?Blɛ benin nun yɛ Ɲanmiɛn Sielɛ Blɛ’n jú ɔ?

ZEZI i akoto’m be kunndɛli kɛ bé sí blɛ nga Zezi wá dí famiɛn’n. Ɔ maan, be usɛli i kɛ: ‘?Nannan, blɛ nga nun yɛ á wá síesíe Izraɛli famiɛn diwlɛ’n ekun ɔn?’ (Sa Nga Be Yoli’n 1:6) Akoto’m be usali kosan sɔ’n, i afuɛ 2.000 yɛ. Sanngɛ sran kpanngban be te kunndɛ kɛ bé sí blɛ nga Ɲanmiɛn Sielɛ Blɛ’n jú’n.

Kɛ mɔ Ɲanmiɛn Sielɛ’n yɛ ɔ yoli Zezi i jasin fɛ’n bolɛ’n i nun ndɛ cinnjin’n ti’n, e kwla lafi su kɛ ɔ kannin blɛ ng’ɔ́ wá jú’n i ndɛ. Kpɛ sunman’n, ɔ kannin blɛ wie m’ɔ kle kɛ ɔ bali naan ɔ o lɛ’n, i ndɛ. (Matie 24:37)a Blɛ kunngba sɔ nun yɛ bé síe i famiɛn ɔn. ?Blɛ ng’ɔ́ klé kɛ Zezi bali naan ɔ o lɛ’n yɛle benin? Maan e fa e ɲin sie like nnan mɔ Biblu’n fa yiyi nun’n, be su e nian.

1. Kɛ ɔ́ wá wú’n, i osu cɛ́ kpa naan b’a se kɛ ɔ o lɛ. Zezi i sunnzun ase kun nun’n, ɔ fɛli i wun sunnzunnin bian kun m’ɔ ‘waan ɔ́ kɔ́ nvle wie nun mmua kpa naan be fɛ i sie famiɛn’n.’ (Lik 19:12) ?Wafa sɛ yɛ Ɲanmiɛn nuan ndɛ sɔ’n kpɛnnin su ɔ? Kɛ Zezi wuli mɔ be cɛnnin i’n, ɔ ɔli “nvle wie nun mmua kpa” yɛle kɛ ɔ ɔli ɲanmiɛn su lɔ. Kɛ Zezi bɔbɔ dun mmua fa kannin sa’n, “kɛ ɔ cɛli kpa’n” ɔ sɛli i sin bali famiɛn dilɛ.—Matie 25:19.

Kɛ Zezi ɔli ɲanmiɛn su’n, i sin’n m’ɔ́ cɛ́ kan’n, akoto Pɔlu seli kɛ: ‘Klist liɛ’n, kpalɛ kunngba nga ɔ suli i’n, ɔ kpɛ i kwlaa ti, ɔ maan be kunndɛman uflɛ kun. I sin ɔ ko trannin Ɲanmiɛn i fama su. Siɛn’n ɔ ti lɔ, ɔ su minndɛ kɛ Ɲanmiɛn maan ɔ tiɛ i kpɔfuɛ’m be su.’ (Ebre Mun 10:12, 13) Ɔ maan, kɛ Zezi ɔli ɲanmiɛn su’n, ɔ minndɛli kpa liɛ su. Sanngɛ, kɛ Zoova sieli i famiɛn’n yɛ minndɛlɛ sɔ’n wieli ɔ. Kɛ ɔ fin lɛ’n yɛ e si kɛ Zezi o lɛ ɔ. ?Asiɛ’n su wa’n, sran’m be ɲinma wún kɛ w’a ba naan ɔ o lɛ?

2. Sran ɲinma su wunman kɛ ɔ bali naan ɔ o lɛ. Nán maan amun wla fi su kɛ, Zezi yiyili like ng’ɔ́ klé kɛ w’a ba naan ɔ o lɛ i nun weiin. (Matie 24:3) Sɛ ɔ ti kɛ be ɲinma kwla wun i balɛ sɔ’n, nn be kanman nzɔliɛ ndɛ kun. Maan e fa sunnzun ase kun e yiyi nun. Sɛ e su tu ajalɛ é kɔ́ jenvie nuan klɔ kun su’n, e kwla wun akpɔ nuan nzɔliɛ ninnge mɔ be kle e atin’n. ?Sanngɛ, kɛ e ko ju jenvie nuan mɔ e wun i m’ɔ la lɔ plaii’n, e sa mian nzɔliɛ wun ekun? Cɛcɛ. Afin, kɛ e ɲinma wun like’n i trele’n, e kunndɛmɛn i nzɔliɛ kun.

Zezi yiyi i nzɔliɛ’n m’ɔ kle kɛ ɔ o lɛ’n i nun naan sran’m b’a wun i wlɛ kɛ ɔ o ɲanmiɛn su lɔ. Afin sran ɲinma su wunmɛn i wun. I sɔ’n ti’n, Zezi seli kɛ: ‘Ɲanmiɛn i sran’m be sielɛ’n ɔ timan like mɔ be wun kɛ i yɛ ɔ́ bá yɛ’n.’ (Lik 17:20) ?Sɛ ɔ ti sɔ’n, nn wafa sɛ yɛ nzɔliɛ sɔ’n úka be nga be o asiɛ’n su wa’n naan b’a wun i wlɛ kɛ, Klist bali naan ɔ o lɛ ɔ?

3. Ɲrɛnnɛn dandan nga bé tɔ́ asiɛ’n su’n, bé klé kɛ Zezi o lɛ. Zezi seli kɛ blɛ ng’ɔ́ wá dí famiɛn ɲanmiɛn su lɔ’n, alɛ dilɛ’n nin awe’n, ɔ nin asiɛ kejelɛ’n nin tukpaciɛ m’ɔ sa ndɛndɛ’n, ɔ nin klunwi’n, bé sɔ́n. (Matie 24:7-12; Lik 21:10, 11) ?Wan yɛ maan ɲrɛnnɛn sɔ’m bé tɔ́ ɔ? Biblu’n kle kɛ Satan m’ɔ ti ‘sran ng’ɔ sie mɛn nga’n,’ i yɛ ɔ́ yó maan ɲrɛnnɛn sɔ’m bé tɔ́ ɔ. W’a fa ya dan kpa. Yɛle kɛ, ɔ si kɛ i cɛn’n w’a sɔnman kun afin blɛ nga Klist di famiɛn’n, w’a bo i bo. (Zan 12:31; Sa Nglo Yilɛ 12:9, 12) Nzɔliɛ nga be kle kɛ Satan w’a fa ya’n yɛ kusu Klist bali naan ɔ o lɛ’n, be sɔnnin kpa e blɛ liɛ nun. I kpa’n bɔbɔ sa nga be juli asiɛ wunmuan’n su afuɛ nga be flɛ i 1914 nun’n ti’n, be nga be suan laa ninnge’m be su like’n, be waan afuɛ sɔ’n ti i liɛ ngunmin.

Blɛ nga Klist bali m’ɔ o lɛ’n nun’n, e kwla bu i kɛ ɲrɛnnɛn ndɛ ngunmin yɛ é tí ɔ. Sanngɛ, nán maan e bu i sɔ. Afin i sɔ’n kle kɛ siɛn’n, Mɛsi’n sie nglo lɔ. Yɛ ɔ cɛ kaan’n, ɔ́ wá síe asiɛ’n wie. ?Wafa sɛ yɛ sran’m bé kwlá sí famiɛn dilɛ sɔ’n naan b’a yaci be wun kɛ ɔ́ síe be ɔ?

4. Kɛ bé bó jasin fɛ’n asiɛ wunmuan’n su’n, é sí kɛ Zezi bali naan ɔ o lɛ. Zezi seli kɛ blɛ nga sran’m bé yó kɛ ‘Nowe i blɛ su’n sa’n,’ ɔ́ klé kɛ ɔ bali naan ɔ o lɛ.b (Matie 24:37-39) Nowe w’a yoman mmeli bobofuɛ ngunmin. Sanngɛ, ɔ boli ‘sa nga be yo ɔ ɔ ti su’n i ndolo’n.’ (2 Piɛr 2:5) Nowe boli i blɛ sufuɛ’m be jɔ kɛ Ɲanmiɛn i jɔlɛ dilɛ cɛn’n w’a mantan koko. Zezi seli kɛ, kɛ i sɔnnzɔnfuɛ’m bé dí i sɔ junman’n, i sɔ’n klé kɛ ɔ bali naan ɔ o lɛ. Afin, ɔ seli kɛ: ‘Bé wá kán Ɲanmiɛn sielɛ’n i jasin fɛ nga mɛn wunmuan’n nun naan sran’n kwlaa be ti Ɲanmiɛn ndɛ’n. I sin yɛ mɛn i awieliɛ’n ɔ́ jú ɔ.’—Matie 24:14.

Kɛ nga e dun mmua wunnin i fluwa nga i akpasua nga be flɛ i “?Ngue yɛle Ɲanmiɛn Sielɛ’n?” i nun’n sa’n, Ɲanmiɛn Sielɛ’n wá núnnún awa nin famiɛn diwlɛ kwlaa nga be o mɛn wunmuan nun’n. I sɔ’n ti yɛ jasin fɛ’n bolɛ junman nun’n, be bo sran’m be jɔ kɛ ɔ cɛ kaan’n, Sielɛ sɔ’n wá dí i sɔ junman’n niɔn. Ɔ maan, bikisa yɛ ɔ fata kɛ sran’m be fa ajalɛ naan b’a fite nun ɔn. Yɛle kɛ, be lo be wun be man Ɲanmiɛn Sielɛ’n naan ɔ sie be. Siɛn’n, ɔ ti cinnjin kɛ sran kwlaa usɛ i wun kosan yɛ’n: ?Ajalɛ benin yɛ ń fá ɔ?

?Ɲanmiɛn Sielɛ’n yó e ye?

Wafa nga jasin fɛ’n mɔ Zezi boli’n, ɔ guali sran’m be awlɛn su nzue’n, be kanman! Kɛ Satan nin Adam nin Ɛvu be yoli ɲin kekle Edɛni fie nun lɔ’n, afuɛ kpanngban sinnin. I sin’n, Ɲanmiɛn Zoova waan ɔ́ fá famiɛn diwlɛ kun síesíe ninnge kwlaa be ye. I liɛ’n, sran nanwlɛfuɛ’m bé ɲán anannganman nguan mɛn klanman nun asiɛ’n su wa, kɛ nga Ɲanmiɛn guguli kɛ ɔ́ yó’n sa. ?Kɛ mɔ famiɛn diwlɛ sɔ mɔ e dun mmua kɛnnin i ndɛ’n, w’a bo sielɛ’n i bo ɲanmiɛn su lɔ’n, nán ndɛ fɛ yɛle i sɔ’n? Nán ngua dilɛ annzɛ laliɛ nun ndɛ ɔ. Sanngɛ, famiɛn diwlɛ sɔ’n o lɛ sakpa.

Kɛ é sé yɛ mɔ sran nga Ɲanmiɛn sieli i famiɛn’n i kpɔfuɛ’m be te o lɛ’n, ɔ di famiɛn. (Jue Mun 110:2) Mɛn tɛ ng’ɔ nin Ɲanmiɛn b’a bu yɛ’n nun’n, Mɛsi’n su yo i Si i klun sa. Yɛle kɛ, ɔ su kunndɛ sran kwlaa nga be klo kɛ bé sí Ɲanmiɛn naan bé sú i ‘be akunndan’n nun nanwlɛ nun’n.’ (Zan 4:24) Sran kwlaa nga be kunndɛ kɛ Ɲanmiɛn sielɛ’n síe be’n, ɔ kwla yo ye. Sran sɔ mun yɛle sran kwlaa nga be fin nvlenvle kwlaa nun, mɔ sran wafawafa kwlaa o be nun’n. (Sa Nga Be Yoli’n 10:34, 35) E wla amun fanngan kɛ amun tran sran sɔ’m be nun wie. Kpɛkun, amun suan Ɲanmiɛn Sielɛ’n su ninnge bikisa. I liɛ’n, Sielɛ sɔ’n maan amún dí aklunjuɛ tititi.—1 Zan 2:17.

[Ja ngua lɛ ndɛ mun]