Be ɲin su yiyilɛ kpafuɛ’n m’ɔ man aklunjuɛ’n
‘Sɛ amún dí like o, sɛ amún nɔ́n nzue annzɛ nzan o, sɛ amún yó like wie o, an yo i kwlaa sɔ’n i nuan su maan Ɲanmiɛn ɲan ɲrun.’—1 KORƐNTFUƐ MUN 10:31.
1, 2. ?Sɛ like nga e yo’n ɔ man e aklunjuɛ’n, ngue ti yɛ e kwla se kɛ ‘Ɲanmiɛn yɛ ɔ fɛ i sɔ’n mannin’ e ɔ? ?Yɛ, afɔtuɛ kpa onin yɛ Biblu’n man e ɔ?
ZOOVA, e Ɲanmiɛn m’ɔ di ninnge’m be su aklunjuɛ’n, ɔ kunndɛ kɛ e di aklunjuɛ wie. I sɔ’n ti’n, ɔ mannin e aklunjuɛ dilɛ ninnge kpanngban kpa. Ɔ maan sɛ e kunndɛ kɛ é yó ninnge nga be kwla man e aklunjuɛ’n, i sɔ’n ti su. (1 Timote 1:11; 6:17) Famiɛn ngwlɛlɛfuɛ Salomɔn seli kɛ: ‘N fa wunnin i wlɛ kɛ like ng’ɔ ti kpa man sran’n yɛle aklunjuɛ dilɛ’n. Yɛ n wunnin kɛ blɛ mɔ sran kun di like m’ɔ nɔn nzan’n m’ɔ di i sa ti junman’n i nuan like’n, Ɲanmiɛn yɛ ɔ fɛ i sɔ’n mɛn i ɔ.’—Akunndanfuɛ’n 3:12, 13.
2 Kɛ sran kun di junman m’ɔ wun kɛ ɔ dili kpa’n, ɔ yo i fɛ. Yɛ, sɛ bé sé bé sé naan ɔ nin i awlofuɛ mun, annzɛ i janvuɛ mun yɛ be dili junman sɔ’n, aklunjuɛ’n yo dan kpa ekun. I sɔ aklunjuɛ liɛ’n, e kwla se kɛ ‘Ɲanmiɛn yɛ ɔ fa mɛnnin i ɔ.’ Sanngɛ, ɔ fataman kɛ aklunjuɛ mɔ Ɲanmiɛn maan e di’n ti’n, é dí lele naan é yó like ng’ɔ timɛn i nuan su’n. Biblu’n se kɛ nán e yo nzannunmunfuɛ, ɔ nin aliɛ safuɛ, yɛ nán e kunndɛ bian nin bla sukusuku. Kpɔkun ɔ kan gua su kɛ be nga be yo i sɔ ninnge mun’n, ‘Ɲanmiɛn su sieman be mlɔnmlɔn.’—1 Korɛntfuɛ Mun 6:9, 10; Nyanndra Mun 23:20, 21; 1 Piɛr 4:1-4.
3. ?Ngue yɛ ɔ́ úka e naan y’a tran y’a minndɛ Zoova naan i cɛn dan’n w’a fuman e nun ɔn?
3 Blɛ kekle nga nun’n, ɔ fata kɛ Klistfuɛ’m be nian be wun su kpa tra laa’n naan b’a yoman mɛn’n nun sa sukusuku wie fi. (Zan 17:15, 16) Afin kɛ nga Biblu’n fa kannin sa’n, andɛ sran’m be ‘klo mɛn dilɛ’n tra Ɲanmiɛn,’ yɛ be ‘buman angunndan’ kɛ ‘ɲrɛnnɛn dan’ kun w’a mantan koko. (2 Timote 3:4, 5; Matie 24:21, 37-39) Zezi seli i sɔnnzɔnfuɛ’m be kɛ: ‘An sasa amun wun, nán an yo aliɛ safuɛ mun nin nzanbɔɛfuɛ mun, nán an koko ninnge’m be ti, sɛ an yo sɔ’n, ɔ cɛman naan cɛn sɔ’n w’a fu amun nun. Afin cɛn sɔ’n ɔ́ wá fú sran mɔ be o mɛn wunmuan’n nun’n be kwlaa be nun kɛ aya sa.’ (Lik 21:34, 35) E mɔ e ti Ɲanmiɛn i sufuɛ’n, e nanti Zezi i afɔtuɛ sɔ’n su. Kpɔkun, kɛ ɔ ko yo naan Zoova i cɛn dan’n w’a fuman e nun’n ti’n, e yoman kɛ mɛn tɛ nga i nunfuɛ. Sanngɛ e mian e ɲin e tran minndɛ Zoova, yɛ e lafiman.—Sofoni 3:8; Lik 21:36.
4. (a) ?Ngue ti yɛ be ɲin su yiyilɛ kpafuɛ’n i ɲanlɛ’n ti kekle ɔ? (b) ?Afɔtuɛ onin yɛ Efɛzfuɛ Mun 5:15, 16 man e mɔ e kunndɛ kɛ é fá su ɔ?
4 Mɛn’n nun sa tɛ’m be kpalolɛ’n timan pɔpɔ. Afin, Satan yo maan a wun be kɛ like kpa mun sa naan sran ngba kwla yo. I li sɛ e se kɛ é yíyí e ɲin su kan’n, i lɛ’n nun yɛ ɔ ti kekle man e kpa’n niɔn. Afin be ɲin su yiyilɛ sunman nga mɛn nunfuɛ’m be kle’n, be kle naan sran’m be ‘ɲin blo ninnge’m be su.’ (1 Piɛr 2:11) Ɔ maan, lika nga sran kpanngban kwla wun i sɔ like’n, lɛ yɛ be fɛ i sɔ like’n kle ɔ. Awlo lɔ bɔbɔ’n, fluwa nin televiziɔn nin ɛntɛnɛti’n, ɔ nin Video’m be ti’n, e kwla nian be ɲin su yiyilɛ fiɛn sɔ mun. I sɔ’n ti’n, Biblu’n man Klistfuɛ’m be afɔtuɛ kpa kun. I waan: ‘An nian amun nantilɛ mɔ an fa nanti’n i su kpa. Nán an yo kɛ sran m’ɔ wunman sa wlɛ’n sa, sanngɛ an yo ngwlɛlɛfuɛ. Kɛ amun a ɲan amun ti’n, nán an tran lɛ ngbɛn, an yo like ng’ɔ yo sa ye’n, afin blɛ nga e o nun yɛ’n ti tɛ.’ (Efɛzfuɛ Mun 5:15, 16) Sɛ e nanti afɔtuɛ sɔ’n su’n, e su faman e blɛ’n e nianman ɲin su yiyilɛ’n ng’ɔ ti tɛ’n, mɔ maan e nin Zoova e afiɛn kwla saci naan y’a mlin’n!—Zak 1:14, 15.
5. ?Ngue yɛ i yolɛ’n man e aklunjuɛ dan ɔn?
5 Kɛ mɔ Klistfuɛ’m be di junman kekle kpa’n ti’n, cɛn kunngun be kunndɛ kɛ bé yíyí be ɲin su kan. I lɛ nun’n, Akunndanfuɛ’n 3:4 waan ɔ le ‘blɛ kun mɔ be fa sri ɔ,’ yɛ ɔ le ‘blɛ kun mɔ be fa si able ɔ.’ Biblu’n nun ndɛ sɔ’n kle kɛ, ɔ fataman kɛ e ɲin su yiyilɛ’n ɔ fa e blɛ ngba. Kpɔkun ɔ fataman kɛ e ɲin su yiyilɛ’n saci e nin Ɲanmiɛn e afiɛn, annzɛ ɔ tanndan Ɲanmiɛn junman dilɛ’n i ɲrun. Sanngɛ, ɔ fata kɛ e ɲin su yiyilɛ’n man e aklunjuɛ. Klistfuɛ nga b’a yo sran Ɲanmiɛn ninnge’m be nun’n, be si kɛ sran like manlɛ’n, ɔ man aklunjuɛ dan. I sɔ’n ti’n, titi be dun mmua yo Zoova klun sa liɛ’n. Kpɔkun, be fa be ti wla Zezi i kɔmin su waka’n bo. Ɔ maan, be ‘wla gua ase.’—Matie 11:29, 30; Sa Nga Be Yoli’n 20:35.
Maan e fa ɲin su yiyilɛ’n i kpafuɛ’n
6, 7. ?Ngue yɛ ɔ kwla uka e naan y’a wun be ɲin su yiyilɛ ng’ɔ ti kpa’n, ɔ nin ng’ɔ timan kpa’n be ngbaciɛ’n i wlɛ ɔ?
6 ?Wafa sɛ yɛ e kwla wun i wlɛ kpa kɛ be ɲin su yiyilɛ kun ti Klistfuɛ’n, i liɛ’n su ɔ? I lɛ nun’n, siɛ nin niɛn’m be kwla uka be mma mun. Kpɔkun sɛ ɔ nin i fata’n, asɔnun kpɛnngbɛn’m be kwla uka e wie. Sanngɛ kɛ e niɛn i kpa sa’n, maan ɔ yo fluwa nun kannganlɛ o, annzɛ be ɲin su yiyilɛ o, annzɛ able silɛ o, annzɛ jue tolɛ o, nán sran uflɛ yɛ ɔ fata kɛ ɔ se e kɛ ɔ ti kpa, annzɛ ɔ timan kpa ɔ. Pɔlu seli kɛ: ‘Be nga b’a yo sran’n be kunndɛ sa ng’ɔ ti kpa’n nin tɛ’n be ngbaciɛ lele be si i kpa.’ (Ebre Mun 5:14; 1 Korɛntfuɛ Mun 14:20) Biblu’n nun mmla’m be bo e ɲrun atin. Ɔ maan sɛ Ɲanmiɛn Ndɛ’n sie e’n, e klun angunndan’n úka e naan y’a yo like ng’ɔ se e kɛ e yo’n.—1 Timote 1:19.
7 Zezi seli kɛ: “Kɛ waka kun ti’n, yɛ i mma’n ti ɔ.” (Matie 12:33) Ɔ maan sɛ be ɲin su yiyilɛ kun kle sa kekleekle, annzɛ sa sukusuku, annzɛ bae dilɛ’n, ɔ fata kɛ e kpalo i. Asa ekun’n, sɛ e ti’n kwla ka be ɲin su yiyilɛ sɔ’n nun’n, annzɛ e wun su faman e feke’n, annzɛ i wun kalɛ’n kwla yo dan’n, annzɛ ɔ kwla bo e wla’n, annzɛ kusu ɔ kwla sanngan sran uflɛ angunndan’n, nn ɔ timan be ɲin su yiyilɛ kpa. Akoto Pɔlu seli kɛ, sɛ e yo like naan ɔ saci e niaan kun i angunndan’n, nn y’a yo sa tɛ. I waan: ‘Kɛ an yo amun niaan mɔ be wunmɛn i wlɛ’n be tɛ sɔ’n mɔ maan be angunndan’n sanngan’n, Klist yɛ an yo i tɛ sɔ’n niɔn. I sɔ’n ti’n, sɛ nnɛn yɛ n ko di n ko saci min niaan’n, n su dimɛn i kun le naan m’an saciman min niaan’n.’—1 Korɛntfuɛ Mun 8:12, 13.
8. ?E wun aya onin mun yɛ Video nianlɛ’n, ɔ nin i nun ngowa kanlɛ’n sua e ɔ?
8 Ninnge nga e kwla to be naan y’a fa yiyi e ɲin su’n, be sɔnnin kpa. I wie yɛle kɛ Video nin Video nun ngowa kanlɛ ninnge mun sa. Video wie’m be kwla yo aɲinsuɛ yilɛ. Sanngɛ be nun’n, be kle ninnge nga Biblu’n bu be fɔ’n. Nanwlɛ, sɛ nzowa kpɛlɛ nin sran kunlɛ, annzɛ bla nin bian kunndɛlɛ yɛ Video kun kle’n, nán maan e se kɛ ɔ ti be ɲin su yiyilɛ ngbɛn! Zoova kpɔ be nga be ‘fa sa tɛ yolɛ’n cici be ti’n.’ (Jue Mun 11:5; Nyanndra Mun 3:31; Kolɔsfuɛ Mun 3:5, 6) Kpɔkun, sɛ like nga Video kun kle’n ɔ su e bo kɛ e yo aɲin kpli’n, annzɛ e ɲin blo ninnge’m be su’n, annzɛ ɔ saci e angunndan’n, annzɛ ɔ fa e blɛ’n i dan lika’n, maan e kaci e sa. Afin, be ɲin su yiyilɛ sɔ’n kwla saci e nin Ɲanmiɛn e afiɛn.—Matie 18:8, 9.
Wafa nga e kwla yo naan e ɲin su yiyilɛ’n w’a yo i kpafuɛ’n
9, 10. ?Be mɔ be wun sa’m be wlɛ kpa’n, ngue yɛ be kwla yo naan b’a ɲan ɲin su yiyilɛ kpafuɛ’n niɔn?
9 Ɔ ju cɛn wie’n, Klistfuɛ’m be usa be wun kɛ: “?Kɛ mɔ be ɲin su yiyilɛ sunman be nin Biblu’n be sansan be wun’n niɔn, onin yɛ ɔ ti kpa ɔ?” E kwla ɲan be ɲin su yiyilɛ kpafuɛ’n. Sanngɛ, i ɲanlɛ’n timan pɔpɔ. Ɔ maan, saan é dun mmua bú i wun angunndan yɛ é síe i yolɛ blɛ. I lɛ nun’n, siɛ nin niɛn mun yɛ ɔ fata kɛ be yo sɔ kpa’n niɔn. Sran sunman be liɛ’n, be nin be awlofuɛ mun nin asɔnunfuɛ mun yɛ be yiyi be ɲin su ɔ. Yɛle kɛ be yia be di like, annzɛ be koko Biblu’n nun sa’m be su yalɛ be fa wla be wiengu fanngan. Annzɛ kusu’n, be fite be ko yiyi be ɲin su lika wie nun, annzɛ be kan ngowa, annzɛ be kɔ wlanwlanlɛ. Ɲin su yiyilɛ’n i wafa sɔ’n, ɔ kwla man aklunjuɛ dan.
10 Aniaan kun m’ɔ ti asɔnun kpɛnngbɛn’n, ɔ nin i yi’n be wuli ba nsan. Be seli kɛ: “I nun mɔ e mma’m be te yo kanngan’n, e nin be yɛ e kunndɛ wunmiɛn lolɛ lika nga é kɔ́’n niɔn. Wie liɛ’n, e man be atin kɛ be flɛ be sran ng’ɔ ti be janvuɛ kpa’n mɔ i ti’n, be aklunjuɛ kwla yo dan’n. Sa wie’m be jɔli ba’m be klun dan. Yɛle kɛ, wie liɛ’n e flɛ awlobo kun, ɔ nin e janvuɛ mɔ be o asɔnun’n nun’n, e awlo lɔ. E tɔn like likawlɛ e di, kpɔkun e kan ngowa. Wie liɛ’n, e kɔ wlanwlanlɛ oka’m be su. Kpɔkun blɛ sɔ’m be nun’n, e fa e ɲin sie ninnge nga Zoova yili be’n be su.”
11, 12. (a) ?Kɛ é síesíe e ɲin su yiyilɛ blɛ’n, ngue yɛ e kwla yo naan sran uflɛ’m be dunman w’a tɛ nun wie ɔ? (b) ?Be ɲin su yiyilɛ kpa onin yɛ sran sunman be wla kwlá fiman su ɔ?
11 Kɛ é síesíe e ɲin su yiyilɛ blɛ’n, maan e bu sran wie’m be angunndan kɛ é flɛ́ be. Sran sɔ’m be wie yɛle angbeti mun, annzɛ sran ng’ɔ nin a jaman bla annzɛ bian’n, annzɛ sran nga i ngunmin tɛ i mma mun’n. Be flɛlɛ sɔ’n kwla wla be fanngan dan. (Lik 14:12-14) Wie liɛ kusu’n, e kwla flɛ sran mɔ w’a ba uflɛuflɛ asɔnun’n nun’n. Sanngɛ i lɛ nun’n, maan e nian nun kpa naan y’a flɛman sran mɔ i nzuɛn’n tɛ’n kwla sa sran uflɛ’n. (2 Timote 2:20, 21) Cɛcɛwafuɛ mɔ be kwlá tuman be bo’n be liɛ’n, e kwla fa aliɛ’n e kɔ be awlo lɔ naan e nin be y’a di.—Ebre Mun 13:1, 2.
12 Kɛ Klistfuɛ’m be yia be di like mɔ be kan sa nga ti yɛ be kacili Klistfuɛ’n, ɔ nin like ng’ɔ ukali be mɔ maan be su Ɲanmiɛn titi’n i ndɛ’n, ɔ wla be wiengu fanngan. I kpɛnngbɛn o, i ba kanngan o, be kwlaa be kwla koko Biblu’n nun sa’m be su yalɛ. I sɔ yalɛ kokolɛ’n, ɔ loman sran fi i ngasi. Sanngɛ, ɔ yo be kwlaa be ye.
13. ?Kɛ be flɛ Zezi nin Pɔlu, annzɛ kɛ be bɔbɔ flɛ sran mun’n, ngue yɛ be yo ɔ?
13 Sɛ e waan é flɛ́ sran mun’n, annzɛ kusu e bɔbɔ yɛ be flɛ e’n, Zezi kle e like ng’ɔ fata kɛ e yo’n i ajalɛ kpa. Yɛle kɛ titi’n, ɔ fɛli i sɔ blɛ’n kleli sran’m be like. (Lik 5:27-39; 10:42; 19:1-10; 24:28-32) I sɔnnzɔnfuɛ klikli’m be fɛli i ajalɛ’n su. (Sa Nga Be Yoli’n 2:46, 47) Akoto Pɔlu seli kɛ: ‘N klo kɛ ń wún amun wun naan Ɲanmiɛn wawɛ’n i like nga n ɲɛnnin i’n, an ɲan wie naan an jran kekle. Sɛ n ju amun wun lɔ mɔ é wlá e wun fanngan Ɲanmiɛn su mɔ e lafi’n ti’n, ɔ́ yó n fɛ dan.’ (Rɔmfuɛ Mun 1:11, 12) I sɔ kunngba’n kɛ e yia’n, ɔ fata kɛ e fɛ i sɔ blɛ’n e wla e wun fanngan.—Rɔmfuɛ Mun 12:13; 15:1, 2.
Ninnge wie m’ɔ fata kɛ e nian e wun su be lika’n
14. ?Ngue ti yɛ ɔ fataman kɛ e flɛ sran kpanngban e ɲin su yiyilɛ’n i bo ɔ?
14 Kɛ mɔ sran su nianlɛ’n leman ba’n ti’n, ɔ fataman kɛ e flɛ sran kpanngban. Blɛ ng’ɔ timan Ɲanmiɛn ninnge’m be yolɛ blɛ’n i nun’n, awlobo wie’m be yia lika wie be yiyi be ɲin su. Annzɛ, be kan ngowa mɔ akplowa silɛ nunman nun’n. Kɛ asɔnun kpɛnngbɛn mun, annzɛ asɔnunfuɛ’m be lika nianfuɛ mun, annzɛ sran nga be wun Ɲanmiɛn ninnge’m be wlɛ kpa’n, be nun wie tran be ɲin su yiyilɛ kun i bo’n, i sɔ’n yo maan be yo sa’n kwlaa i nuan su. Ɲin su yiyilɛ sɔ’n, ɔ kwla jɔ be klun.
15. ?Sɛ sran kun yia i wiengu mun’n, ngue ti yɛ ɔ fata kɛ ɔ nian be su kpa ɔ?
15 Sɛ e yia sran mun kɛ e w’a yiyi e ɲin su’n, maan e nian be su kpa. Afin aklunjuɛ mɔ e waan e nin e wiengu mun é dí’n, e kunndɛman kɛ sa yo be nun kun naan ɔ yo e nsisɔ. Mmla’n 22:8 nun’n, Zoova seli Izraɛlifuɛ’m be kɛ sɛ bé kplán sua uflɛ’n, maan be kplan talɛ kaan kun i ti su aunmuan fawlɛ’n i nuan su tɛɛn sin yia nun. ?Ngue ti ɔ? I waan: ‘W’a yoman sɔ’n, sɛ sran wie flo tɔ ɔ wu’n, kpɔkun bé sé kɛ wɔ yɛ a kunnin i ɔ.’ I sɔ kunngba’n, kɛ e flɛ sran mun kɛ be w’a yiyi be ɲin su’n, kannzɛ bɔbɔ e se be kɛ nán be yo ninnge wie mun’n, sanngɛ ɔ fata kɛ e nian be su naan sa fi w’a ɲanman be.
16. ?Sɛ e yia sran mun naan e waan é mán be nzan mɔ bo’n, ngue ti yɛ ɔ fata kɛ e yo i ngwlɛlɛ su ɔ?
16 Sɛ e waan é mán sran’m be nzan ng’ɔ bo’n, maan e man be ngwlɛlɛ su. Klistfuɛ sunman nga be yia sran mun’n, sɛ be nian naan be bɔbɔ’n be kwla nian nzan’n su’n, yɛ be fa man sran mun ɔn. Afin, ɔ fataman kɛ sran kun nɔn nzan dan, annzɛ sran uflɛ i angunndan sanngan. (Efɛzfuɛ Mun 5:18, 19) Sa sunman wie’m be ti’n, sran wie’m be kpɛ i kpo be nɔnman nzan ng’ɔ bo’n be ɲin su yiyilɛ’n i bo. Be ɲin su yiyilɛ lika sunman wie’m be nun’n, awa tannin be nga be nin a juman nzan nɔnlɛ’n, be nzan. Kannzɛ mmla sɔ’n ti Klistfuɛ’m be ɲrun kekle’n, sanngɛ ɔ fata kɛ be nanti awa i mmla’m be su.—Rɔmfuɛ Mun 13:5.
17. (a) ?Sɛ e yia naan e waan é bó miziki’n, ngue ti yɛ ɔ fata kɛ sran ng’ɔ flɛli i wiengu mun’n ɔ kpa miziki sɔ’m be nun kpa ɔ? (b) ?Sɛ é sí able’n, wafa sɛ yɛ e kwla kle kɛ e ti wun ase kanfuɛ ɔ?
17 Sran ng’ɔ yia i wiengu mun’n, ɔ fata kɛ ɔ fɛ i ɲin sie su kpa kɛ be su boman miziki, yɛ be su siman able, annzɛ be su yoman like mɔ Biblu’n bu i fɔ’n. Miziki’m be ti fanunfanun, yɛ ɔ le sran kun i liɛ m’ɔ klo i ɔ. Sanngɛ, kɛ mɔ andɛ miziki sunman be su sran’m be bo kɛ be di bae, annzɛ be yo sa sukusuku nin nzaje sa mun’n ti’n, ɔ fata kɛ e kpa be nun. Kannzɛ bɔbɔ miziki ng’ɔ ti wɛtɛɛ mɔ jue tolɛ nunman nun’n yɛ e kwla se kɛ ɔ ti kpa’n, sanngɛ ɔ fataman kɛ e bo miziki ng’ɔ ti wɛtɛɛ mɔ fa sran angunndan sie i bian nin bla kunndɛlɛ su’n. Yɛ ɔ fataman kɛ be mɛn i nɛn’n su dan ngboko. Sran nga e si kɛ ɔ su boman miziki’n i sɛsɛ su’n, maan e nian nun kpa naan y’a faman miziki’n i kunndɛlɛ’n, ɔ nin i bolɛ’n y’a wlɛmɛn i sa nun. Able silɛ nga be bu be bo’n nun, kpɔkun be to be ɲɔnflɛn nglo ɔ, ɔ maan sran bu angunndan tɛ’n, Klistfuɛ’m be simɛn i sɔ able mun.—1 Timote 2:8-10.
18. ?Sɛ ba’m be nin be wiengu’m bé yíyí be ɲin su’n, wafa sɛ yɛ siɛ nin niɛn’m be kwla yo naan b’a yoman sa tɛ ɔ?
18 Sɛ ba mun yɛ be yia be wiengu mun’n, ɔ fata kɛ siɛ nin niɛn mɔ be ti Klistfuɛ’n be si like nga be waan bé yó’n. Kpɔkun, maan be trɛn i bo naan be nian ba’m be su. Sanngɛ sa ng’ɔ ti tɛ’n yɛle kɛ, siɛ nin niɛn wie’m be yacili be ba’m be ngunmin be ɔli be ɲin su yiyilɛ. Ɔ maan be yoli sa sukusuku mun. (Efɛzfuɛ Mun 6:1-4) I sɔ’n ti’n, kannzɛ bɔbɔ amun lafi amun mma’m be su’n, sanngɛ ɔ fata kɛ amun uka be naan b’a ‘buman like nga gbaflɛn konvi sɔ i’n i angunndan.’—2 Timote 2:22.
19. ?Ngue yɛ ɔ kwla uka e naan e ɲin w’a tran like ng’ɔ ti cinnjin su ɔ?
19 Nanwlɛ, kɛ cɛn kunngun e yia e yiyi e ɲin su kɛ ng’ɔ nin i fata sa’n, e di su aklunjuɛ. Kpɔkun, ɔ yo maan e mɛn dilɛ’n ɲan ɲrun. Zoova w’a seman kɛ nán e yiyi e ɲin su. Sanngɛ kusu’n, e si kɛ ɲin su yiyilɛ’n, ɔ kwlá ukaman e naan y’a ɲan ninnge mun ɲanmiɛn su lɔ. (Matie 6:19-21) Zezi ukɛli i sɔnnzɔnfuɛ mun maan be wunnin like ng’ɔ ti cinnjin kpa’n, i wlɛ. Like sɔ’n, yɛle kɛ maan be ‘dun mmua fa be wun man Ɲanmiɛn maan ɔ sie be.’ Afin aliɛ nin nzan’n, ɔ nin tralɛ’n, ‘be mɔ be suman Ɲanmiɛn’n be yɛ be kunndɛ ɔ.’—Matie 6:31-34.
20. ?Ninnge kpakpa onin yɛ Zoova fa mɛn i sufuɛ kpa mun mɔ be di su aklunjuɛ ikisa ɔ?
20 Nanwlɛ, sɛ é “dí like o, sɛ é nɔn nzan o, sɛ é yo like wie o,” ɔ fata kɛ e yo i ‘kwlaa sɔ’n i nuan su maan Ɲanmiɛn ɲan ɲrun.’ Yɛ Ɲanmiɛn mɔ mannin e aklunjuɛ dilɛ ninnge kwlaa sɔ mun’n, maan e lɛ i ase. (1 Korɛntfuɛ Mun 10:31) Mɛn klanman mɔ w’a mantan koko nun’n, Zoova wá mán i sufuɛ kpa kwlaa nga be nanti i mmla’m be su’n, be aklunjuɛ dilɛ blɛ kpanngban kpa tititi.—Jue Mun 145:16; Ezai 25:6; 2 Korɛntfuɛ Mun 7:1.
?Amun wla kpɛn su?
• ?Ngue ti yɛ andɛ’n, be ɲin su yiyilɛ kpafuɛ’n i ɲanlɛ’n ti kekle man Klistfuɛ mun ɔn?
• ?Be ɲin su yiyilɛ onin wie mun yɛ be man Klistfuɛ’m be aklunjuɛ ɔ?
• ?Kɛ é yíyí e ɲin su’n, ngue yɛ ɔ fataman kɛ e wla fi i yolɛ’n su ɔ?
[Foto, bue 24]
Maan e fa be ɲin su yiyilɛ ng’ɔ man mmlusuɛ kpa’n.
[Foto mun, bue 25]
?Be ɲin su yiyilɛ onin yɛ Klistfuɛ’m be kpalo i ɔ?