Ɔ ka kaan asiɛ’n wá káci mɛn klanman!

‘E Si mɔ a o ɲanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn, maan ɔ sielɛ blɛ’n ju, maan e mɔ e wo asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’​—Matie 6:9, 10.

SRAN nin Ɲanmiɛn be yalɛ kokolɛ’n ng’ɔ o yɛ’n, mɔ Zezi kleli i sɔnnzɔnfuɛ mun’n, ɔ cici klɔ sran’m be wla. ?Wafa sɛ yɛ ɔ yo sɔ ɔ?

Kɛ nga Ɲanmiɛn srɛlɛ’n sɔ’n fa yi i nglo sa’n, Ɲanmiɛn Sielɛ’n, ɔ́ yó maan bé yó Ɲanmiɛn i klun sa’n asiɛ’n su wa. Wafa kunngba nga be su yo Ɲanmiɛn klun sa’n ɲanmiɛn su lɔ’n, yɛ bé yó i asiɛ’n su wa wie ɔ. Kpɛkun Ɲanmiɛn yó maan asiɛ’n káci mɛn klanman ekun. (Sa Nglo Yilɛ 21:1-5) ?Sanngɛ ngue yɛle Ɲanmiɛn Sielɛ kpa’n? ?Yɛ wafa sɛ yɛ ɔ́ yó naan asiɛ’n w’a kaci mɛn klanman ɔn?

Ɲanmiɛn Sielɛ’n ti awa jrɛiin kun

Ɲanmiɛn Sielɛ’n ti awa jrɛiin kun. Awa jrɛiin kun sa’n, ɔ le famiɛn mun, ɔ nin mmla nga bé dí su’n, ɔ nin nvlefuɛ mun. ?Ɲanmiɛn Sielɛ’n le i sɔ ninnge’n wie? Maan e nian wafa nga Biblu’n tɛ kosan nsan nga be lɔngɔ su yɛ’n be su’n:

?Wan mun yɛ be ti Ɲanmiɛn Sielɛ’n i nun famiɛn mun ɔn? (Ezai 33:22) Zoova sieli i Wa Zezi kɛ ɔ yo Ɲanmiɛn Sielɛ’n i su famiɛn. (Matie 28:18) Zoova maan Zezi kpali sran wie mɔ ‘be fin nvlenvle’n kwlaa nun’n, nin be mɔ be aniɛn’n ti wafawafa’n kwlaa’n, ɔ nin be nga be fin mɛnmɛn’n kwlaa nun’n.’ Be nin Zezi ‘bé síe sran mun asiɛ’n su wa.’—Sa Nglo Yilɛ 5:9, 10.

?Mmla benin mun yɛ be nga Ɲanmiɛn wá síe be’n, bé nánti su ɔ? Mmla wie’m be o lɛ’n, be kle be nga be nanti be su’n kɛ be fa ajalɛ trele kun. Zezi yili mmla sɔ’m be nun cinnjinfuɛ’n i nglo. Ɔ seli kɛ: ‘“Klo ɔ Min Ɲanmiɛn’n kpa, fa ɔ wla’n kwlaa guɛ i su, maan wɔ akunndan’n kwlaa trɛn i su.” I yɛ ɔ ti mmla klikli’n nin i nun dan’n niɔn. Yɛ i nɲɔn su m’ɔ fɛ i’n yɛ ɔ o yɛ: “Klo ɔ wiengu kɛ a fa klo ɔ bɔbɔ wun’n sa.”’—Matie 22:37-39.

Mmla wie’m be liɛ’n kusu’n, be tannin be nga be nanti be su’n, be ajalɛ wie’m be falɛ. I wie yɛle nga Biblu’n kɛn i weiin yɛ’n. Ɔ se kɛ: ‘Nán an laka amun wun, afin bla annzɛ bian kunndɛfuɛ mun, nin amuɛn sɔfuɛ mun, nin yasua mɔ be kunndɛ bla be yi bo annzɛ bla mɔ be kunndɛ bian be wun bo’n, nin yasua mɔ be kunndɛ be wiengu yasua’n, nin awiefuɛ mun, nin sran mɔ be ɲin yiman like’n, nin nzanbɔɛfuɛ mun, nin nzowa kpɛfuɛ mun, ɔ nin sran mɔ be de sran like wue kekle su’n, i sɔ sran liɛ mun Ɲanmiɛn su sieman be mlɔnmlɔn.’—1 Korɛntfuɛ Mun 6:9, 10.

?Wan mun yɛ Ɲanmiɛn wá síe be ɔ? Zezi fali be nga Ɲanmiɛn wá síe be’n sunnzunnin bua mun. Ɔ seli kɛ: ‘Bé tí min nɛn, be akpasua’n yó kun yɛ be tafuɛ’n yó kunngba.’ (Zan 10:16) Sran ng’ɔ kunndɛ kɛ Ɲanmiɛn sie i’n, ɔ fataman kɛ ɔ kɛn i nuan nun ngbɛn sa kɛ ɔ su Bua Tafuɛ Kpa’n mɔ yɛle Zezi’n, i su. Sanngɛ ɔ fata kɛ ɔ yo like nga Zezi se i kɛ ɔ yo’n. Zezi seli kɛ: ‘Nán sran’m be kwlaa mɔ be flɛ min be Min’n be ngba yɛ Ɲanmiɛn síe be sakpa ɔ, saan sran ng’ɔ yo min Si m’ɔ o ɲanmiɛn su lɔ’n i klun sa’n, i yɛ ɔ́ síe i sakpa ɔ.’—Matie 7:21.

Ɔ maan be nga Ɲanmiɛn sie be’n, be manman Ɲanmiɛn i dunman Zoova’n, kɛ Zezi sa. (Zan 17:26; Jue Mun 148:13; Rɔmfuɛ Mun 10:14) Kɛ Zezi se be kɛ be ‘kan Ɲanmiɛn sielɛ’n i jasin fɛ’n’ be kle be wiengu mun’n, be fa su. (Matie 24:14; 28:19, 20) Kpɛkun be yi sran klolɛ kpafuɛ’n i nglo be wiengu’m be lika.—Zan 13:35.

Ɲanmiɛn Sielɛ’n núnnún “be nga be saci asiɛ’n”

Sa nga be yo be mɛn’n nun dɔ nga su’n, be kle kɛ Ɲanmiɛn Sielɛ’n su wa kaci ninnge kpanngban asiɛ’n su. ?Wafa sɛ yɛ e si sɔ ɔ? I afuɛ akpi nɲɔn yɛ, Zezi kannin nzɔliɛ kun mɔ i wafa’n sɔnnin’n i ndɛ. I waan nzɔliɛ sɔ’n klé kɛ ‘Ɲanmiɛn Sielɛ’n blɛ’n w’a mantan koko.’ (Lik 21:31) Kɛ nga ndɛ akpasua nɲɔn su nga e dun mmua kanngannin nun’n fa kleli’n sa’n, e wun nzɔliɛ sɔ’n i wafawafa mun weiin mɛn’n nun.

?Kɛ ɔ ko yo sɔ’n, ngue yɛ ɔ́ bá kasiɛn ɔn? Zezi tɛli su kɛ: ‘Afin blɛ sɔ’n nun’n, ɲrɛnnɛn’n ɔ́ yó dan mɔ kɛ ɔ fin mɛn’n i bo bolɛ’n nun lele ndɛ, i wunsu nin a yoman le yɛ i wunsu su yoman kun le.’ (Matie 24:21) Nán klɔ sran mun yɛ bé yó i sɔ like liɛ’n niɔn. Sanngɛ Ɲanmiɛn yɛ ɔ́ yó sɔ ɔ. Ɔ maan ɔ́ ‘núnnún be nga be saci asiɛ’n.’ (Sa Nglo Yilɛ 11:18) Klunwifuɛ mɔ be bɔbɔ be wun akunndan bulɛ’n ti’n, be saci asiɛ’n, ‘bé trá be mɛn nga nun bé kɔ́.’ Sanngɛ be nga be nanti seiin’n mɔ be su Ɲanmiɛn kɛ nga ɔ nin i fata’n sa’n, ‘bé wá trán mɛn nga nun.’—Nyanndra Mun 2:21, 22.

Sɛ Zoova yo i sɔ sa sroesroe liɛ’n, i ndɛ yo fɛ. ?Ngue ti ɔ? Maan e bu sunnzun ase nga i su akunndan e nian. Maan ɔ yo amun kɛ amun le sua kun sa. Sran nga be tran nun’n, be nun wie’m be ayeliɛ’n ti kpa, be nian sua’n lika yɛ kɛ anglo wie’n be tuɛ i ti kalɛ. Wie’m be kusu be o lɛ’n, be ɲin su ti kekle kpɛkun be bɔbɔ be wun akunndan yɛ be bu ɔ. Be saci sua’n i tɛtɛ kpa, kpɛkun kɛ anglo wie’n be tanninman sua’n i ti kalɛ. Amun a tu be fɔ lele sanngɛ be kaciman. ?Amún yó i sɛ? Saan amún fúan ɲin su keklefuɛ sɔ mun.

I kunngba’n niɔn, Zoova m’ɔ ti asiɛ’n i Yifuɛ’n, ɔ le atin fa i klunklo sran mun naan be tran asiɛ’n su. (Sa Nglo Yilɛ 4:11) Zoova dun mmua kannin kɛ ɔ́ núnnún be nga be yoman i klun sa’n, mɔ be tanndan be wiengu’m be ɲrun’n.—Jue Mun 37:9-11.

Bé wá bó mɛn’n i uflɛ ekun

Ɔ ka kaan Ɲanmiɛn Sielɛ’n mɔ Zezi yɛ ɔ ti su famiɛn’n, ɔ́ wá síe asiɛ’n. Zezi seli kɛ ‘bé wá bó mɛn’n i uflɛ ekun.’ (Matie 19:28) ?Wafa sɛ yɛ mɛn uflɛ sɔ’n, ɔ́ yó ɔ? Maan e fa e ɲin e sie i kasiɛ nga Biblu’n boli be yɛ’n be su e nian:

Jue Mun 46:10. ‘Kɛ ɔ fɛ i lele m’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie.’

Ezai 35:1. ‘Maan aawlɛ flɛnnɛn’n nin asiɛ’n m’ɔ yoman like ye’n, be klun jɔ. Maan aawlɛ flɛnnɛn’n i wun kpɛjɛ i, maan i nun ijre’m be bo nɲrɛ.’

Ezai 65:21-23. ‘Min sran kpa’m bé dí be bɔbɔ be sa nuan ninnge’m be su. Be su fɛman ngbɛn, be su wuman ba naan ba sɔ’m b’a wu be ɲin bo lɛ.’

Zan 5:28, 29. ‘Cɛn wie lele be kwlaa nga be o ndia nun’n, bé tí i [Zezi] nɛn, yɛ bé fín ndia’n nun fíte.’

Sa Nglo Yilɛ 21:4. ‘[Ɲanmiɛn] núnnún be ɲinmuɛn’n kwlaa, wie’n su tranman lɛ kun. Be su yoman sɛ kun, be su sunman kun, be su wunman ɲrɛnnɛn kun.’

Sa nga ti yɛ e kwla lafi su’n

?Amun lafi Biblu’n i nun kasiɛ’m be su? Biblu’n dun mmua kannin kɛ sran kpanngban be su lafiman kasiɛ sɔ’m be su. Ɔ seli kɛ: ‘Kɛ mɛn’n ɔ́ kɔ́ i bue nuan’n, sran wie’m bé bá, bé yó sa nga be klun klo’n, yɛ bé srí amun, bé sé kɛ: “?Ɔ seli amun kɛ ɔ́ bá, nɛ́n i ɔ? ?Yɛ ɔ o nin? Kɛ ɔ fin lalaa’n mɔ e nannan’m be wuli’n, like nga Ɲanmiɛn yili be’n, be kwlaa be te o be osu’n nun.”’ (2 Piɛr 3:3, 4) Sanngɛ sran sɔ’m b’a mlin mlɔnmlɔn. Ninnge nnan mɔ be ti’n, amun kwla lafi ndɛ nga Biblu’n kan’n su’n, maan e fa e ɲin e sie be su:

(1) Lalafuɛ nun’n, Ɲanmiɛn fali ajalɛ asiɛ’n su klunwifuɛ’m be lika. Nzue dan’n ng’ɔ tɔli Nowe blɛ su’n yi i sɔ’n i nglo.—2 Piɛr 3:5-7.

(2) Ɲanmiɛn Ndɛ’n dun mmua kannin sa nga e wun be asiɛ’n su andɛ yɛ’n be ndɛ. Kpɛkun ng’ɔ kannin’n yoli su.

(3) ‘Like nga Ɲanmiɛn yili be’n, be kwlaa be nunman be osu’n nun’ kɛ laa’n sa. Wafa nga andɛ ɲrɛnnɛn’n wo asiɛ’n su’n, i wunsu nin a juman sɔ le. Ɲrɛnnɛn sɔ’n i wie yɛle sran’m be bɔbɔ be afiɛn ndɛ mun nin be nzuɛn m’ɔ ti tɛ’n, ɔ nin asiɛ’n bɔbɔ ba’n m’ɔ su saci’n.

(4) ‘Ɲanmiɛn Sielɛ’n i jasin fɛ’n’ mɔ be su bo i mɛn wunmuan’n nun’n kle kɛ ‘mɛn’n i awieliɛ’n’ w’a mantan koko.—Matie 24:14.

Zoova i Lalofuɛ’m bé srɛ́ amun kɛ amun nin be suan Biblu’n nun like. I liɛ’n, anannganman nguan nga be nga Ɲanmiɛn sie be’n bé ɲɛ́n i’n, amún kwlá sí i su ndɛ kpanngban ekun. (Zan 17:3) Ninnge nglanmannglanman kpa o klɔ sran’m be ɲrun lɔ sakpa. Lika’n i kpa yolɛ’n w’a mantan koko kpa! ?Amún trán i sɔ lika’n nun wie?

[Ndɛ kwle, bue 7]

Be nga be kan kɛ ninnge’m bé ká be osu’n nun kɛ laa’n sa’n, b’a mlin mlɔnmlɔn.

[Foto, bue 8]

?Amún trán i sɔ lika’n nun wie?