Maan ‘an si aunnvuɛ’
1. ?Ngue yɛ sran’m be fɛfɛ i wun andɛ ɔ?
1 Anwlanmannun’n, sran sunman be nin a fɛfɛman aunnvuɛ silɛ i wun kɛ andɛ sa le. Mɛn’n w’a tɔ nvati, ɔ maan sran sunman be wunman be wun fɛ kun, be akunndan’n w’a sanngan, be wla’n w’a bo be wun. Sran akpinngbin be kunndɛ ukalɛ, yɛ e mɔ e ti Klistfuɛ’n, e yɛ ɔ nin i fata kɛ e yi i nglo kpa kɛ e wiengu’m be ndɛ lo e ɔ. (Mat. 22:39; Gal. 6:10) ?Wafa sɛ yɛ e kwla yi i sɔ’n i nglo ɔ?
2. ?Wafa sɛ yɛ e kwla yi e aunnvuɛ silɛ’n i nglo kpa ɔ?
2 Aunnvuɛ silɛ junman: Ɲanmiɛn kunngba cɛ yɛ fɔnvɔlɛ kpafuɛ’n fin i ɔ. (2 Kor. 1:3, 4) Zoova ti aunnvuɛ sifuɛ. Ɔ se e kɛ e kusu ‘e si aunnvuɛ’ naan e ko nian e wiengu’m be osu, e bo Sielɛ Blɛ’n jasin fɛ’n e kle be. (1 Piɛ. 3:8) Sɛ e di jasin fɛ’n bolɛ junman sɔ’n juejue su’n, yɛ é kwlá cící “be nga be anwlɛn’n w’a kpɔtɔ be klun’n” be wla ɔ. Afin Ɲanmiɛn i Sielɛ’n yɛ ɔ ti like kpa kun mɔ klɔ sran mɔ be wun ɲrɛnnɛn’n be kwla fa be wla be gua su ɔ. (Eza. 61:1) Ɔ ka kaan sa, aunnvuɛ mɔ Zoova si i sufuɛ mun’n ti’n, ɔ́ wá núnnún klunwi’n yɛ ɔ́ yó maan bé trán mɛn uflɛ kpa kun nun.—2 Piɛ. 3:13.
3. ?Wafa sɛ yɛ e kwla sɔnnzɔn Zezi ɔ?
3 E bu sran mun kɛ Zezi buli be’n sa: Kannzɛ bɔbɔ Zezi boli jasin fɛ’n kleli sran kpanngban kpa’n, sanngɛ ɔ buli be akunndan be tinuntinun. Ɔ wunnin kɛ sran sɔ’m be kunndɛ kɛ be uka be naan be nin Ɲanmiɛn be afiɛn’n sɛ kpa. Be ti kɛ bua mɔ b’a bo je’n sa. Kɛ Zezi wunnin be’n, be yoli i annvɔ, naan w’a kle be like blɛblɛblɛ. (Mar. 6:34) Sɛ e bu sran mun kɛ Zezi buli be’n sa’n, ɔ́ yó maan é sí be aunnvuɛ be tinuntinun. I sɔ’n fíte e nɛn’n ɔ nin wafa nga e fa yo e ɲrun’n i nun. Jasin fɛ’n yɛ é dún mmua é bó ɔ, yɛ sa nga ɔ o sran kun su’n, i nuan su ndɛ yɛ é kán klé i ɔ.—1 Kor. 9:19-23.
4. ?Ngue ti yɛ ɔ fata kɛ e si sran’m be aunnvuɛ ɔ?
4 Sran kpanngban kpa mɔ be fin nvlenvle kwlaa nun’n, be sɔ Ɲanmiɛn Sielɛ jasin fɛ’n ɔ nin ukalɛ mɔ e uka be’n nun. Sɛ e si sran’m be aunnvuɛ titi’n, i sɔ’n mánmán Zoova e Ɲanmiɛn aunnvuɛ sifuɛ’n, yɛ i klun jɔ́ e wun.—Kol. 3:12.