“Be aniɛn’n timan kun sanngɛ be wun klolɛ’n ti be ti kun”

Ɲrɛnnɛn mɔ sran’m be wun i’n, nán andɛ sa yɛ be kunndɛ kɛ bé fíte nun ɔn. ?Wafa sɛ yɛ e kwla tran mɛn kekle nga nun ɔn? ?Cɛn wie lele é kwlá ɲán e ti? ?Sɛ ɔ kwla yo sɔ’n, é ɲán e ti wafa sɛ?

AFUƐ nga be flɛ i 2006 nun’n, Zoova i Lalofuɛ’m be tɛlɛ i sɔ kosan’m be su be cɛn nsan nvle kun aɲia nga be yoli be lika fanunfanun’n, be bo. Aɲia sɔ mɔ be boli be yolɛ bo Mɛ anglo nun’n, be flɛli i kɛ: “E su wa ɲan e ti!”

Sran kpanngban kpa mɔ be fin nvle fanunfanun’n, be yiali aɲia sɔ’m be nun ngwlan bo. Be yoli aɲia ngwlan sɔ mun Zuie nin Utu nun afuɛ nga be flɛ i 2006 nun. Be yoli kun Pragi m’ɔ ti République Tchèque klɔ’m be bo bia’n, i su. Yɛ be yoli kun Bratislava m’ɔ ti Slovaki klɔ’m be bo bia’n, i su. Be yoli wie Polɔɲi lɔ klɔ nga be flɛ be Kɔrzɔvu nin Pɔznan, be su.a Kpɛkun, be yoli wie Alemaɲi lɔ klɔ nga be flɛ be Dɔrmund nin Flankfɔr, ɔ nin Ambur nin Lɛpzig nin Miniki be su. Sran nga be bali aɲia kwlaa sɔ’m be bo’n, be ti sran 313.000.

?Wafa sɛ yɛ be nga be yiali aɲia sɔ’m be bo’n, be nin be wiengu mun trannin ɔn? ?Be su ndɛ benin yɛ sran’m be kannin ɔn? ?Wafa sɛ yɛ ɔ yoli be nga be ɔli aɲia sɔ’m be bo mun ɔn?

Be wun siesielɛ

Zoova i Lalofuɛ nga be tran lika nga bé wá yó aɲia mun lɔ’n, nin aofuɛ nga bé wá bá’n, be dun mmua siesieli be wun naan aɲia’m w’a yo fɛ. Lika kpa nga bé ɲɛ́n i naan b’a sike aofuɛ mun’n, i ɲanlɛ’n w’a yoman pɔpɔ. Kɔrzɔvu lɔ’n, Zoova i Lalofuɛ’m be sikeli be bɔbɔ be awlo’m be nun sran 13.000. Aofuɛ sɔ mɔ be ti be niaan Klistfuɛ’n, be fin Amlɛnkɛn nin Armeni, ɔ nin Belarisi, ɔ nin Ɛstoni nin Ibegistan, ɔ nin Iklɛni nin Kazastan, ɔ nin Kirzistan nin Letoni, ɔ nin Lituani nin Zɔrzi.

Aofuɛ sɔ’m be nun sunman be dun mmua siesieli be wun lele anglo nsan. I wie yɛle Tatiana liɛ’n. Ɔ ti blɛ kwlaa nun Ɲanmiɛn junman difuɛ Rusi lɔ klɔ nga be flɛ i Kamzaka i su lɔ. Klɔ sɔ’n o Risi i nglo lɔ lika’n nin Zapɔn be aɲia’n su. Yɛ nzue bo sin yiɛ i. Kɛ ɔ fɛ i klɔ sɔ’n su lɔ m’ɔ́ fá jú Kɔrzɔvu mɔ lɔ yɛ be yo aɲia’n, ɔ kwla ju kilo 10.500. I sɔ’n ti’n, Tatiana dun mmua siesieli i wun afuɛ kun. Kɛ ɔ́ kɔ́’n, ɔ dun mmua dili dɔ 5 alapla nun. I sin’n, ɔ dili i liɛ cɛn nsan alie nun. Kpɛkun i agualiɛ su’n, ɔ dili cɛn kun nin sin loto nun.

Kɛ mɔ aɲia’m be yowlɛ’m be ti banɔn bowlɛ ti’n, sran akpi be tuli be klun be siesieli lika sɔ’m be ye. (Mmla’n 23:14) I wie yɛle Lɛpzig lɔ Zoova i Lalofuɛ’m be liɛ’n. Be yoli be aɲia yowlɛ’n i nun sanwun. Kpɛkun, be seli kɛ sɛ aɲia’n wie’n, bé dí i sɔ junman’n ekun naan b’a ɔ. I sɔ’n ti’n, sran nga be nian banɔn bowlɛ lika sɔ’n su’n, be tili sika ng’ɔ fata kɛ be tua’n su.

Sran’m be yialɛ

Nvle kun aɲia sɔ mɔ Zoova i Lalofuɛ’m be yoli’n, be flɛli i kɛ: “E su wa ɲan e ti!” Aɲia sɔ’n, aklunjuɛ su Zoova i Lalofuɛ’m be yiali sran mun i bo kpa. Be yiali sran mun lele kɔnguɛ. I aliɛ m’ɔ́ cɛ́n’n, yɛ be boli aɲia’n i bo ɔ. ?I sɔ’n i bo’n guali sɛ?

Be flɛ jasin fɛ’n bofuɛ kun kɛ Bogdan. Ɔ ko toli bian kpɛnngbɛn kun. Bian’n sunnzun kɛ ɔ́ kɔ́ aɲia nga bé yó i Kɔrzɔvu lɔ’n i bo. Sanngɛ, ɔ leman loto kpa. Afin, lele naan b’a ju lɔ’n, ɔ ti kilo 120. Kusu’n, nn loto nga asɔnun’n wlɛli i bo’n i nun tranwlɛ’n kun o lɛ ngbɛn. Bogdan waan: “E seli bian kpɛnngbɛn’n kɛ aliɛ njɛnniɛn su dɔ 5 miniti 30 su’n, é yía é fá loto. Naan sɛ ɔ to e lɛ’n, ɔ nin e kwla kɔ naan ɔ su tuaman kalɛ fi.” Bian’n kplinnin su. Ɔ maan, ɔ ɔli aɲia’n i bo wie. Cɛn kun’n, ɔ klɛli aniaan’m be ye silɛ fluwa. Ɔ seli kɛ: “Aɲia nga n ɔli i bo n bali yɛ’n, min waan ɔ fin andɛ ń káci min nzuɛn’n naan ń yó kpa.”

Klɔ nga be flɛ i Pragi lɔ kusu’n, be sikeli aniaan nga be fin Angle’n, otɛli kun nun. Kɛ aniaan’m be ɔli aɲia’n i bo be bali’n, bian kun m’ɔ tran otɛli sɔ’n nun’n seli be nun kun kɛ, ɔ ɔli aɲia’n i bo wie. ?Ngue ti yɛ ɔ ɔli i bo ɔ? Bian waan jasin fɛ’n bofuɛ fanunfanun ko ju blu be nin i yiali nun klɔ’n nun lɔ naan be yɛ be yiɛli i ɔ. Ɔ maan, sɛ w’a ɔman’n, ɔ timan kpa! Aɲia’n yoli i fɛ dan. Ɔ maan, i wun blibli i kɛ be kle i like.—1 Timote 2:3, 4.

Nzra nun ijɔlɛ’m be yoli sran’m be fɛ dan

Wafa nga e kwla wun sa fanunfanun nga be tɔ e su’n be trawlɛ’n, ijɔlɛ’m be yiyili be nun. Kpɛkun, wafa nga e kwla tra e awlɛn e jran kekle’n, be fali Biblu’n be mɛnnin i su afɔtuɛ wie.

Be nga kpɛnngbɛn yolɛ’n tin be su’n, annzɛ be timan juejue’n, annzɛ be sran sacili’n, annzɛ sa uflɛ wie o be su’n, be fali Biblu’n fɔnvɔli be. (Jue Mun 72:12-14) Wafa nga siɛ nin niɛn’m be kwla ta be mma mun’n, ɔ nin wafa nga be nga be o aja nun’n be kwla tran naan be aja’n w’a yo ye’n, be mannin be afɔtuɛ. (Akunndanfuɛ’n 4:12; Efɛzfuɛ Mun 5:22, 25; Kolɔsfuɛ Mun 3:21) Gbanflɛn nin talua nga be ta be e Min’n i liɛ’n su be awlo lɔ nin asɔnun lɔ mɔ suklu lɔ be wiengu’m be sa be nian’n, be mannin be afɔtuɛ. Be kleli be wafa nga be ko yo naan b’a jran kekle naan b’a ‘buman like nga gbanflɛn konvi sɔ i’n i akunndan’n.’—2 Timote 2:22.

Be fin mɛnmɛn’n kwlaa sanngɛ be tran aniaan tranlɛ

Kɛ Zoova i Lalofuɛ’m be yia’n, be fa Biblu’n tu be fɔ. I sɔ yolɛ’n ti be nzuɛn. (2 Timote 3:16) ?Sɛ ɔ ti sɔ’n niɔn, ngue yɛ be yoli i aɲia dan sɔ’m be bo lɔ m’ɔ ti i liɛ ngunmin ɔn? Like ng’ɔ yoli i liɛ ngunmin’n, yɛle kɛ be nga yiali’n be fin nvle fanunfanun. Ɔ maan, be aniɛn’m be nun yɛ be ijɔlɛ ɔ. Cɛn kwlaa’n, e ɲrun dinfuɛ’m be anuannzɛ’n i nunfuɛ kun ijɔli. Kpɛkun, be kannin nvle wie’m be nun jasin fɛ’n bolɛ’n nun ndɛ fɛ mun. Ijɔlɛ nin jasin fɛ’n bolɛ’n nun ndɛ fɛ kwlaa sɔ’n, be kannin be aniɛn fanunfanun’m be nun naan ɔ yo aniaan’m be kwlaa be ye.

Kɛ aniaan nga be fin nvle kun nun’n be nin nvle uflɛ nunfuɛ’m be yia’n, be wun blibli be. Be nun kun seli kɛ: “E aniɛn m’ɔ timan kun’n timan e ndɛ. I li bɔbɔ yɛ ɔ yo e cɛn’n i fɛ ekun ɔn. Aniaan’m be fin nvle fanunfanun. Sanngɛ Ɲanmiɛn su mɔ e lafi’n ti’n, e kwlaa e bo ti kun.” Be nga be yiali Miniki lɔ’n be liɛ’n, be seli kɛ: “E aniɛn’n timan kun sanngɛ e wun klolɛ’n ti e ti kun.” Nanwlɛ, kannzɛ be aniɛn’n ti ngunminngunmin naan be fin nvle fanunfanun’n, sanngɛ be trannin aniaan tranlɛ.—Zakari 8:23.

Be ye silɛ’n i nglo yilɛ

Kɛ bé yó aɲia’n, lika’n yoli tɛ. Ɔ maan, ɔ yoli kekle mannin aofuɛ mun. Yɛle kɛ, nzue’n tɔli cɛn’n kwlaa. Kpɛkun, ayrɛ’n yoli kekle wie ekun. Ɔ maan, aniaan kun m’ɔ fin Amlɛnkɛn’m be lɔ’n seli kɛ: “Lika m’ɔ yo tɛ kɛ nga sa’n, n nin a wunmɛn i sɔ e aɲia blɛ nun le. Ɔ maan, m’an kwlá sieman n su ndɛ’m be bo kpa. Sanngɛ, aniaan’m be klun ufue’n nin e aniaan tranlɛ’n, ɔ yiɛli i kwlaa nuan. Nanwlɛ, e wla su fiman aɲia nga su le!”

Like kun ekun m’ɔ yoli aniaan’m be fɛ dan mɔ maan be wla fili lika’n i kekle m’ɔ yoli’n su’n, yɛle fluwa Étude perspicace des Écritures mɔ be boli su kɛ w’a fite Polɔɲi aniɛn nun’n. Fluwa kun ekun m’ɔ fiteli m’ɔ yoli be fɛ’n, yɛle fluwa Vivez en gardant à l’esprit le jour de Jéhovah.

Ninnge nga aniaan’m be wla su fiman su’n, be sɔnnin. I wie yɛle aniaan bla Kristina liɛ’n. Kɛ aniaan wie mɔ be fin nvle uflɛ nun’n bé sá be sin’n, ɔ ko guali be atin wie. I waan: “Kɛ é kále e wun’n, aniaan bla kun tɔli min nun. Kpɛkun, ɔ seli min kɛ: ‘Amun yoli e kpa dan! Amun fali aliɛ nin i su nzue ko mannin e, e tranwlɛ lɔ. I sɔ mɔ an tuli amun klun be yoli’n ti’n, é yó amun kwla lele.’” Aɲia’n bo lɔ’n, aofuɛ nga be bali’n b’a kleman be yalɛ lele kɛ bé kó kúnndɛ aliɛ. Kɛ be ti be osu’n nun lɔ’n, aniaan’m be fali be aliɛ’n ko mannin be lɔ. Aniaan nga be dili i sɔ junman’n be nun kun seli kɛ: “E nin a dimɛn i sɔ junman’n le. Cɛn kwlaa e mannin sran 6.500 be aliɛ. Kɛ a wun bakanngan nin kpɛnngbɛn nga bé dí i sɔ junman’n sa’n, ɔ yo ɲɛnmɛn.”

Aniaan bla kun tuli ajalɛ Kɔrzɔvu lɔ lele ɔli Iklɛni lɔ aɲia liɛ’n bo. Ɔ seli kɛ: “Wafa nga e niaan’m be sɔli e nun’n, ɔ yili klolɛ mɔ e klo e wiengu’n i nglo. E siman wie se naan y’a yo be mo.” Annika le afuɛ mɔcuɛ, yɛ ɔ fin Fɛnandi. Ɔ klɛli Polɔɲi lɔ Betɛli’n i fluwa kɛ: “Wafa nga aɲia’n yoli fɛ’n, m’an bumɛn i sɔ laa. Nanwlɛ, Zoova i anuannzɛ’n i nun tranlɛ yo fɛ. Afin, e le aniaan mɛn wunmuan’n nun.”—Jue Mun 133:1.

Ndɛ nga be mɔ be timan Zoova i Lalofuɛ’n be kannin’n

Kwlaa naan aɲia cɛn’n w’a ju’n, aofuɛ wie’m be siesieli be wun be ɔli nvle’n i lika nglanman’m be nianlɛ. Kɛ be juli Alemaɲi lɔ klɔ kun mɔ be flɛ i Bayɛni’n, be ko jrannin lɔ Ɲanmiɛn Sielɛ Blɛ Sua’n i ɲrun lɛ naan be niaan Zoova i Lalofuɛ’m b’a sɔ be nun. Wafa nga be sɔli be nun kɛ sran kun nin i niaan sa’n, ɔ yoli be wie mɔ be timan Zoova i Lalofuɛ mɔ be ɔli wie’n, be ɲɛnmɛn. Aniaan kun seli kɛ: “Kɛ e sali e sin e otɛli lɔ’n, sran ng’ɔ fali e ko nianniannin lika’n seli kɛ e timan kɛ be nga’m be sa. E wlawlali e wun kpa. Kpɛkun, ndɛ nga be mɔ be kle e lika’n be kannin’n, e kwlaa e nantili su. E trannin diin, y’a wunman kɛ sran kun su kpɛ i wiengu nzowa. Wafa nga aofuɛ mɔ be siman be wun laa be kwla ka lɛ tran aniaan tranlɛ kɛ ngalɛ’n sa’n, ɔ boli i nuan dan.”

Aɲia nga be yoli i Pragi lɔ’n i bo’n, aniaan kun i junman liɛ ng’ɔ dili’n yɛle be nga be sɔ zronalifuɛ’m be nun’n. Ɔ seli kɛ: “Mɔnnɛn nnɔsua wia nun’n, polisie nga be nian e aɲia’n su’n be kpɛnngbɛn’n wa wunnin e wun. Ɔ seli kɛ lika’n ti fɔun naan ɔ leman junman diman. Ɔ seli ekun kɛ, sran wie mɔ be tran aɲia yowlɛ’n i wun lɛ’n be usɛli i aɲia’n i su kosan. Kɛ ɔ boli Zoova i Lalofuɛ’m be dunman’n, srɛ kunnin be. Naan w’a se be kɛ: ‘Sɛ sran ngba ti kɛ Zoova i Lalofuɛ’m be sa’n, sran fi su kunndɛman polisie kun.’”

B’a ɲan be ti!

Biblu’n yo maan Klistfuɛ’m be bo yo kun be su Ɲanmiɛn fɔun. (Rɔmfuɛ Mun 14:19; Efɛzfuɛ Mun 4:22-24; Filipfuɛ Mun 4:7) Zoova i Lalofuɛ’m be yili i sɔ liɛ’n i nglo be ngunmin kun aɲia dan sɔ mɔ be yoli be’n, be bo. Be flɛli be aɲia sɔ’n kɛ: “E su wa ɲan e ti!” Zoova i Lalofuɛ’m b’a ɲan be ti mɛn tɛ nga nun. Afin, like nga be flɛ i kɛ sran kpɔlɛ i finwlɛ’n ti’n, ɔ nin sran like yaya yolɛ’n, ɔ nunman be afiɛn. Kusu’n, be ɲin o blɛ mɔ i sɔ ninnge’m be su tranman mɛn’n nun kun’n, i sin.

Be nga be bali aɲia’m be bo’n, be wunnin kɛ kannzɛ Zoova i Lalofuɛ’m be fin nvle fanunfanun’n, sanngɛ be bo ti kun. Kɛ aɲia’m be wieli’n, be yili i sɔ’n i nglo kpa. Yɛle kɛ, be tɔli be wun nun, be cili be wiengu foto. Kɛ ɔ́ yó sɔ’n, nn bé kále be wun. (1 Korɛntfuɛ Mun 1:10; 1 Piɛr 2:17) Kɛ mɔ be si kɛ ɔ ka kaan bé ɲán be ti sa tɛtɛ’n kwlaa nun’n ti’n, kɛ bé sá be sin be awlo nin be asɔnun’m be nun’n, be klun ti jɔwa. Yɛ be fuali kɛ bé nánti ‘ndɛ m’ɔ man nguan’n’ su titi.—Filipfuɛ Mun 2:15, 16.

[Ja ngua lɛ ndɛ’n]

[Kuku/Foto, bue 10]

Aniɛn ablaɔn nin nnun be yiali kɛ sran kunngba sa

[Foto, bue 10]

Aɲia ngwlan nga be yoli be’n be bo lɔ’n, be ijɔli aniɛn nga be kɛn i lika nga be yiali lɛ’n, be nun. Alemaɲi lɔ’n, be ijɔli aniɛn 18 nun. I wie yɛle nga be yoli i Dɔrmund lɔ’n. Be ijɔlɛ Arabu nin Farsi, ɔ nin Pɔtugɛ nin Ɛspaɲi, ɔ nin Risi nun. Flankfɔr lɔ liɛ’n kusu’n, be ijɔli Aflansi nin Angle, ɔ nin Kloasi nin Sɛrbi aniɛn’n nun. Nga kusu mɔ be yoli i Amburg lɔ’n, be ijɔli Alemaɲi nin Danua nin Siedua, ɔ nin Tamili aniɛn’n nun. Kun nga be yoli i Lɛpzig lɔ’n, be ijɔli Polɔɲi nin Sinua, ɔ nin Tirki aniɛn’n nun. Kpɛkun nga be yoli i Miniki lɔ’n, be ijɔli Alemaɲi bobo aniɛn’n nun, ɔ nin Glɛki nin Itali aniɛn’n nun. Pragi lɔ liɛ’n, be ijɔli Angle nin Cɛki, ɔ nin Risi aniɛn’n nun. Bratislava lɔ’n, be ijɔli Angle nin Ɔnglua nin Slovaki, ɔ nin Slovaki bobo aniɛn’n nun. Nga be yoli i Kɔrzɔvu lɔ’n, be ijɔli Iklɛni nin Polɔɲi, ɔ nin Polɔɲi bobo aniɛn’n nin Risi aniɛn’n nun. Yɛ nga be yoli i Pɔznan lɔ’n, be ijɔli Fɛnua nin Polɔɲi aniɛn’n nun.

Aniɛn kwlaa sɔ mɔ be ijɔli be nun’n, be ti ablaɔn nin nnun! Nanwlɛ, be nga be yiali’n be kan aniɛn fanunfanun. Sanngɛ be wun klolɛ’n ti’n, be bo yoli kun.

[Foto, bue 9]

Kɛ be nga be kan Kloasi’n be yiali Flankfɔr lɔ mɔ be ɲannin “Traduction du monde nouveau” be klɔ aniɛn nun’n, ɔ yoli be fɛ dan.