?An fɔnnin Ɲanmiɛn wawɛ’n i wun?
“Sa tɛ’n wie o lɛ be yo ɔ ɔ ti be wie liɛ.”—1 ZAN 5:16.
1, 2. ?Ngue ti yɛ e si kɛ sran kun kwla fɔn Ɲanmiɛn wawɛ’n i wun ɔn?
ALEMAƝIN lɔ bla kun o lɛ’n, ɔ ti Ɲanmiɛn i sufuɛ. Sanngɛ cɛn kun’n, ɔ seli kɛ: “Min klun jɔman. Afin, cɛn kwlaa min klun titi min kɛ n fɔnnin Ɲanmiɛn wawɛ’n i wun.” ?Sanngɛ, Klistfuɛ kun kwla fɔn Ɲanmiɛn wawɛ’n i wun sakpa?
2 Ɛɛn, ɔ kwla yo sɔ. Afin Zezi seli kɛ: ‘Ɲanmiɛn i dunman sacilɛ’n kwlaa ɔ nin sa kwlaa nga sran yo i’n, ɔ́ yáci cɛ́. Sanngɛ Ɲanmiɛn wawɛ’n i dunman sacilɛ liɛ’n, ɔ su yaci cɛman le.’ (Matie 12:31) Biblu’n wla e su nun kɛ: ‘Sɛ e si nanwlɛ’n naan e ɲinfu e yo sa tɛ ekun’n, i sɔ sa liɛ’n ɔ lemɛn i ti nnɛn kun. Like ng’ɔ ka’n m’ɔ yo e sro’n yɛle fɔ nga Ɲanmiɛn wá bú i kpɔfuɛ mun’n, ɔ nin sin sroesroe m’ɔ́ wá rá be’n.’ (Ebre Mun 10:26, 27) Akoto Zan kusu seli kɛ: ‘Sa tɛ’n wie o lɛ be yo ɔ ɔ ti be wie liɛ.’ (1 Zan 5:16) ?Sanngɛ sran kun bɔbɔ yɛ ɔ kwla se kɛ i ‘sa tɛ’n ti i wie liɛ,’ annzɛ ɔ timɛn i wie liɛ ɔ?
Kɛ sa’n yo sran’n i nsisɔ m’ɔ kaci i nzuɛn’n yɛ be yaci cɛ i ɔ
3. ?Sɛ sa tɛ nga e yoli’n bo e wla’n, i sɔ’n kle sɛ?
3 Zoova yɛ ɔ ti Jɔlɛ Difuɛ dan’n niɔn. Ɔ maan, e kwlaa é wá kán sa nga e yoli be’n klé i. Afin i liɛ’n, ɔ yoman sa tɛ mlɔnmlɔn. (Bo Bolɛ 18:25; Rɔmfuɛ Mun 14:12) Zoova yɛ ɔ kwla se kɛ sa tɛ nga e yoli’n, ɔ kwlá yaci cɛman e naan ɔ́ yí i wawɛ’n m’ɔ o e su’n niɔn. (Jue Mun 51:13) Sanngɛ, sɛ sa tɛ nga e yoli’n bo e wla’n, i sɔ’n kle kɛ ɔ yo e nsisɔ naan y’a kaci e nzuɛn’n. ?Ngue yɛ ɔ kle kɛ sa nga sran’n yoli’n yo i nsisɔ naan w’a kaci i nzuɛn’n sakpa ɔ?
4. (a) ?Kɛ be se kɛ sa nga sran’n yoli’n yo i nsisɔ naan w’a kaci i nzuɛn’n, i bo’n yɛle benin? (b) ?Fɔnvɔlɛ ndɛ benin yɛ ɔ o Jue Mun 103:10-14 nun ɔn?
4 Kɛ be se kɛ sran’n w’a kaci i nzuɛn’n, yɛle kɛ ajalɛ ng’ɔ fali m’ɔ yoli sa tɛ’n annzɛ ɔ su wa yo sa tɛ’n, ɔ fɛmɛn i kun. Sa m’ɔ yoli’n, ɔ yo i nsisɔ, yɛ ɔ bo i wla. Sɛ e yoli sa tɛ naan ɔ yoli e nsisɔ naan e kacili e nzuɛn’n sakpa’n, jue tofuɛ’n i ndɛ yɛ’n kwla cici e wla. Ɔ seli kɛ: ‘Zoova nianman e sa tɛ’m be su yoman e sa. Fɔnlɛ nga e fɔn’n, nán i nuan like yɛ ɔ fa yi e su ɔ. Sanngɛ kpa ng’ɔ yo be mɔ be ɲin yi i’n, i dan’n ɔ ti kɛ ɲanmiɛn’n m’ɔ la nglo lɔ plaii’n ɔ fa o asiɛ’n i ti su mmuammua fuun ju’n sa. Ɔ yo maan e nin e sa tɛ mun e afiɛn’n ti nun kɛ wia afiliɛ’n nin wia atɔliɛ’n be afiɛn’n ti nun ju’n sa. Kɛ siɛ kun fa si i mma’m be aunnvuɛ ju’n yɛ Anannganman kusu fa si be mɔ be ɲin yi i’n be aunnvuɛ ɔ. Afin ɔ si like ng’ɔ fa yili e’n. Ɔ o i klun, ɔ si kɛ fa yɛ ɔ fa yili e ɔ.’—Jue Mun 103:10-14.
5, 6. ?Ndɛ cinnjin benin yɛ ɔ o 1 Zan 3:19-22 nun ɔn? Amun yiyi akoto’n i ndɛ sɔ’n nun.
5 Akoto Zan kannin fɔnvɔlɛ ndɛ kunngba’n wie. Ɔ seli kɛ: ‘Sɛ e yo sɔ’n, yɛ é sí kɛ e ti nanwlɛfuɛ ɔ, yɛ e wla’n kwlá gúa ase Ɲanmiɛn ɲrun ɔn. Afin sɛ e klun akunndan’n maan e bu e wun fɔ’n, maan e si kɛ Ɲanmiɛn ti dan tra e klun akunndan’n, yɛ ɔ si sa’n kwlaa. N sran kpa mun, sɛ e si e klun lɔ kɛ y’a yoman sa tɛ’n, e wla’n kwla gua ase Ɲanmiɛn ɲrun. Like kwlaa nga e srɛ i’n, ɔ́ fá mán e yɛle kɛ e fɛ i ndɛ’n su, yɛ e yo sa ng’ɔ jɔ i klun’n.’—1 Zan 3:19-22.
6 Kɛ e klo e niaan Klistfuɛ mun mɔ e faman sa tɛ’n e ciciman e ti’n, yɛ e “si kɛ e ti nanwlɛfuɛ ɔ.” (Jue Mun 119:11) Sɛ sa wie ti’n e bu e wun fɔ’n, maan e si kɛ ‘Ɲanmiɛn ti dan tra e klun akunndan’n, yɛ ɔ si sa’n kwlaa.’ Zoova si e aunnvuɛ. Afin, ɔ si kɛ e ‘kloman e niaan Klistfuɛ mun e nuan bui su.’ Ɔ si kɛ e kloman sa tɛ’n naan e mian e ɲin e yo i klun sa’n. (1 Piɛr 1:22) Ɔ maan, sɛ e lafi Zoova su naan e klo e niaan mun naan e ɲinfu e yoman sa tɛ’n, e klun akunndan’n maan e su ‘buman e wun fɔ.’ E ‘wla’n gúa ase Ɲanmiɛn ɲrun’ yɛ like nga e srɛ i’n, ɔ́ fá mán e. Afin, e fɛ i ndɛ’n su.
Sran wie mɔ be fɔnnin Ɲanmiɛn wawɛ’n i wun
7. ?Ngue yɛ ɔ kle kɛ sa tɛ nga sran kun yo’n, be kwla yaci cɛ i annzɛ be kwlá yaci cɛmɛn i ɔ?
7 ?Sa tɛ benin yɛ sɛ sran kun yo’n, be yaci cɛmɛn i ɔ? Kɛ ɔ ko yo naan y’a wun i wlɛ’n, amun e fa Biblu’n nun sa wie mun naan e nian. I liɛ’n, sɛ e kacili e nzuɛn’n naan e wla te bo e wun’n, sa sɔ mɔ é wá wún be’n, be kwla cici e wla. Asa ekun’n, é wún i wlɛ kɛ nán sa’n i wafa m’ɔ ti’n yɛ be nian be bu sran’n i fɔ annzɛ be yaci cɛ i ɔ. Sanngɛ, sran’n i klun akunndan’n, annzɛ like nga ti yɛ ɔ yoli sa tɛ’n, annzɛ wafa ng’ɔ yoli sa tɛ’n juli’n, yɛ ɔ kle kɛ be kwla yaci i sa tɛ’n cɛ i annzɛ be kwlá yaci cɛmɛn i ɔ.
8. ?Wafa sɛ yɛ Zezi blɛ su’n, Zuifu’m be Ɲanmiɛn sufuɛ kpɛnngbɛn wie’m be fɔnnin Ɲanmiɛn wawɛ’n i wun ɔn?
8 Zezi blɛ su’n, Zuifu’m be Ɲanmiɛn sufuɛ kpɛnngbɛn mɔ be ɲin cili Zezi’n, be fɔnnin Ɲanmiɛn wawɛ’n i wun. Yɛle kɛ, sa nga be man Zoova kɔmin su mɔ Zezi yoli be’n, be wunnin weiin kɛ Ɲanmiɛn wawɛ’n i dunman nun yɛ ɔ yoli be ɔ. Sanngɛ be klunwi’n ti’n, be waan mmusu’m be si Satan i dunman nun yɛ Zezi yo sa mun ɔn. Zezi kusu waan be nga be saci Ɲanmiɛn wawɛ’n i dunman’n, nn b’a yo sa tɛ naan i sɔ sa liɛ’n, Ɲanmiɛn su ‘yacimɛn i blɛ nga nun annzɛ blɛ ng’ɔ́ bá lɔ’n nun.’—Matie 12:22-32.
9. ?Ngue yɛ be flɛ i sran dunman sacilɛ’n niɔn? ?I sɔ liɛ’n i su ndɛ benin yɛ Zezi kannin ɔn?
9 Sran dunman sacilɛ’n, ɔ kwla yo sran’n i suɛn tɔnlɛ annzɛ i nzowa kpɛlɛ. Kɛ mɔ Zoova wawɛ’n fin Zoova bɔbɔ’n ti’n, sran ng’ɔ kpɛ Zoova wawɛ’n i nzowa’n, nn Zoova yɛ w’a kpɛ i nzowa ɔ. Sran ng’ɔ yo sɔ m’ɔ kaciman’n, be yaci cɛmɛn i. Like nga ti yɛ Zezi kɛnnin i sɔ sa tɛ liɛ’n i ndɛ’n yɛle kɛ, be ng’ɔ kan man be’n be ɲinfu be tanndan Ɲanmiɛn wawɛ’n i ɲrun. Be si kɛ Zoova wawɛ’n i dunman nun yɛ Zezi yo sa mun ɔn. Sanngɛ, be seli kɛ sa sɔ’m be fin Satan. I lɛ nun’n, be sacili Ɲanmiɛn wawɛ’n i dunman. I sɔ’n ti’n, Zezi seli kɛ: ‘Sran ng’ɔ saci Ɲanmiɛn wawɛ’n i dunman’n, ɔ su yaci cɛmɛn i le, i sa tɛ’n kɛ́ i wun tititi.’—Mark 3:20-29.
10. ?Ngue ti yɛ Zezi flɛli Zida Iskariɔti kɛ ‘be sieli i kɛ ɔ mlin’ ɔn?
10 Amun e fa Zida Iskariɔti i ndɛ naan e nian. Bian’n ti awiefuɛ. Yɛle kɛ, sika nga be fa guɛ i be bɔlɛ’n nun mɔ be fa mɛn i kɛ ɔ sie’n, ɔ wua wie. (Zan 12:5, 6) Ɔ yoli sɔ lele jɛtɛ ufue 30 ti’n, ɔ yili Zezi mannin Zuifu’m be kpɛnngbɛn mun. Kɛ ɔ yoli sa sɔ’n, ɔ yoli i ya. Sanngɛ, w’a kacimɛn i nzuɛn’n. I sɔ’n ti’n, Zezi flɛli i kɛ ‘sran mɔ be sieli i kɛ ɔ mlin’n.’ Yɛle kɛ, kɛ Zida Iskariɔti wá wú’n, Ɲanmiɛn su cɛnmɛn i.—Zan 17:12; Matie 26:14-16.
Sran wie mɔ b’a fɔnman Ɲanmiɛn wawɛ’n i wun’n
11-13. ?Sa tɛ benin yɛ famiɛn Davidi nin Bat-Seba be yoli ɔ? ?Wafa sɛ yɛ wafa nga Zoova dili be ndɛ sɔ’n, ɔ fɔnvɔ e ɔ?
11 Klistfuɛ wie’m be o lɛ’n, kɛ be yoli sa tɛ’n, asɔnun kpɛnngbɛn’m be fali Biblu’n tinngɛli be. Sanngɛ, cɛn kunngun be wla bo be wun sa sɔ’n ti. (Zak 5:14) Sɛ ɔ yo e sɔ wie’n, be nga be yoli sa tɛ mɔ Biblu’n kle kɛ be yaci cɛli be’n, be ndɛ’n kwla yo e ye kpa. Amun e fa sran sɔ’m be su ndɛ’n naan e nian.
12 Sran sɔ’n kun yɛle famiɛn Davidi. Ɔ nin Iri i yi Bat-Seba yɛ be yoli sa tɛ’n niɔn. Yɛle kɛ, cɛn kun mɔ Bat-Seba wúnnzin’n, Davidi o i sua’n i ti gbagblagba’n su lɔ naan w’a wun i. Bla’n ti klanman kpa. Davidi maan be ko flɛli i naan ɔ nin i b’a la. Kɛ ɔ tili i kɛ Bat-Seba w’a wunnzɛ’n, ɔ yoli naan bla’n nin i wun Iri be la naan i liɛ’n, sa tɛ m’ɔ yoli’n ká bui bo. Kɛ mɔ Iri nin i yi’n b’a laman’n ti’n, Davidi yoli maan be kunnin Iri alɛ’n nun. I sin’n, Bat-Seba yoli Davidi i yi, yɛ ɔ nin i be wuli ba yasua kun. Sanngɛ, ba’n w’a yoman ye.—2 Samiɛl 11:1-27.
13 Zoova dili Davidi nin Bat-Seba be sa tɛ sɔ’n i jɔlɛ. Kɛ mɔ Davidi kacili i nzuɛn’n mɔ kusu Ɲanmiɛn nin i be trali aenguɛ kɛ sielɛ’n su tumɛn i osu’n nun’n ti’n, e kwla se kɛ Ɲanmiɛn buli i sɔ liɛ’n i akunndan. Ɔ maan, ɔ yacili Davidi i sa tɛ’n cɛli i. (2 Samiɛl 7:11-16; 12:7-14) Bat-Seba kusu kwla kacili i nzuɛn’n wie. Ɔ maan, Ɲanmiɛn yoli i ye. Yɛle kɛ, ɔ wuli Salomɔn m’ɔ yoli famiɛn’n. Kpɛkun, ɔ yoli Zezi Klist i nannan. (Matie 1:1, 6, 16) Sa sɔ’n kle kɛ sɛ e yo sa tɛ naan e kaci e nzuɛn’n, Zoova yáci cɛ́ e.
14. ?Wafa sɛ yɛ famiɛn Manase i su ndɛ’n kle kɛ Ɲanmiɛn kwla yaci sran kun i sa tɛ’n cɛ i ɔ?
14 Sran kun ekun mɔ Zoova yacili i sa tɛ’n cɛli i’n yɛle Manase m’ɔ yoli Zida famiɛn’n. Manase yoli like ng’ɔ yoman Zoova fɛ’n. Yɛle kɛ, ɔ kplannin Baali i sɔwlɛ mun nin “nglo lɔ ninnge’m be sɔwlɛ mun sɛsɛsɛ.” I tɛ kpa bɔbɔ’n yɛle kɛ, ɔ kplannin be Ɲanmiɛn i sua’n i awlo klun nɲɔn’m be nun. Ɔ fɛli i mma mun yili tɛ. Ɔ yoli maan Zida nin Zerizalɛmufuɛ’m be ‘sa tɛ liɛ’n trali nvle nga Anannganman nunnunnin be Izraɛlifuɛ’m be ɲrun’n be liɛ’n.’ Ndɛ nga Ɲanmiɛn nuan ijɔfuɛ’m be kan kleli i’n, w’a faman su. I sɔ’n ti’n, Ɲanmiɛn maan Asiri famiɛn’n wa tɔli i su, ɔ trɛli i lomuɛn ɔli. Kɛ ɔ́ wún i ɲrun’n, ɔ kɛnnin i wun ase. Ɔ kpan flɛli Ɲanmiɛn kɛ ɔ si i aunnvuɛ. Ɲanmiɛn kusu yacili Manase i sa tɛ’n cɛli i. Ɔ fɛli i sɛli i sin Zerizalɛmu yɛ ɔ fɛli i sieli i famiɛn i osu’n nun. I sin’n, Manase takali Ɲanmiɛn i sulɛ’n ekun.—2 Be Nyoliɛ 33:2-17.
15. ?Ngue yɛ akoto Piɛli yoli m’ɔ kle kɛ Zoova yaci sran’n i wun sa cɛ i “wein” ɔn?
15 Zezi blɛ su’n, akoto Piɛli yoli sa tɛ dan kun. Yɛle kɛ, ɔ seli kɛ ɔ siman Zezi. (Mark 14:30, 66-72) Sanngɛ, Zoova yacili Piɛli i wun sa’n cɛli i “wein.” (Ezai 55:7) ?Ngue ti ɔ? Afin, Piɛli kacili i nzuɛn’n. (Lik 22:62) I sin’n, Ɲanmiɛn kleli kɛ ɔ yacili Piɛli i sa tɛ’n cɛli i wein sakpa. Yɛle kɛ, pantekɔtu cɛn nun’n, Ɲanmiɛn maan Piɛli kannin Zezi i ndɛ juejue su kleli sran mun. (Sa Nga Be Yoli’n 2:14-36) ?Sɛ laa Ɲanmiɛn yacili i sufuɛ sɔ’m be sa tɛ’n cɛli be’n, andɛ Klistfuɛ mɔ be kaci be nzuɛn’n be sa tɛ liɛ’n yɛ ɔ su yaci cɛman be ɔ? Jue tofuɛ waan: ‘?Anannganman, sɛ ɔ waan á nían tɛ nga e yo’n, wan cɛ yɛ ɔ ka lɛ ɔ ɔ́ yó e ɔ? Afin wɔ yɛ a yaci sran i wun sa cɛ i ɔ.’—Jue Mun 130:3, 4.
Wafa nga e kwla yaci kokolɛ kɛ y’a fɔn Ɲanmiɛn wawɛ’n i wun’n
16. ?Ngue yɛ kɛ sa tɛ yofuɛ yo’n, Ɲanmiɛn yaci i sa tɛ’n cɛ i ɔ?
16 Sa nga y’a dun mmua kan be ndɛ lɛ’n, be kle kɛ e kwla yaci kokolɛ kɛ y’a fɔn Ɲanmiɛn wawɛ’n i wun. Afin, Zoova yaci sa tɛ yofuɛ ng’ɔ kaci i nzuɛn’n, i sa tɛ’n cɛ i. Sanngɛ, ɔ fata kɛ e tu e klun e srɛ Ɲanmiɛn. Sɛ e yoli sa tɛ’n, e ti kpɔlɛ tɛ mɔ Zezi yili’n nin kpa mɔ Zoova yo e’n, ɔ nin fɔ m’ɔ o e nun’n nin Ɲanmiɛn junman mɔ e di i klanman’n be ti’n, e kwla srɛ Ɲanmiɛn kɛ ɔ si e aunnvuɛ. Sɛ e yo sɔ’n, e kwla lafi su kɛ Zoova m’ɔ ti aklunyefuɛ’n, ɔ́ yáci e sa tɛ’n cɛ́ e.—Efɛzfuɛ Mun 1:7.
17. ?Sɛ e yo sa tɛ naan e kunndɛ kɛ be uka e’n, ngue yɛ ɔ fata kɛ e yo ɔ?
17 ?Sɛ e waan é srɛ́ Ɲanmiɛn naan sanngɛ sa tɛ mɔ e yoli’n ti’n e kwlá srɛman nin? I lɛ nun’n, Zezi i sɔnnzɔnfuɛ Zaki seli kɛ: ‘Sɛ amun nun wie wunnɛn yo i ya’n, maan ɔ flɛ asɔnun kpɛnngbɛn mun. Maan be guɛ i su ngo e Min’n i dunman nun yɛ be srɛ Ɲanmiɛn kɛ ɔ yo i juejue. Ɲanmiɛn su mɔ be lafi’n ti’n, Ɲanmiɛn srɛlɛ sɔ’n maan tukpacɛfuɛ sɔ’n ɲɛ́n i ti, yɛ e Min’n maan ɔ́ jáso. Yɛ sɛ ɔ yoli sa wie’n, ɔ́ yáci cɛ́ i.’—Zak 5:14, 15.
18. ?Kannzɛ be tu sa tɛ yofuɛ kun asɔnun nun’n, ngue ti yɛ i sɔ’n kleman kɛ be kwlá yaci cɛmɛn i kun ɔn?
18 Kannzɛ sran kun yo sa tɛ naan be tu i asɔnun’n nun bɔbɔ’n, i sɔ’n kleman kɛ be kwlá yacimɛn i sa tɛ’n cɛmɛn i kun. Amun e nian Klistfuɛ kun m’ɔ yoli sa tɛ laa Korɛnti lɔ mɔ be tuli i asɔnun nun’n, i ndɛ mɔ Pɔlu kannin’n. Ɔ seli kɛ: ‘Fɔ nga amun nun kpanngban lika an fa tuli sran sɔ’n ɔ ju i. Ɔ maan an yaci i wun sa cɛ i, an yo maan i wla gua ase, sɛ w’a yoman sɔ ɔ, ɔ cɛman naan awlaboe’n w’a kun i.’ (2 Korɛntfuɛ Mun 2:6-8; 1 Korɛntfuɛ Mun 5:1-5) Sanngɛ, sa tɛ yofuɛ nga be kunndɛ kɛ be nin Zoova be afiɛn’n mántan’n, ɔ fata kɛ be flɛ asɔnun kpɛnngbɛn mun naan be fa Biblu’n uka be naan be kle kɛ b’a kaci be nzuɛn’n. Ɔ fata kɛ be ‘yo sa kpa m’ɔ kle kɛ b’a kaci be nzuɛn’n.’—Lik 3:8.
19. ?Ngue yɛ ɔ kwla uka e naan y’a ‘jran kekle y’a lafi Ɲanmiɛn su’ ɔ?
19 ?Ngue ti yɛ sran kun kwla bu i kɛ w’a fɔn Ɲanmiɛn wawɛ’n i wun ɔn? Like nga ti yɛ ɔ yo sɔ’n yɛle kɛ, ɔ kunndɛman kɛ ɔ́ yó sa tɛ bɔɔ kaan sa, annzɛ kusu ɔ timan juejue. Sɛ ɔ yo e sɔ naan e srɛ Ɲanmiɛn naan e fa blɛ e lo wunmiɛn’n, i sɔ’n kwla yo e ye kpa. Kusu’n, nán e lo e wun man Satan naan ɔ bubu e sa sin naan e yaci Ɲanmiɛn sulɛ. Kɛ Zoova o lɛ’n, ɔ kunndɛman kɛ sa tɛ yofuɛ’n mlin. Ɔ maan, sɛ i sufuɛ kun mlin’n, ɔ yomɛn i fɛ kaan sa. I sɔ’n ti’n, sɛ e klun titi e kɛ y’a fɔn Ɲanmiɛn wawɛ’n i wun’n, nán e yaci Ɲanmiɛn Ndɛ’n i suanlɛ. I li Jue Mun be kwla cici e wla kpa. Asa ekun’n, maan e wɔ asɔnun aɲia’m be bo yɛ e bo jasin fɛ’n i titi. Sɛ e yo sɔ’n, é kwlá ‘jrán kekle é láfi Ɲanmiɛn su.’ Kpɛkun, é kwlá yáci kokolɛ kɛ y’a yo sa tɛ naan be kwlá yaci cɛman e.—Tit 2:2.
20. ?Ngue yɛ sran kun kwla yo naan w’a wun i wlɛ kɛ w’a fɔnman Ɲanmiɛn wawɛ’n i wun ɔn?
20 Sran kwlaa nga i klun titi i kɛ w’a fɔn Ɲanmiɛn wawɛ’n i wun’n, ɔ kwla usɛ i wun kosan yɛ mun: ‘?N sacili Ɲanmiɛn wawɛ’n i dunman? ?Sa tɛ nga n yoli mɔ min waan n kacili min nzuɛn’n, n kacili i sakpa? ?N lafi su kɛ Ɲanmiɛn yaci sa tɛ mun cɛ? ?Sran m’ɔ nin Ɲanmiɛn b’a bu’n i wie yɛle min?’ Atrɛkpa’n, i sɔ kosan’m be kwla uka sran’n, ɔ maan ɔ́ wún i wlɛ kɛ w’a saciman Ɲanmiɛn wawɛ’n i dunman annzɛ ɔ nin Ɲanmiɛn b’a buman. Sanngɛ, ɔ kacili i nzuɛn naan ɔ te lafi Zoova su. Sɛ ɔ ti sɔ’n, nn w’a fɔnman Zoova wawɛ’n i wun.
21. ?Kosan benin yɛ like suanlɛ ng’ɔ́ bá lɛ’n wá tɛ́ be su ɔ?
21 Nanwlɛ, kɛ e wun i wlɛ wein kɛ y’a fɔnman Ɲanmiɛn wawɛ’n i wun’n, e wla gua ase dan! Sanngɛ, e kwla usa e wun kɛ: ‘?Ɲanmiɛn wawɛ’n sie min? ?Sa nga Ɲanmiɛn wawɛ’n maan sran yo’n, n yi i nglo min nantilɛ’n nun?’ Like suanlɛ ng’ɔ́ bá lɛ’n wá tɛ́ kosan sɔ’m be su.
?Amún tɛ́ su sɛ?
• ?Ngue ti yɛ e kwla se kɛ sran kun kwla fɔn Ɲanmiɛn wawɛ’n i wun ɔn?
• ?Kɛ be se kɛ sran’n w’a kaci i nzuɛn’n i bo’n yɛle benin?
• ?Wan mun yɛ Zezi blɛ su be fɔnnin Ɲanmiɛn wawɛ’n i wun ɔn?
• ?Wafa sɛ yɛ e kwla yaci kokolɛ kɛ y’a yo sa mɔ be kwlá yaci cɛman ɔn?
[Foto, bue 8]
Kannzɛ Piɛli seli kɛ ɔ siman Zezi’n, sanngɛ i sa tɛ sɔ’n timan sa mɔ be kwlá yaci cɛman ɔn.