Famiɛn diwlɛ kun m’ɔ ti kɛ waka dan kun sa’n

Cɛn kun kɔnguɛ’n, Nebikadnezaa cɛnnin laliɛ kun. Laliɛ sɔ’n yo sro kpa. I sɔ’n ti’n, ɔ flɛli i sa sifuɛ mun naan be tu i bo be kle i. Sanngɛ be nun wie fi w’a kwlá tuman laliɛ’n i bo. Kasiɛn su’n, ɔ flɛli Daniɛli.

Nebikadnezaa seli Daniɛli kɛ: ‘Laliɛ nun’n, n wunnin waka kun. Ɔ ti tɛnndɛn kpa, i ti’n to ɲanmiɛn’n. Asiɛ’n su sran’m be kwlaa be kwla wun i. I nɲa’m be ti klanman kpa, yɛ i su mma’m be sɔnnin kpa. Nnɛn’m be fiɛ i fɔnvɔ’n bo. Anunman’m be yo be sua i sama’m be nun. I sin’n, anzi kun fin ɲanmiɛn su lɔ jrali. Ɔ kpan seli kɛ: “Amun bu waka’n i bo, amun kpɛkpɛ i sama mun. Sanngɛ amun yaci i bo’n nin i olui’m be lɛ. Amun fa blalɛ jrɔkɔ nin aaba jrɔkɔ be ci i. Waka’n i awlɛn’n, m’ɔ ti klɔ sran awlɛn’n, ɔ́ wá káci nnɛn awlɛn, yɛ ɔ́ yó sɔ lele afuɛ nso. Sran’m be kwlaa bé wá sí kɛ Ɲanmiɛn yɛ ɔ ti Siefuɛ’n niɔn, yɛ sran kwlaa ng’ɔ klo kɛ ɔ́ síe i famiɛn’n ɔ sie i famiɛn.”’

Zoova tuli laliɛ’n i bo kleli Daniɛli. Kɛ ɔ yoli sɔ’n, srɛ kunnin Daniɛli. Ɔ seli famiɛn’n kɛ: ‘Nannan, n kunndɛ kɛ laliɛ nga ɔ yo ɔ kpɔfuɛ’m be liɛ, sanngɛ ɔ ti ɔ liɛ. Waka dan nga be buli i bo’n yɛle wɔ. Famiɛn dilɛ’n wá fí ɔ sa, yɛ á wá dí ijre kɛ blo nnɛn mun sa. Sanngɛ kɛ mɔ anzi’n seli kɛ be yaci waka’n i bo’n nin i olui’m be lɛ’n ti’n, á wá yó famiɛn ekun.’

Kɛ ɔ dili afuɛ kun’n, cɛn kun’n, Nebikadnezaa fuli i sua’n i ti gbagblagba’n su lɔ. Kɛ ɔ́ wlánwlán lɔ’n, nn ɔ́ nían Babilɔnin klɔ’n. Kpɛkun ɔ seli kɛ: ‘Nanwlɛ, klɔ nga n kplannin’n ti klanman dan. I sɔ’n kle kɛ n ti sran dan.’ Kɛ ɔ́ kán ndɛ sɔ’n, ɔ tili sran kun nɛn ɲanmiɛn su lɔ. Sran sɔ’n seli kɛ: ‘Nebikadnezaa, famiɛn dilɛ’n w’a fi ɔ sa.’

Kɛ Nebikadnezaa tili ndɛ sɔ’n cɛ’n, w’a wunman sa wlɛ kun. Ɔ kacili kɛ nnɛn sa. Be kɛnnin i bo famiɛn sua’n nun. Ɔ nin nnɛn mun yɛ be tran blo lɔ-ɔ. I timuɛn’n yoli tɛnndɛn kpa kɛ anunman ɲin ndrɛ sa. I sa bui nin i ja bui’m be yoli kɛ anunman ja bui sa.

Kɛ afuɛ nso sinnin’n, Nebikadnezaa wa wunnin sa wlɛ, kpɛkun Zoova wa sieli i Babilɔnin famiɛn ekun. I sin’n, Nebikadnezaa seli kɛ: ‘Ń mánmán Zoova m’ɔ ti nglo lɔ Famiɛn’n. Siɛn’n, m’an wun kɛ Zoova yɛ ɔ ti Siefuɛ’n niɔn. Be nga be tu be wun’n, ɔ gua be ɲin ase. Yɛ sran kwlaa ng’ɔ klo kɛ ɔ́ síe i famiɛn’n ɔ sie i famiɛn.’