Amun sasa amun wun sran lakalɛ’n i lika

‘An sasa amun wun, nán maan sran fi [...] laka amun naan ɔ ɲan amun.’—KOLƆSFUƐ MUN 2:8.

1-3. (a) ?Ngue yɛ ɔ kle kɛ sran lakalɛ’n wo sran’m be ninnge yolɛ’n i kwlaa nun ɔn? (b) ?Sɛ sran lakalɛ’n w’a tru mɛn’n nun’n, ngue ti yɛ ɔ fataman kɛ i sɔ’n bo e nuan ɔn?

I OSU w’a cɛ kan mmla klefuɛ dan kun usali avoka kpanngban wie mun kɛ: “?Amun nun onin yɛ sran nga amun su kpli i ti’n, ɔ nin a lɛkɛmɛn i le ɔ?” ?Be tɛli kosan’n su sɛ? I waan: “Avoka akpi tra su sɔ’m be nun’n, kunngba cɛ yɛ be nin a lɛkɛmɛn i le ɔ.” ?Ngue ti ɔ? Afin, “avoka sɔ’n boli avoka junman’n i dilɛ bo ɔ nin a cɛman, yɛ ɔ nin a kpliman sran ti.” Sa nga y’a kɛn i ndɛ yɛ’n kle weiin kɛ sran lakalɛ’n nin ato bualɛ’n w’a tru andɛ mɛn’n nun.

² Sran lakalɛ’n ti fanunfanun mɛn nunfuɛ’m be ninnge’m be yolɛ’n i kwlaa nun. Sa sɔ’m be su ndɛ nga be kan’n, be diman be yalɛ aladio nin televiziɔn nin zronali’m be nun. I wie yɛle kɛ politikifuɛ’m be diman sa nga be yo’n be su nanwlɛ. Kɛ sika siefuɛ mun nin avoka’m bé kán sika su nvasuɛ nga be ɲɛn i be junman diwlɛ’m be nun’n i ndɛ’n, be blɔ i dan. Aata difuɛ’m be di like tofuɛ’m be ndrunmun, yɛ sran’m be kpɛ be asiransi’m be gblɛ naan b’a ɲan sika b’a tannin be kalɛ mun. Nanwlɛ, sran lakalɛ’n w’a tru dan, ɔ maan sɛ e waan é kɛ́n i ngba sa’n, e su wiemɛn i kan le. Sran lakalɛ’n wo Ɲanmiɛn sulɛ’n nun wie. Ɲanmiɛn sulɛ nga be ti tɛ’n, be kpɛnngbɛn’m be bua sran’m be ato kɛ, be wu be o lɔ. Be kan blɔlɔ sin fɛtɛ ndɛ, kpɔkun be waan Ɲanmiɛn ti Atre nsan.—2 Timote 4:3, 4.

³ ?Ɔ fata kɛ sran lakalɛ’n i kwlaa sɔ’n, ɔ bo e nuan? Cɛcɛ. Afin kɛ Biblu’n kán sa nga “kɛ mɛn’n ɔ́ kɔ́ i bue nuan’n,” bé wá jú’n be ndɛ’n, ɔ seli kɛ: ‘Sran nga be klun yo wi mɔ be ti gblɛfuɛ’n, be sa tɛ nga bé yó’n i tɛ’n ɔ́ trá laa liɛ’n, bé láka sran mun yɛ bé láka be bɔbɔ be wun.’ (2 Timote 3:1, 13). E mɔ e ti Klistfuɛ’n, ɔ fata kɛ e nian e wunsu kpa naan sran lakalɛ ndɛ’m be ti’n, y’a jasoman nanwlɛ atin’n su. Ɔ maan kosan nɲɔn mɔ sɛ e usa e wun ɔ ti su’n yɛle kɛ: ?Ngue ti yɛ sran lakalɛ’n w’a tru andɛ sɔ ɔ? ?Yɛ wafa sɛ yɛ e kwla sasa e wun naan b’a lakaman e ɔ?

?Ngue ti yɛ sran lakalɛ’n w’a tru andɛ sɔ ɔ?

4. ?Sa nga ti yɛ sran lakalɛ’n w’a tru mɛn nun’n, ndɛ mennin yɛ Biblu’n kan fa yiyi nun’n niɔn?

⁴ Sa nga ti yɛ sran lakalɛ’n w’a tru mɛn nga nun’n, Biblu’n yiyi nun weiin. Akoto Zan seli kɛ: “Klunwifuɛ’n sie mɛn wunmuan’n.” (1 Zan 5:19). “Klunwifuɛ” sɔ’n yɛle mmusu’m be si Satan. Kɛ Zezi kɛ́n i ndɛ’n, ɔ seli kɛ: ‘Ɔ diman nanwlɛ mlɔnmlɔn, afin ɔ siman nanwlɛ’n. Ɔ bua ato, afin ato’n ti i nzuɛn, ato’n ti i junman, i yɛ ɔ ti ato buafuɛ’m be si’n niɔn.’ ?Ɔ maan sɛ mɛn nunfuɛ’m be angunndan’n, ɔ nin be nzuɛn’n, ɔ fa sran ng’ɔ sie be’n i liɛ’n, ɔ fata kɛ i sɔ’n bo e nuan?—Zan 8:44; 14:30; Efɛzfuɛ Mun 2:1-3.

5. ?Blɛ kasiɛn nga nun’n, wafa sɛ yɛ Satan wlɛ i wun ase laka sran mun ɔn? ?Yɛ sran mennin mun yɛ i ɲin ci be kpa ɔ?

⁵ Blɛ kasiɛn nga nun’n, Satan wlɛ i wun ase kpa sran lakalɛ’n nun. Kɛ be kɛnnin i bo’n, ɔ bali asiɛ’n su wa “ya su.” Afin ɔ si kɛ i cɛn’n w’a sɔnman kun. Yɛ kɛ m’ɔ kunndɛ kɛ ɔ́ sáci sran kpanngban ti’n, “ɔ laka mɛn wunmuan nunfuɛ’m be kwlaa.” (Sa Nglo Yilɛ 12:9, 12). Satan timan cɛn kunngun sran lakafuɛ. Sanngɛ, sran’m be lakalɛ’n yɛ ɔ ti i junman ɔn, ɔ kaciman.a I sran lakalɛ ajalɛ’m be ti fanunfanun. Ɔ fa gblɛ nin ato’n fa saci be nga be lafiman Ɲanmiɛn su’n be angunndan’n, ɔ maan be faman be wun mantanman Ɲanmiɛn (2 Korɛntfuɛ Mun 4:4). Sran nga ato buafuɛ dan sɔ’n i ɲin ci be kpa’n, yɛle sran nga be su Ɲanmiɛn be ‘angunndan’n nun nanwlɛ nun’n,’ (Zan 4:24; 1 Piɛr 5:8). Nán e wla fi su kɛ, sɛ é kwlá sé’n, Satan seli kɛ: ‘N kwla yo naan sran ba kun sa w’a suman Ɲanmiɛn.’ (Zɔb 1:9-12). I sɔ’n ti’n, amun e fa e ɲin e sie i “gblɛ” nga Satan fa ɲan sran mun’n, i wafa wie’m be su naan e nian wafa nga e kwla sasa e wun be lika’n.—Efɛzfuɛ Mun 6:11.

Be nga be kacili be sin sili Ɲanmiɛn’n, maan e sasa e wun be sran lakalɛ’n i lika

6, 7. (a) ?Ngue yɛ be nga be kacili be sin sili Ɲanmiɛn’n be se be wun kɛ be yo ɔ? (b) ?Wafa sɛ yɛ Biblu’n yiyi be nga be kacili be sin sili Ɲanmiɛn’n be klun angunndan’n nun weinwein ɔn?

⁶ Be nga be kacili be sin sili Ɲanmiɛn’n, be lika yɛ Satan sin titi naan w’a laka Ɲanmiɛn i sufuɛ mun ɔn (Matie 13:36-39). I sɔfuɛ’m be se be wun kɛ be su Zoova naan be lafi Ɲanmiɛn Ndɛ’n su. Sanngɛ, nn be kpalo Ɲanmiɛn i anuannzɛ’n i bue ng’ɔ o asiɛ’n su wa’n. Wie’m be kusu’n, “Babilɔni klɔ dan’n” mɔ yɛle Ɲanmiɛn sulɛ wafa kwlaa nga be ti tɛ’n be ninnge klelɛ nga be kle fa saci Ɲanmiɛn wun’n, be sa be sin be fa be su ekun (Sa Nglo Yilɛ 17:5; 2 Piɛr 2:19-22). Ajalɛ nga be nga be kacili be sin sili Ɲanmiɛn’n be fa’n, ɔ nin angunndan nga be bu’n, Ɲanmiɛn wawɛ’n maan sran nga be klɛli Biblu’n be yi be nglo weiin.

⁷ ?Ngue yɛ be nga be kacili be sin sili Ɲanmiɛn’n, be kunndɛ ɔ? Wie mun’n, nanwlɛ atin’n mɔ laa nun be fali su suli Ɲanmiɛn’n, be ngunmin be jasoman su be kɔman sa ngbɛn. Sanngɛ, be kunndɛ kɛ sran uflɛ su be su. Yɛ kɛ ɔ yo naan be fite be ko kunndɛ be bɔbɔ be sran liɛ’n, be yomɛn i sɔ, be kunndɛ kɛ bé ‘láka Klistfuɛ mun naan be su be su.’ (Sa Nga Be Yoli’n 20:29, 30). Kɛ akoto Pɔlu kán ato like klefuɛ sɔ’m be ndɛ’n, ɔ wlali e su nun kpa seli kɛ: ‘An sasa amun wun, nán maan sran fi fɛ i sa ng’ɔ si i’n nin sa ngbɛn wie fa laka amun naan ɔ ɲan amun.’ (Kolɔsfuɛ Mun 2:8). ?Ndɛ nga Pɔlu kɛnnin i lɛ’n, nɛ́n i sɔ’n cɛ yɛ be nga be kacili be sin sili Ɲanmiɛn’n be nun sunman be yo ɔ? Wafa nga be nga be tra sran je’n be fa yo mɔ be tra sran nga ɔ niɛnmɛn i wunsu’n, i sɔ kunngba yɛ be nga be kacili be sin be sili Ɲanmiɛn’n be yo ɔ. Yɛle kɛ, Klistfuɛ nga be fa ato ndɛ nga sran sɔ’m be kan’n su’n, be yɛ be tra be fa fite asɔnun m’ɔ ti kɛ bua fa sa’n i nun ɔn.

8. ?Ajalɛ mennin yɛ be nga be kacili be sin sili Ɲanmiɛn’n be fa naan b’a ɲan like nga be kunndɛ’n niɔn?

⁸ ?Ajalɛ mennin yɛ be nga be kacili be sin sili Ɲanmiɛn’n be fa laka sran mun ɔn? I sɔfuɛ’m be kpɛ ndɛ’m be wun, annzɛ be kan ndɛ’n i buebue, annzɛ kusu ato kpa yɛ be bua ɔ. I nun mɔ Zezi o asiɛ’n su wa’n, ɔ sili kɛ sran sɔ’m bé wá klé i sɔnnzɔnfuɛ’m be yalɛ naan ‘bé tɔ́n be suɛn tɛtɛ’n kwlaa.’ (Matie 5:11). Gblɛfuɛ tɛ sɔ’m be fa ato’n be laka sran mun. Sran sɔ mun mɔ ‘be kpɛ be ti nun kan ndɛ mun’n,’ mɔ be kan ‘gblɛgblɛ ninnge klelɛ mun,’ kpɔkun mɔ ‘be kaci Ɲanmiɛn Ndɛ nga be klɛli’n’ be fa ɲan like nga be kunndɛ’n, akoto Piɛli wlali e su nun kpa be lika (2 Piɛr 2:3, 13; 3:16). Nanwlɛ, be nga be kacili be sin be sili Ɲanmiɛn’n, be yoli maan sran ‘wie’m be lafiman Ɲanmiɛn su kpa kun.’—2 Timote 2:18.

9, 10. (a) ?Wafa sɛ yɛ e kwla sasa e wun naan be nga be kacili be sin sili Ɲanmiɛn’n, b’a lakaman e ɔ? (b) ?Sɛ anuannzɛ’n tinngɛ e Ɲanmiɛn klun sa silɛ’n, ngue ti yɛ ɔ fataman kɛ i sɔ’n sanngan e angunndan’n niɔn?

⁹ ?Wafa sɛ yɛ e kwla sasa e wun naan be nga be kacili be sin sili Ɲanmiɛn’n b’a lakaman e ɔ? Saan Biblu’n nun afɔtuɛ’m be su falɛ’n cɛ yɛ ɔ kwla uka e ɔ. Be nun kun se kɛ: ‘Be nga be faman ndɛ nga an lafi su su’n, mɔ be fa afiɛn sacilɛ’n wla amun afiɛn’n, mɔ be saci sran ti nun’n, an nian amun wun be lika. Nán an fa amun wun mantan be.’ (Rɔmfuɛ Mun 16:17). Maan ndɛ’n ɔ fin sran o, annzɛ fluwa nun o, annzɛ ɛntɛnɛti nun o, ‘nán e fa e wun mantan be.’ ?Ngue ti yɛ ɔ fata kɛ e fɛ i sɔ ajalɛ’n niɔn? I klikli su’n yɛle kɛ, Ɲanmiɛn Ndɛ’n yɛ ɔ se kɛ e yo sɔ ɔ. Kpɔkun e lafi su kɛ Zoova yɛ titi’n, ɔ si like ng’ɔ ti kpa man e’n niɔn.—Ezai 48:17, 18.

¹⁰ I nɲɔn su’n yɛle kɛ, e klo Zoova i anuannzɛ’n. Afin like nga ɔ kle e’n ti’n, e nin Babilɔni klɔ dan’n e buli mlɔnmlɔnmlɔn. I bue kun kusu’n, e si kɛ sa kwlaa nga Zoova seli kɛ ɔ́ yó be’n, nán be ngba yɛ e wun be wlɛ kpa ɔ. Ɔ maan kɛ lika’n kɔ́ i ɲrun’n, ninnge nga e sili be laa’n, be tinngɛ wie mun kɛ nga ɔ nin i fata’n sa. I lɛ nun’n, Zoova ɲrun yɛ e ɲin ta naan i bɔbɔ yiyi ninnge silɛ sɔ’m be nun blɛblɛblɛ kle e ɔ (Nyanndra Mun 4:18). Kɛ ɔ yo sɔ’n, anuannzɛ nga Ɲanmiɛn mɛnnin i junman kɛ ɔ di’n, mɔ e wun i wlɛ weiin kɛ Ɲanmiɛn yra su’n, e su jasoman nun.—Sa Nga Be Yoli’n 6:7; 1 Korɛntfuɛ Mun 3:6.

Maan e sasa e wun naan y’a lakaman e bɔbɔ e wun

11. ?Ngue ti yɛ fɔ m’ɔ o sran nun’n, ɔ yo maan sran’n lɛkɛ i bɔbɔ wun ɔn?

¹¹ Kɛ mɔ Satan si kɛ sran’n i bɔbɔ wun lakalɛ’n wo i nzuɛn’n nun ti’n, i yɛ ɔ fa sua e wun aya ɔ. Zeremi 17:9 waan: ‘Klɔ sran’n i klun angunndan’n ti tɛ tra like kwlaa, be yo angunndan sɔ’n i sa fi ɔ ɔ yoman ye.’ Yɛ Zaki kusu seli kɛ: ‘Sran kun i lakalɛ’n fin i bɔbɔ i konvi’n, yɛ maan be lɛkɛ i be ɲɛn i ɔ.’ (Zak 1:14). Konvi’n yɛ ɔ fa sa tɛ yolɛ’n ba ɔ. Afin, ɔ yo maan e wunman sa’n i tɛ lika’n kun. Kɛ ɔ ko yo sɔ’n nn y’a laka e wun. Afin, sa tɛ yolɛ’n i agualiɛ’n yɛle wie’n.—Rɔmfuɛ Mun 8:6.

12. ?Wafa sɛ yɛ e kwla laka e bɔbɔ e wun ɔn?

¹² E bɔbɔ e wun lakalɛ’n ɔ kwla kaci e wun aya ndɛndɛ kpa. Yɛle kɛ, klɔ sran i klun angunndan m’ɔ ti tɛ tra like kwlaa ti’n, sɛ ɔ yo sa kun m’ɔ ti tɛ’n, ɔ kwla se i wun kɛ ɔ timan tɛ (1 Samiɛl 15:13-15, 20, 21). E klun angunndan’n mɔ be yo i sa fi ɔ ɔ yoman ye’n, ɔ kwla yo ekun maan e bu ayeliɛ wie m’ɔ nin i fataman’n, kɛ ɔ ti ayeliɛ kpa. Amun e fa be ɲin su yiyilɛ’n i su sunnzun ase e nian. Be ɲin su yiyilɛ wie’m be ti kpa, yɛ be man aklunjuɛ. Sanngɛ, be nun sunman nga andɛ mɛn’n yi be sriman nun nin televiziɔn nun, ɔ nin ɛntɛnɛti nun’n, be ti ninnge fiɛnfiɛn nin sa sukusuku ngunmin. Sanngɛ ɔ cɛman naan y’a se e wun kɛ, e kwla nian ninnge fiɛnfiɛn sɔ mun naan be kwlá yoman e su like fi. Wie’m be ko se be wun kɛ: “?Min angunndan’n buman n fɔ, ɔ maan i tɛ lika’n wo nin?” Sanngɛ sran sɔ’m be su ‘laka be bɔbɔ be wun.’—Zak 1:22.

13, 14. (a) ?Biblu’n nun sa mennin yɛ ɔ kle e kɛ e angunndan’n ɔ tinngɛman kpa sa yolɛ’n nun titi ɔ? (b) ?Ngue yɛ e kwla yo naan y’a lakaman e bɔbɔ e wun ɔn?

¹³ ?Wafa sɛ yɛ e kwla yo naan y’a lakaman e bɔbɔ e wun ɔn? Like kwlaa nga ɔ fata kɛ e yo’n, be nun klikli’n yɛle kɛ maan ɔ kpɛn e klun kɛ klɔ sran’n i angunndan’n ɔ kɔman sa kpa yolɛ’n su titi. Amun e fa akoto Pɔlu i su sunnzun ase e nian. Ka naan w’a kaci Klistfuɛ’n, ɔ kleli Klist i sɔnnzɔnfuɛ’m be yalɛ kpa (Sa Nga Be Yoli’n 9:1, 2). I blɛ sɔ nun’n, i angunndan’n w’a bumɛn i fɔ mlɔnmlɔn. Sanngɛ, ɔ fɛli i wlali sa tɛ yolɛ’n nun. Pɔlu bɔbɔ seli kɛ: ‘Sa wlɛ mɔ n wunmɛn i’n nin i su mɔ n lafiman’n ti yɛ n yoli sɔ ɔ.’ (1 Timote 1:13). I sɔ’n kle kɛ, nán e angunndan’n m’ɔ buman e fɔ sa kun mɔ e yoli’n i nun’n, i ti yɛ é sé kɛ y’a yo sa kpa ɔ. Angunndan nga Ɲanmiɛn Ndɛ’n tinngɛ i’n i kunngba cɛ yɛ ɔ kwla fa sran sie i atin kpa su ɔ.

¹⁴ Kɛ ɔ ko yo naan y’a lakaman e bɔbɔ e wun’n, ɔ fata kɛ e angunndan’n tran ninnge wie mun mɔ be yolɛ’n kwla uka e’n, be su. Maan Ɲanmiɛn srɛlɛ nun’n, e kunndɛ e si sran wafa nga e ti’n (Jue Mun 26:2; 2 Korɛntfuɛ Mun 13:5). Sɛ e si sran wafa nga e ti’n i nanwlɛ su’n, ɔ́ tíke e ɲin. Ɔ maan, é wún i wlɛ kɛ, ɔ fata kɛ e kaci e angunndan’n ajalɛ wie’m be falɛ’n nun. Maan e sie e su tie ndɛ nga sran uflɛ’m be kan’n (Zak 1:19). Kɛ mɔ e kwlá siman e bɔbɔ e wun kpa liɛ su’n ti’n, ɔ ti kpa kɛ e sie e su tie sran’n i wafa nga e ti’n i su ndɛ nga e niaan Klistfuɛ nga b’a tin Ɲanmiɛn ninnge’m be nun’n be kan kle e’n. Sɛ e su fa ajalɛ kun, annzɛ e su yo sa wie naan sa sɔ’n timan kpa e niaan Klistfuɛ mɔ w’a tin Ɲanmiɛn ninnge’m be nun’n i ɲrun’n, e kwla usa e wun kɛ: ‘?Min angunndan’n yɛ m’an tinngɛmɛn i sɛsɛ, annzɛ min awlɛn’n yɛ ɔ su laka min ɔn?’ Maan e kanngan Biblu’n ɔ nin Biblu’n i akua’m be nun titi (Jue Mun 1:2). I sɔ yolɛ’n ɔ́ úka e naan e angunndan’n nin e nzuɛn’n, be nin Ɲanmiɛn i mmla’m b’a ɔ likawlɛ.

Maan e sasa e wun Satan i ato ndɛ’m be lika

15, 16. (a) ?Ato ndɛ mennin mun yɛ Satan fa laka e ɔ? (b) ?Ngue yɛ e kwla yo naan y’a tɔman Satan i gblɛ ndɛ’m be nun ɔn?

¹⁵ Satan fa ato ndɛ fanunfanun fa laka e. I wie yɛle kɛ, ɔ yo maan e bu i kɛ aklunjuɛ’n i kpafuɛ’n ɔ fin aɲanbeun ninnge mun. Sanngɛ nn, i sɔ’n ti ato (Akunndanfuɛ’n 5:10-12). Ɔ kunndɛ kɛ e bu i kɛ mɛn tɛ kain nga ɔ́ ká lɛ titi. Sanngɛ nn, e wun weiin kɛ e o mɛn’n i “bue nuan.” (2 Timote 3:1-5). Satan yo maan sran’m be bu i ekun kɛ, be su ɲanman mɛn dilɛ sukusuku’n i nuan su sa. Sanngɛ nn, be nga be di i sɔ mɛn’n, be titi sa nga be luali’n i su mma tɛ mun (Galasifuɛ Mun 6:7). ?Ngue yɛ e kwla yo naan y’a tɔman sran lakalɛ wafa sɔ’m be nun ɔn?

¹⁶ Maan e fa Biblu’n nun sa mun e tu e wun fɔ nun. Sran nga Satan lakali be’n, be nun sunman be wun ndɛ o Biblu’n nun kpa. Wie’m be kloli aɲanbeun ninnge mun, b’a wunman kɛ be blɛ liɛ’n ɔ juli i bue nuan. Annzɛ kusu be tɔli sa sukusuku yolɛ’n nun. Yɛ be wunnin be ayeliɛ’n i su ɲrɛnnɛn mun kusu (Matie 19:16-22; 24:36-42; Lik 16:14; 1 Korɛntfuɛ Mun 10:8-11). Maan e fa e blɛ liɛ’n nun sa mun e tu e wun fɔ nun. Nanwlɛ, ndɛ’n ɔ nin i kanlɛ fataman. Yɛle kɛ wie liɛ’n, Klistfuɛ wie’m be minndɛman kun lele. Ɔ maan be bu i kɛ Ɲanmiɛn i sulɛ’n ti’n, like kpa wie su sin be sin. Wie liɛ’n be yaci nanwlɛ atin’n i su falɛ be kɔ mɛn dilɛ. Sanngɛ, sran sɔ’m b’a fa ‘atin m’ɔ yo ndrɔn’n su,’ yɛ cɛn kun bé tɔ́ sa kekle nun (Jue Mun 73:18, 19). I sɔ’n ti’n, ngwlɛlɛfuɛ ayeliɛ yɛle kɛ e fa sa tɛ nga e wiengu’m be yo’n, e tu e wun fɔ nun.—Nyanndra Mun 22:3.

17. ?Ngue ti yɛ Satan bua ato kle e kɛ Zoova kloman e, annzɛ ɔ buman e like fi’n niɔn?

¹⁷ Ato ndɛ kun ekun o lɛ mɔ Satan fa laka sran mun kpa liɛ su ɔ. Ato m’ɔ bua fa laka e’n yɛle kɛ, Zoova kloman e, annzɛ ɔ buman e like fi. Nán andɛ sa yɛ Satan fɛli i ɲin sieli sran mɔ fɔ’n wo i nun’n, i su ɔ. Ɔ si like nga ɔ kwla fa bubu e sa sin Ɲanmiɛn sulɛ nun’n (Nyanndra Mun 24:10). I sɔ’n ti’n, ɔ bua e ato kɛ e timan like fi Ɲanmiɛn i ɲrun. Sɛ ‘be tɛ e ase’ naan e bu i kɛ Zoova nianman e lika’n, e kwla yaci i sulɛ (2 Korɛntfuɛ Mun 4:9). I sɔ’n kusu cɛ, yɛ Lakafuɛ dan’n ɔ kunndɛ ɔ! ?Sɛ ɔ ti sɔ’n niɔn, ngue yɛ e kwla yo naan y’a tɔman Satan i ato ndɛ sɔ’n nun ɔn?

18. ?Wafa sɛ yɛ Biblu’n gua e awlɛn su nzue kɛ Zoova klo e ɔ?

¹⁸ Maan e tinuntinun e bu klolɛ nga Biblu’n se kɛ Ɲanmiɛn klo e’n i su angunndan. Biblu’n fa sunnzun ase wie mun mɔ be kan sran awlɛn’n, ɔ kle kɛ Zoova i ɲin o e su naan ɔ klo e e tinuntinun. Kɛ Biblu’n se kɛ Zoova sɔ e ɲinmuɛn nzue’n i “sɛ’n nun’n,” i bo’n yɛle kɛ i sulɛ tankaan i su afɛ nga e wun i mɔ i ti’n e sun’n, ɔ wun i, yɛ i wla fiman su (Jue Mun 56:9). Sɛ e ‘angunndan’n w’a sanngan’n,’ Zoova si sɔ, kpɔkun ɔ nian e lika (Jue Mun 34:19). Ɔ si e bɔbɔ ba’n i kpa liɛ su, yɛ e “ti ndrɛ’n bɔbɔ, ɔ si i nuan.” (Matie 10:29-31). Ɔ nin i sɔ ngba’n, Ɲanmiɛn “fɛ i Wa kunngba cɛ’n mannin” naan e fite nun (Zan 3:16; Galasifuɛ Mun 2:20). Cɛn wie’n, e kwla bu i kɛ ndɛ sɔ mɔ Biblu’n kan’n, be timan e liɛ. Sanngɛ, ɔ fata kɛ ndɛ nga Zoova kan’n, i ɲrun nin i sin’n, e lafi su. Ɔ kunndɛ kɛ e si kɛ ɔ klo sran kwlaa, naan sanngɛ kusu ɔ klo e e tinuntinun.

19, 20. (a) ?Ngue ti yɛ ɔ ti cinnjin kpa kɛ Satan i ato ndɛ nga ɔ se kɛ Zoova kloman e’n, ɔ fata kɛ e si i naan e kpalo i ɔ? (b) ?Wafa sɛ yɛ akpasua sunianfuɛ kun ukali be nga be wla bo be wun’n niɔn?

¹⁹ Maan e wun lakalɛ’n i wlɛ naan e kpalo i. Kɛ amun ko wun kɛ sran kun ti gblɛfuɛ’n, amun nian amun wunsu i lika naan w’a lakaman amun wie. I sɔ kunngba’n, kɛ amun si kɛ Satan yɛ ɔ kunndɛ kɛ amun bu i kɛ Zoova kloman amun’n, ɔ kwla uka amun kpa liɛ su. Kɛ aniaanbla kun kanngannin La Tour de Garde kun nun m’ɔ wunnin ajalɛ nga Satan fa laka sran mun’n, ɔ seli kɛ: “N nin a bumɛn i le kɛ Satan nian angunndan nga n bu’n su ɔ fa bubu min sa sin. I sɔ mɔ m’an wun i wlɛ’n, ɔ wla min fanngan siɛn’n naan m’an jran kekle.”

²⁰ Amun e fa nvle kun m’ɔ o Amlɛnkɛn’m be mɛn’n i bo ngua lɔ nun’n, i su akpasua sunianfuɛ kun i ajalɛ’n e nian. Kɛ ɔ́ sín i niaan Klistfuɛ nga be wla bo be wun’n be su ɔ́ wlá be fanngan’n, ɔ usali be kɛ: ‘?Amun bu i kɛ Ɲanmiɛn ti Atre nsan?’ Titi’n, sran nga i wla boli i wun’n ɔ tɛ su kɛ: ‘N kwlá bumɛn i sɔ mlɔnmlɔn.’ Afin ɔ si kɛ i sɔ’n ti Satan i ato ndɛ’m be nun kun. Asɔnun kpɛnngbɛn’n usa ekun kɛ: ‘?A bu i kɛ sin fɛtɛ’n, ɔ o lɛ sakpa?’ Sran’n tɛ su ekun kɛ: ‘Ɔ si’ɛ i mlɔnmlɔn!’ Kɛ be ko tɛ kosan’n su sɔ’n, asɔnun kpɛnngbɛn’n se be kɛ Satan i ato ndɛ kun ekun o lɛ. I liɛ’n, be wunmɛn i wlɛ ndɛndɛ. Kɛ ɔ ko se sɔ’n, ɔ fa fluwa Approchez-vous de Jéhovahb i bue 249 i ndɛ kpɔlɛ 21, kpɔkun ɔ kle be kɛ Satan i ato ndɛ’n yɛle kɛ, ɔ yo maan e bu i kɛ Zoova kloman e e tinuntinun. Akpasua sunianfuɛ’n waan, wafa nga ɔ ukali aniaan nga be wla boli be wun mɔ be wunnin Satan i ato ndɛ’n sɔ’n i wlɛ, mɔ be kpaloli i’n, ɔ bali nvlɛ kpa.

Maan e sasa e wun sran lakalɛ’n i lika

21, 22. ?Satan i gblɛ ayeliɛ’m be lika’n, ngue ti yɛ e nunman ble nun ɔn? ?Yɛ ngue yɛ ɔ fata kɛ e ta nda kɛ é yó ɔ?

²¹ Mɛn nga y’a ju i bue nuan yɛ nun’n, nán e bu i mlɔnmlɔn kɛ Satan wá yáci sran lakalɛ’n ɔ nin i ato ndɛ’m be trulɛ. Ɔ yoli mɔ Zoova kusu, ɔ yaciman e ble nun Satan i gblɛ ayeliɛ’m be lika ɔ. Biblu’n, ɔ nin Biblu’n i akua nga ‘sran kpa nanwlɛfuɛ m’ɔ si ngwlɛlɛ’n’ yi be’n, be yi mmusu’m be si Satan i gblɛ ninnge’m be nglo weiin (Matie 24:45). I sɔ mɔ be yo’n, ɔ uka e maan e kwla jran Satan i gblɛ ndɛ’m be ɲrun kekle.—2 Korɛntfuɛ Mun 2:11.

²² I sɔ’n ti’n, maan e sasa e wun be nga be kacili be sin sili Ɲanmiɛn’n be ato ndɛ’m be lika. Maan e nian e wunsu kpa naan y’a tɔman e bɔbɔ e wun lakalɛ aya’n m’ɔ tra sran blɛlɛlɛ’n i nun. Kpɔkun, maan e si Satan i ato ndɛ mun naan e kpalo be kwlaa. I liɛ’n, e nin ‘Ɲanmiɛn m’ɔ buaman ato’n’ mɔ i ɲin ci sran nga be diman nanwlɛ’n, e afiɛn’n su saciman.—Jue Mun 31:6; Nyanndra Mun 3:32.

[Ja ngua lɛ ndɛ mun]

?Amun wla kwla kpɛn su?

• ?Ngue ti yɛ sran lakalɛ’n w’a tru asiɛ wunmuan’n su andɛ ɔ?

• ?Ngue yɛ e kwla yo naan be nga be kacili be sin sili Ɲanmiɛn’n b’a lakaman e ɔ?

• ?Ngue yɛ e kwla yo naan y’a tɔman e bɔbɔ e wun lakalɛ aya’n wie fi nun ɔn?

• ?Wafa sɛ yɛ e kwla yo naan y’a tɔman Satan i ato ndɛ’m be nun ɔn?