Maan e jran kekle awlo’m be nun jasin fɛ’n bolɛ’n nun
‘E fɛli dan kpa, sanngɛ Ɲanmiɛn maan e tra e awlɛn e kɛnnin i jasin fɛ’n kleli amun.’—1 TƐS. 2:2.
1. ?Ngue yɛ i yolɛ’n miannin Zeremi sa ɔ? ?Yɛ wafa sɛ yɛ ɔ kwla jrannin be ɲrun ɔn?
ZEREMI ti sran kɛ e sa. Ɔ maan, kɛ Zoova seli i kɛ ɔ sieli i kɛ ‘ɔ ijɔ i nuan kle nvlenvle mun’n,’ Zeremi kpannin kɛ: “Ee min Min Anannganman, n ti bakan n siman ijɔ.” Sanngɛ, kɛ m’ɔ lafi Zoova su’n ti’n, ɔ kplinnin junman sɔ’n i dilɛ’n su. (Zer. 1:4-10) Kɛ ɔ yoli sɔ’n, be yoli Zeremi finfin, b’a sɔmɛn i ndɛ’n nun, wie liɛ bɔbɔ’n be boli i. Ɔ fɛli sɔ lele afuɛ 40 tra su. (Zer. 20:1, 2) Ɔ juli blɛ wie bɔbɔ’n, ɔ yoli i kɛ ɔ yaci junman’n i dilɛ. Sanngɛ, ɔ miɛnnin i ɲin kannin Ɲanmiɛn ndɛ’n titi. Be ng’ɔ kannin ndɛ’n kleli be’n, be nun sunman be keteli be awlɛn’n ti be kpaloli i. Sɛ ɔ ti Zeremi bɔbɔ i ngunmin’n, nn w’a kwlaman junman sɔ’n i di le. Sanngɛ Ɲanmiɛn fanngan nun’n, ɔ dili junman’n.—An kanngan Zeremi 20:7-9 nun.
2, 3. ?Wafa sɛ yɛ sa nga be o Zoova i sufuɛ’m be su andɛ’n, be fa sa nga be tɔli Zeremi su’n niɔn?
2 Andɛ’n, Zoova i sufuɛ sunman be kwla fa be wun sunnzun Zeremi. Kɛ e nun wie mun e buli awlo’m be nun jasin fɛ’n i bolɛ’n i akunndan’n, ndɛ nga e kannin’n yɛle kɛ: ‘Ngalɛfuɛ’n, n su kwlá yoman wie le.’ Sanngɛ, kɛ e buli i sin mɔ e wunnin kɛ Zoova yɛ i waan e bo jasin fɛ’n, e trali e awlɛn, ɔ maan e fali e wun wlɛli i jasin fɛ’n i bolɛ’n nun kpa. Kannzɛ ɔ yoli sɔ’n, sanngɛ sa wie’m be yo maan e nun wie’m be kwlá boman jasin fɛ’n titi. Nanwlɛ, kɛ ɔ yo naan sran kun bo jasin fɛ’n guɛ i ti nin i bo’n, ɔ timan aɔwi ndɛ.—Mat. 24:13.
3 ?Yɛ sɛ Zoova i Lalofuɛ’m be kle e Biblu’n nun like, naan e kɔ aɲia’m be bo sanngɛ jasin fɛ’n i bolɛ te yo e sa nun tankantankan nin? ?Annzɛ, sɛ be yoli e batɛmu, yɛ sɛ e ti juejue sanngɛ e boman jasin fɛ’n awlo’m be nun nin? Sɛ ɔ ti sɔ’n, maan e si kɛ sran wafawafa kwlakwla’m be mian be ɲin naan b’a kwla bo jasin fɛ’n awlo’m be nun. Kɛ mɔ Zoova suan e bo’n ti’n, e kwla yo sɔ wie.
E tra e awlɛn
4. ?Ngue ti yɛ akoto Pɔlu kwla boli jasin fɛ’n yasua su ɔ?
4 E kwlakwla e si kɛ sɛ e kwla bo jasin fɛ’n mɛn wunmuan’n nun’n, nán kɛ e bɔbɔ e wunmiɛn’n ti ɔ. Sanngɛ Ɲanmiɛn wawɛ’n yɛ maan e kwla junman sɔ’n di ɔ. (Zkr. 4:6) I kunngba’n yɛle jasin fɛ’n mɔ e tinuntinun e bo’n. (2 Kor. 4:7) Maan e fa e ɲin e sie i akoto Pɔlu su nian. Kɛ ɔ́ kán afɛ mɔ blɛ wie nun’n, ɔ nin be nga be di ngaliɛ difuɛ junman’n be wunnin i’n i ndɛ’n, ɔ seli kɛ: ‘Be kleli e ɲrɛnnɛn, be yoli e finfin Filipu lɔ. Kɛ e juli amun wun lɔ, e fɛli dan kpa ekun, sanngɛ Ɲanmiɛn maan e tra e awlɛn e kɛnnin i jasin fɛ’n kleli amun.’ (1 Tɛs. 2:2; Yol. 16:22-24) É kwlá bumɛn i kɛ jasin bofuɛ juejue kɛ akoto Pɔlu sa’n, ɔ juli blɛ wie’n, jasin fɛ’n bolɛ’n w’a yoman pɔpɔ i sa nun. Sanngɛ ɔ yoli sɔ. Ɔ maan Pɔlu m’ɔ ti kɛ e sa’n, ɔ fɛli i wla’n guali Ɲanmiɛn su naan w’a kwla bo jasin fɛ’n yasua su. (An kanngan Efɛzfuɛ Mun 6:18-20 nun.) ?Wafa sɛ yɛ e kwla nian Pɔlu i ajalɛ liɛ’n su ɔ?
5. ?Like ng’ɔ kwla uka e naan y’a tra e awlɛn y’a bo jasin fɛ’n i kun yɛle benin?
5 Like ng’ɔ kwla uka e naan y’a tra e awlɛn’n y’a bo jasin fɛ’n, i kun yɛle Ɲanmiɛn srɛlɛ’n. Jasin bofuɛ kun waan: “N srɛ Ɲanmiɛn kɛ maan n tu n klun n ijɔ. N srɛ i kɛ, maan ndɛ nga n kan’n, ɔ kan sran’m be awlɛn’n. Yɛ n srɛ Ɲanmiɛn kɛ, maan n di aklunjuɛ jasin fɛ’n bolɛ’n nun. I kwlaa yoli o, Zoova liɛ yɛle junman’n, nán e liɛ ɔ. Ɔ maan, sɛ ɔ timɛn i ti’n, e kwlaman like fi yo.” (1 Tɛs. 5:17) Ɔ fata kɛ e kwlaa’n e srɛ Ɲanmiɛn titi naan ɔ fɛ i wawɛ’n man e naan y’a bo jasin fɛ’n yasua su.—Lik 11:9-13.
6, 7. (a) ?Aolia nun like benin yɛ Ezekiɛli wunnin i ɔ? ?Yɛ i bo’n yɛle benin? (b) ?Ngue afɔtuɛ yɛ aolia nun like nga Ezekiɛli wunnin i’n, ɔ kle Ɲanmiɛn i sufuɛ mun andɛ ɔ?
6 Ezekiɛl fluwa’n kle e like kun ekun m’ɔ kwla uka e naan y’a bo jasin fɛ’n yasua su’n. Aolia nun’n, Zoova fali fluwa mɔ be ɲɔnɲɔnnin’n kun mannin Ezekiɛli. Be klɛli i ɲrun nin i sin. “Sunlɛ ndɛ, nin awuyomo bolɛ ndɛ, ɔ nin awlabɔɛ kpanlɛ ndɛ mun” yɛ be klɛli be fluwa sɔ’n nun ɔn. Kpɛkun ɔ seli Ezekiɛli kɛ ɔ di. Ɔ seli i kɛ: ‘Klɔ sran, fluwa nga ń fá mán wɔ yɛ’n, di maan ɔ ku yi.’ ?Ndɛ sɔ’n i bo’n yɛle benin? Ɔ fata kɛ Ezekiɛli kplin su naan ndɛ nga Ɲanmiɛn fa mɛn i kɛ ɔ kan’n, ɔ kɛn i kwlaa’n. Sɛ é kwlá sé’n, ɔ fata kɛ ɔ wluwlu i wunnɛn’n ngba nun. Ezekiɛli seli kɛ: ‘Yɛ n dili ɔ, ɔ yoli min nuan nun nɛnkɛnnɛnkɛn kɛ awɛma nzue sa.’ Ɲanmiɛn ndɛ’n i kanlɛ nzra nun’n yoli Ezekiɛli fɛ kɛ w’a di awɛma nzue sa. Ɔ yoli i cenjele like. Afin ɔ jran Zoova ɲrun, yɛ ɔ di junman m’ɔ fa mɛnnin i kɛ ɔ di’n. Ɔ maan, sɛ bɔbɔ sran m’ɔ kan ndɛ’n kle be’n b’a sɔman nun klanman’n, sanngɛ i kanlɛ’n yoli i fɛ.—An kanngan Ezekiɛl 2:8–3:4, 7-9 nun.
7 Aolia nun like mɔ Ezekiɛli wunnin i’n, ɔ man e afɔtuɛ kpa kun. Ɲanmiɛn ndɛ nga e mian e ɲin e kan kle sran mun’n, sran sunman klomɛn i tilɛ. Be siman ye. Ɔ maan, kɛ ɔ ko yo naan Ɲanmiɛn ndɛ’n i kanlɛ w’a yo e cenjele like titi’n, ɔ fata kɛ e suan Biblu’n nun like kpa. Sɛ y’a yoman sɔ’n, e su siman Ɲanmiɛn Ndɛ’n kpa. ?Wafa nga e kanngan Biblu’n nun’n, annzɛ e suɛn i nun like’n, e kwla yo i kpa tra laa’n? ?Yɛ like nga e suɛnnin i Biblu’n nun’n, e kwla bu su akunndan kpa titi?—Jue. 1:2, 3.
Wafa nga e kwla bo Biblu’n i su ndɛ kanlɛ bo’n
8. ?Awlo’m be nun jasin fɛ’n bolɛ nun’n, wafa sɛ yɛ aniaan wie be bo ndɛ’n i kanlɛ bo ɔ?
8 Awlo’m be nun jasin fɛ’n i bolɛ nun’n, like ng’ɔ kle jasin bofuɛ sunman be yalɛ kpa’n yɛle wafa nga be kwla bo ndɛ’n i kanlɛ bo’n. E si kɛ e jasin bolɛ lika wie nun’n, kɛ ɔ́ yó naan e nin sran kun e koko Biblu’n su yalɛ’n, i bo bolɛ’n ti kekle. Jasin bofuɛ wie’m be liɛ’n, kɛ ɔ ko yo naan jasin fɛ’n i bolɛ’n w’a yo pɔpɔ w’a man be’n, be dun mmua bu ndɛ kpe kan nga bé kán’n i sin sie. Kpɛkun, kɛ be to sran’n, mɔ be kan ndɛ sɔ’n kle i’n, be mɛn i fluwa nɲa kun kɛ kuku ng’ɔ o ngua lɛ’n fa kle’n sa. Fluwa nɲa’n i flɛlɛ’n, ɔ nin foto mɔ be o fluwa’n su’n ti maan sran’n kwla nian fluwa’n. Kɛ ɔ yo sɔ’n, be kwla kan ndɛ nga ti yɛ be bali’n be kle i, kpɛkun be usa sran’n i kosan. Wafa nga e kwla yo i sɔ’n, i kun ekun yɛle kɛ e fa fluwa nɲa’n wafawafa, sɛ nsan annzɛ nnan o, e kle sran’n. Kpɛkun e se i kɛ ɔ fa ng’ɔ klo i’n. B’a seman kɛ sran’m be fluwa nɲa manlɛ’n yɛ é fá káci e junman awlo kwlaa nun ɔn. Sanngɛ, kɛ ɔ ko yo naan y’a kle sran’m be Biblu’n nun like’n ti yɛ e yo sɔ ɔ.
9. ?Ngue ti yɛ e wun siesielɛ’n ti cinnjin ɔn?
9 Ajalɛ’n i kwlaa nga é fá’n, maan e siesie e wun. I sɔ’n yɛ ɔ́ úka e naan kɛ é íjɔ’n, e wla w’a gua ase ɔ, naan y’a kwla bo jasin fɛ’n juejue su awlo’m be nun ɔn. Aniaan bian kun m’ɔ ti atin bofuɛ’n seli kɛ: “Kɛ n siesie min wun’n, yɛ n di aklunjuɛ ɔ. I sɔ’n yɛ maan sran’m be ndɛ kan klelɛ yo min fɛ ɔ.” Atin bofuɛ’n kun ekun seli kɛ: “Kɛ n si fluwa nga ń fá mán sran mun’n i nun ndɛ’n, min wun blibli min kɛ n fa man be.” Ndɛ nga é kó kán klé sran mun’n, kɛ é síesíe e wun’n, sɛ e kɛn i e klun lɔ’n ɔ ti kpa. Sanngɛ aniaan wie’m be waan kɛ bé síesíe be wun’n, sɛ be yo kɛ sran yɛ be su kan ndɛ’n kle i sa’n, i kpa liɛ’n tra. Kɛ be yo sɔ’n, yɛ be tu be klun be di Zoova i junman’n kpa ɔ.—Kol. 3:23; 2 Tim. 2:15.
10. ?Ngue yɛ be kwla yo naan jasin fɛ’n bolɛ aɲia’n w’a uka jasin bofuɛ mun ɔn?
10 Ɔ fata kɛ jasin fɛ’n bolɛ aɲia nga be yo be’n, be uka jasin bofuɛ mun naan kɛ be kɔ awlo’m be nun’n, be si jasin fɛ’n i bo, naan b’a di aklunjuɛ. Sɛ ndɛ ng’ɔ o fluwa Maan e nian Ɲanmiɛn Ndɛ’n nun cɛn kwlaa kan jasin fɛ’n bolɛ ndɛ’n, e kwla kanngan nun naan e koko su yalɛ kpe kan. Sanngɛ, ɔ fata kɛ aniaan ng’ɔ siesie aɲia sɔ’n, ɔ yo maan be koko ndɛ ng’ɔ nin jasin fɛ’n bolɛ lika’n fata’n, mɔ bé wá kɛ́n i ndɛ cɛn sɔ nun’n i su yalɛ, annzɛ be yi i nglo. Annzɛ ɔ nin aniaan’m be koko ndɛ uflɛ wie m’ɔ kwla uka be jasin fɛ’n bolɛ nun’n i su yalɛ. I sɔ yolɛ’n uka jasin bofuɛ mun naan b’a bo jasin fɛ’n klanman. Sɛ asɔnun kpɛnngbɛn’n annzɛ aniaan uflɛ nga be siesie aɲia sɔ’n, be dun mmua siesie be wun kpa ka naan b’a ba aɲia’n bo’n, bé kwlá kán ndɛ kwlaa ngalɛ mun, sanngɛ bé wíe aɲia’n yo dɔ su.—Rɔm. 12:8.
Kɛ sran’m be kan ndɛ mɔ e sie e su’n, ɔ ti kpa
11, 12. ?Wafa sɛ yɛ sɛ e sie e su mɔ e kle kɛ sran’m be ndɛ lo e’n, e kwla kan sran’m be awlɛn’n jasin fɛ’n bolɛ nun ɔn? An fa sa kun yiyi nun.
11 Be wun siesielɛ’n ti kpa. Sanngɛ nɛ́n i ngunmin yɛ ɔ kwla yo naan e nin sran mun y’a kwla koko Biblu’n su yalɛ ɔ, annzɛ y’a kan be awlɛn’n niɔn. Ɔ fata kɛ sran’m be ndɛ lo e kpa. Like ng’ɔ kle kɛ sran ndɛ lo e’n, i kun yɛle e su mɔ e sie e tie ndɛ’n. Akpasua sunianfuɛ kun seli kɛ: “Kɛ e tie ndɛ nga sran’m be kan’n, mɔ e kpɛman be nuan jɔlɛ’n, ɔ yo maan e ndɛ’n yo be fɛ kpɛkun i sɔ’n kle be kɛ be ndɛ lo e.” Kɛ e tie ndɛ nga sran’m be kan mɔ e kle kɛ ndɛ sɔ’n lo e’n, ɔ kwla yo maan e nin be e koko Biblu’n su yalɛ. Ndɛ nga é wá kɛ́n i yɛ’n, ɔ́ wá yíyí nun.
12 Be flɛ Aflansi lɔ klɔ kun kɛ Saint-Étienne. Klɔ sɔ’n su lɔ’n bla kun klɛli fluwa kun fa fiteli zronali mɔ be flɛ i Le Progrès nun. Afin ɔ kunndɛ kɛ sran kwlakwla nian nun. I fluwa’n nun’n, ɔ kannin kɛ sran nɲɔn be ɔli i awlo lɔ. Kɛ ɔ́ yó sɔ nn i wa bla kan m’ɔ le anglo nsan’n sacili ɔ nin a cɛman. I waan: “Kɛ n wunnin sran sɔ mun’n, n ka lɛ wunnin i wlɛ kɛ be ti Zoova i Lalofuɛ. N kunndɛli kɛ ń yó naan be sa be sin blɛlɛɛ, sanngɛ n wunnin kɛ fluwa kun o be sa nun. Ɔ kan like nga ti yɛ Ɲanmiɛn yaci sran’m be lɛ maan be wun ɲrɛnnɛn’n i ndɛ. I sɔ’n ti’n, m’an fuanman be. Sanngɛ akunndan ng’ɔ o n klun yɛle kɛ ń wá klé be kɛ be diman nanwlɛ. [...] E nin be e kali lɛ lele dɔ kun tra su. Kɛ ń íjɔ’n, be sieli be su kpa. Be kleli kɛ min ndɛ lo be. Kɛ é títí nun’n, n wunnin kɛ min wun yo min fɛ kpa ti’n, n seli be kɛ be bla cɛn uflɛ ekun.” (Rɔm. 12:15) Kɛ ɔ́ kɔ́ i ɲrun’n, bla sɔ’n kplinnin su kɛ be kle i Biblu’n nun like. Like nga ndɛ sɔ’n kle e’n, yɛle kɛ nán ndɛ nga e niaan’m be kannin’n yɛ ɔ kali bla’n klun ɔn. Sanngɛ wafa nga be sieli be su be tieli i ndɛ’n yɛ ɔ kɛli i klun ɔn.
13. ?Wafa sɛ yɛ e kwla kan ndɛ ng’ɔ nin i fata’n e kle sran nga e to be jasin fɛ’n bowlɛ’n nun’n niɔn?
13 Kɛ e sie e su e tie ndɛ nga sran’m be kan’n, mɔ e kle kɛ be ndɛ lo e’n, ɔ ti kɛ e su se sran sɔ’m be kɛ be kan like nga ti yɛ be kunndɛ kɛ Ɲanmiɛn sie be’n i ndɛ kle e sa. Kɛ ɔ yo sɔ’n, e kusu e kwla bo jasin fɛ’n e kle be kpa. Atrɛkpa’n, amun a sie i nzɔliɛ le kɛ be nga be si jasin fɛ’n bo kpa’n, yɛle be nga kɛ sran’m bé kán ndɛ’n, be si be su sie’n. (Nya. 20:5) Kɛ i sɔfuɛ’m bé bó jasin fɛ’n, be kle kɛ sran’m be ndɛ lo be kpa. Ɔ maan, nán sran sɔ’m be dunman’n nin lika nga be tran nun’n i ngunmin yɛ be klɛ ɔ. Sanngɛ be klɛ ndɛ ng’ɔ yoli be fɛ’n, ɔ nin ninnge nga be miɛn i wun’n wie. Sɛ sran kun tu i klun kan ndɛ wie m’ɔ ti i cinnjin’n kle be’n, be kunndɛ sa sɔ’n i su tɛlɛ Biblu’n i akua’m be nun, kpɛkun be ko nian sran’n i osu ndɛ nun naan b’a ukɛ i. Be yo kɛ akoto Pɔlu sa. Yɛle kɛ, kɛ be to sran’n, ndɛ ng’ɔ kwla uka sran sɔ’n yɛ be kan ɔn. (An kanngan 1 Korɛntfuɛ Mun 9:19-23 nun.) Kɛ be kle kɛ sran’m be ndɛ lo be sɔ’n, ɔ maan sran’m be sɔ jasin fɛ’n nun, kpɛkun i sɔ’n yi i nglo weiin kɛ ‘Ɲanmiɛn si e aunnvuɛ dan.’—Lik 1:78.
Nán e yaci jasin fɛ’n i bolɛ
14. ?Kɛ e bo jasin fɛ’n, wafa sɛ yɛ e nzuɛn’n kwla fa Zoova liɛ’n niɔn?
14 Zoova bu sran’m be sran ti’n, ɔ yoli maan be klunklo ajalɛ yɛ be fa ɔ. Kannzɛ ɔ ti Ɲanmiɛn mɔ like fi nunmɛn i sin’n, sanngɛ ɔ mianman sran kɛ ɔ su i. Klolɛ mɔ sran kun klo Ɲanmiɛn’n, i ti yɛ ɔ su i ɔ. Kusu’n, sran nga be si ninnge m’ɔ mannin e’n i su ye’n, ɔ ra be su. (Rɔm. 2:4) E mɔ e ti Ɲanmiɛn sran’n, ɔ fata kɛ blɛ kwlaa nga e ɲɛn i wun atin’n, e bo jasin fɛ’n naan sran’m be wun kɛ Ɲanmiɛn ti aklunyefuɛ. (2 Kor. 5:20, 21; 6:3-6) Ɔ maan, ɔ fata kɛ e bu e jasin fɛ’n bowlɛ’n nun sran’m be akunndan kpa. ?Ngue yɛ ɔ kwla uka e naan y’a kwla yo sɔ ɔ?
15. (a) ?Zezi seli i sɔnnzɔnfuɛ’m be kɛ sɛ sran’m b’a sɔman be nun klanman’n, ngue yɛ be yo ɔ? (b) ?Ngue yɛ ɔ kwla uka e naan y’a fa e ɲin y’a sie i sran kpa’m be kunndɛlɛ’n su ɔ?
15 Zezi seli i sɔnnzɔnfuɛ’m be kɛ sɛ sran’m be sɔman be nun klanman’n, nán maan be fa be ɲin sie i sɔ’n su lele. Sanngɛ, maan sran kpa’m be kunndɛlɛ’n su yɛ be fa be ɲin sie ɔ. (An kanngan Matie 10:11-15 nun.) Like kun kwla uka e naan y’a kwla yo sɔ. Yɛle kɛ kan nga e sa ju lɛ’n, maan e bu i akunndan naan e yo. Aniaan bian kun fɛ i wun sunnzun sran nga be kɔ sika ɔkwlɛ kunndɛlɛ’n. I ndɛ ng’ɔ kan’n yɛle kɛ: “Ɔ́ yó lele saan cɛn kun ń fíte sika su le.” Aniaan bian kun ekun i like liɛ’n m’ɔ fɛ i ɲin sie su’n yɛle kɛ “le mɔcuɛ kwlaa nun’n, maan ɔ ɲan sran kun m’ɔ klo Ɲanmiɛn Ndɛ’n, naan le mɔcuɛ kunngba nun’n, ɔ sɛ i sin ko niɛn i osu.” Kɛ be yo i sɔ lɛ ɔ yo ye’n, jasin bofuɛ wie’m be mian be ɲin be kanngan Biblu’n nun ndɛ mma kun be kle be ndɛ tiefuɛ’m be kwlaa. ?Ngue like yɛ amun kwla fa sie amun ɲrun kɛ amún yó ɔ?
16. ?Ngue ti yɛ e yaciman jasin fɛ’n bolɛ’n niɔn?
16 Nán wafa nga sran’m be sɔ jasin fɛ’n nun klanman’n, i ngunmin yɛ ɔ kle kɛ e junman’n dili kpa ɔ. E si kɛ jasin fɛ’n i bolɛ’n ti cinnjin, afin ɔ yo maan sran kpa’m bé ɲán nguan. Sanngɛ, ɔ le ninnge cinnjin wie ekun mɔ i ti yɛ e bo jasin fɛ’n niɔn. Kɛ e bo jasin fɛ’n, e yi i nglo kɛ e klo Zoova. (1 Zan 5:3) Sɛ e bo jasin fɛ’n, i liɛ’n sɛ sran’m be faman su naan be wu’n, nán e dunman nun ɔn. (Yol. 20:26, 27) Jasin fɛ’n bolɛ’n kle sran nga be nantiman mmla fi su’n kɛ ‘be ndɛ bulɛ [mɔ Ɲanmiɛn wá bú’n i] blɛ’n w’a ju.’ (Ngl. 14:6, 7) Sa’m be nun cinnjin kpafuɛ’n yɛle kɛ, kɛ e bo jasin fɛ’n, e manman Zoova i dunman’n asiɛ’n wunmuan’n su. (Jue. 113:3) Ɔ maan, sɛ sran’m bé síe be su o, sɛ bé síeman be su o, ɔ fata kɛ e bo Ɲanmiɛn Sielɛ’n i jasin fɛ’n. Nanwlɛ, kɛ e mian e ɲin bo jasin fɛ’n, ɔ yo Zoova fɛ.—Rɔm. 10:13-15.
17. ?Ngue yɛ ɔ ka kaan sa sran’m bé wá sí i ɔ?
17 Andɛ’n, sran kpanngban be bu jasin fɛ’n mɔ e bo’n i like finfin. Sanngɛ ɔ ka kaan sa’n, bé wá káci aniɛn. (Mat. 24:37-39) Zoova seli Ezekiɛli kɛ, kɛ Ɲanmiɛn ndɛ’n ng’ɔ kan’n ko kpɛn su’n, Izraɛlifuɛ ɲin keklefuɛ’m ‘bé wá sí jrɛiin kɛ Ɲanmiɛn nuan ijɔfuɛ kun o be afiɛn.’ (Eze. 2:5) I kunngba’n, kɛ Ɲanmiɛn wá dí mɛn nga i nunfuɛ’m be jɔlɛ’n, sran’m bé wá sí kɛ kannzu, jasin fɛ’n nga Zoova i Lalofuɛ’m be boli i gua su nin awlo’m be nun’n, ɔ fin Ɲanmiɛn Zoova, naan i Lalofuɛ’m be ti i janunfuɛ sakpa. ?Nán e cenjele yɛle kɛ Zoova i dunman o e su, mɔ e kɛn i ndɛ’n blɛ cinnjin nga nun’n? Ɲanmiɛn dunman nun’n, maan e jran kekle awlo’m be nun jasin fɛ’n bolɛ’n nun.
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ e kwla tra e awlɛn naan y’a bo jasin fɛ’n niɔn?
• ?Ngue yɛ ɔ kwla uka e naan awlo’m be nun’n, y’a kwla bo Biblu’n i su ndɛ kanlɛ bo ɔ?
• ?Wafa sɛ yɛ e kwla kle kɛ sran’m be ndɛ lo e ɔ?
• ?Ngue yɛ ɔ kwla uka e naan y’a bu e jasin fɛ’n bowlɛ’n nun sran’m be wun akunndan kpa ɔ?
[Kuku/Foto, bue 17]
Biblu’n nun ndɛ kanlɛ i bo bolɛ wafa’n kun
I bo bolɛ’n
◼ Kɛ amun yo sran’n i like’n, amun kwla mɛn i fluwa nɲa’n kun, kpɛkun amun se i kɛ: “N bali ɔ wun wunlɛ naan ń kán ndɛ cinnjin ng’ɔ o fluwa nga nun’n ń klé wɔ.”
◼ Annzɛ kusu amun kwla mɛn i fluwa nɲa kun kpɛkun amun se i kɛ: “Like nga ti yɛ n fali fluwa nga mannin wɔ’n yɛle kɛ, n kunndɛ kɛ ń sí akunndan nga a bu i ndɛ ng’ɔ o nun’n su’n.”
Sɛ sran’n sɔ fluwa’n nun’n
◼ Nán e bo kokowa. Sanngɛ maan e usɛ i fluwa’n i flɛlɛ’n su kosan pɔpɔ kun.
◼ Kɛ sran’n íjɔ’n, maan e sie e su kpa e tie ndɛ ng’ɔ kan’n. Maan e yo i mmo, kpɛkun kɛ é kán ndɛ’n, nán e wla fi ndɛ ng’ɔ kannin’n su.
Kɛ ɔ ko yo naan yalɛ kokolɛ’n w’a ɔ i ɲrun’n
◼ An kanngan Biblu’n nun ndɛ mma kun annzɛ nɲɔn kun nun. An koko ndɛ ng’ɔ ti sran’n i cinnjin’n i su yalɛ.
◼ Sɛ ndɛ’n yo sran’n i fɛ’n, maan e mɛn i Biblu’n i akua’n kun naan e kle wafa nga é klé i Biblu’n nun like’n. Maan e nin sran’n e nuan sɛ cɛn kun su naan e sa e sin ko niɛn i osu.