Moizi waan ɔ́ sú Zoova

Ezipti lɔ’n, be flɛli Zakɔbu i awlofuɛ mun kɛ Izraɛlifuɛ mun. Kɛ Zakɔbu nin Zozɛfu be wuli’n, Faraɔn uflɛ yɛ ɔ wa sieli Ezipti mɛn’n niɔn. Ɔ buli i kɛ Izraɛlifuɛ’m bé wá ɲán kwlalɛ trá Eziptifuɛ mun. I sɔ’n ti’n, srɛ kunnin i. Ɔ yoli maan Izraɛlifuɛ’m be kacili be kanga. Ɔ miannin be kɛ be kpɛ bliki, yɛ be di junman kekle kpa be fie’m be nun. Ɔ nin i sɔ ngba’n, Izraɛlifuɛ’m be te trɛ. I sɔ’n w’a yoman Faraɔn fɛ. I sɔ’n ti’n, ɔ seli kɛ sɛ Izraɛlifuɛ kun wu ba yasua’n, maan be kun i. Nanwlɛ, srɛ kunnin Izraɛlifuɛ mun dan.

Be flɛ Izraɛli bla kun kɛ Zokebɛdi. Ɔ wuli ba yasua klanman kpa kun. Kɛ ɔ ko yo naan b’a kunman ba’n, ɔ fɛ i sieli i gbogbo kun nun, kpɛkun ɔ fali gbogbo’n ko wlɛli i ijre’m be afiɛn Nili nzue ba’n i nuan lɔ. Be flɛ ba’n i niaan bla’n kɛ Miriamun. Ɔ sali koko lɛ naan ɔ́ nían sa ng’ɔ́ wá jú’n.

Kɛ Faraɔn i wa bla’n bali wunnzinlɛ nzue ba’n nun’n, ɔ wunnin gbogbo’n. Ɔ́ nían gbogbo’n nun-ɔn, ba nɔnman kun yɛ, ɔ su sun. Ba’n yoli i annvɔ. Miriamun usɛli i kɛ: ‘?N ko kunndɛ bla kun naan ɔ wa nian ba’n i lika?’ Kɛ Faraɔn i wa bla’n kplinnin su’n, Miriamun ko flɛli i nin Zokebɛdi. Faraɔn i wa bla’n seli i kɛ: ‘Fa ba nga. Niɛn i lika, ń má tánnin ɔ kalɛ.’

Kɛ ba’n yoli kaklaka kan’n, Zokebɛdi fɛ i ko mannin Faraɔn i wa bla’n. Faraɔn i wa bla’n flɛli i kɛ Moizi, yɛ ɔ tɛli i kɛ i bɔbɔ i klun ba sa. Be tali Moizi kɛ famiɛn ba sa. Ɔ kwla ɲan like kwlaa ng’ɔ klo’n. Sanngɛ i wla w’a fiman Zoova su le. Ɔ si weiin kɛ ɔ ti Izraɛlifuɛ, naan ɔ timan Eziptifuɛ. I sɔ’n ti’n, Zoova yɛ i waan ɔ́ sú i-ɔ.

Kɛ Moizi ɲannin afuɛ ablanan’n (40), ɔ kunndɛli kɛ ɔ́ úkɛ i nvle’n nunfuɛ mun. Cɛn kun’n, ɔ wunnin kɛ Eziptifuɛ kun su bo Izraɛlifuɛ kun. Ɔ maan ɔ finnin Eziptifuɛ’n i like kekle kpa, ɔ kunnin i. Ɔ fɛli i fuɛn’n fiɛli i aunɲan’n nun. Kɛ Faraɔn tili ndɛ sɔ’n, ɔ kunndɛli kɛ ɔ́ kún Moizi. Sanngɛ Moizi wanndi ɔli Madian mɛn’n nun lɔ. Kɛ ɔ ɔli lɔ’n, Zoova niɛnnin i lika.