Amun lafi Ɲanmiɛn su kɛ be sa
1. ?Kɛ ɔ fɛ i Ɔktɔblu i le 19 su’n, fluwa benin yɛ é wá súan nun like ɔ?
1 Afuɛ 2015 nun’n, le mɔcuɛ ng’ɔ bo i bo Ɔktɔblu i le 19 su’n, é wá bó fluwa Amun lafi Ɲanmiɛn su kɛ be sa, i nun like suanlɛ bo asɔnun’m be nun. Fluwa sɔ’n kan Biblu’n nun yasua nin bla 14 mɔ be lafili Ɲanmiɛn su kpa’n, be ndɛ. Kɛ bé sú Zoova’n, sa wie’m be juli be su. Wafa nga fluwa’n yiyi sa sɔ’m be nun’n, ɔ yo kɛ e ɲin bo lɛ yɛ sa sɔ’m be juli sa. Asa ekun’n, ɔ kan afɔtuɛ nga sa sɔ’m be man e’n, ɔ nin wafa nga e kwla nanti be su’n, be ndɛ.—Ebr. 6:12.
2. Wafa nga be siesieli fluwa’n i nun ndɛ’n, amun kɛn i ndɛ kan.
2 Wafa nga be siesieli i nun ndɛ’n: Fluwa’n i nun desɛn kun kle e blɛ nin lika nga i nun yɛ sran sɔ’m be trannin’n. Asa ekun’n, kuku kun o ndɛ tre kwlaa nun. Be flɛ i kɛ, “Maan e bu kosan nga’m be su akunndan.” Ɔ́ úka e naan y’a bu sa nga e kannin be ndɛ’n, be su akunndan naan y’a nanti afɔtuɛ nga sa sɔ’m be man e’n, be su. Fluwa’n i nun desɛn’m be sɔnnin, be ti nglanman kpa. Be boli be ɲin ase be yoli i kwlaa sɔ’n naan ɔ yo e kɛ e ɲin bo lɛ yɛ sa’m be su yo sa.
3. ?Ngue yɛ e kwla yo naan y’a ɲan fluwa sɔ’n, i nun like suanlɛ’n, i su ye ɔ?
3 Wafa nga e kwla ɲan su ye’n: Fluwa’n nun’n, anuannzɛ’n i ɲrun dinfuɛ’m be klɛli e fluwa. Be wla e fanngan se kɛ: “Maan ɔ yo amun kɛ i nun mɔ sa sɔ’m be yo’n, amun o lɛ sa. Amun yo kɛ sran nga be kan be ndɛ Biblu’n nun’n, yɛle amun sa. Kɛ sa sɔ’m be tɔ be su’n, amun nian wafa nga be yo’n. ?Sɛ ɔ ti amun wafa sɛ yɛ amun yo ɔ? Amun fa be ajalɛ liɛ’n be sunnzun amun liɛ’n be nian.” Kɛ be se kɛ e bu sa sɔ’m be su akunndan’n, b’a seman kɛ sa nga b’a kanman be ndɛ’n, be su akunndan yɛ e bu ɔ. Sanngɛ, sa nga be juli mɔ Ɲanmiɛn maan sran’m be klɛli be’n yɛ ɔ fata kɛ e bu be su akunndan ɔn. Kɛ é yó sɔ’n, maan ɔ yo e kɛ blɛ sɔ’n nun’n, e o lɛ sa. (Nee. 8:8) Wie liɛ’n, e su wieman ndɛ tre kun nun like suan. Sɛ ɔ yo sɔ’n, le mɔcuɛ ng’ɔ́ bɛ́ i sin’n, maan aɲia’n i tinngɛfuɛ’n dun mmua bo like nga e suɛnnin i le mɔcuɛ ng’ɔ sinnin’n nun’n, i kpɔlɛ. Nán maan ɔ tra miniti kun. Sɛ kuku nga be flɛ i kɛ: “Maan e bu kosan nga’m be su akunndan,” i wie nunman like nga e suannin nun’n, aɲia’n i tinngɛfuɛ’n kwla usa kosan kun annzɛ nɲɔn fa flan like nga e suannin’n nun.
4. ?Ngue ti yɛ ɔ fata kɛ e suan fluwa Amun lafi Ɲanmiɛn su kɛ be sa, i nun like ɔ?
4 Mɛn’n wá yó tɛ kpa. Ninnge nga be kwla yo naan y’a lafiman Ɲanmiɛn su kun’n, be sɔnnin. Ɲanmiɛn kunndɛ kɛ e lafi i su kpa. I sɔ’n ti’n, ɔ fali fluwa sɔ’n nin Sasafuɛ Tranwlɛ’n nga i su yɛ i nun ndɛ’m be taka’n, ɔ cɛli e. (Zak 1:17) Sɛ e waan é ɲán fluwa sɔ’n i su ye’n, ɔ fata kɛ e tran asɔnun’n i Biblu’n nun like suanlɛ’n, i bo titi. Kpɛkun, maan e mian e ɲin e tɛ kosan’m be su.