?Wan yɛ ɔ nin Ɲanmiɛn o nun sakpa ɔ?

AKOTO PƆLU seli kɛ: ‘Be nga klɔ sran ninnge’n lo be’n, bé wú, sanngɛ be nga Ɲanmiɛn wawɛ’n i ninnge’n lo be’n, bé ɲán nguan nin alaje.’ (Rɔmfuɛ Mun 8:6) Pɔlu ndɛ ng’ɔ kɛn i lɛ’n kle kɛ wafa nga sran nin Ɲanmiɛn be afiɛn’n fa ti’n, ɔ ti i nguan like. Ɔ maan, nán like nga sran’n bɔbɔ klo i’n yɛ maan ɔ nin Ɲanmiɛn be afiɛn’n yó kpa. ?Ɔ maan, kɛ be se kɛ sran nga Ɲanmiɛn ninnge’m be lo i’n, ɔ ‘ɲan nguan nin alaje’n’ i bo’n yɛle benin? Biblu’n kle kɛ sran ng’ɔ nin Ɲanmiɛn o nun’n, ɔ di alaje kɛ é sé yɛ’n. Yɛle kɛ i wun fɛ i feke, ɔ nin Ɲanmiɛn be afiɛn mantan kpa liɛ su. Yɛ cɛn wie lele’n, ɔ́ ɲán anannganman nguan. (Rɔmfuɛ Mun 6:23; Filipfuɛ Mun 4:7) I sɔ’n ti’n, kɛ Zezi seli kɛ ‘be nga be si kɛ be di Ɲanmiɛn ninnge’m be yalɛ’n, be liɛ su ti ye’n,’ i sɔ’n boman e nuan!—Matie 5:3.

Fluwa nga amún kánngan nun yɛ’n kle kɛ Ɲanmiɛn ninnge’m be lo amun. I sɔ’n kusu ti ngwlɛlɛ ayeliɛ. Sanngɛ, sran ng’ɔ nin Ɲanmiɛn o nun’n, annzɛ ɔ nin i nunman nun’n, i su akunndan nga be bu’n, ɔ ti fanunfanun. Ɔ maan, amun kwla usa amun wun kɛ: ‘?Kɛ be se kɛ sran kun nin Ɲanmiɛn o nun’n, i bo’n yɛle benin? ?Kusu wafa sɛ yɛ sran kun kwla yo naan Ɲanmiɛn ninnge’m b’a lo i ɔ?’

‘E Min’n i akunndan’n’

Akoto Pɔlu kleli kɛ sɛ Ɲanmiɛn ninnge’m be lo e’n, ɔ ti kpa yɛ e kwla ɲan su. Sanngɛ w’a kaman ngalɛ’n su. Yɛle kɛ, wafa nga sran kun kwla kle kɛ Ɲanmiɛn ndɛ’n lo i sakpa’n, ɔ kɛnnin i ndɛ wie. Ngbaciɛ ng’ɔ o sran nga Ɲanmiɛn ninnge’m be lo i’n, ɔ nin sran nga Ɲanmiɛn ninnge’m be lomɛn i’n be afiɛn’n, Pɔlu yiyili nun kleli Korɛnti lɔ Klistfuɛ mun. Ɔ seli kɛ sran ng’ɔ nin Ɲanmiɛn nunman nun’n, yɛle sran nga klɔ sran ninnge’m be lo i’n. Sanngɛ, sran ng’ɔ nin Ɲanmiɛn o nun’n, Ɲanmiɛn ninnge’m be lo i. Ɔ seli kɛ: ‘Klɔ sran’n m’ɔ o sa’n, ɔ faman Ɲanmiɛn wawɛ ninnge’m be su, afin be ti i ɲrun sinnzin like.’ Sanngɛ, Pɔlu kan gua su kɛ sran ng’ɔ nin Ɲanmiɛn o nun’n, like nga be fa sie i nzɔliɛ’n yɛle kɛ ɔ nin ‘Klist be akunndan’n ti kun.’—1 Korɛntfuɛ Mun 2:14-16.

Kɛ be se kɛ e bu ‘Klist i akunndan’n’ i bo’n yɛle kɛ e ‘bu akunndan kunngba nga Klist buli’n wie.’ (Filipfuɛ Mun 2:5) Ɔ maan, sran ng’ɔ nin Ɲanmiɛn o nun’n, i akunndan’n yo kɛ Klist liɛ’n sa wie. Ɔ nanti Klist i ajalɛ’n su. (1 Piɛr 2:21; 4:1) Kɛ sran sɔ’n bú Klist i akunndan’n wie kɔ́ i ɲrun’n, nn ɔ nin Ɲanmiɛn be afiɛn’n mántan kpa trá laa’n. Kɛ ɔ yo sɔ’n, ɔ kwla ɲan “nguan nin alaje.”—Rɔmfuɛ Mun 13:14.

Wafa nga e kwla si ‘Klist i akunndan’n’

Sɛ e waan e akunndan’n yo kɛ Klist liɛ’n sa’n, ɔ fata kɛ e si Klist i akunndan sɔ’n. Ɔ maan, ajalɛ klikli ng’ɔ fata kɛ e fa’n, yɛle kɛ maan e si Klist i akunndan bulɛ wafa’n. ?Sanngɛ sran m’ɔ trannin asiɛ’n su wa i afuɛ 2.000 tra su yɛ’n, é yó sɛ naan y’a si i akunndan’n? ?Be nga be trannin e nvle nun laa’n, wafa sɛ yɛ e si be su like ɔ? ?Nán kɛ e kanngan be su fluwa nga be kleli’n niɔn? I kunngba’n yɛ ɔ fata kɛ e yo i Zezi su ɔ. Yɛle kɛ, maan e kanngan Zezi i su ndɛ nga be klɛli be’n, naan y’a si i akunndan’n.—Zan 17:3.

Zezi i jasin fɛ nga Matie nin Marki nin Liki nin Zan be klɛli’n, be kwla uka e naan y’a si Zezi kpa. Sɛ e kanngan be nun naan e bu be su akunndan kpa’n, é sí Zezi i akunndan’n nin i nzuɛn’n. Sɛ bɔbɔ e ti Klistfuɛ naan e yo sɔ’n, i sɔ’n úka e naan ‘ye mɔ e Min’n m’ɔ ti e Defuɛ’n yo e’n ti’n, bé wún kɛ y’a yo sran, yɛ bé wún kɛ e nin i tran naan e si i kpa.’—2 Piɛr 3:18.

Siɛn’n, maan e fa fluwa nnan sɔ mun naan e yiyi be nun ndɛ mma wie’m be nun. I liɛ’n, é wún like ti mɔ Ɲanmiɛn ninnge’m be lo Zezi’n. Kɛ é yó sɔ’n, maan e nian like nga e ko yo naan y’a nanti i ajalɛ’n su’n.—Zan 13:15.

Sran ng’ɔ nin Ɲanmiɛn o nun’n, ‘ɔ yo sa nga Ɲanmiɛn wawɛ’n maan sran yo’n’

Zezi Klist i jasin fɛ mɔ Liki klɛli’n kle kɛ, kɛ be yoli Zezi i batɛmu’n, Ɲanmiɛn wawɛ’n jrɛli i su, yɛ ‘Ɲanmiɛn wawɛ’n sieli i.’ (Lik 3:21, 22; 4:1) Zezi kusu seli i sɔnnzɔnfuɛ mun kɛ ɔ fata kɛ ‘Ɲanmiɛn wawɛ’n’ sie be. (Bo Bolɛ 1:2; Lik 11:9-13) ?Ngue ti yɛ i sɔ’n ti cinnjin ɔn? Afin, Ɲanmiɛn wawɛ’n kwla kaci sran kun i akunndan’n, ɔ maan i akunndan’n yo kɛ Klist liɛ’n sa. (Rɔmfuɛ Mun 12:1, 2) Ɲanmiɛn wawɛ’n maan sran ‘klo Ɲanmiɛn nin sran, i klun jɔ, i wla gua ase, ɔ tra i awlɛn, ɔ yo sran ye, ɔ yo aklunye, ɔ di nanwlɛ, ɔ yo wɛtɛɛ, yɛ ɔ yo sa i nuan su.’ Biblu’n flɛ sa sɔ mun kɛ ‘sa nga Ɲanmiɛn wawɛ’n maan sran yo’n.’ Sran ng’ɔ nin Ɲanmiɛn o nun’n, i sɔ’n fite i nzuɛn’n nun. (Galasifuɛ Mun 5:22, 23) Ɔ maan, sɛ e waan é kɛ́n i kpe’n, é sé kɛ sran ng’ɔ nin Ɲanmiɛn o nun’n, Ɲanmiɛn wawɛ’n sie i.

Kɛ Zezi bó jasin fɛ’n, ɔ yili sa nga Ɲanmiɛn wawɛ’n maan sran yo’n, i nglo titi. Be nga sran’m be buman be wie’n, ɔ buli be sran. Ɔ yili i sran klolɛ’n nin i sran ye yolɛ’n nin i aklunye’n i nglo kpa liɛ su. (Matie 9:36) Amun e nian sa kun mɔ akoto Zan kɛnnin i ndɛ’n. I waan: ‘Kɛ Zezi sín’n, ɔ wunnin aɲinsifuɛ kun mɔ be wuli i nin i’n.’ Bian sɔ’n, Zezi i sɔnnzɔnfuɛ’m be wunnin i wie. Sanngɛ, be liɛ be waan ɔ ti sa tɛ yofuɛ. Ɔ maan, be usali Zezi kɛ: ‘?I bɔbɔ yoli sa wie annzɛ i si nin i nin be yoli sa wie ti yɛ be wuli i sɔ ɔ?’ Aɲinsifuɛ sɔ’n i tranfuɛ’m be liɛ’n, be waan nán sran ɔn, naan like yɛ ɔ srɛsrɛ ɔ. Be seli kɛ: ‘?Nán bian’n m’ɔ tran le sa srɛsrɛ ninnge’n yɛ?’ Sanngɛ Zezi liɛ’n, ɔ wunnin kɛ ɔ fata kɛ be uka bian’n. Ɔ maan, ɔ nin i ijɔli yɛ ɔ yoli i juejue.—Zan 9:1-8.

?Sa sɔ’n kle kɛ Zezi i akunndan’n ti sɛ? I klikli’n yɛle kɛ, Zezi yoman afɛfuɛ’m be finfin. Sanngɛ, ɔ si be aunnvuɛ dan kpa. I nɲɔn su’n, i bɔbɔ fa ajalɛ uka sran mun, be srɛmɛn i. ?Amun nanti Zezi i ajalɛ sɔ’n su? ?Amun bu sran mun kɛ Zezi bu be’n sa? ?Amun uka be naan b’a yo kpa naan b’a lafi su kɛ cɛn wie lele bé ɲán be ti? ?Annzɛ be nga be dunman w’a fu’n yɛ amun ɲin o be su, kpɛkun be nga be ti afɛfuɛ’n, amun ɲin kpa be su? Sɛ amun bu sran mun kɛ Zezi fa bu be’n sa’n, nn amun su nanti i ajalɛ’n su.—Jue Mun 72:12-14.

Sran ng’ɔ nin Ɲanmiɛn o nun’n, ɔ nin i be koko yalɛ

Zezi i jasin fɛ nga be klɛli’n, be kle kɛ Zezi nin i si be kokoli yalɛ titi. (Mark 1:35; Lik 5:16; 22:41) I nun m’ɔ o asiɛ’n su wa’n, ɔ fali blɛ naan ɔ nin i si b’a koko yalɛ. Zezi i sɔnnzɔnfuɛ Matie seli kɛ: ‘Kɛ ɔ mannin sran’m be atin mɔ be ɔli’n, i ngunmin ɔli oka’n su lɔ kɛ ɔ nin Ɲanmiɛn be ko koko yalɛ.’ (Matie 14:23) Yalɛ sɔ m’ɔ nin i Si m’ɔ o ɲanmiɛn su lɔ’n be koko’n, ɔ maan ɔ ɲannin wunmiɛn. (Matie 26:36-44) Andɛ kusu’n, sran ng’ɔ nin Ɲanmiɛn o nun’n, ɔ fa blɛ naan ɔ nin Ɲanmiɛn b’a koko yalɛ. Afin, ɔ si kɛ i sɔ’n úkɛ i kpa. Yɛle kɛ, ɔ nin Ɲanmiɛn be afiɛn’n mántan kpa trá laa’n, kpɛkun i akunndan’n yó kɛ Klist liɛ’n sa.

Ɔ juli wie’n, Zezi srɛli Ɲanmiɛn cɛli kpa. (Zan 17:1-26) I wie yɛle kɛ, kwlaa naan w’a kpɛ i sɔnnzɔnfuɛ 12, ɔ ‘ɔli oka kun su kɛ ɔ́ kó srɛ́ Ɲanmiɛn, ɔ srɛli Ɲanmiɛn lele aliɛ’n cɛnnin i.’ (Lik 6:12) Kannzɛ e su srɛman Ɲanmiɛn lele aliɛ’n cɛnman e’n, sanngɛ sran ng’ɔ nin Ɲanmiɛn o nun’n, ɔ nanti Zezi i jalɛ’n su. Sɛ i waan ɔ́ fá ajalɛ cinnjin kpa kun’n, ɔ fa blɛ kpanngban srɛ Ɲanmiɛn. Ɔ kunndɛ kɛ Ɲanmiɛn wawɛ’n kle i atin naan ajalɛ ng’ɔ́ fá’n w’a kle kɛ ɔ nin Ɲanmiɛn o nun.

Kɛ Zezi nin Ɲanmiɛn bé kókó yalɛ’n, ɔ kɛn i klun ndɛ. Ɔ fata kɛ e niɛn i liɛ’n su. Wafa nga Zezi srɛli Ɲanmiɛn kɔnguɛ kasiɛn nga be kunnin i’n i nun’n, Liki fluwa’n fa e ɲin sie su. I waan: ‘Kɛ i awlaboe’n yó dan’n, ɔ miɛn i ɲin kan ndɛ kle Ɲanmiɛn cinnjin kpa, nvufle kpa’n tu i pataa, nvufle sɔ’n ɔ kaci kɛ mmoja sa, ɔ gua srosrosrosro.’ (Lik 22:44) Zezi tuli i klun srɛli Ɲanmiɛn titi. Sanngɛ, wafa ng’ɔ tuli i klun srɛli Zoova blɛ nga liɛ nun’n, ɔ ti i liɛ ngunmin. Yɛle kɛ sa kekle m’ɔ́ wá tɔ́ i su sɛ́ i nían’n ti’n, ɔ ‘miɛnnin i ɲin’ srɛli Ɲanmiɛn. Ɔ maan, Ɲanmiɛn tili i srɛlɛ’n. (Ebre Mun 5:7) Sran ng’ɔ nin Ɲanmiɛn o nun’n, kɛ ɔ yo sɔ wie ɔ. Kɛ sa kekle kpa tɔ i su’n, ɔ ‘miɛn i ɲin’ srɛ Ɲanmiɛn naan Ɲanmiɛn wawɛ’n kle i atin naan ɔ suɛn i bo.

E kwla se kɛ, kɛ be se kɛ sran kun nin Ɲanmiɛn be koko yalɛ’n, yɛle Zezi liɛ’n. Ɔ maan, sɛ i sɔnnzɔnfuɛ’m be yoli sɔ’n, ɔ fataman kɛ ɔ bo e nuan. Be seli i kɛ: ‘Nannan, kle e sran nin Ɲanmiɛn be yalɛ kokolɛ’n.’ (Lik 11:1) Andɛ kusu’n, be nga Ɲanmiɛn ninnge lo be mɔ be kunndɛ kɛ Ɲanmiɛn wawɛ’n uka be’n, ajalɛ nga Zezi kleli i Ɲanmiɛn srɛlɛ’n su’n yɛ be fa ɔ. Sran ng’ɔ nin Ɲanmiɛn o nun’n, ɔ nin Ɲanmiɛn be koko yalɛ.

Sran ng’ɔ nin Ɲanmiɛn o nun’n, ɔ bo jasin fɛ’n

Zezi i jasin fɛ nga Marki klɛli’n, ɔ kannin kɛ cɛn kun’n, Zezi yoli tukpacifuɛ’m be juejue lele aliɛ’n fa sannin. Kɛ i aliɛ cɛnnin’n, nglɛmuin ndɛ kpa mɔ i kunngba o lɔ srɛ́ Ɲanmiɛn’n, i sɔnnzɔnfuɛ’m b’a ba. Be wa seli i kɛ sran’m b’a ba kpanngban naan be su kunndɛ i. Atrɛkpa’n, be kunndɛ kɛ ɔ yo be juejue. Sanngɛ Zezi kan kleli i sɔnnzɔnfuɛ’m be kɛ: ‘An maan e wɔ klɔ nga be mantanmantan wa’n be su naan n kan ndɛ lɔ wie.’ Kpɛkun, Zezi yiyi nun kɛ: “Afin i sɔ’n ti yɛ m bali ɔ.” (Mark 1:32-38; Lik 4:43) I yo, sran’m be juejue yolɛ’n ti Zezi cinnjin. Sanngɛ, junman bɔbɔ nga ti yɛ ɔ bali asiɛ’n su wa’n, yɛle Ɲanmiɛn Sielɛ’n i jasin fɛ’n i bolɛ.—Mark 1:14, 15.

Andɛ kusu’n, sɛ bé síe sran kun i nzɔliɛ kɛ ɔ bu Klist i akunndan wie’n, nn ɔ bo Ɲanmiɛn Sielɛ’n i jasin fɛ’n. Zezi se i sɔnnzɔnfuɛ’m be kwlaa kɛ: ‘An wɔ ko kle nvlenvle’n kwlaa be like maan be kaci n sɔnnzɔnfuɛ. Yɛ like kwlaa nga n kleli amun’n, amun kusu an kle be maan be fa su.’ (Matie 28:19, 20) Asa ekun’n, Zezi dun mmua kɛnnin i kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’ (Matie 24:14) Ɲanmiɛn Ndɛ’n kle kɛ Ɲanmiɛn wawɛ’n ti yɛ e kwla bo jasin fɛ’n niɔn. Ɔ maan, sɛ e tu e klun e bo jasin fɛ’n juejue su wie’n, i sɔ’n kle kɛ e nin Ɲanmiɛn o nun.—Sa Nga Be Yoli’n 1:8.

Sɛ e waan jasin fɛ’n ndɛ’n tru mɛn wunmuan’n nun’n, ɔ fata kɛ sran kpanngban kpa be di i sɔ junman liɛ’n kusu mɛn wunmuan’n nun. (Zan 17:20, 21) Be nga be di i sɔ junman liɛ’n, ɔ fata kɛ be yo sran mɔ Ɲanmiɛn ninnge mun lo be ɔ. Sanngɛ kusu’n, ɔ fata kɛ junman sɔ’n, be siesie i sɛsɛsɛ naan w’a yoman sukusuku. ?Be nga be fa Zezi i ajalɛ sɔ’n su mɔ be bo Ɲanmiɛn Sielɛ i jasin fɛ’n mɛn wunmuan’n nun’n, amun kwla sie be nzɔliɛ?

?Wafa sɛ yɛ e si kɛ e nin Ɲanmiɛn o nun ɔn?

Ninnge uflɛ o lɛ mɔ sran ng’ɔ nin Ɲanmiɛn o nun’n, ɔ yo ɔ. ?Sanngɛ nga y’a wun be yɛ’n, wafa sɛ yɛ e kwla kle kɛ e yo i sɔ liɛ’n niɔn? Sɛ e waan é wún i wlɛ’n, maan e usa e wun kɛ: “?N kanngan Ɲanmiɛn ndɛ mɔ yɛle Biblu’n nun cɛn kwlaa, yɛ n bu su akunndan? ?Sa nga Ɲanmiɛn wawɛ’n maan sran yo’n, n yi i nglo min nzuɛn’n nun? ?Min nin Ɲanmiɛn e koko yalɛ titi? ?N kunndɛ kɛ ń bó Ɲanmiɛn Sielɛ’n i jasin fɛ’n kɛ mɛn wunmuan nun be nga be bo’n sa?”

Sɛ e bu i sɔ kosan’m be sin kpa’n, ɔ́ úka e maan sɛ e nin Ɲanmiɛn o nun’n, é wún i wlɛ. E wla amun fanngan kɛ an fɛ i sɔ ajalɛ mun ikisa naan be nga bé wá ɲán ‘nguan nin alaje’n,’ amun dunman tɛ be nun.—Rɔmfuɛ Mun 8:6; Matie 7:13, 14; 2 Piɛr 1:5-11.

[Kuku/Foto mun, bue 5]

SRAN NG’Ɔ NIN ƝANMIƐN O NUN’N

◆ Ɔ klo Ɲanmiɛn Ndɛ’n

◆ Ɔ yo sa nga Ɲanmiɛn wawɛ’n maan sran yo’n

◆ Ɔ tu i klun ɔ nin Ɲanmiɛn koko yalɛ titi

◆ Ɔ bo Ɲanmiɛn Sielɛ’n i jasin fɛ’n