Moizi kloli Ɲanmiɛn nin sran

?KƐ BE SE KƐ SRAN KUN KLO SRAN’N I BO’N YƐLE BENIN? Kɛ sran kun klo sran’n, i awlɛn’n o i su kpa. Ɔ yi i nglo wafa ng’ɔ kan ndɛ kle i wiengu mun’n, ɔ nin like ng’ɔ fa yo be’n i nun. Sɛ wie liɛ bɔbɔ’n, ɔ fata kɛ ɔ klɛn i wun man’n, ɔ sisimɛn i bo lele.

?WAFA SƐ YƐ MOIZI KLELI KƐ Ɔ KLO ƝANMIƐN NIN SRAN ƆN? Moizi kleli kɛ ɔ klo Ɲanmiɛn. ?Ngue ti yɛ e se sɔ ɔ? Maan e wla kpɛn ndɛ nga 1 Zan 5:3 kan’n su kan. I waan: “Nyanmiɛn i klolɛ’n yɛlɛ kɛ e fɛ i ndɛ’n su.” Moizi kloli Ɲanmiɛn ti’n, ɔ fɛli i ndɛ’n su. Like kwlaa nga Ɲanmiɛn seli i kɛ ɔ yo’n, ɔ yoli i kwlaa kpan. Maan ɔ yo Ezipti famiɛn’n mɔ i like yolɛ yo ya’n i ɲrun ndɛ kanlɛ o, annzɛ kpɔnman’n i tinngɛlɛ kan sa ngbɛn ndɛma jenvie’n su’n nin o, Moizi yoli. Nanwlɛ, like nga be seli Moizi kɛ ɔ yo’n, i kekle o, i pɔpɔ o, ɔ “niannin i kwlaa’n su yoli be cɛ, i kun sa w’a ka-man lɛ.”​—Ezipt Lɔ Tulɛ 40:16.

Moizi kleli kɛ ɔ klo i niaan Izraɛlifuɛ mun. Kɛ mɔ be kusu be si kɛ Zoova yɛ ɔ fali Moizi sieli be su’n ti’n, be fa be ndɛ’n kwlaa kɔ i ja su. Biblu’n waan: “Kɛ ɔ fɛ i nglɛmun lele b’ɔ́ fá jú nnɔsua’n, wuun sran wie’m be tɛ minndɛ kɛ Moizi kan be ndɛ liɛ’n.” (Ezipt Lɔ Tulɛ 18:13-16) Amun bu i akunndan be nian! Sran kun mɔ kɛ ɔ fɛ i nglɛmun lele m’ɔ́ fá jú nnɔsua’n, ɔ o sran’m be ndɛ’m be siesielɛ’n su’n, e si kɛ w’a yoman pɔpɔ w’a mɛnmɛn i. Sanngɛ, Moizi tuli i klun dili i niaan’m be ndɛ mun.

Nán i niaan’m be ndɛ ngunmin yɛ ɔ siesieli ɔ. Kɛ m’ɔ klo be’n ti’n, ɔ srɛli Ɲanmiɛn mannin be wie. Be nga be yoli i tɛ bɔbɔ’n, ɔ srɛli Ɲanmiɛn mannin be wie. I wie yɛle kɛ, kɛ Moizi i niaan bla Mari kɛnnin i wun ndɛ tɛ’n, Zoova fali kokowe tali Mari wun. Sɛ ɔ ti sran wie’n, ɔ́ sé kɛ ɔ ti kpa mɛn i’n, sanngɛ Moizi w’a kanman sɔ. Ɔ kali lɛ srɛli Ɲanmiɛn mɛnnin i niaan bla’n. Ɔ seli kɛ: “Ee Anannganman, ń srɛ́ wɔ kpa ti-ɔ, yo i juejue.” (Kalɛ 12:13) ?Sɛ Moizi kloman sran’n, nn ɔ́ yó kɛ ngalɛ’n sa?

WAFA NGA E KWLA NIƐN I AELIƐ’N SU’N: Kɛ Moizi sa’n, maan e kusu e klo Ɲanmiɛn kpa. I sɔ’n sú e bo maan é ‘tú e klun’ é fɛ́ i ndɛ’n su. (1 Piɛr 1:22) Kɛ e tu e klun e fa Zoova i ndɛ’n su’n, i klun jɔ. (Nyanndra Mun 27:11) E kusu e ɲan su wie. I kwlaa yoli o, sɛ e su Ɲanmiɛn klolɛ su’n, é yó sa ng’ɔ ti kpa’n. Sanngɛ nɛ́n ngba ɔ, e bɔbɔ ba’n, e klun jɔ́ wie.​—Jue Mun 100:2.

Wafa kun ekun nga e kwla nian Moizi i ajalɛ’n su’n, yɛle kɛ e klo e wiengu mun yɛ e klɛn e wun man be. Sɛ e janvuɛ annzɛ e osufuɛ wie ba kɛ ɔ́ kókó i yalɛ wie klé e’n, klolɛ mɔ e klo i’n ti’n, (1) é síe e su i nuan bo kpa, (2) é yó kɛ e bɔbɔ yɛ ndɛ sɔ’n w’a ɲan e sa, yɛ (3) é klé i kɛ i ndɛ lo e.

Kɛ Moizi sa’n, maan e srɛ Ɲanmiɛn man e wiengu mun. Wie liɛ’n, ndɛ nga sran’n koko kle e’n, ɔ tra e kpɛn. E kwla koko i e se kɛ: “Ee yako, Ɲanmiɛn kunngba cɛ yɛ n kwla srɛ man ɔ.” Sanngɛ nán e wla fi su. Biblu’n waan: “Sɛ sran kpa kun srɛ like Nyanmiɛn sa nun b’ɔ jran su kpa’n, i srɛlɛ sɔ’n yo sa ye dan.” (Zak 5:16) Wie liɛ’n, e srɛlɛ’n ti yɛ Zoova yó like kun mán sran sɔ’n niɔn. ?Ɔ maan, like benin yɛ e kwla yo e man sran mɔ i kpa tra Ɲanmiɛn srɛlɛ’n niɔn?a

?Amun wunman kɛ Moizi kleli e ajalɛ kpa’n? Kannzɛ ɔ ti sran kɛ e sa’n, sanngɛ ɔ kleli kɛ ɔ lafi Ɲanmiɛn su kpa, ɔ kleli kɛ ɔ ti wun ase kanfuɛ, yɛ ɔ kleli kɛ ɔ klo Ɲanmiɛn nin sran. Sɛ e mian e ɲin e fa Moizi i aeliɛ’n su’n, ɔ́ yó kpa mán e bɔbɔ ɔ nin e wiengu mun.​—Rɔmfuɛ Mun 15:4.

[Ja ngua lɛ ndɛ’n]

[Foto, bue 6]