Zedeɔn kwlali Madianfuɛ mun

Izraɛlifuɛ’m be yacili Zoova i sulɛ ekun, kpɛkun be sɔli amuin mun. I sɔ’n ti’n, Madianfuɛ mun be kleli be yalɛ afuɛ nso. Be wua be nnɛn mun, yɛ be saci be fie’n su ninnge mun. Kɛ ɔ ko yo naan Izraɛlifuɛ mun b’a ɲan be ti’n, be fia yɔbuɛ buɛ mun ɔ nin okaoka lika’m be nun. Ɔ maan be kpan flɛli Zoova. Zoova sunmɛnnin i anzi kun gbanflɛn kun mɔ be flɛ i kɛ Zedeɔn’n i sin. Anzi’n seli Zedeɔn kɛ: ‘Zoova fali wɔ kɛ a yo alɛ kunfuɛ dan kun.’ Zedeɔn usɛli i kɛ: ‘?Ń yó sɛ yɛ ń dé Izraɛlifuɛ mun-ɔn? N timan like fi.’

?Ngue yɛ Zedeɔn yoli naan w’a wun i wlɛ kɛ Zoova fɛli i sakpa-ɔ? Ɔ fali bua kplo mɔ ndrɛ o su’n kun sieli i asiɛ wun, kpɛkun ɔ seli Zoova kɛ: ‘Sɛ nglɛmun’n, bɔlɛ’n lua bua ndrɛ’n naan i wun lɛ asiɛ’n ti wisiwisi’n, ń wún kɛ a fali min sakpa kɛ n de Izraɛlifuɛ mun.’ Kɛ lika’n cɛnnin’n, Zedeɔn wunnin kɛ bua ndrɛ’n ti luawa, sanngɛ i wun lɛ asiɛ’n w’a lualuaman. Ɔ seli Zoova ekun kɛ sɛ aliɛ cɛn’n, maan bɔlɛ’n lualua asiɛ’n i ngunmin naan bua ndrɛ’n ka wisiwisi. Sa sɔ mun be yoli su sɛsɛsɛ. Zedeɔn wunnin i wlɛ kɛ Zoova fɛli i sakpa. I sɔ’n ti’n, ɔ fɛli i sonja mun naan be nin Madianfuɛ mun be ko kun.

Zoova seli Zedeɔn kɛ: ‘Ń má yó maan Izraɛlifuɛ’m bé kwlá. Sanngɛ kɛ mɔ ɔ sonja mun be sɔnnin’n ti’n, amun kwla bu i kɛ i sɔ’n ti yɛ amun kwlali-ɔ. Se ɔ sonja mun kɛ be nga srɛ kun be’n, maan be sa be sin.’ Be nun sran akpiakpi ablaɔn- nin-nɲɔn (22.000) be sali be sin. Yɛ be kali sran akpiakpi blu (10.000). Zoova seli kɛ: ‘Ɔ sonja mun be te sɔn. Fa be kɔ nzue’n nuan lɔ naan se be kɛ be nɔn nzue. Be nga kɛ bé nɔ́n nzue’n be niannian sɛ be kpɔfuɛ mun be su ba’n, fɛ i sɔfuɛ mun.’ Sran ya nsan (300) yɛ kɛ bé nɔ́n nzue’n be niannin be wun su-ɔ. Zoova seli kɛ sran sɔ mun yɛ bé kwlá Madian sonja akpiakpi ya akpiakpi ablasan-nin-nnun (135.000) mun-ɔn.

Cɛn sɔ’n nun kɔnguɛ’n, Zoova seli Zedeɔn kɛ: ‘Siɛn’n, amun wɔ naan amun nin Madianfuɛ’m be ko kun.’ Zedeɔn fali awɛ nin sɛ dandan wie mun fa mɛnnin i sonja mun sɛsɛsɛ. Tɛ o sɛ sɔ’m be nun. Ɔ seli be kɛ: ‘Amun nian like nga n yo’n su naan amun yo wie.’ Zedeɔn fitali i awɛ’n nun, ɔ boli sɛ’n, ɔ totoli i tɛ’n, kpɛkun ɔ kpan seli kɛ: ‘Zoova nin Zedeɔn be tokofi’n!’ I sonja ya nsan mun (300) be kwlaa be yoli sɔ wie. Srɛ kunnin Madianfuɛ mun. I sɔ’n ti’n, be kwlaa be bo sanndili. Lika’n sanngannin dan. Ɔ maan Madianfuɛ’m be kunnin be wiengu. Zoova ukali Izraɛlifuɛ mun maan be kwlali be kpɔfuɛ mun ekun.