Awlaboe’n tin be su

KOKO nun wa’n, bian kun m’ɔ kunndɛ sa’m be bo’n waan ɔ́ nían sɛ awlaboe m’ɔ tɔ be nga be awlɛn su sran saci’n be su’n, kɛ ɔ́ cɛ́ kɔ́’n ɔ te tin be su o. I sɔ’n ti’n, ɔ klɛli kosan wie mun ko mannin siɛ nin niɛn mɔ be wa sacili w’a cɛ’n. Be ngba b’a kwlá tɛman kosan’n su. Siɛ kun mɔ be flɛ i Vladimir mɔ i wa yasua’n sacili w’a di afuɛ nnun’n i liɛ’n, ɔ seli kɛ lele nin andɛ i wa’n i ndɛ kanlɛ bo i konviabo kpɔlɛ.a

Siɛ nin niɛn kwlaa nga be wa w’a saci’n, kɛ awlaboe’n tin be su kɛ ngalɛ’n sa. Be flɛ bian kun kɛ William. I wa yasua’n sacili w’a di afuɛ 10. Nzue nun yɛ ɔ wuli ɔ. Kɛ ɔ́ yó sɔ’n, nn ba’n le afuɛ 18. Ɔ seli kɛ: “Lele nin andɛ’n, min wa’n i wie’n te yo min ya. N bumɛn i kɛ i sɔ awlaboe’n wíe le.” Bla kun mɔ be flɛ i Lusi i liɛ’n, i wa’n sacili w’a di afuɛ nnun. Tukpaciɛ wie yɛ wa tɔli i wa’n su kunnin i ɔ. Ɔ seli kɛ: “I klikli nun’n, min waan ato naan min wa’n w’a wuman. Ɔ yoli min kɛ laliɛ tɛ yɛ n su cɛn naan kɛ ń tínnge’n, nn min wa’n w’a jaso. Kɛ ɔ́ cɛ́ kɔ́’n, n wunnin kɛ kannzu ɔ wuli sakpa. Min wa’n wuli w’a di afuɛ nnun. Sanngɛ lele nin andɛ sɛ min ngunmin n ti lika kun’n, kpɔkun n su sun i.”

?Ngue ti yɛ awlaboe’n tin siɛ nin niɛn kɛ Vladimir nin William, ɔ nin Lusi sa mɔ be wa sacili’n, be su sɔ ɔ? Amun e yiyi nun kan e nian.

?Ngue ti yɛ be wla bo be wun dan sɔ ɔ?

Kɛ siɛ nin niɛn’m be wu ba’n, ɔ yo be fɛ dan. I sɔ aklunjuɛ liɛ’n, ɔ lemɛn i wunsu. Kɛ be man be wa’n su’n, annzɛ kɛ be nian be wa m’ɔ su lafi’n, annzɛ kɛ be wun kɛ ɔ su sri’n, ɔ yo be fɛ dan. Siɛ nin niɛn kpa’m be yɛyɛ be mma mun yɛ be kle be ngwlɛlɛ. (1 Tɛsalonikfuɛ Mun 2:7, 11) Kɛ ba’m be nanti like nga be kle be’n su’n, siɛ nin niɛn’m be ɲrun ba ɲan. Ɔ maan, be wun kɛ cɛn wie lele ba sɔ’m bé yó kpa.

Siɛ nin niɛn’m be di junman kekle be fa nian be mma’m be lika. Wie liɛ bɔbɔ’n, be sie sika annzɛ like kpa uflɛ naan kɛ ba’m bé wá bó be awlo liɛ’n, b’a fa ti be wun ɲanman nun. (2 Korɛntfuɛ Mun 12:14) I sɔ’n kwlaa ngalɛ’n kle weiin kɛ, siɛ nin niɛn’m be taman be mma mun naan be wu. Sɛ ɔ ti sɔ’n, nn be su tuman be klun sɔ be taman be mma mun. Sanngɛ, anannganman wie’n w’a tu be wa mɔ be klo i’n be sa nun fo. Kɛ ɔ ko yo sɔ’n, nn ba’n i wun like kwlaa nga be yoli’n, ɔ nin klolɛ mɔ be kloli i’n w’a tɔ nzue nun. Awlaboe nga i sɔ liɛ’n man siɛ nin niɛn mun’n, ɔ tin be su lele.

Biblu’n kle weiin kɛ, kɛ siɛ nin niɛn’m be wa saci’n, awlaboe’n tin be su. Kɛ nannan Zakɔbu tili i kɛ like wie kunnin i wa Zozɛfu’n, Biblu’n kannin like ng’ɔ yoli’n i ndɛ. I waan: ‘Yɛ Zakɔbu títí i tralɛ’n nun yɛ ɔ́ wlá bajɛ tralɛ ɔ. Ɔ yoli i wa’n i sɛ’n cɛli lɔun kpa. I mma’m be kwlakwla be sɔli i kpatalɛ lele ngbɛn. I waan: “Ń sún lele saan ń tó i blɔlɔ lɔ.”’ Zakɔbu trɛnnin i wa’n i awlaboe’n nun afuɛ kpanngban kpa. (Bo Bolɛ 37:34, 35; 42:36-38) Sran kun ekun mɔ Biblu’n kɛn i ndɛ’n, yɛle Naomi. I liɛ’n, i wa yasua nɲɔn yɛ be wuli ɔ. Kɛ ɔ yoli sɔ’n, i wla’n boli i wun dan. Ɔ maan, i dunman Naomi mɔ i bo’n yɛle kɛ “min aklunjuɛ’n,” ɔ seli kɛ nán be flɛ i sɔ kun naan be flɛ i kɛ “Mara.” Yɛle kɛ “klunngbɔ.”—Rit 1:3-5, 20, 21.

Sanngɛ, nán awlaboe m’ɔ tɔ siɛ nin niɛn mɔ be wa sacili’n be su’n, i ndɛ ngunmin yɛ Biblu’n kan ɔn. Ɔ kan wafa nga Zoova wla i sɔfuɛ’m be fanngan’n, i ndɛ wie. Ndɛ ng’ɔ́ bá lɛ nun’n, é wá wún Ɲanmiɛn i sran fanngan wlalɛ sɔ’n i wafa wie mun.

[Ja ngua lɛ ndɛ’n]