Zoova kacimɛn i ndɛ ng’ɔ kan’n
Ezekiɛl fluwa’n i nun ndɛ cinnjin mun—akpasua 1
AFUƐ nga be flɛ i 613 nun ka naan y’a ju Zezi blɛ su’n, nn Zeremi o Zida. Ɔ tuli i klun kannin Zerizalɛmu klɔ nin Zida nvle’n be sacilɛ’n i ndɛ, srɛ w’a kunmɛn i. I blɛ sɔ nun’n, nn Nɛbikadnesar m’ɔ ti Babilɔni famiɛn’n w’a tra Zuifu kpanngban be lɔmuɛn. Be nga be trali be’n, Daniɛli m’ɔ ti gbanflɛn kan’n ɔ nin i janvuɛ nsan be o be nun. Gbanflɛn sɔ’m be dili famiɛn Nɛbikadnesar bɔbɔ i awlo lɔ junman. Be trali Zuifu sɔ’m be nun sunman lomuɛn ɔli Kɛbar nzue ba m’ɔ o ‘Babilɔni mɛn’n,’ i nuan lɔ. (Ezekiɛl 1:1-3) Zoova kusu w’a yaciman Zuifu sɔ’m be ngbɛn. Ɔ sunmɛnnin i nuan ijɔfuɛ’m be sin. Be nun kun yɛle Ezekiɛli. Kɛ Ezekiɛli bó i Ɲanmiɛn nuan ijɔlɛ junman’n i bo’n, nn ɔ le afuɛ 30.
Afuɛ nga be flɛ i 591 nun ka naan y’a ju Zezi blɛ su’n, yɛ Ezekiɛli wieli i fluwa’n i klɛ ɔ. Afuɛ 22 nun ndɛ yɛ ɔ klɛli ɔ. Ndɛ kwlaa ng’ɔ klɛli’n, ɔ niannin nun klɛli i kpa. Blɛ nga sa kun wá jú’n, ɔ yiyi nun weiin. Yɛle kɛ cɛn nin anglo nin afuɛ nga sa sɔ’n kpɛ́n su’n, ɔ kɛn i ndɛ. Ezekiɛli i ndɛ’n, i bue klikli’n kan Zerizalɛmu i sacilɛ nin i nunnunlɛ’n, i ndɛ. I bue nɲɔn su’n kan ndɛ nga Ɲanmiɛn kan kle nvle nga be mantan Izraɛli nvle lɛ’n, i ndɛ. Kpɛkun i bue kasiɛn’n kan wafa nga bé wá táka Ɲanmiɛn sulɛ kpa ekun’n, i ndɛ. É wá fá e ɲin síe i ndɛ ng’ɔ o Ezekiɛl 1:1–24:27 nun’n su. Ɔ kan aolia nun sa mun, ɔ nin Ɲanmiɛn nuan ndɛ mun, ɔ nin sa ng’ɔ́ wá tɔ́ Zerizalɛmu su mɔ be yili be nglo’n, be ndɛ.
‘Ń FÁ WƆ Ń SÍE I KƐ GLADI DIFUƐ SA’
Aolia nun’n, Ɲanmiɛn maan Ezekiɛli wunnin i famiɛn bia’n. I sin’n, junman ng’ɔ fata kɛ Ezekiɛli di’n, Ɲanmiɛn fa mɛnnin i. Zoova seli i kɛ: ‘Ń fá wɔ ń sie Izraɛli nvle’n su kɛ gladi difuɛ sa. Tie ndɛ nga n kan kle wɔ’n, bo su kle Izraɛlifuɛ mun.’ (Ezekiɛl 3:17) Ɲanmiɛn seli Ezekiɛli kɛ ɔ yi Zerizalɛmu i utulɛ nin i nunnunlɛ’n i nglo kpɛ nɲɔn kɛ anɔ yilɛ wie sa. Zoova maan Ezekiɛli seli Zida nvle’n kɛ: “An nian, ń wá fá alɛ ń yí amun su naan ń sáci amun sraka yiwlɛ lika mɔ be o kpɔlɛ’m be su mun.” (Ezekiɛl 6:3) Ɔ seli nvlefuɛ’m be kɛ: ‘Amun ɲrɛnnɛn blɛ liɛ’n w’a to amun.’—Ezekiɛl 7:7.
Afuɛ nga be flɛ i 612 nun ka naan y’a ju Zezi blɛ su’n, Ɲanmiɛn maan aolia nun’n, Ezekiɛli ɔli Zerizalɛmu. Like kain nga Ezekiɛli wunnin i Ɲanmiɛn i sua’n nun lɔ’n, nanwlɛ be flɛmɛn i kain! Ɔ maan, kɛ Zoova wá súnmɛn i anzi mun mɔ be nzɔliɛ yɛle “sran nsiɛn” mun naan be wa tu i klunngbɔ be nga be jasoli i wun’n be su’n, be nga be ‘klɛli be ngban su nzɔliɛ’n,’ be kunngba cɛ yɛ bé fíte nun ɔn. (Ezekiɛl 9:2-6) Sanngɛ, i klikli nun’n, nvle’n i nunnunlɛ nga Ɲanmiɛn kan m’ɔ ti kɛ ‘sɛnmlɛn’ sa’n, ɔ fata kɛ be ‘fa sanndi i klɔ’n su.’ (Ezekiɛl 10:2) Ɔ ti su kɛ ‘Zoova wá yó maan be nga be yo sa tɛ’n, be bɔbɔ bé fɛ́ i su afɛ’n.’ Sanngɛ, ɔ tali nda kɛ ɔ́ wá fá Izraɛlifuɛ mun nvle kunngun’m be nun naan ɔ́ kán be bó nun ekun.—Ezekiɛl 11:17-21.
Ɲanmiɛn wawɛ’n maan aolia nun Ezekiɛli sɛli i sin Babilɔni mɛn’n nun lɔ ekun. Wafa nga Sedesiasi m’ɔ ti Zerizalɛmu nvle’n i famiɛn’n, ɔ nin nvlefuɛ’m bé wá wánndi’n, Ezekiɛli yili i nglo. Ɲanmiɛn nuan ijɔfuɛ yasua nin bla mɔ ato yɛ be bua’n, ɔ yili be bo. Be kannin amuin sɔfuɛ’m be bo. Be fali Zida sunnzunnin nzan m’ɔ timan kpa’n. Anunman ɲin nin viɲi’n be su ɲanndra’n, ɔ kle sa tɛ nga wá tɔ́ Zerizalɛmu su’n. Afin, Zerizalɛmu ɔli Ezipti nvle’n i sin kɛ ɔ ukɛ i. Be tali nda kun fa guali ɲanndra sɔ’n bo kɛ: ‘Ń kpɛ́ sɛdri sama’m be ti nun lɔ, m bɔbɔ ń kplɛ́n i oka tɛnndɛn kun su.’ (Ezekiɛl 17:22) Sanngɛ, Zida nvle’n i liɛ’n, ɔ ‘leman sama kun mɔ bé fá yó famiɛn kpɔman ɔn.’—Ezekiɛl 19:14.
Ɲanmiɛn ndɛ’n i su kosan’m be su tɛlɛ:
1:4-28—?Ngue yɛle like kɛ kakaklolo m’ɔ o ɲanmiɛn su lɔ mɔ be kɛn i ndɛ’n? Like sɔ’n yɛle Zoova i anuannzɛ’n i bue ng’ɔ o ɲanmiɛn su lɔ’n. Ɲanmiɛn i anzi kpakpa mun yɛ be o anuannzɛ sɔ’n nun ɔn. Like kɛ kakaklolo sɔ’n, Zoova i wawɛ’n yɛ maan i wun kpɛ i ɔ. Sran ng’ɔ kondo kakaklolo sɔ’n yɛle Zoova m’ɔ ti ɲanɲan’n. Ɲanngondin mɔ be wunnin i’n, ɔ kle kɛ ɔ ti koun.
1:5-11—?Wan mun yɛle nnɛn nnan nga Ezekiɛli wunnin i’n? I kpɛ nɲɔn su nga aolia nun Ezekiɛli wún like kɛ kakaklolo sa’n, i waan nnɛn nnan sɔ mun’n yɛle anzi nga be nian Ɲanmiɛn i ninnge’m be su’n. (Ezekiɛl 10:1-11; 11:22) I waan nannin ɲrun’n yɛle ‘anzi ɲrun’n.’ (Ezekiɛl 10:14) I sɔ’n nin i fata, afin nannin’n ti wunmiɛn’n i nzɔliɛ. Anzi nga be nian Ɲanmiɛn i ninnge’m be su’n, be le wunmiɛn kpa kusu.
2:1—?Ngue ti yɛ be flɛ Ezekiɛli kpɛ sunman kɛ “klɔ sran” ɔn? Zoova flɛli Ezekiɛli sɔ naan i wla kpɛn su kɛ ɔ ti klɔ sran sakpa. Naan Ezekiɛli wun i wlɛ kɛ Ɲanmiɛn m’ɔ kan ndɛ’n, ɔ nin i m’ɔ ijɔ i nuan’n, be timan kun kaan sa. Biblu’n nun fluwa nga Zezi i sɔnnzɔnfuɛ’m be klɛli’n nun’n, Zezi se kɛ i yɛ ɔ kacili sran kpɛ kɔe 80. I sɔ’n kle weiin kɛ Ɲanmiɛn Wa sɔ’n bali asiɛ’n su wa kɛ klɔ sran sa. Naan nán aolia nun wunnɛn yɛ ɔ fa bali ɔ.
2:9–3:3—?Ngue ti yɛ sunlɛ ndɛ nin awuyomo bolɛ ndɛ nin awlaboe kpanlɛ ndɛ nga be o fluwa’n su’n, ɔ yoli Ezekiɛli i nuan nun nɛnkɛnnɛnkɛn ɔn? Like ti yɛ ndɛ’n yoli Ezekiɛli i nuan nun nɛnkɛnnɛnkɛn’n yɛle wafa ng’ɔ sɔli nun’n. Yɛle kɛ, kɛ Zoova fali Ezekiɛli kɛ ɔ yo i nuan ijɔfuɛ’n, ɔ sili i su ye dan kpa.
4:1-17—?Utulɛ nga bé wá útu Zerizalɛmu’n, Ezekiɛli yili i nglo sakpa? Ezekiɛli srɛli Zoova naan be kaci like ng’ɔ́ wá fá tɔ́n aliɛ’n. Zoova kusu tɛli su klanman. Sɛ Zoova tɛli i su’n, ɔ kle kɛ Ezekiɛli su yi Zerizalɛmu i utulɛ’n i nglo ti ɔ. Kɛ Ezekiɛli lɛ i sa bɛ su’n, ɔ ti Izraɛli famiɛn diwlɛ’n i akpasua blu’n be sa tɛ nga be yoli afuɛ 390 nun’n, i nzɔliɛ. Be yoli be sa tɛ sɔ’n afuɛ nga be flɛ i 997 nun ka naan y’a ju Zezi blɛ su lele fa juli afuɛ nga be flɛ i 607 nun mɔ be sacili Zerizalɛmu nvle’n, i nun. Kɛ Ezekiɛli lɛ i sa fama su’n, ɔ ti sa tɛ nga Zida nvle’n yoli i afuɛ 40 nun’n, i nzɔliɛ. Ɔ fɛ i afuɛ nga be flɛ i 647 nun ka naan y’a ju Zezi blɛ su mɔ Zeremi boli i Ɲanmiɛn nuan junman dilɛ’n i bo’n, lele fa juli 607 nun ka naan y’a ju Zezi blɛ su’n nun. Ezekiɛli yoli i sɔ lele cɛn ba 430. Blɛ sɔ’n nun’n, i aliɛ ng’ɔ di o, i nzue ng’ɔ nɔn o, ɔ ti kaan sa. I sɔ’n ti nzɔliɛ like. Ɔ kle kɛ, kɛ bé wá útu Zerizalɛmu klɔ’n awe wá kpɛ́n.
5:1-3—Ezekiɛli bubuli i ti ndrɛ ng’ɔ yili’n nun. Ɔ fɛli i bue sanndili aunngban nun yɛ ɔ fɛli i bue kan fa wlɛwlɛli i tralɛ’n i nuan’n su. ?I sɔ liɛ’n i bo’n yɛle benin? I sɔ’n kle kɛ, kɛ bé wá trá Zidafuɛ mun lomuɛn kɔ́’n w’a di afuɛ 70. Sanngɛ, be bue kaan bé wá sa be sin Zida nvle nun yɛ bé wá táka Ɲanmiɛn i sulɛ kpa’n ekun.—Ezekiɛl 11:17-20.
17:1-24—?Wan yɛle anunman ɲin nɲɔn’n? ?Wafa sɛ yɛ be kpɛli sɛdri i sama’n be nun fleiin kpa’n niɔn? ?Yɛ wan yɛle sɛdri “sama nɔnman” m’ɔ Zoova kpɛ m’ɔ ta’n? Anunman ɲin nɲɔn sɔ’n yɛle Babilɔni nin Ezipti famiɛn’n. Anunman ɲin klikli mɔ yɛle Babilɔni famiɛn’n, ɔ wa kpɛli waka nga be flɛ i sɛdri’n i ti su lɔ. Waka nga be flɛ i sɛdri’n i ti su lɔ mɔ be kpɛli i lɛ’n, ɔ ti famiɛn Davidi i osu’n nunfuɛ kun i nzɔliɛ. Ɔ maan, anunman ɲin sɔ’n, ɔ wa tuli Zozakini m’ɔ ti Zida famiɛn’n. Kpɛkun, ɔ fali famiɛn Sedesiasi sieli i osu. Famiɛn Sedesiasi kusu seli kɛ ɔ su kpɔciman Babilɔni famiɛn’n, sanngɛ ɔ́ kɔ́ i ɲrun’n, ɔ wa kunndɛli ukalɛ anunman ɲin nɲɔn su’n, i sin. Anunman ɲin nɲɔnfuɛ sɔ’n yɛle Ezipti famiɛn’n. Sanngɛ, i sɔ’n w’a yoman like fi ye. Afin, be trali Sedesiasi lomuɛn ɔli Babilɔni. Lɔ yɛ ɔ wuli ɔ. Asa kusu’n, Zoova tali sɛdri “sama nɔnman” kun. Sɛdri “sama nɔnman” sɔ’n ti Mɛsi i famiɛn dilɛ’n i nzɔliɛ. Zoova tɛli i “oka tɛnndɛn kun su.” Oka tɛnndɛn sɔ’n yɛle Siɔn oka m’ɔ o ɲanmiɛn su lɔ’n. Lɔ yɛ sɛdri sama nɔnman sɔ’n wá yó “sɛdri klanman kpa” ɔ. I yɛ maan sran’m be kwlaa bé dí ye ɔ.—Sa Nglo Yilɛ 14:1.
Afɔtuɛ ng’ɔ man e’n:
2:6-8; 3:8, 9, 18-21. Ɔ fataman kɛ sran’m be sa tɛ’n kun e srɛ. Yɛ i sɔ’n ti’n, ɔ fataman kɛ jasin fɛ’n mɔ e bo kle be naan be kaci be sa’n, e yaci i bolɛ. Sɛ sran’m be sɔman e nun klanman’n, maan e yo kekle kpa kɛ diaman sa. Sanngɛ, nɛ́n i sɔ’n ti yɛ sa ng’ɔ o sran’m be su’n, ɔ su yoman e like fi ɔ. Zezi sili be ng’ɔ boli jasin fɛ’n kleli be’n, be aunnvuɛ. I sɔ’n ti’n, maan i sɔ’n su e bo wie naan e bo jasin fɛ’n kle e wiengu mun.—Matie 9:36.
3:15. Kɛ Ɲanmiɛn fali junman’n mannin Ezekiɛli’n, ɔ trannin Tɛli Abib. Sa ng’ɔ wunnin i ti’n, ‘i nuan boli i wun cɛn ba lele nso.’ Junman nga be mɛnnin i kɛ ɔ di’n, ɔ kali lika sɔ’n nun buli su akunndan kpa. ?Ɔ fataman kɛ e kusu e fa blɛ naan Ɲanmiɛn ninnge nga e suan be’n, e bu be su akunndan kpa naan y’a wun be wlɛ?
4:1–5:4. Sɛ ɔ ti kɛ Ezekiɛli timan wun ase kanfuɛ nin yakpafuɛ sa’n, nn ndɛ nɲɔn nga Ɲanmiɛn seli i kɛ ɔ yi be nglo’n y’a yoman ye. E kusu’n, maan e yo wun ase kanfuɛ nin yakpafuɛ naan y’a di Ɲanmiɛn junman kwlaa nga be fa man e’n.
7:4, 9; 8:18; 9:5, 10. Be nga Ɲanmiɛn kle be nun’n, nán e si be aunnvuɛ.
7:19. Cɛn nga Zoova wá núnnún mɛn tɛ ng’ɔ o yɛ’n, sika su deman sran fi.
8:5-18. Sran ng’ɔ jaso Ɲanmiɛn wun’n, nn be afiɛn’n w’a saci mlɔnmlɔn. Biblu’n waan: ‘Sran ng’ɔ nin Ɲanmiɛn b’a bu’n, ɔ fɛ i nuan’n mlin i wiengu mun. Ngwlɛlɛ’n kusu, ɔ de be nga be nantilɛ’n ti kpa’n.’ (Nyanndra Mun 11:9) Ɔ maan, ndɛ nga be mɔ be nin Ɲanmiɛn be buli’n be kan’n, nán e tie. Maan be yo e kain.
9:3-6. Sɛ e waan é fíte nun ‘ɲrɛnnɛn blɛ’ nun’n, ɔ fata kɛ be klɛ e ngban su nzɔliɛ. Yɛle kɛ, maan e fa e wun man Ɲanmiɛn naan be yo e batɛmu, naan e fa Klistfuɛ nzuɛn’n. (Matie 24:21) Klistfuɛ nga be kpali be sieli be ngunmin mɔ be yɛ be ti sran nga fluwa klɛlɛ like o be sa nun’n, be yɛ be fa sran’m be ngban su klɛlɛ junman’n i nun ta ɔ. Junman sɔ’n yɛle Ɲanmiɛn Sielɛ’n i jasin fɛ’n i bolɛ. Sɛ e waan e nzɔliɛ liɛ’n ka e ngban su’n, ɔ fata kɛ e uka be junman sɔ’n i dilɛ nun kpa.
12:26-28. Be nga bɔbɔ Ezekiɛli i ndɛ’n ti’n be sri i’n, ɔ seli be kɛ: ‘Ndɛ kwlaa nga Zoova kán’n, ɔ su cɛman naan i nuan sa’n w’a yo.’ I sɔ’n ti’n, like kwlaa nga e kwla yo naan y’a uka e wiengu mun naan b’a fa be wla’n b’a guɛ i Zoova su kwlaa naan mɛn ng’ɔ o yɛ’n w’a nunnun’n, maan e yo.
14:12-23. Sɛ cɛn wie lele é ɲán nguan’n, ɔ ti kɛ e bɔbɔ sa. Sran uflɛ fi su fɛmɛn i sɔ ajalɛ liɛ’n e osu.—Rɔmfuɛ Mun 14:12.
18:1-29. Like nga sran kun lua’n, yɛ ɔ ti ɔ.
“Ń YÓ MAAN ZERIZALƐMU SÁCI. ZERIZALƐMU KLƆ WUNMUAN’N SÁCI”
(Ezekiel 20:1–24:27)
Kɛ be trali Izraɛlifuɛ’m be lomuɛn ɔli’n, i afuɛ nso su’n, yɛle kɛ afuɛ nga be flɛ i 611 nun ka naan y’a ju Zezi blɛ su’n, Izraɛli kpɛnngbɛn wie’m be bali Ezekiɛli sin kɛ bé ‘sí Zoova klun sa.’ Jasolɛ nga Izraɛlifuɛ’m be jasoli Zoova wun’n, be kɛnnin i ndɛ kleli be. Yɛ be seli be kɛ ‘Zoova wá yí i tokofi’n’ naan ɔ nin bé kán. (Ezekiɛl 20:1; 21:8) Zoova kannin ndɛ kleli Sedesiasi m’ɔ ti Izraɛlifuɛ’m be kpɛnngbɛn’n. Ɔ seli i kɛ: ‘Bé dé wɔ famiɛn nzɔliɛ’n. Bé dé wɔ́ famiɛn kle’n, lika’n w’a kpɛ i wun, afin be nga be kan be wun ase’n, bé mán be su, yɛ be nga be man be wun su’n, bé wá kán be ase. Sacilɛ nga be flɛ i sacilɛ’n yɛ ɔ́ wá bá lɛ ɔ. Ń yó maan Zerizalɛmu sáci. Zerizalɛmu klɔ wunmuan’n ɔ́ sáci. Sanngɛ, saan Zezi Klist nga ń kpɛ́ i kɛ ɔ nin i bé ɲɛ́n i’n, ɔ́ bá naan i sɔ sa’n w’a ju.’—Ezekiɛl 21:31, 32.
Kɛ be se kɛ klɔ kun yo sa tɛ’n, yɛle Zerizalɛmu klɔ’n. Be yili Izraɛli nvle’n mɔ yɛle Oola nin Zida nvle mɔ yɛle Ooliba be sran kunlɛ’n, i nglo. Zoova w’a dun mmua w’a fa Ooliba w’a wla ‘Asirifuɛ mun mɔ be ti i soman’n m’ɔ wuli be ti kpo’n be sa nun.’ (Ezekiɛl 23:9) Ooliba i nunnunlɛ sɔ’n su cɛman kun. Afuɛ nga be flɛ i 609 nun ka naan y’a ju Zezi blɛ su’n, Zerizalɛmu i kpɔfuɛ’m be bo sin yiɛli i. I sɔ liɛ’n dili anglo 18. Kɛ i agualiɛ su be utuli Zerizalɛmu klɔ’n, ɔ boli Zuifu’m be nuan dan. Ɔ maan, b’a kwlá yiman ngwlɛ kaan sa. Ezekiɛli kusu su kanman Ɲanmiɛn ndɛ’n kleman be nga be trali be lomuɛn ɔli’n lele naan ‘sran kun m’ɔ fin nun fiteli’n’ w’a se kɛ be sacili Zerizalɛmu klɔ’n.—Ezekiɛl 24:26, 27.
Ɲanmiɛn ndɛ’n i su kosan’m be su tɛlɛ:
21:8—?Ngue yɛle tokofi nga Zoova yi i bua’n nun’n? “Tokofi” nga Zoova fa di Zerizalɛmu nin Zida nvle’n be jɔlɛ’n, yɛle Babilɔni famiɛn Nɛbikadnɛzar nin i sonja mun. Atrɛkpa kusu’n, ɔ kwla yo Ɲanmiɛn i anuannzɛ’n i bue ng’ɔ o ɲanmiɛn su lɔ mɔ yɛle anzi mun’n.
24:6-14—?Ngue yɛle annganblalɛ m’ɔ o blalɛ sɛ’n wun’n? Kɛ Zerizalɛmu i kpɔfuɛ’m be bo sin yiɛli i’n, be fɛli i sunnzunnin blalɛ sɛ. Anganblalɛ m’ɔ o blalɛ sɛ mɔ yɛle Zerizalɛmu wun’n, ɔ ti sa tɛtɛ kwlaa ng’ɔ o klɔ’n nun’n, i nzɔliɛ. Sa kain sɔ mun yɛle kɛ nvlefuɛ’m be nzuɛn timan kpa. Be kun sran mun. Sa sɔ’m be kain ti’n, sɛ bɔbɔ be fa blalɛ sɛ sɔ’n i ngbɛn be tɛkɛ i sin su naan ɔ lo dan kpa bɔbɔ’n, i nun annganblalɛ’n su wieman le.
Afɔtuɛ ng’ɔ man e’n:
20:1; 21:5. Wafa nga Izraɛli kpɛnngbɛn’m be tɛli Ezekiɛli su’n, ɔ kle kɛ ndɛ ng’ɔ kan kleli be’n, b’a faman be wla’n b’a guaman su. Nán e kusu e yo sɔ. Yɛle kɛ Ɲanmiɛn ndɛ nga be kan kle e’n, nán e kpalo be.
21:23-27. Kannzɛ bɔbɔ amuin yɛ famiɛn Nɛbikadnɛzar fa yo i ninnge mun’n, sanngɛ sɛ ɔ kwlali Zerizalɛmu’n, ɔ fin Zoova. I sɔ’n kle weiin kɛ sɛ Zoova fa ajalɛ kɛ ɔ́ yó like wie’n, mmusu’m be bɔbɔ be kwlá jrɛnmɛn i.
22:6-16. Sran ng’ɔ saci sran dunman’n, ɔ nin sran nga i nzuɛn ti tɛ’n, ɔ nin sran ng’ɔ miɛnmiɛn i wiengu’n, ɔ nin sran ng’ɔ fa adi ninnge’n, Zoova klomɛn i sɔfuɛ’n. Ɔ maan, ɔ fata kɛ e mian e ɲin kpa naan y’a yomɛn i sɔfuɛ.
23:5-49. Politiki anuannzɛ mɔ Izraɛli nin Zida nvle’n be nin nvle uflɛ’m be trali’n ti’n, be sɔli be amuin mun wie. Maan e kusu e nian e wun su naan y’a yoman be nga be suman Zoova’n, be ninnge mun wie. Ɔ timɛn i ti’n, e Ɲanmiɛn sulafilɛ’n sáci mlɔnmlɔn.—Zak 4:4.
Ndɛ kun m’ɔ kaciman mɔ maan sran kaci’n
Nanwlɛ, Ezekiɛli fluwa’n i ndɛ tre 24 be nun ndɛ’m be man afɔtuɛ kpanngban kpa! Nga y’a fa e ɲin y’a sie be su yɛ’n, be kle e like nga e kwla yo naan Ɲanmiɛn w’a faman e wun ya’n. Kusu like nga e ko yo naan Ɲanmiɛn w’a si e aunnvuɛ’n, e wunnin i wie. Yɛ e wunnin like nga ti yɛ ɔ fata kɛ e kan Ɲanmiɛn ndɛ’n e kle klunwifuɛ mun’n. Ɲanmiɛn nuan ndɛ ng’ɔ kan Zerizalɛmu klɔ’n i nunnunlɛ ndɛ’n, ɔ kle weiin kɛ Zoova yɛ ɔ ‘bo sa uflɛ nga bé wá jú’n be su kle i sufuɛ mun ɔn. Naan ka naan b’a ju’n ɔ bo su kle be.’—Ezai 42:9.
Ɲanmiɛn nuan ndɛ nga y’a wun be yɛ mɔ be o Ezekiɛl 17:22-24 nin 21:31, 32 nun’n, be fa e ɲin sie i Mɛsi i famiɛn dilɛ mɔ w’a taka ɲanmiɛn su lɔ’n su. Ɔ ka kaan sa’n, Ɲanmiɛn i Sielɛ’n i su famiɛn’n wá yó maan Ɲanmiɛn klun sa’n kpɛ́n su asiɛ wunmuan’n su. (Matie 6:9, 10) Sɛ e Ɲanmiɛn sulafilɛ’n ti kekle kpa’n, e kwla lafi su kɛ mmlusuɛ nga Ɲanmiɛn Sielɛ sɔ’n wá mán’n, é ɲán wie. Nanwlɛ, kɛ be se kɛ ‘Ɲanmiɛn i ndɛ ng’ɔ ko kan’n, nn w’a kan ɔ kacimɛn i, ɔ maan sran’m be kaci’n,’ sakpa ɔ.—Ebre Mun 4:12.
[Foto, bue 12]
?Ngue yɛle like kɛ kakaklolo m’ɔ o ɲanmiɛn su lɔ’n?
[Foto, bue 14]
Sɛ e tu e klun e bo jasin fɛ’n naan e uka e wiengu’n, ɔ́ yó maan e ngban su ‘nzɔliɛ’n’ ka lɛ.