Siefuɛ aɲanbeunfuɛ mɔ w’a faman ajalɛ kpa’n
ZUIFU’M be kpɛn kun ti gbanflɛn aɲanbeunfuɛ. Ɔ ti sran sɛsɛ, ɔ nanti mmla’n su, yɛ ɔ klo Ɲanmiɛn. Cɛn kun’n, ɔ ko toli Zezi, ɔ kotoli i bo kpɛkun ɔ usɛli i kɛ: ‘?Nja, ɔ mɔ a ti like klefuɛ kpa’n, ngue yɛ ń yó naan man ɲan anannganman nguan’n niɔn?’
Zezi tɛli i su kɛ, sɛ i waan ɔ́ ɲán anannganman nguan’n, ɔ fata kɛ ɔ fa Ɲanmiɛn mmla’n su. Ɔ seli Zezi kɛ ɔ yiyi ndɛ sɔ’n nun kpa kle i. Yɛ Zezi seli i kɛ: “Mmla sɔ’n yɛ ɔ o yɛ: nán kun sran, nán kunndɛ bla annzɛ bian ɔ yi annzɛ ɔ wun bo, nán wua, nán tɔn sran suɛn, bu ɔ si nin ɔ nin be sran, yɛ klo ɔ wiengu kɛ ɔ fa klo ɔ bɔbɔ wun’n sa.” Mmla nga Ɲanmiɛn fa mannin Moizi’n, i nun ndɛ cinnjin yɛle ngalɛ mun. Yɛ gbanflɛn’n seli Zezi kɛ: ‘N fɛ i kwlaa sɔ’n su. ?Ngue yɛ ɔ te ka ekun ɔn?’—Matie 19:16-20.
Zezi “kloli i sa,” naan w’a se i kɛ: ‘Ɔ te ka wɔ like kun yolɛ, kɔ, ko yo ɔ ninnge’m be atɛ, fɛ i sika’n man yalɛfuɛ mun, yɛ á ɲán ninnge kpakpa ɲanmiɛn su lɔ. Naan bla wa su n su.’—Mark 10:17-21.
Bian’n yɛ i ɲin w’a blo yɛ. ?Ɔ́ yáci i ninnge mun naan ɔ́ sú Zezi su? ?Annzɛ ninnge sɔ mun yɛ be lo i ɔ? ?Ɔ́ síe i awlɛn su ninnge mun asiɛ’n su wa, annzɛ ɲanmiɛn su lɔ yɛ ɔ́ síe be ɔ? Kɛ ɔ yo naan ɔ fa ajalɛ kun’n, ɔ yoli kekle mɛnnin i. Nán kɛ ɔ kloman Ɲanmiɛn ɔn. Afin ɔ fa Mmla’n su, yɛ ɔ su kunndɛ like uflɛ ekun m’ɔ kwla yo naan Ɲanmiɛn klun w’a jɔ i wun’n. ?Ajalɛ benin yɛ ɔ fali ɔ? Biblu’n se kɛ: ‘Ndɛ sɔ’n yoli i ya, ɔ jao ɔli, yɛle kɛ ɔ ti aɲanbeunfuɛ dan.’—Mark 10:22.
Gbanflɛn’n w’a yoman ngwlɛlɛfuɛ. Sɛ ɔ ti kɛ ɔ suli Zezi su ɔ yoli i sɔnnzɔnfuɛ’n, nn ɔ ɲannin anannganman nguan m’ɔ kunndɛ’n. Biblu’n kanman like ng’ɔ juli gbanflɛn sɔ’n su’n. Sanngɛ e si kɛ, kɛ ɔ dili afuɛ kɔe ablanan’n, Rɔmu sonja’m be wa sacili Zerizalɛmu klɔ’n, ɔ nin Zide mɛn’n i lika sunman. Blɛ sɔ nun’n, Zuifu aɲanbeunfuɛ’m be sunman lika be ninnge’m be sacili. Asa, be kali nun.
Gbanflɛn siefuɛ’n w’a faman ajalɛ kpa. Sanngɛ akoto Piɛli nin Zezi i sɔnnzɔnfuɛ’m be liɛ’n, be fali ajalɛ kpa. Be ‘yacili be ninnge kwlaa’ be suli Zezi su. Ajalɛ sɔ’n mɔ be fali’n, be dili su ye dan! Zezi seli be kɛ ninnge nga be yacili i be sin’n, bé ɲán be wun su kpɛ blu. Asa, bé ɲán anannganman nguan. Ajalɛ nga be fali’n, w’a yoman be nzisɔ le.—Matie 19:27-29.