ƐNTƐNƐTI SU FLUWA SIEWLƐ Watchtower
Watchtower
ƐNTƐNƐTI SU FLUWA SIEWLƐ
Wawle
ɔ
  • á
  • ɛ
  • ɔ
  • ɲ
  • ú
  • έ
  • é
  • ó
  • í
  • ń
  • ɔ́
  • BIBLU
  • FLUWA MUN
  • AƝIA MUN
  • w06 1/7 b. 28-32
  • Gbaflɛn nin talua mun, amun bɔbɔ amun su Zoova

Like nga lemɛn i su video

Yaci, like kun ti video'n kwlá boman.

  • Gbaflɛn nin talua mun, amun bɔbɔ amun su Zoova
  • Sasafuɛ Tranwlɛ’n Bo Zoova i Sielɛ Blɛ’n i jɔ—2006
  • Ndɛ ce mun
  • I wunsu like
  • Andɛ’n, sran kun bɔbɔ yɛ ɔ fɛ i wun man Ɲanmiɛn ɔn
  • ?Sran’n i ngwlɛlɛ klelɛ’n yɛle mennin?
  • Zoova waan amun bɔbɔ an fa amun ajalɛ
  • An sua amun bɔbɔ amun trɔ’n
  • ?Ngue ti yɛ batɛmu yolɛ’n su’n, amun sisi amun bo ɔ?
  • “E nin amun yɛ é kɔ́ ɔ”
  • ?Gbanflɛn annzɛ talua kan, w’a ju kɛ be yo ɔ batɛmun?
    Sasafuɛ Tranwlɛ’n Bo Zoova i Sielɛ Blɛ’n i jɔ—2016
  • Amun uka amun mma mun naan be yo be batɛmun
    Sasafuɛ Tranwlɛ’n Bo Zoova i Sielɛ Blɛ’n i jɔ (Like suanlɛ liɛ)—2018
  • Batɛmun yolɛ’n yɛ a nin Ɲanmiɛn be janvuɛ tralɛ’n
    ?Ngue like yɛ Biblu’n kle i sakpasakpa ɔ?
  • Ninnge ng’ɔ fata kɛ e yo be naan b’a yo e batɛmu’n
    Sasafuɛ Tranwlɛ’n Bo Zoova i Sielɛ Blɛ’n i jɔ—2006
Nian wie ekun
Sasafuɛ Tranwlɛ’n Bo Zoova i Sielɛ Blɛ’n i jɔ—2006
w06 1/7 b. 28-32

Gbaflɛn nin talua mun, amun bɔbɔ amun su Zoova

“Ndɛkɛn amun kle like nga amun klo kɛ amún sú i’n.”—ZOZIE 24:15.

1, 2. ?Sran’m be batɛmu yolɛ mennin yɛ be nga be tɔn be wun suɛn kɛ be ti Klistfuɛ’n, be yoli ɔ?

TƐRTILIƐN m’ɔ ti laa fluwa klɛfuɛ’n i blɛ su’n, Klistfuɛ sunman be yacili Zezi i atin’n i su falɛ. Yɛle kɛ be yo bakanngan’m be batɛmu. Sanngɛ i liɛ’n, i waan nán sran’m be fɛ i sɔ ajalɛ’n su. Ɔ maan, ɔ seli i fluwa kun nun kɛ: “Ba m’ɔ nin a wunman Klist i sran’n i wafa ng’ɔ ti’n i wlɛ’n, ɔ kwlá kaciman Klistfuɛ.” Kɛ ɔ́ kán sɔ’n, nn Zezi i blɛ liɛ’n w’a sin lele w’a di afuɛ 100 kun tra su. Ndɛ mɔ Tɛrtiliɛn kannin’n, w’a yoman Ogistɛn mɔ blɛ sɔ’n nun’n, ɔ ti be asɔnun’n i nun sran dan’n kun’n, i klun su. I liɛ ng’ɔ́ wá kán’n kusu’n, ɔ finman Biblu’n nun. I waan batɛmu mɔ be yo sran’n, ɔ kplo i wun fiɛn’n gua. Naan kusu bakan nga b’a yomɛn i batɛmu’n, sɛ ɔ wu’n, ɔ́ kɔ́ sin’n nun. Lɛ yɛ ba nɔnman’m be batɛmu yolɛ’n, fin ɔn.

2 Lele nin andɛ’n, be nga be tɔn be wun suɛn kɛ be ti Klistfuɛ’m be nun sunman lika be yo ba nɔnman’m be batɛmu. Laa kusu’n, nvle wie’m be nunfuɛ’m be waan be ti Klistfuɛ. Kɛ nvle sɔ’m be siefuɛ’m be utu nvle uflɛ’n, be nin be asɔnun kpɛnngbɛn’m be yo nvle uflɛ sɔ’n i nunfuɛ mɔ be ti amuɛn sɔfuɛ’n, be batɛmu kekle nun. Sanngɛ Biblu’n w’a seman kɛ be yo ba nɔnman’m be batɛmu, naan kusu be yo sran’m be batɛmu kekle nun.

Andɛ’n, sran kun bɔbɔ yɛ ɔ fɛ i wun man Ɲanmiɛn ɔn

3, 4. ?Siɛ nin niɛn nga be fali be wun mannin Zoova’n, ngue yɛ ɔ kwla uka be mma mun naan be kusu b’a kwla fa be wun b’a man Zoova wie ɔ?

3 Biblu’n kle kɛ, sɛ bɔbɔ siɛ’n annzɛ niɛn’n i kunngba yɛ ɔ ti Klistfuɛ kpa’n, Ɲanmiɛn sɔ i mma’m be nun. (1 Korɛntfuɛ Mun 7:14) ?Sɔlɛ mɔ Zoova sɔ ba’m be nun’n, ɔ kle kɛ ba sɔ’m b’a kaci i sufuɛ? Cɛcɛ. Ɔ fata kɛ siɛ nin niɛn mɔ be bɔbɔ be fali be wun mannin Zoova’n, be ta be mma mun Zoova liɛ’n su, naan ba’m be bɔbɔ b’a kwla fa be wun b’a man Zoova wie. I sɔ’n ti’n, Famiɛn Salomɔn seli kɛ: ‘Min wa, ngwlɛlɛ nga ɔ si kle wɔ’n, maan ɔ ka ɔ klun. Afɔtuɛ nga kusu mɔ ɔ nin man wɔ’n, nán maan ɔ gua ɔ su sin. Kɛ á nánti sín’n, be yɛ bé sásá wɔ ɔ, kɛ á láfi’n, be yɛ bé nían ɔ su ɔ, kɛ á láfi tínnge’n, bé klé wɔ ngwlɛlɛ. Afin afɔtuɛ’n ti kɛ kannin sa, ɔ kpaja be bo. Afɔtuɛ’n ti kɛ tɛ sa, be fa wun be bo. Fɔ tulɛ nga ngwlɛlɛfuɛ’n tu sran’n, ɔ ti nguan atin yɛ ɔ bo mɛn i ɔ.’— Nyanndra Mun 6:20-23.

4 Ba’m be kpa yolɛ ti yɛ be si nin be nin’m be kle be ngwlɛlɛ ɔ. Sanngɛ sɛ ba’m b’a nantiman su’n, be su diman su ye. Famiɛn Salomɔn seli kɛ: ‘Ba ng’ɔ si angunndan’n ɔ yo maan i si klun jɔ dan. Ba ng’ɔ wunman sa wlɛ’n kusu ɔ wlɛ i nin klunngbɔ. Min wa, sie ɔ su min nuan bo naan fa angunndan. Atin ng’ɔ ti kpa’n yɛ kunndɛ fa su ɔ.’ (Nyanndra Mun 10:1; 23:19) Gbaflɛn nin talua mun, sran fi nin ngwlɛlɛ silɛ’n finmɛn i nin klun. I sɔ’n ti’n, ngwlɛlɛ nin afɔtuɛ nga amun si nin amun nin be kle amun’n, amun fa su aklunjuɛ su. I liɛ’n, amún kwlá ‘fá angunndan.’ Kpɔkun amún fá “atin ng’ɔ ti kpa’n.”

?Sran’n i ngwlɛlɛ klelɛ’n yɛle mennin?

5. ?Afɔtuɛ mennin yɛ Pɔlu mannin siɛ nin niɛn mun, ɔ nin be mma mun ɔn?

5 Akoto Pɔlu seli kɛ: ‘Bakanngan mun, maan amun ɲin yi amun si nin amun nin e Min’n liɛ mɔ an ti’n ti, afin i sɔ’n ti kpa. Be klɛli mmla nun kɛ: “Bu ɔ si nin ɔ nin be sran,” mmla mɔ Ɲanmiɛn fa mannin sran mun m’ɔ uka su kɛ sɛ be yo ɔ ɔ́ yó be ye’n, ɔ ti be nun klikli. Ye sɔ’n yɛle kɛ: “Ɔ́ wun jɔ́ wɔ fɔuun, á cɛ́.” Nja mun, amun kusu, nán an yo sa m’ɔ kun amun mma’m be ya, sanngɛ an ta be kpa e Min’n liɛ’n su, yɛ an tu be fɔ, an kle be ngwlɛlɛ.’— Efɛzfuɛ Mun 6:1-4.

6, 7. ?Kɛ be se kɛ be kle ba’m be ngwlɛlɛ ng’ɔ fin Zoova’n, i bo’n yɛle mennin? ?Ngue ti yɛ i sɔ’n timan ba’m be sacilɛ ɔ?

6 ?Kɛ siɛ nin niɛn mɔ be ti Klistfuɛ’n be ta be mma mun ‘kpa e Min’n liɛ’n su’n,’ i sɔ’n ti ba’m be sacilɛ? ?Annzɛ ɔ ti ba’m be ti nun wunnzinlɛ? Cɛcɛ. ?Afin, wan yɛ ɔ kwla se kɛ sɛ siɛ annzɛ niɛn kun bu i kɛ nzuɛn wie ti kpa naan ɔ fa kle i mma mun’n, nn w’a yo sa tɛ ɔ? ?Kɛ be nga be lafiman Ɲanmiɛn su’n, be kle be mma mun kɛ Ɲanmiɛn nunman lɛ’n, wan yɛ ɔ se kɛ b’a yo sa tɛ ɔ? Be nga be kɔ Katoliki’n be kusu’n, be kle be mma’m be like naan be ɔ Katoliki wie. ?Kɛ be yo sɔ’n, wan yɛ ɔ se kɛ ɔ ti tɛ ɔ? I sɔ kunngba’n yɛ Zoova i Lalofuɛ’m be ta be mma mun ɔn. Yɛle kɛ, be fa wafa nga Zoova klo kɛ be nanti’n, ɔ nin Biblu’n klelɛ’n i bo bolɛ ninnge mun kle be mma mun naan be fa su. I sɔ mɔ be yo’n, ɔ fataman kɛ sran’m be se kɛ ɔ ti ba’m be ti nun wunnzinlɛ.

7 Fluwa kun m’ɔ yiyi Biblu’n nun ndɛ mma’m be nun’n, i waan Efɛzfuɛ Mun 6:4 nun ndɛ nga be se kɛ ‘kle be ngwlɛlɛ’n,’ i bo’n yɛle kɛ be “tinngɛ sran’n i angunndan’n, be sie i atin kpa’n su, be yo maan sran’n bu Ɲanmiɛn i angunndan.” (Dictionnaire théologique du Nouveau Testament, angl.) Sanngɛ wie liɛ’n, ba’m be nantiman ngwlɛlɛ nga be si nin be nin’m be kle be’n su. Afin be janvuɛ’m be jin be su cɛn kwlaa kɛ be nɔn drɔgi, annzɛ be nɔn nzan, annzɛ be kunndɛ bla annzɛ bian sukusuku. Sanngɛ siɛ nin niɛn’m be kle be mma’m be ngwlɛlɛ naan be wun i wlɛ kɛ sa sɔ’m be bo’n guaman kpa. ?Sɛ ɔ ti sɔ’n niɔn, wan yɛ ɔ saci ba mun ɔn?

8. ?Wafa sɛ yɛ be ‘kleli Timote i like m’ɔ lafili su’ ɔ?

8 Akoto Pɔlu seli Timote kɛ: ‘Like nga be kleli wɔ mɔ a lafi su’n, nian su kpa. A si sran nga be kleli wɔ like sɔ’n. Kɛ ɔ fin ɔ ba kaan nun’n, a si Ɲanmiɛn Ndɛ nga be klɛli’n yɛ maan a si ngwlɛlɛ mɔ maan sɛ be lafi Klist su ɔ be ɲan be ti’n niɔn.’ (2 Timote 3:14, 15) Timote i ba kaan nun’n, i nannan ɔ nin i nin be fali Ɲanmiɛn Ndɛ’n be wlɛli i Ɲanmiɛn sulafilɛ’n i bo ase kpa. (Sa Nga Be Yoli’n 16:1; 2 Timote 1:5) I sin’n, kɛ Timote i nannan’n ɔ nin i nin’n be kacili Klistfuɛ’n, b’a miɛnmiɛnmɛn i kɛ ɔ kaci Klistfuɛ wie. Sanngɛ be yiyili Ɲanmiɛn Ndɛ’n nun weinwein be ‘kleli i yɛ ɔ lafili su.’

Zoova waan amun bɔbɔ an fa amun ajalɛ

9. (a) ?Wafa sɛ yɛ Zoova kleli kɛ ɔ bu klɔ sran’n i sran ɔn? ?Yɛ ngue ti yɛ ɔ yili sɔ ɔ? (b) ?Ajalɛ mennin yɛ Ɲanmiɛn Wa’n fɛli i klunklo su ɔ?

9 Zoova w’a yiman sran kɛ nnɛn m’ɔ yo like nga i min’n se kɛ ɔ yo’n sa. Sanngɛ ɔ yili sran’n kɛ i bɔbɔ fɛ i ajalɛ ng’ɔ klo kɛ ɔ́ fá’n. I sɔ m’ɔ yoli’n, ɔ kle kɛ ɔ bu sran’m be sran. Afin, Ɲanmiɛn kunndɛman kɛ e su i mianmianlɛ su. Sanngɛ like ng’ɔ jɔ i klun’n, yɛle kɛ sran kpɛnngbɛn o, gbaflɛn annzɛ talua o, be kwlaa be su i klolɛ su. Kɛ be se kɛ sran kun lo i wun man Ɲanmiɛn klolɛ m’ɔ klo i’n ti’n, yɛ Ɲanmiɛn Wa Zezi yoli ɔ. Ɔ maan Ɲanmiɛn kɛnnin i ndɛ kɛ: ‘Min awlɛn su ba’n yɛ, i su yɛ m’an fa n wla kwlaa m’an gua ɔ.’ (Matie 3:17) Zezi kusu seli i Si’n kɛ: ‘Min Ɲanmiɛn, min waan ń yó ɔ klun sa. Ɔ mmla’n ɔ o min klun.’— Jue Mun 40:9; Ebre Mun 10:9, 10.

10. ?Wafa sɛ yɛ ɔ fata kɛ e su Zoova naan i klun w’a jɔ su ɔ?

10 Sran nga be su Zoova, i Wa’n i dunman nun’n, Zoova kunndɛ kɛ be niɛn i Wa’n i ajalɛ’n su. Yɛle kɛ nán be su i mianmianlɛ su. Jue tofuɛ’n kannin sran nga bé wá bá Zoova sulɛ’n be ndɛ. Ɔ seli kɛ: ‘Blɛ nga á yíayía wɔ alɛ kunfuɛ’m be nuan’n, sonja yakpafuɛ’m be nin wɔ ɔ. Ɔ gbaflɛn’m bé bá ɔ wun ɔ oka’m be su, bé bá kɛ nglɛmun bɔlɛ m’ɔ gua’n sa.’ (Jue Mun 110:3) Be kwlaa nga be o Zoova i anuannzɛ’n nun’n, maan ɔ yo i bue ng’ɔ o nglo lɔ’n nin o, annzɛ i bue ng’ɔ o asiɛ’n su wa’n nin o, be sumɛn i mianmianlɛ su. Klolɛ mɔ be klo Zoova’n, i ti yɛ be lo be wun be mɛn i ɔ.

11. ?Ba nga be si nin be nin’m be ti Zoova i Lalofuɛ’n, ajalɛ mennin yɛ i falɛ’n ɔ o be bɔbɔ ba’n be sa nun ɔn?

11 ?Kɛ m’ɔ ti sɔ’n niɔn, gbaflɛn nin talua mun, waan yɛ ɔ fata kɛ ɔ fa ajalɛ kɛ be yo amun batɛmu ɔ? Nán amun si, annzɛ amun nin, annzɛ asɔnun kpɛnngbɛn mun yɛ bé fɛ́ i sɔ ajalɛ’n niɔn. I sɔ ajalɛ’n o amun bɔbɔ amun sa nun. Zozie seli Izraɛlifuɛ’m be kɛ: ‘Amun ɲin yi Ɲanmiɛn, amun tu amun klun be su i. Ndɛkɛn amun kle like nga amun klo kɛ amún sú i’n.’ (Zozie 24:14-22) I sɔ kunngba’n, ɔ fata kɛ amun bɔbɔ an fa amun wun man Zoova naan amun tu amun klun be su i.

An sua amun bɔbɔ amun trɔ’n

12. (a) ?Kannzɛ siɛ nin niɛn’m be ta be mma mun Zoova liɛ’n su’n, sanngɛ ngue yɛ be kwlá yoman ɔn? (b) ?Blɛ mennin nun yɛ ajalɛ nga ba’m bé fá naan bé sú Zoova’n, ɔ o be bɔbɔ be sa nun ɔn?

12 Gbaflɛn nin talua mun, amun si nin amun nin mɔ be ti Zoova i sufuɛ’n, amun su kaman be bo wun sa trilili. (1 Korɛntfuɛ Mun 7:14) Zaki m’ɔ ti Zezi i sɔnnzɔnfuɛ’n seli kɛ: ‘Sran ng’ɔ si kɛ like nga ɔ yo ɔ ɔ ti kpa m’ɔ yoman’n, nn w’a yo sa tɛ.’ (Zak 4:17) Nán sran kun yɛ ɔ́ sú Ɲanmiɛn mán sran uflɛ ɔ. Amun si nin amun nin be kwlá suman Ɲanmiɛn be manman amun. Amun kusu’n, amun kwlá suman Ɲanmiɛn be manman be wie. (Ezekiɛl 18:20) ?Kɛ ba kun ɲín m’ɔ́ wún Zoova i su like nga be kle i’n i wlɛ’n, nɛ́n i bɔbɔ yɛ ɔ fata kɛ ɔ fa ajalɛ kɛ ɔ nin Zoova bé nánti ɔ?

13. ?Kosan mennin yɛ ɔ fata kɛ gbaflɛn nin talua nga be nin a yoman be batɛmu’n, be fa usa be wun ɔn?

13 Gbaflɛn nin talua mun, atrɛkpa’n, amun si nin amun nin’m be ta amun Ɲanmiɛn liɛ’n su. Amun kɔ asɔnun aɲia kwlaa be bo titi, yɛ amun bo Ɲanmiɛn Sielɛ Blɛ jasin fɛ’n bɔbɔ. Sanngɛ be nin a yoman amun batɛmu. Sɛ ɔ ti sɔ’n niɔn, an usa amun wun kosan yɛ mun kpa, yɛ an di amun wun nanwlɛ: ‘?Ngue ti yɛ n yo ninnge kwlaa sɔ mun ɔn? ?Min si’n nin min nin’n be ti ɔ, annzɛ n kunndɛ kɛ Zoova i klun jɔ min wun ti ɔ?’ ?Gbaflɛn nin talua mun, amun a ‘wun Ɲanmiɛn i klun sa’n i wlɛ, yɛ amun a si sa ng’ɔ ti kpa’n mɔ maan i klun jɔ́ amun wun’n?’— Rɔmfuɛ Mun 12:2.

?Ngue ti yɛ batɛmu yolɛ’n su’n, amun sisi amun bo ɔ?

14. ?Sran mennin wie mun yɛ Biblu’n kan be ndɛ m’ɔ kle kɛ batɛmu yolɛ’n su’n, ɔ fataman kɛ e sisi e bo ɔ?

14 Filipu m’ɔ ti jasin fɛ’n bofuɛ’n, ɔ kleli Etiopi bian kun weiin kpa kɛ Zezi yɛ ɔ ti Mɛsi’n niɔn. Kɛ bian’n wunnin ndɛ’n i wlɛ’n, be ja nun lɛ’n, ɔ usali kɛ: ‘?Ngue yɛ maan n kwlá yoman n batɛmu ɔ?’ Sanngɛ nán blɛ sɔ’n nun yɛ bian’n sili Ɲanmiɛn ndɛ’n niɔn. Ɔ maan, ɔ wunnin i wlɛ kɛ ɔ fataman kɛ ɔ sisi i bo. Yɛle kɛ, ɔ fata kɛ ɔ kle kɛ ɔ fɛli i wun mannin Zoova naan w’a kaci Klistfuɛ. Ɔ maan kɛ be yoli i batɛmu’n, i klun jɔli kpa. (Sa Nga Be Yoli’n 8:26-39) I sɔ kunngba’n yɛ bla kun mɔ be flɛ i Lidi’n, ɔ yoli ɔ. Yɛle kɛ, i ‘angunndan trannin ndɛ mɔ Pɔlu kannin’n su, naan w’a fa su.’ Ɔ maan ɔ nin i osufuɛ’m b’a sisiman be bo lele. Be ‘yoli be batɛmu.’ (Sa Nga Be Yoli’n 16:14, 15) I sɔ wie ekun yɛ Filipu lɔ bisua su kpɛn’n, ɔ yoli ɔ. Yɛle kɛ, kɛ Pɔlu nin Silasi be ‘kannin Zoova i ndɛ’n kleli i’n,’ ɔ sieli i su. ‘Kpɔkun be yoli i nin i awlofuɛ’m be kwlaa be batɛmu.’ (Sa Nga Be Yoli’n 16:25-34) Gbaflɛn nin talua mun, atrɛkpa’n, amun si Zoova nin i klun sa i su like klelɛ’n i bo bolɛ ninnge mun. Asɔnun’n nun kusu be bo amun dunman kpa, yɛ amun kunndɛ kɛ amún sú Zoova. Asa ekun’n, amun kɔ asɔnun aɲia kwlaa be bo titi, yɛ amun bo Ɲanmiɛn Sielɛ Blɛ jasin fɛ’n. ?Sɛ ɔ ti sɔ’n niɔn, ngue ti yɛ batɛmu yolɛ’n su’n amun sisi amun bo ɔ?— Matie 28:19, 20.

15, 16. (a) ?Ngue ti yɛ batɛmu yolɛ’n su’n, gbaflɛn nin talua wie’m be sisi be bo ɔ? (b) ?Kɛ an fa amun wun man Zoova mɔ be yo amun batɛmu’n, wafa sɛ yɛ i sɔ’n sasa amun ɔn?

15 Wie liɛ’n, srɛ kun gbaflɛn nin talua mun kɛ be yo be batɛmu. Afin be bu i kɛ sɛ be yo be batɛmu naan be yo sa tɛ wie’n, bé tú be fɔ. ?Kɛ amun bu i sɔ wie ɔ? Sɛ ɔ ti sɔ’n, amun bu kosan nga i sin be nian: ?Junman mɔ sran’m be kunndɛ be ɲɛnmɛn i’n, i ti yɛ amún sé kɛ amún kpɛ́ i kpo bé trán ase naan amun kɔman suklu ɔ? Cɛcɛ, amun su seman sɔ! Ɔ maan sɛ like fi tanndanman amun ɲrun’n, nán srɛ kun amun kɛ be yo amun batɛmu. Afin sɛ amun fa amun wun man Zoova naan amun yo i klun sa’n, i lɛ’n nun bɔbɔ yɛ amún ɲán wunmiɛn bé jrán kekle sa tɛ yolɛ’n i ɲrun ɔn. (Filipfuɛ Mun 4:13) Ɔ maan gbaflɛn nin talua mun, amun yaci, nán amun se kɛ batɛmu yolɛ’n su’n, amún sísí amun bo. Afin kɛ amun ko wun sa wlɛ’n, sɛ be yoli amun batɛmu o, annzɛ b’a yoman o, saan amún kán sa nga amun yo’n i ndɛ klé Zoova.— Rɔmfuɛ Mun 14:11, 12.

16 Zoova i Lalofuɛ’m be nun gbaflɛn nin talua kpanngban be yoli be batɛmu. Be wunnin kɛ i sɔ mɔ be yoli’n, ɔ ukali be kpa. Amun e fa abloki lɔ gbaflɛn kun i ndɛ e nian. Kɛ bé yó i batɛmu’n, nn ɔ le afuɛ 13. Kɛ é sé yɛ’n, ɔ le afuɛ 23. I waan kɛ m’ɔ si kɛ be yoli i batɛmu’n ti’n, ɔ niɛnnin i wun su kpa naan ‘like nga gbaflɛn kɔnvi sɔ i’n,’ w’a yoman wie. (2 Timote 2:22) Kɛ ɔ́ fɛ́ i ɲin síe blɛ kwlaa nun Ɲanmiɛn junman dilɛ’n su’n, nn ɔ te yo bakan. Kɛ é sé yɛ’n, ɔ di junman Betɛli kun nun, yɛ ɔ yo i fɛ kpa. Gbaflɛn nin talua mun, sɛ amun bɔbɔ an fa ajalɛ kɛ amún sú Zoova’n, nanwlɛ, aklunjuɛ nga amún wá dí’n, ɔ́ yó dan.

17. ?Ninnge mennin yɛ be yolɛ nun’n, ɔ fata kɛ e mian e ɲin kɛ é sí ‘like nga e Min’n klo kɛ e yo’n’ niɔn?

17 Kɛ sran kun ko fɛ i wun ko man Zoova mɔ be yo i batɛmu’n, like kwlaa ng’ɔ́ yó’n, ɔ dun mmua bu Zoova i angunndan. Sran ng’ɔ fɛ i wun man Ɲanmiɛn’n, ɔ ‘tranman lɛ ngbɛn.’ ?Wafa sɛ? Yɛle kɛ laa’n, ninnge ngbɛnngbɛn’m be yolɛ’n yɛ be fɛ i blɛ’n niɔn. Sanngɛ siɛn’n, ɔ fɛ i sɔ blɛ’n suan Biblu’n nun like, ɔ kɔ aɲia’m be bo titi, yɛ ɔ yo like kwlaa ng’ɔ kwla yo naan w’a kan ‘Ɲanmiɛn Sielɛ’n i jasin fɛ’n’ i ndɛ’n. (Efɛzfuɛ Mun 5:15-17; Matie 24:14) Kɛ e fa e wun man Zoova mɔ e kunndɛ kɛ é yó i klun sa’n, i sɔ’n uka e ajalɛ nga e fa’n be nun. Yɛle kɛ maan ɔ yo nzan nɔnlɛ nun o, aliɛ dilɛ nun o, miziki tielɛ nin e ɲin su yiyilɛ nun o, e fa ajalɛ kpa. ?Gbaflɛn nin talua mun, nán ngowa kanlɛ m’ɔ su wieman le’n, yɛ ɔ fata kɛ amun kan ɔn? I lɛ nun’n, sɛ amun usa amun wiengu nga be ti Zoova i sufuɛ’n, bé sé amun kɛ ngowa nga be kwla kan m’ɔ tanndanman “like nga e Min’n klo kɛ e yo’n” i ɲrun’n, be diman be yalɛ.— Efɛzfuɛ Mun 5:18, 19.

“E nin amun yɛ é kɔ́ ɔ”

18. ?Kosan mennin yɛ ɔ fata kɛ gbaflɛn nin talua’m be fa usa be wun ɔn?

18 Kɛ ɔ fɛ i afuɛ nga be flɛ i 1513 nun ka naan y’a ju Zezi blɛ su’n lele m’ɔ́ fá jú nga be flɛ i 33 nun Pantekɔtu nun Klistfuɛ klikli’m be blɛ su’n, Zoova fali nvle kun yoli i liɛ. Nvle sɔ’n i nunfuɛ’m be su i, yɛ be ti i Lalofuɛ. (Ezai 43:12) Ba nga be wu be mun kusu’n, be lemɛn i yowlɛ, be ti Zoova liɛ wie. Sanngɛ kɛ ɔ fɛ i afuɛ nga be flɛ i 33 nun Pantekɔtu nun’n, Zoova wa boli “nvle” uflɛ kun. Nvle sɔ mɔ yɛle Izraɛlifuɛ nga be ti i liɛ sakpa’n, i “dunman tran be su.” (1 Piɛr 2:9, 10; Sa Nga Be Yoli’n 15:14; Galasifuɛ Mun 6:16) Akoto Pɔlu seli kɛ Klist yoli maan be ‘kaci Ɲanmiɛn sa ti sran mɔ be wun sa tɛtɛ kwlaa w’a wie, naan be tu be klun be yo sran ye.’ (Tit 2:14) ?Andɛ’n, ‘nvle nga be nunfuɛ’m be yo sa’n i nuan su mɔ be ti nanwlɛfuɛ,’ afin be nanti Zoova i mmla’m be su’n, yɛle mennin? ?Nvle nga i nunfuɛ’m be ti Zoova i Lalofuɛ’n, mɔ be kle sran’m be kɛ Ɲanmiɛn Sielɛ Blɛ’n yɛ ɔ́ wá dé sran mun’n, yɛle mennin? Gbaflɛn nin talua mun, amun bɔbɔ yɛ ɔ fata kɛ amun kunndɛ nvle sɔ’n naan amun wun i ɔ. (Ezai 26:2-4) ?Kɛ amun nian asɔnun nin Ɲanmiɛn sulɛ wafawafa’m be nzuɛn’n, ɔ nin ndɛ ng’ɔ o Biblu’n nun m’ɔ fata kɛ Ɲanmiɛn i sufuɛ’m be nanti su’n, ngue yɛ amun wun i ɔ?

19. (a) ?Kɛ sran kpanngban be boli be ɲin ase be niannin’n, ngue yɛ be wunnin i ɔ? (b) ?Ngue yɛ be srɛ Zoova i Lalofuɛ’m be nun gbaflɛn nin talua’m be kwlaa kɛ be yo ɔ?

19 Asiɛ wunmuan’n su’n, sran kpanngban kpa mɔ gbaflɛn nin talua’m be o nun wie’n, be boli be ɲin ase be niannin. Be wunnin kɛ Zoova i Lalofuɛ nga Ɲanmiɛn fɛli i wawɛ’n mannin be mɔ be o asiɛ’n su’n, be yɛ be ti “nvle nga be nunfuɛ’m be yo sa’n i nuan su” sakpa’n niɔn. Be yɛ be ti Izraɛlifuɛ nga be ti Ɲanmiɛn liɛ sakpa’n niɔn. Asiɛ wunmuan’n su sran kpanngban be se be kɛ: ‘E nin amun yɛ é kɔ́ ɔ, afin e tili i kɛ Ɲanmiɛn’n o amun sin.’ (Zakari 8:23) Gbaflɛn nin talua mun, é srɛ́ Ɲanmiɛn kɛ amun tran Ɲanmiɛn i nvle nunfuɛ’m be nun wie. Sɛ amun yo sɔ’n, nn amun a ‘fa nguan’n.’ Yɛle kɛ, amún ɲán anannganman nguan asiɛ’n su.— Mmla’n 30:15-20; 2 Piɛr 3:11-13.

?Amún tɛ́ su sɛ?

• ?Sran ngwlɛlɛ klelɛ’n yɛle mennin?

• ?Wafa sɛ yɛ Zoova kunndɛ kɛ e su i ɔ?

• ?Ba nga be si nin be nin’m be ti Zoova i Lalofuɛ’n, ajalɛ mennin yɛ i falɛ’n ɔ o be bɔbɔ be sa nun ɔn?

• ?Ngue ti yɛ ɔ fataman kɛ batɛmu yolɛ’n su’n, e sisi e bo ɔ?

[Foto, bue 28]

?Wan i nuan ndɛ yɛ amún fá su ɔ?

[Foto, bue 30]

?Kɛ an fa amun wun man Zoova mɔ be yo amun batɛmu’n, wafa sɛ yɛ i sɔ’n sasa amun ɔn?

[Foto, bue 31]

?Ngue ti yɛ maan amun yoman amun batɛmu ɔ?

    Wawle nun fluwa mun (2000-2025)
    Fin nun fite
    Wlu nun
    • Wawle
    • Fa ko man sran
    • Ɔ klunklo ninnge siesielɛ
    • Copyright © 2025 Watch Tower Bible and Tract Society of Pennsylvania
    • I su junman dilɛ'n i su mmla mun
    • Amun su ndɛ'm be su mmla'n
    • Amun su ndɛ'm be siesielɛ
    • JW.ORG
    • Wlu nun
    Fa ko man sran