Davidi nin Saili

Kɛ Davidi kunnin Goliati’n, Famiɛn Saili fɛ i sieli i sonja mun be su kpɛn. Davidi ɲannin kwlalɛ alɛ kpanngban nun. I sɔ’n ti’n, i dunman’n fuli kpa. Blɛ kwlaa nga Davidi kɔ alɛ kunlɛ m’ɔ ba’n, bla’m be fite, be si able, yɛ be to jue be se kɛ: ‘Saili kunnin sran akpi (1.000) tra su, yɛ Davidi kusu kunnin sran akpi blu (10.000) tra su!’ I sɔ’n ti’n, Saili i ɲin cili Davidi, yɛ ɔ kunndɛli kɛ ɔ́ kún i.

Davidi si jru bo kpa. Cɛn kun m’ɔ́ bó jru Famiɛn Saili i ɲrun’n, Saili fɛli i cua’n fa toli i wun. Davidi ciɛli i wun, kpɛkun cua’n wɔli talɛ’n. Kɛ ɔ yoli sɔ’n, Saili yoli ninnge fanunfanun ekun naan ɔ́ kún Davidi. I sɔ’n ti’n, Davidi wanndili ko fiali aawlɛ flɛnnɛn’n nun lɔ.

Saili fali sonja akpi nsan (3.000), kpɛkun be ɔli Davidi i kunndɛlɛ. Cɛn kun’n, Saili ko wluli yɔbuɛ buɛ kun nun. Kannzu Davidi nin i sran mun be fia yɔbuɛ buɛ sɔ’n nun. Yɛ Davidi i sran mun be seli i blɛlɛ kɛ: ‘Sɛ w’a kunman Saili’n, a su ɲɛnmɛn i kun.’ Davidi wunngeli Saili i wun lɔ blɛlɛlɛ, kpɛkun ɔ kpɛli i tralɛ’n i bue. Saili w’a wunman nun. I sin’n, Davidi i klun titili i. Afin i ɲin w’a yiman sran mɔ Zoova sieli i famiɛn’n. Davidi w’a kplinman su kɛ i sran’m be yo Saili i like yaya. I kpa bɔbɔ’n, ɔ kpan flɛli Saili seli i kɛ, sɛ i waan ɔ́ kún i’n, nn ɔ kunnin i. ?Sanngɛ Saili yacili Davidi i yalɛ klelɛ?

Cɛcɛ. Saili kunndɛli titi kɛ ɔ́ kún Davidi. Cɛn kun kɔnguɛ’n, Davidi nin i niaan wa Abisai be ɔli lika nga Saili nin i sonja mun be o lɔ’n nun. Kɛ ɔ́ yó sɔ’n, nn Abnɛɛ m’ɔ nian Saili su’n, i kusu su lafi. Abisai seli kɛ: ‘Andɛ y’a ɲɛn i! Jran maan n kun i ke!’ Davidi tɛli i su kɛ: ‘Maan Zoova bɔbɔ nin Saili be kan. Maan e fɛ i cua’n nin i nzue towa’n be ngunmin naan e wɔ.’

Davidi fuli oka kun m’ɔ mantan lika nga Saili nin i sonja’m be o lɛ’n su. Kpɛkun ɔ kpan seli kɛ: ‘?Abnɛɛ, ngue ti yɛ a sasaman ɔ famiɛn’n niɔn? ?Saili i cua’n nin i nzue towa’n be o nin?’ Kɛ Saili tili sran’n i nɛn’n, ɔ wunnin i wlɛ kɛ Davidi-ɔ. I sɔ’n ti’n, ɔ seli kɛ: ‘Sɛ ɔ waan á kún min’n, nn a kunnin min. N si kɛ wɔ yɛ á wá yó Izraɛli famiɛn’n niɔn.’ Saili sɛli i sin i awlo. Kannzɛ bɔbɔ Saili kpɔ Davidi’n, sanngɛ Saili i awlofuɛ’m be ngba be kpɔmɛn i.