“I nun ndɛ’n jɔli min klun dan”
“FLUWA ‘Approchez-vous de Jéhovah’ ti’n, ń yó amun kwla lele. I nun ndɛ’n jɔli min klun dan. Afin, ɔ yoli maan n wunnin kɛ Zoova klo min. Kpɔkun siɛn’n, n wun kɛ m’an mantan Zoova ɔ nin i awlɛn su Ba’n, be dan kpa. Ń wá kán fluwa sɔ’n i ndɛ ń klé sran kwlaa kpan, kpɔkun ń fá wie ń cɛ́ min osufuɛ mun.” Fluwa uflɛ m’ɔ fiteli nvle kun aɲia’n nga be flɛ i “Sielɛ Blɛ’n i juejue su jasin bofuɛ mun” mɔ be yoli i afuɛ 2002 nun lele ɔ fa juli afuɛ 2003 nun’n i bo’n, i su ndɛ nga Zoova i Lalofuɛ’m be nun kun kannin’n yɛ ɔ o lɛ. Fluwa sɔ’n i nun nɲa’m be ti bue ya nsan ablaɔn (320). Amun e fiti fluwa uflɛ sɔ’n i nun ndɛ wie’m be su naan e kunndɛ sa nga ti yɛ be yili’n.
Fluwa uflɛ’n i nun ndɛ wie mun
?Ndɛ mennin yɛ ɔ o fluwa uflɛ sɔ’n nun ɔn? Ndɛ kwlaa ng’ɔ o Sasafuɛ Tranwlɛ’n i nun like suanlɛ nɲɔn’n nga é wá súan nun’n, ɔ nin ninnge kpanngban kpa wie’m ekun be o fluwa uflɛ sɔ’n nun. Fluwa sɔ’n i nun ndɛ tre’n ti 31. Yɛ, ndɛ tre kun i tɛnndɛn’n ti kɛ e fluwa Sasafuɛ Tranwlɛ’n i nun like suanlɛ kun sa. Kɛ e ko fiti fluwa’n i nun ndɛ tre klikli nsan’n be su ko wie’n, fluwa’n i nun kpɛkpɛlɛ’n ti fa nnan; yɛ be nun kunngun nnan sɔ’n be dun mmua fiti Zoova i wafa ng’ɔ ti mɔ be ti abonuan’n, be su kwlaa naan b’a yiyi be nun. I sin’n, wafa nga Zoova yi i wafa fanunfanun’m be nglo’n, fluwa’n kan be ndɛ. Kpɔkun i nun kpɛkpɛlɛ kwlaa nun’n, ɔ le ndɛ tre kun m’ɔ kan Zezi i ndɛ ɔ. ?Ngue ti ɔ? An maan e nian ndɛ nga Zezi bɔbɔ kannin’n. I waan: ‘Sran ng’ɔ wun min’n, nn w’a wun e Si.’ (Zan 14:9). Zezi i ninnge’m be yolɛ nun’n, ɔ yili Zoova i sran wafa ng’ɔ ti’n i nun weiin, ɔ maan sran ng’ɔ wun i’n, nn w’a wun e Si Zoova. Fluwa’n i nun kpɛkpɛlɛ’n i ndɛ tre kwlaa be atabo nun’n, be kle e wafa nga e kusu e kwla nian Zoova i ayeliɛ’n su wie’n. Like ng’ɔ fata kɛ e wun i wlɛ kpa ekun’n, yɛle kɛ Zoova i wafa ng’ɔ ti mɔ be ti abonuan’n, be nun yiyilɛ ng’ɔ o fluwa uflɛ sɔ nun’n, ɔ taka Biblu’n su.
Fluwa Approchez-vous de Jéhovah i nun ninnge wie’m be ti be liɛ ngunmin. Kɛ ɔ fɛ i fluwa’n i ndɛ tre 2 su lele m’ɔ́ fá ju ndɛ tre kasiɛn’n i atabo’n su’n, ndɛ tre kwlaa le i kuku kun mɔ be flɛ i kɛ “Éléments de méditation” (Like nga é bú su angunndan’n). Kuku sɔ’m be nun ndɛ mma nin kosan’m be timan ndɛ tre’m be nun flanlɛ ngbɛn. Sanngɛ, be uka e naan e fa Biblu’n e bu like nga e suannin’n i su angunndan. Ɔ maan, kɛ é kánngan nun’n, maan e fa e ɲin e sie i Biblu’n i nun ndɛ mma’m be su kpa. E fa kuku’n i nun kosan mun e usa e wun, kpɔkun e bu wafa nga é nánti su’n i su angunndan. Sɛ e yo i sɔ’n, fluwa’n i nun ndɛ’n kwla uka e naan y’a fa e wun y’a mantan Zoova kpa.—Jue Mun 19:15.
Foto nga be niannin nun be kpali be mɔ be o fluwa’n nun’n, be kle e like, yɛ be wla e fanngan. Fluwa’n i ndɛ tre 17 su’n, i nun bue wie’m be ti Biblu’n nun sa wie’m be su foto ngunmin.
?Ngue ti yɛ be yili fluwa’n niɔn?
?Fluwa Approchez-vous de Jéhovah, ngue ti yɛ be yili ɔ? Sa nga ti yɛ be yili fluwa’n yɛle kɛ, ɔ uka e naan e si Zoova kpa, naan e fa e wun e mɛntɛn i kpa liɛ su.
?Amun a bu sran nga fluwa Approchez-vous de Jéhovah kwla uka be’n, be angunndan? Ɔ kwla yo sran nga amun kle be Biblu’n nun like’n, annzɛ aniaan Klistfuɛ nga b’a jran jasin fɛ’n bolɛ’n. ?Yɛ amun li, amun a bo fluwa uflɛ sɔ’n i nun kannganlɛ’n i bo? Sɛ amun nin a yomɛn i sɔ’n, amun siesie amun wun naan amun a kwla bo i bo. Amun fa blɛ be fa bu like nga amun kanngan’n i su angunndan. Maan fluwa uflɛ sɔ’n ɔ uka amun naan amun fa amun wun mantan Ɲanmiɛn Zoova kpa, naan amun bo Sielɛ Blɛ jasin fɛ’n i aklunjuɛ su nin juejue su kpa ekun.