Zoova i anzi’n deli Ezekiasi

Asirifuɛ mun b’a fa Izraɛli nvle’n i nun akpasua blu. Siɛn’n, Sankeribu m’ɔ ti Asiri famiɛn’n i waan ɔ́ fá akpasua nɲɔn nga be o Zida lɔ’n be wie. Ɔ boli Zida klɔ mun be falɛ bo kunngunngun. Zerizalɛmun klɔ’n yɛ ɔ kunndɛli kpa kɛ ɔ́ fá-ɔ. Sanngɛ Sankeribu siman kɛ Zoova sasa Zerizalɛmun klɔ’n.

Ezekiasi m’ɔ ti Zida famiɛn’n ɔ ko mannin Sankeribu i sika kpanngban naan ɔ yaci Zerizalɛmunfuɛ mun be diin. Ɔ sɔli sika’n nun, sanngɛ ɔ sunmɛnnin i sonja mun kɛ be ko tɔ Zerizalɛmun klɔ’n su. Srɛ kunnin Zerizalɛmunfuɛ mun, afin Asirifuɛ mun b’a mantan koko. Sanngɛ Ezekiasi seli be kɛ: ‘Nán srɛ kun amun. Asirifuɛ’m be le wunmiɛn, sanngɛ Zoova wá yó maan é kwlá be.’

Sankeribu sunmannin Rabusake’n m’ɔ ti i sran’n kɛ ɔ ko yo Zerizalɛmunfuɛ’m be finfin. Rabusake’n jrannin klɔ’n i sin lɔ, kpɛkun ɔ kpan se kɛ: ‘Zoova su kwlá deman amun. Nán amun yaci Ezekiasi lɛ naan ɔ laka amun. Ɲanmiɛn fi kwlá deman amun e sa nun.’

Ezekiasi usali Zoova like ng’ɔ fata kɛ ɔ yo’n. Zoova tɛli i su kɛ: ‘Nán maan ndɛ nga Rabusake’n kannin’n ti’n srɛ kun amun. Sankeribu su kwlá faman Zerizalɛmun klɔ’n.’ I sin’n, Sankeribu klɛli Ezekiasi i fluwa. Ɔ seli i kɛ: ‘Fa ɔ wun man min. Zoova kwlá deman wɔ.’ Ezekiasi srɛli Zoova seli kɛ: ‘Zoova, yaci de e. I liɛ’n, sran mun be kwlaa bé wún i wlɛ kɛ ɔ kunngba cɛ yɛ a ti Ɲanmiɛn’n niɔn.’ Zoova seli i kɛ: ‘Asiri famiɛn’n su juman Zerizalɛmun wa. Ń sásá min klɔ’n.’

Sankeribu buli i kɛ ɔ́ wá fá Zerizalɛmun klɔ’n. Sanngɛ cɛn kun kɔnguɛ’n, Zoova sunmɛnnin i anzi kun lika nga Sankeribu i sonja mun be boli be nanmue lɛ’n. Anzi sɔ’n kunnin sonja akpiakpi ya akpiakpi ablaɔcuɛ-nin-nnun (185.000). Famiɛn Sankeribu i sonja kpakpa’m be wuli. Ɔ maan ɔ kwlá yoman like fi kun. Ɔ sɛli i sin i awlo. Zoova sasali Ezekiasi nin Zerizalɛmun klɔ’n kɛ nga ɔ fa kannin’n sa. ?Sɛ i sɔ blɛ nun’n, a o Zerizalɛmun lɔ wie’n, á láfi Zoova su?