Bla m’ɔ ɔli gbo su’n

Kɛ Delɛ Cɛn’n sinnin mɔ Zezi nin i sɔnnzɔnfuɛ’m bé sá be sin Galile’n, be sinnin Samari mɛn’n nun. Kɛ be juli klɔ nga be flɛ i Sikaa’n i wun lɛ’n, Zezi ɔli wunmiɛn lolɛ lika kun nun. Be flɛ lika sɔ’n kɛ Zakɔbu i nzue gbo. Kɛ ɔ́ ló wunmiɛn’n, i sɔnnzɔnfuɛ’m be ɔli aliɛ tolɛ klɔ’n nun lɔ.

Bla kun bali nzue salɛ gbo’n su lɛ. Zezi seli i kɛ: “Man min nzue maan n nɔn.” Bla’n tɛli i su kɛ: ‘?Ngue ti yɛ a nin min ijɔ-ɔ? N ti Samarifuɛ. Zifu mun nin Samarifuɛ mun be diman.’ Zezi seli i kɛ: ‘Sɛ ɔ ti kɛ a si min’n, nn á sé min kɛ n man wɔ nzue, yɛ ń mán wɔ nzue ng’ɔ man nguan’n.’ Bla’n seli i kɛ: ‘N wunman ɔ ndɛ’n i wlɛ. A leman like bɔbɔ naan w’a fa sa nzue’n.’ Zezi seli i kɛ: ‘Sran kwlaa ng’ɔ nɔn nzue nga n man’n, nzuewe su kunmɛn i kun.’ Yɛ bla’n seli i kɛ: “Baba, man min nzue sɔ’n wie.”

Zezi seli bla’n kɛ: ‘Ko se ɔ wun kɛ ɔ bla gbo’n su wa.’ Bla’n tɛli i su kɛ: ‘N leman bian.’ Zezi seli i kɛ: ‘Ɔ ndɛ sɔ’n ti nanwlɛ. A jali bian kpɛ nnun, yɛ bian nga a nin i be o nun dɔ nga su’n, ɔ timan ɔ wun.’ Bla’n seli i kɛ: ‘N wun kɛ a ti Ɲanmiɛn nuan ijɔfuɛ. Min nvle’n nunfuɛ’m be waan e kwla su Ɲanmiɛn oka nga su. Sanngɛ Zifu’m be waan saan Zerizalɛmun lɔ yɛ e kwla su Ɲanmiɛn-ɔn. N si kɛ sɛ Mesi’n ba’n, ɔ́ wá klé e wafa ng’ɔ fata kɛ e su Ɲanmiɛn’n.’ Yɛ Zezi seli i kɛ: ‘Min yɛ n ti Mesi’n niɔn.’ Ndɛ sɔ mɔ Zezi kannin’n, ɔ nin-a kan kleman sran fi le.

Bla’n ɔli klɔ’n nun lɔ ndɛndɛ ko seli Samarifuɛ’m be kɛ: ‘M’an wun Mesi’n. Ɔ si min su sa’n kwlaa. Amun bla be wa nian.’ Be suli i su be ɔli gbo’n su lɔ, yɛ be ko tieli ndɛ nga Zezi kan’n.

Samarifuɛ’m be seli Zezi kɛ ɔ ka be klɔ’n su lɛ. Ɔ dili cɛn ba nɲɔn lɛ, ɔ kleli sran’m be like. Yɛ sran kpanngban be lafili i su. Be seli bla’n kɛ: ‘Nanwlɛ, bian nga i ndɛ ng’ɔ kan’n, ɔ kle kɛ i yɛ ɔ́ wá dé mɛn’n niɔn.’