Zoova kacimɛn i ndɛ ng’ɔ kan’n

Ezekiɛl fluwa’n i nun ndɛ cinnjin mun—akpasua 2

E O AFUƐ nga be flɛ i 609 nun ka naan y’a ju Zezi blɛ su’n, i Desamblu anglo’n nun. Babilɔni famiɛn’n bali kɛ ɔ́ wá sáci Zerizalɛmu klɔ’n i mlɔnmlɔn siɛn’n. Blɛ sɔ nun’n, ndɛ nga Ezekiɛli kan kle be nga be trali be lomuɛn ɔli Babilɔni’n, ɔ taka Zerizalɛmu nvle mɔ be klo i’n, i utulɛ nin i sacilɛ’n i su. Sanngɛ siɛn’n, ndɛ nga Ɲanmiɛn maan Ezekiɛli kan’n, ɔ kan sa ng’ɔ́ wá tɔ́ nvle nga be suman Ɲanmiɛn mɔ kɛ ɲrɛnnɛn’n wá tɔ́ Ɲanmiɛn nvle’n su’n, bé srí i’n, be ndɛ. Kɛ Babilɔnifuɛ’m be bo sin yiali Zerizalɛmu klɔ’n, i anglo 18 m’ɔ́ jú’n yɛ be utuli ɔ. Kɛ ɔ yoli sɔ’n, ndɛ nga Ezekiɛli kannin’n, ɔ kacili ekun. Yɛle kɛ, ɔ kannin Ɲanmiɛn i sulɛ kpa’n i takalɛ uflɛ mɔ bé wá tɛ́kɛ i klanman’n, i ndɛ.

Ezekiɛl 25:1–48:35 kan nvle nga be sin yia Izraɛli’n, ɔ nin Ɲanmiɛn i nvle’n, i delɛ’n be ndɛ.a Wafa nga sa’m be fa su be wun su tɛɛn annzɛ be kan ndɛ kunngba’n, i su yɛ be niannin be klɛli ɔ. Saan ndɛ ng’ɔ o Ezekiɛl 29:17-20 nun’n, yɛ ɔ ti i liɛ ngunmin kan ɔn. Yɛle kɛ sa nga be dun mmua kannin’n ɔ nin ng’ɔ o yɛ’n, be suman be wun su. Ezekiɛl fluwa’n o Ɲanmiɛn i ndɛ’n nun wie. I sɔ’n ti’n, i nun ndɛ’m ‘be kaciman, ɔ maan sran’m be kaci.’—Ebre Mun 4:12.

‘MƐN NGA WÁ KÁCI KƐ EDƐNI FIE’N SA’

(Ezekiɛl 25:1–39:29)

Zoova si ndɛ nga Amɔnfuɛ nin Moabufuɛ nin Edɔmufuɛ nin Filistifuɛ nin Tirfuɛ nin Sidɔnfuɛ’m bé wá kɛ́n i Zerizalɛmu i sacilɛ’n su’n. I sɔ’n ti’n, ɔ seli Ezekiɛli kɛ ɔ kan ndɛ wie kle be. Ezipti nvle liɛ’n, bé fɛ́n i bo ninnge’n kwlaa. ‘Ezipti famiɛn’n nin i sran kpanngban mun’ mɔ be fa be sunnzun Liban lɔ Sɛdri waka’n, ‘saan Babilɔni i tokofi’n ɔ́ kán be.’—Ezekiɛl 31:2, 3, 12; 32:11, 12.

Kɛ be sacili Zerizalɛmu nvle’n, afuɛ nga be flɛ i 607 nun ka naan y’a ju Zezi blɛ su nun’n, i anglo nsiɛn su’n, sran kun mɔ kɛ bé útu Zerizalɛmu klɔ’n ɔ fiteli nun’n, ɔ wa seli Ezekiɛli kɛ: “Klɔ’n w’a bo!” I sɔ nun’n, nn Ezekiɛli timan ‘bobo kun.’ Ɔ kwla kan ndɛ kle be nga be trali be lomuɛn ɔli’n. (Ezekiɛl 33:21, 22) Ɔ fata kɛ ɔ kan Ɲanmiɛn nuan ndɛ’n. Zoova waan ɔ́ ‘wá síe be su bua sunianfuɛ kun, sran sɔ’n yɛle i sufuɛ Davidi.’ (Ezekiɛl 34:23) Edɔmu nvle liɛ’n, bé wá sáci i mlɔnmlɔn. Sanngɛ, nvle ng’ɔ o i sin lɔ mɔ yɛle Zida’n, ɔ́ ‘wá káci kɛ Edɛni fie’n sa.’ (Ezekiɛl 36:35) Zoova ta nda kɛ ɔ́ wá sɛ́sɛ́ i nvlefuɛ nga be sali be sin’n, naan ‘Gɔgu’ su yoman be like fi.—Ezekiɛl 38:2.

Ɲanmiɛn ndɛ’n i su kosan’m be su tɛlɛ:

29:8-12—?Blɛ benin nun yɛ be sacili Ezipti nvle’n m’ɔ dili afuɛ 40 ɔ? Kɛ be sacili Zerizalɛmu afuɛ nga be flɛ i 607 nun ka naan y’a ju Zezi blɛ su’n, Zidafuɛ nga be kali lɛ’n, be wanndi ɔli Ezipti mɛn’n nun lɔ. Sanngɛ nn Ɲanmiɛn nuan ijɔfuɛ Zeremi seli kɛ nán be wɔ. (Zeremi 24:1, 8-10; 42:7-22) Nán lɔ mɔ bé kɔ́’n ti yɛ bé wánndi famiɛn Nɛbikadnɛzar i bo ɔ. Afin, ɔ́ wá útu Ezipti nvle’n. Kɛ ɔ yoli sɔ’n yɛ Ezipti nvle’n kali srolo afuɛ ablanan ɔn. Kannzɛ sran’m b’a kanman utulɛ nga Babilɔni nvle’n utuli Ezipti nvle’n i ndɛ’n, sanngɛ e kwla lafi su kɛ ɔ yoli sɔ sakpa. Afin, ndɛ ng’ɔ fin Zoova nuan fite’n, sɛ ɔ ti sran’n nn saan ɔ́ yó nga ti yɛ ɔ sunmɛnnin i’n.—Ezai 55:11.

29:18—?Wafa sɛ yɛ ‘alɛ kunfuɛ’m be ti’m be kpa mɔ be wati su’m be su w’a kplokplo ɔ?’ Tir klɔ dan’n i falɛ’n w’a yoman blɛblɛ w’a manman famiɛn Nɛbikadnɛzar i sonja mun. Blɛ sɔ nun’n, kɛ mɔ sonja’m be alɛ kle’n o be ti su m’ɔ kpita be ti’n su’n ngboko’n, i ti yɛ be seli kɛ sonja’m be ti’n kpali ɔ. Trɔ nga be suɛli i be wati su be ɔli klɔ’n i wun talɛ’n i silɛ’n, ɔ kpitali be wati su. I ti yɛ be kan kɛ be wati’n su’n kplokplo’n niɔn.—Ezekiɛl 26:7-12.

Afɔtuɛ ng’ɔ man e’n:

29:19, 20. Kɛ Tirfuɛ’m bé wánndi kó fía be nvle nga nzue sin yia i’n i su’n, be fali be bo ninnge mun ɔli. Ɔ maan, kɛ famiɛn Nɛbikadnɛzar fali Tir nvle’n, ninnge ng’ɔ ɲannin be’n w’a sɔnman. Kannzɛ Nɛbikadnɛzar tu i wun yɛ ɔ sɔ amuin’n, sanngɛ Zoova yoli i ye. Yɛle kɛ ɔ fali Ezipti fa mɛn i kɛ ‘ɔ yo i sonja’m be akatua nga bé ɲɛ́n i’n.’ ?I sɔ’n ti’n, ɔ nin i fataman kɛ e yo kɛ Ɲanmiɛn sa naan junman nga awa di man e’n ti’n, e tua e lapo’n? Nán maan e se kɛ, kɛ mɔ be nga be sie e’n, be ti tɛ naan e siman like nga bé fá lapo’n be yo’n ti’n, e tuaman e lapo mun.—Rɔmfuɛ Mun 13:4-7.

33:7-9. Andɛ’n, be nga be kpali be sieli be ngunmin be onga’n, be nzɔliɛ yɛle sran nga be sieli i kɛ gladi difuɛ sa Izraɛli su’n. Be nga be kpali be sieli be ngunmin be onga sɔ’n, be nin be ukafuɛ sran kpanngban kpa’m be faman Ɲanmiɛn Sielɛ’n i jasin fɛ’n bolɛ’n, be kanman ngowa. Be kan kle sran mun kɛ ‘ɲrɛnnɛn dan’n’ w’a mantan koko.—Matie 24:21.

33:10-20. Sɛ e waan é ɲán ti cɛn wie’n, ɔ fata kɛ e kpalo sa tɛ yolɛ’n naan e nanti Ɲanmiɛn i atin’n su. Afin, Ɲanmiɛn i atin’m be “ti kpa.”

36:20, 21. Kɛ Izraɛlifuɛ mɔ be ti ‘Zoova i nvle nunfuɛ’n’ b’a nantimɛn i ndɛ’n su’n, be sacili i dunman’n. E liɛ’n, ɔ fataman kɛ e yo Zoova sufuɛ e nuan bui su.

36:25, 37, 38. Ɲanmiɛn ninnge’m be nun mɛn klanman nga e o nun andɛ’n, e ti kɛ ‘nnɛn nga be fa be kɛ bé fá yí tɛ mɔ lɛ nunman be nun’n,’ be sa. I sɔ’n ti’n, ɔ fata kɛ e mian be ɲin e yo sanwun titi.

38:1-23. Kɛ Gɔgu m’ɔ fin Magɔgu mɛn’n nun’n wá kúnndɛ kɛ ɔ́ yó Zoova i sufuɛ’m be like yaya’n, Zoova su yacimɛn be lɛ. Saan ɔ́ dé be. I sɔ’n jɔ e klun. Kɛ be fuannin mmusu’m be si Satan m’ɔ ‘sie mɛn nga’n,’ dunman nga be fa tɔnnin i’n yɛle Gɔgu’n. Magɔgu mɛn’n yɛle lika nga be fuannin Satan nin i mmusu mun guali be asiɛ’n i nvɛn wun wa’n.—Zan 12:31; Sa Nglo Yilɛ 12:7-12.

“NIAN LIKE NGA N FA KLE WƆ’N SU KPA”

(Ezekiɛl 40:1–48:35)

E o Zerizalɛmu i sacilɛ’n i afuɛ blu nin nnan su. (Ezekiɛl 40:1, NW) Ɔ maan, ɔ fata kɛ Izraɛlifuɛ’m be di kanga lele afuɛ ablenun nin nsiɛn ekun. (Zeremi 29:10) Ezekiɛli su wa ɲan afuɛ 50. Aolia nun’n, ɔ ɔli Izraɛli mɛn’n nun lɔ. Ɲanmiɛn seli i kɛ: ‘Klɔ sran, nian kpa, yɛ sie ɔ su! Nian like nga ń wá fá klé wɔ’n su kpa.’ (Ezekiɛl 40:2-4) Kɛ aolia nun Ezekiɛli wunnin Ɲanmiɛn i sua uflɛ’n, wafa ng’ɔ yoli i fɛ’n, an bu i akunndan!

Ɲanmiɛn i sua ɲanɲan nga Ezekiɛli wunnin i’n, ɔ le anuan 6. I aliɛ diwlɛ’m be ti 30. Ɔ le lika kpa nin i lika kpa tra su’n. Ɔ le tɛ yiwlɛ mɔ waka yɛ be fa yoli’n, ɔ nin tɛ yiwlɛ nga i su yɛ be yi tɛ nga be rɛ i nnɛn kɔlikɔli’n. “Kan be wlu lɛ’n,” nzue wie ɲrɛn kaci nzue dan. (Ezekiɛl 47:1) Asa ekun’n, Ezekiɛli wun kɛ be fali mɛn’n i wia afiliɛ lɔ lika’n lele m’ɔ́ fá jú i wia atɔliɛ lɔ lika’n mannin sran mun. Mɛn sɔ’m be afiɛn’n, yɛle kɛ Zida nin Bɛnzamɛn be afiɛn asiɛ liɛ’n be yacili i lɛ. Lika sɔ’n, lɛ yɛ be kplannin ‘Zoova i sua’n’ nin i ‘klɔ’ mɔ be flɛ i ‘Anannganman o lɛ’n’ niɔn.—Ezekiɛl 48:9, 10, 15, 35.

Ɲanmiɛn ndɛ’n i su kosan’m be su tɛlɛ:

40:3–47:12—?Ngue yɛle Ɲanmiɛn i sua nga Ezekiɛli wunnin i aolia nun’n? Ɲanmiɛn i sua gbendengble nga Ezekiɛli wunnin i aolia nun lɛ’n, b’a kplɛnmɛn i le. Afin, ɔ ti Ɲanmiɛn i sua mɔ nán sran yɛ ɔ klannin’n, i nzɔliɛ. Yɛle ajalɛ kwlaa nga Ɲanmiɛn fa naan y’a su i kpa andɛ’n. (Ezekiɛl 40:2; Mise 4:1; Ebre Mun 8:2; 9:23, 24) Kɛ “mɛn’n ɔ́ kɔ́ i bue nuan” mɔ Ɲanmiɛn kplo be wun fiɛn’n yɛ ɔ kpɛn su ɔ. (2 Timote 3:1; Ezekiɛl 44:10-16; Malasi 3:1-3) Sanngɛ, kɛ asiɛ’n wá káci mɛn klanman’n yɛ é wá wún aolia nun like sɔ’n i bo kpa ɔ. Sanngɛ, sua sɔ mɔ Ezekiɛli wunnin i’n, ɔ kle kɛ Izraɛlifuɛ’m bé wá sú Zoova kpa ekun. Yɛ be kwlaa be nin be awlofuɛ’m bé wá mán be asiɛ be mɛn’n nun.

40:3–43:17—?Ɲanmiɛn i sua’n i sunnzunlɛ’n, i bo’n yɛle benin? I bo’n yɛle kɛ ajalɛ nga Zoova fɛli i kɛ bé tɛ́kɛ i sulɛ kpa’n ekun’n, saan ɔ́ kpɛ́n su.

43:13-20—?Ngue yɛle Ɲanmiɛn suwlɛ nga Ezekiɛli wunnin i aolia nun’n? Ɲanmiɛn suwlɛ’n ti Ɲanmiɛn klun sa mɔ yɛle kɛ Zezi fɛ́ i wun kpɔ́ sran’m be ti’n, i nzɔliɛ. Zezi i tɛ sɔ’n ti’n, Ɲanmiɛn bu be ng’ɔ kpali be sieli be ngumnin’n be sran kpa. Yɛ i sɔ’n ti’n be nga be o “sran kpanngban kpa” mun be nun’n, be ti sanwun Ɲanmiɛn ɲrun. (Sa Nglo Yilɛ 7:9-14; Rɔmfuɛ Mun 5:1, 2) I sɔ’n ti yɛ atrɛkpa’n, like “kukluku kɛ kpongbo dan wie sa” m’ɔ o Ɲanmiɛn sua nga Salomɔn kplannin’n nun lɔ mɔ i nun yɛ Ɲanmiɛn ɲrun jranfuɛ’m be fɛ i nun nzue’n be wunnzin’n, Ezekiɛli w’a wunman wie Ɲanmiɛn i sua ng’ɔ wunnin i aolia nun’n, i nun’n niɔn.—1 Famiɛn Mun 7:23-26.

44:10-16—?Wan mun yɛ be ti Ɲanmiɛn ɲrun jranfuɛ’m be akpasua’n, i nzɔliɛ ɔ? Ɲanmiɛn ɲrun jranfuɛ’m be akpasua’n be nzɔliɛ yɛle be nga be kpali be sieli be ngunmin andɛ’n. Sɛ sran sɔ’m be ti sika’n, nn é sé kɛ kɛ Ɲanmiɛn bɛli i sua i nun nianlɛ afuɛ nga be flɛ i 1918 nun’n, ɔ bali kɛ sran m’ɔ ‘tɔn sika sɔ’n m’ɔ yi i nun fiɛn’n sa.’ (Malasi 3:1-5) Kɛ ɔ yoli sɔ’n, be nga be yoli sanwun annzɛ be kacili be nzuɛn’n, Ɲanmiɛn yacili be i junman’n su. Sanngɛ, ɔ fata kɛ be mian be ɲin naan be ‘nian be wun su mɛn nun sa tɛtɛ yolɛ’n i lika.’ I liɛ’n, be nga be o “sran kpanngban” kpa be nun mɔ be nzɔliɛ yɛle be nga be timan Ɲanmiɛn ɲrun jranfuɛ’n, bé nían be ajalɛ’n su.—Zak 1:27; Sa Nglo Yilɛ 7:9, 10.

45:1; 47:13–48:29—?“Mɛn” nin i cɛcɛlɛ nga be kɛn i ndɛ’n, ɔ ti ngue nzɔliɛ? Sɛ é kwlá sé’n, mɛn’n ti lika kwlaa nga Zoova i sufuɛ’m be di be junman lɛ’n i nzɔliɛ. Sanngɛ, sɛ e waan é trán mɛn sɔ’n nun titi’n, saan é súan Ɲanmiɛn sulɛ kpa’n i bo titi. Mɛn’n sɔ’n, i cɛcɛlɛ’n i su kpɛnlɛ dan’n wá yó mɛn uflɛ’n nun lɔ. Blɛ sɔ nun’n, Ɲanmiɛn sufuɛ kpa’m be kwlaa be tinuntinun bé ɲán be tranwlɛ liɛ sakpa.—Ezai 65:17, 21.

45:7, 16—?Kɛ be se kɛ nvlefuɛ’m be kwlaa bé yí like bé mán Ɲanmiɛn ɲrun jranfuɛ mun nin wlengbi’n, i bo’n yɛle benin? Ndɛ sɔ’n i bo klikli’n yɛle kɛ, Ɲanmiɛn i sua mɔ nán sran yɛ ɔ kplannin’n nun’n, be suan sran sɔ’m be bo. Be uka be yɛ be nin be di junman likawlɛ aɲinyiɛ su.

47:1-5—?Ngue yɛle nzue ng’ɔ fin Ɲanmiɛn i sua’n nun fite mɔ Ezekiɛli i wunnin i aolia nun’n? Nzue sɔ’n, yɛle ninnge nga Zoova fa man e i sulɛ nun naan e ka nguan nun’n. Ninnge sɔ’n wie yɛle Zezi i wun kpɔlɛ tɛ nin Ɲanmiɛn i su nanwlɛ ndɛ nga be o Biblu’n nun’n. (Zeremi 2:13; Zan 4:7-26; Efɛzfuɛ Mun 5:25-27) Nzue sɔ’n yi, ɔ maan sran kpanngban kpa nga be fa Ɲanmiɛn sulɛ kpa’n i atin’n su’n, be kwla ɲan wie. (Ezai 60:22) Klist i afuɛ akpi famiɛn dilɛ blɛ nun’n, nzue sɔ m’ɔ man nguan’n, ɔ́ wá ɲrɛ́n kpa liɛ su. Yɛ nzue sɔ m’ɔ man nguan’n, i wie yɛle kɛ bé wún ninnge wie’m be wlɛ ekun. Ninnge sɔ’m be fin “fluwa” m’ɔ be trɛli nun’n, be nun.—Sa Nglo Yilɛ 20:12; 22:1, 2.

47:12—?Ngue yɛle waka nga be su mma’n? Waka sɔ’m be ti ajalɛ nga Ɲanmiɛn fɛli i ninnge’m be nun naan fɔ’n w’a tranman sran nun kun’n, be nzɔliɛ.

48:15-19, 30-35—?Ngue yɛle klɔ nga Ezekiɛli wunnin i aolia nun’n? ‘Klɔ’ sɔ’n nunman lika wie mɔ bé sé kɛ ɔ ti Ɲanmiɛn liɛ klonglo ɔ. Ɔ maan, klɔ sɔ’n timan ɲanmiɛn su lɔ like. Ɔ ti asiɛ’n su wa like. Ɔ maan, wafa nga bé wá síe sran kpa nga bé wá trán ‘asiɛ uflɛ’n’ su’n, ɔ kwla yo klɔ sɔ’n i nzɔliɛ. (2 Piɛr 3:13) Kɛ mɔ klɔ sɔ’n le anuan i bue kwlaa su’n, i nun wlulɛ’n timan kekle. Yɛle kɛ maan be nga be ti Ɲanmiɛn i nvle’n i sunianfuɛ’n, be mantanlɛ yo pɔpɔ.

Afɔtuɛ ng’ɔ man e’n:

40:14, 16, 22, 26. Ɲanmiɛn i sua’n nun’n, mme nɲa’n yɛ be fa yoli talɛ’m be wun klanman ɔn. I sɔ’n kle kɛ be nga be nzuɛn’n ti kpa’n, be kunngba cɛ yɛ be kwla wlu lɔ ɔ. (Jue Mun 92:13) Ɔ maan, sɛ Zoova sɔ́ sulɛ nga e su i’n nun’n, nn e nzuɛn ti kpa.

44:23. Be nga andɛ be di junman kɛ Ɲanmiɛn ɲrun jranfuɛ’m be liɛ’n sa’n, ɔ fata kɛ e la be ase dan! “Sran kpa nanwlɛfuɛ m’ɔ si ngwlɛlɛ’n,” yɛ ɔ fa Ɲanmiɛn sufuɛ’m be aliɛ manlɛ blɛ ng’ɔ ti i nuan su i su’n, i nun ta ɔ. Ɔ man e aliɛ Ɲanmiɛn ninnge’m be nun naan e wun like ng’ɔ ti kpa nin ng’ɔ timan kpa’n, be ngbaciɛ’n.—Matie 24:45.

47:9, 11. Ɲanmiɛn silɛ’n ti nzue ng’ɔ fin Ɲanmiɛn i sua nun lɔ fite’n, i nun like cinnjin’n kun. Abonuan like nga nzue sɔ’n yoli i andɛ’n, be kanman. Lika kwlaa nga sran’m be o lɛ’n, sɛ be nɔn nzue sɔ’n, sɛ é kwlá sé’n, bé ɲán nguan. (Zan 17:3) Be nga be nɔnman nzue sɔ’n, bé wá káci ‘njin ngunmin.’ Yɛle kɛ bé wá núnnún be mlɔnmlɔn. I sɔ’n ti’n, ɔ ti cinnjin kpa kɛ e ‘mian e ɲin e kan ndɛ nanwlɛ’n nán e kpɛ i wun.’—2 Timote 2:15.

‘Ń wá klé nvle’m be kɛ min nzuɛn’n nin klɔ sran liɛ’n timan kun’

Kɛ be tuli Davidi i osu nunfuɛ kasiɛn’n i famiɛn bia’n su’n, Ɲanmiɛn w’a kplinman su kun kɛ sran uflɛ tran su. Kɛ ɔ yoli sɔ’n, ɔ cɛli kan lele naan ‘sran nga Ɲanmiɛn kpɛli’ i kɛ ɔ́ trán famiɛn bia’n su’n w’a ba. Sanngɛ, Ɲanmiɛn i wla w’a fiman aenguɛ ng’ɔ nin Davidi be trali’n su. (Ezekiɛl 21:27; 2 Samiɛl 7:11-16) Ezekiɛli i ndɛ’n kan Ɲanmiɛn i “sufuɛ Davidi” m’ɔ́ wá káci “bua sunianfuɛ” nin ‘famiɛn’n’ i ndɛ. (Ezekiɛl 34:23, 24; 37:22, 24, 25) Sran sɔ mɔ be kɛn i ndɛ’n yɛle Zezi Klist m’ɔ le kwlalɛ Ɲanmiɛn i Sielɛ nun’n. (Sa Nglo Yilɛ 11:15) Zoova wá ‘klé nvle’m be kɛ i nzuɛn’n nin klɔ sran liɛ’n timan kun.’ Klist i famiɛn dilɛ’n yɛ maan i sɔ liɛ’n yó ye ɔ.—Ezekiɛl 36:23.

Ɔ cɛ kaan sa’n, be kwlaa nga be saci Ɲanmiɛn dunman’n bé wá núnnún be. Sanngɛ, be nga be ninnge yolɛ nun be kle kɛ be bo Ɲanmiɛn i dunman fɛ’n, bé wá ɲán anannganman nguan. I sɔ’n ti’n, maan e nɔn nzue m’ɔ man nguan m’ɔ ɲrɛn piaa andɛ’n wie. Yɛ maan Ɲanmiɛn sulɛ kpa’n yo e ninnge’m be nun cinnjin kpafuɛ’n.

[Ja ngua lɛ ndɛ’n]

[Foto, bue 22]

?Ngue yɛle nzue m’ɔ man nguan mɔ Ezekiɛli wunnin i aolia nun’n?

[Foto, bue 23]

Ɲanmiɛn i sua ɲanɲan mɔ Ezekiɛli wunnin i aolia nun’n.

[Foto cifuɛ mun, bue 22]

Pictorial Archive (Near Eastern History) Est.