Maan e ‘nian junman nga e min’n fa e sieli su’n su kpa’
‘E nian junman nga e Min’n fa e sieli su’n su kpa, e nian nun di i kpa.’—KOL. 4:17.
1, 2. ?Sɛ é kwlá sé’n, sran’m be kalɛ benin yɛ ɔ o Klistfuɛ’m be su ɔ?
SƐ É kwlá sé’n, e wiengu’m be kalɛ dan kpa o e su. Ajalɛ nga be fɛ i bikisa’n, ɔ kwla yo maan be kwla fin “afɛ dan’n” nun fite annzɛ be ti kwla ka nun. (Ngl. 7:14) Ɲanmiɛn i ndɛ kun mɔ be klɛli i Nyanndra fluwa nun’n, ɔ se kɛ: ‘Be nga be su kɔ be kunlɛ’n, de be. Be nga be di be ndɛ mɔ be su kɔ be kunlɛ’n, yo maan be yaci be nun.’ Ndɛ sɔ’n ti cinnjin kpa. Sɛ sran’m be fa ajalɛ tɛ naan y’a kan kleman be naan be wu’n, ɔ ti e ti su trɔ. I kpa’n bɔɔ’n, ndɛ kunngba’n se ekun kɛ: ‘Sɛ a se kɛ: “M’an wunman nun o!” Ɲanmiɛn bɔbɔ si nun. Ɔ si ɔ sa nga a yo be’n. I ɲin ta wɔ. Ɔ si sa ngba. Sran kun i sa ng’ɔ yo be’n, i su yɛ ɔ nian fa bu i fɔ ɔ.’ Nanwlɛ, Zoova i sufuɛ’m be kwlá seman kɛ sa ng’ɔ o sran’m be su’n, ‘be wunman nun.’—Nya. 24:11, 12.
2 Zoova bu nguan’n i like dan. Ɔ maan, ɔ wlɛ i sufuɛ’m be fanngan naan like nga be kwla yo naan b’a uka sran kpanngban kpa naan b’a ɲan nguan’n, be yo i sɔ like’n. Ɔ fata kɛ Ɲanmiɛn i sufuɛ’m be tinuntinun be kan ndɛ ng’ɔ o Ɲanmiɛn Ndɛ’n nun’n kle sran mun. Afin ndɛ sɔ’n yɛ maan be kwla ɲan nguan ɔn. Junman nga e di’n ti kɛ gladi difuɛ junman sa. Kɛ gladi difuɛ’n wun kɛ sa wie su ba’n, ɔ bo i jɔ. E kunndɛman kɛ be nga be o wie atin’n su’n, be wie’n ka e su. (Eze. 33:1-7) I sɔ’n ti’n, ɔ ti cinnjin kpa kɛ e ‘kan Ɲanmiɛn ndɛ’n’ titi.—An kanngan 2 Timote 4:1, 2, 5 nun.
3. ?Ndɛ benin mun yɛ like suanlɛ nga, ɔ nin i sin liɛ’n bé kán ɔn?
3 Kɛ é dí e junman m’ɔ man nguan’n, wafa nga e kwla cia e wun ninnge nga be tanndan e ja nun be lika’n, ɔ nin wafa nga e kwla uka sran kpanngban kpa’n, yɛ like suanlɛ nga ɔ́ wá klé e ɔ. Like suanlɛ ng’ɔ́ bá nga i sin’n, ɔ́ wá klé e wafa nga e sa kwla tɔ sran’m be nanwlɛ ndɛ’n i klelɛ nun’n. Like suanlɛ nsan su’n, ɔ́ wá kán wafa nga mɛn wunmuan nun jasin bofuɛ wie’m be junman’n bali nvlɛ’n i ndɛ. I sɔ’n wlá e fanngan. Sanngɛ kwlaa naan y’a wun ndɛ sɔ mun’n, ɔ fata kɛ ninnge nga ti yɛ blɛ nga e o nun yɛ’n ti kekle’n, e nian be nun wie mun.
?Ngue ti yɛ sran sunman be wla w’a bo be wun ɔn?
4, 5. ?Sa benin mun yɛ be tɔ sran’m be su ɔ? ?Yɛ sa sɔ’m be ti’n, ngue yɛ be yo ɔ?
4 Mɛn’n nun sa’m be kle kɛ e o “mɛn’n i awieliɛ,” naan ɔ cɛ kaan’n, mɛn nga ɔ́ núnnún. Sa nga Zezi nin i sɔnnzɔnfuɛ’m be seli kɛ bé klé kɛ e o mɛn’n i “bue nuan’n,” be su tɔ sran’m be su. Alɛ, nin awe, nin asiɛ m’ɔ keje’n, nin sa wie mun ekun be tɔ sran’m be su. I kwlaa sɔ’n ti ‘ɲrɛnnɛn.’ Asa ekun’n, sran nga be nantiman mmla fi su’n, mɔ be bu be ngunmin be wun akunndan’n, mɔ be ndɛ nunman Ɲanmiɛn i ndɛ nun’n, be diman be yalɛ. Be nga be mian be ɲin be nanti Biblu’n nun mmla’m be su bɔbɔ’n, ‘lika’n ti kekle’ be su wie.—Mat. 24:3, 6-8, 12; 2 Tim. 3:1-5.
5 Sanngɛ sran’m be dan lika be siman like kpa nga ti yɛ maan lika’n w’a yo sɔ’n. Ɔ maan alaje mɔ be nin be awlofuɛ’m be ɲɛnmɛn i’n ti, be nun sunman be akunndan’n w’a sanngan. Asa ekun’n, kɛ sran’m be awlɛn su sran wie wu’n, annzɛ kɛ ɲrɛnnɛn sa uflɛ wie’m be ɲan be’n, i sɔ’n bo be wla. Kɛ mɔ sran kpanngban be siman sa nga ti yɛ sa sɔ’m be ju’n, ɔ nin wafa nga bé wíe mlɔnmlɔn’n ti’n, be wla bo be wun—Efɛ. 2:12.
6. ?Ngue ti yɛ “Babilɔni klɔ dan’n” w’a kwlá ukaman be nga be o i sin’n niɔn?
6 “Babilɔni klɔ dan’n,” mɔ yɛle mɛn wunmuan’n nun Ɲanmiɛn sulɛ nga be timan su’n be akpasua’n, w’a fɔnvɔman sran mun. ‘I nzan mɔ yɛle i tekle bolɛ’n,’ ɔ fa yoli maan sran’m be wunman wafa nga bé yó naan be nin Ɲanmiɛn be afiɛn’n w’a sɛ’n. I kpa’n bɔbɔ’n, Ɲanmiɛn sulɛ ng’ɔ timan su’n i nunfuɛ’m be yoli be ninnge mun kɛ tekle sifuɛ sa. Yɛle kɛ be lakalakali “asiɛ’n su famiɛn” mun, yɛ like nga be se be kɛ be yo’n, yɛ be yo ɔ. Be fa ato ndɛ mun nin bae ninnge’m be fa yo maan sran’m be nun sunman be lo be wun man mɛn siefuɛ mun. Ɔ maan Ɲanmiɛn sulɛ ng’ɔ timan su’n i nunfuɛ’m be ɲannin kwlalɛ. Sanngɛ blɛ kunngba nun’n, be kpɔcili Ɲanmiɛn sulɛ ng’ɔ ti su’n.—Ngl. 17:1, 2, 5; 18:23.
7. ?Ngue yɛ ɔ minndɛ sran’m be dan lika ɔ? ?Sanngɛ wafa sɛ yɛ be kwla uka be nun wie mun ɔn?
7 Zezi seli kɛ sran’m be dan lika be o atin ng’ɔ flɛli i kɛ atin dan’n su. Atin sɔ’n i awieliɛ’n yɛle ɲrɛnnɛn’n. (Mat. 7:13, 14) Sran wie’m be o atin dan’n su afin be ɲinfu be faman like nga Biblu’n kle’n su. Sanngɛ wie’m be liɛ’n, lakalɛ mɔ be lakali be’n ti yɛ be o atin sɔ’n su ɔ. Annzɛ kusu be nga be dun mmua be ɲrun’n be Ɲanmiɛn sulɛ nun’n, b’a kleman be like nga Zoova kunndɛ kɛ be yo sakpasakpa’n. Atrɛkpa sɛ be fa Biblu’n nun ndɛ mun kle be nun wie mun kɛ be mɛn dilɛ wafa’n timan kpa’n, bé káci. Sanngɛ be nga be tran Babilɔni klɔ dan’n nun, mɔ be kunndɛman kɛ bé nánti Biblu’n nun mmla’m be su’n, be su finman “afɛ dan’n” nun fiteman.—Ngl. 7:14.
Nán maan e ‘yaci’ jasin fɛ’n i bolɛ le
8, 9. ?Kɛ be kleli Klistfuɛ klikli’m be ɲrɛnnɛn’n, ngue yɛ be yoli ɔ? ?Yɛ ngue ti yɛ be yoli sɔ ɔ?
8 Zezi seli kɛ i sɔnnzɔnfuɛ’m bé bó Ɲanmiɛn Sielɛ jasin fɛ’n, naan bé yó maan sran’m be kaci i sɔnnzɔnfuɛ. (Mat. 28:19, 20) Ɔ maan titi, Klistfuɛ kpa’m be ɲrun’n, jasin fɛ’n bolɛ’n, ɔ ti be ɲin m’ɔ yi Ɲanmiɛn’n i nzɔliɛ, yɛ ɔ kle kɛ be lafi Ɲanmiɛn su. I sɔ’n ti’n, kannzɛ bɔbɔ jasin fɛ’n bolɛ’n ti, be kleli Klistfuɛ klikli’m be yalɛ’n, sanngɛ b’a yacimɛn i bolɛ le. Be lafili Zoova su kɛ ɔ́ mán be wunmiɛn. Be srɛli i kɛ ɔ yo maan be ‘kɛn i ndɛ’n yakpa su.’ Zoova tɛli be su, ɔ fɛli i wawɛ’n mannin be, yɛ be kannin Ɲanmiɛn i ndɛ’n yakpa su.—Yol. 4:18, 29, 31.
9 ?Kɛ ɲrɛnnɛn klelɛ’n wa yoli dan Zezi i sɔnnzɔnfuɛ’m be su’n, be yacili jasin fɛ’n i bolɛ? Ɔ si’ɛ. Jasin fɛ’n mɔ akoto’m be boli’n ɔ yoli Zuifu’m be Ɲanmiɛn sulɛ’n nun kpɛnngbɛn’m be ya. Ɔ maan be trali be, be wlanwlannin be yɛ be boli be nin ɲantiaan. Sanngɛ ɔ nin i sɔ ngba’n, b’a ‘yaciman Zezi Klist jasin fɛ’n i bolɛ nin i klelɛ.’ Be wunnin i wlɛ weiin kɛ sɛ be ‘ɲin yi Ɲanmiɛn tra sran mun’n, ɔ ti kpa tra kɛ be ɲin yi sran’n.’—Yol. 5:28, 29, 40-42.
10. ?Sa benin mun yɛ andɛ’n, be tɔ Klistfuɛ’m be su ɔ? ?Sanngɛ sɛ e nzuɛn’n ti kpa’n, ngue yɛ i sɔ’n kwla yo ɔ?
10 Andɛ’n, nán Ɲanmiɛn i sufuɛ’m be nun sunman yɛ jasin fɛ’n mɔ be bo’n ti’n, be bo be annzɛ be wla be bisua ɔ. Sanngɛ ɲrɛnnɛn wafa uflɛ wie’m be tɔ Klistfuɛ kpa’m be kwlaa be su. I wie yɛle kɛ, kɛ mɔ e Biblu’n nun’n like suanlɛ’n ti’n, e ayeliɛ’n nin e wiengu’m be liɛ’n timan kun’n, mɔ ajalɛ nga e fa be’n be taka Biblu’n su’n ti’n, be nga e nin be di junman likawlɛ’n be kwla bu i kɛ e te yo laa ninnge mun. Asa ekun, be nga e nin be di junman likawlɛ’n, ɔ nin e suklu lɔfuɛ mun, annzɛ e mantanfuɛ mun be wunman ninnge nga e yo’n i wlɛ. Sanngɛ ɔ fataman kɛ finfin sɔ mɔ be yo e’n, ɔ bubu e sa sin. Mɛn’n nunfuɛ’m be o aosin nun. Sanngɛ Klistfuɛ’m be liɛ’n, ɔ fata kɛ be yo kɛ ‘nzraama m’ɔ kpaja’n sa.’ (Fil. 2:15) Atrɛkpa’n, e nzuɛn’n ɔ́ yó sran nga be klo nanwlɛ mɔ be nian e’n be klanman, yɛ i sɔ’n ti’n, bé mánmán Zoova.—An kanngan Matie 5:16 nun.
11. (a) ?Wafa sɛ yɛ sran wie’m be kwla sɔ jasin fɛ’n bolɛ’n nun ɔn? (b) ?Ɲrɛnnɛn wafa benin yɛ be kleli akoto Pɔlu ɔ? ?Yɛ ngue yɛ ɔ yoli ɔ?
11 Sɛ e waan é bó jasin fɛ’n titi’n, ɔ fata kɛ e yo yakpafuɛ. Sran wie’m be kwla yo e fiaan, annzɛ kusu be kwla yo ninnge wie mun ekun be fa bubu e sa sin. E osufuɛ mun bɔbɔ be kwla yo i sɔ like’n. (Mat. 10:36) Jasin fɛ’n mɔ akoto Pɔlu boli’n ti’n, be boli i kpɛ sunman. Sanngɛ maan e nian ɲrɛnnɛn sɔ mɔ be kleli i’n, i su ndɛ ng’ɔ kannin’n. Ɔ seli kɛ: ‘Be kleli e ɲrɛnnɛn, be yoli ye finfin. Kɛ e juli amun wun lɔ, e fɛli dan kpa ekun, sanngɛ Ɲanmiɛn maan e tra e awlɛn e kɛnnin i jasin fɛ’n kleli amun.’ (1 Tɛs. 2:2) Nanwlɛ ɔ nin i fatali kɛ Pɔlu yo yakpa naan w’a kwla bo jasin fɛ’n titi. Afin kɛ be trɛli i’n, be yili i wun tralɛ mun, be boli i nin ngble, kpɛkun be wlɛli i bisua. (Yol. 16:19-24) ?Sanngɛ ngue yɛ ɔ yoli m’ɔ kwla boli jasin fɛ’n juejue su titi ɔ? Yɛle kɛ jasin fɛ’n bolɛ junman mɔ Ɲanmiɛn fa mɛnnin i’n, ɔ o i klun kpa kɛ ɔ́ dí.—1 Kor. 9:16.
12, 13. ?Sa benin mun yɛ be o Klistfuɛ wie’m be su ɔ? ?Yɛ wafa sɛ yɛ be mian be ɲin be jran be ɲrun kekle ɔ?
12 Lika wie’m be nun’n, be toman sran’m be awlo, annzɛ kusu sran’m be faman be su sieman jasin fɛ’n su. I sɔ lika’m be nun’n, jasin fɛ’n i bolɛ juejue su’n kwla yo kekle man e. ?Sɛ ɔ ti sɔ’n, ngue yɛ e kwla yo ɔ? Ɔ fata kɛ e mian e ɲin naan e bo jasin fɛ’n nga b’a siesieman’n, e kle sran mun. Asa ekun’n e kwla siesie e blɛ’n i uflɛ naan y’a bo jasin fɛ’n blɛ uflɛ wie’m be nun. Annzɛ e kwla bo jasin fɛ’n lika nga sran kpanngban be o lɛ’n be nun.—An nian Zan 4:7-15; Sa Nga Be Yoli’n 16:13; 17:17 be nun.
13 Sa nga be o Klistfuɛ sunman be su’n, be nun wie mun ekun yɛle oke yolɛ’n, nin alaje mɔ be lemɛn i’n. Ɔ maan be kwlá boman jasin fɛ’n kɛ nga be kunndɛ kɛ bé bó’n sa. Sɛ i sɔ sa’m be o e su wie’n, nán maan i sɔ’n bubu e sa sin. Like nga e kwlɛmɛn i yo’n, Zoova si i. Yɛ like nga e kwla yo mɔ e yo’n, i klun jɔ su. (An kanngan 2 Korɛntfuɛ Mun 8:12 nun.) Sa kekle kwlaa nga be tɔ e su’n be nun’n, maan ɔ yo e ɲrun tanndanlɛ o, annzɛ sran mɔ be faman be su sieman jasin fɛ’n su’n nin o, annzɛ aunkpinndiɛ mɔ e lɛmɛn i’n nin o, like nga e kwla yo i jasin fɛ’n bolɛ junman nun’n, maan e mian e ɲin yo.—Nya. 3:27; an nian Mark 12:41-44 nun.
Maan ‘e nian junman nga be fa e sieli su’n su kpa’ titi
14. ?Ajalɛ benin yɛ akoto Pɔlu mɛnnin i niaan Klistfuɛ mun ɔn? ?Yɛ afɔtuɛ benin yɛ ɔ mannin ɔn?
14 Akoto Pɔlu wlɛli i wun ase dili jasin fɛ’n bolɛ junman’n, yɛ ɔ wlɛli i niaan Klistfuɛ’m be fanngan naan be yo sɔ wie. (Yol. 20:20, 21; 1 Kor. 11:1) Klistfuɛ klikli’m be blɛ su’n, Pɔlu wlali Klistfuɛ kun fanngan kpa. Be flɛ i kɛ Arsipu. Kɛ ɔ́ klɛ́ Kolɔsfuɛ’m be fluwa’n, ɔ seli kɛ: ‘An se Arsipu kɛ ɔ nian junman nga e Min’n fɛ i sieli i su’n su kpa, an se i kɛ ɔ nian nun di i kpa.’ (Kol. 4:17) Sran’n i wafa nga Arsipu ti’n, annzɛ sa nga be juli i su’n, e siman be. Sanngɛ kɛ e niɛn i sa’n, ɔ sɔli jasin fɛ’n bolɛ junman’n nun. Sɛ e ti Klistfuɛ mɔ y’a dun mmua y’a fa e wun y’a man Ɲanmiɛn’n, i sɔ’n kle kɛ e kusu e sɔli jasin fɛ’n bolɛ junman’n nun wie. ?Sɛ ɔ ti sɔ’n niɔn, e nian nun e di jasin fɛ’n bolɛ junman’n kpa?
15. ?Kɛ Klistfuɛ’m be fa be wun man Ɲanmiɛn’n, i sɔ’n kle sɛ? ?Yɛ kosan benin mun yɛ i sɔ’n yo maan e usa e wun ɔn?
15 Kwlaa naan b’a yo e batɛmu’n, e tuli e klun e srɛli Zoova e fali e wun mɛnnin i. I sɔ’n kle kɛ e tali nda kɛ é yó i klun sa. Ɔ maan siɛn’n, maan e usa e wun kɛ: ‘?Min mɛn dilɛ nun’n, Ɲanmiɛn klun sa yolɛ’n yɛ ɔ ti min cinnjin sakpa ɔ?’ Atrɛkpa’n, Zoova ɲrun’n, junman ng’ɔ kunndɛ kɛ e di’n sɔnnin. Ɔ kwla yo e awlofuɛ mun m’ɔ fata kɛ e nian be lika’n. (1 Tim. 5:8) ?Sanngɛ kɛ e ko di junman sɔ mun ko wie’n, ngue yɛ e fa e blɛ annzɛ e wunmiɛn’n i onga’n e yo ɔ? ?Ngue yɛ ɔ ti e cinnjin e mɛn dilɛ’n nun ɔn?—An kanngan 2 Korɛntfuɛ Mun 5:14, 15 nun.
16, 17. ?Ngue yɛ Klistfuɛ nga be te yo gbanflɛn annzɛ talua’n, annzɛ be nga be su junman’n w’a sɔnman’n be kwla bu i yolɛ akunndan ɔn?
16 ?E ti Klistfuɛ gbanflɛn annzɛ talua mɔ w’a wie suklu di, annzɛ ɔ su wa wie i di ɔ? Atrɛkpa’n, sran nin a tranman e sa su. ?Sɛ ɔ ti sɔ’n, ngue yɛ é yó ɔ? ?Ajalɛ benin yɛ e kwla fa naan nda nga e tali Zoova kɛ é yó i klun sa’n, y’a kwla yiɛ i nuan ɔn? Gbanflɛn nin talua kpanngban be siesieli be wun naan b’a kwla yo atin bofuɛ. Yɛ i sɔ yolɛ’n mannin be aklunjuɛ dan.—Jue. 110:3; Aku. 12:1.
17 Wienun ɔn, y’a san gbanflɛn nin talua blɛ’n wun kan, yɛ junman nga e di’n, sɛ é kwlá sé’n, ɔ fa e blɛ’n kwlaa. Sanngɛ kusu sran nunman e sa su. E ngunmin e wun lika yɛ e nian ɔn. Atrɛkpa’n, blɛ nga e kwla ɲɛn i nun’n, e nin asɔnun’n nunfuɛ’m e di junman likawlɛ, yɛ i sɔ’n man e aklunjuɛ. ?E kwla yo maan e aklunjuɛ sɔ’n uka su? ?Wafa nga e kwla uka e jasin fɛ’n bolɛ’n su’n, e buli i akunndan? (Jue. 34:9; Nya. 10:22) Lika wie’m be nun’n, junman ng’ɔ fata kɛ be di naan sran’m be kwlaa b’a ti ndɛ nanwlɛ m’ɔ man nguan’n, ɔ te sɔn kpa. ?E kwla siesie e blɛ’n naan wienun ɔn, lika nga jasin bofuɛ’m b’a sɔnman’n y’a ko bo jasin fɛ’n lɔ?—An kanngan 1 Timote 6:6-8 nun.
18. ?Ngue yɛ aniaan nɲɔn mɔ be jali be wun uflɛuflɛ’n be yoli ɔ? ?Yɛ i bo’n guali sɛ?
18 Maan e fa e ɲin sie i like nga Kevɛn nin Elena be yoli’n su e nian. Be o Amlɛnkɛn’m be mɛn’n nun lɔ.a Be nvle’n nun lɔ’n, kɛ sran nɲɔn be ko ja be wun uflɛuflɛ’n, be to be sua. Ɔ maan be kusu be buli sua kun tolɛ’n i akunndan. Be nɲɔn’n be di junman blɛ kwlaa nun. Ɔ maan be kwla ɲan aɲanbeun ninnge kpanngban. Sanngɛ be junman’n, ɔ nin awlo’n nun junman’m be dilɛ’n fa be blɛ’n i dan lika. Ɔ maan blɛ nga be kwla ɲɛn i bo jasin fɛ’n w’a sɔnman. Be wunnin i wlɛ kɛ be fa be blɛ’n nin be wunmiɛn’n kwlaa nian be ninnge’m be lika. Asa ekun’n, be wunnin kɛ atin bofuɛ kun nin i yi be liɛ’n, be leman like kpanngban, sanngɛ kusu be di aklunjuɛ. Ɔ maan be wunnin i wlɛ kɛ be kwla fa be ɲin sie i like uflɛ su. Be srɛli Zoova kɛ ɔ uka be naan be fa ajalɛ kpa. I sin’n be yoli be sua dan’n i atɛ, yɛ be ko trannin sua kaan kun nun. Elena kpɛli i junman dilɛ blɛ’n su yɛ ɔ yoli atin bofuɛ. Kɛ Kevɛn ti i yi i jasin fɛ’n bolɛ’n nun ndɛ fɛfɛ mun’n, i kusu yacili i junman m’ɔ fɛ i blɛ’n kwlaa’n i dilɛ naan w’a yo atin bofuɛ wie. Kɛ ɔ́ kɔ́ i ɲrun kan’n, be ɔli Amlɛnkɛn’m be mɛn’n i ngua lɔ be ko boli jasin fɛ’n lika nga jasin bofuɛ’m b’a sɔnman lɔ’n nun. Kevɛn waan: “Laa’n e di aklunjuɛ e aja’n nun. Sanngɛ siɛn’n mɔ e uka e Ɲanmiɛn sulɛ’n su’n, aklunjuɛ nga e di’n yo dan ekun.”—An kanngan Matie 6:19-22 nun.
19, 20. ?Ngue ti yɛ jasin fɛ’n bolɛ junman’n yɛ ɔ ti andɛ junman’m be nun cinnjinfuɛ’n niɔn?
19 Andɛ asiɛ’n su junman’m be nun cinnjinfuɛ’n yɛle jasin fɛ’n bolɛ junman’n. (Ngl. 14:6, 7) Ɔ yo maan Zoova i dunman’n yo sanwun. (Mat. 6:9) Biblu’n nun ndɛ’n yo maan be kwlaa nga be fa su afuɛ nuan kwlaa nun’n, be mɛn dilɛ’n yo kpa tra laa’n. Yɛ i sɔ’n kwla yo maan be ɲan be ti. ?Sanngɛ kɛ nga Pɔlu fa usali’n sa’n, ‘sɛ sran fi kɛnmɛn i ndɛ kleman sran mun’n, ɔ́ yó sɛ yɛ bé tí ɔ?’ (Rɔm. 10:14, 15) ?I yo, ɔ́ yó sɛ yɛ bé tí ɔ? I sɔ’n ti’n, maan e ta nda kɛ like kwlaa nga e kwla yo naan y’a bo jasin fɛ’n i kpa’n, é yó.
20 Wafa kun ekun nga e kwla yo naan y’a uka sran mun naan b’a wun blɛ kekle nga e o nun yɛ’n, ɔ nin ajalɛ nga be fa’n be cinnjin mɔ be ti’n i wlɛ’n, yɛle kɛ maan e yo maan e like klelɛ’n yo kpa ɔ i ɲrun. Wafa nga e kwla yo i sɔ liɛ’n, i ndɛ yɛ é wá kɛ́n i like suanlɛ ng’ɔ́ bá lɛ’n nun ɔn.
[Ja ngua lɛ ndɛ’n]
a Be kacili be dunman mun.
?Wafa sɛ yɛ amún tɛ́ kosan’m be su ɔ?
• ?Sɛ é kwlá sé’n, sran’m be kalɛ benin yɛ ɔ o Klistfuɛ’m be su ɔ?
• ?Sa kekle nga be tɔ e su e jasin fɛ’n bolɛ’n nun’n, wafa sɛ yɛ e kwla ɲan be trawlɛ ɔ?
• ?Junman nga e sɔli nun’n, wafa sɛ yɛ e kwla nian nun e di i kpa ɔ?
[Foto, bue 9]
Kɛ be tanndan e ɲrun’n, ɔ nin i fata kɛ e tra e awlɛn naan y’a kwla bo jasin fɛ’n.
[Foto, bue 10]
?Sɛ lika nga e bo jasin fɛ’n nun’n, sran’m be taman awlo tran’n, ngue yɛ e kwla yo ɔ?