?Wafa sɛ yɛ e kwla si sran aunnvuɛ ɔ?

‘Maan e yo sran’m be kwlaa be ye, sanngɛ maan e dun mmua yo man e niaan nga e nin be e lafi Klist su’n.’—GALASIFUƐ MUN 6:10.

1, 2. ?Ngue yɛ Samarifuɛ’n i su ndɛ’n kle e aunnvuɛ silɛ’n su ɔ?

CƐN kun mɔ mmla sifuɛ kun nin Zezi bé kókó yalɛ’n, ɔ usali Zezi kɛ: ‘?Wan yɛ ɔ ti min wiengu’n niɔn?’ Zezi buli ɲanndra naan bian’n, ɔ wun i wlɛ. Ɔ seli i kɛ: ‘Bian kun fin Zerizalɛmu ɔ su kɔ Zeriko, ɔ ko tɔli kodiawiefuɛ’m be nun, be deli i wun ninnge’n kwlaa, be boli i lele, kɛ ɔ ka kaan ɔ́ wú’n, yɛ be yacili lɛ ɔli ɔ. Ɲanmiɛn ɲrun jranfuɛ kun sín atin kunngba sɔ’n su, ɔ wunnin bian sɔ’n, ɔ sɛnnin i wun ɔli. Yɛ Levitfuɛ kun kusu sín lɛ’n, ɔ wunnin bian sɔ’n, ɔ sɛnnin i wun ɔli. Sanngɛ Samarifuɛ kun m’ɔ su kɔ lika’n, ɔ ko fiteli i su, kɛ ɔ wunnin i’n, ɔ yoli i annvɔ. Ɔ guɛguɛli i kannin’m be nun ngo nin nzan, naan w’a cici be su, yɛ ɔ fɛ fuli nnɛn’n mɔ i bɔbɔ fu su’n i su ɔ, ɔ fɛ ɔli aofuɛ sua kun nun, ɔ niɛnnin i lika. Kɛ aliɛ cɛnnin’n, ɔ yili denie nɲɔn mannin aofuɛ sua’n i sunianfuɛ, ɔ seli kɛ: “Niɛn i lika kpa, like nga a mɛn i ekun’n, sɛ m ba’n, ń yí i nuan like mán ɔ.” ?Be sran nsan sɔ’n, ɔ ɲrun’n, be nun onin yɛ ɔ niannin bian m’ɔ tɔli kodiawiefuɛ’m be nun’n i lika kɛ i wiengu sran sa ɔ?’ Yɛ i waan: ‘Yɛle nga m’ɔ sili i aunnvuɛ’n.’—Lik 10:25, 29-37a.

² Kɛ be se kɛ sran si aunnvuɛ’n, nanwlɛ, yɛle Samari bian’n i liɛ’n! Yɛle kɛ, sran mɔ be yoli i like yaya’n, ɔ timɛn i fuɛ. Sanngɛ, ɔ yoli i ye. Afin, sran’n yoli i annvɔ. I sɔ’n kle kɛ bé sí sran aunnvuɛ’n, ɔ fataman kɛ be niɛn i finwlɛ’n annzɛ i Ɲanmiɛn sulɛ wafa’n. Kɛ Zezi wieli ndɛ’n i kan mɔ bian m’ɔ usɛli i sa’n wunnin i wlɛ’n, Zezi seli i kɛ: “Ɔ kusu, ko yo i kunngba sɔ’n.” (Lik 10:37b) Kɛ nga Zezi fa kɛnnin i lɛ’n, maan e kusu e mian e ɲin e si sran’m be aunnvuɛ. ?Sanngɛ, wafa sɛ yɛ cɛn kwlaa é yí i sɔ liɛ’n i nglo e nzuɛn’n nun ɔn?

‘Sɛ wienun ɔn e niaan kun leman tralɛ’n’

3, 4. ?Ngue ti yɛ ɔ ti cinnjin kpa kɛ e si e niaan Klistfuɛ’m be aunnvuɛ ɔ?

³ Akoto Pɔlu seli kɛ: ‘Sɛ e ɲɛn i wun alaje’n, maan e yo sran’m be kwlaa be ye, sanngɛ maan e dun mmua yo man e niaan nga e nin be e lafi Klist su’n.’ (Galasifuɛ Mun 6:10) Amun e nian wafa nga e kwla si e niaan Klistfuɛ’m be aunnvuɛ dan’n.

⁴ Zaki m’ɔ ti Zezi i sɔnnzɔnfuɛ’n wlɛli i wiengu Klistfuɛ’m be fanngan kɛ be si aunnvuɛ. Ɔ seli be kɛ: ‘Kɛ Ɲanmiɛn dí be nga be siman sran aunnvuɛ’n be jɔlɛ’n, ɔ su siman be aunnvuɛ.’ (Zak 2:13) Ndɛ nga Zaki dun mmua kannin naan w’a kan ndɛ nga’n, ɔ nin i sin liɛ ng’ɔ kannin be’n, be uka e naan y’a yi e aunnvuɛ silɛ’n i nglo. I wie yɛle ndɛ ng’ɔ o Zak 1:27 nun’n. Ɔ seli kɛ: ‘Ɲanmiɛn sulɛ m’ɔ ti kpa mɔ fiɛn fi nunmɛn i wun e Si Ɲanmiɛn ɲrun’n, yɛle aika mun nin angbeti mmla’m mɔ be wun ɲrɛnnɛn’n be lika nianlɛ, ɔ nin be wun su nianlɛ mɛn nun sa tɛtɛ yolɛ’m be nun.’ Kpɛkun Zak 2:15, 16 nun’n, ɔ seli kɛ: ‘Maan e se kɛ wienun ɔn e niaan bian annzɛ e niaan bla kun leman tralɛ, yɛ ɔ leman aliɛ. ?Sɛ amun nun kun se i kɛ: “Maan ɔ wun jɔ wɔ fɔuun, maan a ɲan tannin kla, yɛ maan ɔ ku yi!” mɔ sanngɛ ɔ mɛnmɛn i like nga i sa miɛn i wun’n, nzu ye yɛ w’a yo a mɛn i ɔ?’

5, 6. ?Wafa sɛ yɛ e kwla si e asɔnunfuɛ’m be aunnvuɛ dan ɔn?

⁵ Sran m’ɔ leman wie mɔ be ti i wun ɲanman nun’n, i sɔ yolɛ’n ti Ɲanmiɛn sulɛ kpa’n i nzɔliɛ’n kun. I sɔ’n ti’n, e asɔnun liɛ’n nun’n, nán e nuan bui su yɛ sran’m be ndɛ lo e ɔ. Sanngɛ, be nga kekle’n o be su’n, annvɔ mɔ be yo e’n ti’n, e ti be wun ɲanman nun. (1 Zan 3:17, 18) I wie yɛle kɛ, sɛ aniaan kun i wunnɛn yo i ya’n, e kwla tɔn aliɛ e ko mɛn i. Sɛ aniaan kpɛnngbɛn wie o lɛ’n, e kwla ko yo i awlo nun ninnge mun. Kpɛkun, sɛ e kwla man aniaan wie’m be loto kpa annzɛ e fu loto kunngba’n nun e ko asɔnun’n, maan e yo sɔ. Be nga kekle’n o be su sakpa’n, sɛ e uka be klun ufue su’n, ɔ ti kpa dan. Afin, é klé kɛ e si aunnvuɛ.—Mmla’n 15:7-10.

⁶ E niaan mɔ be su trɛ mɔ be leman wie’n, ɔ ti kpa kɛ e ti be wun ɲanman nun. Sanngɛ ng’ɔ ti kpa ekun’n yɛle kɛ, e nian be lika Ɲanmiɛn sulɛ’n nun. I lɛ nun’n, Biblu’n waan e ‘wla be nga be awlɛn sɔman’n be yakpa, e uka be nga be leman wunmiɛn’n.’ (1 Tɛsalonikfuɛ Mun 5:14) Be mɔ be ti ‘bla kpɛnngbɛn’ mun kusu’n, ɔ fata kɛ be ‘yo sa nga Ɲanmiɛn sran yo ɔ ɔ ti su’n.’ (Tit 2:3) Asɔnun sunianfuɛ’m be liɛ’n, Biblu’n waan: ‘Bé yó kɛ like mɔ be fiɛ i bo mɔ kɛ aunmuan’n ɔ́ fíta’n ɔ ɲanman be’n sa. Bé yó kɛ lika mɔ be fia nun, mɔ kɛ aunmuan dan’n ɔ́ tú’n, ɔ kanman be’n sa.’—Ezai 32:2.

7. ?Klistfuɛ klikli’m be blɛ su’n, ngue yɛ Antiɔsu lɔ Klistfuɛ’m be yoli m’ɔ kle e wafa nga e kwla si aunnvuɛ’n niɔn?

⁷ Klistfuɛ klikli’m be blɛ su’n, sɛ angbeti bla nin aika mma mun, ɔ nin be mɔ be leman wie’n be o asɔnun kun nun’n, i nunfuɛ’m be uka be. Sanngɛ ɔ ju wie ɔ, be fali like ko tili be niaan nga be o lika uflɛ’n, be wun ɲanman nun. I wie yɛle ‘awe dan kpa m’ɔ kpɛnnin mɛn wunmuan’n nun’ mɔ Ɲanmiɛn nuan ijɔfuɛ Agabisi kɛnnin i ndɛ’n. Kɛ ɔ yoli sɔ’n, Zezi i sɔnnzɔnfuɛ nga be o Antiɔsu lɔ’n be ‘kwlaa be bo yoli kun kɛ sran’m be kwlakwla be fa like nga be sa ju su’n, be ko man aniaan nga be o Zide lɔ’n maan be fa ti be wun ɲanman nun.’ I sɔ like liɛ’n, ‘be yiyi fa mannin Barnabasi nin Sɔlu’ naan b’a fa ko man lɔ kpɛnngbɛn mun. (Sa Nga Be Yoli’n 11:28-30) Andɛ kusu’n, “sran kpa nanwlɛfuɛ m’ɔ si ngwlɛlɛ’n,” ɔ siesieli komite wie mun naan sɛ sanvuɛsa ɲan aniaan mun’n, be nian be lika. I wie yɛle kɛ, sɛ aunmuan dan wie tu’n, annzɛ asiɛ’n keje annzɛ kusu jenvie’n ɔ bo dan ɔ saci ninnge mun’n, be yɛ be nian be lika ɔ. (Matie 24:45) Kɛ i sɔ sa’m be ju mɔ komite sɔ’n bo i jɔ kɛ e ko uka aniaan mun, annzɛ e man e klunklo like’n, mɔ e yo sɔ’n, e kle i lɛ’n nun kɛ e si aunnvuɛ dan.

‘Sɛ an bu sran’n wie kpa tra wie’n’

8. ?Ngue ti yɛ sran mɔ be bu i kpa tra wie’n, ɔ nin aunnvuɛ silɛ’n kɔman likawlɛ ɔ?

⁸ Zaki seli kɛ: ‘Sɛ an bu sran’n wie kpa tra wie’n, nn amun a yo sa tɛ. Kɛ be nian mmla nun’n, be wun kɛ amun a tɔn mmla’n.’ Sran ng’ɔ yo sɔ’n, ɔ kleman kɛ ɔ si aunnvuɛ. Kusu’n, ‘mmla nga wie nunmɛn i sin’ mɔ yɛle sran klolɛ’n, ɔ nantiman su. (Zak 2:8, 9) Sɛ sran dan mun yɛ e kpli e yo be ye’n, ɔ cɛman naan sɛ ‘ɲrɛnnɛnfuɛ’n kpán’n,’ y’a bu e sukpɔ nun waka. (Nyanndra Mun 21:13) Sran mɔ be bu i kpa tra wie’n, ɔ nin aunnvuɛ silɛ’n kɔman likawlɛ.

9. ?Sɛ e ɲin yi sran kun kpa annzɛ e yo i mo dan tra su’n, ngue ti yɛ i sɔ’n timan tɛ ɔ?

⁹ Ɔ fataman kɛ e kpa sran’m be nun. ?Sanngɛ sɛ sran kun o lɛ naan like wie ti e ɲin yi i kpa’n, i sɔ’n ti tɛ? Cɛcɛ. Afin amun e nian. Kɛ Pɔlu kán Epafroditi m’ɔ ti i wiengu junman difuɛ’n i ndɛ’n, ɔ seli Filipu lɔ Klistfuɛ mun kɛ: “An bu sran nga be ti kɛ i sa’n be sran.” ?Ngue ti yɛ Pɔlu seli be sɔ ɔ? I waan: ‘Afin Klist junman’n ti yɛ ɔ́ wá dé wú’n niɔn. Ɔ fɛ i wun mannin wie’n kɛ ɔ́ dí junman nga amun a ɲanman amun ti a diman b’a manman min’n.’ (Filipfuɛ Mun 2:25, 29, 30) Junman kpa mɔ Epafroditi dili’n ti’n, ɔ nin i fata kɛ be yo i mo dan tra su. 1 Timote 5:17 kusu se kɛ: ‘Asɔnun kpɛnngbɛn nga be sie asɔnun’n i kpa’n, maan be bu be sran yɛ be yo be mo dan. I li kpɛnngbɛn nga be di junman kpa mɔ be kan Ɲanmiɛn ndɛ yɛ be kle like’n, maan be mo yolɛ liɛ’n yo dan tra su.’ Be nga be nzuɛn’n ti kpa kusu’n, ɔ nin i fata kɛ e ɲin yi be kpa wie. Sɛ e yo i kwla ngalɛ’n, y’a kpaman sran nun.

‘Ngwlɛlɛ m’ɔ fin ɲanmiɛn su’n, sɛ ɔ ti sran’n, nn é sé kɛ ɔ si aunnvuɛ dan’

10. ?Ngue ti yɛ ɔ fata kɛ e nian e nuan’n su ɔ?

¹⁰ Zaki kannin ndɛ m’ɔ fin be nuan fite’n, i ndɛ wie. Ɔ seli kɛ: ‘Be nuan’n, ɔ ti kɛ duwlɛ sa! E nuan sɔ’n yɛ e fa manman e Min’n m’ɔ ti e Si’n niɔn. E nuan kunngba’n, yɛ e fa wua sran mɔ Ɲanmiɛn yili be’n mɔ be ti kɛ i sa’n, be amuɛn’n niɔn. Ɲanmiɛn manmanlɛ’n nin amuɛnnwua’n be fin nuan kunngba sɔ’n nun.’ Kpɛkun, ɔ kan gua su kɛ: ‘Sɛ amun klunwi’n ti amun ɲin ci sran yɛ an bu amun bɔbɔ amun wun akunndan’n, nán an fa amun ngwlɛlɛ’n di amun nuan, yɛ nán an fa nanwlɛ’n kaci ato. I sɔ ngwlɛlɛ liɛ’n finman ɲanmiɛn su, ɔ ti asiɛ’n su wa liɛ, ɔ ti klɔ sran liɛ, ɔ fin mmusu’m be si Satan. Afin lika nga be ɲin ci sran mɔ be bu be bɔbɔ be wun akunndan lɛ’n, sa sukusuku’n nin sa tɛtɛ’n kwlaa o lɛ. Ngwlɛlɛ m’ɔ fin ɲanmiɛn su’n, sɛ ɔ ti sran’n, nn é sé kɛ sa tɛ kaan sa nunmɛn i wun. Ɔ kloman ndɛnngan, ɔ ti wɛtɛfuɛ, be nin i kwla koko yalɛ, ɔ si aunnvuɛ dan, ɔ yo sa kpa, ɔ buman sran’n wie kpa traman wie, yɛ ɔ kloman dunman.’—Zak 3:8-10a, 14-17.

11. ?Wafa sɛ yɛ e nuan’n kwla kle kɛ e si aunnvuɛ ɔ?

¹¹ Sɛ ngwlɛlɛ’n ti sran’n, nn é sé kɛ ɔ ‘ɔ si aunnvuɛ’n.’ Kɛ nga e fa wun i lɛ’n, e nuan nun ndɛ’n yɛ ɔ́ klé kɛ ɔ sie e annzɛ ɔ sieman e ɔ. Afin amun nian. ?Sɛ e ɲin m’ɔ ci sran’n ti’n, e di e nuan, e bua ato, annzɛ kusu e kan sran wun ndɛ tɛ’n, bé bú e sɛ? Jue Mun 94:4 waan: “Be nga be nuan nun ndɛ’m be ti dandan ngunmin’n, be ti sa tɛ yofuɛ.” Sran mɔ w’a yoman like fi’n, i wun ndɛ tɛ kanlɛ kaan sa kusu’n, ɔ kwla yo maan be bumɛn i sran kun. (Jue Mun 64:2-4) ‘Lalofuɛ gblɛfuɛ mɔ ato ble kpa’n yɛ ɔ bua’n,’ i tɛ liɛ m’ɔ ti’n kusu’n, be kɛnmɛn i lele. (Nyanndra Mun 14:5; 1 Famiɛn Mun 21:7-13) Ɔ maan, kɛ Zaki wieli be nuan’n i tɛ m’ɔ ti’n i ndɛ kan’n, ɔ seli kɛ: ‘N niaan mun nán maan ɔ yo sɔ.’ (Zak 3:10b) Ɔ maan, sɛ e si aunnvuɛ sakpa’n, nán maan e nuan nun ndɛ’n kle kɛ e klo ndɛnngan. Sanngɛ, ɔ fata kɛ ɔ kle kɛ e ti wɛtɛfuɛ naan be nin e kwla koko yalɛ. Zezi seli kɛ: ‘Ń kán klé amun kɛ, jɔlɛ dilɛ cɛn nun’n, ndɛ ngbɛn kwlaa mɔ sran’m be kannin’n, be bɔbɔ yɛ bé kán be su ndɛ ɔ.’ (Matie 12:36) I kwlaa sɔ’n ti’n, maan ndɛ ng’ɔ fin e nuan’n, ɔ kle kɛ e si aunnvuɛ!

“An yaci sa nga sran’m be yo amun’n cɛ be”

12, 13. (a) ?Ngue yɛ junman difuɛ mɔ i min’n i kalɛ o i su’n, i su ɲanndra’n kle e aunnvuɛ silɛ’n su ɔ? (b) ?Kɛ Zezi se kɛ e yaci e niaan’n i sa tɛ’n ‘cɛ i lele kpɛ ableso fa nso’n,’ i bo’n yɛle benin?

¹² Junman difuɛ mɔ i min’n i talan akpi blu o i su mɔ Zezi fɛli i ndɛ’n buli ɲanndra’n, ɔ kle e wafa kun ekun nga e kwla si aunnvuɛ’n. Yɛle kɛ, kɛ mɔ junman difuɛ’n leman like naan w’a tuɛ i min’n i kalɛ’n ti’n, ɔ la kondoli i bo kɛ ɔ si i aunnvuɛ. Ɔ “yoli i min’n i annvɔ.” Ɔ maan, ɔ yaci kalɛ’n cɛli i. Kɛ ɔ́ kɔ́’n, ɔ nin i wiengu junman difuɛ kun mɔ i denie 100 o i su’n, be yiali. I liɛ’n su’n, w’a simɛn i wiengu’n i aunnvuɛ, ɔ ko wlɛli i bisua. Kɛ be min’n tili’n, ɔ flɛli junman difuɛ klun tɛfuɛ sɔ’n naan w’a se i kɛ: “Sran tɛfuɛ, kɛ a kpatali min’n, n yacili ɔ kalɛ liɛ’n kwlaa cɛli wɔ. ?Kɛ n sili wɔ aunnvuɛ’n, ɔ kusu, a kwlá siman ɔ wiengu’n i aunnvuɛ wie?” Famiɛn’n fali ya naan w’a wla junman difuɛ sɔ’n i bisua wie. Zezi gua ɲanndra’n i bo kɛ: ‘Sɛ an yaciman amun wiengu’m bé sa mɔ be yo amun’n cɛman be amun klun ufue su’n, kɛ min Si m’ɔ o ɲanmiɛn su lɔ’n ɔ́ wá yó amun sɔ ɔ.’—Matie 18:23-35.

¹³ Ɲanndra sɔ’n kle weiin kɛ, kɛ be si sran aunnvuɛ’n, be yaci i sa tɛ’n cɛ i! E kusu’n, sa tɛ mɔ e yo’n, ɔ ti e su kalɛ dan kpa. Sanngɛ, Zoova yaci cɛ e. ?Kɛ m’ɔ yo sɔ’n ti’n, ɔ nin i fataman kɛ e kusu e ‘yaci sa nga sran’m be yo e’n cɛ be?’ (Matie 6:14, 15) Kwlaa naan Zezi w’a bu junman difuɛ m’ɔ simɛn i wiengu aunnvuɛ’n i su ɲanndra’n, Piɛli usɛli i kɛ: ‘?Nannan, sɛ n niaan kun yo min tɛ’n, kpɛ nɲɛ yɛ ń yáci cɛ i ɔ? ?Lele kpɛ nso?’ Zezi seli i kɛ: ‘Nán kpɛ nso ɔ, sanngɛ lele kpɛ ableso fa nso.’ (Matie 18:21, 22) I sɔ mɔ Zezi kannin’n i bo’n yɛle kɛ, sa nga sran yo mɔ e yaci cɛ i klun ufue su’n, ɔ leman kpɛ bo.

14. ?Kɛ nga Matie 7:1-4 fa kannin’n sa’n, wafa sɛ yɛ cɛn kwlaa e kwla si aunnvuɛ ɔ?

¹⁴ Kɛ Zezi kán Ɲanmiɛn ndɛ’n oka’n su lɔ’n, ɔ kleli wafa kun ekun nga e kwla si aunnvuɛ’n. Ɔ seli kɛ: ‘Nán an bu sran fɔ maan Ɲanmiɛn bu amun fɔ, afin fɔ kunngba nga an fa bu sran’n, yɛ Ɲanmiɛn wá fá bú amun ɔn. ?Ɔ yo sɛ yɛ a wun wla’n m’ɔ o ɔ niaan i ɲin su’n, sanngɛ a wunman janvlɛ’n m’ɔ o ɔ bɔbɔ ɲinma su’n niɔn? ?Ɔ yo sɛ yɛ a se ɔ niaan kɛ: “Jran maan n yi ɔ ɲin su wla’n,” sanngɛ janvlɛ o ɔ bɔbɔ ɔ ɲin su’n niɔn?’ (Matie 7:1-4) I sɔ’n ti’n, maan cɛn kwlaa e si e wiengu’m be aunnvuɛ e yaci sa tɛ nga be yo e’n, e cɛ be. Nán maan e klo sran’m be fɔ bulɛ.

“Maan e yo sran’m be kwlaa be ye”

15. ?Ngue ti yɛ nán e wiengu Klistfuɛ’m be ngunmin yɛ ɔ fata kɛ e si be aunnvuɛ ɔ?

¹⁵ Kannzɛ Zaki fluwa’n tin su fii kɛ e si e wiengu Klistfuɛ’m be aunnvuɛ’n, sanngɛ i sɔ’n kleman kɛ be ngunmin yɛ ɔ fata kɛ e si be aunnvuɛ ɔ. Jue Mun 145:9 waan: “Anannganman ti kpa man sran’m be kwlakwla. Ɔ klo ninnge m’ɔ yili be’n be ngba.” Kpɛkun, Biblu’n wla e fanngan kɛ e ‘nian like nga Ɲanmiɛn yo’n su, e yo’ naan e “yo sran’m be kwlaa be ye.” (Efɛzfuɛ Mun 5:1; Galasifuɛ Mun 6:10) I yo, e kloman ‘mɛn dilɛ’n, nin ninnge nga be o mɛn’n nun’n.’ Sanngɛ, nɛ́n i sɔ’n ti yɛ sɛ mɛn’n nunfuɛ’m be sa mian’n, e su nianman be lɔ ɔ.—1 Zan 2:15.

16. ?Wafa nga é yó sran kun ye jú’n, ɔ fin ngue?

¹⁶ Kɛ ‘blɛ’n fa ti mɔ sa’m be fa ju’n i su like yɛ e wun i’ ɔ. I sɔ’n ti’n, sɛ sanvuɛsa ɲan sran’n, maan e mɔ e ti Klistfuɛ’n e ukɛ i, nán e sisi e bo. (Akunndanfuɛ’n 9:11) Ɔ ti sɔ, sanngɛ oteku, kɛ i sa klun fa ti’n, yɛ ɔ mɛn i yi i njin ɔn. (Nyanndra Mun 3:27) Kusu’n, maan e nian nun kpa. Afin, ɔ cɛman naan like mɔ é fá mán sran’n i cɛn kwlaa ti’n, w’a yo fuɛnfuɛ. (Nyanndra Mun 20:1, 4; 2 Tɛsalonikfuɛ Mun 3:10-12) Ɔ maan, sɛ sran yo e annvɔ naan é yó ye’n, maan e yo i ngwlɛlɛ su.

17. ?Wafa sɛ yɛ be nga be timan Klistfuɛ’n, e kwla si be aunnvuɛ dan ɔn?

¹⁷ Kɛ e bo jasin fɛ’n, yɛ e yo be nga be timan Klistfuɛ’n be ye dan ɔn. Afin, Ɲanmiɛn Ndɛ mɔ sran’m be simɛn i’n ti’n, sɛ é kwlá sé’n, be o aosin nun. Be wunman be ɲrun nin be sin. Be ti ‘afɛfuɛ yɛle kɛ be bo je kɛ bua mɔ be leman sunianfuɛ’n sa.’ (Matie 9:36) I lɛ nun’n, Ɲanmiɛn Ndɛ’n kwla yo ‘kɛ kannin sa, ɔ kpaja be bo.’ Ɔ maan, bé wún sa ng’ɔ tɔ be su’m be trawlɛ. Asa ekun’n, Ɲanmiɛn Ndɛ’n kwla ‘kpaja be ɲrun atin’n su weiin.’ Yɛle kɛ, like nga Ɲanmiɛn seli kɛ ɔ́ wá yó mɔ Biblu’n kan be ndɛ’n ti’n, bé wún kɛ like kpa o be ɲrun. Ɔ maan, be wla’n gúa ase. (Jue Mun 119:105) Ndɛ nanwlɛ m’ɔ o Biblu’n nun mɔ i kunngba yɛ ɔ kwla yo sran’m be ye’n, i kanlɛ’n ti e cenjele dan! Kɛ é sé yɛ’n, ‘ɲrɛnnɛn dan’n’ w’a mantan koko.’ I sɔ’n ti’n, Ɲanmiɛn Sielɛ’n i jasin fɛ’n mɔ e bo’n, ɔ nin like mɔ e kle sran mun naan be kaci Zezi i sɔnnzɔnfuɛ’n, maan e di i sɔ junman’n i kpa juejue su. (Matie 24:3-8, 21, 22, 36-41; 28:19, 20) Like uflɛ fi nunman lɛ mɔ e kwla yo e kle kɛ e si sran’m be aunnvuɛ dan ekun ɔn.

‘An fa ninnge mun cɛ’

18, 19. ?Ngue ti yɛ ɔ fata kɛ cɛn kwlaa e mian e ɲin e si aunnvuɛ ɔ?

¹⁸ Zezi seli kɛ: ‘Sɛ an fa amun klowa mun nin amun talie mun be nun ninnge cɛ yalɛfuɛ amun klun ufue su’n, ɔ ti kpa.’ (Lik 11:41) Kɛ sran ng’ɔ si aunnvuɛ’n cɛ́ like’n, ɔ cɛ i klun ufue su. (2 Korɛntfuɛ Mun 9:7) Andɛ mɛn nga nun mɔ sran’m be yo wlɛ, be bu be ngunmin be wun akunndan mɔ sran ndɛ loman be’n, kɛ sran kun wun kɛ be cɛ i like klun ufue su’n, i sɔ’n yo i fɛ dan!

¹⁹ I sɔ’n ti’n, maan cɛn kwlaa e mian e ɲin si aunnvuɛ dan. Kɛ é yó sɔ kɔ́’n, nn é yó kɛ Ɲanmiɛn sa. Ɔ maan, e klun jɔ́ e. É wún kɛ e nunman mɛn’n nun sa ngbɛn.—Matie 5:7.

?Ngue yɛ amun suannin ɔn?

• ?Ngue ti yɛ ɔ ti cinnjin kɛ e si e wiengu Klistfuɛ’m be aunnvuɛ dan ɔn?

• ?Wafa sɛ yɛ e kwla si e niaan Klistfuɛ’m be aunnvuɛ ɔ?

• ?Wafa sɛ yɛ e kwla yo be nga be timan Klistfuɛ’n be kpa ɔ?

[Foto, bue 9]

Samari bian’n sili aunnvuɛ.

[Foto, bue 10]

Klistfuɛ’m be si aunnvuɛ dan.

[Foto, bue 13]

Kɛ e kan Biblu’n nun ndɛ nanwlɛ’n e kle be nga be timan Klistfuɛ’n, e si be aunnvuɛ dan.