Be sacili Zerizalɛmun klɔ’n

Zidafuɛ mun be yacili Zoova sulɛ kpɛ sunman, yɛ be sɔli amuin mun. Zoova sunmɛnnin i nuan ijɔfuɛ mun naan be ko uka be. Ɔ yoli sɔ afuɛ kpanngban, sanngɛ b’a faman be ndɛ’n su. I kpa bɔbɔ’n, be yoli be finfin. ?Ngue yɛ Zoova yoli naan b’a yaci amuin sɔlɛ-ɔ?

Babilɔnin famiɛn mɔ be flɛ i kɛ Nebikadnezaa’n, ɔ su fa nvle mun kunngunngun. Kpɛ klikli ng’ɔ fali Zerizalɛmun klɔ’n, ɔ trali Famiɛn Zozakinin nin i awlo lɔ sran dandan mun, ɔ nin sonja mun nin ajuin difuɛ mun, kpɛkun ɔ fali be kwlaa ɔli Babilɔnin. Ɔ fali Zoova i sua’n nun lɔ ninnge kpakpa’m be kwlaa, kpɛkun ɔ sieli Sedesiasi Zida famiɛn.

I klikli nun’n, Sedesiasi i ɲin yili Nebikadnezaa. Sanngɛ nvle nga be mɛntɛn i lɛ’n, ɔ nin be nga be tɔn be wun suɛn kɛ be ti Ɲanmiɛn nuan ijɔfuɛ’n, be seli i kɛ ɔ yo ɲin kekle Babilɔnin famiɛn’n i su. Zeremin seli i kɛ: ‘Sɛ a yo ɲin kekle’n, bé kún sran mun Zida nvle’n nun, awe’n kpɛ́n, yɛ sran mun bé tɔ́ tukpacɛ.’

Kɛ Sedesiasi yoli famiɛn m’ɔ dili afuɛ mɔcuɛ’n, ɔ yoli ɲin kekle Babilɔnin famiɛn’n i su. Kpɛkun ɔ ko seli Eziptifuɛ’m be sonja mun kɛ be wa ukɛ i. I sin’n, Nebikadnezaa sunmɛnnin i sonja mun kɛ be ko utu Zerizalɛmun klɔ’n. Be boli nanmue mun sin yiali klɔ’n. Zeremin seli Sedesiasi kɛ: ‘Zoova waan, sɛ a fa ɔ wun man Babilɔnin famiɛn’n, á fíte nun, yɛ be su saciman klɔ’n. Sanngɛ sɛ w’a yoman sɔ’n, Babilɔninfuɛ’m bé wɔ́ Zerizalɛmun klɔ’n nun, kpɛkun bé trá wɔ, yɛ bé wlá ɔ bisua.’ Sedesiasi seli i kɛ: ‘N su faman min wun n mɛnmɛn i.’

Kɛ ɔ dili afuɛ kun nin sin’n, Babilɔninfuɛ’m be sonja’m be bubuli Zerizalɛmun klɔ’n i wun talɛ’n i lika wie mun. Kpɛkun be wɔli klɔ’n nun. Be wɔli Ɲanmiɛn i sua’n nun, be kunnin sran kpanngban, kpɛkun be wlali sran akpi kpanngban be bisua.

Sedesiasi wanndili, sanngɛ Babilɔninfuɛ’m be suli i su. Be ko trɛli i Zeriko klɔ’n i wun koko lɛ, kpɛkun be fɛ i ko mannin Nebikadnezaa. Babilɔnin famiɛn’n yoli maan be kunnin Sedesiasi i mma mun i ɲrun lɛ. I sin’n, ɔ boboli Sedesiasi i ɲinma mun, ɔ wlɛli i bisua, yɛ ɔ kali lɔ wuli. Sanngɛ Zoova seli Zidafuɛ’m be kɛ: ‘Sɛ afuɛ ableso (70) sin’n, ń má yó naan amun sa amun sin Zerizalɛmun.’

?Sa benin yɛ ɔ juli gbanflɛn kanngan nga be tra be ɔli Babilɔnin lɔ’n be su-ɔ? ?Be suli Zoova titi?