?Kɛ be se kɛ Zezi bali naan ɔ o lɛ’n, e wun i bo kpa?
‘?Ngue yɛ ɔ ti ɔ balɛ’n nin mɛn’n i awieliɛ’n i nzɔliɛ’n niɔn? Kle ye.’—MAT. 24:3.
1. ?Kosan cinnjin kpa benin yɛ Zezi i akoto’m be usɛli i ɔ?
CƐN kun’n, Zezi i akoto nnan be ko toli i Olivie Oka’n su naan b’a usɛ i kosan kun. Be usali kosan sɔ’n, ɔ su wa di afuɛ akpi nɲɔn. Be usɛli i kɛ: ‘?Blɛ onin yɛ sa sɔ’m bé yó ɔ, yɛ ngue yɛ ɔ ti ɔ balɛ’n nin mɛn’n i awieliɛ’n i nzɔliɛ’n niɔn? Kle ye.’ (Matie 24:3) Kosan sɔ nun’n, akoto’m be kannin like cinnjin nɲɔn ndɛ. Be kannin blɛ nga i nun yɛ Zezi ‘bá mɔ bé wún kɛ ɔ o lɛ’n,’ ɔ nin “mɛn’n i awieliɛ’n” be nzɔliɛ’n, i ndɛ. ?Ndɛ nɲɔn sɔ’m be bo’n yɛle benin?
2. ?Kɛ be se kɛ “mɛn’n i awieliɛ’n,” i bo’n yɛle benin?
2 Amun e dun mmua fa e ɲin sie ndɛ nga be se kɛ “mɛn’n i awieliɛ’n,” i su. Kɛ Wawle Biblu’n nun be se kɛ “mɛn’n i awieliɛ” annzɛ “mɛn’n kɔ́ i bue nuan’n,” Glɛki nun be se kɛ syn·teʹlei·a. Kusu’n, Glɛki nun ndɛ mma te’los mɔ Wawle Biblu’n kaci i wie kɛ “awieliɛ’n,” i bo kpa’n yɛle kɛ like’n “w’a wie.” Amun e fa ijɔlɛ nga be ijɔ nzra nun Ɲanmiɛn Sielɛ Blɛ sua’m be nun’n, i sunnzun ase naan e wun ngbaciɛ ng’ɔ o ndɛ nɲɔn sɔ’m be afiɛn’n. Kɛ be se kɛ ijɔlɛ’n w’a ju i awieliɛ’n, yɛle kɛ e o ijɔlɛ’n i akpasua kasiɛn’n nun. Blɛ kpe kan sɔ nun’n, ijɔfuɛ’n fa ndɛ ng’ɔ yiyili nun’n, ɔ nin wafa nga ndɛ sɔ’n kan nzrafuɛ mun’n, ɔ kpɛn be wla. Sanngɛ, kɛ be se kɛ ijɔlɛ’n w’a wie’n, nn ijɔfuɛ’n fin cenje’n su ɔ su jra. Ɔ maan, lele nin kɛ be se kɛ mɛn tɛ ng’ɔ o yɛ’n w’a wie’n, i sɔ blɛ’n yɛ Biblu’n flɛ i mɛn’n i awieliɛ’n niɔn.
3. ?Sa nga be ju blɛ mɔ Zezi o lɛ nun’n, be nun wie yɛle benin?
3 ?Yɛ Zezi i “balɛ” mɔ i akoto’m be usɛli i su kosan’n, i bo’n yɛle benin? Ndɛ nga be kacili i wa kɛ balɛ’n, Glɛki aniɛn’n nun yɛle pa·rou·siʹa. Ndɛ sɔ’n i bo kpa’n yɛle kɛ “ɔ bali naan ɔ o lɛ” annzɛ “ɔ o lɛ.”a Kɛ ɔ fɛ i afuɛ nga be flɛ i 1914 nun mɔ Zoova sieli Zezi famiɛn ɲanmiɛn su lɔ’n, Zezi bali yɛ ɔ o lɛ. Kpɛkun, lele nin i kɛ blɛ mɔ ‘ɲrɛnnɛn’n ɔ́ yó dan’ mɔ Zezi núnnún klunwifuɛ mun’n, ɔ te o lɛ. (Matie 24:21) Sa kpanngban ju blɛ sɔ mɔ Zezi o lɛ’n nun. Sa sɔ’n wie yɛle kɛ ‘mɛn’n ɔ́ kɔ́ i bue nuan.’ Kpɛkun, be yiayia be nga be kpali be sieli be ngunmin’n, yɛ be cɛn be naan be ko tran ɲanmiɛn su lɔ. (2 Tim. 3:1; 1 Kor. 15:23; 1 Tɛs. 4:15-17; 2 Tɛs. 2:1) Ɔ maan, e kwla se kɛ “mɛn’n i awieliɛ’n” (syn·teʹlei·a), i kunngba’n yɛle blɛ mɔ Zezi o lɛ’n (pa·rou·siʹa).
Ɔ timan blɛ kpe kan
4. ?Wafa sɛ yɛ blɛ ng’ɔ́ klé kɛ Zezi bali naan ɔ o lɛ’n, ɔ nin sa nga be juli Nowe blɛ su’n, be fa be wun ɔn?
4 Blɛ mɔ Zezi o lɛ’n i su ndɛ nga i bɔbɔ kannin’n, ɔ kle kɛ pa·rou·siʹa timan blɛ kpe kan. (Kanngan Matie 24:37-39 nun.) Maan e sie i nzɔliɛ kɛ, kɛ Zezi kán blɛ m’ɔ́ klé kɛ ɔ bali naan ɔ o lɛ’n i ndɛ’n, nán blɛ kpe kan mɔ Nzue dan’n tɔli Nowe blɛ su’n, yɛ ɔ fa sunnzunnin i ɔ. Sanngɛ, blɛ tɛnndɛn ng’ɔ fɛli i lele fa juli blɛ nga Nzue dan’n tɔli m’ɔ kpɛli’n, yɛ Zezi fa sunnzunnin blɛ ng’ɔ bali m’ɔ o lɛ’n niɔn. Blɛ sɔ nun’n, Nowe boboli mmeli’n, ɔ boli jasin fɛ’n lele naan Nzue dan’n w’a tɔ. Lele naan sa kwlaa sɔ’n w’a wie’n, ɔ cɛli kpa. I sɔ kunngba’n, blɛ nga Zezi o lɛ’n, i nun yɛ sa fanunfanun ng’ɔ fata kɛ be ju lele naan ɲrɛnnɛn dan’n w’a wie’n, bé jú ɔ.—2 Tɛs. 1:6-9.
5. ?Wafa sɛ yɛ ndɛ ng’ɔ o Sa Nglo Yilɛ ndɛ tre 6 nun’n, ɔ kle kɛ blɛ m’ɔ Zezi bali ɔ o lɛ’n, ɔ timan blɛ kpe kan ɔn?
5 Biblu’n nun ndɛ wie mun ekun be kle weiin kɛ nán blɛ kpe kan nga Klist núnnún klunwifuɛ mun’n, yɛ ɔ́ klé kɛ ɔ bali naan ɔ o lɛ ɔ. I wie yɛle kɛ, kɛ Sa Nglo Yilɛ fluwa’n kán Zezi ndɛ’n, ɔ se kɛ Zezi fu nnɛn kpanngɔ ufue kun su. Yɛ be mɛnnin i like kun kɛ sika kle sa. (Kanngan Sa Nglo Yilɛ 6:1-8 nun.) Kɛ afuɛ nga be flɛ i 1914 nun Ɲanmiɛn sieli Zezi famiɛn’n, Zezi ɔli ‘yasua su kɛ ɔ nin i kpɔfuɛ mun bé kó kún naan ɔ́ kwlá be.’ Sa Nglo Yilɛ fluwa’n kle kɛ nnɛn kpanngɔ wafawafa be nin be fufuɛ’m be su i su. Be ti alɛ dilɛ nin awe, ɔ nin tukpaciɛ m’ɔ sa ndɛndɛ’n, be nzɔliɛ. Sa kwlaa sɔ’m be ju blɛ tɛnndɛn mɔ i nun yɛ “mɛn’n kɔ́ i bue nuan’n,” i nun. E wun kɛ sa sɔ’m be kpɛn su e blɛ liɛ’n nun.
6. ?Wafa sɛ yɛ Sa Nglo Yilɛ ndɛ tre 12 uka e naan kɛ be se kɛ Klist bali naan ɔ o lɛ’n, y’a wun i wlɛ ɔ?
6 Sa Nglo Yilɛ ndɛ tre 12 kan Zezi i famiɛn sielɛ ɲanmiɛn su lɔ’n, i su ndɛ wie mun ekun. Ɔ kan kɛ alɛ kun tɔli ɲanmiɛn su lɔ. Naan Zezi Klist mɔ i nun m’ɔ o ɲanmiɛn su lɔ’n i dunman’n yɛle Misɛli’n, ɔ nin i anzi mun yɛ mmusu’m be si Satan nin i anzi’m be kunnin. I agualiɛ su’n, be kannin mmusu’m be si Satan nin i anzi’m be bo guali be asiɛ’n su wa. Sa Nglo Yilɛ fluwa’n kle kɛ, mmusu’m be si Satan w’a fa ya dan kpa, afin ‘ɔ si kɛ i cɛn’n w’a sɔnman kun.’ (Kanngan Sa Nglo Yilɛ 12:7-12 nun.) Ɔ maan, e wun i wlɛ weiin kɛ, kɛ be ko sie Klist famiɛn ɲanmiɛn su lɔ’n, ɲrɛnnɛn sa’m bé wá tɔ́ asiɛ’n su wa. I sɔ’n ti’n, ɔ nin i fata kɛ be yo asiɛ’n sufuɛ’m be “yako.”
7. ?Ngue yɛ Jue Mun be fluwa nɲɔn su’n kɛn i ndɛ ɔ? ?Yɛ ngue ajalɛ yɛ i sɔ’n man sran’m be atin kɛ be fa ɔ?
7 Sielɛ mɔ bé síe Zezi famiɛn Siɔn Oka m’ɔ o ɲanmiɛn su lɔ’n i su’n, Jue Mun be fluwa’n i nɲɔn su’n, ɔ dun mmua kɛnnin i ndɛ. (Kanngan Jue Mun 2:5-9, ɔ nin Ju 110:1, 2 be nun.) Jue sɔ’n kle ekun kɛ be mannin mɛn siefuɛ mun nin be sran’m be blɛ naan be koto Klist bo. Be seli be kɛ be “yo ngwlɛlɛfuɛ” naan be jran maan “be man be afɔtuɛ.” Nanwlɛ, i blɛ sɔ nun’n, sran kwlaa “ng’ɔ kunndɛ fiawlɛ [Ɲanmiɛn] i nun’n,” afin ɔ su Zoova nin sran m’ɔ sieli i famiɛn’n, “i liɛ su ti ye!” Ɔ maan, blɛ mɔ Zezi o lɛ m’ɔ ti famiɛn’n, be man mɛn siefuɛ mun nin be sran’m be atin naan be kaci.—Jue Mun 2:10-12.
Be wun i wlɛ kɛ Zezi o lɛ
8, 9. ?Wan mun yɛ bé wún nzɔliɛ ng’ɔ́ klé kɛ Zezi bali naan ɔ o lɛ’n i wlɛ, kpɛkun bé sí i bo kpa’n niɔn?
8 Kɛ Farizifuɛ’m be seli Zezi kɛ ɔ kle be blɛ nga Ɲanmiɛn wá síe sran mun’n, Zezi tɛli be su kɛ ‘ɔ timan like mɔ be wun kɛ i yɛ ɔ́ bá yɛ’n,’ kɛ nga be fa bu i’n sa. (Lik 17:20, 21) Be nga be suman Zoova’n, be su wunmɛn i wlɛ. ?Yɛ ɔ́ yó sɛ li yɛ bé wún i wlɛ ɔ? Afin, be kplinman su bɔbɔ kɛ Zezi sie be. ?Sɛ ɔ ti sɔ’n niɔn, wan mun yɛ bé wún nzɔliɛ ng’ɔ́ klé kɛ Zezi bali naan ɔ o lɛ’n i wlɛ, kpɛkun bé sí i bo kpa’n niɔn?
9 Zezi seli kɛ i sɔnnzɔnfuɛ’m bé wún nzɔliɛ sɔ’n i wlɛ kɛ nga be fa wun ‘kɛ ɲanmiɛn’n kpa sin i bue kun lɔ m’ɔ kpaja ju i bue kun lɔ’n’ sa. (Kanngan Lik 17:24-29 nun.) Maan e sie i nzɔliɛ kɛ Matie 24:23-27 nun’n, Zezi kannin nzɔliɛ kunngba sɔ m’ɔ́ klé kɛ ɔ bali naan ɔ o lɛ’n, i ndɛ.
Sran nga be o lɛ’n be wun nzɔliɛ’n
10, 11. (a) ?Laa’n, Sasafuɛ Tranwlɛ’n yiyili nun kɛ “ajulisufuɛ” mɔ Matie 24:34 kan be ndɛ’n, yɛle wan? (b) ?Wan mun yɛ Zezi i sɔnnzɔnfuɛ’m be wunnin i wlɛ kɛ be o “sran nga be o lɛ’n,” be nun wie ɔ?
10 Laa’n, Sasafuɛ Tranwlɛ’n yiyili nun kɛ Zezi nin i akoto’m be blɛ su’n, “sran nga be o lɛ’n” mɔ Matie 24:34 kan be ndɛ’n, yɛle ‘blɛ sɔ nun Zuifu mɔ be lafiman Ɲanmiɛn su’n.’b Ndɛ’n i nun yiyilɛ sɔ’n ti su. Afin, blɛ kwlaa nga Zezi kannin “ajulisufuɛ” mun be ndɛ’n, w’a kanman be su ndɛ kpa. Kpɛ sunman, ɔ seli kɛ ajulisufuɛ sɔ’m be ti “tɛtɛ.” (Mat. 12:39; 17:17; Mark 8:38) Ɔ maan, Sasafuɛ Tranwlɛ’n seli kɛ “ajulisufuɛ” tɛtɛ mɔ Zezi kannin be ndɛ’n, yɛle e blɛ liɛ’n nun sran nga be lafiman Zoova su mɔ bé wún ninnge nga bé klé kɛ e o “mɛn’n i awieliɛ’n” (syn·teʹlei·a). Kpɛkun, kɛ bé sé kɛ mɛn tɛ nga w’a wie’n (teʹlos), bé wún nun.
11 Ɔ ti su kɛ, i nun mɔ Zezi kán “ajulisufuɛ” mun be ndɛ’n, w’a kanman be su ndɛ klanman. Kɛ ɔ́ kán ndɛ’n, wie liɛ’n, ɔ kan kle i blɛ su sran tɛtɛ mun. Wie kusu ɔ, ɔ kan ajulisufuɛ’m be ndɛ kle sran uflɛ. ?Sanngɛ i sɔ’n ti’n, é sé kɛ “ajulisufuɛ” nga Matie 24:34 kan be ndɛ’n, yɛle i blɛ su sran tɛtɛ mun? Cɛcɛ. Afin, nán e wla fi su kɛ Zezi i sɔnnzɔnfuɛ nnan yɛ “be bɛli i wun lɛ” ɔ. (Matie 24:3) Kusu’n, kɛ Zezi kán “ajulisufuɛ” mun be ndɛ klé i sɔnnzɔnfuɛ mun’n, w’a kanman be su ndɛ tɛ. Ɔ maan, i akoto’m be wunnin i wlɛ kɛ be bɔbɔ nin be niaan Klistfuɛ’m be o “sran nga be o lɛ’n,” mɔ be su wieman ‘naan sa sɔ’m b’a yo’n,’ be nun wie.
12. ?Kɛ Zezi se kɛ “sran nga be o lɛ’n,” wafa sɛ yɛ ndɛ sɔ’n i ɲrun nin i sin’n uka e maan e wun sran sɔ’m be wlɛ ɔ?
12 ?Ngue ti yɛ e kwla se sɔ ɔ? Maan e nian ndɛ sɔ’n i ɲrun nin i sin’n kpa. Matie 24:32, 33 nun’n, Zezi seli kɛ: ‘An fa sunnzun figie’n be nian. Kɛ ɔ́ bó nɲrɛ, mɔ i nɲa’n trɛ́’n, an si kɛ munngun’n w’a mantan. I kunngba’n niɔn, amun kusu kɛ an wun ninnge sɔ’m be kwlaa’n, maan amun si kɛ m mɔ n kacili Sran’n min nin amun a mantan yɛ n jin anuan’n sin.’ (An nian Mark 13:28-30 nin Lik 21:30-32 nun wie.) I sin’n, Matie 24:34 se kɛ: ‘Nanwlɛ, sran nga be o lɛ’n be su wieman naan sa sɔ’m b’a yo.’
13, 14. ?Ngue ti yɛ e kwla se kɛ “sran nga be o lɛ’n” mɔ Zezi kan be ndɛ’n, yɛle i sɔnnzɔnfuɛ mun ɔn?
13 Zezi seli kɛ i sɔnnzɔnfuɛ mɔ Ɲanmiɛn fɛ́ i wawɛ’n mán be’n, be yɛ kɛ bé wá wún “sa sɔ’m be kwlaa’n,” bé wún be wlɛ ɔ. Ɔ maan, kɛ Zezi seli kɛ ‘sran nga be o lɛ’n, be su wieman naan sa sɔ’m be kwlaa b’a yo’n,’ i sɔnnzɔnfuɛ’m be ndɛ yɛ ɔ kan ɔn.
14 Zezi i sɔnnzɔnfuɛ’m be liɛ’n, be timan kɛ be nga be lafiman Zoova su’n be sa. Afin, kɛ be wun nzɔliɛ’n, be wun be bo kpa. Kpɛkun, kɛ be fa sa mun “sunnzun” nzɔliɛ nga Zezi kleli’n i nun ninnge mun’n, “be si” be bo kpa’n. Be wun i wlɛ kpa kɛ Zezi “jin anuan’n sin.” Ndɛ nga Zezi kannin’n, i bue kpɛnnin su Zezi i sɔnnzɔnfuɛ klikli nga be kpali be sieli be ngunmin’n, ɔ nin be blɛ su Zuifu’m be ɲrun. Sanngɛ, saan be nga i sin be wa kacili Zezi i sɔnnzɔnfuɛ mɔ Ɲanmiɛn kpali be sieli be ngunmin’n, be yɛ be kwla bu sa nga be juli’n be sin naan b’a wun be wlɛ kpa ɔ.
15. (a) ?E blɛ liɛ nun’n, wan mun yɛle “sran nga be o lɛ’n” mɔ Zezi kannin be ndɛ’n? (b) ?Ngue ti yɛ é kwlá siman blɛ mɔ “sran nga be o lɛ’n,” be di’n niɔn? (An nian fluwa’n i bue 29 i kuku’n nun.)
15 Sran nga be wunman Ɲanmiɛn i ndɛ m’ɔ ti nanwlɛ’n i wlɛ andɛ’n, be liɛ’n, be waan ‘ɔ leman like mɔ be wun’ i m’ɔ kle kɛ Zezi bali naan ɔ o lɛ ɔ. Be waan ninnge’m be kwlaa be te o be osu laa’n nun. (2 Piɛr 3:4) Sanngɛ, Klist i niaan mɔ be o asiɛ’n su wa andɛ’n, be liɛ’n, be wunnin nzɔliɛ ng’ɔ kle kɛ Zezi bali naan ɔ o lɛ’n i wlɛ kɛ ɲanmiɛn’n yɛ w’a kpa sin i bue kun lɔ m’ɔ kpaja ju i bue kun lɔ’n sa. Be yɛ be ti “sran nga be o lɛ’n,” mɔ be su wieman ‘naan sa sɔ’m be kwlaa b’a yo’n’ niɔn.c I sɔ’n kle kɛ, blɛ mɔ Klist i niaan mɔ be kpali be sieli be ngunmin’n be nun wie’m be te o asiɛ’n su wa’n, yɛ ɲrɛnnɛn dan nga be kɛnnin i ndɛ’n, ɔ́ bó i bo ɔ.
Maan e “tran minndɛ”
16. ?Ngue yɛ ɔ fata kɛ Klist i sɔnnzɔnfuɛ’m be kwlaa be yo ɔ ?
16 Sɛ e wun nzɔliɛ ng’ɔ kle kɛ Zezi bali naan ɔ o lɛ’n i wlɛ’n, ɔ ti kpa. Sanngɛ, nɛ́n i ngba ɔ. Afin, Zezi seli ekun kɛ: “Ndɛ nga ń kán klé amun yɛ’n, n kan kle sran’m be kwlaa kɛ be tran minndɛ.” (Mark 13:37) Maan ɔ yo be nga bé kɔ́ ɲanmiɛn su lɔ’n nin o, annzɛ sran kpanngban kpa mun o, ndɛ sɔ’n ti cinnjin kpa man e kwlaa andɛ. Kɛ afuɛ nga be flɛ i 1914 nun Zoova sieli Zezi famiɛn ɲanmiɛn su lɔ lele andɛ’n, w’a di afuɛ 90 tra su. Kannzɛ bɔbɔ ɔ kwla yo kekle man e kɛ e buabua e wun sie naan e tran minndɛ’n, sanngɛ ɔ fata kɛ e yo sɔ. Kɛ mɔ e si kɛ Zezi bali naan ɔ ti famiɛn ɲanmiɛn su lɔ’n ti’n, i sɔ’n uka e maan e kwla yo i sɔ liɛ’n. I sɔ’n kle e ekun kɛ ɔ cɛ kaan sa’n, ɔ́ wá núnnún i kpɔfuɛ mun ‘dɔ nga be bumɛn i akunndan’n su’n.’—Lik 12:40.
17. ?Kɛ be se kɛ Klist bali naan ɔ o lɛ’n mɔ e si i bo kpa’n ti’n, ɔ fata kɛ i sɔ’n yo e sɛ? ?Yɛ junman benin yɛ ɔ fata kɛ e fɛ i dilɛ’n e cici e ti kpa tra laa’n niɔn?
17 Kɛ be se kɛ Klist bali naan ɔ o lɛ’n, e si i bo kpa’n. I sɔ’n ti’n, e wun i wlɛ kpa kɛ e ɲrun w’a ka koko. E si kɛ, kɛ ɔ fɛ i afuɛ nga be flɛ i 1914 nun’n, ɔ ti famiɛn ɲanmiɛn su lɔ. Ɔ ka kaan sa’n, ɔ́ wá núnnún klunwifuɛ mun, kpɛkun ɔ́ káci ninnge mun mlɔnmlɔn asiɛ wunmuan’n su. I sɔ’n ti’n, ɔ fata kɛ junman nga Zezi mannin e’n, e fɛ i dilɛ’n e cici e ti kpa tra laa’n. Zezi seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n [teʹlos] ɔ́ jú ɔ.’—Matie 24:14.
[Ja ngua lɛ ndɛ mun]
a Sɛ amun kunndɛ kɛ amún wún sa sɔ’n i wlɛ ekun’n, amun nian fluwa Étude perspicace des Écritures, Volume 2, bue 648-51 nun.
b An nian Sasafuɛ Tranwlɛ’n, afuɛ 1995, Novamblu 1 (w-F) i bue 11-15, 19, 30, 31 nun.
c Atrɛkpa’n, blɛ mɔ Sa Nglo Yilɛ fluwa’n i nun aolia nun like klikli’n ɔ di naan i nun ninnge’m b’a kpɛn su’n, yɛ “sran nga be o lɛ’n” be di ɔ. (Sa Nglo Yilɛ 1:10–3:22) Sa sɔ m’ɔ kpɛn su e Min’n i cɛn nun’n, ɔ fɛ i afuɛ nga be flɛ i 1914 nun lele fa ju blɛ mɔ be nga be kpali be sie be ngunmin’n be nun kasiɛn’n ɔ́ wú, kpɛkun ɔ́ cɛ́n’n.—An nian La Révélation : le grand dénouement est proche! i bue 24, kpɔlɛ 4 nun.
?Wafa sɛ yɛ amún tɛ́ kosan’m be su ɔ?
• ?Wafa sɛ yɛ e si kɛ blɛ nga Zezi bali naan ɔ o lɛ’n, ɔ timan blɛ kpe kan ɔn?
• ?Wan mun yɛ be wun nzɔliɛ ng’ɔ kle kɛ Zezi bali naan ɔ o lɛ’n i wlɛ, kpɛkun be si i bo kpa ɔ?
• ?Wan mun yɛle e blɛ liɛ’n nun “sran nga be o lɛ” mɔ Matie 24:34 kan be ndɛ’n?
• ?Ngue ti yɛ é kwlá siman blɛ mɔ “sran nga be o lɛ’n,” be di’n niɔn?
[Kuku, bue 29]
?E kwla si blɛ mɔ “sran nga be o lɛ’n,” bé dí’n?
Titi’n, kɛ be se kɛ “sran nga be o lɛ’n” annzɛ “ajulisufuɛ” mun’n, yɛle blɛ kun nun sran kpɛnngbɛn nin ba kanngan’m be kwlaa. I wie yɛle ndɛ ng’ɔ o Ezipt Lɔ Tulɛ 1:6 nun’n. I waan: ‘I sin’n, Zozɛfu wa wuli. I niaan mun nin i sɔ blɛ liɛ nun sran’m be kwlaa be wuli.’ Zozɛfu nin i niaan’m be afuɛ sɛman. Sanngɛ, blɛ kunngba’n i nun sa nga be juli’n, ɔ yoli be ngba be ɲrun. “I sɔ blɛ liɛ nun sran’m be” nun wie yɛle Zozɛfu i ɲrun kpɛnngbɛn mun. Zozɛfu dun mmua wuli naan sran sɔ’m be nun wie’m b’a wu. (Bo Bolɛ 50:24) Be wuli Zozɛfu i sin naan b’a wu “i sɔ blɛ liɛ nun sran’m be” nun wie ekun kɛ Bɛnzamɛn sa’n. Yɛ kɛ Zozɛfu fá wú’n, nn atrɛkpa sran sɔ’m be ɲin te o su.
Ɔ maan, kɛ be kan “sran nga be o lɛ’n” be ndɛ, mɔ be fa wɔ blɛ trele kun nun sran mun’n, sɛ ɔ timan kɛ be kleli kɛ blɛ sɔ’n fa bo i bo m’ɔ fa wie’n naan ɔ cɛman ngboko’n, be kwlá siman blɛ nga i sɔfuɛ’m be di’n i weiin sa. I sɔ’n ti’n, kɛ Zezi kannin “sran nga be o lɛ’n,” be ndɛ Matie 24:34 nun’n, w’a klemɛn i sɔnnzɔnfuɛ mun wafa nga be kwla yo naan b’a si cɛn nga ‘mɛn’n m’ɔ su kɔ i bue nuan’n,’ ɔ́ wíe’n. I kpa bɔbɔ’n, Zezi kleli kpa kɛ be su siman “cɛn sɔ’n nin i dɔ’n.”—2 Tim. 3:1; Mat. 24:36.
[Foto, bue 26]
Kɛ ɔ fɛ i afuɛ nga be flɛ i 1914 nun mɔ be sieli Zezi famiɛn’n, ‘ɔ kɔ yasua su kɛ ɔ nin i kpɔfuɛ’m bé kó kún naan ɔ́ kwlá be.’
[Foto, bue 28]
‘Sran nga be o lɛ’n, be su wieman naan sa sɔ’m b’a yo.’