‘Ɲanmiɛn m’ɔ wla sran fanngan mɔ maan be tra be awlɛn’n,’ ɔ uka e

I AFUƐ ko ju 2.000 yɛ’n, Pɔlu m’ɔ ti Biblu’n i klɛfuɛ kun’n, ɔ kannin Ɲanmiɛn Zoova ndɛ kɛ i yɛ ‘ɔ wla sran fanngan mɔ maan be tra be awlɛn’ ɔn. (Rɔmfuɛ Mun 15:5) Kɛ mɔ Ɲanmiɛn kusu kaciman ti’n, e si kɛ ɔ te fɔnvɔ i sufuɛ mun. (Zak 1:17) I kpa bɔbɔ’n, Biblu’n kle kɛ Zoova i sran fɔnvɔlɛ wafa’n sɔnnin. ?I wie yɛle benin? I kun yɛle kɛ ɔ fɛ i wawɛ’n suan be nga be srɛ i’n, be bo. Wie liɛ kusu’n, ɔ yo maan sran’n i niaan Klistfuɛ’m be fɔnvɔ i. Asa ekun’n, ɔ yoli maan be klɛli sa wie’m be ndɛ Biblu’n nun naan ɔ wla be mɔ be wa sacili’n be fanngan kpa. Amun e yiyi Ɲanmiɛn i sran fɔnvɔlɛ wafa nsan sɔ’n, be nun kunngunngun e nian.

‘Be kpan flɛ Zoova’n, ɔ ti’

Kɛ famiɛn Davidi kán e Yifuɛ Zoova ndɛ’n, ɔ seli kɛ: ‘Sran mun, amun fa amun wun wlɛ i sa nun tititi. Like ng’ɔ mian amun sa’n, amun kan kle i. Ɔ ti e fiawlɛ.’ (Jue Mun 62:9) ?Ngue ti yɛ Davidi kwla seli sɔ ɔ? Ɔ kɛnnin i bɔbɔ i wun ndɛ kɛ: ‘Sɛ yalɛfuɛ wie kpan flɛ Zoova’n, ɔ ti, yɛ ɔ maan ɲrɛnnɛn ng’ɔ o i su’n ɔ wie.’ (Jue Mun 34:7) Yɛle kɛ, kɛ sa’m be tɔli i su m’ɔ kpan flɛli Zoova’n, Zoova tɛli i kwlaa su. Ɔ maan, Davidi si kɛ sɛ sa uflɛ tɔ i su’n, Ɲanmiɛn súɛn i bo.

Kɛ Davidi sa’n, siɛ nin niɛn mɔ be wla bo be wun’n be kwla lafi su kɛ sɛ be kpan flɛ Zoova’n, ‘ɔ́ tí’ naan ɔ́ súan be bo. (Jue Mun 65:3) Bian mɔ be flɛ i William mɔ e dun mmua kɛnnin i ndɛ’n seli kɛ: “Kɛ min wa’n wuli mɔ awlaboe’n tɔli min su’n, n siman kɛ ń fíte nun le. N srɛli Zoova kɛ ɔ uka min. Ɔ suannin min bo kusu naan m’an tɔman.” Sɛ amun kusu amun lafi Zoova su be srɛ i’n, ɔ́ súan amun bo wie. Zoova bɔbɔ seli kɛ: ‘N ti Anannganman amun Ɲanmiɛn, n sɔ amun sa. Min yɛ n se amun kɛ: “Nán srɛ kun amun naan ń úka amun’n niɔn.”’—Ezai 41:13.

E niaan kpa’m be suan e bo

Wie liɛ’n, be nga be wa sacili’n be kunndɛ kɛ bé cúɛn be wun bé dí be yalɛ’n. Sanngɛ, ɔ fataman kɛ be trɛn i sɔ’n nun lele. Afin Nyanndra Mun 18:1 waan like kwla yo ‘sran ng’ɔ fɛmɛn i wun mantanman sran’n.’

Klistfuɛ nga be wla bo be wun’n, be niaan Klistfuɛ’m be kwla uka be dan kpa. Nyanndra Mun 17:17 waan: ‘Janvuɛ kpa’n ɔ nunnun wunfle. Be niaan’n kusu, ɔ nunnun mmoja.’ Lusi m’ɔ e dun mmua kɛnnin i ndɛ’n, ɔ wunnin kɛ ndɛ sɔ’n ti nanwlɛ. Afin kɛ i wa’n sacili’n, i niaan Klistfuɛ’m be fɔnvɔli i. Ɔ seli kɛ: “Kɛ be ba min yako yolɛ’n, wie liɛ’n, be kanman ndɛ. Sanngɛ be fɔnvɔli min dan. Aniaan bla kun liɛ’n, kɛ sran fi nunman min wun lɛ’n, yɛ ɔ bɛ i liɛ ɔ. Afin ɔ si kɛ blɛ sɔ nun’n, sunlɛ yɛ n sun ɔn. Ɔ maan, ɔ ba yɛ ɔ nin min sun ɔn. Aniaan kun liɛ’n, ɔ fɔnvɔ min telefɔnu nun cɛn kwlaa. Wie’m be liɛ kusu’n, be flɛli e be awlo lɔ naan e nin be e di like. Lele nin andɛ’n, be te yo sɔ bɔbɔ.”

Kɛ siɛ nin niɛn’m be wa saci’n, awlaboe’n tin be su dan sɔ. Sanngɛ be Ɲanmiɛn srɛlɛ’n, ɔ nin be niaan Klistfuɛ’m be cici be wla kpa. Siɛ nin niɛn sunman mɔ be ti Klistfuɛ mɔ be wa w’a saci’n, be wunnin kɛ Zoova w’a yiman be ase. Nanwlɛ, kɛ Zoova o lɛ’n, ‘sran nga be awlɛn’n w’a kpɔtɔ be klun’n, i yɛ ɔ ti be fɔnvɔfuɛ ɔ. Sɛ like yo be’n, ɔ nian be lika.’—Jue Mun 147:3.

Biblu’n nun sa wie’m be cici e wla

Be nga be wla bo be wun’n, nán Ɲanmiɛn srɛlɛ’n nin be niaan kpa’m be ngunmin yɛ be kwla cici be wla ɔ. Sanngɛ, Ɲanmiɛn ndɛ’n kwla cici be wla wie. Sa wie mɔ Biblu’n kan be ndɛ’n, be kle weiin kɛ Zezi kwla cici be nga be wa sacili’n be wla, naan i wun blibli i kɛ ɔ yo sɔ. Yɛle kɛ, ɔ cɛnnin sran wie’m be mma mun. Sa sɔ mɔ Zezi yoli be’n, be kwla cici be mɔ andɛ be wla bo be wun’n, i dan kpa. Amun e kan sa sɔ’m be nun nɲɔn be ndɛ.

Cɛn kun’n, Zezi ɔli klɔ kun mɔ be flɛ i Nain’n su. Ɔ́ nían ɔn, be nin saka kun su sin. Angbeti bla kun yɛ i wa yasua’n wuli ɔ. Like nga Zezi yoli i blɛ sɔ nun’n, Liki ndɛ tre 7 kɛn i ndɛ. I ndɛ mma 13 waan: ‘Kɛ e Min’n wunnin bla sɔ’n, ɔ yoli i annvɔ, yɛ ɔ seli i kɛ: “Mmo, yako, muan ɔ nuan!”’

?Bla mɔ i wa sacili’n, wan yɛ ɔ́ kó sé i kɛ nán maan ɔ sun ɔn? Sanngɛ, Zezi seli i sɔ. Afin, ɔ si kɛ ɔ́ wá cící bla’n i wla. Liki ndɛ tre 7 kunngba’n waan: ‘Zezi wunngeli lɔ ɔ kannin kpata’n, yɛ be nga be suɛ i’n be jrannin ɔn. Yɛ ɔ seli kɛ: “Gbanflɛn, jaso!” Ɔ jao trannin ase, kpɔkun ɔ su ijɔ. Yɛ ɔ fɛ i mɛnnin i nin ɔn.’ (Lik 7:14, 15) Kɛ ɔ yoli sɔ’n, kannzɛ bla’n w’a yaciman sunlɛ’n, sanngɛ aklunjuɛ sunlɛ yɛ ɔ sunnin ɔn.

Cɛn kun ekun’n, bian wie mɔ be flɛ i Zairisi i wa bla kan m’ɔ le afuɛ 12 i wunnɛn yoli i ya kekle kpa. Ɔ maan, ɔ ko srɛli Zezi kɛ ɔ wa de i wa’n. Bian’n i nuan w’a tɔman, kpɔkun be wa seli i kɛ i wa’n w’a wu. Kɛ ɔ tili ndɛ sɔ’n, nanwlɛ, i wla boli i wun dan. Sanngɛ Zezi seli i kɛ: “Nán srɛ kun wɔ, gua ɔ wla ase.” Kɛ Zezi juli bian’n i awlo lɔ’n, ɔ wluli sua lɔ. Ɔ wutili ba’n i sa naan w’a se i kɛ: ‘Talua jaso! Kpɔkun talua’n w’a jao ɔ su nanti.’ ?Kɛ ɔ yoli sɔ’n, ngue yɛ talua’n i si nin i nin’n be yoli ɔ? Biblu’n waan: “Be nuan boli be wun dan kpa.” Nanwlɛ, ɔ yoli Zairisi nin i yi kɛ be su cɛn laliɛ sa. I fɛ m’ɔ yo be’n ti’n, be tɔli be wa’n nun.—Mark 5:22-24, 35-43.

Sa kɛ ngalɛ sa mɔ Biblu’n kan be ndɛ’n, be kle kɛ andɛ siɛ nin niɛn nga be wa sacili’n, be kwla gua be wla ase. Zezi seli kɛ: ‘Cɛn wie lele be kwlaa nga be o ndia nun’n, bé tí i nɛn, yɛ bé fín ndia’n nun fíte.’ (Zan 5:28, 29) Zoova kunndɛ kɛ i Wa’n cɛn be nga be wuli mun. Ɔ maan, kɛ Zezi wá sé kɛ bakan ‘jaso’n,’ bakanngan kwlaa nga be wuli’n ‘bé tí i nɛn’n.’ Bé jáso, yɛ bé nánti. Kpɔkun, kɛ Zairisi nin i yi sa’n, bakanngan sɔ’m be si nin be nin’m be ‘nuan bó be wun dan kpa.’

Siɛ nin niɛn mɔ amun wa sacili’n, maan amun wla gua ase. Afin, kɛ Zoova wá cɛ́n amun wa’n, amun awlaboe’n wíe mlɔnmlɔn. Sanngɛ sɛ amun waan bé dí i sɔ aklunjuɛ’n, amun nanti jue tofuɛ’n i afɔtuɛ nga su. I waan: ‘An fa amun wun mantan Zoova m’ɔ kwla’n! An kunndɛ kɛ ɔ nin amun tran tititi. Maan amun wla kpɛn sa ɲɛnmɛnɲɛnmɛn ng’ɔ yo be’n be su. Maan amun wla kpɛn abonuan sa ng’ɔ yoli be’n be su.’ (Jue Mun 105:4-6) Amun fa amun wun mantan Ɲanmiɛn Zoova. Yɛ amun su i wafa ng’ɔ ti i liɛ’n su’n.

?Sɛ amun ‘fa amun wun mantan Zoova’n,’ ngue yɛ amún ɲɛ́n i dɔ nga su ɔ? Like nga amún ɲɛ́n i’n yɛle kɛ, amun kwla srɛ i kɛ ɔ suan amun bo. Amun wiengu Klistfuɛ mɔ be klo sran’n, bé cící amun wla. Kpɔkun, Biblu’n nun like nga amun suan’n, ɔ maan amún yó sran. Amun ɲrun lɔ liɛ kusu mɔ w’a mantan koko’n yɛle kɛ, Zoova wá yó ‘sa ɲɛnmɛnɲɛnmɛn nin abonuan sa mun’ mán amun nin an mma mɔ be wuli’n. Ɔ maan, amun nin bé ɲán anannganman nguan.

[Kuku, bue 5]

“Se bla mɔ i wa sacili’n kɛ ɔ bla”

Ananngo’m be lɔ Zoova i Lalofuɛ kun mɔ be flɛ i Kehinde’n, ɔ nin i yi Bintu be wa nɲɔn be yoli loto nun asidan. Kpɔkun, be ka lɛ be wuli. Nanwlɛ, sa sɔ’n boli be wla dan. Sanngɛ kɛ mɔ be cisa Zoova su’n ti’n, be kwla trali be awlɛn. Yɛ b’a yaciman jasin fɛ’n m’ɔ cici sran’m be wla’n i bolɛ.

Sran wie’m be sieli Kehinde nin i yi Bintu be awlɛn tralɛ sɔ’n i nzɔliɛ. Ɔ maan cɛn kun’n, kɛ bla kun mɔ be flɛ i kɛ Ukoli’n wunnin Bintu i janvuɛ kun’n, ɔ seli i kɛ: “Kó sé bla mɔ i wa nɲɔn be ka lɛ wuli cɛn kunngba mɔ sanngɛ ɔ te kan Ɲanmiɛn ndɛ’n kɛ ɔ bla. Afin, min waan ń sí i awlɛn tralɛ sɔ’n i bo.” Kɛ be ko flɛli Bintu m’ɔ bali’n, Ukoli seli i kɛ: “Min waan ń sí sa nga ti yɛ Ɲanmiɛn kunnin ɔ mma mun mɔ sanngɛ a yaciman jasin fɛ’n bolɛ’n. Min liɛ’n, kɛ ɔ fin cɛn mɔ min wa bla kunngba cɛ’n sacili’n, min nin Ɲanmiɛn e liɛ’n wieli.” Bintu kusu’n, like nga ti yɛ sran wu’n, ɔ nin like nga ti yɛ e lafi su kɛ e awlɛn su sran mɔ be sacili’n bé cɛ́n’n, ɔ fali Biblu’n yiyili nun kleli bla’n.—Sa Nga Be Yoli’n 24:15; Rɔmfuɛ Mun 5:12.

Kɛ ɔ yoli sɔ’n, Ukoli seli kɛ: “Laa n bu i kɛ Ɲanmiɛn yɛ ɔ fa sran mun ɔn. Siɛn’n, m’an wun kɛ ato ɔ.” Kɛ ɔ fin lɛ’n, ɔ nin Zoova i Lalofuɛ’m be suan Biblu’n nun like naan ɔ́ sí ninnge nga Ɲanmiɛn wá yó be’n, be nun kpa.

[Kuku, bue 6]

‘Min waan ń fɔ́nvɔ be, sanngɛ n wunman kɛ ń yó’n’

Kɛ sie nin niɛn’m be wa saci’n, be nin be fuɛ’m be wla bo be wun dan. Sanngɛ i sɔ’n kwla yo be janvuɛ’m be kɛnsrɛn. Yɛle kɛ, be wunman ndɛ kun nga bé kán’n, annzɛ like nga be kwla yo naan b’a fɔnvɔ be’n. I sɔ’n ti’n, be mɔ ‘be waan bé fɔ́nvɔ be mɔ sanngɛ be wunman kɛ be yo’n,’ be kwla nian ajalɛ nga’m be su.

❖ Kannzɛ bɔbɔ amun wunman ajalɛ kun be faman’n, nán amun se kɛ amun ko wunman sran mɔ sa w’a ɲɛn i’n, i wun. Afin amun wunlɛ ngbɛn sa’n, ɔ fɔnvɔ i wie. Sɛ i li amun wunman ndɛ kun be kanman’n, sanngɛ kɛ amún yó be like mɔ amún yó be yako’n, nán maan ɔ yo amun nuan bui su. I liɛ’n, sran’n sí kɛ i ndɛ lo amun sakpa. Sɛ sunlɛ kun amun’n, an sun. Biblu’n waan: ‘Sɛ sran kun sún’n, maan ɔ yo amun annvɔ.’ (Rɔmfuɛ Mun 12:15) Kɛ bé sún mɔ amun nin be sun’n, be wla gua ase.

❖ Nán amun minndɛ kɛ be se amun kɛ amun yo like wie naan amun a yo. I lɛ nun’n, amun kwla tɔn aliɛ man be e. Annzɛ amun kwla kpu be ninnge mun. Annzɛ kusu amun kwla tran lɛ naan b’a sunman amun. Sran wie’m be ko se sran’n kɛ: “Sɛ ɔ sa mian like wie wun’n, kan kle min.” I sɔ’n nin i fataman. Afin, kannzɛ nán angunndan tɛ yɛ amun fa kannin sɔ’n, sran kwla bu i kɛ amun a fɛ. I sɔ’n ti’n, amun kwla usa sran’n kɛ: “?Ngue kan yɛ n kwla yo ɔ?” Kpɔkun, amun yo like ng’ɔ kle amun’n. Sɛ b’a manman amun atin’n, nán amun wlu i sua ba’n nun lɔ. Annzɛ kusu nán amun sa kan be ninnge mun.

❖ Kannzɛ amun wa w’a saci le’n, sanngɛ amun siman wafa nga sran’n i liɛ’n fa yo i ya ju’n. Afin, ɔ le wafa nga sran kun i sa liɛ’n kwla yo i ya ɔ. I sɔ’n ti’n, ndɛ kanlɛ kɛ “nian, sa ng’ɔ o ɔ su lɛ’n m’an wun i wie le’n,” nán amun se sɔ mlɔnmlɔn.

❖ Ɔ́ cɛ́ naan b’a yo ninnge mun awlo’n nun kɛ laa’n sa. I sɔ’n ti’n, like kwlaa nga amun kwla yo naan amun a suan awlofuɛ’m be bo’n, nán amun yaci i yolɛ. Sran mɔ i wla w’a bo i wun’n, kɛ ɔ́ cɛ́ kɔ́’n, nn i asamian’n yó dan. I sɔ’n ti’n, nán amun ɲin kpɛ i su.a

[Ja ngua lɛ ndɛ’n]

[Foto, bue 7]

Biblu’n nun sa wie’m be kle kɛ Zezi kwla cɛn bakanngan nga be wuli’n, naan i wun blibli i kɛ ɔ yo sɔ.