Sran mun be wanzo yɛ be yo ɔ — ƐNTƐNƐTI SU FLUWA SIEWLƐ Watchtower

Sran mun be wanzo yɛ be yo ɔ

“Nazi’m be lika’n, ɔ ti sran wanzo yolɛ ngunmin lika.”

NDƐ’N FIN MAGDALENA REUTER KUSSEROW M’Ɔ FIN NAZI’M BE SRAN ƝRƐNNƐN KLELƐ LIKA’N NUN LƆ FITELI’N.

ALƐ dan’n i nɲɔn su nun’n, ɲrɛnnɛn nga Nazi’m be kleli sran mun be sran ɲrɛnnɛn klelɛ lika’m be nun’n, be flɛmɛn i ɲrɛnnɛn, ɔ yo sro. Sanngɛ, nán blɛ sɔ’n nun yɛ sran’m be boli be wiengu i ɲrɛnnɛn klelɛ’n, i bo ɔ. Yɛ sran’n i sɔ yolɛ’n w’a wieman lɛ kusu. Lele nin andɛ’n, ‘sran’m be wanzo yolɛ ngunmin’ yɛ be yo ɔ.

Sanngɛ nán sran’m be wlɛ yolɛ mɔ be yoli be’n, i ngunmin yɛ ɔ kle kɛ sran’m be buman be wiengu’n i sran ɔn. Afin sa wie mɔ be fa yo sran’n, wie liɛ’n, sɛ w’a boman ɔ ɲin ase w’a niɛnmɛn i kpa sa’n, a su wunman kɛ i sɔ’n ti sran’n i wanzo yolɛ. I wie yɛle bakan wie mɔ i wun tukpaciɛ’n ti’n, be sri i’n. I wie ekun yɛle sran ng’ɔ ko tran nvle uflɛ nun mɔ i ninnge’m be yolɛ wafa’n ti’n, be yo i finfin’n. Lika wie’m be nun’n, blɔfuɛ annzɛ sran ble leman ɲrun. Wie liɛ kusu’n, nvle mɔ sran’n fin nun’n, i ti yɛ ɔ leman ɲrun ɔn. Kɛ sran’m be yo be wiengu’n sɔ’n, wie liɛ’n, be se kɛ be su di aɔwi. Sanngɛ be nga be to be mma’n, be bumɛn i kɛ ɔ ti aɔwi dilɛ. Be bu i kɛ ɔ ti be finfin yolɛ, yɛ i sɔ’n lo be ngasi kpa.—Nyanndra Mun 26:18, 19.

?Kɛ be se kɛ sran’n le ɲrun’n i bo’n yɛle mennin?

Fluwa kun m’ɔ tutu ndɛ mma’m be bo’n waan sran’n i ɲrun m’ɔ le i’n, yɛle ‘i sran m’ɔ ti’n, mɔ be ɲin yi i’n, kpɔkun be bu i sran’n.’ Ɔ maan ɔ fata kɛ sran’n bɔbɔ bu i wun sran naan w’a ɲan ɲrun. Sanngɛ wafa nga i wiengu’m be nin i tran’n, ɔ ti cinnjin wie. Afin sran’n, ɔ kwla yo maan i wiengu ɲan ɲrun.

Lika kwlaa nun’n, ɔ le yalɛfuɛ, ɔ nin be nga be leman sran’n, ɔ nin sran nga be kwlaman nun’n. ?Sanngɛ yalɛfuɛ mɔ sran kun ti’n, annzɛ sran m’ɔ lemɛn i’n, annzɛ kwlalɛ m’ɔ kwlaman nun’n ti’n, ɔ́ yó i bɔbɔ i wun finfin? Cɛcɛ. Sanngɛ wafa nga i wiengu’m be nin i tran’n, i ti ɔ kwla bu i wun kɛ ɔ leman ɲrun. Kɛ e niɛn i kpa sa kusu’n, i sɔfuɛ mun yɛ sran’m be yo be wanzo titi ɔ. Wie liɛ’n, kɛ sran’n ti oke, annzɛ yalɛfuɛ, annzɛ bubuwafuɛ’n, naan be waan bé klé i kɛ be bumɛn i wie’n, be se i kɛ: ‘Bé kán sran’m be ndɛ’n, kpɔkun a fa ɔ liɛ wla nun.’ Annzɛ kusu be se i kɛ: ‘?Bé kán sran kpa’m be ndɛ’n, ɔ liɛ o nun sɛ?’ Nanwlɛ, i sɔ’n ti ɲrɛnnɛn dan!

?Sanngɛ yoo, ngue ti yɛ sran’m be yo be wiengu i wanzo kpa’n niɔn? ?Cɛn wie lele’n, sran’m bé bú be wiengu sran? Wafa nga Biblu’n tɛ kosan sɔ’m be su klanman’n, yɛ é wá wún i siɛn’n niɔn.