Maan e kle like nga Biblu’n kle i sakpasakpa’n
‘An kle nvlenvle’n kwlaa be like maan be kaci n sɔnnzɔnfuɛ. Yɛ like kwlaa nga n kleli amun’n, amun kusu an kle be.’—MATIE 28:19, 20.
1. ?Biblu’n i ɲanlɛ ti kekle?
LALAFUƐ fluwa nga w’a tru mɛn’n nun kpa w’a tra fluwa ngba’n, yɛle Biblu’n m’ɔ ti Zoova nuan ndɛ’n. Kɛ é sé yɛ’n, be kwla ɲɛn i bue wie aniɛn 2.300 tra su nun. Ɔ maan sɛ e fa asiɛ wunmuan’n su sran 100, be nun 90 tra su be le Biblu’n be klɔ aniɛn’n nun.
2, 3. (a) ?Ngue ti yɛ sran’m be nuan sɛman like nga Biblu’n kle’n su ɔ? (b) ?Kosan mennin yɛ é wá tɛ́ be su ɔ?
2 Sran kpanngban be kanngan Biblu’n nun cɛn kwlakwla. Wie’m be liɛ bɔbɔ’n, b’a kɛnngɛn i wunmuan’n nun kpɛ sunman. Asɔnun’m be kusu’n, be akpasuaakpasua kpanngban be waan be like klelɛ’n taka Biblu’n su. Sanngɛ, be nuan sɛman like nga Biblu’n kle’n su. Ng’ɔ ti tɛ ekun’n yɛle kɛ asɔnun kunngba’n nun’n, be nuan sɛman su. Sran wie’m be bumɛn i kɛ Biblu’n ti Ɲanmiɛn sa nuan like naan ɔ ti like kpa. Be nun sunman wie’m be liɛ kusu’n, be waan Biblu’n ti Ɲanmiɛn i sa nuan like. Naan like ng’ɔ nin i fata kɛ be fa yo’n, yɛle kɛ sɛ sran’m be su yo like wie naan be waan bé tá nda’n, be kwla fa ta. Annzɛ kusu’n, be kwla fa be sa fua su be ta nda jɔlɛ difuɛ’m be ɲrun kɛ bé dí nanwlɛ.
3 Sanngɛ Biblu’n timɛn i sɔ like. Ɔ ti Ɲanmiɛn Ndɛ, ɔ ti sran kwlaa be liɛ. Yɛ ɔ le ta kpa sran’m be su. (Ebre Mun 4:12) I sɔ’n ti’n, e mɔ e ti Zoova i Lalofuɛ’n, e kunndɛ kɛ sran’m be si like nga Biblu’n kle’n. Ɔ maan junman nga Zezi seli i sɔnnzɔnfuɛ mun kɛ be di’n, i dilɛ’n yo e fɛ. Zezi seli kɛ: ‘An wɔ ko kle nvlenvle’n kwlaa be like maan be kaci n sɔnnzɔnfuɛ. Yɛ like kwlaa nga n kleli amun’n, amun kusu an kle be.’ (Matie 28:19, 20) Kɛ é dí e junman sɔ’n, e to sran nga be klo nanwlɛ’n mɔ ninnge sukusuku nga Ɲanmiɛn sulɛ wafa’m be kle’n ti’n, be angunndan w’a sanngan’n. I sɔfuɛ’m be kunndɛ kɛ bé sí e Yifuɛ’n i su ndɛ nanwlɛ’n, ɔ nin like nga ti yɛ e o asiɛ’n su’n i su ndɛ nga Biblu’n kan’n. I sɔ’n ti’n, é wá fá e ɲin síe kosan cinnjin nga be nun sunman be fa usa be wun’n, be nun nsan su kunngunngun. I klikli’n yɛle kɛ: ?E ndɛ lo Ɲanmiɛn? I nɲɔn su’n yɛle kɛ: ?Ngue ti yɛ e o asiɛ’n su ɔ? Yɛ i nsan su’n yɛle kɛ: ?Ngue yɛ ɔ o wie’n i sin ɔn? Be su tɛlɛ nun’n, é dún mmua wún ndɛ nga Ɲanmiɛn sulɛ wafa’m be su kpɛnngbɛn’m be kan m’ɔ ti ato’n. Kpɔkun i sin’n, é wún like nga Biblu’n kle i sakpasakpa’n.
?E ndɛ lo Ɲanmiɛn?
4, 5. ?Ngue ti yɛ sran’m be bumɛn i kɛ e ndɛ lo Ɲanmiɛn ɔn?
4 Kosan nga é dún mmua tɛ́ su’n yɛle kɛ: ?E ndɛ lo Ɲanmiɛn? Sran sunman be bumɛn i kɛ e ndɛ lo Ɲanmiɛn. ?Yɛ ngue ti ɔ? Afin mɛn wunmuan’n nun’n, ɔ ti be wun kpɔlɛ nin alɛ kunlɛ nin ɲrɛnnɛn’n ngunmin. Ɔ maan, sran’m be kpɛ i kpo be se kɛ: ‘Sɛ e ndɛ lo Ɲanmiɛn sakpa’n, nn ɔ su yacimɛn i sɔ ɲrɛnnɛn sa mun naan be tɔ e su.’
5 Like kun ekun nga ti yɛ sran’m be bu i kɛ e ndɛ loman Ɲanmiɛn’n, ɔ fin Ɲanmiɛn sulɛ wafa’m be su kpɛnngbɛn mun. ?Kɛ ɲrɛnnɛn tɔ sran’m be su’n, ngue ndɛ yɛ kpɛnngbɛn sɔ’m be kan ɔn? Amun e fa bla wie i ndɛ e nian. Bla sɔ’n i wa kanngan nɲɔn be wuli loto asidan nun. Kɛ ɔ yoli sɔ’n, i asɔnun kpɛnngbɛn’n seli i kɛ: “Ɲanmiɛn yɛ ɔ fali be naan be nɲɔn’n be ukɛ i anzi’m be su ɔ.” ?Kɛ be kan ndɛ kɛ ngalɛ’n sa’n, nán Ɲanmiɛn su yɛ be fa ɲrɛnnɛn sa mun gua ɔ? Sanngɛ, Zaki m’ɔ ti Zezi i sɔnnzɔnfuɛ’n waan: ‘Sɛ be laka sran kun’n, nán maan ɔ se kɛ, Ɲanmiɛn yɛ ɔ lɛkɛ i ɔ. Afin be kwlá lakaman Ɲanmiɛn sa fi nun, yɛ i bɔbɔ lakaman sran fi.’ (Zak 1:13) Nanwlɛ, Ɲanmiɛn Zoova yoman klunwi. Afin, ‘klunwi yolɛ’n nin ndɛ kwlɛ bulɛ’n, be timan Ɲanmiɛn i nzuɛn mlɔnmlɔn.’—Zɔb 34:10.
6. ?Sa tɛ’n nin ɲrɛnnɛn m’ɔ o mɛn’n nun’n fin wan?
6 ?Sɛ ɔ ti sɔ’n niɔn, ngue ti yɛ sa tɛ’n nin ɲrɛnnɛn’n w’a tru mɛn’n nun sɔ ɔ? Sa nga ti yɛ ɔ ti sɔ’n, i kun yɛle kɛ sran’m be kpalo Ɲanmiɛn i atin m’ɔ ti kpa’n. Be kplinman su kɛ Ɲanmiɛn sie be. I sɔ ajalɛ mɔ be fa’n, kannzɛ bɔbɔ be wunmɛn i wlɛ o, sanngɛ Satan m’ɔ ti Ɲanmiɛn i Kpɔfuɛ’n yɛ be fa be wun mɛn i kɛ ɔ sie be ɔ. Afin Biblu’n waan: “Klunwifuɛ’n sie mɛn wunmuan’n.” (1 Zan 5:19) Like nga ti yɛ ɲrɛnnɛn sa’m be o mɛn nun’n yɛ ɔ o lɛ. Satan kusu i klun ti tɛ, ɔ kpɔ sran, ɔ ti gblɛfuɛ yɛ ɔ yo wlɛ. ?Kɛ sran kɛ ngalɛ’n sa’n sie mɛn’n, nán like ng’ɔ ti kɛ i bɔbɔ sa cɛ’n yɛ ɔ́ jú ɔ? Ɔ maan klunwi m’ɔ w’a yi asiɛ’n, ɔ boman e nuan!
7. ?Ninnge nga ti yɛ e wun ɲrɛnnɛn’n be nun wie yɛle mennin?
7 Like kun ekun nga ti yɛ e wun ɲrɛnnɛn’n, yɛle fɔ m’ɔ o e nun’n. Yɛ i sɔ’n ti’n, e waan saan fii é síe e wiengu. I sɔ liɛ’n i agualiɛ’n yɛle alɛ’n nin e wiengu mianmianlɛ’n, ɔ nin afɛ’n. Akunndanfuɛ’n 8:9 kɛn i weiin kɛ: ‘Sran kun sie i wiengu kun kpɔkun ɔ kle i ɲrɛnnɛn.’ Sanngɛ nɛ́n i ngba. ‘Kɛ blɛ’n fa ti mɔ sa’m be fa ju’n, i su like yɛ e wun i ɔ.’ (Akunndanfuɛ’n 9:11) I sɔ’n ti yɛ wie liɛ’n, sanvuɛsa tɔ sran’m be su’n niɔn.
8, 9. ?Ngue ti yɛ e si kɛ e ndɛ lo Zoova sakpa ɔ?
8 ?Sɛ bɔɔ nán Zoova yɛ ɔ fa ɲrɛnnɛn yi e su’n, sanngɛ e ndɛ lo i yɛ ɔ o lɛ? É tɛ́ su kpa weiin kɛ ɛɛn! Afin, e ndɛ m’ɔ lo i ti’n, like nga ti yɛ kɛ sran’m bé fá atin tɛ’n ɔ yacili be lɛ’n, ɔ yiyili nun kleli e Biblu’n nun. Ɔ yiyi nun kɛ sa nɲɔn ti yɛ ɔ yoli sɔ ɔ. I klikli’n kan i bɔbɔ Ɲanmiɛn i nglo nin asiɛ m’ɔ sie’n, i su akplowa m’ɔ tɔli’n. Kpɔkun i nɲɔn su’n kan sran’m be sein nantilɛ’n i su akplowa m’ɔ tɔli’n. Sɛ Zoova waan ɔ yiyimɛn i sɔ’n ndɛ’m be nun kleman e’n, sran fi kwlá usɛmɛn i sa. Afin i yɛ ɔ yili like kwlaa ɔ, kpɔkun like fi nunmɛn i sin. Sanngɛ e ndɛ m’ɔ lo i’n ti’n, ɔ yiyili be nun kleli e.
9 Amun e nian like kun ekun m’ɔ kle kɛ e ndɛ lo Ɲanmiɛn’n. Biblu’n waan kɛ Nowe blɛ su sa tɛ’n truli asiɛ’n su’n, “ɔ yoli Anannganman i ya dan.” (Bo Bolɛ 6:5, 6) ?Yɛ sa tɛ nga w’a tru e blɛ liɛ’n nun’n nin, ɔ yo Ɲanmiɛn i ya wie? Ɛɛn, afin Ɲanmiɛn w’a kaciman. (Malasi 3:6) Ɔ kpɔ lufle bulɛ’n, yɛ ɔ kloman kɛ sran wun ɲrɛnnɛn. I sɔ’n ti’n, Biblu’n waan ɔ ka kaan sa Ɲanmiɛn wá núnnún sa tɛ kwlaa nga Satan nin sran’m be mɛn sielɛ’n ti’n, sran’m be wun i’n. ?I sɔ ngalɛ’n kleman weiin kpa kɛ e ndɛ lo Ɲanmiɛn?
10. ?Ɲrɛnnɛn m’ɔ o sran’m be su’n, ɔ yo Zoova sɛ?
10 Kɛ ɲrɛnnɛn tɔ sran’m be su mɔ Ɲanmiɛn sulɛ wafa’m be su kpɛnngbɛn’m be se kɛ i sɔ’n fin Ɲanmiɛn’n, be tɔn Ɲanmiɛn i suɛn. Sanngɛ Zoova liɛ’n, i wun blibli i kɛ ɔ nunnun ɲrɛnnɛn m’ɔ o sran’m be su’n. 1 Piɛr 5:7 waan: “I yɛ ɔ nian amun lika ɔ.” Nanwlɛ, like nga Biblu’n kle i sakpasakpa’n yɛ ɔ o lɛ!
?Ngue ti yɛ e o asiɛ’n su ɔ?
11. ?Like nga ti yɛ sran o asiɛ’n su’n, i su like mennin yɛ Ɲanmiɛn sulɛ wafa’m be kle ɔ?
11 Kosan’n i nɲɔn su nga sran sunman be bu i sin mɔ be wunmɛn i wlɛ mɔ é wá tɛ́ su siɛn’n, yɛle kɛ: ?Ngue ti yɛ e o asiɛ’n su ɔ? Mɛn’n nun Ɲanmiɛn sulɛ wafa’m be waan sran’m be ti aofuɛ asiɛ’n su. Yɛle kɛ sran’m be tranwlɛ’n o lika uflɛ naan kɛ bé sín bé kɔ́’n, yɛ be sike asiɛ’n su kan ɔn. Ɲanmiɛn sulɛ wafa sɔ’m be kpɛnngbɛn wie’m be liɛ bɔbɔ’n, be bua ato kɛ cɛn wie lele Ɲanmiɛn wá núnnún asiɛ wunmuan’n mlɔnmlɔn. I sɔ like mɔ be kle’n ti’n, sran kpanngban be kpɛ i kpo be se kɛ bé dí be mɛn, afin cɛn wie lele bé wú. Kpɔkun be liɛ w’a wie. ?Sanngɛ like nga ti yɛ e o asiɛ’n su’n, i su like mennin yɛ Biblu’n kle i sakpasakpa ɔ?
12-14. ?Like nga ti yɛ Ɲanmiɛn yili asiɛ nin sran’n i su like nga Biblu’n kle’n yɛle mennin?
12 Like nga ti yɛ Ɲanmiɛn yili asiɛ nin sran’n, ɔ yo ɲɛnmɛn. Biblu’n waan Ɲanmiɛn ‘w’a yiman asiɛ’n i ngbɛn,’ sanngɛ “ɔ yili kɛ be tran su.” (Ezai 45:18) Ɔ se ekun kɛ Zoova “wlali asiɛ’n i bo ase kekleke kpa! Kɛ ɔ o lɛ’n yɛ ɔ wo ɔ.” (Jue Mun 104:5) Kɛ e wun like nga ti yɛ Ɲanmiɛn yili asiɛ’n nin sran’n i wlɛ kɛ nga sa’n, e wun kɛ nán ngbɛn ti yɛ e o asiɛ’n su wa ɔ.
13 Bo Bolɛ ndɛ tre 1 nin 2 yiyi nun kɛ Zoova niannin asiɛ nun yili naan sran’m be tran su. Ɔ kle ekun kɛ, kɛ Ɲanmiɛn wieli asiɛ’n i siesie naan sran’m be tran su’n, ɔ wunnin kɛ junman’n yoli “kpa dan.” (Bo Bolɛ 1:31) I sin’n, Ɲanmiɛn fali sran klikli Adam nin i yi Ɛvu sieli be Edɛni fie klanman’n nun. Kpɔkun, ɔ mannin be aliɛ kpakpa kpanngban. Ɲanmiɛn seli be kɛ: “An trɛ, an sɔn kpa, an yi asiɛ’n, an sie i.” Kɛ nga Ɲanmiɛn fa kɛn i lɛ’n sa’n, ɔ fata kɛ Adam nin Ɛvu be wu ba kɛ be bɔbɔ mɔ fɔ nunman be nun’n sa. Yɛ be yo maan asiɛ wunmuan’n kaci kɛ fie mɔ be o nun’n sa naan be sie nnɛn mun klolɛ su.—Bo Bolɛ 1:26-28.
14 Ɔ maan like nga Zoova kunndɛ’n, yɛle kɛ sran’m be tran asiɛ’n su tititi naan nán fɔ’n tran be nun. Biblu’n waan: ‘Mɛn’n ɔ́ yó sran kpa’m be liɛ. Bé trán nun tititi.’ (Jue Mun 37:29) Ndɛ’n ti weiin. Yɛle kɛ Ɲanmiɛn yili sran mun naan be tran mɛn klanman’n nun naan be di aklunjuɛ tititi. Ɲanmiɛn klun sa nga Biblu’n kle i sakpasakpa’n, yɛ ɔ o lɛ!
?Ngue yɛ ɔ o wie’n i sin ɔn?
15. ?Like ng’ɔ o wie’n i sin’n, i su like mennin yɛ Ɲanmiɛn sulɛ wafa sunman be kle ɔ?
15 Amun e tɛ kosan’n i nsan su nga sran sunman be usa’n, i su siɛn’n. Be usa kɛ: ?Kɛ sran wu’n, nn i liɛ’n w’a wie? Ɲanmiɛn sulɛ wafa sunman be waan sran le i sin like kun naan kɛ ɔ wu’n, like sɔ’n wuman wie. Be nun wie’m be liɛ bɔbɔ’n, be te jran su cinnjin kpa kɛ Ɲanmiɛn kle klunwifuɛ’m be ɲrɛnnɛn trilili sin fɛtɛ kun nun. ?Sanngɛ, ndɛ nanwlɛ yɛle sɔ’n? ?Wie’n i su like mennin yɛ Biblu’n kle i sakpasakpa ɔ?
16, 17. ?Biblu’n waan be nga b’a wu’n be liɛ ti sɛ?
16 Ɲanmiɛn Ndɛ’n waan: ‘Be nga be ɲin o su’n, be si kɛ bé wú cɛn kun, sanngɛ be nga b’a wu’n be liɛ’n be wunman sa fi wlɛ. Be minndɛman akatua fi kun, afin sran’m be wla w’a fi be su.’ Kɛ mɔ be nga b’a wu’n, be ‘wunman sa fi wlɛ’n’ ti’n, be timan sa, be wunman ase, be ijɔman, yɛ be buman angunndan. Nanwlɛ, be minndɛman akatua fi. Afin be kwlá diman junman fi! Asa ekun’n, ‘be sran klolɛ o, be sran kpɔlɛ o, be kwla silɛ o, i kwlaa sɔ’n w’a wie.’ Like fi kwlá yoman be fɛ annzɛ be ya kun mlɔnmlɔn.—Akunndanfuɛ’n 9:4-5, 6, 10.
17 Kɛ nga e fa wun i lɛ’n sa’n, wie’n i su like nga Biblu’n kle’n ti weiin, i wlɛ wunlɛ’n timan kekle. Yɛle kɛ, kɛ sran ko wu’n nn w’a wu. Ɔ nunman lika uflɛ fi. Kpɔkun sran’m be finman blɔlɔ naan b’a wu be kɛ nga sran’m be fa bu i’n sa. Sɛ e waan é wún ndɛ sɔ’m be wlɛ kpa’n, e kwla fa sran’n i nguan’n e sunnzun like kɛ buzi’n i sin taaman’n sa e nian. Kɛ e ko nuan buzi’n, nn w’a nuan. I sin taaman’n nunman lika uflɛ naan w’a kpaja lɔ.
18. ?Kɛ Biblu’n nun like suanfuɛ’n ko si kɛ be nga be wuli’n be wunman sa fi wlɛ’n, ngue yɛ ɔ kwla wun i wlɛ siɛn’n niɔn?
18 Ndɛ nanwlɛ sɔ mɔ i wlɛ wunlɛ’n timan kekle’n, amun e nian wafa ng’ɔ kaci sran’m be angunndan mlɔnmlɔn’n. Kɛ Biblu’n nun like suanfuɛ’n ko si kɛ be nga be wuli’n be wunman sa fi wlɛ’n, i angunndan’n kaci. Yɛle kɛ sɛ bɔbɔ i nannan’m be ti sran mɔ be fa sa sie be klun’n, kɛ be wuli lɛ’n yɛ b’a wu ɔ, be kwlá yomɛn i like fi kun. Asa ekun’n, ɔ wun i wlɛ kɛ i awlɛn su sran nga be wuli’n be kwlá timan sa kun, be kwlá wunman ase kun, be kwlá ijɔman kun, yɛ be kwlá buman angunndan kun. Ɔ maan, kɛ be se kɛ be wu be o lɔ’n, annzɛ sran’m be wun ɲrɛnnɛn sin fɛtɛ nun’n, i sɔ’n ti ato. Biblu’n i liɛ ng’ɔ kan’n yɛle kɛ, be nga be wuli mɔ Ɲanmiɛn wla te kpɛn be su’n, ɔ́ wá cɛ́n be. ?Nán ndɛ fɛ yɛle sɔ’n?—Zan 5:28, 29.
E fluwa uflɛ mɔ é fá dí junman’n
19, 20. ?Ngue yɛ ɔ ti e mɔ e ti Klistfuɛ’n e trɔ ɔ? ?Yɛ Biblu’n i akua mennin yɛ be yili naan e fa bo jasin fɛ ɔ?
19 Kosan nga sran sunman be usa’n, be nun nsan cɛ yɛ y’a tɛ su lɛ ɔ. Be su tɛlɛ nun’n, e wunnin kɛ like nga Biblu’n kle’n ɔ timan kekle, ɔ ti weiin. Nanwlɛ, kɛ e fɛ i sɔ ndɛ nanwlɛ’n e kle sran nga be kunndɛ kɛ bé sí like nga Biblu’n kle’n, ɔ yo e fɛ dan! Sanngɛ, sran mɔ be klo nanwlɛ’n be kunndɛ kɛ be yiyi kosan cinnjin kpanngban kpa wie mun ekun be nun weinwein man be. I sɔ liɛ’n ti e mɔ e ti Klistfuɛ’n e trɔ. Yɛle kɛ, e yɛ ɔ fata kɛ e tɛ be kosan sɔ’m be su man be ɔ.
20 Ɲanmiɛn Ndɛ’n m’ɔ ti nanwlɛ’n kusu’n, i nun yiyilɛ weinwein leman ba. Sanngɛ kɛ ɔ ko yo naan y’a kwlɛ i sɔ’n yo naan w’a kan sran’m be awlɛn’n ti’n, ‘sran kpa nanwlɛfuɛ m’ɔ si ngwlɛlɛ’n’ yili fluwa kun naan e fa bo jasin fɛ’n. (Matie 24:45-47) Fluwa sɔ’n le bue 224, yɛ be flɛ i kɛ: ?Ngue like yɛ Biblu’n kle i sakpasakpa ɔ?
21, 22. ?Fluwa ?Ngue like yɛ Biblu’n kle i sakpasakpa ɔ? i nun ndɛ fɛfɛ wie mun yɛle mennin?
21 Kɛ ɔ fɛ i afuɛ nga be flɛ i 2005 nun lele m’ɔ́ fá jú 2006 nun’n, Zoova i Lalofuɛ’m be yoli be nvle kun aɲia. Be flɛli i kɛ: “Maan e ɲin yi Ɲanmiɛn.” Aɲia sɔ’m be bo lɔ yɛ be yili fluwa Biblu’n kle i nglo ɔ. Ndɛ fɛfɛ kpanngban kpa o nun. Fluwa’n i bue klikli nnun’n be nun’n, foto nin Biblu’n nun ndɛ mma’m be o lɛ. E kwla fa e bo Biblu’n nun like klelɛ bo ndɛndɛ kpa. Asa ekun’n, e kwla fa fluwa’n i lika sɔ’n e uka like suanfuɛ’n naan w’a wun Biblu’n i nun ndɛ tre mun nin i ndɛ mma’m be siesiewlɛ’n.
22 Kɛ ɔ ko yo naan ndɛ ng’ɔ o fluwa sɔ’n nun’n w’a kan like suanfuɛ’n i awlɛn’n ti’n, be klɛli i weiin yɛ i wlɛ wunlɛ’n timan kekle. Kusu’n, wafa nga be klɛli ndɛ’n, ɔ maan like suanfuɛ’n kwla kɛn i klun ndɛ. Like suanlɛ kwlaa le i su fitilɛ kosan mun. Kpɔkun be atabo’n su’n, kuku kun o lɛ. Be flɛ i kɛ: “Like nga Biblu’n kle’n.” Kuku sɔ nun’n, be fa Biblu’n tɛ kosan nga be fa fitili like suanlɛ’n su’n be su. Asa ekun’n, desɛn nglanman nin be su ndɛ o fluwa’n nun. Be kwla uka like suanfuɛ’n naan w’a wun like ng’ɔ simɛn i laa’n i wlɛ. Kannzɛ bɔbɔ fluwa’n i nun ndɛ’n timan kekle’n, sanngɛ ndɛ’m be bo tulɛ lika kun o lɛ. Ɔ yiyi ndɛ cinnjin 14 be nun kpa. Ɔ maan sɛ like suanfuɛ’n waan ɔ́ sí ndɛ kun nun kpa ekun’n, e kwla fa fluwa’n i lika sɔ’n e ukɛ i.
23. ?Wafa sɛ yɛ e kwla fa fluwa Biblu’n kle e di junman ɔn?
23 Be yili fluwa Biblu’n kle naan sɛ sran’m be ti sɛ be ti sɛ o, e fa kle be like. Sɛ e wun kɛ like suanfuɛ’n siman Biblu’n nun like fi’n, nán maan e kpli e flafla like suanlɛ’n su. Maan e fa blɛ e yiyi nun kpa naan ɔ kɛn i awlɛn’n. Sɛ sunnzun ase wie o lɛ naan ɔ wunmɛn i wlɛ kpa’n, maan e yiyi nun, annzɛ kusu maan e fa sunnzun ase uflɛ. Maan e dun mmua siesie e wun kpa, yɛ maan e fa fluwa’n e di junman kpa. Maan e srɛ Ɲanmiɛn kɛ ɔ uka e. I liɛ’n, é kwlá ‘kán ndɛ nanwlɛ’n e su kpɛmɛn i wun.’—2 Timote 2:15.
Maan e si ninnge ɲɛnmɛn mɔ Ɲanmiɛn mannin e’n be su ye
24, 25. ?Ninnge ɲɛnmɛn mennin yɛ Zoova fa mannin i nvle nunfuɛ mun ɔn?
24 Zoova yra e mɔ e ti i nvle nunfuɛ’n e su dan. Yɛle kɛ ɔ kle e i su ndɛ nanwlɛ’n. I sɔ liɛ’n, ɔ fata kɛ e si su ye dan! Afin, Ɲanmiɛn fɛ i klun sa’n fia wun tufuɛ’n be wun, kpɔkun ɔ yi i nglo kle be nga be ti wɛtɛɛfuɛ’n. Zezi kɛnnin i sɔ liɛ’n i ndɛ. Ɔ seli kɛ: ‘N Si, ɔ mɔ a ti ɲanmiɛn su lɔ’n nin asiɛ’n be Min’n, kwla o, yɛle kɛ a fa ninnge nga mun fiali ngwlɛlɛfuɛ nin be mɔ be si sa’n be wun, sanngɛ a yi be nglo kleli be mɔ be ti kɛ ba kanngan mun sa’n.’ (Matie 11:25) Nanwlɛ, kɛ sran kun o wun ase kanfuɛ mɔ be su Zoova m’ɔ sie nglo nin asiɛ’n be nun wie’n, i sɔ’n ti i cenjele dan.
25 Like ng’ɔ ti e cenjele dan ekun’n yɛle kɛ, Ɲanmiɛn maan e kle sran’m be like naan be si i. Afin sran’m be tɔn Ɲanmiɛn i suɛn be like klelɛ’n nun. Zoova i suɛn tɔnlɛ sɔ’n ti’n, sran sunman be bu i kɛ ɔ nianman be lika naan ɲrɛnnɛn ng’ɔ o be su’n, ɔ timɛn i ndɛ. ?I sɔfuɛ mun’n, amun wun blibliman amun kɛ amun uka be naan be yaci i sɔ angunndan’n i bulɛ? ?Amun kunndɛman kɛ sran nga be klo nanwlɛ’n be si Ɲanmiɛn i su ndɛ nanwlɛ’n? Sɛ i sɔ yɛ amun kunndɛ’n, amun yi i nglo kɛ amun ɲin yi Ɲanmiɛn. Yɛle kɛ, amun bo jasin fɛ’n i juejue su. Yɛ kosan cinnjin kpa nga sran’m be fa usa be wun mɔ be su tɛlɛ’n o Biblu’n nun’n, amun yiyi nun kle be. Afin be nga be klo ndɛ nanwlɛ’n, ɔ fata kɛ be si like nga Biblu’n kle i sakpasakpa’n.
?Amun tɛ́ su sɛ?
• ?Ngue ti yɛ e si kɛ e ndɛ lo Ɲanmiɛn ɔn?
• ?Ngue ti yɛ e o asiɛ’n su ɔ?
• ?Ngue yɛ ɔ o wie’n i sin ɔn?
• ?Fluwa Biblu’n kle i nun ndɛ mennin yɛ ɔ yo amun fɛ kpa ɔ?
[Foto, bue 7]
Biblu’n kle kɛ cɛn wie lele ɲrɛnnɛn’n wíe.
[Foto cifuɛ mun, bue 7]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Foto, bue 9]
Sran kpa’m bé wá trán asiɛ m’ɔ́ wá káci mɛn klanman’n nun tititi.