Maan e ‘si aunnvuɛ’ kpa

AWLANMANNUN’N, e wiengu klɔ sran’m be sa nin a mianman aunnvuɛ silɛ i wun kɛ andɛ sa le. Be kunndɛ kɛ be uka be. Afin awe, nin tukpaciɛ, nin yalɛ, nin nzaje sa mun, nin nvle kun nunfuɛ mɔ be afiɛn’n sɛman’n, ɔ nin ninnge kɛ asiɛ’n i kejelɛ sa, nin aunmuan dan m’ɔ tu saci ninnge mun sa’n, ɔ nin nzue m’ɔ tɔ di lika’n, yɛ be o be su ɔ. Sran ng’ɔ si aunnvuɛ’n, yɛle sran nga kɛ ɔ wun kɛ i wiengu su fɛ’n, ɔ kunndɛ kɛ ɔ́ úkɛ i naan afɛ sɔ’n jaso i su annzɛ ɔ yo sɔsɔ’n. Wafa kunngba nga kɛ wia’n ko bo e kpa’n mɔ e nɔn nzue flɔlɔ’n, mɔ e wun fa jɔ e’n, aunnvuɛ silɛ’n kusu yo maan be nga be wla w’a bo be wun’n, be wla gua ase. Ɔ kwla yo maan afɛ ng’ɔ o be su’n kan ase, yɛ ɔ kwla wla be fanngan.

Ninnge nga e yo be’n, nin ndɛ nga e kan be’n be nun’n, e kwla yi e aunnvuɛ silɛ’n i nglo. I wie yɛle kɛ maan e nian e wiengu lika, yɛ kɛ e wiengu sa mian fɔnvɔlɛ wun’n, maan e trɛn i wun lɛ e fɔnvɔ i. Nán be nga be ti e osufuɛ nin e janvuɛ, nin be nga e si be’n, be ngunmin yɛ ɔ fata kɛ e si be aunnvuɛ ɔ. Be nga e siman be bɔbɔ’n, e kwla si be aunnvuɛ wie. I nun mɔ Zezi Klist kán Ɲanmiɛn ndɛ’n klé sran mun oka’n su lɔ’n, ɔ usali kɛ: ‘?Sɛ an klo amun klofuɛ’m be ngunmin’n, ngue like yɛ amún ɲɛ́n i ɔ?’ Asa ekun’n, Zezi Klist m’ɔ ti aunnvuɛ sifuɛ’n, ɔ seli kɛ: “Like kwlaa nga an klo kɛ sran yo man amun’n, an yo i kunngba sɔ’n man be.”—Matie 5:46, 47; 7:12.

Ndɛ klanman sɔ mɔ sran sunman be si i’n, ɔ o Ɲanmiɛn Ndɛ’n nun. Sran sunman be waan ninnge nga be kwla kle e aunnvuɛ silɛ’n, be nun danfuɛ’n yɛle Biblu’n. Ɲanmiɛn Ndɛ’n kan flan nun kɛ ɔ fata kɛ e uka be nga sa wie ti’n, be kwlá ukaman be wun’n. Kɛ Biblu’n kán Ɲanmiɛn Zoova m’ɔ ti e Yifuɛ’n, mɔ maan be klɛli Biblu’n, i ndɛ’n, ɔ se kɛ ɔ si aunnvuɛ tra sran’m be kwlaa kpan.

Biblu’n se kɛ: “[Ɲanmiɛn] kan aika mma mun nin angbeti bla’m be ti ndɛ, ɔ klo aofuɛ mun, ɔ man be aliɛ be di, ɔ man be tannin be kla.” (Mmla’n 10:18) Asa ekun’n ɔ kan Ɲanmiɛn Zoova i ndɛ se kɛ: “Be nga be mianmian be kplɔlɔlɔ’n, ɔ nian be ndɛ’m be nun di be kpa. Be nga awe kun be’n, ɔ man be like be di.” (Jue Mun 146:7) Zoova kpɛli mmla kun aofuɛ nga ɔ leman wie’n, i lika. Ɔ seli kɛ: “Amun trɛ i nun kɛ wie ɔ ɔ ti amun niaan wie sa. Amun klo i kɛ amun fa klo amun bɔbɔ amun wun’n sa.”—Saun Yolɛ 19:34.

Sanngɛ blɛ sunman nun’n, aunnvuɛ silɛ’n timan pɔpɔ. Akoto Pɔlu klɛli Klistfuɛ nga be o Kolɔsu lɔ’n be fluwa kɛ: ‘Amun a wla amun nzuɛn laa mɔ maan an yo sa tɛtɛ’n i ase, yɛ amun a fa nzuɛn uflɛ mɔ maan amun a yo kɛ sran mɔ Ɲanmiɛn yili i uflɛ’n sa. Ɲanmiɛn kaci sran sɔ’n titi lele ɔ si i kpa yɛ ɔ fɛ i mlɔnmlɔn. An ti Ɲanmiɛn i sran, ɔ klo amun, yɛ ɔ fali amun. I sɔ’n ti’n, maan sran’m be yo amun annvɔ.’—Kolɔsfuɛ Mun 3:9, 10, 12.

I sɔ’n kle kɛ ɔ fata kɛ e mian e ɲin naan y’a si aunnvuɛ. “Nzuɛn uflɛ” ng’ɔ fata kɛ Klistfuɛ’m be fa’n, i wafa’n kun yɛle ngalɛ’n. Pɔlu trannin laa nun Rɔmufuɛ mɔ be ti nzajefuɛ’n be afiɛn. Ɔ wlɛli i niaan Klistfuɛ’m be fanngan kɛ be kaci be nzuɛn laa’n mlɔnmlɔn naan b’a kwla si aunnvuɛ b’a tra laa’n.

Aunnvuɛ silɛ’n le ta

Sran wie’m be bu aunnvuɛ sifuɛ’m be luflefuɛ. Yɛ be bu i kɛ be kwla yo i sɔfuɛ’m be like yaya ndɛndɛ. ?I sɔ akunndan’n ti su?

Ɔ si’ɛ mlɔnmlɔn! Like ng’ɔ su sran kun bo m’ɔ si aunnvuɛ’n, yɛle i wiengu klolɛ m’ɔ fin i awlɛn’n nun’n. Klolɛ’n kusu fin Ɲanmiɛn. Sɛ klolɛ’n ti sran’n, nn i yɛle Ɲanmiɛn. ‘Ɲanmiɛn yɛ ɔ ti sran klofuɛ’n niɔn.’ (1 Zan 4:16) Kɛ Biblu’n se kɛ Zoova ti ‘e Si, ɔ si aunnvuɛ, ɔ ti Ɲanmiɛn kun m’ɔ jran e sin sa’n kwlaa nun’n,’ i su ɔ. (2 Korɛntfuɛ Mun 1:3) Ndɛ nga be kacili i kɛ ‘aunnvuɛ silɛ’n,’ i bo klikli’n yɛle kɛ, “kɛ e wiengu o afɛ nun’n, ɔ yo e ya.” I kpa’n bɔbɔ’n, Zoova ‘yo be nga be siman ye’n, ɔ nin klunwifuɛ’m be ye.’—Lik 6:35.

E Yifuɛ’n kunndɛ kɛ e kusu, e yi nzuɛn klanman kɛ aunnvuɛ silɛ sa’n i nglo. Be klɛli i Mise 6:8 nun kɛ: ‘Atin ng’ɔ ti atin kpa’n, mɔ Zoova waan amun fa su’n, like nga i waan amun yo’n, be dun mmua kan kleli amun. Like nga i waan amun yo’n yɛle kɛ i waan nán an bu amun wiengu lufle, klun ufue su like’n yɛ amun yo ɔ.’ Ɲanmiɛn i Wa Zezi Klist fɛli i Si i nzuɛn’n. I kusu seli kɛ: “An si aunnvuɛ, kɛ amun Si kusu si aunnvuɛ’n sa.”—Lik 6:36.

Sɛ e ti aunnvuɛ sifuɛ’n, ɔ ti kpa, afin aunnvuɛ silɛ’n yó maan é ɲán mmlusuɛ kpanngban. Blɛ sunman nun’n, e wun kɛ ndɛ ng’ɔ o Nyanndra Mun 11:17 nun’n ti nanwlɛ. Ndɛ sɔ’n se kɛ: ‘Sran nga i klun ti ufue’n, i bɔbɔ wun kpa yɛ ɔ́ yó i lɛ ɔ.’ Kɛ sran kun sa mian mɔ e si i aunnvuɛ’n, Ɲanmiɛn ɲrun’n, i bɔbɔ Ɲanmiɛn yɛ e yoli i ye lɛ ɔ. Ɔ maan i waan aunnvuɛ nga i sufuɛ’m be si sran mun’n ti’n, ɔ́ mán be i su mmlusuɛ. Ɲanmiɛn maan famiɛn Salomɔn seli kɛ: ‘Like nga sran kun fa cɛ yalɛfuɛ’n, ɔ ti kɛ Zoova yɛ w’a fa mɛn i sa. Ɔ maan Zoova ɔ́ yó i mo.’ (Nyanndra Mun 19:17) Akoto Pɔlu kusu seli kɛ: ‘An si kɛ like kpa kwlaa nga sran kun yo’n, ɔ́ ɲɛ́n i nuan like e Min’n sa nun.’—Efɛzfuɛ Mun 6:8.

Aunnvuɛ silɛ’n kwla yo maan fɔundi’n tran sran’m be afiɛn. Yɛ sɛ ndɛ tɔ’n, ɔ kwla uka be maan be siesie ndɛ sɔ’n. Sran nga be timan be wun aniɛn’n, ɔ kwla uka be maan be ti be wun aniɛn. Kpɔkun aunnvuɛ silɛ’n yo maan be yaci be wiengu i wun sa cɛ i. Wie liɛ’n, sran’m be wun aniɛn mɔ be timan’n, ɔ fin ndɛ nga be sunnzun kɛ bé kán’n, sanngɛ mɔ nɛ́n i yɛ be kan’n. Annzɛ kusu like nga be yoli’n, be wiengu w’a wunmɛn i wlɛ, kpɛkun w’a bu akunndan uflɛ. I sɔ’n kwlaa nun’n, aunnvuɛ silɛ’n uka e naan fɔundi’n, w’a kwla tran e afiɛn titi. Sɛ sran kun si aunnvuɛ’n, i wun sa yaci cɛlɛ yoman ya. Aunnvuɛ silɛ’n uka e maan afɔtuɛ nga Pɔlu fa mannin Klistfuɛ mun’n, e kwla nanti su. Ɔ seli kɛ: ‘Sa nga amun wiengu yo mɔ an wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i.’—Kolɔsfuɛ Mun 3:13.

Maan e yi aunnvuɛ silɛ’n i nglo

Aunnvuɛ silɛ’n yo maan sran nga awlabɔɛ o i su’n, i wla gua ase. Kɛ nga e fa wunnin i’n sa’n, aunnvuɛ silɛ’n yo maan be nga afɛ o be su’n, be yo e annvɔ, yɛ be afɛ’n yo e ya. Kɛ be se kɛ sran kun si aunnvuɛ’n, ɔ kle kɛ be nga afɛ’n o be su’n, be yo i annvɔ, kpɛkun like ng’ɔ kwla yo naan w’a uka be’n, ɔ yo.

Kɛ Klistfuɛ’m be si aunnvuɛ’n, be sɔnnzɔn Zezi. Zezi ukali sran mun ninnge kɛ aliɛ sa’n be ɲanlɛ’n nun. Asa ekun’n, ɔ ukali be Ɲanmiɛn i ninnge’m be nun wie. W’a seman le kɛ ɔ ɲɛnmɛn i ti ukaman sran mun. Kɛ ɔ wun kɛ sran’m be sa mian like wie wun’n, ɔ si be aunnvuɛ, yɛ ɔ uka be.

Ɲanmiɛn sulɛ nun’n, kɛ Zezi wunnin sran kpanngban mɔ be ng’ɔ fata kɛ be uka be’n, be nianman be lika’n, maan e nian wafa nga i wun yoli i’n: ‘Kɛ Zezi wunnin sran mun’n, be yoli i annvɔ, afin be ti afɛfuɛ yɛle kɛ b’a bo je kɛ bua mɔ be leman sunianfuɛ’n sa.’ (Matie 9:36) Ndɛ mma nga be kacili i kɛ ‘yoli i annvɔ’n,’ Biblu’n su like suanfuɛ kun waan ɔ ti ndɛ m’ɔ kle kɛ “like nga sran kun wun i’n, ɔ wluwlu i wun dan.” Ɔ maan, glɛki aniɛn nun’n ndɛ mma sɔ’n yɛ ɔ yiyi aunnvuɛ silɛ’n nun kpa ɔ.

Klistfuɛ mɔ be kusu be si aunnvuɛ’n, be uka be wiengu maan ninnge kɛ aliɛ nin tralɛ nin lawlɛ sa’n be nun’n, ɔ nin Ɲanmiɛn i ninnge’m be nun’n, be ɲan like nga be miɛn i sa’n. Akoto Piɛli klɛli kɛ: ‘Maan amun akunndan’n yo kun, maan amun nuan sɛ, an klo amun wiengu kɛ amun niaan sa, an si i aunnvuɛ.’ (1 Piɛr 3:8) Kɛ ɔ nin i fatali kɛ tukpaciɛ’n ti’n, awlo kun nunfuɛ mun mɔ be ti Klistfuɛ’n, be ɔ lika uflɛ’n, be niaan Klistfuɛ nga be o lika sɔ nun’n, be mannin be sua kɛ be tran nun naan nán be tannin i kalɛ. Be trannin sua’n nun lele anglo nsiɛn. Yasua’n waan: “Cɛn kwlaa’n, be wa nian e osu. Yɛ be fɔnvɔlɛ ndɛ nga be kan kle e’n maan e wunnin e wun fɛ.”

Aofuɛ’m be kusu be ndɛ lo Klistfuɛ kpa mun wie. Be fa be blɛ, nin be wunmiɛn’n, nin be sa nun ninnge’m be yo sran nga be siman be’n, be ye. Sran nga be ukali sran mɔ be siman be mlɔnmlɔn’n, mɔ e dun mmua kannin be ndɛ laa’n, be ti Zoova i Lalofuɛ.

I sɔ’n yo maan aunnvuɛ silɛ’n o Klistfuɛ’m be asɔnun’n nun, yɛ be yi be klun ufue’n i nglo. Kɛ mɔ asɔnun’n nunfuɛ’m be klo be wun’n ti’n, i sɔ’n yo maan be kunndɛ be wiengu’m be sulɛ’n i wun atin. Sa nga be o asɔnun’n i nun aika nin angbeti’m be su’n, be sɔnnin. Ɔ maan ɔ fata kɛ be ndɛ lo e yɛ e si be aunnvuɛ. Sɛ be ti yalɛfuɛ, annzɛ be kwlaman be wun ayre yo, annzɛ be leman lawlɛ kpa, annzɛ kusu sa wie mun ekun be o be su’n, naan e kwla uka be’n, maan e uka be.

Bian kun nin i yi mɔ be o Glɛki’m be nvle’n nun lɔ’n, be ndɛ yɛ e su wa kan ɔn. Bian’n tɔli tukpaciɛ. Be fɛli i nin i yi be ɔli dɔɔtrɔ kun m’ɔ o mmua kpa’n nun. Kusu be lomin fie mɔ i ti yɛ be ɲan sika kan’n, i tilɛ w’a ju. ?Yɛ kɛ mɔ be o dɔɔtrɔ lɔ mmua lɔ sɔ’n niɔn, wan yɛ ɔ́ tí lomin’n niɔn? Asɔnun nga ɔ o be lomin fie lika’n nun lɔ’n, i nunfuɛ’m be dili i sɔ junman liɛ’n. Be tili lomin’n, yɛ be ko yoli i atɛ. Ɔ maan bian’n nin i yi mɔ be o asamian nun’n, be kwla ɲannin sika. Asa ekun be wla guali ase.

Wafa nga e kwla yi aunnvuɛ silɛ’n i nglo’n be sɔnnin. Klistfuɛ mɔ be si aunnvuɛ’n be nun wie’m be wunnin kɛ blɛ wie nun’n, like nga be nga be o awlabɔɛ nun’n be kunndɛ kɛ be yo man be’n, yɛle kɛ sran’m be nian be osu, naan be tie ndɛ nga be kan kle be’n, naan be si be aunnvuɛ yɛ be fa Biblu’n nun ndɛ mun fɔnvɔ be.—Rɔmfuɛ Mun 12:15.

Amun nin aunnvuɛ sifuɛ mun tran

Fɔundi o Klistfuɛ nga be o asiɛ wunmuan’n su’n be afiɛn. Yɛ be yi be aunnvuɛ silɛ’n nin be klun ufue’n i nglo. Klistfuɛ kpa’m be wun i wlɛ kɛ sɛ sran kun si aunnvuɛ’n, sran’m be klo kɛ bé fá be wun mɛ́ntɛn i. Sanngɛ sran ng’ɔ yo i wiengu’m be kpokokpoko’n, sran’m be faman be wun mɛntɛnmɛn i. I sɔ’n ti’n, kɛ bé sɔ́nnzɔn be Si m’ɔ o ɲanmiɛn su lɔ’n, be mian be ɲin yo like ng’ɔ kle kɛ be ‘si aunnvuɛ’n.’

Zoova i Lalofuɛ’m be yia amun amanniɛn su kɛ amun a nian aunnvuɛ silɛ, nin klolɛ, nin be wiengu i lika nianlɛ m’ɔ o be Klistfuɛ’m be afiɛn’n. Be lafi su kɛ be afiɛn tranlɛ sɔ m’ɔ yo fɛ m’ɔ man aklunjuɛ’n, amún wá dí aklunjuɛ sɔ’n wie.—Rɔmfuɛ Mun 15:7.

[Foto, bue 5]

Pɔlu klɛli Kolɔsu lɔ Klistfuɛ’m be fluwa kɛ maan sran’m be yo be annvɔ.

[Foto mun, bue 7]

Kɛ Zezi wun kɛ sran’m be sa mian like wie wun’n, ɔ si be aunnvuɛ, yɛ ɔ uka be.