YO MAAN SRAN’M BE KACI ZEZI I SƆNNZƆNFUƐ
LIKE SUANLƐ 10
Tu ɔ klun uka sran mun
Ndɛ cinnjin’n: “E tuli e klun boli Ɲanmiɛn i jasin fɛ’n e kleli amun, kpɛkun e fali e wun e nannannin su bɔbɔ, afin amun ti e awlɛn su sran.”—1 Tes. 2:8.
Like nga Zezi yoli’n
1. Nian VIDEO’N, annzɛ kanngan Zan 3:1, 2 nun. I sin’n, bu kosan nga’m be akunndan:
(1). ?Atrɛkpa’n, ngue ti yɛ kɔnguɛ yɛ Nikodɛmun ko wunnin Zezi wun-ɔn?—Nian Zan 12:42, 43 nun.
(2). Zezi kplinnin su kɛ ɔ nin Nikodɛmun bé kókó yalɛ kɔnguɛ. ?I lɛ nun’n, wafa sɛ yɛ ɔ kleli kɛ ɔ kunndɛ kpa kɛ ɔ́ úka sran mun naan be kaci i sɔnnzɔnfuɛ-ɔ?
?Ngue yɛ like nga Zezi yoli’n kle e-ɔ?
2. Kɛ mɔ e klo sran mun’n ti’n, e tu e klun e uka be naan be kaci Zezi i sɔnnzɔnfuɛ.
Sɔnnzɔn Zezi
3. Kle sran’n i like blɛ nin lika ng’ɔ klo’n nun. Sran’n kwla kle cɛn nin dɔ trele kun. ?Nin yɛ kɛ ɔ suan like’n i wun kpɛjɛ i kpa-ɔ? ?I junman su lɔ, i awlo lɔ annzɛ lika uflɛ-ɔ? Sɛ ɔ fata kɛ a yaci ninnge nga a yo be’n be nun wie’m be yolɛ naan a ko kle sran’n i like lika nin dɔ ng’ɔ kleli’n su’n, mian ɔ ɲin yo sɔ.
4. Nán kpɛ sran’n i like klelɛ’n nun cɛn. Sɛ a su kwlá ko nianman sran’n i osu’n, nán se i kɛ amun su kwlá suanman like. Sanngɛ usa ɔ wun kɛ:
(1). ?Lemɔcuɛ kunngba sɔ nun’n, n kwla ko kle i like cɛn uflɛ?
(2). ?N kwla flɛ i telefɔnun annzɛ video nun naan m’an kle i like?
(3). ?Aniaan uflɛ kwla ko kle i like?
5. Srɛ Ɲanmiɛn naan ɔ yo naan a bu like suanfuɛ’n i wun akunndan kpa. Sɛ sran’n kpɛ like suanlɛ’n nun cɛn’n annzɛ ɔ faman like ng’ɔ suan su ndɛndɛ’n, srɛ Zoova kɛ ɔ uka wɔ naan ɔ sa sin w’a bubuman-ɔ. (Fip. 2:13) Srɛ i kɛ ɔ uka wɔ naan a fa ɔ ɲin sie i like suanfuɛ’n i nzuɛn kpakpa’m be su.