An bu akunndan kunngba nga Klist buli’n wie
“An bu akunndan kunngba nga Krist-Jésus buli’n wie.”—FILIPFUƐ MUN 2:5.
1. ?Ngue ti yɛ ɔ fata kɛ e kunndɛ kɛ é bú akunndan kunngba nga Klist buli’n wie ɔ?
ZEZI KLIST seli kɛ: “An bla min sin, [...] an fa min nzuɛn’n su, afin n ti sran wɛtɛɛ yɛ nin anwlɛn’n ti flɔlɔ. Yɛ amun wla wá gúa ase.” (Matie 11:28, 29) Sran’m be yialɛ nga Zezi yia be klolɛ su’n sɔ’n, ɔ yi akunndan ng’ɔ bu’n i nglo. Klɔ sran fi kwlá kleman e ajalɛ kpa kɛ ngalɛ’n sa. Kannzɛ bɔbɔ Zezi ti Ɲanmiɛn Wa naan ɔ le ɲrun nin kwlalɛ kpa’n, sanngɛ ɔ sili sran’m be aunnvuɛ. I li be nga afɛ’n o be su’n, yɛ ɔ sili be aunnvuɛ dan’n niɔn.
2. ?Zezi i su ninnge benin yɛ é wá wún be ɔ?
2 Like suanlɛ nga, ɔ nin nɲɔn nga bé bá lɔ’n be nun’n, é wá wún wafa nga e nin “Krist ye akunndan’n” kwla yo kun’n, ɔ nin wafa nga e kwla yo sɔ titi’n. (1 Korɛntfuɛ Mun 2:16) É dún mmua é fá e ɲin é síe i like nnun su: Zezi i wɛtɛɛ m’ɔ ti’n, ɔ nin i wun ase kanlɛ’n, ɔ nin i klun ufue’n yɛ i ɲin m’ɔ yi Ɲanmiɛn’n. Kpɛkun i yakpa’n nin i sran klolɛ m’ɔ leman wunsu’n.
Maan e suan Klist i wɛtɛɛ yolɛ’n
3. (a) ?Be wun ase kanlɛ’n su like benin yɛ Zezi kleli i sɔnnzɔnfuɛ mun ɔn? (b) ?Kɛ Zezi i sɔnnzɔnfuɛ’m be kpɔnzɔli’n, ngue yɛ ɔ yoli ɔ?
3 Zezi m’ɔ ti Ɲanmiɛn i Wa mɔ fɔ nunmɛn i nun’n, ɔ kplinnin su kɛ ɔ́ bá asiɛ’n su wa naan ɔ́ wá dí junman klɔ sran mɔ fɔ o be nun mɔ be ti sa tɛ yofuɛ’n be afiɛn. Sran sɔ’m be nun wie’m bé wá kún i. Ɔ nin i sɔ ngba’n, Zezi dili aklunjuɛ titi kpɛkun ɔ trɛli i awlɛn. (1 Piɛr 2:21-23) Kɛ fɔ ng’ɔ o e wiengu’m be nun’n, ɔ nin sa tɛ nga be yo’n be kan e’n, sɛ ‘e kpɛ e nyin nian’ Zezi’n, é kwlá yó sɔ wie. (Ebre Mun 12:2) Zezi seli i sɔnnzɔnfuɛ’m be kɛ ‘be fa be ti wlɛ i kɔmin su waka’n bo’ naan be niɛn i nzuɛn’n su. (Matie 11:29) ?Ngue yɛ be kwla suan ɔn? Like kun mɔ be kwla suan’n, yɛle kɛ Zezi ti sran wɛtɛɛ, kpɛkun kannzɛ bɔɔ i sɔnnzɔnfuɛ’m be fɔn sɛ’n, sanngɛ ɔ trɛ i awlɛn be lika. Kɔnguɛ kasiɛn naan Zezi w’a wu’n, ɔ wunnzinnin i sɔnnzɔnfuɛ’m be ja wun fa kleli be wafa nga be ‘anwlɛn’n [kwla yo] flɔlɔ’n.’ I sɔ ajalɛ liɛ’n, be wla su fiman su le. (An kanngan Zan 13:14-17 nun.) I sin’n, kɛ Piɛli nin Zaki yɛ Zan be ‘nyin [w’a kwlá] tranman su’n,’ Zezi wunnin kɛ be lemɛn i wun fanngan ti ɔ. Ɔ usali kɛ: “?Simɔn, w’a lafi?” Kpɛkun ɔ seli kɛ: “Maan amun nyin tran su, yɛ amun nin Nyanmiɛn an koko yalɛ naan lakafuɛ’n w’a laka-man amun. Amun anwlɛn’n wo su kɛ amún yó, sanngɛ an lɛ-mɛn i wun fanngan.”—Mark 14:32-38.
4, 5. ?Wafa sɛ yɛ ajalɛ nga Zezi kle e’n, ɔ kwla uka e naan kɛ e niaan’m be fɔn’n y’a yo like ng’ɔ fata’n niɔn?
4 Aniaan wie’m be klo kɛ bé dún mmua like kwlaa nun annzɛ be ya falɛ yoman ya. Annzɛ kusu afɔtuɛ nga asɔnun kpɛnngbɛn mun annzɛ “sran kpa nanwlɛfuɛ b’ɔ si ngwlɛlɛ’n” be man’n i su falɛ’n nun’n, be cuɛncuɛn be ja ase. ?Sɛ ɔ yo sɔ’n ngue yɛ e yo ɔ? (Matie 24:45-47) Fɔ m’ɔ o sran’n nun ti’n, sɛ Satan i mɛn nunfuɛ’m be yo sa kun’n, e wun i wlɛ yɛ e yaci e cɛ be. Sanngɛ sɛ e niaan mun yɛ be yo sɔ’n i yaci cɛlɛ’n kwla yo kekle man e. Sɛ fɔ ng’ɔ o e wiengu’m be nun’n, ɔ lo e ngasi ndɛndɛ’n, maan e usa e wun kɛ: ‘?Wafa sɛ yɛ e nin “Krist ye akunndan’n” kwla yo kun kpa ɔ?’ Nán maan e wla fi su kɛ kannzɛ Ɲanmiɛn ninnge’m be nun’n, ɔ ju wie’n Zezi i sɔnnzɔnfuɛ’n be fɔnnin’n, sanngɛ w’a fa yoman ndɛ.
5 E nian akoto Piɛli liɛ’n. Kɛ Zezi seli i kɛ ɔ fin mmeli’n nun jra naan ɔ nanti nzue’n su to i lɔ’n, ɔ nantili nzue’n su kan. Kpɛkun kɛ ɔ wunnin kɛ aunmuan’n ti dan’n, yɛ ɔ boli mlɔnlɛ bo ɔ. ?Kɛ ɔ yoli sɔ’n Zezi fali ya seli kɛ: “Ɔ ti kpa man wɔ! Á fá tú ɔ wun fɔ’n nun”? Cɛcɛ! “Jésus tinngɛ i sa’n sɔli i nun, yɛ ɔ usɛli i kɛ: ‘A lafi-man n su kpa. ?Nguɛ ti yɛ a lafi-man n su kpa-a?’” (Matie 14:28-31) ?Sɛ e wun weiin kɛ e niaan kun lafiman Ɲanmiɛn su kpa’n, sɛ é kwlá sé’n e kwla tinngɛ e sa’n e ukɛ i naan w’a lafi Ɲanmiɛn su kpa? I sɔ’n ti Zezi i awlɛn flɔlɔ m’ɔ yili i nglo Piɛli i lika’n, i su afɔtuɛ kpa kun.
6. ?Ngue yɛ Zezi kleli i akoto mun sran dan yolɛ’n su ɔ?
6 Zezi i akoto nga be sili sran ng’ɔ ti be nun dan’n i su akplowa’n, Piɛli o be nun wie. Zaki nin Zan be seli Zezi kɛ i Sielɛ’n Blɛ’n nun’n, maan be nun kun trɛn i fama su naan kun trɛn i bɛ su. Kɛ Piɛli nin akoto nga’m be tili’n, be fali ya. Zezi si kɛ wafa nga be tali be’n, i ti yɛ be kwla bu i sɔ akunndan liɛ’n niɔn. Ɔ flɛli be yɛ ɔ seli be kɛ: “An si kɛ nvle wie’m be famiɛn’m be mian-mian be sran mun, yɛ sran dandan’m be tin be sran’m be su. Amun liɛ’n su yo-man sɔ, sanngɛ amun nun sran ng’ɔ klo kɛ ɔ́ yó dan’n, maan ɔ su i wiengu mun, yɛ amun nun sran ng’ɔ klo kɛ ɔ́ yó su kpɛn’n, maan ɔ yo i wiengu’m be kanga.” I sin’n, ɔ kɛnnin i bɔbɔ i ajalɛ’n i ndɛ. I waan: “M bɔ n kacili Sran’n kɛ m balɛ’n ɔ ti sɔ-ɔ, afin m’an ba-man kɛ be su min, sanngɛ m bali kɛ ń sú sran, naan ń fá min wun kpɔ́ sran sunman be ti.”—Matie 20:20-28.
7. ?Wafa sɛ yɛ e tinuntinun e kwla yo naan bo kun yolɛ’n w’a tran asɔnun’n nun ɔn?
7 Sɛ e bu Zezi i wun ase kanlɛ’n i su akunndan’n, ɔ kwla uka e naan y’a ‘yo e wun kaan’ e niaan’m be afiɛn. (Lik 9:46-48) I sɔ yolɛ nun’n, maan e bo yo kun. Zoova m’ɔ ti kɛ awlobo dan kun i su kpɛnngbɛn’n sa’n, ɔ kunndɛ kɛ i mma’m be ‘tran likawlɛ.’ (Jue Mun 133:1) Zezi srɛli i Si naan Klistfuɛ kpa’m be bo yo kun. I liɛ’n, ‘mɛn nunfuɛ’m bé sí kɛ i yɛ ɔ sunmɛnnin i ɔ, yɛ ɔ klo be kɛ ɔ fa klo i’n sa.’ (Zan 17:23) Sɛ e bo ti kun’n, sran’m bé wún i wlɛ kɛ e ti Klist i sɔnnzɔnfuɛ. Sɛ e kunndɛ kɛ e bo yo kun kusu’n, ɔ fata kɛ e nian fɔ ng’ɔ o e niaan’m be nun’n kɛ nga Klist fa yoli’n sa. Zezi yacili sa nga sran’m be yoli’n cɛli be. Yɛ ɔ kleli kɛ saan sɛ e yaci sa nga sran’m be yo e’n cɛ be’n, yɛ Ɲanmiɛn yó i sɔ e lika wie ɔ.—An kanngan Matie 6:14, 15 nun.
8. ?Ngue yɛ be nga be su Ɲanmiɛn w’a cɛ’n be ajalɛ’n kle e ɔ?
8 Be nga be boli Klist i sɔnnzɔnlɛ bo w’a cɛ kpa’n, sɛ e nian be liɛ’n su’n, ɔ kwla uka e wie. Kɛ Zezi sa’n, Ɲanmiɛn i sufuɛ sɔ’m be wun i wlɛ kɛ fɔ o be wiengu’m be nun. Be wunnin i wlɛ kɛ sran’m be aunnvuɛ silɛ kɛ nga Klist fa yoli’n sa’n, ɔ uka e naan e mɔ e wun sa wlɛ’n, y’a ‘uka be nga be wun-mɛn i wlɛ kpa’n.’ Sanngɛ nɛ́n i ngba ɔ. I sɔ’n kusu yo maan e bo yo kun. Asa ekun’n, ɔ wla asɔnun wunmuan’n i nunfuɛ’m be fanngan maan be bu akunndan nga Klist bu’n, i su akunndan. Like kunngba nga akoto Pɔlu kunndɛli kɛ Klistfuɛ nga be o Rɔmu lɔ’n be ɲɛn i’n, yɛ be kunndɛ kɛ be niaan’m be ɲɛn i wie ɔ. Yɛle kɛ: “Maan Nyanmiɛn b’ɔ wla sran fanngan b’ɔ maan be tra be anwlɛn’n, ɔ maan amun akunndan’n yo kun kɛ Krist-Jésus bɔbɔ kle ye kɛ e yo’n sa. [Yɛle kɛ an bu akunndan kunngba nga Krist-Jésus buli’n wie.] Maan amun bo yo kun sɔ naan amun kwlaa an yi e Min Jésus-Krist i Si Nyanmiɛn’n i ayɛ.” (Rɔmfuɛ Mun 15:1, 5, 6) Nanwlɛ e bo m’ɔ yo kun Zoova i sulɛ’n nun’n, ɔ mɛnmɛn i.
9. ?Ngue ti yɛ ɔ fata kɛ e ɲan Ɲanmiɛn wawɛ’n naan y’a kwla sɔnnzɔn Zezi ɔ?
9 Zezi waan ‘anwlɛn flɔlɔ’n,’ ɔ nin wɛtɛɛ yolɛ’n m’ɔ ti like nga Ɲanmiɛn wawɛ’n maan sran yo’n i nun kun’n, be kɔ likawlɛ. I sɔ’n ti’n, kɛ é súan Zezi i ajalɛ’n, ɔ fata kɛ e ɲan Zoova i wawɛ’n naan y’a kwla sɔnnzɔn i kɛ ng’ɔ nin i fata’n sa. Maan e srɛ Ɲanmiɛn naan ɔ fɛ i wawɛ’n man e, yɛ e mian e ɲin naan e yo sa nga Ɲanmiɛn wawɛ’n maan sran yo’n. Sa nga Ɲanmiɛn wawɛ’n maan sran yo’n sɔ’n, “ɔ maan be klo Nyanmiɛn nin sran, be klun jɔ, be wla gua ase, be tra be anwlɛn, be yo sran ye, be yo aklunye, be di nanwlɛ, be yo wɛtɛɛ, yɛ be yo sa i nuan su.” (Galasifuɛ Mun 5:22, 23) Sɛ e fa be wun ase kanlɛ nin wɛtɛɛ yolɛ’n be su ajalɛ nga Zezi kleli e’n su’n, Zoova m’ɔ ti e Si m’ɔ o ɲanmiɛn su lɔ’n i klun jɔ́ e wun.
Zezi yili i klun ufue’n i nglo i wiengu’m be lika
10. ?Wafa sɛ yɛ Zezi yili i klun ufue’n i nglo ɔ?
10 Sa nga Ɲanmiɛn wawɛ’n maan sran yo’n i nun kun yɛle aklunye yolɛ’n. Zezi yoli sran’m be klun ufue titi. Sran kwlaa nga be tuli be klun be kunndɛli Zezi’n, be wunnin kɛ “ɔ sɔli be nun [“klanman,” NW].” (Lik 9:11) ?Ngue yɛ Zezi i aklunye’n kle e ɔ? Sran klun ufuefuɛ’n, ɔ klo sran, i wun yo fɛ. Kɛ Zezi ti sɔ ɔ. Ɔ sili sran’m be aunnvuɛ “afin be ti afɛfuɛ yɛlɛ kɛ b’a bo je kɛ bua bɔ be lɛ-man sunianfuɛ’n sa.”—Matie 9:35, 36.
11, 12. (a) An kan blɛ kun mɔ i nun’n Zezi yili aunnvuɛ silɛ’n i nglo’n i ndɛ. (b) ?Ngue yɛ ndɛ nga e wunnin i lɛ’n ɔ kle e ɔ?
11 Zezi w’a siman sran’m be aunnvuɛ sa ngbɛn, sanngɛ ɔ yoli like ng’ɔ kwla yo’n naan w’a uka be’n. Maan e fa ndɛ nga e nian. Mannza tɛnndɛn tɔli bla kun wun w’a di afuɛ lele 12. Ɔ si kɛ Moizi mmla’n nun’n, i tukpacɛ’n ti’n i bɔbɔ nin sran nga be kɛn i’n, be kwlá yoman be Ɲanmiɛn sulɛ’n nun ninnge wie mun. (Saun Yolɛ 15:25-27) Sanngɛ ndɛ nga be kɛn i Zezi su’n, ɔ nin wafa nga Zezi fa yo sran mun ti’n, bla’n lafili su kɛ ɔ kwla yo i juejue. Naan ɔ́ yó i juejue sakpa. Ɔ seli kɛ: “Sɛ n kwla kɛn i tralɛ’n bɔ cɛ’n, ń yó juejue.” Ɔ trɛli i awlɛn ko yoli sɔ, kpɛkun ɔ wunnin i kɛ w’a yo juejue.
12 Zezi sili kɛ sran kun kɛnnin i. Ɔ kpɛli i ɲin kunndɛli sran sɔ’n. Bla’n bu i kɛ be su wa tutu i afin w’a fɔn mmla’n. Srɛ kunnin i, i wun usuli i, yɛ ɔ wa kotoli Zezi bo naan w’a di i kwlaa nanwlɛ w’a kle i. ?Zezi tutuli bla aunnvuɛfuɛ sɔ mɔ ɲrɛnnɛn o i su’n? W’a yoman sɔ kaan sa! Ɔ guali bla’n i awlɛn su nzue seli kɛ: “N wa, Nyanmiɛn su bɔ a lafi’n ti, w’a nyan ɔ ti. Gua ɔ wla ase, kɔ.” (Mark 5:25-34) Nanwlɛ, ndɛ kɛ ngalɛ’n sa’n ɔ fɔnvɔli bla’n kpa!
13. (a) ?Wafa sɛ yɛ Zezi i like yolɛ’n, ɔ nin Farizifuɛ’m be liɛ’n timan kun ɔn? (b) ?Wafa sɛ yɛ Zezi nin ba kanngan’m be trannin ɔn?
13 Klist w’a fɛmɛn i kwlalɛ’n w’a tinman i wiengu’m be su le kɛ Farizifuɛ klunwifuɛ’m be sa. (Matie 23:4) Sanngɛ ɔ fali Zoova i mmla’n kleli sran mun amanniɛn su, yɛ ɔ trɛli i awlɛn be lika. Zezi nin i sɔnnzɔnfuɛ’m be trannin klanman. Ɔ kloli be titi yɛ ɔ yoli be janvuɛ kpa. (Nyanndra Mun 17:17; Zan 15:11-15) Ba kanngan’m be bɔbɔ’n, Zezi i wun yoli be fɛ yɛ be kusu be wun yoli Zezi fɛ wie. W’a seman kɛ ɔ ɲɛnmɛn i ti. Sanngɛ ɔ yacili like ng’ɔ su yo’n i yolɛ ɔ maan be kwla bɛli i wun. Cɛn kun’n, i sɔnnzɔnfuɛ mɔ be te bu be wun sran dan kɛ Ɲanmiɛn sulɛ wafa’m be su kpɛnngbɛn’m be sa’n, be waan nán sran’m be fa be mma’m be wɔ Zezi wun lɔ naan ɔ kan be. I sɔ’n w’a yoman Zezi i fɛ. Ɔ seli be kɛ: “An yaci ba kanngan’m be nun maan be bla n sin, nán an fuan be, afin be bɔ be yo be wun kɛ ba kanngan nga mun sa’n, be yɛ Nyanmiɛn sie be-ɔ.” Kpɛkun ɔ fali ba kan kun kɛ ɔ́ fá klé be like cinnjin kpa kun. Ɔ seli be kɛ: “Nanwlɛ, sran ng’ɔ yo-mɛn i wun kɛ bakan sa, b’ɔ fɛ-mɛn i wun man-man Nyanmiɛn kɛ ɔ sie i’n, ɔ su yo-man mɛn nga Nyanmiɛn sie’n i nunfuɛ mlɔnmlɔn.”—Mark 10:13-15.
14. ?Sɛ be nian ba kanngan’m be lika’n, ngue mmlusuɛ yɛ be ɲɛn i ɔ?
14 Kɛ ba kanngan sɔ’m bé wá ɲín mɔ bé wla kpɛ́n su kɛ Zezi Klist ‘to i sa blali be, ɔ fɛ i sa fuafuali be su, yɛ ɔ yrali be nguan’n,’ wafa nga be wie’m be wun fá yó be’n, maan e bu i akunndan kan e nian. (Mark 10:16) Andɛ kusu ba kanngan nga kpɛnngbɛn mun nin sran uflɛ’m be nian be lika kpa’n, bé wlá kpɛ́n be su klanman. I ng’ɔ ti cinnjin kpafuɛ’n yɛle kɛ ba nga asɔnun’n nun be nian be lika be kaan nun kpa’n, be si kɛ Zoova i wawɛ’n wo i sran’m be su.
Maan e yi e klun ufue’n i nglo mɛn tɛ nga nun
15. ?Ngue ti yɛ andɛ’n, sɛ sran’m be timan aklunyefuɛ’n, ɔ fataman kɛ ɔ bo e nuan ɔn?
15 Andɛ’n, sran sunman be bu i kɛ be ɲanman be ti naan b’a yo aklunye. Suklu lɔ o, junman su lɔ o, kɛ Zoova i sufuɛ’m bé tú ajalɛ o, annzɛ jasin fɛ’n bolɛ nun o, sran’m be yo be tɛ. Klunwi nga be yo e’n, ɔ kwla bubu e sa sin. Sanngɛ ɔ fataman kɛ i sɔ liɛ’n bo e nuan. Afin Zoova maan Pɔlu kannin kɛ, kɛ mɛn’n “kɔ́ i bue nuan’n,” sran’m bé “bú be bɔbɔ be wun akunndan, [...] be su klo-man sran.” I sɔ sran mun yɛ Klistfuɛ kpa’m be nin be bé trán ɔn.—2 Timote 3:1-3.
16. ?Aklunye m’ɔ ti Klistfuɛ’m be nzuɛn’n, wafa sɛ yɛ e kwla yi i nglo asɔnun’n nun ɔn?
16 Asɔnun’n i nun tranlɛ’n, ɔ man e aunjuɛ tra mɛn tɛ’n i nun tranlɛ’n. Sɛ e tinuntinun e nian Zezi i ajalɛ’n su’n, e kwla yo naan asɔnun’n i nun tranlɛ w’a yo fɛ. ?Wafa sɛ yɛ e kwla yo sɔ ɔ? Tukpaciɛ nin sa kekle wie’m be ti’n, asɔnun’n nun’n, ɔ fata kɛ e uka aniaan sunman naan e wla be fanngan. Mɛn’n ‘i bue nuan’ nga nun’n, sa wafa sunman sɔ’m bé sɔ́n, sanngɛ nán blɛ yɛ b’a ju su ɔ. Afin laa’n nun’n, Klistfuɛ’m be wunnin i sɔ ɲrɛnnɛn kunngba’n wie. Ɔ maan, kɛ nga laa be fa ukali Klistfuɛ mun kɛ ɔ nin i fata’n sa’n, andɛ kusu’n ɔ fata kɛ e uka Klistfuɛ nga sa o be su’n wie. I wie yɛle like nga Pɔlu fa wlali Klistfuɛ’m be fanngan kɛ be yo’n. Ɔ seli kɛ: “An wla be nga be anwlɛn sɔ-man’n be yakpa, an uka be nga be lɛ-man wunmiɛn’n, an tra amun anwlɛn sran’m be kwlaa be wun.” (1 Tɛsalonikfuɛ Mun 5:14) Sɛ e waan é yó sɔ’n, ɔ fata kɛ aklunye m’ɔ ti Klistfuɛ’m be nzuɛn’n, i yolɛ’n kaci e junman.
17, 18. ?Ninnge benin wie’m be nun yɛ e kwla yi e aklunye’n i nglo kɛ Zezi liɛ’n sa ɔ?
17 Ɔ fata kɛ Klistfuɛ’m be ‘sɔ be niaan’m be nun klanman.’ Yɛle kɛ wafa nga sɛ ɔ ti Zezi’n nn, ɔ́ fá yó be’n, maan be yo be sɔ. Maan be nga be si be w’a cɛ’n, ɔ nin be nga be siman be’n, be ndɛ lo be. (3 Zan 5-8) Kɛ nga Zezi fali ajalɛ sili i wiengu’m be aunnvuɛ sa’n, e kusu kɛ e wiengu’m be o e wun’n, maan be wla gua ase.—Ezai 32:2; Matie 11:28-30.
18 Kɛ sa o e wiengu wie su naan e yo like kun e fa kle kɛ i ndɛ lo e naan e wun i wlɛ kɛ sa o i su’n, i sɔ’n nun’n e kle kɛ e ti aklunyefuɛ. Maan e kunndɛ i sɔ yolɛ’n i wun atin naan e yo i sakpa. Pɔlu seli kɛ: “An klo amun wun kpa kɛ sran nin i niaan sa, an dun mmua bu amun wiengu sran.” (Rɔmfuɛ Mun 12:10) Ndɛ sɔ’n i bo’n yɛle kɛ e kwlakwla e wla e wun ase e fa Klist i ajalɛ’n su, e si e wiengu’m be aunnvuɛ, e yo be ye. E yo sɔ naan y’a “klo-man Nyanmiɛn nin sran e nuan bui su.” (2 Korɛntfuɛ Mun 6:6) Ɲanmiɛn nin sran klolɛ wafa sɔ mɔ Klistfuɛ’m be yi i nglo’n, Pɔlu kɛnnin i ndɛ kɛ: “Sran b’ɔ klo sran’n, ɔ trɛ i anwlɛn sran wun, sran b’ɔ klo sran’n, ɔ yo aklunye, yɛ i nyin blo-man sran like su, sran b’ɔ klo sran’n, ɔ di-man tutre, ɔ tu-mɛn i wun.” (1 Korɛntfuɛ Mun 13:4) Ɔ fataman kɛ e fa sa wie mɔ e niaan’m be yoli e’n, e sie e klun. Sanngɛ maan e nian afɔtuɛ nga su. I waan: “An yo amun wun ye, an si amun wun aunnvuɛ, sa nga amun wiengu yo amun’n, an yaci cɛ i kɛ Nyanmiɛn kusu yaci sa nga an yoli i’n cɛli amun Krist ti’n sa.”—Efɛzfuɛ Mun 4:32.
19. ?Aklunye m’ɔ ti Klistfuɛ nzuɛn’n sɛ e yi i nglo’n, mmlusuɛ benin yɛ e ɲɛn i ɔ?
19 E ɲin mɔ e mian naan blɛ kwlaa nun y’a kunndɛ sran i ye yolɛ’n i wun atin naan y’a yo i nuan su like sakpa’n, e ɲan su mmlusuɛ kpanngban. I sɔ’n ti’n, Zoova wawɛ’n kwlá dí junman kpa asɔnun’n nun, yɛ ɔ́ kwlá yó maan sran ngba kwlá yí sa nga Ɲanmiɛn wawɛ maan sran yo’n be nglo. Asa ekun’n, kɛ e nanti Zezi i ajalɛ’n su mɔ e uka e wiengu mun mɔ be yo sɔ wie’n, e bo m’ɔ yo kun e su Ɲanmiɛn aklunjuɛ su’n, ɔ yo maan Ɲanmiɛn i klun jɔ. I sɔ’n ti’n, cɛn kwlaa e mian e ɲin naan e nin e wiengu mun e tranlɛ’n nun’n, e yo wɛtɛɛfuɛ nin aklunyefuɛ kɛ Zezi sa.
?Amun kwla yiyi nun?
• ?Wafa sɛ yɛ Zezi kleli kɛ ɔ ‘ti sran wɛtɛɛ yɛ i anwlɛn’n ti flɔlɔ’ ɔ?
• ?Wafa sɛ yɛ Zezi yili i aklunye’n i nglo ɔ?
• ?Mɛn tɛ nga nun’n, wafa sɛ yɛ e yi Klistfuɛ nzuɛn kɛ wɛtɛɛ nin aklunye yolɛ’n be nglo ɔ?
[Foto, bue 11]
?Sɛ aniaan kun kpɔnzɔ i Ɲanmiɛn sulafilɛ’n nun kɛ Piɛli sa’n, é úkɛ i?
[Foto, bue 13]
?Wafa sɛ yɛ e kwla yo naan aklunye yolɛ’n w’a tran asɔnun’n nun ɔn?