E ɲrun dinfuɛ’m be anuannzɛ’n i nun sran uflɛ mun
MLAN cɛn m’ɔ ti afuɛ 2005, Utu anglo’n i le 24 su’n, nglɛmun nun’n, Betɛli nga be o Amlɛnkɛn’m be lɔ’n, ɔ nin nga be o Kanada lɔ’n, be nunfuɛ’m be tili nganniɛn fɛfɛ kun. Yɛle kɛ, kɛ ɔ fɛ i afuɛ 2005, Sɛptamblu anglo’n i le klikli’n su’n, sran nɲɔn be wa ukali Zoova i Lalofuɛ’m be ɲrun dinfuɛ’m be anuannzɛ’n i nunfuɛ’m be su. Sran nɲɔn sɔ mun yɛle Jɛfri Jakson nin Antoni Moris III.
Aniaan bian Jakson boli Atin bofuɛ junman’n dilɛ bo Tasmanie lɔ afuɛ 1971 nun Fevrie anglo’n nun. Tasmanie nvle’n o Ɔstrali mɛn’n nun lɔ. Jenvie’n sin yiɛ i. Afuɛ 1974 nun Zuɛn anglo’n nun yɛ ɔ jali Janɛt ɔ. Be flɛ Janɛt ekun kɛ Jɛni. Kɛ be jali’n, w’a cɛman naan b’a yo titi atin bofuɛ. Kɛ ɔ fɛ i afuɛ 1979 nun lele m’ɔ́ jú afuɛ 2003 nun’n, be yoli ngaliɛ difuɛ Tuvalu, nin Samoa, ɔ nin Fiji lɔ. Jenvie’n sin yia nvle sɔ mun. Yɛ be o asiɛ’n i lika nga be flɛ i Pacifique Sud i nun lɔ. Kɛ aniaan bian nin aniaan bla Jakson be ɔli nvle sɔ’m be nun’n, be kacili Biblu’n i akua mun aniɛn uflɛ nun. Kɛ ɔ fɛ i afuɛ 1992 nun’n, aniaan bian Jakson dili junman Samoa lɔ Betɛli komite’n nun. Kpɔkun kɛ ɔ fɛ i afuɛ 1996 nun’n ɔ ko dili junman Fiji lɔ Betɛli komite’n nun. Afuɛ 2003 Avrili nun’n, ɔ nin i yi Jɛni be yoli Amlɛnkɛn’m be lɔ Betɛli’n nunfuɛ, yɛ be boli junman dilɛ bo Betɛli sɔ nun lɔ kan be kaci fluwa lɔ’n. I sin’n, aniaan bian Jakson wa yoli e ɲrun dinfuɛ’m be like klelɛ komite’n nunfuɛ’m be ukafuɛ.
Aniaan bian Moris boli atin bofuɛ junman’n i dilɛ’n bo afuɛ 1971 nun Amlɛnkɛn’m be mɛn’n nun lɔ. Afuɛ kunngba sɔ nun Desamblu anglo’n nun’n, ɔ jali Suzani. Be dili atin bofuɛ junman afuɛ ko yo nnan naan b’a wu be wa yasua klikli m’ɔ suan Jɛsi’n. I afuɛ kun nin anglo 8 m’ɔ́ sín’n, be wuli ba yasua uflɛ ekun. Be flɛli i Pɔlu. Afuɛ 1979 nun’n, aniaan bian Moris mɛnnin i atin bofuɛ junman’n su ekun. Ɔ yoli titi atin bofuɛ. Kɛ be wlali be mma’m be suklu’n, i yi kusu yoli atin bofuɛ kɛ i sa wie. Be nin be mma’m be dili Ɲanmiɛn i junman’n Amlɛnkɛn’m be mɛn’n nun lɔ nvle nga be flɛ be kɛ Rhode Island’n nin Caroline du Nord be nun lɔ. Be di jasin bofuɛ’m be yalɛ lika sɔ’m be nun’n. Caroline du Nord mɛn’n i nglo, aniaan bian Moris yoli akpasua su nianfuɛ’n i ja nunfuɛ. Kpɔkun i mma’m be yoli titi atin bofuɛ. Kɛ Jɛsi nin Pɔlu be ɲannin afuɛ 19, be ko dili junman Betɛli ng’ɔ o Amlɛnkɛn’m be lɔ’n nun. Blɛ sɔ nun’n, aniaan bian Moris kusu yoli akpasua sunianfuɛ. I sin’n, afuɛ 2002 nun’n, be flɛli i nin i yi Suzani kɛ be ko di junman Betɛli lɔ. Utu anglo’n i le klikli’n su yɛ be boli be junman uflɛ’n i dilɛ’n bo ɔ. Aniaan bian Moris dili junman Patɛrsɔni lɔ biolo ng’ɔ nian jasin fɛ’n bolɛ junman’n su’n i nun. I sin’n, ɔ yoli e ɲrun dinfuɛ’m be komite ng’ɔ nian jasin fɛ’n bolɛ junman’n su’n i nunfuɛ’m be ukafuɛ.
E ɲrun dinfuɛ’m be anuannzɛ’n nunfuɛ nga aniaan nɲɔn sɔ’m be wa ukali be su’n, be dunman mun yɛ: C. Barbar, J. Bar, S. Hɛrd, M. Lɛt, G. Lɔs, T. Jɛrɛs, G. Piɛrs, A. Srodɛr, D. Splɛni, yɛ D. Sidlik. E ɲrun dinfuɛ’m be anuannzɛ’n i nunfuɛ’m be kwlaa be ti Klistfuɛ nga be kpali be sieli be ngunmin’n be nunfuɛ.