Awlo’m be nun jasin fɛ’n bolɛ’n ti cinnjin andɛ: ?Ngue ti ɔ?
‘Cɛn kwlaa be yaciman Zezi Klist jasin fɛ’n i bolɛ nin i klelɛ Ɲanmiɛn i sua’n nun nin awlo’m be nun.’—YOL. 5:42.
1, 2. (a) ?Jasin fɛ’n i bolɛ wafa benin yɛ sran’m be fa sie Zoova i Lalofuɛ’m be nzɔliɛ ɔ? (b) ?Ngue yɛ é wá kɛ́n i ndɛ like suanlɛ nga nun ɔn?
NVLE kpanngban nun’n, kɛ sran’m be wun kɛ, sran nɲɔn b’a wlawla be wun yɛiin, kpɛkun be kɔ awlo’m be nun be ko bo Ɲanmiɛn Sielɛ’n i jasin fɛ’n kle sran mun’n, be usaman lele. Be si kɛ Zoova i Lalofuɛ mun ɔn. Sɛ sran’m be sɔ jasin bofuɛ’m be nun klanman’n, be kwla man sran sɔ’m be fluwa, yɛ be se be kɛ bé klé be Biblu’n nun like. I sin’n be kɔ awlo uflɛ nun. Sɛ amun di junman’n sɔ’n wie’n, atrɛkpa’n amun a sie i nzɔliɛ kɛ wie liɛ’n, amun ukeman amun nuan naan sran’m b’a si kɛ amun ti Zoova i Lalofuɛ. Nanwlɛ, awloawlo’m be nun jasin fɛ’n bolɛ’n yɛ sran’m be fa sie e nzɔliɛ ɔ.
2 Zezi yɛ ɔ seli kɛ e bo jasin fɛ’n naan e yo maan sran’m be kaci i sɔnnzɔnfuɛ ɔ. Wafa nga e di junman sɔ’n, ɔ sɔnnin. (Mat. 28:19, 20) E bo jasin fɛ’n gua’m be bo, ɔ nin akpɔ’m be nuan yɛ lika uflɛ ekun mɔ sran’m be sinsin lɛ’n. (Yol. 17:17) E flɛ sran mun telefɔnu nun e bo jasin fɛ’n e kle be, annzɛ e klɛ be fluwa. Kɛ é dí e bɔbɔ e junman mun titi’n, e bo jasin fɛ’n e kle sran mun wie. E bɔbɔ e le e ɛntɛnɛti adrɛsi. Sɛ sran’m be fa naan be nian ɛntɛnɛti nun’n, bé wún Biblu’n i akua nga e yili be’n aniɛn 300 tra su nun.a Jasin fɛ’n i bolɛ’n i wafa kwlaa sɔ’m be yo maan e junman’n ba nvlɛ. Sanngɛ, wafa cinnjin kpa nga e bo jasin fɛ’n lika sunman nun’n, yɛle awlo’m be nun jasin fɛ’n bolɛ’n. ?Jasin fɛ’n i bolɛ wafa sɔ’n i bo’n fin nin? ?Ɔ yoli sɛ yɛ maan andɛ awlo’m be nun jasin fɛ’n i bolɛ’n w’a kaci e junman ɔn? ?Yɛ ngue ti yɛ i wafa sɔ’n ti cinnjin andɛ ɔ?
Wafa nga akoto’m be boli jasin fɛ’n
3. ?Jasin fɛ’n bolɛ’n i su ndɛ benin yɛ Zezi kan kleli i sɔnnzɔnfuɛ mun ɔn? ?Yɛ ngue yɛ i sɔ’n kle i wafa ng’ɔ fata kɛ be bo jasin fɛ’n, i su ɔ?
3 Awlo’m be nun jasin fɛ’n bolɛ’n i bo’n fin Biblu’n nun. Kɛ Zezi sunmɛnnin i sɔnnzɔnfuɛ’m be kɛ be ko bo jasin fɛ’n, ɔ seli be kɛ: “Klɔ kwlaa nga an ju su’n, sɛ ɔ ti dan o, sɛ ɔ ti kaan o, an usa sɛ sran kpa wie o lɛ” o. ?Ɔ́ yó sɛ naan b’a si kɛ sran kun ti sran kpa ɔ? Zezi seli be kɛ be wlu awlo’m be nun. I waan: ‘Kɛ an wlu awlo sɔ nun’n, an yo like se kɛ: “Maan alaje’n tran awlo nga nun.” Sɛ awlo sɔ’n i nunfuɛ’m be ti kpa’n, alaje trán nun.’ ?Bé mínndɛ kɛ sran’m be flɛ be ka naan b’a wlu awlo’m be nun? Maan e nian ndɛ nga Zezi kannin’n. I waan: ‘Sɛ b’a sɔman amun nun yɛ sɛ be tieman amun ndɛ’n, an jao awlo sɔ’n nun annzɛ klɔ sɔ’n su. Yɛ kɛ amún kɔ́’n an kpukpu amun ja wun ndutre’n guɛ i lɛ.’ (Mat. 10:11-14) Ndɛ nga Zezi kannin’n ti weiin. Be bɔbɔ yɛ be ko to sran mun be awlo’m be nun ɔn. Be bɔbɔ yɛ be fɛ i sɔ ajalɛ’n niɔn. I waan maan akoto’m be ‘wlan klɔ’m be su, be kan jasin fɛ’n.’—Lik 9:6.
4. ?Biblu’n i bue benin yɛ ɔ kɛnnin i trele kɛ sran’m be boli jasin fɛ’n awlo’m be nun ɔn?
4 Biblu’n kɛnnin i trele kɛ Zezi i sɔnnzɔnfuɛ’m be boli jasin fɛ’n awlo’m be nun. E wun i sɔ liɛ’n Sa Nga Be Yoli’n 5:42 nun. I waan: ‘Cɛn kwlaa be yaciman Zezi Klist jasin fɛ’n i bolɛ nin i klelɛ Ɲanmiɛn i sua’n nun nin awlo’m be nun.’ Kɛ ɔ yoli sɔ’n, i afuɛ 20 m’ɔ́ jú’n, akoto Pɔlu kannin ndɛ kun kpɛnnin Efɛzi lɔ asɔnun kpɛnngbɛn’m be wla. I waan: ‘Sa kwlaa m’ɔ ko yo amun kpa’n, m’an fiaman wie fi su amun wun. N kɛn i kwlaa kleli amun, n yiyi nun weiin kleli amun nzra nun nin awlo’m be nun.’ ?Pɔlu dun mmua kannin ndɛ kleli asɔnun kpɛnngbɛn sɔ mun ka naan b’a kaci Zezi i sɔnnzɔnfuɛ? Ɛɛn. Afin, ɔ seli be kɛ maan ‘be yaci ɲin kekle yolɛ Ɲanmiɛn su naan be ɲin yi i yɛ be lafi e Min Zezi su.’ (Yol. 20:20, 21) Fluwa kun kannin Sa Nga Be Yoli’n 20:20 i su ndɛ. Ɔ seli kɛ: “Ɔ fata kɛ e fa e ɲin sie su kɛ jasin fɛ’n bofuɛ dan kpa sɔ’n, ɔ boli jasin fɛ’n awlo’m be nun.”—Robertson’s Word Pictures in the New Testament.
Be nga be ti kɛ lalo mɔ be ba kpuu sa andɛ’n
5. ?Wafa sɛ yɛ be kannin jasin fɛ’n i bolɛ ndɛ Zoɛl fluwa’n nun ɔn?
5 Klistfuɛ klikli’m be boli jasin fɛ’n sɔ. Sanngɛ, ɔ ti nga é wá bó i e blɛ liɛ’n nun’n, i su fitilɛ. Be nga Ɲanmiɛn fɛli i wawɛ’n mannin be’n be jasin fɛ’n nga be bo’n, Ɲanmiɛn nuan ijɔfuɛ Zoɛli fa sunnzunnin kakaa mɔ be saci like’n. Kakaa sɔ’n i wie yɛle lalo mun. (Zoɛ. 1:4) Lalo’m be wanndi kɛ safuɲrɛn mun sa, be wluwlu sua’m be nun kpɛkun be di ninnge kwlaa ng’ɔ o be ɲrun’n. (An kanngan Zoɛl 2:2, 7, 9 nun.) Nanwlɛ, wafa nga be kan lalo’m be ndɛ wafan’n, ɔ yo ɲɛnmɛn. Ɔ kle kɛ Ɲanmiɛn i nvle nunfuɛ’m be mian be ɲin be di junman mɔ Ɲanmiɛn mannin be’n kpa. Ndɛ nga Zoɛli kannin’n i su kpɛnlɛ nun’n, wafa nga Klistfuɛ nga bé kɔ́ ɲanmiɛn su’n, ɔ nin “bua’m be wie” mun be di be junman’n, i klikli’n yɛle awlo’m be nun jasin fɛ’n i bolɛ’n. (Zan 10:16) ?Sanngɛ, wafa sɛ yɛ e Zoova Lalofuɛ mun, e fali akoto’m be ajalɛ liɛ’n su wie ɔ?
6. ?Afuɛ nga be flɛ i 1922 nun’n, wafa sɛ yɛ be wlali aniaan’m be fanngan kɛ be bo jasin fɛ’n niɔn? ?Sanngɛ ngue yɛ wie’m be yoli ɔ?
6 Kɛ ɔ fɛ i afuɛ nga be flɛ i 1919 nun’n, be tinnin su kpa kɛ, ɔ fata kɛ Klistfuɛ’m be kwlakwla, be bo jasin fɛ’n. Sasafuɛ Tranwlɛ’n, afuɛ 1922 Utu 15 (w-E) i ndɛ akpasua kun i flɛlɛ yɛle “Jasin fɛ’n i bolɛ’n ti cinnjin kpa.” Fluwa sɔ’n kpɛnnin Klistfuɛ nga Ɲanmiɛn fɛ i wawɛ’n mannin be’n be wla ndɛ cinnjin kun su. I waan: “Ɔ fata kɛ aniaan sɔ’m be fa fluwa’m be ɔ awlo’m be nun, naan be bo jasin fɛ’n be kle sran mun. Maan be se be kɛ Ɲanmiɛn i Sielɛ’n w’a mantan koko.” Be klɛli wafa nga be kwla bo jasin fɛ’n fluwa Bulletin nun (siɛn be flɛ fluwa sɔ’n Ɲanmiɛn Sielɛ Blɛ Junman). Sanngɛ, be nga be boli jasin fɛ’n i blɛ sɔ’n nun’n b’a sɔnman. Wie’m b’a klomɛn i bolɛ’n. Be kannin like ti mɔ be kwlá boman jasin fɛ’n. Sanngɛ like ti mɔ be yoli i sɔ’n, i dan lika yɛle kɛ be bu i kɛ jasin fɛ’n bolɛ’n nin be fataman. Kɛ bé tín su kpa kɛ ɔ fata kɛ sran kwlaa bo jasin fɛ’n, i sɔfuɛ’m be nun sunman b’a suman Zoova kun.
7. ?Kɛ ɔ fɛ i afuɛ nga be flɛ i 1950 nun’n, ngue yɛ ɔ kleli kɛ ɔ fata kɛ be uka aniaan mun ɔn?
7 Afuɛ nga be wa bɛli i sin’n, jasin fɛ’n bofuɛ’m be wa ukali su. Sanngɛ, ɔ fata kɛ be kle jasin bofuɛ mun wafa ng’ɔ fata kɛ be bo jasin fɛ’n awlo’m be nun’n. I wie yɛle Amlɛnkɛn’m be mɛn’n nun lɔ’n. Kɛ ɔ fɛ i afuɛ nga be flɛ i 1950 lele m’ɔ́ fá jú 1953 nun’n, aniaan nga be o lɔ’n, be nun lɔuun kpa be jasin fɛ bolɛ liɛ’n ti wafa kun. Yɛle kɛ, fluwa nɲa nga be fa cɛcɛ sran mun’n i ngunmin yɛ be fa bo be jasin fɛ liɛ’n niɔn. Annzɛ be jran akpɔ’m be nuan be fa periodiki man sran mun. Sɛ be fa sran ya kun’n, be nun ablanan be boman jasin fɛ’n anglo kwlaa nun. ?Wafa sɛ yɛ be kwla ukali Klistfuɛ sɔ mun naan b’a bo jasin fɛ’n awlo’m be nun ɔn?
8, 9. ?Afuɛ nga be flɛ i 1953 nun’n, ngue junman yɛ be kleli aniaan mun ɔn? ?Yɛ i bo’n guali sɛ?
8 Afuɛ nga be flɛ i 1953 nun’n, Zoova i Lalofuɛ’m be yoli nvle kun aɲia dan mɔ nvle fanunfanun be yia’n, i kun New York lɔ. Blɛ sɔ nun’n, be kannin awloawlo’m be nun jasin fɛ’n bolɛ’n i ndɛ kpa. Aniaan bian Nathan Knorr mɔ i blɛ sɔ nun’n, i yɛ ɔ dun mmua e ɲrun e junman nun mɛn wunmuan’n nun’n, ɔ seli kɛ asɔnun sunianfuɛ’m be junman’n i klikli’n yɛle kɛ be uka Zoova i Lalofuɛ’m be kwlaa naan be bo jasin fɛ’n awlo’m be nun. I waan “ɔ fata kɛ aniaan’m be kwlaa be si jasin fɛ’n i bo awloawlo’m be nun.” Kɛ ɔ yoli sɔ’n, be kleli aniaan’m be jasin fɛ’n i bolɛ mɛn wunmuan nun. Sran ng’ɔ nin a boman jasin fɛ’n awlo’m be nun le’n, be kleli i i bolɛ. Kɛ be to sran’n, ndɛ’n ng’ɔ fata kɛ be kan naan b’a fa Biblu’n b’a kle i’n, yɛ wafa ng’ɔ fata kɛ sɛ be usa be kosan be tɛ su’n, be kleli be.
9 Kɛ be kleli aniaan’m be jasin fɛ’n i bolɛ sɔ’n, junman’n bali nvlɛ. Kɛ ɔ́ fá dí afuɛ blu’n, mɛn wunmuan nun’n, jasin bofuɛ’m be trali laa liɛ’n su kpɛ nɲɔn. Sran nga be sa be sin be ko niannin be osu’n, be ukali su kpɛ nɲɔn tra su. Yɛ sran nga be kle be Biblu’n nun like’n, ɔ juli laa liɛ’n i kpɛ nɲɔn nin sin. Kɛ é sé yɛ’n, mɛn wunmuan nun jasin bofuɛ’m be fuanfuan miliɔn nso. Sɔnlɛ mɔ y’a sɔn sɔ’n, ɔ kle kɛ Zoova ra e ɲin mɔ e kplin e bo jasin fɛ’n awloawlo’m be nun’n su.—Eza. 60:22.
Sran nga bé fíte nun’n be nzɔliɛ sielɛ
10, 11. (a) ?Aolia nun like benin yɛ be kleli Ezekiɛli m’ɔ o Ezekiɛl ndɛ tre 9 nun ɔn? (b) ?Wafa sɛ yɛ ndɛ sɔ’n kpɛn su e blɛ liɛ’n nun ɔn?
10 Aolia nun like nga Ɲanmiɛn nuan ijɔfuɛ Ezekiɛli wunnin i’n, ɔ kle kɛ awlo’m be nun jasin fɛ’n bolɛ’n ti cinnjin. Ezekiɛli wunnin sran nsiɛn. Abɔlɛ ninnge o be sa nun sɛsɛsɛ. Sran’n i nso su’n i wun tralɛ liɛ’n ti lɛn, fluwa klɛlɛ like kun sɛn i nvɛn wun. Be seli sran sɔ’n kɛ ɔ ‘wlan klɔ’n nun naan be kwlaa nga be su bo awuyomo, mɔ be su kplin tete sa nga sran’m be yo be klɔ’n nun’n be ti’n, ɔ klɛ be ngban su nzɔliɛ kun.’ Kɛ ɔ wieli sran’m be nzɔliɛ sie’n, be seli sran nsiɛn nga abɔlɛ ninnge o be sa nun’n kɛ be kun be nga b’a sieman be nzɔliɛ’n.—An kanngan Ezekiɛl 9:1-6 nun.
11 E wun i wlɛ kɛ ndɛ nga Ɲanmiɛn nuan ijɔfuɛ’n kannin’n i su kpɛnlɛ nun’n, be nga be kpali be sieli be ngunmin’n be onga’n yɛ ɔ ti sran mɔ i “wun tralɛ liɛ’n ti lɛ’n” niɔn. Kɛ be bo jasin fɛ’n, yɛ kɛ be kle sran’m be like’n, ɔ ti kɛ be klɛ sran’m be ngban su nzɔliɛ sa. Zezi waan i sɔfuɛ’m be ti i ‘bua wie mun.’ (Zan 10:16) ?Ngue yɛle nzɔliɛ mɔ be sie be’n? Yɛle kɛ sran sɔ’m be fa be wun man Ɲanmiɛn, yɛ be yo be batɛmu naan bé yó Zezi i sɔnnzɔnfuɛ. Be kaci be nzuɛn’n. (Efɛ. 4:20-24) Sran sɔ mɔ be ti Zezi i bua mun’n, be nin Klistfuɛ nga be kpali be sieli i ngunmin’n be akpasua’n yo kun, yɛ be uka be naan b’a sie sran uflɛ nzɔliɛ.—Ngl. 22:17.
12. ?Wafa sɛ yɛ sran’m be ngban su nzɔliɛ klɛlɛ mɔ Ezekiɛli wunnin i aolia nun’n, ɔ kle kɛ Zezi i bua’m be kunndɛlɛ’n ti cinnjin ɔn?
12 Like nga ti yɛ ‘be kwlaa nga be su bo awuyomo’n’ be kunndɛlɛ’n ti cinnjin’n, aolia nun like nga Ezekiɛli wunnin i’n, ɔ yi i nun kun i nglo. Yɛle kɛ ɔ ti sran sɔ’m be nguan ɲanlɛ ndɛ. Ɔ ka kaan sa Zoova i anzi mɔ be yɛ sran nsiɛn mɔ abɔlɛ ninnge o be sa nun’n be ti be nzɔliɛ’n, bé wá núnnún be nga b’a klɛman be ngban su nzɔliɛ’n. Kɛ akoto Pɔlu kán jɔlɛ dilɛ sɔ’n i ndɛ’n, ɔ seli kɛ Zezi Klist nin ‘anzi mɔ be le fanngan dan’n,’ bé bá. Yɛ Zezi ‘tú be nga be siman Ɲanmiɛn’n nin be nga be faman e Min Zezi i jasin fɛ’n su’n be fɔ.’ (2 Tɛs. 1:7, 8) Maan e sie i nzɔliɛ kɛ wafa nga sran kun fa sɔ jasin fɛ’n nun’n, i su yɛ bé nían bé dí i jɔlɛ ɔ. Ɔ maan, ɔ fata kɛ e bo jasin fɛ’n lele mɛn’n i awieliɛ naan y’a jran. (Ngl. 14:6, 7) I sɔ’n ti’n, e mɔ e fali e wun mannin Zoova’n, trɔ dan kpa yɛ ɔ jin e ti su lɛ ɔ.—An kanngan Ezekiɛl 3:17-19 nun.
13. (a) ?Ngue kalɛ yɛ akoto Pɔlu wunnin i kɛ ɔ o i su ɔ? ?Yɛ ngue ti ɔ? (b) ?Sran’m be kalɛ benin yɛ ɔ o e su ɔ?
13 Sran’m be jasin fɛ’n i bo klelɛ yoli akoto Pɔlu cinnjin. Ɔ klɛli i kɛ: ‘Sran nga be ɲin a ti o, be nga be ɲin nin a timan o, be nga be si fluwa o, be nga be siman fluwa o, be kwlaa be jasin fɛ’n i bo klelɛ kalɛ o n su. I sɔ’n ti, n waan ń wá kán jasin fɛ’n kle amun Rɔmfuɛ mun amun kusu wie.’ (Rɔm. 1:14, 15) Ye nga Ɲanmiɛn yoli Pɔlu ti’n, ɔ lɛ i ase. Ɔ maan, ɔ yoli i cinnjin kɛ i kusu ukɛ i wiengu mun naan be di ye sɔ’n wie. (1 Tim. 1:12-16) Ɔ ti kɛ sran kwlaa nga Pɔlu wun be’n, be kalɛ o i su. Saan kɛ ɔ́ bó bo jasin fɛ’n kle be’n, yɛ ɔ́ kwlá sé kɛ w’a tua kalɛ sɔ’n niɔn. ?Kɛ e kusu e wun sran mun e jasin fɛ’n bolɛ lika’n nun’n, kɛ ɔ yo e sɔ wie ɔ?—An kanngan Sa Nga Be Yoli’n 20:26, 27 nun.
14. ?Like ti mɔ e bo jasin fɛ’n i nun cinnjin’n yɛle benin?
14 Kannzɛ sɛ sran’m be nguan’n ti cinnjin’n, sanngɛ like kun ekun ti cinnjin tra sran’m be nguan’n. Zoova kannin ndɛ kun Malaki 1:11 nun. I waan: ‘Kɛ ɔ fɛ wia afiliɛ lɔ lele m’ɔ́ fá jú wia atɔliɛ’n lɔ’n, sran’m be kwlaa bé sí kɛ min dunman’n ti dan. Like ng’ɔ nin min fata’n yɛ bé fá mán min ɔn. Min dunman’n ti dan mɛn’n kwlaa’n nun. M bɔbɔ min Anannganman mɔ n sie mɛn wunmuan’n yɛ n kan n kle amun ɔn.’ Wafa nga ndɛ sɔ’n kpɛn su andɛ’n, yɛle kɛ Zoova i sufuɛ’m be jasin fɛ’n i bolɛ nun’n, be yo maan Zoova i dunman’n fu. (Jue. 109:30; Mat. 24:14) ‘Manmanlɛ nga e manman Ɲanmiɛn’n, ɔ ti kɛ asenna like sa.’ Like cinnjin nga ti yɛ e bo jasin fɛ’n awlo’m be nun’n yɛ ɔ o lɛ ɔ.—Ebr. 13:15.
Sa dan kpa’m be te o e ɲrun lɔ
15. (a) ?Kɛ Izraɛlifuɛ’m bé bó sín yía Zeriko’n, i cɛn nso su’n wafa sɛ yɛ be ukali be junman’n su ɔ? (b) ?Ngue yɛ i sɔ’n kle e wafa nga e bo jasin fɛ’n i su ɔ?
15 ?Sa benin mun yɛ be te o e ɲrun lɔ ɔ? Zeriko klɔ’n i falɛ’n i su ndɛ ng’ɔ o Zozie i fluwa nun’n, ɔ kwla uka e naan y’a tɛ kosan sɔ’n su. Ka naan Ɲanmiɛn w’a nunnun Zeriko klɔ’n, ɔ seli Izraɛlifuɛ’m be kɛ be bo sin yia klɔ’n, cɛn kun kpalɛ kun, lele cɛn nsiɛn. Sanngɛ i le nso su’n, ɔ fata kɛ be bo sin yia klɔ’n tra titi liɛ’n su. Zoova seli Zozie kɛ: ‘Amun bo sin yia klɔ’n kpɛ nso. Kɛ amún nánti’n, nn Ɲanmiɛn ɲrun jranfuɛ’m bé fíta awɛ nun. Maan sran’m be kpan alɛ kpanlɛ kekle kpa! Kpɛkun talɛ ng’ɔ sin yia klɔ’n ɔ́ bú gúa.’ (Zoz. 6:2-5) Atrɛkpa’n kɛ nga be fa yoli’n sa’n, e kusu é úka e jasin bolɛ’n su wie. I kwlaa yoli o, kɛ lele mɔ mɛn nga i awieliɛ’n jú’n, wafa nga e jasin fɛ’n bolɛ nun’n, é wá yí Ɲanmiɛn i dunman’n ɔ nin i Sielɛ’n be nglo’n, e nin a yomɛn i sɔ liɛ’n le.
16, 17. (a) ?Ka naan “afɛ dan’n” w’a ju’n, ngue yɛ é yó ɔ? (b) ?Kosan benin mun yɛ é wá tɛ́ be su like suanlɛ ng’ɔ́ bá lɛ’n nun ɔn?
16 Blɛ kun wá jú’n, Ɲanmiɛn ndɛ nga é kán klé sran mun’n, ɔ́ yó kɛ “kpanlɛ kekle kpa” sa. Sa Nglo Yilɛ fluwa nun’n, be fali ndɛ kekle kpa’m be sunnzunnin ‘nzraama mɔ kɛ nzue’n tɔ́ ɔ be gua’n, i dandan kpa mɔ kun ju kilo ablanan’n.’b Sa Nglo Yilɛ 16:21 waan: ‘Ɲrɛnnɛn sɔ’n yoli tɛ kpa, be kwlá kaman.’ E siman junman nga awlo’m be nun jasin bolɛ’n, ɔ́ dí i Ɲanmiɛn i sran’m be jɔlɛ dilɛ blɛ sɔ’n nun’n ka. Sanngɛ, e kwla lafi su kɛ, ka naan “afɛ dan’n” w’a sin’n, wafa nga sran’m bé sí Zoova i dunman’n, be nin a wunmɛn i sɔ le.—Ngl. 7:14; Eze. 38:23.
17 Kɛ é mínndɛ sa dan kpa nga be te o e ɲrun lɔ’n, maan e bo Ɲanmiɛn i Sielɛ’n i jasin fɛ’n titi. Sanngɛ, kɛ é bó awlo’m be nun jasin fɛ’n, wafa sɛ yɛ be kle e yalɛ ɔ? ?Yɛ wafa sɛ yɛ e kwla jran sa sɔ’m be ɲrun ɔn? Like suanlɛ ng’ɔ́ bá lɛ nun’n, é wá tɛ́ kosan sɔ’m be su.
[Ja ngua lɛ ndɛ mun]
a Zoova i Lalofuɛ’m be ɛntɛnɛti adrɛsi’n yɛle www.watchtower.org.
b Ndɛ mma nga be klɛli i klikli nun’n, ɔ kwla yo Glɛki’m be like sunnzunlɛ liɛ’n. Sɛ ɔ ti sɔ’n, nzraama kun kwla ju kilo 20.
?Wafa sɛ yɛ amún tɛ́ kosan’m be su ɔ?
• ?Awlo’m be nun jasin fɛ’n i bolɛ’n i bo’n fin nin?
• ?Wafa sɛ yɛ be tinnin awlo’m be nun jasin fɛ’n i bolɛ’n su e blɛ liɛ’n nun ɔn?
• ?Ngue ti yɛ jasin fɛ’n i bolɛ’n ti be kwlaa nga be fali be wun mannin Zoova’n be trɔ ɔ?
• ?Ngue sa yɛ ɔ te o e ɲrun lɔ ɔ?
[Foto, bue 12]
?Sran’m be jasin fɛ’n i bo klelɛ’n ti e cinnjin kɛ nga ɔ fa yoli akoto Pɔlu i cinnjin’n sa?
[Foto, bue 13]
Nathan Knorr, 1953