Susrɛ kun mɔ sin o nun’n

Moizi o Madian mɛn’n nun lɔ w’a di afuɛ ablanan (40). Ɔ jali bla, yɛ ɔ wuli ba mun. Cɛn kun mɔ Moizi níɛn i bua’m be su Sinai oka’n i wun koko lɛ’n, ɔ wunnin abonuan sa kun. Yɛle kɛ sin o susrɛ kun nun, sanngɛ susrɛ’n yraman! Moizi waan ɔ́ kɔ́ lɔ naan ɔ́ kó nían like sɔ’n kpa, kpɛkun ɔ tili sran kun i nɛn susrɛ’n nun lɔ. Sran sɔ’n seli kɛ: ‘Moizi! Nán mantan wa. Yiyi ɔ ngbabua mun, afin lika nga a o nun’n, ɔ ti Ɲanmiɛn liɛ.’ Zoova yɛ ɔ fali ndɛ’n wlali anzi kun i nuan yɛ ɔ kannin-ɔn.

Srɛ kunnin Moizi, i sɔ’n ti’n, ɔ kɛtɛli i ɲrun. Ɲanmiɛn seli i kɛ: ‘N wun Izraɛlifuɛ’m be su afɛ’n. Ń má dé be Eziptifuɛ’m be sa nun, kpɛkun ń fá be ń kɔ́ lika klanman kpa kun nun. Wɔ yɛ á wá fá min sran mun Ezipti mɛn’n nun fíte-ɔ.’ Atrɛkpa’n, sa sɔ’n boli Moizi i nuan.

Moizi usali Ɲanmiɛn kɛ: ‘?Sɛ be usa min kɛ wan yɛ ɔ sunmannin min’n, ń sé sɛ?’ Ɲanmiɛn tɛli i su kɛ: ‘Se be kɛ Zoova m’ɔ ti Abraamun nin Izaaki, ɔ nin Zakɔbu be Ɲanmiɛn’n yɛ ɔ sunmannin wɔ-ɔ.’ Moizi seli kɛ: ‘?Yɛ sɛ be lafiman ndɛ nga n kan’n su’n nin?’ Zoova kleli Moizi kɛ ɔ́ wá úkɛ i. Yɛle kɛ ɔ seli Moizi kɛ ɔ yi kpɔnman m’ɔ o i sa nun’n i ase. Kɛ ɔ yili kpɔnman’n i ase’n, ɔ kacili wuo. Kɛ Moizi trali wuo’n i lua’n, ɔ kacili kpɔnman ekun. Zoova seli i kɛ: ‘Sɛ a yo abonuan sa nga’n, bé wún i wlɛ kɛ min yɛ n sunmannin wɔ-ɔ.’

Moizi seli Ɲanmiɛn kɛ: ‘N siman ijɔ.’ Zoova seli i kɛ: ‘Ń má klé wɔ ndɛ ng’ɔ fata kɛ a kan’n. Yɛ ń fá ɔ niaan bian Aarɔn naan ɔ uka wɔ.’ Kɛ Moizi wunnin i wlɛ kɛ Zoova ɔ́ jrɛ́n i sin’n, ɔ fɛli i yi nin i mma mun, kpɛkun be ɔli Ezipti.