?É yó sɛ naan Ɲanmiɛn mɔ be ‘srɛ i ɔ ti’n’ w’a sɔ e nun?
“Sɛ be srɛ wɔ ɔ, a ti. Sran’m be kwlaa bé bá ɔ sin.”—JUE MUN 65:3.
1. ?Ngbaciɛ mennin yɛ ɔ o klɔ sran’n, ɔ nin nnɛn’m be afiɛn ɔn? ?Ɔ maan, ngue yɛ klɔ sran’n kwla yo ɔ?
KLƆ sran’n timan kɛ nnɛn mun sa. Yɛle kɛ, klɔ sran’n i kunngba cɛ yɛ ɔ kwla su Ɲanmiɛn ɔn. I kunngba cɛ yɛ ɔ si kɛ ɔ di Ɲanmiɛn ninnge’m be yalɛ, kpɔkun ɔ kunndɛ kɛ ɔ́ yó i nuan su like ɔ. Ɔ maan, ɔ nin Ɲanmiɛn be kwla nanti kɛ sran kun nin i janvuɛ sa. I sɔ’n yo ɲɛnmɛn.
2. ?Sa tɛ mɔ klɔ sran yoli’n ti’n, ɔ nin Ɲanmiɛn be afiɛn’n yoli sɛ?
2 Kɛ Ɲanmiɛn yí Adam nin Ɛvu’n, ɔ yili be kpa, fɔ nunman be nun. Ɔ maan, be kwla wunnge be Si Ɲanmiɛn wun lɔ kɛ bakan kun wunnge i si wun lɔ, mɔ srɛ kunmɛn i’n sa. Sanngɛ sa tɛ mɔ be yoli’n ti’n, be nin Ɲanmiɛn be afiɛn’n tili nun. (Bo Bolɛ 3:8-13, 17-24) ?Yɛ be mma’m be li, be kwlá wunngeman Ɲanmiɛn wun lɔ wie? Be kwla wunnge i wun lɔ. Sanngɛ, saan bé yó ninnge wie mun naan w’a sɔ be nun. ?Ninnge mennin yɛle sɔ’n?
?É yó sɛ naan Ɲanmiɛn w’a sɔ e nun?
3. ?Ngue yɛ ɔ fata kɛ klɔ sran’n yo naan Ɲanmiɛn w’a sɔ i nun ɔn? ?Sa mennin yɛ ɔ kle i sɔ liɛ’n niɔn?
3 Cɛn kun’n, Adam i wa Kain nin Abɛli be mannin Ɲanmiɛn i like naan ɔ sɔ be nun. Ɲanmiɛn sɔli Abɛli i like liɛ’n nun. Sanngɛ w’a nianman Kain ɲrun. (Bo Bolɛ 4:3-5) ?Ngue ti yɛ Ɲanmiɛn yoli sɔ ɔ? Ebre Mun 11:4 tɛ su kɛ: ‘Ɲanmiɛn su mɔ Abɛli lafi’n ti yɛ i like nga ɔ fa suli i’n i kpa trali Kaɛn liɛ’n niɔn. I su m’ɔ lafi’n ti’n, Ɲanmiɛn bɔbɔ seli kɛ ɔ ti sran kpa.’ Sa sɔ’n kle like nga Ɲanmiɛn kunndɛ kɛ klɔ sran mɔ fɔ o i nun’n, ɔ yo naan i kusu w’a sɔ i nun’n. Yɛle kɛ maan ɔ lafi i su. Zoova yili like kun ekun m’ɔ fata kɛ e yo’n, i nglo. Ɔ seli Kain kɛ: ‘Nian, sɛ a nanti kɛ ɔ fata’n sa’n, á ɲán kɔmin cɛn wie.’ Nanwlɛ, sɛ ɔ ti kɛ Kain nantili kɛ ɔ nin i fata’n sa’n, nn Ɲanmiɛn sɔli i nun. Sanngɛ, Kain kpaloli Ɲanmiɛn i nuan ndɛ’n, kpɔkun ɔ kunnin i nian bian. Ɔ maan, ɔ wa yoli finfinfuɛ. Sran’m be kwlaa be wun i ɔ, be fuɛn i. (Bo Bolɛ 4:7-12) Ɔ maan, kɛ ɔ fɛ i mɛn’n i bo bolɛ nun’n, like nga Ɲanmiɛn kunndɛ kɛ e yo naan w’a sɔ e nun’n, i ɲin fite weiin. Yɛle kɛ maan e lafi Ɲanmiɛn su yɛ e nanti ndɛnman su.
4. ?Ngue yɛ ɔ fata kɛ e wun i wlɛ naan y’a fa e wun y’a mantan Ɲanmiɛn ɔn?
4 Fɔ m’ɔ o e kwlaa e nun’n, ɔ ti kɛ ce yɛ ɔ o sran nin Ɲanmiɛn be afiɛn sa. Sɛ e waan é fá e wun mántan Ɲanmiɛn naan ɔ sɔ e nun’n, ɔ fata kɛ e wun i sɔ liɛ’n i wlɛ. Ɲanmiɛn nuan ijɔfuɛ Zeremi kannin Izraɛlifuɛ’m be ndɛ seli kɛ: ‘E yoli sa tɛ. A fali ɲanmiɛn ble’n a katali ɔ ɲin kɛ ɔ́ yó naan e srɛlɛ’n w’a kwlá toman wɔ lɔ’n ti.’ (Ngwlɛ Yilɛ 3:42, 44) Ɔ nin i sɔ ngba’n, kɛ mɛn’n boli i bo lele m’ɔ́ fá jú andɛ’n, sran kwlaa ng’ɔ lafi Ɲanmiɛn su mɔ i awlɛn’n ti kpa m’ɔ nanti Ɲanmiɛn i mmla’m be su’n, Ɲanmiɛn ti i srɛlɛ’n. (Jue Mun 119:145) Amun e kan sran kpa sɔ’m be nun wie’m be ndɛ naan e wun wafa nga e kwla nian be Ɲanmiɛn srɛlɛ’n su’n.
5, 6. ?Wafa sɛ yɛ e kwla nian Abraamu liɛ’n su e wunnge Ɲanmiɛn wun ɔn?
5 Sran sɔ’m be nun kun yɛle Abraamu. Abraamu fɛli i wun mantannin Ɲanmiɛn, yɛ Ɲanmiɛn sɔli i nun klanman. Ɔ maan, Ɲanmiɛn flɛli i kɛ “min janvuɛ.” (Ezai 41:8) ?Wafa sɛ yɛ e kwla nian Abraamu liɛ’n su e wunnge Ɲanmiɛn wun ɔn? Ba mɔ e nannan Abraamu lemɛn i naan w’a di i aja’n ti’n, ɔ usali Ɲanmiɛn kɛ: ‘M’an wuman ba. ?Ngue like cɛ yɛ á mán min ɔn?’ (Bo Bolɛ 15:2, 3; 17:18) Cɛn kun’n, Ɲanmiɛn seli kɛ ɔ́ wá núnnún Sodɔmu nin Gomɔru klɔ’n, be sa tɛ yolɛ’n ti. Be nga wienun ɔn, be kwla fite nun’n ti’n, Abraamu w’a muɛnmɛn i nuan. Ɔ kokoli be ti kleli Ɲanmiɛn. (Bo Bolɛ 18:23-33) Abraamu w’a kaman ngalɛ’n su. Ɔ srɛli Ɲanmiɛn mannin sran uflɛ wie. (Bo Bolɛ 20:7, 17-18) Wie liɛ kusu’n, Abraamu yili tɛ mannin Ɲanmiɛn kɛ nga Abɛli yili’n sa.—Bo Bolɛ 22:9-14.
6 Sa kwlaa sɔ’m be nun’n, kɛ Abraamu kɛ́n i klun ndɛ klé Zoova’n, ɔ kɛn i weiin ɔ kpɛmɛn i wun. Sanngɛ, ɔ kɛn i aɲinyiɛ su nin wun ase kanlɛ. Afin Zoova ti i Yifuɛ. E wun i sɔ liɛ’n weiin ndɛ kun m’ɔ kannin’n nun. Bo Bolɛ 18:27 nun’n, ɔ seli Ɲanmiɛn kɛ: ‘Nannan, n ti asiɛ wun fa, sanngɛ n tu wɔ kpli kaflɛ, maan n kan kun ekun.’ ?Nán ajalɛ kpa yɛle sɔ’n? Ɔ fata kɛ e nian su.
7. ?Ninnge mennin mun yɛ e nannan’m be fa wlali be srɛlɛ’n nun ɔn?
7 Sran wie mun ekun, be fali ndɛ fanunfanun wlali Zoova sa nun, yɛ ɔ sɔli nun klanman. Be nun kun yɛle nannan Zakɔbu. Ɔ srɛli Ɲanmiɛn kɛ ɔ jrɛn i sin. Kpɔkun ɔ tali nda kɛ: ‘Like kwlaa nga Ɲanmiɛn man min’n ń fɛ́ i blusu’n ń mɛ́n i.’ (Bo Bolɛ 28:20-22) I sin’n, kɛ ɔ nin i niaan bian Ezau bé wá yía nun’n, ɔ srɛli Zoova kɛ ɔ de i. Ɔ seli kɛ: ‘Yaci, de min min niaan bian Ezau sa nun. Nanwlɛ, n sro i.’ (Bo Bolɛ 32:10-13) Sran kun ekun m’ɔ fɛli i ndɛ’n wlali Ɲanmiɛn sa nun’n, yɛle nannan Zɔbu. I awlofuɛ’m be ti’n, ɔ yili tɛ mannin Ɲanmiɛn. I sin’n, kɛ i janvuɛ nsan’m be ijɔli tɛtɛ’n, ɔ srɛli be ti naan ‘Zoova w’a tie Zɔbu i srɛlɛ’n.’ (Zɔb 1:5; 42:7-9) E nannan sɔ’m be srɛlɛ’n, ɔ kle e ninnge nga e kwla fa wla e srɛlɛ’n nun wie’n. Asa ekun’n, ɔ kle kɛ sran ng’ɔ srɛ Ɲanmiɛn kɛ ɔ nin i fata’n sa’n, Ɲanmiɛn ti i srɛlɛ’n.
Wafa nga Moizi mmla’n kle kɛ be wunnge Ɲanmiɛn wun lɔ’n
8. ?Mmla nun’n, wafa sɛ yɛ be fa nvlefuɛ’m be ndɛ’n wla Zoova sa nun ɔn?
8 Kɛ Zoova deli Izraɛli Ezipti lɔ fiteli’n, ɔ mannin be mmla. Mmla nun’n, Ɲanmiɛn sieli i ɲrun jranfuɛ mun kɛ Levifuɛ wie mun sa. Be yɛ be jran nvlefuɛ’m be nuan ɔn. Sanngɛ sɛ ndɛ wie tɔ naan ɔ kan nvle wunmuan’n, sran kun fa ndɛ sɔ’n wla Zoova sa nun, nvlefuɛ’m be dunman nun. Sran sɔ’n kwla yo famiɛn’n, annzɛ Ɲanmiɛn nuan ijɔfuɛ kun. (1 Samiɛl 8:21, 22; 14:36-41; Zeremi 42:1-3) I wie yɛle nga famiɛn Salomɔn yoli’n. I nun mɔ bé yí Ɲanmiɛn i sua’n i nglo’n, ɔ tuli i klun srɛli Zoova. Zoova kusu tili i srɛlɛ’n, afin i ɲrun ɲanɲan’n yili sua’n. Kpɔkun ɔ seli kɛ: “Ń fá min su ń síe i amun srɛlɛ nga amún srɛ́ i lika nga nun wa’n su.”—2 Be Nyoliɛ 6:12–7:3, 15.
9. ?Ngue yɛ Ɲanmiɛn seli kɛ be yo i sua’n nun lɔ naan w’a sɔ be nun ɔn?
9 Mmla nga Ɲanmiɛn fa mannin Izraɛlifuɛ mun i nun’n, ɔ kleli like kun m’ɔ fata kɛ be yo i sua’n nun lɔ naan b’a kwla wunnge i wun naan w’a sɔ be nun’n. ?Ngue like yɛle sɔ’n? Like sɔ’n yɛle kɛ nglɛmun nin nnɔsua kwlaa’n, Ɲanmiɛn ɲrun jranfuɛ’m be su kpɛn’n, ɔ yi tɛ man Zoova kpɔkun ɔ yra ansans. Kɛ ɔ́ kɔ́ i ɲrun’n, Ɲanmiɛn ɲrun jranfuɛ’m be dili i sɔ junman’n wie. Sanngɛ sa tɛ’n i ti srɛlɛ cɛn dan’n nun’n, Ɲanmiɛn ɲrun jranfuɛ’m be su kpɛn’n yɛ ɔ yra ansans’n niɔn. Sɛ be Ɲanmiɛn ɲrun jranlɛ junman’n i dilɛ’n nun’n, b’a yoman sɔ b’a manman Ɲanmiɛn’n, ɔ sɔman be nun.—Ezipt Lɔ Tulɛ 30:7, 8; 2 Be Nyoliɛ 13:11.
10, 11. ?Ngue yɛ ɔ kle kɛ Zoova sɔli sran’m be bɔbɔ be srɛlɛ’n nun ɔn?
10 ?Izraɛli lɔ’n, sɛ sran kun waan ɔ́ kɔ́ Ɲanmiɛn wun’n, be nga be jran be nuan’n, be lika yɛ saan fii ɔ́ sín ɔn? Cɛcɛ. Afin Biblu’n kle kɛ, kɛ sran wie’m be bɔbɔ be srɛli Ɲanmiɛn’n, ɔ sɔli nun klanman. I nun mɔ Salomɔn yí Ɲanmiɛn i sua’n i nglo’n, ɔ srɛli Zoova kɛ: ‘Sɛ be srɛ wɔ sakpa’n, yɛ sɛ be man be sa’m be su naan be tinngɛ be sua nga ndɛnman’n, kɛ a o ɲanmiɛn su lɔ’n, tɛ be su.’ (2 Be Nyoliɛ 6:28-30) Liki fluwa’n kusu se kɛ, kɛ Zan batɛmu yofuɛ’n i si Zakari yrá ansans Ɲanmiɛn i sua’n nun lɔ’n, nn sran’m be kwlaa be o ‘gua su lɔ bé srɛ́ Ɲanmiɛn.’ Kɛ e niɛn i siin sa’n, e kwla se kɛ i sɔ yolɛ’n ti nvlefuɛ’m be nzuɛn. Yɛle kɛ cɛn kwlaa kɛ bé yrá ansans Ɲanmiɛn sua nun lɔ’n, ansans yrawlɛ mɔ be fali sika ɔkwlɛ be yoli’n i su’n, nn be kusu be o gua su lɔ bé srɛ́.—Lik 1:8-10.
11 Kɛ nga e fa wun i lɛ’n sa’n, maan ɔ yo sran’m be bɔbɔ o, annzɛ be nuan jranfuɛ mun o, sɛ be wunnge Zoova wun lɔ kɛ ng’ɔ nin i fata’n sa’n, ɔ sɔ be nun, ɔ ti be srɛlɛ’n. Andɛ e diman Moizi mmla’n su. Sanngɛ, wafa nga laa Izraɛlifuɛ’m be wunngeli Ɲanmiɛn wun lɔ m’ɔ sɔli be nun’n, ɔ kle e ngwlɛlɛ kpa. Yɛle kɛ, ɔ kle e wafa nga e kusu e kwla srɛ Ɲanmiɛn naan w’a ti’n.
Wafa nga Klist dunman nun be kwla wunnge Ɲanmiɛn wun lɔ’n
12. ?Ngue yɛ Zoova siesieli naan Klistfuɛ’m b’a kwla fa be wun b’a mɛntɛn i ɔ?
12 E liɛ’n e ti Klistfuɛ, yɛ Zoova bɔbɔ kleli like ng’ɔ siesieli naan y’a kwla wunnge i wun lɔ’n. Ɔ timan kɛ laa mɔ Ɲanmiɛn le i sua asiɛ’n su wa mɔ sran’m be ko srɛ i nun lɔ’n sa, annzɛ kusu mɔ i ɲrun jranfuɛ’m be jran nvlefuɛ’m be nuan sa. ?Yɛle kɛ sɛ? Yɛle kɛ Ɲanmiɛn le i sua uflɛ kun. Sua sɔ’n timan sua jrɛiin, nán sran yɛ ɔ kplannin ɔn. Afuɛ nga be flɛ i 29 nun’n, kɛ Ɲanmiɛn wawɛ’n trannin Klist su m’ɔ Ɲanmiɛn sieli i Ɲanmiɛn ɲrun jranfuɛ’m be su kpɛn’n, yɛ sua sɔ’n takali ɔ.a Saan é wlú sua sɔ’n nun naan y’a fa e wun y’a mantan Zoova naan y’a su i. E yo i sɔ liɛ’n Zezi i tɛ m’ɔ yili mɔ maan Ɲanmiɛn yaci e wun sa cɛ e’n, i fanngan nun.—Ebre Mun 9:11, 12.
13. ?Ngue yɛ be yoli laa Zerizalɛmu lɔ Ɲanmiɛn sua’n nun m’ɔ ti Ɲanmiɛn srɛlɛ mɔ be srɛ i, i sua mɔ nán sran yɛ ɔ kplannin’n i nun, i nzɔliɛ ɔ?
13 Laa Zerizalɛmu lɔ Ɲanmiɛn sua’n i nun ninnge kpanngban be ti ninnge wie’m be nzɔliɛ. Be ti Ɲanmiɛn sua mɔ nán sran yɛ ɔ kplannin’n, i nun ninnge’m be nzɔliɛ. Be kwla uka e maan e wun Ɲanmiɛn i srɛlɛ’n i wlɛ wie. (Ebre Mun 9:1-10) I wie yɛle kɛ nglɛmun nin nnɔsua kwlaa’n, Ɲanmiɛn ɲrun jranfuɛ’n yra ansans, ansans yrawlɛ’n su. Ansans yrawlɛ’n sɔ’n, ɔ o sua’n i lika kpa’n nun lɔ. ?Yɛ ansans’n ti ngue i nzɔliɛ? Sa Nglo Yilɛ fluwa’n waan: ‘Ansans’n yɛle yalɛ nga Ɲanmiɛn sran’m be koko kle i’n.’ (Sa Nglo Yilɛ 5:8; 8:3, 4) Ɲanmiɛn maan Davidi kusu seli kɛ: ‘Min srɛlɛ nga n srɛ’n, maan ɔ yo ɔ ɲrun kɛ ansans sa.’ (Jue Mun 141:2) Ɔ maan, kɛ Klistfuɛ’m be srɛ Ɲanmiɛn mɔ be mɛnmɛn i m’ɔ sɔ nun klanman’n, ɔ ti kɛ laa ansans m’ɔ bɔn Ɲanmiɛn bue nun fannin’n sa.—1 Tɛsalonikfuɛ Mun 3:10.
14, 15. (a) An yiyi wafa nga Ɲanmiɛn nin be nga bé kɔ́ ɲanmiɛn su lɔ’n be afiɛn’n ti’n, i nun? (b) ?Yɛ be nga be ti ‘bua wie’ mun be li?
14 ?Wan yɛ, sɛ é kwlá sé’n, ɔ kwla wlu Ɲanmiɛn i sua mɔ nán sran yɛ ɔ kplannin’n i nun lɔ naan w’a jran Ɲanmiɛn ɲrun ɔn? Laa Ɲanmiɛn i sua’n nun lɔ’n, sua’n i awlo’n klun lɔ junman dilɛ’n yoli Ɲanmiɛn ɲrun jranfuɛ nin Levifuɛ’m be cenjele like. Sanngɛ Ɲanmiɛn ɲrun jranfuɛ’m be ngunmin cɛ yɛ be wlu sua’n i lika kpa’n nun lɔ ɔ. Klistfuɛ nga Ɲanmiɛn fɛli i wawɛ’n mannin be mɔ bé kɔ́ ɲanmiɛn su’n be kusu’n, be nin Ɲanmiɛn be afiɛn’n ti i liɛ ngunmin. Ɔ ti kɛ be o Ɲanmiɛn i sua’n i lika kpa’n, ɔ nin i awlo’n i klun lɔ sa. Ɔ maan, be le atin be srɛ Ɲanmiɛn be mɛnmɛn i.
15 ?Yɛ sran nga bé ká asiɛ’n su wa mɔ be ti ‘bua’m be wie mun’n,’ be li? (Zan 10:16) Ɲanmiɛn nuan ijɔfuɛ Ezai seli kɛ ‘cɛn wie lele’n,’ nvlenvle’m be kwlaa bé bá Zoova sulɛ. (Ezai 2:2, 3) Asa ekun’n, ɔ seli kɛ “aofuɛ” mun bé bá Ɲanmiɛn sulɛ wie naan Ɲanmiɛn sɔ́ be nun. Afin, Ɲanmiɛn seli kɛ: ‘Bé sú min min srɛwa sua’n nun, yɛ ń yó maan be klun jɔ́.’ (Ezai 56:6, 7) Sa Nglo Yilɛ 7:9-15 yiyi nun kpa ekun. I waan be ti ‘sran kpanngban kpa’ naan be fin ‘nvlenvle kwlaa’ nun naan be su Ɲanmiɛn be mɛnmɛn i ‘wia nun nin kɔnguɛ.’ Be yo i sɔ’n Ɲanmiɛn i sua mɔ nán sran yɛ ɔ kplannin’n i gua su awlo’n i klun lɔ. Ɔ maan, andɛ Ɲanmiɛn i sufuɛ’m be kwlakwla be kwla fa be wun be mantan Ɲanmiɛn. Afin, be si kɛ sɛ be srɛ i ɔ, ɔ ti. Nanwlɛ, i sɔ’n jɔ e klun dan!
?Srɛlɛ mennin yɛ Ɲanmiɛn ti ɔ?
16. ?Ɲanmiɛn srɛlɛ nun’n, ajalɛ mennin yɛ Klistfuɛ klikli’m be man e ɔ?
16 Ɲanmiɛn srɛlɛ’n yoli Klistfuɛ klikli’m be nzuɛn. ?Ngue yɛ be fa wlali be srɛlɛ’n nun ɔn? Kɛ asɔnun kpɛnngbɛn’m bé kúnndɛ sran nga bé fá asɔnun’n nun junman’n bé wlɛ́ i sa nun’n, be srɛ Ɲanmiɛn kɛ ɔ tike be ɲin. (Sa Nga Be Yoli’n 1:24, 25; 6:5, 6) Epafrasi srɛli Ɲanmiɛn mɛnnin i wiengu Klistfuɛ mun. (Kolɔsfuɛ Mun 4:12) Kɛ be wlali Piɛli bisua’n, asɔnunfuɛ nga be o Zerizalɛmu lɔ’n be kusu be srɛli Ɲanmiɛn mɛnnin i. (Sa Nga Be Yoli’n 12:5) Kɛ bé klé Klistfuɛ klikli’m be yalɛ’n, be srɛli Ɲanmiɛn kɛ ɔ wla be yakpa. Be seli kɛ: ‘Nannan Ɲanmiɛn, nian e wlanwlanlɛ mɔ be wlanwlan e ɔ, i sɔ’n ti siɛn’n, yo maan ɔ sran’m be kan ɔ ndɛ’n yakpa su.’ (Sa Nga Be Yoli’n 4:23-30) Zaki kusu seli Klistfuɛ mun kɛ sɛ sa tɔ be su’n, maan be srɛ Ɲanmiɛn naan ɔ man be ngwlɛlɛ. (Zak 1:5) ?Yɛ e li, e fa sa kwlaa sɔ mun e wla e srɛlɛ’n nun wie?
17. ?Srɛlɛ mennin yɛ Ɲanmiɛn ti ɔ?
17 Nán srɛlɛ ngba yɛ Ɲanmiɛn ti ɔ. ?Sɛ ɔ ti sɔ’n niɔn, wafa sɛ yɛ e kwla srɛ Ɲanmiɛn naan y’a lafi su kɛ é ɲán like nga e srɛ i’n niɔn? Laa’n, kɛ be nga be nin Ɲanmiɛn be nanti klanman’n bé srɛ́ i’n, ndɛ ng’ɔ o be klun’n yɛ be kan ɔn, be kpɛmɛn i wun. Be angunndan’n ti kpa, be lafi Ɲanmiɛn su. Kpɔkun be yi i sɔ liɛ’n i nglo be nzuɛn’n nun. Sɛ andɛ e nanti be ajalɛ’n su’n, Ɲanmiɛn tí e srɛlɛ’n wie.
18. ?Ngue yɛ ɔ fata kɛ Klistfuɛ’m be yo naan Ɲanmiɛn w’a tie be srɛlɛ’n niɔn?
18 Sɛ e waan Ɲanmiɛn ti e srɛlɛ’n, saan é yó like kun ekun. Akoto Pɔlu kɛnnin i sɔ liɛ’n i ndɛ. I waan: ‘Klist ti e kwla kɔ e Si Ɲanmiɛn wun lɔ i wawɛ’n i fanngan nun.’ (Efɛzfuɛ Mun 2:13, 18) Ɔ maan, sɛ é kwlá sé’n, atin’n la nun. Sanngɛ Zezi kunngba cɛ i dunman nun yɛ sɛ e srɛ Ɲanmiɛn’n, ɔ́ tí ɔ.—Zan 14:6; 15:16; 16:23, 24.
19. (a) ?Blɛ wie nun’n, ngue ti yɛ Izraɛlifuɛ’m be ansans yralɛ’n bɔnnin Zoova bue nun tɛ ɔ? (b) ?Wafa sɛ yɛ e srɛlɛ’n kwla yo kɛ ansans m’ɔ bɔn Ɲanmiɛn bue nun fannin sa ɔ?
19 E wunnin kɛ Ɲanmiɛn i sufuɛ kpa’m be srɛlɛ mɔ Ɲanmiɛn sɔ nun klanman’n, ɔ ti kɛ ansans nga Izraɛli lɔ Ɲanmiɛn ɲrun jranfuɛ’m be yrɛ i’n sa. Sanngɛ ɔ juli cɛn wie’n, ansans nga be yra mannin Zoova’n, ɔ yoli i tɛ. Afin be yra ansans, kpɔkun be kunngba’n be ko sɔ amuɛn mun. (Ezekiɛl 8:10, 11) Andɛ kusu’n, be nga be waan be ti Zoova i sufuɛ mɔ be kunngba’n be kpalo i mmla’n, sɛ é kwlá sé’n, be srɛlɛ’n bɔn Ɲanmiɛn i bue nun tɛ. (Nyanndra Mun 15:8) I sɔ’n ti’n, maan e nian wafa nga e nanti’n su. Yɛle kɛ, maan e nzuɛn’n yo kpa titi naan srɛlɛ mɔ e srɛ Ɲanmiɛn’n w’a bɔn i bue nun fannin kɛ ansans sa. Nanwlɛ, be nga be nanti Zoova i atin kpa’m be su’n, be srɛlɛ’n yo i fɛ. (Zan 9:31) ?Sanngɛ wafa sɛ yɛ ɔ nin i fata kɛ e srɛ ɔ? ?Ngue yɛ e kwla fa wla e srɛlɛ’n nun ɔn? ?Yɛ wafa sɛ yɛ Ɲanmiɛn tɛ e srɛlɛ’n su ɔ? Like suanlɛ ng’ɔ́ bá lɔ’n wá tɛ́ kosan sɔ mun, ɔ nin wie mun ekun be su.
?Amún yíyí nun sɛ?
• ?Wafa sɛ yɛ klɔ sran’n kwla wunnge Ɲanmiɛn wun lɔ naan w’a sɔ i nun ɔn?
• ?Wafa sɛ yɛ e kwla nian e nannan’m be srɛlɛ’n su e srɛ Ɲanmiɛn ɔn?
• ?Ɲanmiɛn srɛlɛ nun’n, ajalɛ mennin yɛ Klistfuɛ klikli’m be man e ɔ?
• ?Wafa sɛ yɛ e srɛlɛ’n kwla yo kɛ ansans m’ɔ bɔn Ɲanmiɛn bue nun fannin’n sa ɔ?
[Ja ngua lɛ ndɛ’n]
a An nian Sasafuɛ Tranwlɛ’n, afuɛ 2001, Mɛ 15 (w-F) i bue 27 nun.
[Foto, bue 23]
?Ngue ti yɛ Ɲanmiɛn sɔli Abɛli i like liɛ nun m’ɔ yacili Kain liɛ’n lɛ ɔ?
[Foto, bue 24]
“N ti asiɛ wun fa.”
[Foto, bue 25]
“Ń fɛ́ i blusu’n ḿ mɛ́n i.”
[Foto, bue 26]
?Amun Ɲanmiɛn srɛlɛ’n ti kɛ ansans m’ɔ bɔn Zoova i bue nun fannin’n sa?