AMUN LAFI ƝANMIƐN SU KƐ BE SA

“Ɔ nin Nyanmiɛn be nuan sɛ”

MAAN ɔ yo amun kɛ amun ɲin ta Nowe sa. Ɔ o lɛ tinngɛtinngɛ i wun. Ɔ ti ase waka losin dan kun su, ɔ su lo wunmiɛn. I ɲin ta like kɛ mmeli sa mɔ be su kplan’n. Gudrɔn mɔ b’a klo i’n, ɔ bɔn fiaan. Kɛ Nowe i awlofuɛ’m bé kpɛ́kpɛ́ waka’m be nun bé fá dí junman’n, sɛ a o mmua lɔ’n a ti be ngan. Kɛ Nowe ti lɔ’n, i ɲin ta i mma mun. Be su wla be wun ase bé jájá mmeli’n. I bɔbɔ Nowe nin i yi nin i mma mun, ɔ nin i mma’m be yi’m be sɔli junman sɔ’n i dilɛ w’a di afuɛ kpanngban. Sanngɛ junman ng’ɔ ka’n te sɔn.

Nowe i asa’n su lɔfuɛ’m be bu i kɛ Nowe nin i awlobo’n, be ti w’a saci. Kɛ bé bóbó like kɛ mmeli sa’n bé kɔ́’n, nn sran’m bé srí be. Sran sɔ’m be bumɛn i kɛ nzue wá tɔ́ dí asiɛ wunmuan’n. Be liɛ’n, ɲrɛnnɛn sa sɔ mɔ Nowe kɛn i ndɛ kle be titi’n, ɔ kwlá juman sakpa, naan Nowe su cɛn laliɛ. Be usa be wun kɛ: ?Ɔ yo sɛ ti yɛ sran kun kwla kle i bɔbɔ nin i awlofuɛ’m be yalɛ be di finfin junman kɛ ngalɛ sa ɔ? Sanngɛ Ɲanmiɛn Zoova mɔ Nowe su i’n i liɛ’n, w’a bumɛn i kɛ Nowe i ti w’a saci.

Ɲanmiɛn Ndɛ’n waan: “Noe nin Nyanmiɛn be nuan sɛ.” (Bo Bolɛ 6:9, 10) Ndɛ sɔ’n i bo yɛle kɛ Nowe lafili Ɲanmiɛn su yɛ i ɲin yili i kpa. Kpɛkun ɔ yoli Ɲanmiɛn klun sa titi. Asa ekun’n, ɔ nin Zoova be trali janvuɛ tankaan kpa. Kɛ afuɛ akpi kpanngban sinnin’n, Biblu’n kannin Nowe i ndɛ seli kɛ: “Ɔ buli mɛnfuɛ’m be fɔ, [...] Nyanmiɛn su b’ɔ lafi’n ti.” (Ebre Mun 11:7) ?Wafa sɛ yɛ ɔ kwla yoli sɔ ɔ? ?Ngue yɛ Nowe i Ɲanmiɛn sulafilɛ’n kle e ɔ?

KLUNWI YOLƐ’N TRULI MƐN’N NUN SANNGƐ NOWE NANTILI SEIN

Nowe i nannannannan Enɔki nin Ɲanmiɛn be nantili klanman. I blɛ su bɔbɔ’n, nn asiɛ’n i sufuɛ’m b’a saci. Ɔ maan Enɔki seli kɛ cɛn wie lele’n, Ɲanmiɛn wá dí be nga be sroman Ɲanmiɛn bɔbɔ’n, be jɔlɛ. Sanngɛ Nowe blɛ su’n, sa tɛ yolɛ’n wa yoli tɛ trali su. Sran’m be sacili ndɛndɛ kpa. Ɔ maan kɛ Nowe yó kpɛnngbɛn’n, nn asiɛ’n i sufuɛ’m b’a wie saci. Be sa kekleekle yolɛ ti’n, Zoova ɲrun’n, sran’m be sacili mlɔnmlɔn. (Bo Bolɛ 5:22; 6:11; Zid 14, 15) ?Ngue ti yɛ sran’m be yoli sɔ ɔ?

Anzi mɔ be ti Ɲanmiɛn i mma mun’n, be yoli sa kun m’ɔ nin yolɛ fataman’n. Yɛle kɛ ka naan Nowe i blɛ liɛ’n w’a ju’n, be nun kun jasoli Zoova wun yɛ ɔ kacili mmusu Satan. Afin ɔ buali Ɲanmiɛn i su ato, kpɛkun ɔ lakali Adam nin Ɛvu, ɔ maan be yoli sa tɛ. Sanngɛ Nowe blɛ su’n, anzi wie mun ekun be wa jasoli Zoova i wun. Be yacili junman nga Ɲanmiɛn mannin be ɲanmiɛn su lɔ’n be bali asiɛ’n su wa. Be kacili be wun klɔ sran, kpɛkun be jali bla nglanman mun. Anzi tutrefuɛ nin ɲin keklefuɛ sɔ mɔ be ngunmin be wun akunndan yɛ be bu’n, be nzuɛn’n sacili klɔ sran mun.​—Bo Bolɛ 3:1-5; 6:1, 2; Zid 6, 7.

Asa ekun’n, anzi sɔ mɔ be kacili be wun klɔ sran’n, be nin bla nga be jali be’n be wuli ba wie mun. Ba sɔ’m be ti jajraajra kpa yɛ be wunmiɛn liɛ’n, be kanman. Sa kekleekle yofuɛ sɔ’m be yoli maan nzaje sa nin Ɲanmiɛn i su ɲin kekle yolɛ’n, ɔ wa yoli dan trali laa’n. I kwlaa sɔ’n ti’n, kɛ Ɲanmiɛn m’ɔ ti like kwlaa yifuɛ’n ɔ niannin asiɛ’n, ɔ wunnin kɛ “sran’m be klunwi’n kɔ i nyrun cɛn’n kwlaa. Kɛ aliɛ’n cɛ́n b’ɔ́ sán’n, wuun be klun akunndan’n yó tɛ kɔ́ i nyrun.” I sɔ’n ti’n, Zoova seli kɛ sɛ afuɛ 120 sin’n, ɔ́ núnnún sa tɛtɛ yofuɛ sɔ’m be kwlaa kpan.​—Bo Bolɛ 6:3-5.

Kɛ e niɛn i sa’n ba talɛ blɛ sɔ nun’n, ɔ́ wá yó kekle kpa. Sanngɛ Nowe kwla tɛli i mma mun kpa. Ɔ jali bla kpa kun. Yɛ kɛ Nowe dili afuɛ 500 m’ɔ́ kɔ́ i ɲrun’n, i yi wa wuli ba yasua nsan mɛnnin i. Be flɛ be kɛ Sɛmu, Kamu yɛ Zafɛti.a Ɔ fata kɛ Nowe nin i yi be bo yo kun be sasa be naan be mantanfuɛ tɛtɛ sɔ’m b’a saciman be. Kɛ ba yasua kanngan’m be o lɛ’n, be nga ‘be ti sran jajraajra’ ɔ nin yasua nga ‘be dunman’n fu’n’ be yo be ɲɛnmɛn. I sɔ sran kusu yɛle anzi’m be mma sɔ mun. Nowe nin i yi be kwlá yoman naan be mma’m b’a timan abɔlɛ sa sroesroe nga sran jajraajra’m be yo’n, be su ndɛ wie fi. Sanngɛ Ɲanmiɛn Zoova m’ɔ kpɔ klunwi sa’n kwlaa’n, i su ndɛ m’ɔ yo fɛ’n be kwla kan kleli be. Be ukali be mma mun naan be wun i wlɛ kɛ nzaje sa nin ɲin kekle nga sran’m be yo i mɛn’n nun’n, be yo Zoova i ya.​—Bo Bolɛ 6:6.

Siɛ nin niɛn’m be kwla wun sa ng’ɔ juli Nowe nin i yi be su’n i wlɛ. Afin kɛ Nowe blɛ su sa’n, andɛ’n nzaje sa nin ɲin kekle yolɛ’n w’a saci lika’n. I li bɔbɔ’n, be dimɛn i sɔ’n i yalɛ bakanngan’m be ɲin su yiyilɛ ninnge’m be nun. Siɛ nin niɛn nga be fa ngwlɛlɛ nanti’n, be yo like kwlaa nga be kwla yo naan be mma’m b’a nianman aeliɛ tɛ su’n. Yɛle kɛ Zoova m’ɔ ti Ɲanmiɛn m’ɔ klo kɛ sran’m be tran fɔun’n mɔ i waan cɛn wie lele ɔ́ núnnún nzaje sa’n kwlaa’n, be kɛn i su ndɛ be kle be. (Jue Mun 11:5; 37:10, 11) Kannzɛ mɛn’n w’a saci’n, sanngɛ ba’m be kwla suan sa kpa yolɛ. Nowe nin i yi be kwla ukali be mma mun. Be mma’m be ɲinnin be yoli sran kpa. Yɛ bla nga be jali be’n, be kusu be kplinnin su kɛ bé fá Ɲanmiɛn Kpli Zoova i klun sa yolɛ’n bé síe i like kwlaa ɲrun.

“BOBO LIKE KUN KƐ MMELI SA”

Cɛn kun’n, Nowe i mɛn dilɛ wafa’n wa kacili mlɔnmlɔn. Yɛle kɛ Zoova kannin sa nga ɔ guguli kɛ ɔ́ yó’n, i ndɛ kleli i sufuɛ kpa sɔ’n. Ɔ seli Nowe kɛ ɔ́ wá núnnún i blɛ su mɛn’n. Yɛ ɔ wlali Nowe i su nun kpongbongbo kɛ ɔ fa “waka fa bobo like kun kɛ mmeli sa.”​—Bo Bolɛ 6:14.

Sran wie’m be waan like sɔ’n, ɔ ti kɛ mmeli kun nga mun sa. Sanngɛ nɛ́n i sɔ sakpa ɔ. Afin ɔ lemɛn i ti lika, yɛ ɔ lɛmɛn i bo lika. Ɔ leman like mɔ be fa cisan nun, annzɛ be fa tinngɛ i ɔ. Sanngɛ ɔ ti kɛ alaka kpli wie sa. Wafa nga ɔ fata kɛ Nowe kplan mmeli sɔ’n Zoova yiyili i kwlaa nun sɛsɛsɛ kleli i. I sin’n, ɔ seli Nowe kɛ ɔ fa gudrɔn kɛn i klun nin i sin’n. Like nga ti yɛ i waan Nowe yo sɔ’n ɔ yiyili nun. Ɔ seli i kɛ: “Ń wá tɔ́ anannganman su nzue kun asiɛ’n su [...]. Ń kún asiɛ’n su ninnge’m be kwlaa.” Sanngɛ Zoova seli Nowe ekun kɛ: “A nin ɔ yi, nin ɔ mma mun, ɔ nin ɔ mma’m be yi mun, án wlú mmeli’n nun.” Asa kusu’n, ɔ fata kɛ Nowe fa nnɛn wafawafa kwlaa be nun wie wlu like kɛ mmeli sa’n nun. Be nga bé trán mmeli sɔ’n nun’n, be yɛ bé ɲán be ti ɔ.​—Bo Bolɛ 6:17-20.

Junman ng’ɔ fata kɛ Nowe di’n, ɔ timan aɔwi. Ɔ fata kɛ mmeli sɔ’n yo dan kpa. Yɛle kɛ maan i tɛnndɛn nun’n yo mɛtri 120 tra su, i tɛtrɛ nun’n yo mɛtri 20 tra su, yɛ i nglonglo su’n yo mɛtri 10 tra su. I dan tra e blɛ liɛ su jenvie su mmeli nga be fa waka be bobo’n be nun dan kpafuɛ’n lele. ?Kɛ Nowe wunnin junman’n i kekle m’ɔ kwla yo’n, ɔ kunndɛli kɛ ɔ́ kpɛ́ Ɲanmiɛn i atinsrɛ, annzɛ ɔ ijɔijɔli i konviabo? ?Ɔ kunndɛli kɛ ɔ́ kpɛ́ wafa nga Ɲanmiɛn waan ɔ di junman’n i wun kan naan w’a yo pɔpɔ i sa nun? Biblu’n tɛ su kɛ: “Noe yoli i kwlakwla ng’ɔ o lɛ’n kpan! Ndɛ nga Nyanmiɛn fa sieli i nyrun’n, ɔ niannin i kwlaa su yoli.”​—Bo Bolɛ 6:22.

Be dili junman’n afuɛ kpanngban kpa. Atrɛkpa’n be dili junman’n afuɛ kɔe 50. Ɔ fata kɛ be bu waka mun, be kpɛkpɛ be nun, be cuɛn be ase, be sɛsɛ be wun naan be fa be sasa be wiengu su. Ɔ fata kɛ mmeli’n i klun lɔ’n ɲan etazi nsan, yɛ be kpɛkpɛ nun sua ba sua ba. Naan kusu be kpɛ anuan i bue kun su. E kwla se kɛ be kpɛli fenɛtri i nglo lɔ, kpɛkun be mɛnnin i ti afiɛn lɔ’n su kan naan kɛ nzue’n tɔ́’n w’a kwla sonji w’a gua.​—Bo Bolɛ 6:14-16.

Kɛ afuɛ’m bé sín mɔ mmeli’n i kplanlɛ’n kɔ́’n i ɲrun’n, e kwla se kɛ Nowe dili aklunjuɛ afin i awlofuɛ’m be suɛnnin i bo kpa! Sanngɛ junman’n i wafa kun o lɛ’n, kɔlɛ i dilɛ’n i kekle trali mmeli’n i kplanlɛ’n bɔbɔ. Biblu’n kan junman sɔ’n i ndɛ. Ɔ se e kɛ: ‘Noe bo sa nga be yo-ɔ ɔ ti su’n i ndolo.’ (2 Piɛr 2:5) Nowe i blɛ su klunwifuɛ mun nin sran mɔ be buman Ɲanmiɛn i like fi’n, be nunnunlɛ mɔ Ɲanmiɛn su wa nunnun be’n, Nowe kannin i ndɛ yakpa su kleli be. ?Kɛ be tili ndɛ nga Nowe kannin’n, ngue yɛ be yoli ɔ? I nun nga Zezi Klist kán blɛ sɔ’n i ndɛ’n, ɔ seli kɛ sran sɔ’m “b’a buman like fi akunndan.” I waan be bɔbɔ be ninnge’m be yolɛ kɛ aliɛ dilɛ nin nzan nɔnlɛ ɔ nin bian nin bla jalɛ mɔ be fali be ɲin bloli nun dan’n ti’n, b’a sieman be su Nowe i nuan bo. (Matie 24:37-39) E kwla se kɛ sran kpanngban be yoli Nowe nin i awlofuɛ’m be finfin. Atrɛkpa bɔbɔ’n, wie’m be wlɛnwlɛnnin i yɛ be yoli i kpokokpoko.

Sanngɛ Nowe nin i awlofuɛ’m be sa sin w’a bubuman be le. Be blɛ su’n, sran’m be bɔbɔ be ninnge liɛ’m be yolɛ’n yɛ ɔ ti be cinnjin ɔn. Ɔ maan mmeli bobolɛ’n yoli be ɲrun sinnzin dilɛ annzɛ finfin junman. Sanngɛ Nowe nin i awlofuɛ’m b’a yaciman mmeli’n i bobolɛ. Andɛ’n, sɛ awlobo nga i nunfuɛ’m be ti Klistfuɛ’n be fa be ɲin sie i Nowe nin i awlofuɛ’m be Ɲanmiɛn sulafilɛ’n su’n, i sɔ’n kwla uka be kpa. Afin kɛ Biblu’n kán e blɛ liɛ’n i ndɛ’n, i waan e o mɛn’n ‘i bue nuan.’ (2 Timote 3:1) Zezi seli kɛ e blɛ liɛ’n nin blɛ nga Nowe kplannin mmeli’n bé yó kun. Kɛ Klistfuɛ’m be kan Ɲanmiɛn Sielɛ’n i ndɛ’n, sɛ mɛn’n nunfuɛ’m be sɔman nun annzɛ be yo be finfin annzɛ kusu be kle be ɲrɛnnɛn’n, maan be wla kpɛn Nowe su. Nán be ngunmin be blɛ su sa ɔ.

“WLU MMELI’N NUN”

Blɛblɛblɛ Nowe nin i awlofuɛ’m b’a wie mmeli’n i kplan. Kɛ Nowe wá ɲán afuɛ 600, i awlɛn su sran wie’m be wuli. I si Lemɛki wuli.b Kɛ afuɛ nnun sinnin’n, Lemɛki i si Mɛtisela m’ɔ ti Nowe i nannan’n ɔ wuli. Ɔ ɲannin afuɛ 969 yɛ ɔ wuli ɔ. Be nga Biblu’n kan be ndɛ’n, i kunngba cɛ yɛ ɔ cɛli juli sɔ ɔ. (Bo Bolɛ 5:27) Mɛtisela nin Lemɛki be nɲɔn’n, be nin Adam m’ɔ ti sran klikli’n, be ti blɛ kunngba’n nunfuɛ mun.

Afuɛ kunngba sɔ nun’n, Ɲanmiɛn Zoova kannin ndɛ kun ekun kleli Nowe. Ɔ seli i kɛ: “A nin wɔ awlofuɛ mun an wlu mmeli’n nun.” Ɲanmiɛn seli Nowe ekun kɛ ɔ fa nnɛn wafawafa’n kwlaa wlu mmeli’n nun. I waan ɔ fa nnɛn nga be di’n akpasua kunngun kwlaa nun nso. Maan be yo nga be kwla fa yi tɛ’n. Yɛ nga be diman’n akpasua kunngun kwlaa nun nɲɔn.​—Bo Bolɛ 7:1-3.

Sran nga sa kɛ ngalɛ’n sa’n yo i ɲrun’n, i wla kwlá fiman su. Afin kɛ ɔ́ nían’n, nnɛn wie’m bé bá be nanti, wie’m be cuɛn be wun ase, wie’m be tu kpɛn, yɛ wie’m be tu. Nnɛn sɔ mun kusu’n, wie’m be cɛnnin, wie’m be ti kaan, wie’m be ti tɛnndɛn, yɛ wie’m be yo wlɛ tra wie mun. Kɛ ɔ ko yo naan nnɛn sɔ’m b’a wlu mmeli’n nun lɔ’n, e kwla wun kɛ Nowe fɛli kpa. Afin ɔ fata kɛ ɔ kankan be yɛ ɔ nin be kpli, kpɛkun ɔ lualua be blɛblɛblɛ. Biblu’n waan “be wluli Nowe i sin” mmeli’n nun lɔ.​—Bo Bolɛ 7:9.

Akplowa sifuɛ wie’m be kwla usa kɛ: ‘?Wafa sɛ yɛ i sɔ sa liɛ’n kwla yo ye ɔ? ?Wafa sɛ yɛ nnɛn kwlaa sɔ’m be kwla tran lika kaan sɔ’n nun fɔun ɔn?’ Maan amun bu sa nga i akunndan: ?Nglo nin asiɛ’n be Yifuɛ’n i sa kwlá sɔnman nnɛn m’ɔ yili be’n be su? ?Ɔ kwlá yoman naan b’a sro sran naan kusu b’a lo? Maan an wla kpɛn su kɛ Zoova yɛ ɔ kpacili ndɛ mma jenvie nun ɔn. I kunngba’n yɛ ɔ yoli maan wia’n kɛli i osu kunngba’n nun lɛ lele’n niɔn. ?Yɛ Nowe blɛ su sa ngalɛ mun yɛ ɔ kwlá yoman be ɔ? I yo, ɔ kwla yo, yɛ ɔ yoli kusu.

Ɔ ti su kɛ Ɲanmiɛn kwla yo like uflɛ le nnɛn mun. Sanngɛ, ɔ fali be wlali Nowe sa nun. I sɔ m’ɔ yoli ti’n, e wla kpɛn ndɛ nga mɛn’n i bobolɛ nun ɔ kannin’n su. Yɛle kɛ, maan sran’m be nian ninnge kwlaa nga nguan o be nun’n be lika. (Bo Bolɛ 1:28) Andɛ’n, siɛ nin niɛn sunman be fa Nowe i su ndɛ’n kle be mma mun kɛ nnɛn nin sran’m be ndɛ lo Zoova.

Zoova seli Nowe kɛ ɔ ka le mɔcuɛ kun nzue dan’n tɔ́. Kɛ e niɛn i sa’n, ɔ fata kɛ Nowe nin i awlofuɛ’m be ngba be kan be wun be yo ninnge mun. Amun bɔbɔ amun nian. Ɔ fata kɛ be siesie nnɛn nin ndidiɛ ninnge mun sɛsɛsɛ mmeli’n nun. Yɛ ɔ fata kɛ be fa be bo ninnge’n kwlaa be wla nun wie. Kɔlɛ Nowe i yi’n nin Sɛmu nin Kamu yɛ Zafɛti be yi liɛ mun be niannin nun kpa be siesieli mmeli’n nun naan i nun tranlɛ’n w’a yo fɛ.

?Yɛ be blɛ sufuɛ’m be li? Kannzɛ bɔbɔ sa’m be kleli kɛ Zoova su yra Nowe nin i junman’n be su’n, sanngɛ “b’a buman like fi akunndan.” Be wunnin kɛ nnɛn’m be su lɔngɔ su be wlu mmeli’n nun, sanngɛ i sɔ’n w’a yoman be like. Ɔ fataman kɛ i sɔ’n bo e nuan. Andɛ bɔbɔ’n, sran’m be buman ninnge kpanngban nga be kle kɛ e o mɛn nga i bue nuan’n be like. Yɛ kɛ nga akoto Piɛli fa kannin’n sa’n, sran finfin yofuɛ’m be o lɛ. Be yo be nga be sie be su ndɛ nga Ɲanmiɛn kan’n i bo’n be finfin. (2 Piɛr 3:3-6) Kɛ be yoli Nowe nin i awlofuɛ’m be finfin sɔ wie ɔ.

?Blɛ benin nun yɛ be yacili be finfin yolɛ ɔ? Biblu’n waan kɛ Nowe fɛli i awlofuɛ nin nnɛn mun wluli mmeli’n nun wieli’n, Zoova ‘nyinnin Noe su anuan.’ Sɛ sran finfin yofuɛ sɔ’m be nun wie o lɛ blɛ sɔ’n nun’n, like nga Ɲanmiɛn yoli i lɛ’n ti’n ɔ́ trán diin. Sɛ w’a yoman sɔ bɔbɔ’n kɛ nzue dan’n boli i bo’n saan ɔ́ yó sɔ. Afin kɛ be se kɛ nzue tɔ’n yɛ ɔ tɔli ɔ! Ɔ tɔli lele dili asiɛ wunmuan’n kɛ nga Zoova fa kannin’n sa.​—Bo Bolɛ 7:16-21.

?Sa tɛ yofuɛ sɔ’m be wie’n, ɔ yoli Zoova i fɛ? Cɛcɛ! (Ezekiɛl 33:11) Kɛ mɔ w’a kunndɛman kɛ be wu’n ti’n, ɔ mannin be blɛ naan be kaci be yo sa kpa. ?Sanngɛ yoo, sɛ be waan bé yó sɔ’n nn be kwla yoli? Nowe i mɛn dilɛ wafa’n uka e naan y’a wun i wlɛ. Nowe nin i Ɲanmiɛn Zoova be nantili klanman yɛ i ɲin yili i sa kwlaa nun. Ɔ maan ɔ kleli kɛ be kwla yo sa kpa naan be fite nun. I sɔ nun’n, ɔ buli i mɛnfuɛ’m be fɔ. Ɔ yoli maan be klunwi aeliɛ’n i ɲin fiteli weiin. I Ɲanmiɛn sulafilɛ’n ti’n, sa w’a ɲanman i bɔbɔ nin i awlofuɛ mun. Sɛ amun lafi Ɲanmiɛn su kɛ Nowe sa’n, amun kwla le amun bɔbɔ ɔ nin amun awlɛn su sran mun. Kɛ Nowe sa’n amun nin Ɲanmiɛn Zoova amun nuan kwla sɛ yɛ amun tra janvuɛ. Kpɛkun amun kwla ka janvuɛ nun anannganman!

[Ja ngua lɛ ndɛ mun]

[Foto, bue 28]

[Foto, bue 29

Ɔ fata kɛ Nowe nin i yi be sasa be mma mun aeliɛ tɛtɛ’m be lika.

[Foto, bue 30 31]

Kannzɛ sa’m be kleli kɛ Ɲanmiɛn yra Nowe su’n, sanngɛ sran’m be yoli i finfin yɛ b’a tieman i nuan ndɛ’n.