Famiɛn dilɛ kun m’ɔ́ ká lɛ tititi’n

Cɛn kun kɔnguɛ’n, Famiɛn Nebikadnezaa cɛnnin laliɛ kun. Laliɛ sɔ’n kun srɛ kpa. I sɔ’n ti’n, i akunndan’n sanngannin, ɔ maan ɔ kwlá lafiman. Ɔ flɛli i wunnzue yifuɛ mun, kpɛkun ɔ seli be kɛ: ‘Amun tu min laliɛ’n i bo kle min.’ Be seli i kɛ: ‘Nannan, kan laliɛ sɔ’n i ndɛ kle e.’ Sanngɛ Nebikadnezaa seli be kɛ: ‘Cɛcɛ! Amun bɔbɔ amun kan laliɛ’n i ndɛ kle min. Sɛ amun a kanman’n, ń kún amun.’ Be seli i ekun kɛ: ‘Kan laliɛ’n i ndɛ kle e. I liɛ’n, é tú i bo é klé wɔ.’ Ɔ tɛli be su kɛ: ‘Amun kunndɛ kɛ amún láka min. Amun kan laliɛ nga n cɛnnin’n i ndɛ kle min.’ Be seli famiɛn’n kɛ: ‘Like nga a se e kɛ e yo i yɛ’n, sran fi kwlá yoman.’

Nebikadnezaa fali ya dan kpa. I sɔ’n ti’n, i waan be kun i nvle’n nun sa sifuɛ’m be kwlaa. Daniɛli nin Sadraki nin Mesaki ɔ nin Abɛdnego be o sa sifuɛ sɔ’m be nun wie. Daniɛli seli famiɛn’n kɛ ɔ man be blɛ kan. I sin’n, ɔ nin i janvuɛ mun be srɛli Zoova. Be seli i kɛ ɔ uka be. ?Ngue yɛ Zoova yoli-ɔ?

Zoova yoli maan Daniɛli wunnin laliɛ nga Nebikadnezaa cɛnnin’n, kpɛkun ɔ tuli i bo kleli i. Kɛ aliɛ cɛnnin’n, Daniɛli ko wunnin famiɛn’n i sran mun be nun kun wun, kpɛkun ɔ seli i kɛ: ‘Nán kun sa sifuɛ mun. N kwla tu laliɛ nga famiɛn’n cɛnnin’n i bo.’ Yɛ famiɛn’n i sran’n fali Daniɛli ɔli famiɛn’n i wun lɔ-ɔ. Daniɛli seli famiɛn’n kɛ: ‘Sa nga bé wá jú’n, yɛ Ɲanmiɛn fa kleli wɔ-ɔ. Laliɛ nga a cɛnnin’n yɛ: A wunnin like kun m’ɔ ti kɛ waka sran sa’n. Ɔ ti dan kpa. I ti’n ti sika ɔkwlɛ, i wue’n nin i sa’m be ti sika, i ku lika’n nin i sɔwa’m be ti aaba, i ja’m be ti blalɛ, i ja ngbabua’m be bue ti blalɛ yɛ be bue ti ufa. Kpɛkun yɔbuɛ kun fin oka kun su ɔ wa finnin waka sran’n i ja ngbabua’n. Waka sran’n fufuli, ɔ kacili ndutre, kpɛkun aunmuan’n fa ɔli. Yɔbuɛ’n kacili oka dan kun, kpɛkun ɔ deli asiɛ wunmuan’n.’

I sin’n, Daniɛli seli kɛ: ‘Ɔ laliɛ’n i bo’n yɛ: Like nga a wunnin i’n, i ti m’ɔ ti sika ɔkwlɛ’n, yɛle ɔ famiɛn diwlɛ’n. Sika’n ti famiɛn diwlɛ kun m’ɔ́ bá ɔ sin’n i nzɔliɛ. I sin ekun’n, famiɛn diwlɛ uflɛ wá bá. I nzɔliɛ yɛle aaba’n. Ɔ́ wá síe asiɛ wunmuan’n. Famiɛn diwlɛ ng’ɔ́ sú i su ekun’n, ɔ́ wá yó kekleke kɛ blalɛ sa. I agualiɛ su’n, famiɛn diwlɛ ng’ɔ́ bá’n, i nun búbú. I bue wie mun bé yó kekleke kɛ blalɛ sa, yɛ i bue wie mun bé yó fakafaka kɛ ufa sa. Yɔbuɛ m’ɔ kacili oka’n, yɛle Ɲanmiɛn Sielɛ’n. Ɔ́ wá núnnún famiɛn diwlɛ sɔ mun, kpɛkun ɔ́ ká lɛ tititi.’

Nebikadnezaa kotoli, kpɛkun ɔ utuli i ɲin ase Daniɛli i bo lɛ. Ɔ seli kɛ: ‘Ɔ Ɲanmiɛn’n yɛ ɔ tuli laliɛ sɔ’n i bo kleli wɔ-ɔ. Ɲanmiɛn wie fi nin i sɛman.’ Nebikadnezaa w’a kunman Daniɛli kun. I kpa bɔbɔ’n, ɔ fɛ i sieli i i sa sifuɛ’m be su kpɛn. Yɛ ɔ sieli i Babilɔnin akpasua’n i su kpɛn wie. ?A wun wafa nga Zoova tɛli Daniɛli i srɛlɛ’n su’n?