Ɲrɛnnɛn nsan klikli mun

Eziptifuɛ’m be fali Izraɛlifuɛ mun be kacili be kanga, yɛ be miannin be kɛ be di junman kekle kpa. Zoova sunmannin Moizi nin Aarɔn Faraɔn sin. I waan be ko se i kɛ: ‘Yaci min sran’m be nun naan be wɔ aawlɛ flɛnnɛn’n nun lɔ be ko su min.’ Faraɔn kɛnnin i yasua su kɛ: ‘Min ndɛ nunman Zoova ndɛ nun! Izraɛlifuɛ’m be su tuman be bo.’ I kpa bɔbɔ’n, Faraɔn wa ukali be junman’n su. I sɔ’n ti’n, Zoova tuli i fɔ. ?A si like nga Zoova yoli’n? Ɔ fali ɲrɛnnɛn blu yili i Ezipti mɛn’n su. Zoova seli Moizi kɛ: ‘Faraɔn su faman min ndɛ’n su. Nglɛmun’n, ɔ́ wá kɔ́ Nili nzue ba’n i nuan lɔ. To i lɔ naan se i kɛ, kɛ mɔ w’a yaciman min sran’m be nun’n ti’n, Nili nzue’n wá káci mmoja.’ Kɛ nga Zoova fa kannin’n sa’n, Moizi ɔli. Aarɔn fali kpɔnman’n finnin Nili nzue’n su Faraɔn i ɲrun lɛ. Kpɛkun nzue’n kacili mmoja. Nzue’n wa bɔnnin fiaan kpa, jue’m be wuli, yɛ sran’m b’a kwlá nɔnman Nili nzue’n kun. Sanngɛ Faraɔn w’a manman Izraɛlifuɛ’m be atin kɛ be wɔ.

I cɛn nso su’n, Zoova sunmannin Moizi Faraɔn wun lɔ ekun. I waan ɔ ko se i kɛ: ‘Sɛ w’a yaciman min sran’m be nun’n, klɛ mun bé wá trú Ezipti mɛn’n nun.’ Kɛ Aarɔn mɛnnin i kpɔnman’n su’n, klɛ mun be fiteli. Be truli Ezipti mɛn wunmuan’n nun. Be wluli be sua nin be sua ba mun, ɔ nin be talie’m be nun. Faraɔn seli Moizi kɛ ɔ srɛ Zoova naan ɲrɛnnɛn sɔ’n wie. Ɔ seli kɛ ɔ́ wá yáci Izraɛlifuɛ’m be nun naan be wɔ. Zoova yoli maan klɛ’m be wuli. Eziptifuɛ’m be tiantiannin klɛ’m be nuan. Lika’n bɔnnin kain kpa. Sanngɛ Faraɔn w’a yaciman Izraɛlifuɛ’m be nun.

I sin’n, Zoova seli Moizi kɛ: ‘Maan Aarɔn fɛ i kpɔnman’n fin asiɛ wun, naan ndutre’n kaci wɛntɛnwɛntɛn.’ Kɛ ɔ yoli sɔ cɛ’n, wɛntɛnwɛntɛn mun be fali lika wunmuan’n. Faraɔn i sran wie’m be seli i kɛ: ‘Ɲrɛnnɛn nga fin Ɲanmiɛn.’ Sanngɛ Faraɔn w’a kplinman su kɛ ɔ́ yáci Izraɛlifuɛ’m be nun naan be wɔ.