‘Amun Si si aunnvuɛ’
“An si aunnvuɛ, kɛ amun Si kusu si aunnvuɛ’n sa.”—LIK 6:36.
1, 2. ?Ndɛ benin yɛ Zezi kan kleli mmla klefuɛ nin Farizifuɛ mun, ɔ nin i sɔnnzɔnfuɛ mun m’ɔ kle kɛ aunnvuɛ silɛ’n ti like kpa ɔ?
MMLA nga Ɲanmiɛn sinnin Moizi lika fa mannin Izraɛlifuɛ mun’n, ɔ ju i liɛ 600. Kannzɛ bɔbɔ ɔ ti cinnjin kɛ be nanti be su’n, sanngɛ kusu’n, ɔ ti cinnjin kpa wie kɛ be si aunnvuɛ. I sɔ’n ti’n, kɛ Zezi wunnin kɛ Farizifuɛ’m be siman aunnvuɛ’n, w’a tranman lɛ w’a nianman be. Kpɛ nɲɔn’n, ɔ buli be fɔ. Kpɛkun, ɔ boli Ɲanmiɛn ndɛ’n m’ɔ se kɛ ‘n klo aunnvuɛ nga be si sran’n tra tɛ nga be yi be man min’n,’ i su kleli be. (Matie 9:10-13; 12:1-7; Oze 6:6) Cɛn kun ekun’n, Zezi seli be kɛ: ‘Amun mmla klefuɛ mun nin Farizifuɛ mun mɔ amun ti dunman klofuɛ mun, an yako! Yɛle kɛ an yi manti’n, nin anɛti’n, ɔ nin kumɛn’n be blusu’n, sanngɛ an yaci mmla ng’ɔ ti cinnjin’n, nin nanwlɛ dilɛ’n, nin aunnvuɛ silɛ’n, ɔ nin sa kpa yolɛ mɔ maan sran’m be fa be wla gua amun su’n. Sa sɔ’m be yolɛ’n yɛ ɔ ti i su’n niɔn, sanngɛ nán an yaci wie’m be yolɛ.’—Matie 23:23.
2 I sɔnnzɔnfuɛ’m be liɛ’n, ɔ seli be kɛ: ‘An si aunnvuɛ, kɛ amun Si kusu si aunnvuɛ’n sa.’ (Lik 6:36) I kwlaa sɔ’n kle kɛ aunnvuɛ silɛ’n yoli Zezi i cinnjin kpa. Sanngɛ sɛ e waan é ‘nían Ɲanmiɛn i sran aunnvuɛ silɛ su’n,’ ɔ fata kɛ e wun i bo kpa. (Efɛzfuɛ Mun 5:1) Asa ekun’n, sɛ e wun like nga ti yɛ aunnvuɛ silɛ’n ti kpa man e’n, i sɔ yolɛ’n su yoman kekle e sa nun. Ɔ́ káci e nzuɛn.
Be nga be leman wie’m be aunnvuɛ silɛ
3. ?Ngue ti yɛ Zoova yɛ ɔ kwla kle e aunnvuɛ silɛ ɔ?
3 Jue tofuɛ’n seli kɛ: ‘Anannganman yaci sa cɛ, ɔ si aunnvuɛ, ɔ faman ya ndɛndɛ, i kpa liɛ’n, be flɛman. Anannganman ti kpa man sran’m be kwlakwla. Ɔ klo ninnge m’ɔ yili be’n be ngba.’ (Jue Mun 145:8, 9) Zoova ti ‘e Si, ɔ si aunnvuɛ, ɔ ti Ɲanmiɛn kun m’ɔ jran e sin sa’n kwlaa nun’ ɔn. (2 Korɛntfuɛ Mun 1:3) Sran ng’ɔ si aunnvuɛ’n, ɔ yo i wiengu ye. I sɔ yolɛ’n ti Ɲanmiɛn i nzuɛn. Ɔ maan, i yɛ ɔ kwla kle e aunnvuɛ silɛ ɔ.
4. ?Ngue yɛ Ezai 49:15 kle e aunnvuɛ silɛ’n su ɔ?
4 Zoova seli Ezai 49:15 nun kɛ: “?Bla ta kun wla fi i wa’n su? ?Ɔ simɛn i bɔbɔ i klun ba’n i aunnvuɛ?” Ebre nun ndɛ mma nga be kaci i wa kɛ ‘aunnvuɛ’n,’ ɔ nin nga be fa kan Zoova i ndɛ Jue Mun 145:8, 9 nun’n, be bo ti kun. Like nga ti yɛ Zoova si aunnvuɛ’n, i kunngba’n ti yɛ bla ta’n si i wa’n i aunnvuɛ ɔ. Yɛle kɛ ba’n yo i nin’n i annvɔ. I sɔ’n ti yɛ kɛ awe kun ba’n, annzɛ ɔ kunndɛ like uflɛ’n, i nin’n niɛn i lika ɔ. Zoova kusu’n, sran’m be yo i annvɔ. I ti yɛ ɔ si be aunnvuɛ ɔ.
5. ?Zoova nin Izraɛlifuɛ’m be tranlɛ nun’n, wafa sɛ yɛ ɔ kleli kɛ ɔ ti “aunnvuɛ sifuɛ dan” ɔn?
5 Sɛ sran yo e annvɔ’n, ɔ ti kpa. Sanngɛ sɛ e si aunnvuɛ’n, ɔ ti kpa ekun tra su. I lɛ nun’n, amun e nian wafa nga Zoova nin Izraɛlifuɛ mɔ be ti i nvle nunfuɛ mun trannin’n. Kɛ Eziptifuɛ’m be fali be yoli be kanga lele afuɛ ko ju 3.500, Zoova seli Moizi kɛ: ‘N wunnin min sran nga be o Ezipti lɔ’n be ɲrɛnnɛn nga be fa kle be’n. Kɛ be kle be ɲrɛnnɛn’n, kpanlɛ nga be kpannin’n, n tili. N si afɛ ng’ɔ o be su’n. M’an jra kɛ ń wá dé be Eziptifuɛ’m bé sa nun naan ń fá bé Ezipti mɛn’n nun ń kɔ́ mɛn klanman m’ɔ ti tɛtrɛ kpa’n nun lɔ. Lɔ asiɛ’n yo like ye kpa. I kunngba’n ɔ ti nnɛn tawlɛ klanman.’ (Ezipt Lɔ Tulɛ 3:7, 8) Ye sɔ mɔ Zoova yoli Izraɛlifuɛ mun’n i afuɛ 500 m’ɔ́ sín’n, ɔ boli su ekun. Ɔ seli be kɛ: ‘N fali Izraɛli nvle’n Ezipti lɔ m bali. N deli amun Eziptifuɛ nin nvle nga be kleli amun yalɛ’n be kwlakwla be sa nun.’ (1 Samiɛl 10:18) Sanngɛ Izraɛlifuɛ’m b’a nantiman Ɲanmiɛn i mmla’m be su. Ɔ maan, be wunnin be ɲrun tikatika. Kɛ ɔ yo sɔ kusu mɔ be kpan flɛ Zoova’n, be yo i annvɔ. Ɔ maan, ɔ ko de be. (Jɔlɛ Difuɛ Mun 2:11-16; 2 Be Nyoliɛ 36:15) I sɔ’n kle weiin kɛ Ɲanmiɛn m’ɔ ti sran klofuɛ’n, ɔ tranman lɛ nianman sran nga be sa w’a mian annzɛ kekle’n o be su’n. Afin, ɔ ti “aunnvuɛ sifuɛ dan.”—Efɛzfuɛ Mun 2:4.
6. ?Wafa sɛ yɛ Zezi sili aunnvuɛ kɛ i Si sa ɔ?
6 Zezi Klist sili aunnvuɛ dan kɛ i Si sa. Cɛn kun’n, aɲinsiwafuɛ nɲɔn be kunndɛli kɛ ɔ tike be ɲin’n. Ɔ maan, be seli i kɛ: ‘Nannan, David Anunman, si e aunnvuɛ yo e ye.’ ?Kɛ be seli sɔ’n, ngue yɛ Zezi yoli ɔ? Ɔ yoli be ye. Sanngɛ, ɔ yoli i klun ufue su. Afin Biblu’n waan: ‘Be yoli Zezi annvɔ, ɔ kannin be ɲinma’n, be ja osu kunngba’n nun lɛ be wunnin ase.’ (Matie 20:30-34) Annvɔ mɔ sran’m be yoli Zezi ti’n, ɔ yoli be nun sunman be ye. Ɔ tikeli aɲinsiwafuɛ’m be ɲin, ɔ deli sran wie mɔ asiɛ usu’m be sacili be’n, ɔ yoli kokowefuɛ’m be juejue. Kpɛkun, siɛ nin niɛn wie mɔ be mma’m be ti tukpacifuɛ’n, ɔ yoli be mma sɔ’m be juejue.—Matie 9:27; 15:22; 17:15; Mark 5:18, 19; Lik 17:12, 13.
7. ?Ngue yɛ Ɲanmiɛn Zoova nin i Wa’n be ayeliɛ’n kle e aunnvuɛ silɛ’n su ɔ?
7 Ɲanmiɛn Zoova nin Zezi Klist yɛ be kle e aunnvuɛ silɛ’n niɔn. Yɛle kɛ, ɔ fata kɛ sran m’ɔ leman wie’n, ɔ yo e annvɔ naan e ti i wun ɲanman nun. Kɛ Ɲanmiɛn Ndɛ’n kan aunnvuɛ silɛ’n i ndɛ’n, kpalɛ sunman i bo’n yɛ o lɛ. ?Yɛ sɛ sran’n yo sa tɛ mɔ be di i jɔlɛ’n nin? ?Wafa sɛ yɛ be kwla si i aunnvuɛ ɔ? ?I aunnvuɛ silɛ sɔ’n yɛle kɛ be su yomɛn i like fi mlɔnmlɔn?
Sa tɛ yofuɛ’m be aunnvuɛ silɛ
8, 9. ?Kɛ Davidi nin Bat-Seba be yoli sa tɛ’n, wafa sɛ yɛ Ɲanmiɛn sili be aunnvuɛ ɔ?
8 ?Kɛ famiɛn Davidi nin Bat-Seba m’ɔ ti sran uflɛ yi’n be lali mɔ Ɲanmiɛn nuan ijɔfuɛ Natan fa tɛli i ɲrun’n, ngue yɛ ɔ yoli ɔ? Davidi kɛnnin i wun ase srɛli Ɲanmiɛn. Ɔ seli kɛ: ‘Ee Ɲanmiɛn klun ufuefuɛ, yo n ye. Nian ɔ aunnvuɛ mɔ a si klɔ sran’n ti, nunnun min sa tɛ mun. Wunnzin min weiin kpa, maan fɔnlɛ mɔ n fɔnnin’n ɔ wie. Yo min saun kpa maan min wun sa’n kwlaa wie weiin. Afin n wun sa tɛtɛ nga n yo be’n. Sa tɛtɛ sɔ’m be sinsin min ɲin su. Ɔ kunngba yɛ n yoli ɔ sa’n niɔn. N yoli sa nga a klomɛn i’n.’—Jue Mun 51:3-6.
9 Sa mɔ Davidi yoli’n, ɔ yoli i nzisɔ dan. Zoova kusu yaci cɛli i. Ɔ maan, like ng’ɔ fata kɛ be fa yo i nin Bat-Seba’n, ɔ goli nun. Afin Moizi mmla kle kɛ, ɔ fata kɛ be kun be nɲɔn’n. (Mmla’n 22:22) Kannzɛ i li b’a kunman be’n, sanngɛ be suali be sa tɛ’n i trɔ’n kan. (2 Samiɛl 12:13) I sɔ’n kle kɛ aunnvuɛ mɔ Ɲanmiɛn si sran’n ti’n, ɔ kwla yaci i sa tɛ cɛ i. Sanngɛ nɛ́n i sɔ’n ti yɛ ɔ su tumɛn i fɔ ɔ.
10. ?Ngue ti yɛ ɔ fataman kɛ aunnvuɛ mɔ Zoova si e’n ti’n, é ká sa tɛ yolɛ’n su ɔ?
10 Kɛ mɔ ‘Adam ti yɛ sa tɛ yolɛ’n bali mɛn’n nun’ mɔ ‘sa tɛ’n i akatua’n yɛle wie’ ti’n, wie’n o sran’m be kwlaa be su. (Rɔmfuɛ Mun 5:12; 6:23) Sanngɛ kɛ Zoova dí e jɔlɛ’n, ɔ si e aunnvuɛ. I sɔ’n ti’n, ɔ fata kɛ e lɛ i ase dan! Sanngɛ, nán aunnvuɛ mɔ Ɲanmiɛn si e’n, i ti yɛ é ká sa tɛ yolɛ’n su ɔ. Mmla’n 32:4 waan Zoova “i atin’m be ti seiin.” Ɔ maan, kannzɛ Zoova ti aunnvuɛ sifuɛ’n, sanngɛ ɔ nanti mmla’m be su seiin, ɔ kaciman.
11. ?Wafa sɛ yɛ Zoova dili Davidi nin Bat-Seba be jɔlɛ sɛsɛsɛ ɔ?
11 Davidi nin Bat-Seba be liɛ’n su’n, be yacili be sa tɛ’n cɛli be ti yɛ b’a kunman be ɔ. Sanngɛ, sɛ ɔ ti kɛ Izraɛli jɔlɛ difuɛ mun yɛ be dili be ndɛ’n, nn be kunnin be kɛ nga Moizi mmla’n fa kan’n sa. Afin, Zoova w’a manman Izraɛli jɔlɛ difuɛ’m be atin kɛ be yaci sran’m be sa tɛ’n cɛ be. Sanngɛ aenguɛ mɔ Zoova nin Davidi be trali’n ti’n, Zoova niannin naan sɛ ɔ kwla yaci cɛ i o. (2 Samiɛl 7:12-16) Ɔ maan, Zoova bɔbɔ m’ɔ ‘di asiɛ’n sufuɛ’m be kwlaa be jɔlɛ,’ kpɛkun ɔ ‘nian sran’m be awlɛn’n nun’n,’ yɛ ɔ dili ndɛ’n niɔn. (Bo Bolɛ 18:25; 1 Be Nyoliɛ 29:17) I liɛ’n, sɛ Davidi kacili i nzuɛn’n annzɛ w’a kaciman’n, ɔ kwla wun i wlɛ naan sɛ ɔ́ yáci i sa tɛ’n cɛ́ i’n, w’a yaci a cɛ.
12. ?Ngue yɛ ɔ fata kɛ e yo naan y’a ɲan aunnvuɛ mɔ Ɲanmiɛn si e’n i su ye ɔ?
12 Sa tɛ mɔ i nun yɛ be wuli e’n i akatua’n yɛle wie’n. Sanngɛ aunnvuɛ mɔ Zoova si e’n ti’n, é fíte nun. Aunnvuɛ sɔ mɔ Zoova si e’n, ɔ nin i sɛsɛ m’ɔ ti’n be kɔ likawlɛ. I sɔ’n ti’n, ɔ yoli naan i Wa Zezi Klist fɛ i wun kpɔ e ti. Aunnvuɛ silɛ’n i dan kɛ ngalɛ’n sa’n, sran fi nin a simɛn i le. (Matie 20:28; Rɔmfuɛ Mun 6:22, 23) Sanngɛ, sɛ e waan é ɲán su ye’n, yɛle kɛ sɛ e waan é ɲán nguan’n, ɔ fata kɛ e ‘lafi i Wa’n su.’—Zan 3:16, 36.
Ɲanmiɛn si aunnvuɛ yɛ ɔ ti seiin
13, 14. ?Zoova i sran aunnvuɛ silɛ’n, ɔ trɛ i seiin m’ɔ ti’n su? Amun yiyi nun.
13 E dun mmua wunnin kɛ Zoova si aunnvuɛ. ?Sanngɛ wie liɛ’n, i sran aunnvuɛ silɛ’n, ɔ trɛ i seiin m’ɔ ti’n? ?Yɛle kɛ sɛ sran kun yo sa tɛ’n, i aunnvuɛ silɛ’n ti ɔ su dimɛn i jɔlɛ sɛsɛsɛ? Cɛcɛ, ɔ timan sɔ.
14 Zoova sinnin i nuan ijɔfuɛ Oze lika seli Izraɛlifuɛ’m be kɛ: ‘Jalɛ nga ń já wɔ yɛ’n, n su yraman wɔ le. Ɔ́ yó nanwlɛ su. Ń kló wɔ, ń sí wɔ aunnvuɛ.’ (Oze 2:21) Ndɛ sɔ’n kle weiin kɛ Zoova m’ɔ yo like nanwlɛ su yɛle kɛ ɔ nanti seiin, ɔ ti aunnvuɛ sifuɛ wie. I aunnvuɛ silɛ sɔ’n, ɔ nin i nzuɛn uflɛ wie’m be kɔ likawlɛ. Zoova ti ‘Ɲanmiɛn aklunyefuɛ, nin aunnvuɛ sifuɛ, ɔ yaci sa tɛ mun, nin ɲin kekle, ɔ nin fɔnlɛ mun cɛ. Sanngɛ sran ng’ɔ yo sa tɛ mun, ɔ semɛn kɛ w’a yoman like fi.’ (Ezipt Lɔ Tulɛ 34:6, 7) Biblu’n kɛn i ndɛ ekun kɛ: ‘Ɔ ti kɛ yɛbuɛ sa, sa ng’ɔ yo be’n be ti kpa lele tra su. I atin’m be ti seiin.’ (Mmla’n 32:4) I kwlaa sɔ’n kle kɛ, Zoova i sran aunnvuɛ silɛ’n traman i seiin nantilɛ’n su. Kɛ ɔ si sran aunnvuɛ’n, e wun kɛ ɔ ti seiin wie.
15, 16. (a) ?Kannzɛ Zoova ti seiin, ngue yɛ ɔ kle kɛ i like yolɛ yoman ya ɔ? (b) ?Kɛ Zoova wá núnnún andɛ mɛn kain nga’n, ngue yɛ i sufuɛ’m be kwla lafi su kɛ ɔ́ yó ɔ?
15 Kannzɛ Zoova ti seiin, sanngɛ i like yolɛ yoman ya. Afin amun nian. Kɛ sran kun nantiman mmla’n su mɔ be di i jɔlɛ be tu i fɔ’n, i su ɔ. Zoova yo sɔ wie kusu. Sanngɛ i seiin nantilɛ’n ti’n, sɛ sran kun nin delɛ fata’n, ɔ de i. I sɔ yɛ ɔ yoli Lɔtu nin i wa bla mun ɔn. Yɛle kɛ, kɛ ɔ́ núnnún Sodɔmu nin Gomɔru klɔ’n, ɔ deli be.—Bo Bolɛ 19:12-26.
16 Kɛ Zoova wá núnnún andɛ mɛn kain nga’n, e kwla lafi su kɛ “sran kpanngban kpa” mɔ be ti i sufuɛ mɔ ‘be kpuli be tralɛ mun Bua Gbanflɛn’n i mmoja’n nun’n,’ ɔ́ dé be. I sɔ’n ti yɛ be waan bé “fín afɛ dan’n nun” fíte’n niɔn.—Sa Nglo Yilɛ 7:9-14.
?Ngue ti yɛ ɔ fata kɛ e yo aunnvuɛ sifuɛ ɔ?
17. ?Like cinnjin kpa kun nga ti yɛ ɔ fata kɛ e si aunnvuɛ’n yɛle benin?
17 Kɛ be se kɛ sran si aunnvuɛ’n, Zoova nin Zezi Klist yɛ be kle e ɔ. Like cinnjin kpa kun nga ti yɛ ɔ fata kɛ e si aunnvuɛ’n, Nyanndra Mun 19:17 kɛn i ndɛ. I waan: ‘Like nga sran kun fa cɛ yalɛfuɛ’n, ɔ ti kɛ Anannganman yɛ w’a fa mɛn i sa. Ɔ maan Anannganman ɔ́ yó i mo.’ Kɛ Zoova wun kɛ e si aunnvuɛ kɛ i bɔbɔ nin i Wa’n be sa’n, ɔ yo i fɛ dan. (1 Korɛntfuɛ Mun 11:1) Kpɛkun, sɛ e yo sɔ’n, e wiengu’m bé sí e aunnvuɛ wie.—Lik 6:38.
18. ?Ngue ti yɛ ɔ fata kɛ e mian e ɲin e yo aunnvuɛ sifuɛ ɔ?
18 Sran ng’ɔ si aunnvuɛ’n, ɔ ti aklunyefuɛ, ɔ klo sran, yɛ ɔ ti sran kpa. Sran’m be yo i annvɔ ti yɛ ɔ si be aunnvuɛ ɔ. Kannzɛ Zoova ti seiin’n, sanngɛ i sran aunnvuɛ silɛ’n ti’n, ɔ faman ya ndɛndɛ. Ɔ trɛ i awlɛn sa tɛ yofuɛ’m be wun naan be kaci be nzuɛn’n. (2 Piɛr 3:9, 10) I sɔ’n kle kɛ sran ng’ɔ si aunnvuɛ’n, ɔ trɛ i awlɛn. Ɔ maan sɛ aunnvuɛ silɛ’n ti waka’n, nn é sé kɛ ɔ su mma kpa kpanngban. I mma sɔ’n wie yɛle sa sunman mɔ Ɲanmiɛn wawɛ’n maan sran yo’n. (Galasifuɛ Mun 5:22, 23) I sɔ’n ti’n, sɛ e mian e ɲin e yo aunnvuɛ sifuɛ’n, ɔ ti kpa dan!
“Be nga be si aunnvuɛ’n, be liɛ su ti ye”
19, 20. ?Kɛ be se kɛ aunnvuɛ silɛ’n kwla fɔ bulɛ’n, i bo yɛle benin?
19 Like nga ti yɛ ɔ fata kɛ e si aunnvuɛ’n, Zaki m’ɔ ti Zezi i sɔnnzɔnfuɛ’n kɛn i ndɛ. I waan: ‘Sɛ aunnvuɛ silɛ’n nin fɔ bulɛ’n be ti sran’n, nn aunnvuɛ silɛ’n kwla fɔ bulɛ’n.’ (Zak 2:13b) Aunnvuɛ mɔ Zoova i sufuɛ’m be si be wiengu’n, i ndɛ yɛ Zaki kan ɔn. Wafa nga aunnvuɛ silɛ’n kwla fɔ bulɛ’n yɛle kɛ, kɛ i blɛ wá jú mɔ é wá ‘kán sa nga e yoli be’n klé Ɲanmiɛn’n,’ e ti kpɔlɛ tɛ mɔ i Wa’n yili ti’n, i wla su fiman sran ng’ɔ si aunnvuɛ’n i su. Ɔ́ yáci i sa tɛ’n cɛ́ i. (Rɔmfuɛ Mun 14:12) Kɛ e niɛn i kpa sa’n, like kun nga ti yɛ kɛ Davidi kunndɛli Bat-Seba’n, Ɲanmiɛn sili i aunnvuɛ’n yɛ ɔ o lɛ. Yɛle kɛ Davidi bɔbɔ’n, ɔ ti aunnvuɛ sifuɛ. (1 Samiɛl 24:4-7) Sanngɛ, ‘kɛ Ɲanmiɛn dí be nga be siman sran aunnvuɛ’n be jɔlɛ’n, ɔ su siman be aunnvuɛ.’ (Zak 2:13a) Ɔ maan, kɛ Ɲanmiɛn se kɛ be nga ‘sran yoman be annvɔ’n’ be nin ‘kunlɛ fata’n,’ i sɔ’n boman e nuan!—Rɔmfuɛ Mun 1:31, 32.
20 Kɛ Zezi kán Ɲanmiɛn ndɛ oka’n su lɔ’n, ɔ seli kɛ: ‘Be nga be si aunnvuɛ’n, be liɛ su ti e, afin Ɲanmiɛn wá sí be aunnvuɛ!’ (Matie 5:7) Be nga be kunndɛ kɛ Ɲanmiɛn si be aunnvuɛ’n, ndɛ sɔ’n kle weiin kɛ ɔ fata kɛ be bɔbɔ be si aunnvuɛ! Like suanlɛ ng’ɔ́ bá lɛ nun’n, é wá wún wafa nga e kwla yo aunnvuɛ sifuɛ’n.
?Ngue yɛ amun suannin ɔn?
• ?Aunnvuɛ silɛ’n i bo yɛle benin?
• ?Wafa sɛ yɛ be kwla si sran kun i aunnvuɛ ɔ?
• ?Wafa sɛ yɛ Zoova kwla si sran’m be aunnvuɛ naan i kunngba’n w’a yo seiin ɔn?
• ?Ngue ti yɛ ɔ fata kɛ e yo aunnvuɛ sifuɛ ɔ?
[Foto, bue 4]
Be nga be leman wie’n, be yo Zoova i annvɔ kɛ bakan yo i nin’n i annvɔ’n sa.
[Foto, bue 6]
?Ngue yɛ abonuan sa nga Zezi yoli be’n, be kle e aunnvuɛ silɛ’n su ɔ?
[Foto, bue 7]
?Aunnvuɛ mɔ Zoova sili Davidi’n, ɔ ti i nuan su?
[Foto, bue 8]
Ɲanmiɛn i seiin m’ɔ ti’n, i ti yɛ ɔ si sran’m be aunnvuɛ ɔ.