Nvlenvle kwlaa be jasin fɛ’n

‘Amún wá kán min ndɛ [...] lele fá jú asiɛ’n i awieliɛ.’—YOL 1:8.

1. ?E mɔ e kle Biblu’n nun like’n, ngue su yɛ e fa e ɲin e sie ɔ? ?Yɛ ngue ti ɔ?

SRAN ng’ɔ si like kle kpa’n, ɔ nian ndɛ ng’ɔ kan’n su kpa. Kpɔkun ɔ nian wafa nga ɔ kan ndɛ sɔ’n i su wie. Sanngɛ wafa nga i bɔbɔ kle like’n, ɔ fɛ i ɲin sie su wie. E mɔ e kle Biblu’n nun like’n, e kusu e fa ajalɛ kunngba’n su. Yɛle kɛ e fa e ɲin sie i jasin nga e bo’n, ɔ nin wafa nga e bo i’n, be su. Nán kɛ e kaci Ɲanmiɛn Sielɛ Blɛ’n jasin fɛ nga e bo’n i ti ɔ. Sanngɛ wie liɛ’n, ɔ fata kɛ e siesie wafa nga e bo jasin fɛ’n sɔ’n. ?Ngue ti ɔ? Kɛ ɔ ko yo naan sran kpanngban b’a ti jasin’n fɛ’n, i ti ɔ.

2. ?Sɛ e siesie e jasin fɛ’n bolɛ’n i ye’n, nn wan yɛ e su sɔnnzɔn i ɔ?

² Sɛ e siesie e jasin fɛ’n bolɛ wafa’n i ye’n, nn e su nian be nga laa be suli Ɲanmiɛn’n, be liɛ’n su. Maan e nian akoto Pɔlu i ajalɛ’n su. Ɔ seli kɛ: ‘Kɛ n ko yo naan m’an ɲan Zuifu mun’n, sɛ n ju be nun’n, n yo min wun kɛ be sa. Kɛ n ko yo naan m’an ɲan be mɔ be diman Moizi mmla’n su’n, sɛ n ju be nun’n, n yo min wun kɛ be sa. Kɛ n ko yo naan m’an ɲan be nga be nin a wunman Ɲanmiɛn ndɛ’n i wlɛ kpa’n, n yo min wun kɛ be sa. Sran wafa’n kwlaa mɔ n to be’n, kɛ n ko yo naan m’an de be’n, n yo min wun kɛ be sa, yɛ n yo like kwlaa nga n kwlɛ i yo’n.’ (1 Korɛntfuɛ Mun 9:19-23) Wafa nga Pɔlu boli jasin fɛ’n, ɔ yoli kpa dan. Ɔ le sran kun nin wafa nga ɔ fata kɛ e bo jasin fɛ’n e kle i’n. Sɛ e bu sran’m be angunndan naan e yo i sɔ’n, e kusu e junman’n dí kpa.

Lele “asiɛ’n i mmua lɔ”

3. (a) ?Like mennin yɛ ɔ yo maan e jasin fɛ’n bolɛ junman’n timan aɔwi’n niɔn? (b) ?Wafa sɛ yɛ ndɛ ng’ɔ o Ezai 45:22 nun’n, ɔ su kpɛn su andɛ ɔ?

³ Like kun ng’ɔ timan aɔwi jasin bofuɛ’m be sa nun’n, yɛle jasin bowlɛ’n i dan m’ɔ ti’n. Yɛle kɛ e bo jasin fɛ’n “mɛn wunmuan’n nun.” (Matie 24:14) Blɛ kasiɛn nga nun’n, Zoova i Lalofuɛ kpanngban be tuli be klun be dili junman kpa lele be juli nvle uflɛ nun. ?Yɛ i sɔ’n i bo’n guali sɛ? I bo m’ɔ gua’n yoli abonuan, yɛle kɛ jasin fɛ’n w’a tru asiɛ wunmuan’n su. Kɛ afuɛ 1900 fá bó i bo’n, be bo jasin fɛ’n asiɛ’n i bue kaan sa su, sanngɛ kɛ é sé yɛ’n, Zoova i Lalofuɛ’m be o nvlenvle 235 nun! Nanwlɛ, be bo Ɲanmiɛn Sielɛ Blɛ’n i jasin lele “asiɛ’n i mmua lɔ.”—Ezai 45:22.

4, 5. (a) ?Wan mun yɛ be o jasin fɛ’n i bolɛ lika kwlaa nun’n, i ɲrun ɔn? (b) ?Ngue ndɛ yɛ Betɛli wie’m be kɛnnin i be nga be jaso be nvle nun be ba be lika nun jasin fɛ’n bolɛ’n be su ɔ?

⁴ ?Ngue ti yɛ jasin fɛ’n bolɛ’n kɔ i ɲrun sɔ ɔ? Like kpanngban ti ɔ. Ngaliɛ difuɛ nga be kle be like Gileadi Suklu nun’n, ɔ nin sran kpanngban nga be tra sran 20.000 mɔ be kle be like École de Formation Ministérielle nun’n, be yo maan jasin fɛ’n bolɛ’n kɔ i ɲrun wie dan. Asa ekun’n, Zoova i Lalofuɛ nga be bɔbɔ be tu ajalɛ be kɔ nvle nga be le jasin bofuɛ’m be awuliɛ lɔ’n, be di junman sɔ’n wie. Be wun klɛnlɛ kɛ nga sa mɔ yasua nin bla, gbaflɛn nin talua nin sran kpɛnngbɛn, ɔ nin be nga be o aja nun nin be nga be nunman aja nun be klɛn’n ti’n, jasin fɛ’n w’a tru asiɛ wunmuan’n su. (Jue Mun 110:3; Rɔmfuɛ Mun 10:18) Be junman’n jɔ e klun dan. Be nga be jaso be nvle nun be kɔ lika nga be le jasin fɛ’n bofuɛ’m be awuliɛ lɔ’n, Betɛli nga be nian jasin bowlɛ lika sɔ’m be su’n, be kannin aniaan sɔ’m be ndɛ kpa. Amun e fa e ɲin sie wie’m be su e nian.

⁵ Equateur lɔ’n, be seli kɛ: “Lika nga asɔnun akpasua kaan yɛ be o lɔ’n, e aniaan sɔ’m be fa jasin fɛ’n i nun ta, yɛ be uka be maan be taka asɔnun uflɛ mun. Kpɔkun be yo maan aniaan bian nin aniaan bla mun, be kɔ be ɲrun Ɲanmiɛn ninnge’m be nun.” République Dominicaine lɔ’n, be seli kɛ: “Sɛ aniaan kpanngban nga be jasoli be nvle nun lɔ be bali wa’n be kɔ’n, nanwlɛ be kɔlɛ’n su yoman kpa manman asɔnun mun. Kɛ be nin e o wa’n, ɔ ti suyralɛ like.” Europe de l’Est lɔ’n, be seli kɛ: “Asɔnun kpanngban nun’n, aniaan bla’m be sɔnnin. Sɛ e fa sran ya’n, be nun 70 be ti bla. (Jue Mun 68:12) Be nun sunman be fali nanwlɛ atin’n su ɔ nin a cɛman. Sanngɛ aniaan bla nga be ti atin bofuɛ mɔ be nin a jaman bian’n mɔ be fin nvle uflɛ nun be bali’n, be kle bla sɔ’m be like kpa. Aniaan bla sɔ mɔ be fin nvle uflɛ nun’n, be ti kɛ cɛlɛ like mɔ Ɲanmiɛn fa mannin e sa!” ?Amun a bu i angunndan le kɛ amún kɔ́ lika uflɛ nun bé kó bó jasin fɛ’n?a—Sa Nga Be Yoli’n 16:9, 10.

“Sran blu mɔ be aniɛn’n ti ngunminngunmin’n”

6. ?Wafa sɛ yɛ Zakari 8:23 kle kɛ aniɛn’n su yoman e jasin fɛ’n i nun aɔwi like?

⁶ Like uflɛ ng’ɔ timan aɔwi jasin fɛ’n i bolɛ’n nun’n, yɛle aniɛn ngunminngunmin nga sran’m be kɛn i asiɛ’n su’n. Ɲanmiɛn Ndɛ’n dun mmua kɛnnin i ndɛ. Ɔ seli kɛ: ‘I blɛ sɔ nun’n, sɛ sran blu mɔ be aniɛn’n ti ngunminngunmin’n, bé kó trá Zuifu kunngba cenje i wun tralɛ’n i nuan su’n, kpɔkun bé sé i kɛ: “E nin amun yɛ é kɔ́ ɔ, afin e tili i kɛ Ɲanmiɛn’n o amun sin.”’ (Zakari 8:23) E blɛ liɛ nun’n, ‘sran blu’n,’ be ti sran kpanngban kpa nga Sa Nglo Yilɛ 7:9 kannin be ndɛ’n be nzɔliɛ. Sanngɛ, amun e sie i nzɔliɛ kɛ Zakari i ndɛ sɔ’n nun’n, “sran blu” sɔ mun’n, nán nvlenvle ngunminngunmin mɔ be fin nun’n, i ndɛ kunngba yɛ ɔ kan ɔn. Sanngɛ, “be aniɛn’n ti ngunminngunmin” wie. ?Ɲanmiɛn nuan ijɔfuɛ’n i ndɛ sɔ’n nun’n, amun wun ndɛ cinnjin kpa kun m’ɔ o nun mɔ i sɔ liɛ’n w’a kpɛn su’n? Ɛɛn.

7. ?Ngue yɛ ɔ kle kɛ jasin fɛ’n su kan sran nga “be aniɛn’n ti ngunminngunmin’n” niɔn?

⁷ Amun e nian. Kɛ e cuɛn e kɔ siɛn afuɛ lele 50, e wun kɛ i blɛ sɔ’m be nun’n, be yi e fluwa mun aniɛn 90 nun. Andɛ’n, be yi be aniɛn 400 tra su be nun. ‘Sran kpa nanwlɛfuɛ m’ɔ si ngwlɛlɛ’n’ miɛn i ɲin kpa naan y’a ɲan Biblu’n i akua mun. Aniɛn bɔbɔ nga sran bue kaan sa yɛ be kan’n, be ɲan Biblu’n i akua’m be nun wie. (Matie 24:45) I wie yɛle kɛ, siɛn’n be ɲan Biblu’n i akua mun Groenlandais aniɛn nun (sran 47.000 yɛ be kan ɔn), Palaouan aniɛn nun (sran 15.000 yɛ be kan ɔn), yɛ Yap aniɛn nun (sran mɔ be juman 7.000 yɛ be kan ɔn).

“Atin dan” m’ɔ man e ajalɛ uflɛ mun

8, 9. ?Like mennin yɛ ɔ man e jasin fɛ’n bolɛ’n i wun “atin dan” ɔn? ?Yɛ wafa sɛ yɛ jasin bofuɛ kpanngban be niɛn i sɔ’n su be di junman ɔn?

⁸ Andɛ’n, nán kɛ saan é kɔ́ nvle uflɛ nun naan y’a bo jasin fɛ’n y’a kle be nga be kan aniɛn uflɛ mun ɔn. Afuɛ nga be sinnin koko nga’m be nun’n, sran akpinngbin be jasoli be nvle nun ɔli aboje klɔ’m be su. I sɔ’n yoli maan aniɛn wafawafa nga be kan be nvle sɔ’m be nun’n, be sɔnnin. I wie yɛle Aflansi lɔ klɔ nga be flɛ i Pali’n (Paris). Be kan aniɛn ngunminngunmin 100. Torɔnto m’ɔ o Kanada lɔ liɛ’n, be kan aniɛn 125. Angle lɔ klɔ nga be flɛ i Lɔndru lɔ liɛ’n, nvle uflɛ’m be aniɛn nga be kan’n ɔ ti 300 tra su! Sran kpanngban nga be fin nvle uflɛ nun mɔ be o asɔnun nga be o lika sɔ’m be nun’n, be man jasin fɛ’n bolɛ’n i wun “atin dan” uflɛ naan e bo jasin fɛ’n e kle be nga be fin nvlenvle kwlaa nun’n.—1 Korɛntfuɛ Mun 16:9.

⁹ Kɛ ɔ ko yo naan b’a bo jasin fɛ’n b’a kle sran kpanngban’n ti’n, jasin bofuɛ sunman be suan aniɛn uflɛ. Ɔ yoli kekle mannin be nun sunman. Sanngɛ be ɲin mɔ be miannin be ukali aofuɛ mun Ɲanmiɛn Ndɛ’n i silɛ’n nun’n, ɔ mannin be aklunjuɛ dan kpa. Afuɛ koko nga’m be nun’n, Blɔfuɛ mɛn’n i wia atɔliɛ lɔ lika nun’n, sɛ e fa sran ya’n, be nun sran 40 mɔ be yoli be batɛmu’n nvle kun aɲia nga be yoli be’n be bo’n, be ti aofuɛ.

10. ?Wafa sɛ yɛ amun fa fluwa Une bonne nouvelle pour des gens de toutes nations fa bo jasin fɛ’n niɔn? (An nian kuku “Caractéristiques de la brochure Une bonne nouvelle pour des gens de toutes nations,” m’ɔ o bue 31 i nun.)

¹⁰ Nanwlɛ, e nun sunman kwlá suanman aniɛn uflɛ. Sɛ ɔ ti sɔ bɔbɔ’n, e kwla fa fluwa Une bonne nouvelle pour des gens de toutes nations.b mɔ Biblu’n nun jasin fɛ mɔ be klɛli i aniɛn fanunfanun o nun’n, e uka sran. (Zan 4:37) ?Amun fa fluwa sɔ’n bo jasin fɛ’n?

Kɛ be sɔman e nun kpa’n

11. ?Like uflɛ mennin yɛ ɔ kle yalɛ jasin fɛ’n bowlɛ lika wie’m be nun ɔn?

¹¹ Kɛ Satan i ninnge’m be ɲan ta sran’m be su kɔ’n, like uflɛ kun ekun kle e yalɛ titi e jasin bolɛ’n nun. Like sɔ’n yɛle kɛ jasin bowlɛ lika wie’m be nun’n, sran’m be sɔnman e nun kpa. Nanwlɛ, i sɔ’n boman e nuan, afin Zezi seli kɛ é wún i sɔ like’n. Kɛ ɔ́ kán e blɛ liɛ’n i ndɛ’n, ɔ seli kɛ: “Sran kpanngban be sran klolɛ’n ɔ́ wíe.” (Matie 24:12) Nanwlɛ, sran sunman be lafiman Ɲanmiɛn su kun, yɛ be faman Biblu’n nun ndɛ’n su kun. (2 Piɛr 3:3,  4) I sɔ’n ti yɛ nvle wie’m be nun’n, be nga be kaci Zezi i sɔnnzɔnfuɛ’n b’a sɔnman’n niɔn. Sanngɛ, i sɔ liɛ’n kleman kɛ lika sɔ’m be nun’n, junman dan nga e niaan bian nin e niaan bla Klistfuɛ nga be su Ɲanmiɛn kpa be di’n, ɔ ti ngbɛn. (Ebre Mun 6:10) ?Ngue ti ɔ? Maan e nian ajalɛ wie mun.

12. ?E jasin fɛ’n junman nun’n, like nɲɔn mennin yɛ be ti cinnjin ɔn?

¹² Like nga ti yɛ e bo jasin fɛ’n, Zezi i jasin fɛ’n mɔ Matie klɛli’n yiyi be nun cinnjin nɲɔn nun. I klikli’n yɛle kɛ e ‘kle nvlenvle’n kwlaa be like maan be kaci Zezi i sɔnnzɔnfuɛ.’ (Matie 28:19) I nɲɔn su’n, yɛle kɛ maan sran’m be “ti” Sielɛ Blɛ jasin fɛ’n. (Matie 24:14) Like nɲɔn sɔ’m be ti cinnjin, sanngɛ ndɛ kpa kun o kasiɛnfuɛ’n i nun. ?Ngue ti ɔ?

13, 14. (a) ?Zezi i balɛ’n i nzɔliɛ’n, i nun like cinnjin kun yɛle mennin? (b) ?Kɛ e bo jasin fɛ’n lika nga be sɔman e nun kpa’n i nun’n, ngue yɛ ɔ fata kɛ ɔ kpɛn e klun titi ɔ?

¹³ Matie m’ɔ ti Biblu’n klɛfuɛ’n, ɔ seli kɛ akoto’m be usali Zezi kɛ: ‘?Blɛ onin yɛ sa sɔ’m bé yó ɔ, yɛ ngue yɛ ɔ ti ɔ balɛ’n nin mɛn’n i awieliɛ’n i nzɔliɛ’n niɔn?’ (Matie 24:3) Zezi seli be kɛ nzɔliɛ sɔ’n i nun cinnjin kun’n, yɛle jasin fɛ’n m’ɔ́ bé bó i asiɛ’n i wunmuan’n su’n. ?Sran mɔ bé klé be like mɔ bé káci i sɔnnzɔnfuɛ’m be ndɛ yɛ ɔ kannin ɔn? Cɛcɛ. Ɔ seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Matie 24:14) Ndɛ ngalɛ’n nun’n, Zezi kleli kɛ Sielɛ Blɛ jasin fɛ’n junman’n bɔbɔ ba’n, ɔ ti nzɔliɛ sɔ’n i nun like cinnjin kun.

¹⁴ Ɔ maan, kɛ é bó jasin fɛ’n, maan ɔ kpɛn e klun kɛ sɛ bɔbɔ e ɲanman sran naan w’a kaci Zezi i sɔnnzɔnfuɛ’n, sanngɛ junman sɔ mɔ e di’n ti’n, sran’m be “ti” jasin fɛ’n. Sɛ sran’m be tɛli e su o, annzɛ sɛ b’a tɛman e su o, e boli jasin fɛ’n e kleli be. Ɔ maan Zezi i ndɛ ng’ɔ kannin’n i su kpɛnlɛ nun’n, e dili junman’n wie. (Ezai 52:7; Sa Nglo Yilɛ 14:6, 7) Jɔrdi ti Zoova i Lalofuɛ, ɔ ti gbaflɛn kan. Ɔ o Blɔfuɛ’m be mɛn’n i wia afiliɛ lɔ. Ɔ seli kɛ: “Kɛ n si kɛ Zoova sin min lika wie naan ndɛ ng’ɔ o Matie 24:14 w’a kpɛn su’n, ɔ yo min fɛ dan.” (2 Korɛntfuɛ Mun 2:15-17) Amun bu i sɔ wie ?Nɛ́n i ɔ?.

Kɛ be tanndan e ɲrun’n

15. (a) ?Like mennin yɛ Zezi dun mmua kannin i ndɛ kleli i sɔnnzɔnfuɛ mun ɔn? (b) ?Like mennin yɛ ɔ yo maan ɲrɛnnɛn klelɛ nun bɔbɔ’n, e kwla bo jasin fɛ’n niɔn?

¹⁵ E ɲrun tanndan lɛ’n ti e jasin fɛ’n bolɛ’n nun like kekle’n kun. Zezi dun mmua kan kleli i sɔnnzɔnfuɛ’m be kɛ: “Nvle’n kwlaa bé kpɔ́ amun n dunman nun.” (Matie 24:9) Kɛ nga be fa yoli Klistfuɛ klikli mun sa’n, andɛ kusu be kpɔ Zezi i sɔnnzɔnfuɛ mun, be tanndan be ɲrun, kpɔkun be kle be ɲrɛnnɛn. (Sa Nga Be Yoli’n 5:17, 18, 40; 2 Timote 3:12; Sa Nglo Yilɛ 12:12, 17) Nvle wie’m be nun’n, awa’m be tannin be jasin fɛ’n i bolɛ. Sanngɛ, kɛ mɔ nvle sɔ’m be nun Klistfuɛ’m be ɲin yi Ɲanmiɛn ti’n, be yaciman Sielɛ Blɛ jasin fɛ’n i bolɛ. (Amɔs 3:8; Sa Nga Be Yoli’n 5:29; 1 Piɛr 2:21) ?Ɔ nin i sɔ ngba’n, ngue ti yɛ Klistfuɛ sɔ mun, ɔ nin jasin bofuɛ kpanngban uflɛ’m be kwla bo jasin fɛ’n niɔn? Zoova yɛ ɔ fɛ i wawɛ’n wla be fanngan ɔn.—Zakari 4:6; Efɛzfuɛ Mun 3:16; 2 Timote 4:17.

16. ?Wafa sɛ yɛ Zezi kleli kɛ Ɲanmiɛn wawɛ’n ti yɛ e jasin fɛ bolɛ junman’n kwla yo ye ɔ?

¹⁶ Zezi tinnin su kɛ Ɲanmiɛn i wawɛ’n ti yɛ jasin fɛ’n junman’n kwla yo ye ɔ. Ɔ seli kɛ: ‘Kɛ Ɲanmiɛn wawɛ’n ko ba amun wun’n, ɔ́ tín amun, án wá kán min ndɛ lele fá jú asiɛ’n i awieliɛ.’ (Sa Nga Be Yoli’n 1:8; Sa Nglo Yilɛ 22:17) Wafa nga be fa siesieli Biblu’n nun ndɛ kpe kan sɔ’n, ɔ ti cinnjin kpa. I klikli nun’n, yɛle kɛ Zezi i sɔnnzɔnfuɛ’m bé ɲán Ɲanmiɛn wawɛ’n, kpɔkun i nɲɔn su’n yɛ bé bó jasin fɛ’n asiɛ wunmuan’n su. Saan Zoova i wawɛ’n yɛ ɔ́ úka be naan b’a ɲan fanngan b’a bo jasin fɛ’n ‘mɛn wunmuan nun naan sran kwlaa b’a ti’ ɔ (Matie 24:13, 14; Ezai 61:1, 2) I sɔ’n ti yɛ Zezi seli kɛ Ɲanmiɛn wawɛ’n ti like m’ɔ ‘uka’n’ niɔn. (Zan 15:26, NW) Ɔ seli kɛ Ɲanmiɛn wawɛ’n klé i sɔnnzɔnfuɛ’m be like yɛ ɔ́ klé be atin.—Zan 14:16, 26; 16:13.

17. ?Kɛ be kle e jran e ɲrun kekle kpa’n, wafa sɛ yɛ Ɲanmiɛn wawɛ’n uka e ɔ?

¹⁷ ?Kɛ andɛ be tanndan e jasin fɛ’n bolɛ’n i ɲrun kpa’n, wafa sɛ yɛ Ɲanmiɛn i wawɛ’n uka e ɔ? Ɲanmiɛn wawɛ’n wla e fanngan, yɛ ɔ tanndan be nga be kle e yalɛ’n be ɲrun. Sɛ e waan é wún i sɔ liɛ’n i wlɛ’n, maan e nian Famiɛn Saili i su ndɛ kun e nian.

Ɲanmiɛn wawɛ’n tanndannin be ɲrun

18. (a) ?Kacilɛ’n i tɛ kpa mennin yɛ Saili wa kacili ɔ? (b) ?Ajalɛ mennin yɛ Saili fali naan w’a kle Davidi i ɲrɛnnɛn ɔn?

¹⁸ Kɛ Saili bó i Izraɛli famiɛn’n i dilɛ bo’n, ɔ boli i bo kpa. Sanngɛ kɛ ɔ́ kɔ́ i ɲrun’n, i ɲin w’a yiman Zoova kun. (1 Samiɛl 10:1, 24; 11:14, 15; 15:17-23) Ɔ maan Ɲanmiɛn yili i wawɛ’n i su. Kɛ ɔ yoli sɔ’n, Saili wa kpɔli Davidi. Afin Ɲanmiɛn kpali Davidi kɛ ɔ́ wá sín Saili osu yó famiɛn, yɛ ɔ fɛli wawɛ mɛnnin i. (1 Samiɛl 16:1, 13, 14) Davidi ti kɛ sran mɔ sran nunmɛn i sin sa. Afin, jru yɛ ɔ bo ɔ. Sanngɛ Saili liɛ’n, ɔ si cua to kpa. Cɛn kun mɔ Davidi bó jru’n, ‘Saili mannin cua’n su, i waan: “Nga, ń sɛ́n i cua sa kpan ɔ́ bó nun fíti talɛ’n.” Ɔ toli i kpɛ nɲɔn, sanngɛ kɛ Davidi kiɛ i wun sa, nn w’a sin.’ (1 Samiɛl 18:10, 11) Kɛ ɔ yoli sɔ’n, Saili tieli ndɛ nga i wa Zonatan m’ɔ ti Davidi janvuɛ’n, ɔ kannin’n. Ɔ maan ɔ tali nda. Ɔ seli kɛ: ‘N kan Zoova, n su kunman Davidi.’ Sanngɛ i sin’n, ‘Saili waan ɔ́ wɔ́ Davidi i cua naan ɔ bo nun fiti talɛ’n. Davidi jasoli lɛ naan cua’n w’a kplan talɛ’n wun.’ Davidi wanndili, sanngɛ Saili suli i su. Blɛ kekle sɔ nun’n, Ɲanmiɛn wawɛ’n tanndannin Saili i ɲrun. ?Wafa sɛ?—1 Samiɛl 19:6, 10.

19. ?Wafa sɛ yɛ Ɲanmiɛn wawɛ’n sasali Davidi ɔ?

¹⁹ Davidi wanndi ɔli Ɲanmiɛn nuan ijɔfuɛ Samiɛli sin, sanngɛ Saili sunmannin sran kɛ be ko trɛ i. Kɛ be juli Davidi i fiawlɛ’n i nun lɔ’n, ‘Ɲanmiɛn i wawɛ’n jrali Saili i sunmanfuɛ’m be su, kpɔkun be su kan Ɲanmiɛn i nuan su ndɛ’n wie.’ Ɲanmiɛn wawɛ’n m’ɔ fali be mlɔnmlɔn’n ti’n, be wla fili junman nga be ɔli i dilɛ’n su. Kɛ i osu cɛ kan’n, Saili sunmannin sran uflɛ mun ekun kɛ be ko tra Davidi bla, sanngɛ sa ng’ɔ ɲannin sran ng’ɔ sunman be klikli’n, ɔ ɲannin be wie. I agualiɛ su’n, Famiɛn Saili bɔbɔ yɛ ɔ ɔli Davidi tralɛ ɔ. Sanngɛ Saili w’a kwlá tanndanman Ɲanmiɛn wawɛ’n i ɲrun. Yɛle kɛ, Ɲanmiɛn wawɛ’n maan ɔ kali lika sɔ’n nun lɛ “le kun sɔ’n nun ɔ nin kɔnguɛ.” Ɔ maan Davidi ɲannin blɛ wanndili.—1 Samiɛl 19:20-24.

20. ?Afɔtuɛ mennin yɛ ɲrɛnnɛn nga Saili kleli Davidi’n, ɔ man e ɔ?

²⁰ Afɔtuɛ cinnjin kpa kun o Saili nin Davidi be su ndɛ sɔ’n nun. Yɛle kɛ be nga be kle i sufuɛ’m be ɲrɛnnɛn’n, kɛ Ɲanmiɛn i wawɛ’n jran be ɲrun, be kwlá ɲanman kwlalɛ le. (Jue Mun 46:12; 125:2) Zoova seli kɛ Davidi yɛ ɔ́ wá yó Izraɛli famiɛn’n niɔn. Sran fi w’a kwlá kaciman ndɛ sɔ’n. Andɛ kusu’n, Zoova w’a gugu kɛ saan ‘bé kán Ɲanmiɛn i sielɛ i jasin fɛ’n i ndɛ.’ Sran fi su kwlá jrɛnmɛn i sɔ liɛ’n le.—Sa Nga Be Yoli’n 5:40, 42.

21. (a) ?Wafa sɛ yɛ andɛ’n, be nga be kle Ɲanmiɛn sufuɛ’m be ɲrɛnnɛn wie’m be yo ɔ? (b) ?Ngue su yɛ e lafi ɔ?

²¹ Ato’n, yɛ wie liɛ bɔbɔ’n sa yaya mun yɛ Ɲanmiɛn sulɛ wafa wie mun, ɔ nin politiki kpɛnngbɛn wie’m be fa tanndan e ɲrun ɔn. Sanngɛ, kɛ nga Ɲanmiɛn fɛli i wawɛ’n sasali Davidi sa’n, Ɔ́ sɛ́sɛ́ I sufuɛ mun sɔ wie andɛ. (Malasi 3:6) Ɔ maan kɛ Davidi sa’n, e kwla lafi su e se kɛ: ‘N lafi Ɲanmiɛn su, srɛ kunman min. ?Ngue like bɔɔ cɛ yɛ klɔ sran’n kwla yo min ɔn?’ (Jue Mun 56:12; 121:1-8; Rɔmfuɛ Mun 8:31) Maan Zoova uka e naan e like kwlaa nga ɔ kwla jran e jasin fɛ’n bolɛ junman m’ɔ fa mannin e’n i ɲrun’n, e jrɛn i ɲrun kekle, naan e bo Sielɛ Blɛ jasin fɛ’n e kle sran mun asiɛ’n wunmuan’n su.

[Ja ngua lɛ ndɛ mun]

?Amun wla kwla kpɛn su?

• ?Ngue ti yɛ ɔ fata kɛ e siesie wafa nga e bo e jasin fɛ’n i ye ɔ?

• ?Jasin fɛ’n bolɛ’n i wun “atin dan” uflɛ mennin yɛ w’a tike e ɲrun ɔn?

• ?Sɛ be sɔ e nun o, sɛ be sɔman e nun o, ngue yɛ e jasin fɛ’n bolɛ’n ti’n, ɔ su kpɛn su ɔ?

• ?Ngue ti yɛ be nga be jran Ɲanmiɛn Sielɛ Blɛ’n i su jasin fɛ’n bolɛ’n i ɲrun’n, be kwlá ɲanman kwlalɛ le ɔ?

[Box on page 27]

“Ɔ jɔ be klun dan”

Kɛ bé kán awlo kun nunfuɛ mun mɔ be jasoli Espaɲin lɔ be ɔli Bolivie lɔ jasin fɛ’n i bolɛ’n be ndɛ’n, be seli kɛ: “Be Ɲanmiɛn sulɛ likawlɛ’n, ɔ man be aklunjuɛ.” Awlo’n sɔ nun ba kun ɔli lika sɔ nun lɔ asɔnun akpasua kaan kun i bo suanlɛ. I aklunjuɛ dan’n, ɔ ɲannin ta i si nin i nin be su. Ɔ maan, be awlo’n kwlaa ɔ nin i niaan bian nnan mɔ be afuɛ’n fɛ i afuɛ 14 lele fá jú 25 be ɔli lika sɔ nun lɔ jasin fɛ’n i bolɛ wie. Yasua’m be nun nsan b’a kaci atin bofuɛ. Kpɔkun koko nga nun’n, i m’ɔ fali ninnge’m be nun ta’n, ɔ ɔli École de formation ministérielle.

Angelika le afuɛ 30, yɛ ɔ fin Kanada. Ɔ ɔli jasin fɛ’n i bolɛ blɔfuɛ mɛn’n i wia afiliɛ lɔ. Ɔ seli kɛ: “Sa nga n wun be’n be sɔnnin, sanngɛ kɛ n uka sran mun jasin fɛ’n bolɛ junman’n nun’n, min klun jɔ. Kɛ mɔ n jasoli min nvle nun n bali aniaan’m be ukalɛ mɔ i sɔ’n ti be yo min mo’n, ɔ jɔ min klun dan kpa.”

Aniaan bla nɲɔn be su wa ɲan afuɛ 30, yɛ be fin Amlɛnkɛn be mɛn’n nun lɔ. Be ɔli République Dominicaine lɔ jasin fɛ’n i bolɛ. Be seli kɛ: “Sran’m be ayeliɛ ng’ɔ fata kɛ e nanti su’n, ɔ sɔnnin. Sanngɛ, e miannin e ɲin dili e jasin fɛ’n bolɛ junman’n lika nun. Ɔ maan e Biblu’n nun like suanfuɛ nso be ba aɲia’m be bo siɛn’n.” Klɔ kun mɔ asɔnun nunman lɔ’n, aniaan bla nɲɔn sɔ’m be yoli maan be takali asɔnun akpasua kaan kun lɔ.

Laura ti aniaan bla yɛ ɔ su wa ɲan afuɛ 30. Ɔ ko boli jasin fɛ’n nvle uflɛ nun afuɛ nnan. Ɔ seli kɛ: “N bɔbɔ yɛ n kunndɛ kɛ min mɛn dilɛ’n kan ase ɔ. I sɔ’n uka jasin bofuɛ mun maan be wun kɛ nán yalɛ ti yɛ be kan be mɛn dilɛ’n i ase ɔ. Sanngɛ sran m’ɔ kunndɛ kɛ ɔ́ yó sa ng’ɔ ti i nuan su’n, i bɔbɔ yɛ ɔ fɛ i ajalɛ ɔ. Sran’m be ukalɛ’n, i li bɔɔ gbaflɛn nin talua’m be ukalɛ’n mannin min aklunjuɛ dan kpa. Kpɔkun aklunjuɛ’n yoli maan ɔ ti kɛ nn nvle uflɛ nun jasin fɛ’n i bolɛ’n timan kekle mlɔnmlɔn. Nanwlɛ, n su faman like uflɛ fi mɛn nun n kaciman junman nga n di i wa’n. Kpɔkun sɛ Zoova di su’n, n su yacimɛn i dilɛ.”

[Box on page 31]

Wafa nga be fa siesieli fluwa Une bonne nouvelle pour des gens de toutes nations

Be klɛklɛli fluwa Une bonne nouvelle pour des gens de toutes nations i bue’m be su aniɛnaniɛn sɔ lele 92. Wafa nga be klɛli ndɛ’n, ɔ ti kɛ nn sran’n o e ɲrun lɔ yɛ ɔ su kan ndɛ’n kle e sa. Ɔ maan kɛ awlofuɛ’n kanngan nun’n, ɔ ti kɛ amun mɔ amun fali fluwa’n be mɛnnin i’n yɛ amun su kan ndɛ’n kle i ɔ.

Fluwa’n i bui’n i klun lɔ’n, asiɛ’n i desɛn o su. Amun fa asiɛ’n i desɛn’n naan amun fa kle nvle nga amun fin nun’n. Kpɔkun maan i kusu kle amun i nvle liɛ’n wie. Kɛ ɔ yo sɔ’n, amun kwla fɛ i ɲin sie ndɛ’n su. Kpɔkun amun kwla yo janvuɛ, yɛ amun yalɛ kokolɛ’n kwla yo amanniɛn su.

Fluwa’n i su fitilɛ lika’n nun’n, be mannin ajalɛ kpanngban nga e kwla fa naan y’a uka be nga e kanman be aniɛn’n be kpa. I ti’n, é srɛ́ amun kɛ amun kanngan ajalɛ sɔ’m be nun kpa naan amun nanti be su.

Lika nga be klɛli aniɛn nga be o fluwa nun’n be lɛ’n, nán aniɛn’m be ngunmin yɛ be o lɛ ɔ. Sanngɛ, aniɛn’m be nzɔliɛ’n klɛ aniɛn’m be ɲrun lɛ wie. I siesielɛ sɔ’n, ɔ yo maan amun kwla si aniɛn’m be nzɔliɛ nga be klɛ be fluwa nɲa’m be su’n, ɔ nin Biblu’n i akua nga be klɛ be aniɛn uflɛ nun’n.