Zezi nin Samari bla’n

ZEZI jrannin Samari lɛ gbo kun wun ɔ loli wunmiɛn. I sɔnnzɔnfuɛ’m be ɔli klɔ nun lɔ aliɛ tolɛ. Bla nga Zezi nin i su ijɔ lɛ’n, ɔ bali nzue salɛ. Ɔ seli i kɛ: ‘Mmo, man min nzue kan maan n nɔn.’

I sɔ’n boli bla’n i nuan kpa. ?Amun si sa ti’n? Afin Zezi ti Zuifu yɛ bla’n ti Samarifuɛ. Yɛ Zuifu’m be sunman lika be kloman Samarifuɛ’m be sa. Be nin Samarifuɛ’m be ijɔman bɔbɔ! Sanngɛ Zezi liɛ’n ɔ klo sran kwlaa. Ɔ maan ɔ seli Samari bla’n kɛ: ‘Sɛ a si sran ng’ɔ se wɔ kɛ a mɛn i nzue lɛ’n, nn ɔ bɔbɔ á srɛ́ i wie, yɛ ɔ́ mán wɔ nzue m’ɔ sonji’n.’

Yɛ bla’n seli kɛ: ‘Nja, gbo’n ti kploun, a leman like mɔ a fa sa ɔ. ?Nin yɛ á ɲán nzue m’ɔ man nguan’n niɔn?’

Zezi seli i kɛ: ‘Sran kwlaa ng’ɔ nɔn nzue nga’n, nzue we kún i ekun. Sanngɛ sran nga ɔ nɔn nzue nga n fa mɛn i’n, ɔ́ káci kɛ nzue ti sa i nun m’ɔ ɲrɛn piaa lele ɔ maan ɔ́ nyán anannganman nguan.’

Yɛ bla’n seli kɛ: ‘Nja man min nzue sɔ’n wie! naan nzue we w’a kunman n kun, man min wie naan m’an baman nzue nun wa kun.’

Bla sɔ’n bu i kɛ Zezi su kan nzue jrɛiin i ndɛ. Sanngɛ Zezi su kan Ɲanmiɛn i su nanwlɛ’n, ɔ nin i Sielɛ Blɛ’n be ndɛ. I sɔ nanwlɛ ndɛ’n ɔ ti kɛ nzue m’ɔ man nguan sa. Ɔ kwla man sran kun anannganman nguan.

Siɛn’n, Zezi se bla’n kɛ: ‘Ko flɛ ɔ wun naan an bla.’

Bla’n tɛli su kɛ: ‘N leman bian.’

Zezi seli i kɛ: ‘Kɛ a se kɛ a leman bian’n ɔ ti nanwlɛ, afin w’a ja bian nnun, yɛ nga a nin i o nun kɛ é sé yɛ’n, ɔ timan ɔ wun.’

Ɔ boli bla i nuan, afin ndɛ wunmuan ngalɛ’n, ɔ ti nanwlɛ. ?Wafa sɛ yɛ Zezi sili i sɔ ninnge mun ɔn? Yɛle kɛ Sran nga Ɲanmiɛn tali nda kɛ ɔ́ fɛ́ i ba’n yɛle Zezi, ɔ maan ndɛ wunmuan ngalɛ’n, Ɲanmiɛn kan kleli i. I osu kunngba nun lɛ yɛ Zezi i sɔnnzɔnfuɛ’m be fin klɔ nun lɔ be bali ɔ. Ɔ boli be nuan kɛ Zezi nin Samari bla kun be su ijɔ.

?Ngue yɛ i wunmuan ngalɛ’n ɔ kle e ɔ? Ɔ kle kɛ Zezi klo nvlenvlefuɛ wafa kwlaa. Yɛ e kusu ɔ fata kɛ e yo sɔ wie. Nán maan e bu i kɛ, kɛ mɔ sran wie’m be ti nvle uflɛ nunfuɛ ti’n, be timan sran kpa. Zezi kunndɛ kɛ sran’m be kwlaa be si nanwlɛ ndɛ nga ɔ man anannganman nguan’n. E kusu ɔ fata kɛ e uka sran mun naan be si nanwlɛ ndɛ’n.