YO MAAN SRAN’M BE KACI ZEZI I SƆNNZƆNFUƐ
LIKE SUANLƐ 11
Maan like nga a kle’n i wlɛ wunlɛ yo pɔpɔ
Ndɛ cinnjin’n: “Sɛ ndɛ ng’ɔ fin amun nuan fite’n timan weinwein’n, ɔ́ yó sɛ naan sran’m b’a wun i wlɛ?” —1 Kor. 14:9.
Like nga Zezi yoli’n
1. Nian VIDEO’N, annzɛ kanngan Matie 6:25-27 nun. I sin’n, bu kosan nga’m be akunndan:
(1). ?Wafa sɛ yɛ Zezi kleli kɛ Zoova nian e lika-ɔ?
(2). ?Kannzɛ Zezi si anunman’m be su ninnge kpanngban’n, sanngɛ be su like trele benin su yɛ ɔ fali e ɲin sieli-ɔ? ?Ngue ti yɛ i sɔ m’ɔ yoli’n ti kpa-ɔ?
?Ngue yɛ like nga Zezi yoli’n kle e-ɔ?
2. Kɛ like nga e kle’n i wlɛ wunlɛ’n ti pɔpɔ’n, ɔ wluwlu sran’m be wun yɛ ɔ ka be klun.
Sɔnnzɔn Zezi
3. Nán ijɔ dan. Nán yiyi like nga amun su suan’n i su like kwlaa nga a si i’n nun. Sanngɛ fa sran’n i ɲin sie i like trele nga amun su suan’n su. Kɛ a ko usa kosan’n man sran’n i blɛ naan ɔ tɛ su. Sɛ ɔ wunman wafa nga ɔ́ tɛ́ su’n annzɛ sɛ ndɛ ng’ɔ kan’n nin nga Biblu’n kan’n be sansan be wun’n, usɛ i kosan uflɛ m’ɔ kwla ukɛ i naan w’a wun ndɛ i wlɛ kpa’n. Kɛ like suanfuɛ’n ko wun ndɛ cinnjin’n i wlɛ’n, an wɔ amun ɲrun.
4. Uka like suanfuɛ’n naan ɔ bu like ng’ɔ su suan’n nin like ng’ɔ si i’n be akunndan. I wie yɛle kɛ ka naan amun a bo sran cɛnlɛ’n i su like suanlɛ bo’n, amun flan be nga be wuli’n be su like nga like suanfuɛ’n si i’n nun kan.
5. Si sunnzun ase fa. Kwlaa naan w’a fa sunnzun ase kun’n, usa ɔ wun kɛ:
(1). ‘?Sunnzun ase nga min waan ń fá’n i wlɛ wunlɛ yó pɔpɔ?’
(2). ‘?Like suanfuɛ’n kwlá wún i wlɛ ndɛndɛ?’
(3). ‘?Ɔ́ kwlá úkɛ i naan i ɲin w’a tran ndɛ cinnjin’n su?’