“Be kannin ndɛ lika’n kwlaa”

‘An wɔ ko kle nvlenvle’n kwlaa be like maan be kaci n sɔnnzɔnfuɛ, yɛ an yo be batɛmu e Si Ɲanmiɛn, nin i Wa’n, ɔ nin i wawɛ’n be dunman nun.’—MATIE 28:19.

1, 2. (a) ?Junman mennin yɛ Zezi fa mɛnnin i sɔnnzɔnfuɛ mun ɔn? (b) ?Ɔ yo sɛ yɛ maan Klistfuɛ klikli’m be kwla dili junman’n i dan kpa ɔ?

KƐ Ɔ ka kan naan Zezi w’a ɔ ɲanmiɛn su’n, ɔ mɛnnin i sɔnnzɔnfuɛ’m be junman kun. Ɔ seli be kɛ: ‘An wɔ ko kle nvlenvle’n kwlaa be like maan be kaci n sɔnnzɔnfuɛ, yɛ an yo be batɛmu e Si Ɲanmiɛn, nin i Wa’n, ɔ nin i wawɛ’n be dunman nun.’ (Matie 28:19). Nanwlɛ, junman dan a o!

² Amun e bu i sin e nian! Afuɛ ablasan nin nsan (33) nun E.B.N. (E Blɛ liɛ Nun) Pantekɔti nun’n, Ɲanmiɛn wawɛ’n wluli Zezi i sɔnnzɔnfuɛ kɔe sran ya kun sran ablaɔn (120) be nun. Kpɔkun be boli junman sɔ’n i dilɛ’n i bo. Yɛle kɛ be seli sran’m be kɛ, Mɛsi mɔ be minndɛ i kɛ ɔ wa de be’n, yɛle Zezi (Sa Nga Be Yoli’n 2:1-36). ?Wafa sɛ yɛ sran akpasua kaan sɔ’n bé kwlá dí junman’n nvlenvle’n kwlaa nun ɔn? Sɛ ɔ ka sran’m be ngunmin ti’n, ɔ su yoman ye. Sanngɛ ‘Ɲanmiɛn kwla sa’n kwlaa yo.’ (Matie 19:26). Zoova wawɛ’n suannin Klistfuɛ klikli’m be bo. Ɔ maan, be jrannin su kpa be boli jasin fɛ’n (Zakari 4:6; 2 Timote 4:2). Kɛ ɔ dili blɛ kan’n, akoto Pɔlu seli kɛ be boli jasin fɛ’n kleli “asiɛ’n sufuɛ’m be kwlaa.”—Kolɔsfuɛ Mun 1:23.

3. ?Ngue yɛ ɔ katali Klistfuɛ kpa mɔ “awie’n” ti be nzɔliɛ’n be su ɔ?

³ Afuɛ ya kpɔlɛ klikli’n nun’n, Ɲanmiɛn sulɛ kpafuɛ’n w’a yaciman trulɛ. Sanngɛ Zezi seli kɛ blɛ wie wá jú’n, Satan wá gúa “awie ijre mma” naan ɔ fifi kata Klistfuɛ kpa mɔ “awie’n” ti be nzɔliɛ’n be su. I sɔ liɛ’n, ɔ́ dí afuɛ ya kpɔlɛ kpanngban kpa lele naan awie kpɛlɛ blɛ’n w’a ju. Kɛ akoto’m be wuli’n, ndɛ sɔ’n kpɛnnin su.—Matie 13:24-39.

E trɛ ndɛndɛ kpa andɛ

4, 5. ?Kɛ ɔ fɛ i afuɛ 1919 nun’n, junman mennin yɛ Klistfuɛ nga be kpali be sieli be ngunmin’n be boli i dilɛ bo ɔ? ?Yɛ ngue ti yɛ ɔ yoli junman dan be sa nun ɔn?

⁴ Afuɛ akpi kun afuɛ ya ngwlan afuɛ blu nin ngwlan (1919) nun’n, blɛ nga ɔ fata kɛ be kpɛ Klistfuɛ kpa’m be awie’n naan be sie i nin awie ijre’n be ngunminngunmin’n, ɔ boli i bo. Be nga be kpali be sieli be ngunmin’n, be wunnin i wlɛ kɛ junman nga Zezi fa mannin be’n ɔ nin a wieman. Be wunnin i wlɛ weiin kpa ekun kɛ be o ‘mɛn’n i bue nuan.’ Ɔ maan, be ɲin w’a tuman ndɛ nga Zezi kannin’n, i su. Ɔ seli kɛ: ‘Bé wá kán Ɲanmiɛn Sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (2 Timote 3:1; Matie 24:14). Nanwlɛ, be wunnin i wlɛ kɛ junman dan kpa te o be ɲrun.

⁵ Kɛ nga junman fa yoli dan E.B.N. afuɛ 33 nun Klistfuɛ klikli’m be sa nun sa’n, junman’n nga ɔ fata kɛ be nga be kpali be sieli be ngunmin’n be di’n, ɔ ti dan wie. Be ti sran akpi kpɔlɛ kan. Kpɔkun nvle nga be o be nun’n, b’a sɔnman. ?Bé yó sɛ naan b’a kwla bo jasin fɛ’n “mɛn wunmuan’n nun?” Nán maan e wla fi su kɛ Sezali’m be blɛ su’n, asiɛ’n su sran’m be ti miliɔn ya nsan (300.000.000). Sanngɛ kɛ alɛ dan’n i klikli’n wieli’n, asiɛ su sran’m be wa yoli miliali nɲɔn (2.000.000.000). Ɔ maan, afuɛ ya kpɔlɛ ablaɔn (20) nun’n, asiɛ’n su sran’m bé trɛ́ bé kɔ́ be ɲrun ndɛndɛ.

6. ?Lele m’ɔ́ fá jú afuɛ 1935 nun’n, wafa sɛ yɛ jasin fɛ’n truli ɔ?

⁶ Sanngɛ, kɛ afuɛ ya kpɔlɛ klikli nun Klistfuɛ’m be liɛ’n sa’n, Zoova i sufuɛ nga ɔ kpali be sieli be ngunmin’n be lafili i su be dili junman’n. Ɔ maan, ɔ fɛli i wawɛ’n suannin be bo. Lele m’ɔ́ fá jú afuɛ akpi kun afuɛ ya ngwlan afuɛ ablasan nin nnun (1935) nun’n, nn jasin bofuɛ’m be ti akpiakpi ablenun nin nsiɛn (56.000). Be kan Biblu’n nun nanwlɛ ndɛ’n nvle ya kun blu nin nnun (115) be nun. I sɔ’n kle kɛ be dili junman’n, sanngɛ i dan lika ekun te o be ɲrun lɔ.

7. (a) ?Afuɛ 1935 nun’n, junman dan uflɛ mennin yɛ ɔ wa trannin be nga be kpali be sieli be ngunmin’n be sa nun ɔn? (b) ?Kɛ mɔ ‘bua’m be wie mun’ be ukali be nga be kpali be sieli be ngunmin’n ti’n, wafa sɛ yɛ sran’m be yialɛ junman’n truli andɛ ɔ?

⁷ I sin’n, kɛ be wa wunnin “sran kpanngban kpa” mɔ Sa Nglo Yilɛ 7:9 kan be ndɛ’n be wlɛ kpa’n, be wunnin kɛ junman dan kpa o be ɲrun. Sanngɛ kusu’n, junman difuɛ dan sɔ’m bé ɲán ukafuɛ. Sran kpanngban kpa mɔ yɛle ‘bua’m be wie mun,’ mɔ be lafi su kɛ bé trán asiɛ’n su tititi’n, mɔ ‘be fin mɛnmɛn’n kwlaa nin nvlenvle’n kwlaa nun, nin sran wafawafa’n kwlaa be nun’n, mɔ be ijɔ aniɛn wafawafa’n kwlaa’n,’ ɔ fata kɛ be yia be (Zan 10:16). Sran sɔ’m be kusu ‘be su [Zoova, NW] wia nun nin kɔnguɛ.’ (Sa Nglo Yilɛ 7:15). Jasin fɛ’n bolɛ nin sran’m be like klelɛ junman dilɛ’n nun’n, be uka be nga be kpali be sieli be ngunmin’n (Ezai 61:5). Laa’n, jasin bofuɛ’m be trɛli ɔli be ɲrun akpi kpɔlɛ blu blu. Sanngɛ siɛn’n akpingbin nun yɛ be trɛ kɔ be ɲrun ɔn, i sɔ’n jɔ Klistfuɛ nga be kpali be sieli be ngunmin’n be klun dan kpa. Afuɛ akpi nɲɔn nin nsan (2003) nun’n, jasin bofuɛ miliɔn nsiɛn sran akpiakpi ya nnan sran akpiakpi ablaɔn nin ngwlan sran ya nsan nin sran ablenun nin kun (6.429.351) nga be boli jasin fɛ’n, be dan lika be fin sran kpanngban kpa’m be nun.a Klistfuɛ nga be kpali be sieli be ngunmin’n be si be ukalɛ sɔ’n i su ye. Kpɔkun be nga be ti bua’m be wie’m be kusu’n, be si be niaan nga be kpali be sieli be ngunmin’n be ukalɛ m’ɔ ti be cenjele like’n, i su ye.—Matie 25:34-40.

8. ?Alɛ dan’n i nɲɔn su nun’n, wafa sɛ yɛ Zoova i Lalofuɛ’m be tɛli yalɛ dandan nga be kleli be’n su ɔ?

⁸ Kɛ be wunnin sran mɔ be ti awie’n i nzɔliɛ’n be wlɛ weiin’n, Satan wlali be sin alɛ dan kpa (Sa Nglo Yilɛ 12:17). ?Kɛ be boli sran kpanngban kpa’m be yialɛ’n i bo’n, ngue yɛ Satan yoli ɔ? Sa nga ɔ yoli’n, yɛle kɛ ɔ yoli abɔlɛ sa tɛ kpa! ?Sɛ e se kɛ alɛ dan nɲɔn su’n i nun’n, Satan yɛ maan be kleli Ɲanmiɛn sufuɛ kpa’m be yalɛ’n, é sí i su akplowa lele? Alɛ kunfuɛ akpasua nɲɔn’n, be kleli Klistfuɛ’m be yalɛ dan kpa. E niaanbian nin e niaanbla kpanngban mɔ be ti e awlɛn su sran’n, be wunnin ɲrɛnnɛn dan. Be Ɲanmiɛn sulafilɛ’n ti’n, be nun wie’m be wuli. Jue nga jue tofuɛ’n toli’n, be toli wie. I waan: ‘Ń lá Ɲanmiɛn ase i ndɛ’n ti, n lafi i su, ɔ maan srɛ kunman min. ?Ngue like bɔɔ cɛ yɛ klɔ sran kwla yo min ɔn?’ (Jue Mun 56:5; Matie 10:28). Zoova wawɛ’n mannin Klistfuɛ nga be kpali be sieli be ngunmin’n ɔ nin bua’m be wie mun be wunmiɛn. Ɔ maan be bo yoli kun be jrannin kekle (2 Korɛntfuɛ Mun 4:7). I sɔ ti’n, ‘Ɲanmiɛn ndɛ’n truli.’ (Sa Nga Be Yoli’n 6:7). Kɛ alɛ dan’n boli i bo afuɛ akpi kun afuɛ ya ngwlan afuɛ ablasan nin ngwlan (1939) nun’n, Klistfuɛ nanwlɛfuɛ akpiakpi ableso nin nɲɔn sran ya nnan sran ableso nin nnun (72.475) be mannin be jasin fɛ’n bolɛ’n i su rapɔru. Sanngɛ afuɛ akpi kun afuɛ ya ngwlan afuɛ ablanan nin nnun (1945) nun’n, yalɛ nga be kleli aniaan mun’n ti’n, nán be ngba yɛ be kwla mannin be rapɔru’n niɔn. Sanngɛ rapɔru nga be mannin’n, be kleli kɛ Zoova i Lalofuɛ akpiakpi ya akpiakpi ablenun nin nsiɛn sran ya nɲɔn ablangwlan nin ngwlan (156.299) b’a yaciman jasin fɛ’n i bolɛ. Nanwlɛ, Satan kleli i wun yalɛ ngbɛn!

9. ?Alɛ dan’n i nɲɔn su nun’n, suklu uflɛ nɲɔn mennin yɛ be kpɛli be ba ɔ?

⁹ Nanwlɛ, alɛ dan’n i nɲɔn su nun’n, lika’n yoli sukusuku dan. Sanngɛ w’a baman Zoova i sufuɛ’m be angunndan nun kɛ be jran be jasin fɛ’n bolɛ’n i le. I li bɔɔ, afuɛ akpi kun afuɛ ya ngwlan afuɛ ablanan nin nsan (1943) nun mɔ alɛ’n ɔ́ kpí kpa’n, be kpɛli suklu uflɛ nɲɔn be ba. Suklu sɔ mɔ andɛ be flɛ kun kɛ Ɲanmiɛn junman dilɛ suklu’n, ɔ kle Zoova i Lalofuɛ’m be wafa nga be tinuntinun be kwla yo naan sran’m b’a kaci Zezi i sɔnnzɔnfuɛ’n. I nɲɔn su’n yɛle l’École biblique de Guiléad de la Société Tour de Garde, ɔ kle ngaliɛ difuɛ’m be wafa nga be kwla bo jasin fɛ’n nvle uflɛ’m be nun’n. Nanwlɛ, kɛ alɛ’n fá wíe’n, nn Klistfuɛ kpa’m b’a siesie be wun naan bé dí junman’n i dan kpa liɛ su kɔ́ i ɲrun.

10. ?Afuɛ 2003 nun’n, wafa sɛ yɛ Zoova i nvle’n i juejue su like yolɛ’n i ɲin fiteli ɔ?

¹⁰ Junman nga be dili’n, ɔ yo ɲɛnmɛn dan o! I gbaflɛn nin talua mun o, i kpɛnngbɛn mun o, i siɛ nin niɛn mun yɛ ba kanngan mun o, i bubuwafuɛ nin cɛcɛwafuɛ mun o, be kwlaa nga be suannin Ɲanmiɛn junman dilɛ suklu’n i bo lɔ like’n, be boli jasin fɛ’n titi. Yɛ kɛ nga Zezi seli be kɛ be yo’n sa’n, be te yo i sɔ titi (Jue Mun 148:12, 13; Zoɛl 3:1, 2). Afuɛ 2003 nun’n, kɛ ɔ ko yo naan sran akpiakpi ya mɔcuɛ sran akpiakpi ablaɔn nin nnun sran ya kun ablaɔcuɛ nin nnun (825.185) b’a kle kɛ be wun i wlɛ kpa kɛ blɛ nga e o nun yɛ’n ɔ ti cinnjin kpa’n ti’n, be dili cɛn kunngun atin bofuɛ annzɛ titi atin bofuɛ junman. Afuɛ kunngba sɔ nun’n, Zoova i Lalofuɛ’m be dili dɔ miliali kun dɔ miliɔn ya nɲɔn ablasan nin nnan dɔ akpiakpi ya nso akpiakpi ablangwlan nin nsiɛn dɔ ya nnan dɔ ableso nin nso (1.234.796.477) Ɲanmiɛn Sielɛ Blɛ’n i jasin fɛ’n bolɛ nun. Zoova klun jɔ i nvle’n i juejue su like yolɛ’n su sakpa!

Nvle uflɛ’m be nun

11, 12. ?Sa mennin yɛ ɔ yi junman dan nga ngaliɛ difuɛ’m be dili’n i nglo ɔ?

¹¹ Kɛ blɛ’m be sín’n, Gileadi suklu ba mun, ɔ nin koko nga nun École de formation ministérielle suklu ba’m be dili junman kun m’ɔ yo ɲɛnmɛn ɔn. Afuɛ akpi kun afuɛ ya ngwlan afuɛ ablanan nin nnun (1945) nun’n, kɛ ngaliɛ difuɛ klikli’m bé jú Brezili lɔ’n, nn jasin bofuɛ nga be o nvle sɔ nun’n, be traman sran ya nnan (400) ngboko. Ngaliɛ difuɛ sɔ mun be nin ngaliɛ difuɛ nga be bali kasiɛn’n su’n, be kwlaa be nin Brezili lɔ aniaan’m be bo yoli kun be dili junman’n i juejue su. Kpɔkun Zoova yrali be su dan kpa. Nanwlɛ, sran kwlaa nga i wla kpɛn Brezili lɔ laa ndɛ sɔ’n su’n, aklunjuɛ cɛ yɛ ɔ́ dí ɔ. Afin afuɛ 2003 nun’n, lɔ jasin bofuɛ’m be juli sran akpiakpi ya nsiɛn sran akpi nso sran ya nsan sran ablesiɛn nin nɲɔn (607.362)!

¹² Amun e fa Zapɔn lɔ ndɛ liɛ’n naan e nian. Kwlaa naan b’a kun alɛ dan’n i nɲɔn su’n, nvle sɔ’n nun Ɲanmiɛn Sielɛ Blɛ jasin bofuɛ’m be ti sran ko ju ya kun. Alɛ blɛ sɔ nun’n, yalɛ dan nga be kleli be’n ti’n, be nun sunman be wuli. Kpɔkun kɛ alɛ’n wieli’n, Zoova i Lalofuɛ nga b’a yaciman Ɲanmiɛn i junman’n i dilɛ mɔ be fiteli nun’n, b’a sɔnman (Nyanndra Mun 2:7). Nanwlɛ, afuɛ akpi kun afuɛ ya ngwlan afuɛ ablanan nin ngwlan (1949) nun’n, aklunjuɛ su sran ndɛnmanfuɛ sɔ’m be sɔli ngaliɛ difuɛ blu nin nsan (13) klikli nga be dili Gileadi suklu’n, be nun. Kpɔkun ngaliɛ difuɛ’m be kusu’n, ndɛndɛ kpa, be fali be niaan Zapɔnfuɛ’m be yoli be awlɛn su sran. Kɛ afuɛ ablenun (50) sinnin’n, afuɛ 2003 nun’n, Zapɔn lɔ jasin bofuɛ’m be wa yoli sran akpiakpi ya nɲɔn akpiakpi blu nin nso sran ya nnun nin mɔcuɛ (217.508)! Nanwlɛ, Zoova yrali i sufuɛ nga be o nvle sɔ nun’n be su dan kpa. Ndɛ fɛ kɛ ngalɛ sa’m be o nvle sunman be rapɔru nun wie. Junman dan nga be nga be kwla boli jasin fɛ’n nvle uflɛ nun’n be dili’n ti’n, jasin fɛ’n truli dan kpa. I sɔ ti’n, afuɛ 2003 nun’n, klɔ nin nvle nga nzue sin yia be’n, ɔ nin mɛn’n i akpasua uflɛ wie’m be su’n, sran’m be kwla tili jasin fɛ’n. Lika sɔ’m be wunmuan’n be nuan’n ti ya nɲɔn nin ablasan nin nnun (235). Nanwlɛ, sran kpanngban kpa nga be ba’n, be fin “nvlenvle kwlaa nun.”

‘Be fin [...] nvlenvle’n kwlaa nun, sran wafawafa kwlaa o be nun, be ijɔ aniɛn wafawafa kwlaa’

13, 14. ?Wafa sɛ yɛ Zoova kleli kɛ ɔ ti cinnjin kɛ be bo jasin fɛ’n be kle be nga ‘be ijɔ aniɛn wafawafa kwlaa’n,’ niɔn?

¹³ E.B.N afuɛ 33 i Pantekɔti nun’n, kɛ Ɲanmiɛn wawɛ’n wluli Zezi i sɔnnzɔnfuɛ’m be nun’n, abonuan sa klikli nga be yoli’n, yɛle kɛ be ijɔli aniɛn nga Ɲanmiɛn wawɛ’n fa wlali be nuan kɛ be kan kle sran nga be yiali lɛ’n. Atrɛkpa’n, be nga be tieli be ijɔlɛ’n be kan aniɛn kun kɛ Glɛki aniɛn’n sa, mɔ sran sunman be kɛn i nvle kpanngban nun’n. Wie liɛ kusu’n, kɛ mɔ ‘be sro Ɲanmiɛn’n’ ti’n, atrɛkpa’n, be ti Ɲanmiɛn ndɛ mɔ be kɛn i Ebre aniɛn nun Ɲanmiɛn sua nun lɔ’n, i wie. Sanngɛ, kɛ be tili jasin fɛ’n be klɔ aniɛn’n nun’n, be fali be ɲin sieli ndɛ sɔ’n su kpa.—Sa Nga Be Yoli’n 2:5, 7-12.

¹⁴ Andɛ kusu’n, be bo jasin fɛ’n i aniɛn kpanngban nun. Kɛ nga Ɲanmiɛn Ndɛ’n fa kan’n sa’n, nán mɛnmɛn’m be ngunmin be nun yɛ sran kpanngban kpa’m be fin ɔn. Sanngɛ be fin ‘nvlenvle’n kwlaa, nin sran wafawafa kwlaa, yɛ be ijɔ aniɛn wafawafa kwlaa.’ I sɔ ti yɛ Zoova maan i nuan ijɔfuɛ Zakari seli kɛ: ‘Sɛ sran blu be aniɛn’n ti ngunminngunmin’n, bé kó trá Zuifu kunngba cenje i wun tralɛ’n i nuan su’n, kpɔkun bé sé i kɛ: “E nin amun yɛ é kɔ́ ɔ, afin e tili i kɛ Ɲanmiɛn’n wo amun sin.”’ (Zakari 8:23). Kannzɛ bɔbɔ Zoova i Lalofuɛ’m be ijɔman aniɛn uflɛ Ɲanmiɛn wawɛ’n i fanngan nun’n, sanngɛ be si kɛ sran’m be klɔ aniɛn’m be nun jasin fɛ’n bolɛ’n, ɔ ti like cinnjin kpa.

15, 16. ?Ngue yɛ ngaliɛ difuɛ’m be nin be wiengu’m be yoli naan b’a bo jasin fɛ’n nvle nga be o be nun’n, be aniɛn’m be nun ɔn?

¹⁵ Nanwlɛ, andɛ’n, sran kpanngban be kan aniɛn kɛ angle nin blɔfuɛ, ɔ nin kɛ ɛspaɲɔlu sa. Sanngɛ, be nga be jasoli be nvle’m be nun be ɔli Ɲanmiɛn junman dilɛ nvle uflɛ’m be nun’n, be miannin be ɲin be suannin aniɛn nga nvle sɔ’m be nunfuɛ’m be kan’n, naan b’a kwla bo jasin fɛ’n b’a kle “sran kpa” mun (Matie 10:11). I sɔ’n w’a yoman pɔpɔ be sa nun. Tuvalu ti nvle kun mɔ jenvie’n sin yiɛ i ɔ. Ɔ o asiɛ’n i lika nga be flɛ i Pacifique Sud i nun lɔ. Kɛ aniaan nga be o lika sɔ nun lɔ’n be sa miannin be klɔ aniɛn nun fluwa’m be wun’n, ngaliɛ difuɛ kun miɛnnin i ɲin dili junman kekle sɔ’n. Kɛ mɔ fluwa nga be fa tutu ndɛ mma’m be bo’n wie fi nunman lɛ aniɛn sɔ nun’n ti’n, ngaliɛ difuɛ sɔ’n klɛli ndɛ mma wie mun tiannin be nuan tuvalu aniɛn’n nun. Kɛ i osu cɛli kan’n, be wa yili fluwa Vous pouvez vivre éternellement sur une terre qui deviendra un paradisb aniɛn sɔ’n nun. Kɛ ngaliɛ difuɛ’m bé jú nvle nga be flɛ i kɛ Curaçao [Kurasao] su lɔ’n, nn Biblu’n i akua nin fluwa nga be tutu ndɛ mma’m be bo papiamento aniɛn nun’n, wie fi nunman lɛ. Kpɔkun wafa nga ɔ fata kɛ be kpɛ aniɛn sɔ’n i klɛlɛ ba’n, sran’m be te si i su akplowa dan kpa. Sanngɛ kɛ ngaliɛ difuɛ klikli’m be juli nvle sɔ’n nun lɔ mɔ be dili afuɛ nɲɔn’n, be yili fluwa nɲa klikli’n papiamento aniɛn’n nun. Kɛ e se yɛ’n, aniɛn ya kun aniɛn ablasan nin nsan (133) nga i nun yɛ be suan Sasafuɛ Tranwlɛ’n i nun like’n, ɔ nin angle aniɛn’n blɛ kunngba’n nun’n, papiamento aniɛn’n o nun wie.

¹⁶ Angola nvle nun lɔ’n, ngaliɛ difuɛ klikli’m b’a kwlá ɲanman Zoova i Lalofuɛ kun naan w’a uka be fluwa’m be kacilɛ nun. I li bɔɔ, ndɛ mma nga be fa flɛ like kɛ “like mɔ fɔ nunmɛn i nun” sa’n, ɔ lemɛn i wunsu Angola lɔ aniɛn’m be nun. Ngaliɛ difuɛ kun seli kɛ: “Fluwa’m be kacilɛ nun’n, suklu klefuɛ nga be su suan Biblu’n nun like’n be ukali min. Kɛ mɔ be siman nanwlɛ ndɛ’n i kpa’n ti’n, ɔ fata kɛ n niɛn i kpa sɛ like kwlaa nga e kaci’n ɔ ti i su sakpa o.” Sanngɛ be kwla kacili fluwa nɲa Mɛn uflɛ kun nun fɔundi tranlɛ Angola lɔ aniɛn kpanngban nun. Dɔ nga su’n, be suan Sasafuɛ Tranwlɛ’n i nun like umbundu m’ɔ ti Angola lɔ aniɛn’n, ɔ nin angle aniɛn’n nun blɛ kunngba’n nun.

17, 18. ?Junman dan kpa mennin yɛ be dili i Mɛksiki nvle’n ɔ nin nvle uflɛ’m be nun ɔn?

¹⁷ Mexique [Mɛksiki] lɔ’n, ɛspaɲɔlu yɛ sran sunman be kan ɔn. Sanngɛ kwlaa naan Ɛspaɲi lɔfuɛ’m b’a ju lɔ’n, sran’m be kan aniɛn kpanngban, yɛ kɛ é sé yɛ’n be te kan aniɛn sɔ’m be nun wie mun. Dɔ nga su’n, Zoova i Lalofuɛ’m be yili Biblu’n i akua mun Mɛksiki lɔ aniɛn nso ɔ nin lɔ bobofuɛ’m be aniɛn’n be nun. Amlɛnkɛn’m be mɛn nun lɔ ɛndiɛn aniɛn’m be nun fluwa nga ɔ fata kɛ be fite blɛ nga ɔ ti i nuan su’n i nun’n, Ɲanmiɛn Sielɛ Blɛ junman fluwa’n maya aniɛn nun’n, yɛ ɔ ti be nun klikli nga be yili’n niɔn. Nanwlɛ, Ɲanmiɛn Sielɛ Blɛ jasin bofuɛ akpiakpi ya nnun sran akpiakpi ableso nin nɲɔn sran ya nnun sran ablasan (572.530) nga be o Mɛksiki lɔ’n, sran akpiakpi nga be kan maya nin aztɛki aniɛn’n, ɔ nin aniɛn uflɛ wie mun ekun’n, be o be nun wie.

¹⁸ Koko nga nun’n, sran kpanngban be ɔli nvle uflɛ’m be talolɛ. Annzɛ kusu sika ndɛ ti’n, be tuli be nvle nun be ɔli nvle uflɛ nun. I sɔ ti’n, nvle kpanngban nun’n, nvle uflɛ’m be aniɛn’n nun jasin fɛ’n bolɛ lika’n w’a yo dan. Zoova i Lalofuɛ’m be kwla dili junman dan kpa sɔ’n. Itali nvle’n nun lɔ’n, asɔnun nin asɔnun akpasua nga be kanman itali aniɛn’n, be kan nvle uflɛ aniɛnaniɛn ablaɔn nin nɲɔn (22). Koko nga nun’n, kɛ ɔ ko yo naan b’a uka aniaan mun naan b’a bo jasin fɛ’n nvle uflɛ’m be aniɛn nun’n, be tikeli suklu ableso (70) aniɛn blu nin nnan (14) nun, ɔ nin Itali lɔ bobofuɛ’m be aniɛn’n nun naan be suan aniɛn sɔ mun. Nvle uflɛ kpanngban nun’n, Zoova i Lalofuɛ’m be mian be ɲin sɔ wie naan b’a bo jasin fɛ’n b’a kle aofuɛ mun. Nanwlɛ, Zoova bɔbɔ maan sran kpanngban kpa mɔ be kan aniɛn wafawafa kpanngban kpa’n be ba kpuu.

“Lika’n kwlaa”

19, 20. ?Ndɛ mennin yɛ Pɔlu kannin m’ɔ andɛ, ɔ kpɛn su sɛsɛsɛ ɔ? Amun yiyi nun.

¹⁹ Afuɛ ya kpɔlɛ klikli nun’n, akoto Pɔlu seli kɛ: “N se kɛ yoo: ?B’a timan? Be tili i kpa, afin be klɛli i kɛ: ‘Be kannin ndɛ lika’n kwlaa, yɛ be tili be ndɛ’n mɛn wunmuan’n nun.’” (Rɔmfuɛ Mun 10:18). Sɛ sa sɔ’n kpɛnnin su afuɛ ya kpɔlɛ klikli nun’n, andɛ kusu’n, ɔ kpɛn su dan kpa liɛ su! Sran kpanngban kpa mɔ atrɛkpa be nin a wunmɛn i wunsu sɔ le’n, be su se kɛ: “Ń lá Anannganman i ase blɛ’n kwlaa nun. Ń fá min nuan’n ḿ mɛ́nmɛ́n i tititi.”—(Jue Mun 34:2).

²⁰ I li bɔɔ, junman’n i dilɛ’n ɔ kanman ase. Ɲanmiɛn Sielɛ Blɛ’n i jasin fɛ’n bofuɛ’m be uka su titi kɔ i ɲrun. Jasin bofuɛ’m be ko niannin sran’m be osu kpɛ ko ju akpingbin tra su. Kpɔkun be kleli sran ko ju akpiakpi ya tra su be Biblu’n nun like. Asa ekun’n, sran uflɛ nga be konvi sɔ nanwlɛ ndɛ’n be yi be wun nglo titi. Afuɛ sin’n, sran kɔe miliɔn blu nin nsiɛn sran akpiakpi ablangwlan nin nso sran ya nsiɛn sran ablaɔn nin nɲɔn (16.097.622) be trannin E Wla Kpɛnlɛ Cɛn dilɛ’n i bo. Nanwlɛ, junman nga ɔ o e ɲrun’n, ɔ te yo dan. E niaan nga be kleli be ɲrɛnnɛn’n, maan e nian be awlɛn tralɛ’n su, naan e kusu e jran kekle ndɛnman yolɛ nun titi. Kpɔkun e niaan nga kɛ ɔ fɛ i afuɛ 1919 nun lele m’ɔ́ fá jú andɛ’n be fali be wun wlɛli i Zoova junman’n i dilɛ nun’n, maan e nian be juejue su like yolɛ’n su, naan e kusu e yo i sɔ wie. Jue nga jue tofuɛ’n toli’n, maan e kwlaa e sɔ su titi. Ɔ seli kɛ: ‘Maan ninnge nga be lo wunmiɛn’n be kwlaa be manman Anannganman. An manman Anannganman!’—Jue Mun 150:6.

[Ja ngua lɛ ndɛ mun]

?Amun kwla yiyi nun?

• ?Afuɛ 1919 nun’n, junman mennin yɛ e niaan’m be boli i dilɛ bo ɔ? ?Yɛ ngue ti yɛ junman sɔ’n i dilɛ’n w’a yoman pɔpɔ ɔ?

• ?Sran mennin mun yɛ be yiali be naan b’a suan jasin fɛ’n bolɛ junman’n i bo ɔ?

• ?Ngaliɛ difuɛ mun nin be nga be dili Ɲanmiɛn junman nvle uflɛ’m be nun’n, be junman’n i su ndɛ mennin yɛ be kannin ɔn?

• ?Ndɛ mennin yɛ amun kwla kan naan amun a fa kle kɛ Zoova yra junman nga i nvle’n di i andɛ’n, i su ɔ?

[Tableau, pages 12-15]

RAPPORT MONDIAL DES TÉMOINS DE JÉHOVAH POUR L’ANNÉE DE SERVICE 2003

(Voir la publication)