Zezi fali Sɔlu yoli i sɔnnzɔnfuɛ

Sɔlu ti Rɔmunfuɛ. Be wuli i Tasi lɔ. Laa’n, ɔ ti Farizifuɛ. Ɔ si Zifu’m be Mmla’n kpa, yɛ ɔ kpɔ Klisifuɛ mun. Ɔ kɔ Klisifuɛ’m be awlo’m be nun, ɔ tra be kwlakwla, i yasua-o, i bla-o, kpɛkun ɔ wla be bisua. I kpa bɔbɔ’n, kɛ sran’m bé fínfín Etiɛnin i yɔbuɛ’n, ɔ jin be wun lɛ yɛ ɔ nian be-ɔ.

Sɔlu tra Klisifuɛ mun Zerizalɛmun lɛ. Sanngɛ i waan ɔ́ kɔ́ lika uflɛ naan ɔ́ kó trá Klisifuɛ nga be o lɔ’n be wie. I sɔ’n ti’n, ɔ seli Ɲanmiɛn ɲrun jranfuɛ dan’n kɛ ɔ mɛn i atin naan ɔ wɔ Damasi ko tra Klisifuɛ nga be o lɔ’n mun wie. Kɛ ɔ́ wá mántan klɔ’n, ɲanmiɛn su lɔ’n kpajali piaa guɛli i su, kpɛkun ɔ finnin ase. Ɔ tili sran kun nɛn. Sran sɔ’n seli kɛ: ‘?Sɔlu, ngue ti yɛ a kle min yalɛ-ɔ?’ Yɛ Sɔlu usali kɛ: ‘?Wan yɛle wɔ?’ Sran’n tɛli su kɛ: ‘N bɔbɔ min Zezi-ɔ. Kɔ Damasi naan be kle wɔ like ng’ɔ fata kɛ a yo’n.’ Sɔlu i ɲinma sili. I sɔ’n ti’n, be trɛli i sa’n yɛ be fɛ i wluli klɔ’n nun-ɔn.

Klisifuɛ nanwlɛfuɛ kun o Damasi lɔ’n, be flɛ i Ananiasi. Aolia nun’n, Zezi seli i kɛ: ‘Fa atin nga be flɛ i Trele’n su naan kɔ Zida i awlo lɔ. Sɛ a ju lɔ’n, usa bian nga be flɛ i Sɔlu’n i osu.’ Ananiasi seli kɛ: ‘Min Min, n si bian sɔ’n i su ndɛ. Ɔ wla ɔ sɔnnzɔnfuɛ’m be bisua.’ Sanngɛ Zezi seli i kɛ: ‘Kɔ i sin. M’an fɛ i kɛ ɔ bo jasin fɛ’n kle nvlenvle’m be nunfuɛ mun.’

Kɛ Ananiasi wunnin Sɔlu’n, ɔ seli i kɛ: ‘Min niaan Sɔlu, Zezi sunmannin min ɔ sin naan n ma tike ɔ ɲinma’n.’ Be ja nun lɛ’n, Sɔlu wunnin ase ekun. Ɔ suannin Zezi i su like, kpɛkun ɔ kacili i sɔnnzɔnfuɛ. Kɛ be yoli i batɛmun’n, ɔ nin i wiengu Klisifuɛ’m be boli jasin fɛ’n Ɲanmiɛn sulɛ sua’m be nun. Kɛ Zifu’m be wunnin kɛ Sɔlu su kan Zezi i ndɛ’n, i sɔ’n yoli be ya kpa. Be seli kɛ: ‘?Nán bian nga yɛ laa’n, ɔ wla Zezi i sɔnnzɔnfuɛ’m be bisua’n niɔn?’

Sɔlu boli jasin fɛ’n afuɛ lele nsan Damasi lɔ. Zifu’m be kpɔ Sɔlu. I sɔ’n ti’n, be buli i kunlɛ akunndan. Kɛ aniaan’m be tili ndɛ sɔ’n nun’n, be ukali Sɔlu naan w’a kwla fite nun. Be fɛ i sieli gbogbo kun nun, kpɛkun be fɛ i sinnin klɔ’n i wun talɛ’n i toklo kun nun, kpɛkun be jrɛli i asiɛ wun lɔ.

Kɛ Sɔlu juli Zerizalɛmun lɔ’n, ɔ kunndɛli kɛ ɔ́ fɛ́ i wun mántan aniaan mun. Sanngɛ aniaan’m be sro i. Zezi i sɔnnzɔnfuɛ kun mɔ be flɛ i Baanabasi’n, ɔ fali Sɔlu ɔli akoto’m be wun lɔ. Ɔ seli be kɛ Sɔlu w’a kaci. Sɔlu nin asɔnun ng’ɔ o Zerizalɛmun lɔ’n i nunfuɛ’m be boli jasin fɛ’n juejue su. I sin’n, be wa flɛli i kɛ Pɔlu.