Ɔ ti cinnjin kpa kɛ e tran e minndɛ tra titi’n
‘I sɔ’n ti’n, an tran minndɛ, yɛle kɛ an siman cɛn nga amun Min’n ɔ́ bá nun ɔn.’—MATIE 24:42.
1, 2. ?Ngue yɛ ɔ kle kɛ e o mɛn’n i awieliɛ blɛ’n nun ɔn?
BILL EMMOTT m’ɔ ti fluwa klɛfuɛ’n waan: “Sa nga e blɛ liɛ nun w’a tru dan kpa’n, yɛle alɛ kunlɛ’n.” Bill Emmott si kɛ, kɛ mɛn’n boli i bo lele m’ɔ́ fá jú e blɛ liɛ nun’n, sran’m be kunnin alɛ mun yɛ be yoli be wiengu sa kekleekle mun. I sɔ’n ti’n, ɔ kan gua su kɛ: “Sa nga laa nun sran’m be yoli’n, i kunngba’n yɛ be yo i e blɛ liɛ’n nun ɔn. Sanngɛ, sa nga be yo be e blɛ liɛ nun’n be ti tɛ dan. Afin e blɛ liɛ nun’n, mɛn wunmuan nunfuɛ’m be kunnin alɛ dan kun [...]. Sanngɛ, w’a kaman ngalɛ’n su. Be kunnin alɛ dan kun ekun.”
2 Zezi Klist seli kɛ: “Nvle kun wá jáo nvle kun wun, yɛ famiɛn kun wá jáo i wiengu famiɛn kun wun.” Sanngɛ, ninnge sɔ’m be ti ‘Klist i balɛ’n nin mɛn’n i awieliɛ’n i nzɔliɛ’n,’ be nun sa’n kun. Afin ndɛ cinnjin sɔ nun’n, Zezi kannin awe m’ɔ́ wá kpɛ́n’n, ɔ nin tukpaciɛ m’ɔ sa ndɛndɛ’n, yɛ asiɛ’n m’ɔ́ wá kéje’n, be ndɛ wie (Matie 24:3, 7, 8; Lik 21:6, 7, 10, 11). Nanwlɛ, e wun kɛ ɲrɛnnɛn sa sɔ’m b’a yo dan yɛ b’a yo tɛ kpa b’a wɔ be ɲrun. Kɛ e nian ayeliɛ nga sran’m be yi i nglo Ɲanmiɛn ɔ nin be wiengu sran’m be lika’n, e wun kɛ asiɛ’n su’n wa’n sa tɛ nga sran’m be yo cɛnnin. Nanwlɛ, sran’m b’a saci, yɛ sran kunlɛ’n ɔ nin sa kekleekle yolɛ’n, w’a tru mɛn’n nun. Sran’m be yo be wun kɛ be sro Ɲanmiɛn sa, sanngɛ nn be klo sika nin mɛn dilɛ. I kwlaa sɔ’n kle kɛ, e o ‘mɛn’n i kekle lika’n,’ nun.—2 Timote 3:1-5.
3. ?Wafa sɛ yɛ ɔ fata kɛ e bu ‘blɛ’m be nzɔliɛ’n’ niɔn?
3 ?Wafa sɛ yɛ amun bu mɛn’n i tɛ nga ɔ́ yó kɔ́ i ɲrun lɛ’n niɔn? Sran sunman be bumɛn i ndɛ. Yɛ sa sɔ’m be ti’n, wie’m be awlɛn’n w’a kete. Mɛn’n nun sran dandan mun nin sa sifuɛ’m be wunman ‘blɛ’m be nzɔliɛ’n’ i wlɛ. Ɲanmiɛn sulɛ wafa’m be su kpɛnngbɛn’m be kusu be ukaman sran mun naan b’a wun i sɔ liɛ’n i wlɛ (Matie 16:1-3). Sanngɛ Zezi liɛ’n, ɔ seli i sɔnnzɔnfuɛ’m be kɛ: ‘I sɔ’n ti’n, an tran minndɛ, yɛle kɛ an siman cɛn nga amun Min’n ɔ́ bá nun ɔn.’ (Matie 24:42). Zezi w’a seman kɛ e minndɛ sa ngbɛn. Sanngɛ i waan, maan e “tran minndɛ.” Sɛ e waan é trán mínndɛ’n, ɔ fata kɛ e nian e wun su titi, yɛ nán maan e lafi. Kusu’n, i sɔ’n timan blɛ kasiɛn mɔ e o nun yɛ’n, ɔ nin lika’n mɔ w’a yo kekle’n, be wlɛ wunlɛ ngunmin sa ngbɛn. Sanngɛ, ɔ fata kɛ e wun i wlɛ weiin kpa naan e si kɛ ‘like’n kwlaa be awieliɛ’n w’a mantan.’ (1 Piɛr 4:7). I sɔ’n nun kunngba cɛ yɛ é kwlá wún i wlɛ kɛ ɔ ti cinnjin kpa kɛ e tran minndɛ ɔ. Ɔ maan, kosan nga ɔ fata kɛ e usa e wun’n yɛ: ‘?Ngue yɛ ɔ kwla uka min naan m’an wun i wlɛ weiin kpa naan m’an si kɛ mɛn’n i awielɛ’n w’a mantan koko ɔ?’
4, 5. (a) ?Ngue yɛ maan e kwla wun i wlɛ weiin kpa kɛ mɛn’n i awieliɛ’n w’a mantan koko ɔ? ?Yɛ ngue ti ɔ? (b) ?Wafa sɛ yɛ Zezi m’ɔ kacili sran’n i balɛ’n ɔ nin Nowe i blɛ su’n be fa be wun ɔn?
4 Ka naan Nowe blɛ su anannganman su nzue’n mɔ awlanmannun’n be nin a wunmɛn i le’n w’a tɔ’n, amun e bu wafa nga lika’n yoli’n, i angunndan e nian. E wun kɛ sran’m be sa tɛ yolɛ’n, ɔ yoli Zoova “i ya dan.” Ɔ maan, ɔ seli kɛ: ‘Sran mɔ n yili be’n, ń núnnún be kwlaa.’ (Bo Bolɛ 6:6, 7). Kpɔkun ɔ yoli sɔ sakpa. Kɛ Zezi ɔ́ fá e blɛ liɛ’n ɔ́ súnnzun Nowe i blɛ liɛ’n, ɔ seli kɛ: ‘Kɛ m mɔ n kacili sran’n ń wá bá’n, sran’m bé yó kɛ Nowe i blɛ su’n sa.’—Matie 24:37.
5 Wafa nga Zoova fa buli mɛn’n, ka naan anannganman su nzue’n w’a tɔ’n, sɛ i sɔ kunngba’n yɛ ɔ fa bu e blɛ liɛ’n, ɔ ti su. Kɛ mɔ Nowe i blɛ su’n Zoova nunnunnin be nga be sroman Ɲanmiɛn ti’n, saan ɔ́ núnnún mɛn nga nun klunwifuɛ mun wie. Sɛ e wun wafa nga blɛ nɲɔn sɔ’m be ti kun’n i wlɛ weiin kpa’n, i sɔ’n úka e naan y’a si kɛ mɛn’n i awieliɛ’n w’a mantan koko sakpa. ?Wafa nga blɛ nɲɔn sɔ’m be ti kun’n yɛle mennin? I wafa’n kwla ju fa nnun kun. I klikli’n yɛle kɛ, mɛn’n mɔ bé wá núnnún i’n, be boli su weiin kleli sran mun.
Be boli ‘like nga be nin a wunmɛn i le’n su’ kleli be
6. ?Nowe i blɛ su’n, sa mennin yɛ Zoova dun mmua boli su kɛ ɔ́ wá jú ɔ?
6 Nowe i blɛ su’n, Zoova seli kɛ: ‘Ɔ fataman kɛ nguan nga n fa mannin sran mun’n ɔ cɛ be nun ngboko, afin kannzɛ ɔ yo sɛ bé wú. Siɛn’n sɛ be waan b’a cɛ o yɛle afuɛ ya ablaɔn.’ (Bo Bolɛ 6:3). Ndɛ sɔ mɔ laa blɛ liɛ’n nun, afuɛ akpi nɲɔn ya nnan, afuɛ ablangwlan (2490) nun Ɲanmiɛn kannin’n, ɔ kleli kɛ mɛn wunmuan’n nun sran mɔ be sroman Ɲanmiɛn be nunnunlɛ’n w’a ju. Wafa nga blɛ sɔ’n nunfuɛ’m be buli ndɛ sɔ’n, amun bu i angunndan be nian! Afuɛ ya kun ablaɔn (120) su’n, Zoova wá ‘tɔ́ anannganman su nzue kun asiɛ’n su, ɔ́ fá núnnún ninnge nga be o asiɛ’n su’n be kwlaa. Ɔ́ kún asiɛ’n su ninnge’m be kwlaa.’—Bo Bolɛ 6:17.
7. (a) ?Kɛ Ɲanmiɛn boli sa nga ɔ́ wá jú’n su kleli Nowe’n, ngue yɛ Nowe yoli ɔ? (b) ?Kɛ be kan mɛn tɛ kain nga i nunnunlɛ’n i ndɛ kle e’n, ngue yɛ ɔ fata kɛ e yo ɔ?
7 Sa dan sɔ m’ɔ su wa ju’n, Ɲanmiɛn boli su kleli Nowe afuɛ kpanngban kpa, ka naan w’a ju. Ɔ maan, Nowe siesieli i wun ngwlɛlɛ su naan w’a kwla fite nun. Akoto Pɔlu waan: ‘Kɛ [Ɲanmiɛn] boli like nga be nin a wunmɛn i le’n su kleli [Nowe’n], ɔ boboli mmeli kun ɔ fa deli i osufuɛ mun srolɛ m’ɔ sro i’n ti.’ (Ebre Mun 11:7). ?Yɛ e li? Kɛ mɛn tɛ kain nga i blɛ kasiɛn’n ɔ boli i bo afuɛ 1914 nun lele m’ɔ́ fá jú andɛ’n, afuɛ kɔe ablangwlan (90) w’a sin. E kwla se kɛ mɛn’n i ‘awieliɛ blɛ’n w’a ju.’ (Daniɛl 12:4). ?Kɛ be kan ndɛ be kle e kɛ nga sa’n, ngue yɛ ɔ fata kɛ e yo ɔ? Biblu’n waan: ‘Sran nga ɔ yo Ɲanmiɛn i klun sa’n, ɔ́ ká lɛ tititi.’ (1 Zan 2:17). Ɔ maan, dɔ nga su yɛ ɔ fata kɛ e angunndan’n ɔ tran Zoova i cɛn’n su naan e yo i klun sa’n i kpa liɛ su ɔ.
8, 9. ?E blɛ liɛ nun’n, sa mennin mun yɛ be bo su be kle sran mun ɔn? ?Yɛ wafa sɛ yɛ be yo i sɔ ɔ?
8 E blɛ liɛ nun’n, be nga be kan be ɲin ase be suan Biblu’n nun like’n, be wunnin kɛ Ɲanmiɛn wá núnnún mɛn tɛ nga. ?Amun lafi i sɔ ndɛ liɛ su wie? Amun nian ndɛ weinwein nga Zezi Klist kannin’n. I waan: ‘Blɛ sɔ’n nun’n, ɲrɛnnɛn’n ɔ́ yó dan mɔ kɛ ɔ fin mɛn’n i bo bolɛ’n nun lele andɛ’n, i wunsu nin a yoman le yɛ i wunsu su yoman kun le.’ (Matie 24:21). Zezi seli ekun kɛ, i mɔ Ɲanmiɛn sieli i kɛ ɔ di nvle’m be jɔlɛ’n, ɔ́ bá. Kpɔkun, ɔ́ bú sran’m be nun kɛ nnɛn tafuɛ’n bu i bua mun nin i boli’m be nun gua be ngunminngunmin’n sa. Be nga be yoli sa tɛ’n m’ɔ buli be fɔ’n, ‘bé kɔ́ lika mɔ lɔ ɲrɛnnɛn’n wieman’n nun’n, [ɔ́ núnnún be mlɔnmlɔnmlɔn, NW], sanngɛ nanwlɛfuɛ’m bé ɲán anannganman nguan.’—Matie 25:31-33, 46.
9 Zoova fa sa sɔ mɔ bé wá jú’n sie i nvle’n i ɲrun titi. Like nga ɔ fa yo i sɔ’n, yɛle Ɲanmiɛn ninnge’m be nun aliɛ nga ‘sran kpa nanwlɛfuɛ m’ɔ si ngwlɛlɛ’n,’ ɔ man’n (Matie 24:45-47). Asa ekun’n, sran nga be o asiɛ’n su mɔ be fin mɛnmɛn nin nvlenvle’n kwlaa be nun’n, ɔ nin be kwlaa nga be aniɛn’n ti fanunfanun’n, ɔ nin sran wafawafa’n kwlaa, be yia be kɛ: ‘Maan be ɲin yi Ɲanmiɛn, be mɛnmɛn i, afin sran’m be ndɛ bulɛ blɛ’n w’a ju.’ (Sa Nglo Yilɛ 14:6, 7). Ɲanmiɛn Sielɛ Blɛ jasin fɛ’n nga Zoova i Lalofuɛ’m be bo i asiɛ wunmuan su’n, i nun ndɛ cinnjin kpa’n kun yɛle kɛ, ɔ ka kaan Ɲanmiɛn Sielɛ Blɛ’n wá núnnún sran’m be famiɛn diwlɛ liɛ mun (Daniɛl 2:44). I sɔ ndɛ liɛ’n, ɔ timan aɔwi ndɛ. Afin kɛ Ɲanmiɛn m’ɔ kwla like kwlaa yo’n ɔ kan ndɛ’n, sɛ ɔ ti sran’n nn é sé kɛ ɔ sɛmɛn i sin i wun sa ngbɛn (Ezai 55:10, 11). Ɔ yoli i sɔ Nowe i blɛ su, yɛ ɔ́ wá yó i sɔ wie e blɛ liɛ’n nun.—2 Piɛr 3:3-7.
Bian nin bla kunndɛlɛ sukusuku’n w’a tru
10. ?Ngue ndɛ yɛ e kwla kɛn i Nowe i blɛ su bla nin bian kunndɛlɛ sukusuku’n i lika ɔ?
10 Sa kun ekun nun’n, e blɛ liɛ’n ti kɛ Nowe i blɛ liɛ’n sa. Zoova seli yasua klikli’n ɔ nin i yi’n mɔ i bɔbɔ ɔ siesieli be aja’n kɛ, be si sua naan ‘be yi asiɛ’n.’ (Bo Bolɛ 1:28). Sanngɛ Nowe i blɛ su’n, anzi ɲin keklefuɛ’m be fali be tete bolɛ’n be sali sran mun. Yɛle kɛ, be fali klɔ sran wunnɛn be bali asiɛ’n su wa, kpɔkun be jali sran’m be wa bla nglanman mun. Ba nga be wuli be’n, be ti jajraajra; nán sran nun yɛ be wo ɔ, kusu nán anzi nun yɛ be wo ɔ (Bo Bolɛ 6:2, 4). Anzi ɲin keklefuɛ sɔ’m be sa tɛ yolɛ kunngba’n yɛ Sodɔmu nin Gomɔrufuɛ’m be yoli ɔ (Zid 6, 7). Ɔ maan, bian nin bla kunndɛlɛ sukusuku’n, ɔ truli kpa liɛ su blɛ sɔ’n nun.
11. ?Sa mennin nun yɛ e blɛ liɛ’n ti kɛ Nowe i blɛ liɛ’n sa ɔ?
11 ?Lika’n ti sɛ e blɛ liɛ’n nun? Blɛ kasiɛn nga nun’n, bla nin bian kunndɛlɛ’n ɔ ti sran kpanngban be junman. Sran sɔ mun mɔ ‘be siman ɲannzuɛn kun’n,’ Pɔlu kan be ndɛ se kɛ: ‘Wlaka’n w’a kun be kpo, be yaciman sa tɛtɛ’m be yolɛ’n mlɔnmlɔn.’ (Efɛzfuɛ Mun 4:19). Fluwa’m be nun annzɛ televiziɔn nun’n, be yi yasua nin bla nna’n i nglo. Sran’m be dun mmua si sua ka naan b’a ja. Be saci ba kanngan mun. Yasua mun annzɛ bla’m be yaci bla nna nin bian nna nga Ɲanmiɛn siesieli’n, kpɔkun be tɔ be wiengu yasua, annzɛ bla’m be kunndɛlɛ’n nun. Sa tɛ kwlaa sɔ’m be yolɛ’n w’a tru. Sran sɔ’m be nun wie’m b’a dun mmua ‘ɲan be sa tɛtɛ sɔ mun mɔ be yo’n i nuan akatua’n.’ Yɛle kɛ, be ɲan tukpaciɛ mun, be awlobo’m be saci, yɛ be ɲan i su sa wie mun ekun.—Rɔmfuɛ Mun 1:26, 27.
12. ?Ngue ti yɛ ɔ fata kɛ e suan sa tɛ’n i kpɔlɛ’n niɔn?
12 Nowe i blɛ su’n, Zoova tɔli anannganman su nzue fa nunnunnin sran nga be mɛn dilɛ’n taka bian nin bla kunndɛlɛ sukusuku’n su’n. Maan e wla kpɛn su titi kɛ, e blɛ liɛ’n ɔ ti kɛ Nowe i blɛ su’n sa. ‘Ɲrɛnnɛn dan’ nga ɔ́ wá bá’n, ɔ́ núnnún asiɛ’n su ‘bla annzɛ bian kunndɛfuɛ mun, nin yasua mɔ be kunndɛ bla be yi bo annzɛ bla mɔ be kunndɛ bian be wun bo’n, nin yasua mɔ be kunndɛ be wiengu yasua’n.’ (Matie 24:21; 1 Korɛntfuɛ Mun 6:9, 10; Sa Nglo Yilɛ 21:8). Nanwlɛ, ɔ ti cinnjin kpa kɛ e suan sa tɛ’n i kpɔlɛ, yɛ ajalɛ kwlaa nga ɔ kwla fa e wla bian nin bla kunndɛlɛ sukusuku nun’n, e wla be ase!—Jue Mun 97:10; 1 Korɛntfuɛ Mun 6:18.
“Sa kekleekle mun yɛ sran’m be yo ɔ”
13. ?Ngue ti yɛ ‘sa kekleekle mun yɛ sran’m be yoli’ i asiɛ’n su Nowe i blɛ su’n niɔn?
13 Kɛ Biblu’n kán sa kun ekun mɔ be yoli i Nowe i blɛ su’n i ndɛ’n, ɔ se kɛ: ‘Blɛ sɔ nun’n, nn mɛn wunmuan’n nun sran’m b’a saci mlɔnmlɔn. Sa kekleekle mun yɛ sran’m be yo ɔ.’ (Bo Bolɛ 6:11). Sanngɛ, nán blɛ sɔ’n nun yɛ be kpɛli sa kekleekle yolɛ’n i ba ɔ. Adam i wa Kaɛn, ɔ kunnin i niaanbian m’ɔ ti sran kpa’n (Bo Bolɛ 4:8). Kɛ Lemɛki kunnin gbaflɛn kun’n, ɔ fa dili i nuan. Jue nga ɔ toli’n nun’n, ɔ seli kɛ i ti delɛ nun yɛ ɔ kunnin i ɔ. I sɔ’n kle kɛ sa kekleekle yolɛ’n, ɔ yoli Lemɛki blɛ sufuɛ’m be nzuɛn (Bo Bolɛ 4:23, 24). Like nga mɔ maan Nowe i blɛ liɛ’n yoli ngunmin’n, yɛle wafa nga sa kekleekle yolɛ’n ɔ yoli dan fa juli’n. Kɛ Ɲanmiɛn i mma’m be nin sran’m be wa bla’m be wuli sran jajraajra mun’n, sa kekleekle yolɛ’n nga ɔ truli asiɛ’n su’n, awlanmannun, be nin a wunmɛn i sɔ le. Sran jajraajra sɔ’m be sa kekleekle yolɛ’n ti’n, Traduction du monde nouveau waan ndɛ mma nga Ebre aniɛn nun’n, be fa flɛ sran sɔ mun’n yɛle “akpa tofuɛ.” I bo’n yɛle kɛ: “Sran mɔ be bla be wiengu akpa.” (Bo Bolɛ 6:4). I sɔ’n ti’n, ‘sa tɛ nga b’a yo i asiɛ’n su’n w’a sɔn ngboko.’ (Bo Bolɛ 6:13). Mɛn tɛ kaiin kɛ ngalɛ sa nun’n, wafa nga Nowe i awlobo’n i lika nianlɛ’n ɔ yoli kekle i sa nun’n, amun bɔbɔ amun bu i sin be nian! Sanngɛ, Nowe kleli kɛ ‘i blɛ sufuɛ’m be kwlakwla be nun’n, i kunngba yɛ ɔ nin Zoova be mantan ɔn.’—Bo Bolɛ 7:1.
14. ?Wafa sɛ yɛ andɛ ‘sa kekleekle yolɛ’n’ w’a tru asiɛ’n su dan ɔn?
14 Kɛ mɛn’n boli i bo lele m’ɔ́ fá jú andɛ’n, sran’m be yo sa kekleekle titi. Sanngɛ, wafa nga Nowe i blɛ su sa kekleekle yolɛ’n fa truli dan’n, i sɔ kunngba’n yɛ e wun i asiɛ wunmuan’n su andɛ ɔ. Cɛn kwlaa e ti i kɛ, be yo sa kekleekle awlobo’m be nun, yɛ be yo kakawlonga sa mun. Nvle kunngba nun’n, kɛ be nga be kan aniɛn kun’n be kunndɛ kɛ bé núnnún aniɛn uflɛ nunfuɛ mun ti’n, be yoman be sa fi nn be su tɔ be su be kun be sa ngbɛn. Sran nga b’a kun be alɛ’m be nun’n be liɛ’n, be kɛnmɛn i ndɛ lele. Nanwlɛ, sa kekleekle yolɛ’n w’a tru asiɛ’n su dan. ?Ngue ti ɔ? Kosan’n i su tɛlɛ’n ɔ kan sa kun ekun m’ɔ nin Nowe i blɛ liɛ’n be ti kun’n, i ndɛ.
15. (a) ?Ngue ti yɛ sa kekleekle mɔ sran’m be yo’n, w’a yo dan blɛ kasiɛn nga nun’n niɔn? (b) ?Yɛ ngue yɛ e kwla lafi su kɛ ɔ́ jú ɔ?
15 Afuɛ 1914 nun’n, kɛ Ɲanmiɛn sieli Zezi Klist Famiɛn’n, mɔ i Famiɛn Diwlɛ’n takali ɲanmiɛn su lɔ’n, Zezi yoli sa dan kpa kun. Yɛle kɛ, ɔ kannin mmusu’m be si Satan ɔ nin i anzi’m be bo ɲanmiɛn su lɔ guali be asiɛ’n su wa (Sa Nglo Yilɛ 12:9-12). Ka naan anannganman su nzue’n w’a tɔ’n, anzi ɲin keklefuɛ’m be bɔbɔ be ɲinfu be yacili be tranwlɛ’n ɲanmiɛn su lɔ be bali asiɛ’n su wa. Sanngɛ e blɛ liɛ’n nun liɛ’n, nán be klunklo su yɛ be bali ɔ. Be kannin be bo kekle nun ɲanmiɛn su lɔ be guali be asiɛ’n su wa. Asa ekun’n, siɛn’n be kwlá faman klɔ sran wunnɛn kun naan be nin sran’m be mma’m b’a yo tete sa mun ekun. I sɔ’n wla be klunngbɔ’n, ɔ be be awlɛn. Ɔ maan, jɔlɛ mɔ bé wá dí be’n ti’n, srɛ kun be, yɛ be wlawla sran mun ɔ nin be anuannzɛ mun naan asiɛ wunmuan’n su’n be yo sa kekleekle mun tra Nowe i blɛ su liɛ’n bɔbɔ. Kɛ anzi ɲin keklefuɛ mun ɔ nin be mma’m be sa tɛ yolɛ’n yoli dan’n, Zoova nunnunnin mɛn’n kwlaa. Ɔ maan, e lafi Zoova su kpa kɛ, i sɔ kunngba’n yɛ ɔ́ wá yó i e blɛ liɛ’n nun ɔn (Jue Mun 37:10)! Sanngɛ, be nga andɛ be tran be minndɛ’n, be si kɛ be su wa ɲan be ti.
Be bo jasin fɛ’n
16, 17. ?Like’n i nnan su nga nun mɔ e blɛ liɛ’n ɔ nin Nowe i blɛ liɛ’n be ti kun’n, yɛle mennin?
16 Like’n i nnan su nga nun mɔ e blɛ liɛ’n ɔ nin Nowe i blɛ liɛ’n be ti kun’n, e wun i junman nga be fa mannin Nowe kɛ ɔ di’n, i nun. Nowe boboli mmeli dan kpa kun. Kpɔkun, ɔ ‘boli ndolo.’ (2 Piɛr 2:5). ?Ndɛ mennin yɛ ɔ boli i ndolo’n niɔn? Sran mun m’ɔ fata kɛ be kaci be nzuɛn’n, ɔ nin mɛn’n mɔ Ɲanmiɛn su wa nunnun i’n, i ndolo cɛ yɛ Nowe boli ɔ. Zezi waan Nowe i blɛ sufuɛ’m ‘b’a buman like fi angunndan lele nzue dan’n wa fa be kwlaa ɔli.’—Matie 24:38, 39.
17 I wafa kunngba’n, Ɲanmiɛn Sielɛ Blɛ jasin fɛ’n i bolɛ mɔ be fa mannin Zoova i Lalofuɛ mun’n, be tu be klun be bo i asiɛ wunmuan’n su. E kwla se kɛ mɛn’n i lika kwlaa nun’n, sran’m be kwla tie Sielɛ Blɛ jasin’n i su ndɛ’n. Kpɔkun be kwla kanngan i su fluwa’m be nun be bɔbɔ be klɔ aniɛn’m be nun. Dɔ nga su’n, Sasafuɛ Tranwlɛ’n m’ɔ bo Zoova Sielɛ Blɛ’n i jɔ’n, be yi i fluwa miliɔn ablaɔn nin nnun (25.000.000) tra su. Kpɔkun ɔ fite aniɛn fanunfanun ya kun ablanan (140) tra su be nun. Nanwlɛ, be bo Ɲanmiɛn Sielɛ Blɛ’n jasin fɛ’n ‘mɛn wunmuan’n nun naan sran’n kwlaa be ti.’ Kɛ be ko di junman sɔ’n i lele mɔ i agualiɛ su’n ɔ ko yo Ɲanmiɛn i liɛ’n su’n, saan julɛ yɛ mɛn’n i awieliɛ’n ɔ́ jú siɛn’n niɔn.—Matie 24:14.
18. ?Wafa sɛ yɛ e kwla fa wafa nga sran’m be sɔ jasin fɛ nga e bo’n nun e sunnzun Nowe blɛ sufuɛ’m be liɛ’n niɔn?
18 Amun e bu wafa nga sran’m b’a buman Ɲanmiɛn ninnge’m be like fi’n, ɔ nin sacilɛ mɔ be sacili mlɔnmlɔn ka naan anannganman su nzue’n w’a tɔ’n, i angunndan e nian. E wun kɛ be srili Nowe ɔ nin i awlofuɛ mun, kpɔkun be yoli be finfin. Kannzɛ be yoli sɛ o, awieliɛ’n wieli be. I sɔ kunngba’n, ‘sran wie mun mɔ be sri sran mun’n,’ b’a sɔn dan blɛ kasiɛn nga nun. Sanngɛ, Biblu’n waan: ‘E Min’n i balɛ’n ɔ́ fú be nun kɛ awiefuɛ sa.’ (2 Piɛr 3:3, 4, 10). Sɛ i sɔ sa liɛ’n i blɛ’n ju’n, ɔ su sɛnmɛn i wun le (Abakik 2:3). Nanwlɛ, ngwlɛlɛ ayeliɛ yɛle kɛ e tran minndɛ!
Be nga be kwla ɲan be ti’n b’a sɔnman
19, 20. ?Sa mennin nun yɛ anannganman su nzue nga ɔ tɔli’n, ɔ nin e blɛ liɛ’n i nunnunlɛ’n ɔ́ yó kun ɔn?
19 Nán sa tɛ yofuɛ’m be nunnunlɛ’n i nun ngunmin yɛ e blɛ liɛ’n ɔ nin Nowe i blɛ liɛ’n, be ti kun ɔn. Yɛle kɛ i nun mɔ anannganman su nzue’n tɔli’n, wafa kunngba nga sran wie’m be ɲannin be ti’n, sran wie’m be kusu bé ɲán be ti mɛn tɛ nga i nunnunlɛ’n nun wie. Be nga be ti wun ase kanfuɛ mɔ b’a diman mɛn’n kɛ blɛ sɔ nunfuɛ’n be liɛ’n sa’n, be ɲannin be ti anannganman su nzue nga ɔ tɔli’n nun. Ɲanmiɛn i klun sa yolɛ’n ti’n, b’a yoman be blɛ liɛ su mɛn tɛ’n, i nunfuɛ. Biblu’n waan: ‘Nowe liɛ’n, i wun yoli Anannganman fɛ.’ Ɔ se ekun kɛ: ‘[Nowe] tu i klun su Ɲanmiɛn.’ (Bo Bolɛ 6:8-10). Sran kwlaa be nun’n, ‘sran mɔcuɛ cɛ yɛ be fuli mmeli’n nun be trannin nzue’n i ɲin su lele be ɲannin be ti ɔ.’ (1 Piɛr 3:20). Kpɔkun Zoova seli be kɛ: “An trɛ, an yi asiɛ wunmuan’n.” (Bo Bolɛ 9:1).
20 Ɲanmiɛn Ndɛ’n gua e awlɛn su nzue kɛ, “sran kpanngban kpa” bé fín “afɛ dan’n nun” bé fíte (Sa Nglo Yilɛ 7:9, 14). ?Sran kpanngban sɔ’m be ti nɲɛ? Zezi bɔbɔ tɛ su se kɛ: ‘Anuan nin atin nga be sin nun ɔn be ɲan nguan’n be ti kaan, yɛ be nga be kunndɛ bé wún i’n, b’a sɔnman.’ (Matie 7:13, 14). Yɛle kɛ, kɛ e fa sran miliar nsiɛn nga andɛ be o asiɛ’n su’n e sunnzun sran nga bé fín afɛ dan’n nun bé fíte’n, sran sɔ’m b’a sɔnman sakpa. Sanngɛ mmlusuɛ nga sran nga be ɲannin be ti anannganman su nzue nun’n be ɲɛnnin i’n, atrɛkpa’n, sran sɔ mɔ b’a sɔnman’n bé ɲɛ́n i wie. Yɛle kɛ, be nin be mma’m bé kwlá yó mɛn uflɛ’n i nun sran.—Ezai 65:23.
Maan ‘e tran e minndɛ’
21, 22. (a) ?Mmlusuɛ mennin yɛ amun ɲɛnnin i anannganman su nzue’n i su yalɛ kokolɛ’n nun ɔn? (b) ?Afuɛ 2004 nun Biblu’n nun ndɛ mma liɛ’n yɛle mennin? ?Yɛ wafa sɛ yɛ ɔ fata kɛ e bu afɔtuɛ sɔ’n niɔn?
21 Kannzɛ bɔbɔ anannganman su nzue’n tɔli i osu w’a cɛ kpa’n, sanngɛ ɔ ti sa kun m’ɔ fata kɛ e fa tu e wun fɔ nun ɔn (Rɔmfuɛ Mun 15:4). Yɛle kɛ, kɛ e wun e blɛ liɛ’n m’ɔ nin Nowe i blɛ liɛ’n be ti kun’n, ɔ fata kɛ i sɔ’n ɔ uka e naan y’a lafiman. Kpɔkun, maan e si weiin kɛ cɛn nga Zezi ɔ́ fá bú sa tɛ yofuɛ’m be fɔ m’ɔ́ sáci be’n, saan cɛn sɔ’n ɔ́ jú kɛ awiefuɛ i balɛ’n sa.
22 Andɛ’n, Zezi Klist nian Ɲanmiɛn ninnge’m be nun junman dan kpa kun i dilɛ’n su. Ɲanmiɛn i sufuɛ kpa’m be ti ɲanlɛ nin be fɔuun nun tranlɛ’n ti’n, Ɲanmiɛn ninnge’m be nun lika klanman’n m’ɔ ti kɛ mmeli sa’n, ɔ o lɛ (2 Korɛntfuɛ Mun 12:3, 4). Sɛ e waan é ɲán e ti ɲrɛnnɛn dan’n nun’n, ɔ fata kɛ e ka lika klanman sɔ’n nun. Sɛ ɔ timɛn i ti’n, mɛn nga ɔ o yɛ’n ɔ ti Satan i mɛn. Yɛ w’a sa cɛiin naan ɔ́ dí sran kwlaa nga Ɲanmiɛn ninnge’m be nun’n, ɔ lafi’n. I sɔ’n ti’n, ɔ ti cinnjin kpa kɛ e buabua e wun e sie yɛ ‘e tran e minndɛ’ Zoova i cɛn’n.—Matie 24:42, 44.
?Amun wla kpɛn su?
• ?Kɛ Zezi kɛ́n i balɛ’n i ndɛ’n, afɔtuɛ mennin yɛ ɔ mannin ɔn?
• ?Blɛ mennin yɛ Zezi fa sunnzunnin i balɛ’n niɔn?
• ?Sa mennin nun yɛ e blɛ liɛ’n ɔ nin Nowe i blɛ’n, be ti kun ɔn?
• ?Kɛ e bu wafa nga e blɛ liɛ’n ɔ nin Nowe i blɛ’n be ti kun’n i angunndan’n, ngue yɛ ɔ ti cinnjin kpa kɛ ɔ yo ɔ?
[Blurb on page 18]
Afuɛ 2004 nun Biblu’n nun ndɛ mma liɛ yɛle: ‘An tran minndɛ [...]. Amun buabua amun wun sie.’—Matie 24:42, 44.