Ɲanmiɛn ninnge’m be su yalɛ kokolɛ’n yo sran ye

‘Nán ndɛ tɛ kun sa fin amun nuan fite, sanngɛ an kan ndɛ nga ɔ ti kpa mɔ sran ti ɔ ɔ yo sran’n, naan ɔ yo be kwlaa nga be ti’n be fɛ.’—EFƐZFUƐ MUN 4:29.

1, 2. (a) ?Wafa sɛ yɛ ijɔlɛ mɔ klɔ sran’n ijɔ’n ɔ ti like cinnjin ɔn? (b) ?Ngue yɛ Zoova i sufuɛ’m be kunndɛ kɛ ndɛ nga ɔ fin be nuan fite’n ɔ yo ɔ?

LUDWIG Koehler m’ɔ ti fluwa sifuɛ dan kun’n, ɔ seli kɛ: “Ijɔlɛ mɔ klɔ sran’n ijɔ’n, ɔ fin Anannganman, yɛ ɔ ti abonuan like.” Like kpa sɔ mɔ Ɲanmiɛn mannin e’n ti’n, ɔ fata kɛ e lɛ i ase (Zak 1:17). Sɛ tukpaciɛ ɲan e awlɛn su sran kun i ti nun miɛn’n, naan i sɔ’n ti i ijɔlɛ’n tɔtɔ nun’n, ɔ maan be timan’n, yɛ e wun kɛ yalɛ kokolɛ’n ti like cinnjin ɔn. Zoan mɔ koko nga nun i wun’n ɲannin i sɔ tukpaciɛ’n, ɔ seli kɛ: “Kɛ laa é kókó yalɛ’n, e afiɛn’n mantan kpa. Nanwlɛ, n di i sɔ yalɛ kokolɛ blɛ’n i wun yalɛ kpa!”

² Kɛ e nin sran e koko yalɛ’n, e nin i e kwla tra janvuɛ, e kwla siesie e afiɛn ndɛ. Yalɛ kokolɛ’n fɔnvɔ sran, ɔ wla sran Ɲanmiɛn sulafilɛ’n i fanngan, yɛ ɔ fa sran wlɛ i sran nun. Sanngɛ, yalɛ kokolɛ’n i su mmlusuɛ kwlaa ngalɛ’n, be timan like mɔ be fin nglo be tɔ sa ngbɛn ɔn. Famiɛn akunndanfuɛ Salomɔn waan: ‘Sran nga ɔ́ kán ndɛ ɔ ɔ bumɛn i sin’n, i nuan nun ndɛ’n ɔ yra fiaan kɛ kue yɛ b’a fa wɔ sran sa. Akunndanfuɛ’m be kusu kɛ be kan ndɛ sa’n, ɔ klun tɔ nun sa fɔuun.’ (Nyanndra Mun 12:18). E mɔ e ti Zoova i sufuɛ’n, e kunndɛman kɛ e nuan nun ndɛ’n ɔ yo kɛ kue sa. Sanngɛ, e kunndɛ kɛ ɔ yo sran ye. Maan ɔ yo jasin fɛ’n bolɛ’n nun o, annzɛ e nin e wiengu e afiɛn yalɛ kokolɛ’n nun o, e kunndɛ kɛ ndɛ nga ɔ fin e nuan fite’n ɔ manman Zoova. Jue tofuɛ’n waan: ‘Ɲanmiɛn, é fá wɔ é dí e nuan cɛn kwlaa, e yaciman wɔ bo flɛlɛ’n le naan kɛ ɔ́ yó ɔ w’a yo.’—Jue Mun 44:9.

3, 4. (a) ?Kɛ e nian ndɛ nga ɔ fin e nuan fite sa’n, ngue yɛ ɔ ti kekle man e kwlaa ɔ? (b) ?Ngue ti yɛ ndɛ nga e kan’n ɔ ti cinnjin ɔn?

³ Zaki m’ɔ ti Zezi i sɔnnzɔnfuɛ waan: ‘Be nuan’n, sɛ ɔ ti nnɛn’n, nn sran fi kwlá lomɛn i.’ Kpɔkun, ɔ kpɛn e wla kɛ: ‘E kwlaa e fɔn sa sunman nun. Sran nga i nuan fitefiteman tɛtɛ’n, ɔ ti sran kpa m’ɔ kwla niɛn i wun su.’ (Zak 3:2, 8). Fɔ’n m’ɔ wo e kwlaa e nun ti’n, kannzɛ bɔbɔ e buli angunndan kpa sɛ o, sanngɛ nán cɛn ngba yɛ e nuan nun ndɛ’n yó sran ye, annzɛ ɔ́ mánmán e Yifuɛ’n niɔn. I sɔ’n ti’n, ɔ fata kɛ e bu ndɛ nga ɔ fite e nuan’n i sin naan y’a kan. Afin, Zezi seli ekun kɛ: ‘Ń kán klé amun kɛ, jɔlɛ dilɛ cɛn nun’n, ndɛ ngbɛn kwlaa mɔ sran’m be kannin’n, be bɔbɔ yɛ bé kán be su ndɛ ɔ. Afin ndɛ nga ɔ fin ɔ nuan fite’n yɛ ɔ man ɔ wun sa ɔ, yɛ ndɛ nga ɔ fin ɔ nuan fite’n i su yɛ bé fá bú ɔ fɔ ɔ.’ (Matie 12:36, 37). Ɛɛn, ndɛ nga ɔ fin e nuan fite’n, Ɲanmiɛn Kpli ɔ́ úsa e i su sa.

⁴ Ajalɛ kpa kun nga e ko fa naan e nuan nun ndɛ’n w’a yoman kɛ kue sa’n, yɛle kɛ e koko Ɲanmiɛn ninnge’m be su yalɛ titi. ?É yó sɛ naan y’a kwla koko i sɔ yalɛ liɛ’n, yɛ mmlusuɛ mennin yɛ e kwla ɲɛn i yalɛ kokolɛ nga ɔ yo sran ye’n, i nun ɔn? Like suanlɛ nga ɔ́ wá yíyí nun.

Maan e nian e awlɛn’n su

5. ?Yalɛ nga e koko’n i nun’n, junman mennin yɛ e awlɛn’n di ɔ?

⁵ Kɛ é súan yalɛ kokolɛ nga ɔ yo sran ye’n i yolɛ’n, maan e si kɛ ndɛ nga ɔ fin e nuan’n ɔ yi ndɛ nga ɔ o e awlɛn’n nun lɔ’n i nglo. Zezi seli kɛ: ‘Ndɛ kwlaa nga ɔ o sran awlɛn’n nun’n yɛ ɔ fite i nuan ɔn.’ (Matie 12:34). E kpɛ i kpo e se kɛ, like nga ɔ ti e cinnjin’n yɛ e klo i su yalɛ kokolɛ ɔ. I sɔ’n ti’n, ɔ fata kɛ e usa e wun kosan yɛ’n: ?Min anwlɛn’n nun lɔ ndɛ mennin yɛ min yalɛ kokolɛ’n ɔ yi i nglo ɔ? ?Kɛ e nin min awlofuɛ mun, annzɛ min niaan Klistfuɛ mun e o likawlɛ’n, kɛ ɔ yo naan n koko Ɲanmiɛn ninnge’m be su yalɛ’n, ninnge kɛ balɔn tolɛ’n sa, annzɛ tralɛ mun sa, annzɛ kusu flimu nin ninnge ngbɛnngbɛn’m be su yalɛ yɛ n koko ɔ? Atrɛkpa’n, y’a wunmɛn i wlɛ kɛ ninnge ngbɛnngbɛn sɔ’m be yolɛ’n w’a di e buɛ’n. Ɔ maan, sɛ e wun ninnge nga be ti cinnjin kpa’n be wlɛ’n, bé ɲán ta klanman kpa e yalɛ kokolɛ’n nin e mɛn dilɛ’n su.—Filipfuɛ Mun 1:10.

6. ?Ngue yɛ Ɲanmiɛn ninnge’m be su angunndan bulɛ’n ɔ kwla yo ndɛ nga ɔ fin e nuan fite’n i su ɔ?

⁶ Like nga ɔ ti kpa’n i su angunndan bulɛ’n, ɔ kwla ɲan ta klanman kpa ndɛ nga ɔ fin e nuan fite’n su. Sɛ e mian e ɲin e bu Ɲanmiɛn ninnge’m be su angunndan’n, saan é kókó be su yalɛ. Kɛ Famiɛn Davidi ɔ́ kɛ́n i sɔ liɛ’n i ndɛ’n, ɔ seli kɛ: ‘Anannganman [...] ndɛ nga ɔ fin min nuan fite’n, ɔ nin akunndan nga m bu be min klun lɔ’n, maan be jɔ ɔ klun.’ (Jue Mun 19:15). Kpɔkun, Azafu kusu seli kɛ: ‘Ḿ bú sa nga a [Ɲanmiɛn] yoli’n be kwlaa be akunndan. Ḿ bú sa dandan nga a yoli’n be akunndan.’ (Jue Mun 77:13). Sran nga Ɲanmiɛn Ndɛ’n kɛn i awlɛn’n ɔ nin i angunndan’n, saan ndɛ nga ɔ yo sran ye’n, i cɛ yɛ ɔ́ fíte i nuan ɔn. Zeremi w’a kwlá yaciman like nga Zoova kleli i’n i ndɛ kanlɛ (Zeremi 20:9). Sɛ e angunndan’n tran Ɲanmiɛn ninnge’m be su titi’n, é yó kɛ Zeremi sa wie.—1 Timote 4:15.

7, 8. ?Ninnge kpa mennin yɛ be su yalɛ kokolɛ’n yo sran ye ɔ?

⁷ Ɲanmiɛn ninnge’m be yolɛ titi’n, be yo maan e kwla kan ndɛ fɛ kpanngban (Filipfuɛ Mun 3:16). Aɲia dandan mun nin asɔnun aɲia mun, ɔ nin fluwa nga be fite uflɛuflɛ mun, ɔ nin cɛn kwlaa Biblu’n nun ndɛ mma kun su yalɛ kokolɛ’n, be man e Ɲanmiɛn ninnge’m be nun angunndan kpa mɔ e kwla kan kle e wiengu mun ɔn (Matie 13:52). Kpɔkun e jasin fɛ’n bolɛ nun ndɛ’m be kwla wla e wiengu fanngan kpa liɛ su!

⁸ Izraɛli lɔ waka mun nin nnɛn mun, ɔ nin anunman mun yɛ jue’m be fanunfanun mɔ be ti’n, be boli Famiɛn Salomɔn nuan (1 Famiɛn Mun 4:33). Ɔ maan, ɔ tuli i klun kannin Ɲanmiɛn i sa nuan ninnge sɔ’m be ndɛ aklunjuɛ su. E kwla yo sɔ wie. Zoova i sufuɛ’m be klo ninnge kpanngban be su yalɛ kokolɛ. Sanngɛ sran nga Ɲanmiɛn wawɛ’n sie be’n, Ɲanmiɛn ninnge’m be su yalɛ kokolɛ’n yɛ ɔ fite be nuan ɔn.—1 Korɛntfuɛ Mun 2:13.

‘Maan amun angunndan’n tran ninnge nga’m be su’

9. ?Afɔtuɛ mennin yɛ Pɔlu mannin Filipu lɔ Klistfuɛ mun ɔn?

⁹ Sɛ ndɛ nga ɔ fin e nuan’n ɔ taka afɔtuɛ nga Pɔlu klɛli ko mannin Filipu lɔ Klistfuɛ mun’n i su’n, sa kwlaa nga é kókó be su yalɛ’n ɔ́ yó e wiengu ye. Pɔlu waan: ‘Maan amun angunndan’n tran like kwlaa nga ɔ ti kpa’n, nin sa kwlaa mɔ sran yo ɔ ɔ ti kpa’n be su, yɛle: ndɛ nanwlɛ’n, nin like nga be bu i like kpa’n, nin like nga ɔ ti i nuan su’n, nin sa nga ɔ timan tɛ mlɔnmlɔn’n, nin like nga ɔ ti klanman’n, yɛ ndɛ nga be ti ɔ ɔ jɔ be klun’n.’ (Filipfuɛ Mun 4:8). Ninnge nga Pɔlu kannin be ndɛ’n, be cinnjin mɔ be ti ti’n, ɔ seli kɛ: ‘Maan amun angunndan’n tran be su.’ Yɛle kɛ, maan e angunndan nin e awlɛn’n, ɔ tran be su. I sɔ’n ti’n, amun e fa e ɲin e sie i ninnge sɔ mɔ Pɔlu kannin be ndɛ’n be su kunngunngun naan e nian wafa nga be kwla uka e yalɛ kokolɛ’n nun’n.

10. ?Wafa sɛ yɛ e yalɛ kokolɛ nun’n, e kwla kan ndɛ nga ɔ ti nanwlɛ’n niɔn?

¹⁰ Kɛ be se kɛ ndɛ nanwlɛ’n, nán ndɛ kwlaa nga ɔ timan ato’n i ndɛ yɛ be kan ɔn. Ndɛ nanwlɛ’n, ɔ kan like nga ɔ ti seiin mɔ fiɛn kaan sa nunmɛn i wun mɔ be kwla lafi su’n, yɛle kɛ Ɲanmiɛn Ndɛ’n m’ɔ ti nanwlɛ’n sa. Ɔ maan, kɛ é kán Biblu’n nun ndɛ’n, annzɛ nzra nun ijɔlɛ fɛfɛ nga ɔ wluwluli e wun’n, annzɛ Biblu’n nun afɔtuɛ nga ɔ ukali e’n, i ndɛ é klé e wiengu’n, e angunndan’n tran ndɛ nanwlɛ’n su. Kɛ e yo sɔ’n, e sieman e su “be nga be bu be wun kɛ be si sa’n,” be ndɛ’m be bo (1 Timote 6:20). Kpɔkun be waan be waan ndɛ mɔ be kwlá kpɛmɛn i bo’n, e kɛnmɛn i sɔ ndɛ’n e sinman.

11. ?Like mɔ be bu i like kpa’n, i mennin yɛ e kwla fa wla e yalɛ kokolɛ’n nun ɔn?

¹¹ Like nga be bu i like kpa’n, yɛle like nga i yolɛ’n ti cinnjin kpa’n. Nɛ́n i yɛle like ngbɛnngbɛn mun. Like nga ɔ ti cinnjin kpa sɔ’n, i wie yɛle e jasin fɛ’n bolɛ’n, annzɛ lika kekle nga e o nun yɛ’n, annzɛ e nzuɛn’n m’ɔ fata kɛ ɔ yo kpa titi’n. Ninnge sɔ’m be su yalɛ kokolɛ’n, ɔ wla e fanngan maan Ɲanmiɛn ninnge’m be nun e lafiman, e saciman, kpɔkun e yaciman jasin fɛ’n i bolɛ. Nanwlɛ, jasin fɛ’n bolɛ nun ndɛ fɛfɛ mun nin sa nga be ju dɔ nga su’n, be kpɛn e wla kɛ e o blɛ kasiɛn’n nun. I sɔ ngalɛ’n kwlaa be su yalɛ kokolɛ’n, ɔ wla e fanngan kpa.—Sa Nga Be Yoli’n 14:27; 2 Timote 3:1-5.

12. ?Kɛ e bu like nga ɔ ti i nuan su’n, ɔ nin sa nga ɔ timan tɛ mlɔnmlɔn’n, be su afɔtuɛ nga Pɔlu mannin’n i su angunndan’n, ngue yɛ ɔ fata kɛ e wlɛ i ase ɔ?

¹² Like nga ɔ ti i nuan su’n, yɛle like nga ɔ ti kpa Ɲanmiɛn ɲrun m’ɔ nin i mmla’m be kɔ likawlɛ’n. Sa nga ɔ timan tɛ mlɔnmlɔn’n, be wun i sɔ liɛ’n e angunndan nin e ayeliɛ’n nun. Yɛle kɛ, ɔ fataman kɛ be ti sran wun sacilɛ ndɛ, annzɛ aɔwi tɛtɛ dilɛ’n, annzɛ bla nin bian kunndɛlɛ ndɛ, e yalɛ kokolɛ’n nun (Efɛzfuɛ Mun 5:3; Kolɔsfuɛ Mun 3:8). Maan ɔ yo junman diwlɛ lɔ o, annzɛ suklu lɔ o, kɛ sran’m bé kán ninnge tɛtɛ sɔ’m be ndɛ’n, Klistfuɛ’m be trɛmɛn i bo wie.

13. Amun kan yalɛ kokolɛ wie mun mɔ be kan like nga ɔ ti klanman’n, ɔ nin ndɛ nga be ti ɔ ɔ jɔ be klun’n, be ndɛ.

¹³ Kɛ Pɔlu se kɛ like nga ɔ ti klanman’n, ninnge nga be ti kpa, annzɛ mɔ be ti klolɛ like’n, be ndɛ yɛ ɔ kan ɔn. Ninnge sɔ’m be asabesin’n yɛle like nga ti yɛ be ɲin ci sran’n, annzɛ be yo wlɛ’n, annzɛ be nin sran be afiɛn saci’n. Ndɛ nga be ti ɔ ɔ jɔ be klun’n, yɛle ndɛ nga ɔ ti klanman’n. I wie yɛle be nga be lafi Ɲanmiɛn su’n be nzuɛn kpa’n, i ndɛ nga ɔ o periodiki La Tour de Garde nin Réveillez-vous! be nun’n. ?Kɛ e ko wie fanngan wlalɛ ndɛ sɔ’m be nun kun kanngan’n, ngue ti yɛ e boman su e kleman e wiengu mun ɔn? Nanwlɛ, Ɲanmiɛn ninnge’m be nun’n, sa nga e wiengu’m be yo’n, kɛ e tie be ndɛ’n ɔ wla e fanngan dan kpa! Ninnge kɛ ngalɛ sa’m be su yalɛ kokolɛ’n, be yo maan asɔnunfuɛ’m be klo be wun yɛ be nuan sɛ.

14. (a) ?Like nga ɔ ti kpa’n i yolɛ nun’n, ngue yɛ ɔ fata kɛ e yo ɔ? (b) ?Wafa sɛ yɛ e kwla fa sa kwlaa mɔ sran yo ɔ ɔ ti kpa’n, e wla e yalɛ kokolɛ’n nun ɔn?

¹⁴ Pɔlu kannin ‘like kwlaa nga ɔ ti kpa’n,’ i ndɛ wie. Like nga ɔ ti kpa’n, ɔ kan nzuɛn kpa’n, annzɛ ayeliɛ kpa’n. Ɔ fata kɛ e nian e wun su naan e nuan nun ndɛ’n ɔ taka Ɲanmiɛn Mmla’n su. I liɛ’n, é kán ndɛ nga ɔ ti kpa’n, m’ɔ timan tɛ mlɔnmlɔn’n. Sa kwlaa mɔ sran yo ɔ ɔ ti kpa’n yɛle kɛ, sɛ nzra nun ijɔlɛ kun yoli e fɛ’n, annzɛ e sieli Klistfuɛ kpa kun i nzɔliɛ asɔnun’n nun’n, maan e kɛn i ndɛ e kle sran sɔ’n, annzɛ e kɛn i ndɛ e kle e wiengu mun. Akoto Pɔlu kannin i niaan Klistfuɛ’m be nzuɛn kpa’n i ndɛ titi (Rɔmfuɛ Mun 16:12; Filipfuɛ Mun 2:19-22; Filemɔn 4-7). Asa ekun’n, ninnge nga e Yifuɛ’n yoli’n, be ti ninnge kpa mɔ e kwla kan be ndɛ ɔ. I lɛ nun’n, e diman sa nga be su yalɛ kokolɛ’n kwla yo sran ye’n, be yalɛ.—Nyanndra Mun 6:6-8; 20:12; 26:2.

Maan e koko yalɛ nga ɔ yo sran ye’n

15. ?Biblu’n nun mmla mennin yɛ ɔ se siɛ nin niɛn’m be kɛ be nin be mma’m be koko yalɛ nga ɔ yo sran ye’n niɔn?

¹⁵ Mmla’n 6:6,7 waan: “Maan mmla nga n su fa man amun ndɛkɛn yɛ’n be ka amun klun. Amun fa kle amun mma mun, sɛ amun ti amun awlo lɔ, amun kan, sɛ amun wo atin su amun su kɔ lika o, amun kan, sɛ amún wá lá o, sɛ amún tínnge o, amun kan.” Mmla sɔ’n kle weiin kɛ, sa nga i yolɛ’n ɔ ti su m’ɔ fata kɛ siɛ nin niɛn’m be yo’n, yɛle kɛ be nin be mma’m be koko Ɲanmiɛn ninnge’m be su yalɛ.

16, 17. ?Ajalɛ kpa mennin yɛ Zoova nin Abraamu be man siɛ nin niɛn mun ɔn?

¹⁶ Junman nga Zezi ɔ́ wá dí i asiɛ’n su wa’n i su yalɛ dan nga ɔ nin i Si m’ɔ o nglo lɔ’n be kokoli’n, amun e bu i sin e nian. Zezi bɔbɔ seli i sɔnnzɔnfuɛ’m be kɛ: ‘N Si m’ɔ sunmannin min’n, i bɔbɔ yɛ ɔ kleli min ndɛ nga n kan’n nin ninnge wafa nga n kle’n niɔn.’ (Zan 12:49; Mmla’n 18:18). Ye nga Zoova yoli e nannan Abraamu i awlo nunfuɛ mun nin i nannan mun’n, Abraamu bɔbɔ kwla kɛnnin i ndɛ titi kleli i wa Izaaki. I sɔ yalɛ mɔ Zoova nin Zezi be kokoli’n, mɔ Abraamu kusu nin i wa Izaaki be kokoli’n, ɔ ukali Zezi nin Izaaki maan be yoli Ɲanmiɛn i klun sa’n i aenvuɛ su.—Bo Bolɛ 22:7-9; Matie 26:39.

¹⁷ E mma’m be le atin be tie yalɛ kokolɛ nga ɔ yo sran ye’n, i wie. Ɔ maan, kannzɛ bɔbɔ junman’n wo siɛ nin niɛn’m be su dan sɛ’n, sanngɛ ɔ fata kɛ be fa blɛ naan be nin be mma’m be koko yalɛ. Sɛ amun yo i sɔ ɔ yo ye’n, amun kwla siesie amun wun naan cɛn kun nun’n, awlobo wunmuan’n ɔ tran aliɛ talie kunngba’n i sin. I blɛ sɔ nun’n, annzɛ kɛ amun ko wie aliɛ di’n, amun koko yalɛ nga ɔ wla fanngan’n. I sɔ yolɛ’n, ɔ kwla yo maan awlobo’n yo juejue kpa Ɲanmiɛn ninnge’m be nun’n.

18. Amun kan sa kun m’ɔ kle kɛ sɛ siɛ nin niɛn mun ɔ nin be mma’m be koko yalɛ kpa’n, be ɲan su mmlusuɛ’n i ndɛ.

¹⁸ Alɛzandri ti atin bofuɛ i afuɛ ablaɔn (20) tra su yɛ. Angunndan nɲɔnnɲɔn nga kɛ ɔ le afuɛ blu nin nnan (14) ɔ buli’n, i wla te kpɛn su. I waan: “Min wiengu suklu ba mun nin like klefuɛ’m be ti’n, min angunndan’n yoli nɲɔnnɲɔn Ɲanmiɛn nin Biblu’n, be lika. Sanngɛ, min si’n nin min nin’n be trali be awlɛn be fali blɛ be yiyili i sɔ ndɛ liɛ’n nun blɛblɛblɛ be kleli min. I sɔ yalɛ kokolɛ’n, ɔ ukali min maan n yacili angunndan nɲɔnnɲɔn sɔ’n i bulɛ. Sanngɛ, ɔ ukali min wie ekun maan n fali ajalɛ kpa.” ?Yɛ ɔ ti sɛ siɛn’n? I waan: “N te o awlo lɔ. Sanngɛ e junman nga e di’n ti’n, e nin min si’n e ɲanman e ti kun naan y’a tran y’a koko e afiɛn yalɛ. I sɔ’n ti’n, le mɔcuɛ kun nun sa’n, e di like likawlɛ min si i junman’n su lɔ. Nanwlɛ, i sɔ yalɛ kokolɛ’n ti min klun su kpa.”

19. ?Ngue ti yɛ e kwlaa e sa mian Ɲanmiɛn ninnge’m be su yalɛ kokolɛ’n i wun ɔn?

¹⁹ ?Blɛ nga mɔ e nin e niaan Klistfuɛ mun e koko Ɲanmiɛn ninnge’m be su yalɛ fɛfɛ’n, e bu i e cenjele like? Ɔ kwla yo e asɔnun aɲia’m be bo, annzɛ jasin fɛ’n bolɛ’n nun, annzɛ kɛ e nin sran uflɛ mun e yia’n e bo nzɛmunndɛ’n, annzɛ kɛ é kɔ́ lika loto nun’n. Pɔlu kunndɛli kɛ ɔ nin Klistfuɛ nga be o Rɔmu lɔ’n bé kókó yalɛ. Ɔ seli be kɛ: ‘N klo kɛ ń wún amun wun naan Ɲanmiɛn wawɛ’n i like nga n ɲɛnnin i’n, an ɲan wie naan an jran kekle. Sɛ n ju amun wun lɔ mɔ e wla e wun fanngan Ɲanmiɛn su mɔ e lafi’n ti’n, ɔ́ yó n fɛ dan.’ (Rɔmfuɛ Mun 1:11, 12). Zoanɛsi ti asɔnun kpɛnngbɛn kun. I waan: “E nin e niaan Klistfuɛ mun e Ɲanmiɛn ninnge’m be su yalɛ kokolɛ’n ti like cinnjin kpa. Ɔ man e aklunjuɛ yɛ e wun fa e feke. N usa aniaan kpɛnngbɛn mun maan be laa nun ndɛ mun, ɔ nin like nga be yo mɔ i ti yɛ be Ɲanmiɛn sulafilɛ’n te yo tankaan’n, be kɛn i nun ndɛ kle min. Kɛ afuɛ’n bé sín bé kɔ́’n, e nin be nun kpanngban kpa e kokoli yalɛ. Ɔ maan, be kleli min ngwlɛlɛ nin sa silɛ.”

20. ?Sɛ e wun kɛ yalɛ kokolɛ’n timan sran kun i cinnjin, annzɛ ɔ sa ɲan’n, ngue yɛ e kwla yo ɔ?

²⁰ ?Yɛ sɛ sran wie’m be yo kɛ Ɲanmiɛn ninnge’m be su yalɛ kokolɛ’n timan be cinnjin’n nin? Sɛ e wun i sɔ’n, nán maan e sa sin bubu e. E kwla kunndɛ blɛ uflɛ naan y’a kɛn i sɔ ndɛ’n y’a kle be. Salomɔn wunnin kɛ: ‘Ndɛ nga be kan m’ɔ kpɛn su sɛsɛ’n, ɔ yo ɲɛnmɛn kɛ b’a fa sika ɔkwlɛ nin jɛtɛ ufue b’a di ajuin wie sa.’ (Nyanndra Mun 25:11). Amun kle kɛ sran nga be taman ijɔ, annzɛ be sa ɲan’n, be ndɛ lo amun. Afin, ‘sran klun angunndan’n ɔ ti kɛ nzue m’ɔ o asiɛ’n i bo’n sa. Sran nga m’ɔ si ngwlɛlɛ’n, i bɔbɔ yɛ maan be kwla wun angunndan nga ɔ o [sran’n] i klun’n niɔn.’a (Nyanndra Mun 20:5). I kwlaa yoli o, nán maan sran wie i ayeliɛ’n ti’n, e se kɛ é yáci ndɛ nga ɔ wluwluli e wun’n i kanlɛ.

Ɲanmiɛn ninnge’m be su yalɛ kokolɛ’n ɔ man mmlusuɛ

21, 22. ?Mmlusuɛ mennin yɛ Ɲanmiɛn ninnge’m be su yalɛ kokolɛ’n, ɔ man ɔn?

²¹ Pɔlu seli kɛ: ‘Nán ndɛ tɛ kun sa fin amun nuan fite, sanngɛ an kan ndɛ nga ɔ ti kpa mɔ sran ti ɔ ɔ yo sran’n, naan ɔ yo be kwlaa nga be ti’n be fɛ.’ (Efɛzfuɛ Mun 4:29; Rɔmfuɛ Mun 10:10). I sɔ yalɛ’n i kokolɛ’n timan pɔpɔ. Sanngɛ, i sɔ yolɛ’n i su mmlusuɛ’n sɔnnin kpa. Ɲanmiɛn ninnge’m be su yalɛ kokolɛ’n ɔ yo maan e kan e Ɲanmiɛn sulafilɛ’n i ndɛ e kle e wiengu mun, kpɔkun ɔ yo maan e nin e niaan Klistfuɛ mun e afiɛn’n sɛ kpa.

²² I sɔ’n ti’n, maan e kwlaa e fa like kpa kɛ ijɔlɛ’n sa mɔ Ɲanmiɛn fa mannin e’n, e uka e wiengu mun, kpɔkun e fa e manman Ɲanmiɛn. Sɛ e koko i sɔ yalɛ’n, e bɔbɔ é dí i su aklunjuɛ, kpɔkun ɔ́ wlá e wiengu fanngan. Sanngɛ i kwlaa yoli o, Zoova m’ɔ tie e yalɛ kokolɛ’n i klun jɔ́. I klun jɔ́ afin, e fa e nuan’n e yo sa nga ɔ nin i fata (Jue Mun 139:4; Nyanndra Mun 27:11). Maan e si weiin kɛ, sɛ e koko Ɲanmiɛn ninnge’m be su yalɛ’n, Zoova i wla su fiman e su le. Kɛ Biblu’n kán be nga be su Zoova andɛ be ndɛ’n, ɔ seli kɛ: ‘Be nga be ɲin yi Anannganman’n, be yiali be kokoli be wun. Be ndɛ nga be kannin’n, Anannganman fɛli i su sieli i bo ɔ tili. Be nga be ɲin yi Anannganman m’ɔ kan ndɛ kle be ɔ be fa’n, be klɛli be dunman i bɔbɔ i ɲrun lɛ.’ (Malasi 3:16, 23). Nanwlɛ, Ɲanmiɛn ninnge’m be su yalɛ kokolɛ m’ɔ yo sran ye’n, ɔ ti cinnjin dan kpa!

[Ja ngua lɛ ndɛ’n]

?Wafa sɛ yɛ amún tɛ́ kosan’m be su ɔ?

• ?Ngue yɛ e yalɛ kokolɛ’n ɔ yi i nglo e lika ɔ?

• ?Ninnge mennin be su yalɛ kokolɛ’n yɛ ɔ kwla yo sran ye ɔ?

• ?Ngue ti yɛ yalɛ kokolɛ awlo lɔ nin asɔnun nun lɔ’n, ɔ ti cinnjin ɔn?

• ?Mmlusuɛ mennin yɛ yalɛ kokolɛ’n ɔ man ɔn?