Zoova ti e janvuɛ kpafuɛ’n
“Nyanmiɛn flɛli [Abraamu] i janvuɛ.”—ZAK 2:23.
?WAFA SƐ YƐ AMÚN TƐ́ KOSAN’M BE SU Ɔ?
?Ngue ti yɛ Zoova ti e janvuɛ kpafuɛ’n niɔn?
?Sɛ e kunndɛ kɛ é yó Zoova i janvuɛ’n, Jue Mun 15:3, 5 waan nzuɛn benin yɛ ɔ fata kɛ e fa ɔ?
?Ngue yɛ ɔ kwla uka e naan y’a kan e klun ndɛ y’a kle e Janvuɛ kpafuɛ’n niɔn?
1. ?Kɛ mɔ Ɲanmiɛn yili e kɛ i bɔbɔ sa ti’n, ngue yɛ e kwla yo ɔ?
BLƐ sunman kɛ be waan bé kán ba kun mɔ fɛ i si i’n i ndɛ’n, be se kɛ: “A simɛn i si’n niɛn i bɔbɔ.” Sɛ be kan sɔ’n i su ɔ. Afin i kwlaa yoli o, ba kwlaa fɛ i si nin i nin be nzuɛn’n nin be sran waka’n. Zoova ti e Si m’ɔ o ɲanmiɛn su lɔ’n. I yɛ ɔ mannin e nguan ɔn. (Jue. 36:10) Kɛ m’ɔ yili e kɛ i bɔbɔ sa’n ti’n, e kwla fɛ i nzuɛn’n. Ɔ maan e kwla bu akunndan, e kwla fa ajalɛ, yɛ e kwla tra janvuɛ.—Bob. 1:26.
2. ?Ngue ti yɛ Zoova ti e janvuɛ kpafuɛ’n niɔn?
2 Zoova ti e janvuɛ kpafuɛ’n. Afin ɔ klo e, yɛ e lafi ɔ nin i Wa’n be su. Zezi seli kɛ: “Nyanmiɛn kloli mɛn’n lele ɔ fɛ i Wa kunngba cɛ’n mannin naan sran kwlaa ng’ɔ lafi i su’n w’a mlin-man, sanngɛ ɔ nyan anannganman nguan.” (Zan 3:16) Sran kpanngban be nin Zoova be trali janvuɛ, yɛ be nin i be afiɛn mantannin kpa. Maan e kan be nun nɲɔn be ndɛ naan e nian wafa nga e kwla fa be ajalɛ’n su.
“MIN JANVUƐ ABRAAM”
3, 4. ?Abraamu nin Zoova be janvuɛ tralɛ’n nun’n, ngue yɛ Abraamu yoli mɔ i osu’n nunfuɛ’m b’a yoman ɔn?
3 Cɛn kun mɔ Zoova kán ndɛ’n, ɔ boli Abraamu dunman. Ɔ seli kɛ: “Min janvuɛ Abraam.” (Eza. 41:8) Be Nyoliɛ fluwa’n i nɲɔn su’n i ndɛ tre 20 i ndɛ mma 7 flɛ Abraamu kɛ Ɲanmiɛn i janvuɛ. ?Ngue yɛ maan Abraamu nin i Yifuɛ’n be janvuɛ’n kwla trali kpa sɔ ɔ? Ɲanmiɛn su mɔ Abraamu lafili ti ɔ.—Bob. 15:6; an kanngan Zak 2:21-23 nun.
4 Izraɛlifuɛ mɔ be ti Abraamu i osu’n nunfuɛ’n, Zoova yoli be Si nin be Janvuɛ. Sanngɛ kɛ ɔ juli i ɲrun’n, be janvuɛ’n wa sacili. Afin b’a lafiman nda nga Zoova tali’n, be su kun.
5, 6. (a) ?Wafa sɛ yɛ e nin Zoova e trali janvuɛ ɔ? (b) ?Kosan benin mun yɛ ɔ fata kɛ e tinuntinun e fa usa e wun ɔn?
5 Kɛ é sí Zoova’n, nn é láfi i su kpa trá laa’n, nn é kló i’n kpa ekun. Kɛ e boli Biblu’n nun like suanlɛ bo’n, maan e wla kpɛn like nga e suannin’n i su kan e nian. E wunnin kɛ Zoova o lɛ sakpa, naan e nin i e kwla tra janvuɛ kpa. Asa ekun’n, e wunnin i wlɛ kɛ ɲin kekle mɔ Adam yoli’n ti’n, e nin sa tɛ yolɛ’n fin e nin klun. Asa kusu’n, e wunnin i wlɛ kɛ klɔ sran’m be nin Ɲanmiɛn be afiɛn mantanman kun. (Kol. 1:21) I sin’n, e wunnin i wlɛ kɛ e Si Ɲanmiɛn m’ɔ o nglo lɔ’n, ɔ nin e nun wie fi nunman mmua, naan e ndɛ lo i. Yɛ e wa sili kɛ ɔ fɛli i Wa’n yili e ti tɛ. E lafili tɛ sɔ’n su. Kɛ ɔ fɛ i lɛ’n, yɛ e nin Ɲanmiɛn e janvuɛ tralɛ’n boli i bo ɔ.
6 Kɛ e bu i kwlaa sɔ’n i akunndan’n, ɔ fata kɛ e tinuntinun e usa e wun kɛ: ‘?Min nin Zoova e afiɛn ti sɛ andɛ? ?E janvuɛ’n su tra kpa trá laa’n? ?Kɛ aliɛ cɛ́n m’ɔ́ sán’n, nn ń láfi Zoova su kpa, nn ń kló i tankaan kpa?’ Laa sran kun ekun m’ɔ nin Zoova be janvuɛ’n trali kpa’n yɛle Zedeɔn. Maan e kɛn i ndɛ kan naan e wun wafa nga e kwla niɛn i ajalɛ’n su’n.
“ANANNGANMAN TI AUNJUƐ”
7-9. (a) ?Sa benin yɛ Zedeɔn wunnin i m’ɔ ti i liɛ ngunmin ɔn? ?Kɛ ɔ wunnin sa sɔ’n, i bo guali sɛ? (An nian desɛn ng’ɔ o kan like suanlɛ’n bo i bo lɛ’n.) (b) ?É yó sɛ naan e nin Zoova e janvuɛ’n w’a tra kpa?
7 Jɔlɛ difuɛ Zedeɔn blɛ su’n, lika’n yoli kekle kpa Izraɛlifuɛ’m be su. Kɛ ɔ́ yó sɔ nn be o mɛn nga Zoova tali nda kɛ ɔ́ fá mán be’n i nun. Blɛ sɔ nun’n, Madianfuɛ’m be kleman be yalɛ aɔwi. I sɔ’n ti’n, Zedeɔn fia yɛ ɔ bo i ble’n niɔn. Ɔ bo i viɲi mma cuɛnwlɛ’n nun lɔ. I liɛ’n ɔ kwla fɛ i ble mma kpakpa mun fia Madianfuɛ’m be ɲrun ndɛndɛ. Jɔlɛ Difuɛ Mun ndɛ tre 6 se kɛ le kun’n, anzi kun fiteli Zedeɔn ɲrun Ofra lɔ. Ɔ flɛli Zedeɔn kɛ “safunyrɛn.” I sɔ’n boli Zedeɔn nuan kpa. Afin kannzɛ Zedeɔn si kɛ Zoova deli i nvle’n Eziptifuɛ’m be sa nun’n, sanngɛ ɔ lafiman su kpa kɛ ɔ́ kwlá dé be Madianfuɛ’m be sa nun. I sɔ’n ti, anzi sɔ m’ɔ ijɔ Zoova nuan’n, ɔ guali Zedeɔn i awlɛn su nzue. Ɔ seli i kɛ Zoova wá úkɛ i naan ɔ́ kwlá Madianfuɛ mun.
8 Zedeɔn usali anzi’n kɛ i bɔbɔ Zedeɔn’n, ‘ɔ́ kwlá dé Izraɛli nvle’n Madianfuɛ’m be sa nun.’ Zoova tɛli i su weinwein. Ɔ seli i kɛ: “Ń wá jrán ɔ sin, á wá kwlá Madianfuɛ mun kɛ sran kunngba yɛ a nin i be su kun sa.” (Jɔl. 6:11-16) Sanngɛ Zedeɔn seli Zoova kɛ ɔ kle i nzɔliɛ kun. Atrɛkpa’n, kɛ m’ɔ nin a wunman wafa ng’ɔ́ kwlá dé Izraɛlifuɛ mun’n, i ti yɛ ɔ seli sɔ ɔ. Maan e sie i nzɔliɛ kɛ, be yalɛ kokolɛ’n sɔ’n kle weiin kɛ Zedeɔn si kpa kɛ Zoova o lɛ sakpa.
9 Zedeɔn ko tɔnnin aliɛ blɛli anzi’n. I sin’n, anzi’n yili atrɛ kun. Ɔ fali i sa nun kpɔnman’n kannin aliɛ’n, kpɛkun sin fiteli yrali aliɛ’n. Zedeɔn wa sili kɛ kannzu Zoova yɛ ɔ sunmannin anzi sɔ’n niɔn. I ti srɛ kunnin i kpa. Ɔ kpan seli kɛ: “M’an wu o! Anannganman Nyanmiɛn Kpli! Wunlɛ nga m’an fa min nyinma m’an wun Anannganman i Anz’n yɛ’n, min liɛ a wie.” (Jɔl. 6:17-22) ?Sa ng’ɔ juli lɛ’n kpɛli ce yili Zedeɔn nin Zoova be afiɛn? Cɛcɛ. Aunjuɛ bɔɔ li yɛ ɔ wa trannin ɔ nin Zoova be afiɛn ɔn. Sa ti mɔ e se sɔ’n yɛle kɛ, Zedeɔn kplannin tɛ yiwlɛ kun mannin Zoova naan w’a tɔn i dunman kɛ: “Anannganman Ti Aunjuɛ.” Nanwlɛ, sa ng’ɔ juli lɛ’n ti’n, Zedeɔn wa lafili Zoova su kpa, yɛ ɔ nin i be afiɛn wa mantannin kpa ekun. (An kanngan Jɔlɛ Difuɛ Mun 6:23, 24 nun.) Kɛ e bu like nga Zoova yo man e aliɛ ba kwlaa nun’n i akunndan’n, e wun i wlɛ kpa kɛ ɔ ti e janvuɛ sakpa. Blɛ kwlaa nga e nin i e koko yalɛ’n, e wun jɔ e fɔun. Kpɛkun, e nin i e afiɛn’n mantan kpa ekun.
‘?WAN CƐ YƐ Ɔ KWLA TRAN ANANNGANMAN SUA’N NUN ƆN?’
10. ?Sɛ e kunndɛ kɛ é yó Zoova i janvuɛ’n, Jue Mun 15:3, 5 waan nzuɛn benin mun yɛ ɔ fata kɛ e fa ɔ?
10 Sɛ e kunndɛ kɛ é yó Zoova i janvuɛ’n, ɔ fata kɛ e yi nzuɛn wie’m be nglo. Jue Mun 15 nun’n, Davidi kannin nzuɛn sɔ’m be ndɛ. I waan sɛ e yi nzuɛn sɔ’m be nglo’n, yɛ é ‘kwlá trán Anannganman i sua’n nun ɔn.’ Yɛle kɛ é kwlá yó Zoova i janvuɛ. (Jue. 15:1) Maan e kan nzuɛn sɔ’m be nun nɲɔn be ndɛ. Kun yɛle kɛ nán e tɔn sran suɛn. I nɲɔn su’n yɛle kɛ, maan e di nanwlɛ sa kwlaa nun. Davidi seli kɛ sran nga Zoova fɛ i yo i janvuɛ’n, “ɔ tɔn-mɛn i wiengu suɛn. [...] Sɛ be waan bé cɛ́ i like naan ɔ tɔn sran nga w’a yoman sa’n i suɛn’n, ɔ kplin-man su.”—Jue. 15:3, 5.
11. ?Ngue ti yɛ ɔ fataman kɛ e tɔn sran suɛn ɔn?
11 Jue uflɛ nun’n, Davidi wlali e su nun kɛ ‘nán maan e ijɔ tɛtɛ.’ (Jue. 34:14) Sɛ e fɛmɛn i afɔtuɛ sɔ’n su’n, e nin e Si m’ɔ o ɲanmiɛn su lɔ’n e janvuɛ’n sáci. Afin sran suɛn tɔnlɛ’n ti Zoova i kpɔfuɛ danfuɛ’n mɔ yɛle mmusu’m be si Satan’n i nzuɛn. I sɔ’n ti, kɛ é kán ndɛ é klé e wiengu annzɛ é kán sran wie ndɛ’n, nán maan e ijɔ tɛtɛ. I liɛ’n, e nin Zoova e afiɛn mántan kpa titi. Be nga kɛ é kán be ndɛ’n, ɔ fata kɛ e nian e wun su kpa naan y’a ijɔman tɛtɛ’n, yɛle be nga Zoova sieli be kpɛnngbɛn asɔnun nun’n.—An kanngan Ebre Mun 13:17 nin 1 Tɛsalonikfuɛ Mun 5:12 nun.
12, 13. (a) ?Ngue ti yɛ ɔ fata kɛ sa kwlaa nun’n, e di nanwlɛ ɔ? (b) ?Kɛ e di nanwlɛ’n, ngue yɛ sran’m be yo ɔ?
12 Like kun mɔ be fa sie Zoova i sufuɛ’m be nzɔliɛ’n yɛle kɛ be ti nanwlɛfuɛ, be diman sran lufle. Akoto Pɔlu seli kɛ: “An srɛ Nyanmiɛn titi kɛ ɔ nian e su. E si e klun lɔ weiin kɛ y’a yo-man sa fi, afin sa’n kwlaa nun e klo kɛ é yó sa ng’ɔ ti kpa’n.” (Ebr. 13:18) Kɛ mɔ “sa’n kwlaa nun e klo kɛ é yó sa ng’ɔ ti kpa’n” ti’n, ɔ wie e niaan Klistfuɛ mun bɔbɔ’n, e diman be lufle. I wie yɛle kɛ sɛ be nun wie’m be di junman e sa nun’n, e nin be e yo ninnge mun i nuan su sɛsɛsɛ. Kpɛkun kalɛ nga e nuan sɛli su kɛ é fá tánnin be’n, e fa tannin be. Sɛ kusu e bɔbɔ yɛ e di junman e niaan Klistfuɛ kun sa nun’n, e seman kɛ, kɛ m’ɔ ti e niaan’n ti’n, ɔ fata kɛ ɔ yo e sa, annzɛ ɔ yo e sa.
13 Kɛ mɔ Zoova i Lalofuɛ’m be ti nanwlɛfuɛ’n ti’n, kpɛ sunman sran’m be yi be ayɛ. I sɔ yɛ bian kun m’ɔ ti susute dan kun i su min’n, ɔ yoli ɔ. Bian sɔ’n sieli i nzɔliɛ kɛ Zoova i Lalofuɛ’m be yo ndɛ nga be kan’n i nuan su sa. I osu ti’n, ɔ seli be kɛ: “Kɛ amun nin sran kun amun nuan ko sɛ ndɛ kun su’n, amun kaciman amun nuan kun.” (Jue. 15:4) Nanwlɛ, kɛ e yo sɔ’n e nin Zoova e janvuɛ’n tra kpa titi. Kpɛkun, i m’ɔ klo e m’ɔ ti e Si m’ɔ o ɲanmiɛn su lɔ’n, i dunman’n fu.
MAAN E UKA SRAN MUN NAAN BE YO ZOOVA I JANVUƐ
14, 15. ?Kɛ é bó jasin fɛ’n, ngue yɛ e kwla yo naan sran’m b’a kaci Zoova i janvuɛ ɔ?
14 Kɛ é bó jasin fɛ’n, be nga e to be’n, be nun kpanngban be lafi su kɛ Ɲanmiɛn o lɛ. Sanngɛ be bumɛn i kɛ ɔ kwla yo be janvuɛ kpafuɛ’n. ?Wafa sɛ yɛ e kwla uka be ɔ? Kɛ Zezi sunmannin i sɔnnzɔnfuɛ wie mun nɲɔnnɲɔn kɛ be ko bo jasin fɛ’n, maan e sie ndɛ ng’ɔ kan kleli be’n i nzɔliɛ. Ɔ seli be kɛ: “Awlo kwlaa nga an wlu nun’n, kɛ an wlu lɔ cɛ’n, an yo be like se kɛ: ‘Maan alaje tran awlo nga nun!’ Sɛ sran wɛtɛɛfuɛ wie o awlo sɔ nun’n, maan ɔ nyan alaje, sanngɛ sɛ i sɔfuɛ nun-man lɛ’n, nán maan amun nuan yralɛ’n yo ye.” (Lik 10:5, 6) Kɛ e to sran mun mɔ e nin be e yo kɛ sran kun nin i janvuɛ sa’n, be kwla kunndɛ kɛ bé tíe jasin fɛ’n. Be nga be kloman e sa bɔbɔ’n, sɛ e to be’n maan e yo sɔ wie. I liɛ’n be kwla gua be ya’n i ase. Kpɛkun blɛ uflɛ nun’n, be kwla sɔ e nun klanman.
15 Kɛ é bó jasin fɛ’n, e to be nga b’a fa be wun b’a wla Ɲanmiɛn sulɛ wafa nga be timan su’n be nun kpa’n, annzɛ Ɲanmiɛn sulɛ wafa sɔ’m be ninnge yolɛ’n su yɛ be di’n. Maan e nin be e yo kɛ sran nin i janvuɛ sa wie. E aɲia’m be bo lɔ kusu’n, maan e sɔ sran kwlaa nun klanman. Be nga mɛn’n nun sa’m b’a bo be wla’n, ɔ nin be nga be kunndɛ kɛ bé súan e Ɲanmiɛn’n i su like kpa ekun’n, yɛ ɔ fata kɛ e sɔ be nun kpa bɔbɔ ɔ. Fluwa Sasafuɛ Tranwlɛ’n kan sran sɔ’m be nun kpanngban be ndɛ. E kwla wun be su ndɛ ndɛ akpasua nga be flɛ i blɔfuɛ nun kɛ “ La Bible transforme des vies ” i nun.
E NIN E JANVUƐ KPA’N E DI JUNMAN LIKAWLƐ
16. Zoova ti e janvuɛ yɛ ‘e nin i e di junman.’ An yiyi nun.
16 Blɛ sunman nun’n, sran nga be di junman likawlɛ’n, be tra janvuɛ. Yɛ be afiɛn mantan kpa. E kwlaa nga e fali e wun mannin Zoova’n, e cenjele like yɛle kɛ e ti i janvuɛ. Sanngɛ nɛ́n i ngba ɔ. ‘E nin i yɛ e di junman ɔn.’ (An kanngan 1 Korɛntfuɛ Mun 3:9 nun.) Kɛ é bó jasin fɛ’n mɔ é úka sran mun naan be kaci Zezi i sɔnnzɔnfuɛ’n, e si e Si m’ɔ o ɲanmiɛn su lɔ’n i nzuɛn m’ɔ yo ɲɛnmɛn’n i kpa ekun. Asa ekun’n, e wun wafa ng’ɔ fɛ i wawɛ’n uka e naan y’a kwla bo jasin fɛ’n.
17. E aɲia dandan’m be kle kɛ Zoova ti e janvuɛ. Amun yiyi nun.
17 Kɛ é bó jasin fɛ’n é kɔ́’n, nn e nin Zoova e afiɛn’n mántan kpa ekun. E wun kɛ be nga be kloman e sa’n, mɔ be waan bé jrán jasin fɛ’n bolɛ junman’n, Zoova manman be atin. Asa ekun’n, e aɲia’m be bo’n, Zoova kle e atin. Yɛ e fluwa nga be yiyi Biblu’n nun’n be nun’n, ɔ kle e atin wie. I kwlaa sɔ’n yo e ɲɛnmɛn dan. Ndɛ nga be yiyi nun e aɲia dandan’m be bo’n, be kle weiin kpa kɛ Zoova si e su sa mun ɔ nin ninnge nga be mian e sa’n. Kɛ aɲia dan kun wieli’n, awlobo kun i nunfuɛ’m be klɛli fluwa ko mannin Betɛli’n. Fluwa sɔ nun’n, be seli kɛ: “Ndɛ nga be yiyili be nun aɲia’n i bo lɔ’n, be wluwluli e wun dan. E wunnin kɛ Zoova klo e tinuntinun kpa, naan ɔ kunndɛ kɛ e liɛ yo ye.” Aniaan kun nin i yi be ti Alemaɲi lɔfuɛ. Cɛn kun be ɔli cɛn ngunmin kun aɲia kun i bo Irlandi lɔ klɔ nga be flɛ i Dublin i su lɔ. Kɛ aɲia’n wieli’n, be klɛli Betɛli’n i fluwa. Be kannin wafa nga aniaan’m be sɔli be nun mɔ be niannin be lika klanman’n i ndɛ. Be lali aniaan’m be ase. Kpɛkun be seli kɛ: “Asenna’n i danfuɛ’n ti Zoova nin Famiɛn Zezi Klist be liɛ. Afin be dunman nun ti’n, e o sran akpasua kun mɔ be bo ti kun’n be nun wie. Nán bo kun yolɛ’n i ndɛ ngbɛn sa yɛ e kan ɔn. Sanngɛ aliɛ ba kwlaa nun’n, e wun kɛ e bo ti kun sakpa. E wla su fiman cɛn ngunmin kun aɲia nga e yoli i Dublin lɔ’n i su le. É wlá kpɛ́n su titi kɛ Zoova i sulɛ nga e nin amun e su i likawlɛ’n, ɔ ti e cenjele like dan.”
JANVUƐ’M BE KOKO YALƐ
18. ?E nin Zoova e yalɛ kokolɛ’n i su kosan benin mun yɛ ɔ fata kɛ e fa usa e wun ɔn?
18 Kɛ janvuɛ’m be koko yalɛ kpa titi’n, be afiɛn mantan kpa ekun. Andɛ’n, sran’m be nin be janvuɛ’m be ta yalɛ koko ɛntɛnɛti su. Wie liɛ kusu be klɛ be wiengu fluwa selilɛli nun. ?Yɛ e mɔ Zoova ti e janvuɛ kpa’n nin? ?E fa blɛ e nin i e koko yalɛ? ?E tɛ i sɔ yo? Nán e wla fi su kɛ ‘sɛ be srɛ i’n, ɔ ti.’—Jue. 65:3.
19. ?Sɛ ɔ ti kekle man e kɛ e kan e klun ndɛ e kle Zoova’n, ngue yɛ ɔ kwla uka e ɔ?
19 Zoova i sufuɛ wie’m be o lɛ’n, kɛ ɔ yo naan be kan be klun ndɛ kle sran’n, ɔ timan pɔpɔ be sa nun. Sanngɛ i sɔ yɛ Zoova kunndɛ kɛ, kɛ é srɛ́ i’n, e yo ɔ. (Jue. 119:145; Ngw. 3:41) Sɛ i sɔ yolɛ timan pɔpɔ e sa nun’n, maan e si kɛ e le ukafuɛ. Akoto Pɔlu klɛli Rɔmu lɔ Klistfuɛ’m be fluwa kɛ: “E si-man like nga e srɛ Nyanmiɛn kɛ ɔ fa man e b’ɔ ti i su’n. I Wawɛ’n bɔbɔ oto, ɔ jran e nuan ɔ srɛ i man ye. Nyanmiɛn b’ɔ si sran’m be anwlɛn nun’n, ɔ si akunndan ng’ɔ o i Wawɛ’n i klun’n, afin like nga Nyanmiɛn klo’n yɛ i Wawɛ’n srɛ man be nga be ti i liɛ mun-ɔn.” (Rɔm. 8:26, 27) Sɛ e kanngan Biblu’n nun fluwa kɛ Zɔb nin Jue Mun, ɔ nin Nyanndra Mun sa’n be nun’n, e kwla wun wafa nga é kán e klun ndɛ é klé Zoova’n.
20, 21. ?Ngue yɛ ndɛ nga Pɔlu kɛnnin i Filipfuɛ Mun 4:6 nun’n, ɔ kle e ɔ?
20 Sɛ sa kekle kpa tɔ e su’n, maan e wla kpɛn ndɛ yɛ’n mɔ Pɔlu kan kleli Filipufuɛ mun’n i su. Ɔ seli be kɛ: “Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase.” Kɛ e srɛ Ɲanmiɛn kɛ ngalɛ sa’n, e wun e wun fɛ. Afin Pɔlu kan guali su kɛ: “Amún wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su bo-man, yɛ amun akunndan su sanngan-man sran wunmuan bɔ amun nin Krist-Jésus ti’n ti.” (Fil. 4:6, 7) E wun mɔ Ɲanmiɛn maan ‘ɔ jɔ e fɔuun’ mɔ i ti e wla boman yɛ e akunndan sannganman ti’n, maan e la Ɲanmiɛn ase titi.
21 Kɛ e srɛ Ɲanmiɛn titi’n, e nin i e janvuɛ’n w’a tra kpa. I sɔ’n ti’n, maan ‘e koko yalɛ kle Nyanmiɛn titi, nán e yaci.’ (1 Tɛs. 5:17) É srɛ́ kɛ like suanlɛ nga uka e naan e nin Ɲanmiɛn e janvuɛ’n tra tankaan kpa ekun. Naan e nzuɛn’n yo kɛ Ɲanmiɛn fa klo’n sa. Maan e fa blɛ e bu ninnge kpakpa ng’ɔ yo man e’n be su akunndan. Sa nga ti yɛ ɔ yo ninnge sɔ mun man e’n yɛle kɛ ɔ ti e Si, e Ɲanmiɛn nin e Janvuɛ.