Maan e wla e wun ase e kan Ɲanmiɛn ndɛ’n e guɛguɛ i bo
“Zezi kaleli ye cinnjin kpa kɛ e kan kle sran’m be kɛ i bɔbɔ yɛ Nyanmiɛn sieli i ɔ.”—SA NGA BE YOLI’N 10:42.
1. ?Kɛ Piɛli kán ndɛ klé Kɔrnɛyi’n, ngaliɛ benin yɛ ɔ kan flannin nun ɔn?
ITALI lɔ sonja ya su kpɛn kun m’ɔ sro Ɲanmiɛn’n, ɔ yiɛli i osufuɛ nin i janvuɛ mun kɛ be wa tie Ɲanmiɛn Ndɛ’n. Be flɛ bian sɔ’n kɛ Kɔrnɛyi. I sɔ’n ti wafa nga Ɲanmiɛn nin sran’m bé wá nánti siɛn’n, i nzɔliɛ. Akoto Piɛli seli sran akpasua sɔ’n be kɛ be kaleli akoto mun kɛ be “kan kle sran’m be kɛ i [Zezi] bɔbɔ yɛ Nyanmiɛn sieli i ɔ.” Piɛli i jasin fɛ’n bolɛ sɔ’n bali nvlɛ kpa. Afin, Ɲanmiɛn fɛli i wawɛ’n mannin be nga be timan Zuifu mun, be yoli be batɛmu yɛ be yoli be nga Zezi nin bé wá dí famiɛn ɲanmiɛn su lɔ’n be nunfuɛ. Nanwlɛ, Ɲanmiɛn Ndɛ’n mɔ Piɛli kannin guɛguɛli i bo’n, ɔ bali nvlɛ kpa!—Sa Nga Be Yoli’n 10:22, 34-48.
2. ?Wafa sɛ yɛ e si kɛ nán akoto 12 be ngunmin yɛ be seli be kɛ be kan Ɲanmiɛn Ndɛ’n niɔn?
2 Sa sɔ’n juli afuɛ nga be flɛ i 36 nun. Afuɛ nɲɔn kwlaa naan y’a ju afuɛ sɔ’n nun’n, sa kun juli Klistfuɛ’m be kpɔfuɛ dan kpa kun su. Ɔ maan, ɔ wa kacili i nzuɛn’n. Sɔlu m’ɔ fin Tarsi’n, ɔ su kɔ Damasi yɛ Zezi fiteli i ɔ. Ɔ seli i kɛ: “Jao wlu klɔ’n nun lɔ, bé wá klé wɔ like nga á wá yó’n.” Zezi seli i sɔnnzɔnfuɛ Ananiasi kɛ Sɔlu wá bó jasin fɛ’n “nvle wie’m be nun famiɛn mun nin Izraɛlfuɛ’m be nyrun.” (An kanngan Sa Nga Be Yoli’n 9:3-6, 13-20 nun.) Kɛ Ananiasi ko toli Sɔlu’n, ɔ seli i kɛ: “E nannan’m be Nyanmiɛn’n ɔ fali wɔ. [...] Afin ndɛ nga a tili’n nin like nga a wunnin i’n, á wá kán klé sran’m be kwlaa.” (Sa Nga Be Yoli’n 22:12-16) ?Wafa sɛ yɛ Sɔlu mɔ i sin’n be wa flɛli i Pɔlu’n, ɔ wlɛli i wun ase kannin Ɲanmiɛn Ndɛ’n kpa ɔ?
Ɔ kannin Ɲanmiɛn Ndɛ’n guɛguɛli i bo!
3. (a) ?Ndɛ cinnjin benin yɛ é wá fá e ɲin síe su ɔ? (b) ?Wafa sɛ yɛ Efɛzi lɔ asɔnun kpɛnngbɛn’m be tɛli Pɔlu i ngaliɛ’n su ɔ? ?Ajalɛ kpa benin yɛ i sɔ’n man e ɔ?
3 Nanwlɛ junman nga i sin Pɔlu dili’n, maan e fa e ɲin e sie i ngbɛsungbɛsu’m be su. Sanngɛ maan e dun mmua fa e ɲin e sie i ndɛ kun mɔ Pɔlu kɛnnin i afuɛ nga be flɛ i 56 nun’n i su. Ndɛ sɔ’n o Sa Nga Be Yoli’n ndɛ tre 20 nun. Kɛ Pɔlu i ajalɛ’n i nsan su ng’ɔ tuli ɔli jasin fɛ’n i bolɛ’n, ɔ́ wá wíe’n yɛ ɔ kannin ndɛ sɔ’n niɔn. Ɔ jrali Mile klɔ’n su lɔ. Klɔ sɔ’n ti mmeli jranwlɛ lika kun. Ɔ o Eze jenvie’n i nuan. Kpɛkun ɔ sunmannin sran Efɛzi lɔ asɔnun kpɛnngbɛn’m be sin. Lɛ’n nin Efɛzi’n, be afiɛn’n ti nun kilo 50. Atin nga be fa kɔ lɔ’n, aunmuan’n fita su kpa. Kɛ Pɔlu i ngaliɛ sɔ’n toli Efɛzi lɔ asɔnun kpɛnngbɛn mun’n, be wun w’a blibliman be aɔwi. (An nian Nyanndra Mun 10:28 nun.) Kannzɛ bɔbɔ be wun bliblili be sɔ’n, sanngɛ ɔ nin i fatali kɛ be siesie be wun naan b’a tu ajalɛ b’a wɔ Mile. ?Ɔ nin i fatali kɛ be nun wie’m be jran be junman’n, annzɛ be ɲin be aata diwlɛ mun? Andɛ’n, afuɛ nuan kun nun’n, be yo nvle kun aɲia’n kpɛ kunngba. Kɛ ɔ ko yo naan Klistfuɛ sunman b’a kwla tran aɲia’n i ngba’n i bo’n ti’n, be fa ajalɛ kunngba sɔ’n wie.
4. ?Kɛ Pɔlu dili afuɛ nɲɔn kun Efɛzi lɔ’n, junman benin yɛ ɔ dili ɔ?
4 Asɔnun kpɛnngbɛn sɔ’m be dili cɛn nsan annzɛ nnan naan b’a ju Pɔlu wun lɔ. ?Sanngɛ ngue yɛ Pɔlu fali blɛ sɔ’n yoli i Mile lɔ ɔ? ?Sɛ ɔ ti e’n, nn ngue yɛ é yó ɔ? (An nian Sa Nga Be Yoli’n 17:16, 17 nun.) Ndɛ nga Pɔlu kan kleli Efɛzi lɔ asɔnun kpɛnngbɛn mun’n, ɔ kwla uka e naan y’a tɛ kosan sɔ’m be su. Ɔ kannin i jasin fɛ’n bolɛ junman ng’ɔ dili i afuɛ nga be sinnin’n nun’n, i ndɛ. Ɔ kannin jasin fɛ’n ng’ɔ dun mma boli i Efɛzi lɔ’n i ndɛ wie. (An kanngan Sa Nga Be Yoli’n 20:18-21 nun.) Pɔlu si kɛ sran fi su kpalomɛn i nuan. Ɔ maan ɔ seli kɛ: “Kɛ ɔ fin cɛn mɔ n juli Azi mɛn’n nun wa’n, [...] n kan kleli Zuif mun nin Grɛk’m be kɛ be yaci nyin kekle yolɛ’n Nyanmiɛn su.” Ɔ wlɛli i wun ase dili junman nga Zezi fa wlɛli i sa nun’n. ?Wafa sɛ yɛ Pɔlu dili junman sɔ’n Efɛzi lɔ ɔ? Ɔ ɔli lika nga ɔ kwla to Zuifu kpanngban’m be lɔ’n, ɔ boli jasin fɛ’n kleli be. Liki klɛli kɛ, kɛ ɔ fɛ i afuɛ nga be flɛ i 52 lele 55 nun’n, i nun mɔ Pɔlu o Efɛzi lɔ’n, ɔ kɔ Ɲanmiɛn ndɛ suanlɛ nin i srɛlɛ sua nun lɔ, ‘ɔ kan ndɛ kle be yasua su. Ɔ tutu i bo weiin kle be naan be wun i wlɛ.’ Sanngɛ kɛ Zuifu’m “be yoli nyin kekle,” mɔ “be faman su’n,” Pɔlu jaoli be wun lɛ ɔli klɔ’n i bue uflɛ su ko boli jasin fɛ’n. Efɛzi klɔ dan sɔ’n su’n, Pɔlu kannin Ɲanmiɛn Ndɛ’n kleli Zuifu nin Glɛki mun.—Sa Nga Be Yoli’n 19:1, 8, 9.
5, 6. ?Ngue ti yɛ e kwla se kɛ jasin fɛ’n nga Pɔlu boli i awloawlo’m be nun’n, ɔ boli kleli be nga be nin a lafiman Klist su’n niɔn?
5 Blɛ sɔ’n nun’n, be nga be wa kacili Klistfuɛ’n, kɛ ɔ́ kɔ́ i ɲrun’n, be wa yoli asɔnun kpɛnngbɛn. Be yɛ Pɔlu kannin ndɛ kleli be Mile lɔ’n niɔn. Pɔlu fali ajalɛ ng’ɔ nantili su’n, ɔ fa kpɛnnin be wla kɛ: “An si kɛ sa kwlaa b’ɔ ko yo amun kpa’n, m’an fiaman wie fi su amun wun. N kɛn i kwlaa kleli amun, n yiyi nun weiin kleli amun nzra nun nin awlo’m be nun.” Andɛ’n, sran wie’m be waan be nga be wa lafili Klist su’n, be lika nianlɛ ngbɛn yɛ Pɔlu kɛn i ndɛ ɔ. Sanngɛ nɛ́n i sɔ ɔ. Afin kɛ be se kɛ ɔ ‘yiyi nun weiin kleli be nzra nun nin awlo’m be nun’n,’ be nga be nin a lafiman Klist su’n, be ndɛ yɛ ɔ kan ɔn. Ndɛ nga Pɔlu kɛnnin i kasiɛn nun’n, ɔ tuli ndɛ sɔ’n i ɲin weiin kpa. Ɔ seli kɛ: “N kan kleli Zuif mun nin Grɛk’m be kɛ be yaci nyin kekle yolɛ’n Nyanmiɛn su naan be nyin yi i yɛ be lafi e Min Jésus su.” Ɔ maan, be nga be nin a lafiman Klist su m’ɔ nin i fata kɛ be yaci ɲin kekle yolɛ Ɲanmiɛn su naan be lafi Zezi su’n, be yɛ Pɔlu kannin Ɲanmiɛn Ndɛ’n kleli be ɔ.—Sa Nga Be Yoli’n 20:20, 21.
6 Fluwa sifuɛ kun suannin Biblu’n i bue nga be klɛli i Glɛki nun’n i su like kpa. Ndɛ ng’ɔ kɛnnin i Sa Nga Be Yoli’n 20:20 i su’n yɛ: “Pɔlu dili afuɛ nsan Efɛzi lɔ. Ɔ boli jasin fɛ’n awloawlo’m be nun. Annzɛ sɛ é kwlá sé’n, ɔ boli jasin fɛ’n kleli sran kwlaa (ndɛ mma 26). Ɔ maan, awloawlo’m be nun jasin fɛ’n bolɛ nin asɔnun aɲia’m be yolɛ’n, ɔ taka Biblu’n nun ndɛ mma ngalɛ’n su.” Kɛ nga fluwa sifuɛ sɔ’n fa kannin sa’n, kannzɛ bɔbɔ Pɔlu boli jasin fɛ’n awloawlo’m be nun annzɛ w’a yoman sɔ’n, sanngɛ Pɔlu seli Efɛzi lɔ asɔnun kpɛnngbɛn’m be kɛ nán be wla fi wafa ng’ɔ wlɛli i wun ase boli jasin fɛ’n nin i agualiɛ’n be su. Liki klɛli i kɛ: “Sran nga be tran Azi lɔ’m be kwlaa, sɛ be ti Zuif annzɛ Grɛk o, be tili e Min’n i ndɛ’n.” (Sa Nga Be Yoli’n 19:10) ?Sanngɛ wafa sɛ yɛ “be kwlaa” nga be tran Azi lɔ’n be tili jasin fɛ’n niɔn? ?Yɛ ajalɛ benin yɛ i sɔ’n kwla man e jasin fɛ’n bolɛ’n nun ɔn?
7. ?Be nga Pɔlu kannin Ɲanmiɛn Ndɛ’n kleli be trele’n, i bo’n guali sɛ mannin be?
7 Jasin fɛ’n mɔ Pɔlu boli i nzra nun nin awloawlo’m be nun’n ti’n, sran sunman be kwla tili Ɲanmiɛn Ndɛ’n. ?E bu i kɛ be kwlaa nga be tili jasin fɛ’n Efɛzi lɔ’n be kali lɛ? ?B’a tuman ajalɛ b’a ɔman lika uflɛ aata dilɛ annzɛ be osufuɛ’m be sin annzɛ lika wie mɔ be wla kwla gua ase lɔ’n? Cɛcɛ. Andɛ sa kunngba sɔ’m be ti’n, sran kpanngban be tu ajalɛ. Atrɛkpa’n, e bɔbɔ y’a yo sɔ wie le. Laa blɛ sɔ’n nun kusu’n, aata dilɛ annzɛ like uflɛ wie’m be ti’n, sran’m be fin likalika’m be nun be ba Efɛzi. Atrɛkpa’n, be nin Pɔlu be yiali annzɛ be tili jasin fɛ’n ng’ɔ boli’n. ?Kɛ ɔ yo sɔ mɔ bé sá be sin be awlo’n, bé yó sɛ? Be nga be sɔli ndɛ nanwlɛ’n nun’n, bé kán kle be wiengu mun. Wie’m be liɛ kusu b’a sɔman nun. Sanngɛ atrɛkpa’n, ndɛ nga be tili i Efɛzi lɔ’n be wa kɛnnin i ndɛ. Ɔ maan, be osufuɛ o, be tranfuɛ o, annzɛ be nga be bali like tolɛ be sa nun mun o, be tili ndɛ nanwlɛ’n. Kɛ ɔ yoli sɔ’n, atrɛkpa’n be wie’m be sɔli nun klanman. (An nian Mark 5:14 nun.) ?Jasin fɛ’n nga e wla e wun ase e bo’n, wafa nga i bo’n kwla gua’n, i su like benin yɛ i kwlaa sɔ’n kle e ɔ?
8. ?Wafa sɛ yɛ be nga be o Azi mɛn’n nun’n, be kwla tili ndɛ nanwlɛ’n niɔn?
8 Kɛ Pɔlu kán Ɲanmiɛn junman ng’ɔ dun mmua dili i Efɛzi lɔ’n i ndɛ’n, ɔ klɛli i kɛ ‘b’a mɛn i atin dan, ɔ maan ɔ kwla di junman kpa.’ (1 Korɛntfuɛ Mun 16:8, 9) ?Atin benin yɛ Pɔlu kɛn i ndɛ ɔ? ?Yɛ wafa sɛ yɛ be mɛnnin i atin sɔ’n niɔn? Jasin fɛ’n nga Pɔlu boli i Efɛzi lɔ titi’n ti’n, Ɲanmiɛn ndɛ’n truli. Maan e kan Kolɔsu nin Laodise nin Zerapolisi mɔ be ti Efɛzi lɔ akpasua’n su klɔ nsan’n, be ndɛ e nian. Pɔlu i ja nin a tiaman klɔ sɔ’m be su le, sanngɛ be tili jasin fɛ’n. Epafrasi ti akpasua sɔ’n i nunfuɛ. (Kolɔsfuɛ Mun 2:1; 4:12, 13) ?Pɔlu yɛ ɔ boli jasin fɛ’n kleli Epafrasi Efɛzi lɔ yɛ maan ɔ kacili Klistfuɛ ɔ? Biblu’n kɛnmɛn i weiin sa. Sanngɛ kɛ Epafrasi bó jasin fɛ’n, i akpasua’n su lɔ’n, atrɛkpa’n Pɔlu yɛ ɔ sunmɛnnin i ɔ. (Kolɔsfuɛ Mun 1:7) Atrɛkpa kusu’n, i nun mɔ Pɔlu o Efɛzi lɔ’n, yɛ klɔ kɛ Filadɛlfi nin Sardi, ɔ nin Tiatir sa be tili jasin fɛ’n niɔn.
9. (a) ?Ngue like yɛ ɔ yoli Pɔlu i cinnjin ɔn? (b) ?Afuɛ 2009 nun Biblu’n nun ndɛ mma liɛ’n yɛle benin?
9 I sɔ’n ti’n, ɔ nin i fata kpa kɛ Efɛzi lɔ asɔnun kpɛnngbɛn’m be fa Pɔlu i ndɛ nga su. Ɔ seli kɛ: “M buman min wun like fi, n yo sɔ naan m’an wanndi a ju n juwlɛ, naan m’an wie junman nga e Min Jésus fa wlali n sa nun kɛ n yo’n i yo [n kan Ɲanmiɛn Ndɛ’n n guɛguɛ i bo]. Junman sɔ’n yɛle kɛ n kan ye dan nga Nyanmiɛn yoli ye’n i ndɛ.” Ndɛ sɔ’n nun yɛ afuɛ nga be flɛ i 2009 nun Biblu’n nun ndɛ mma’n fin ɔn. Ɔ ti ndɛ m’ɔ wla e fanngan dan ɔn. Ndɛ sɔ’n yɛ: “Maan e kan Ɲanmiɛn Ndɛ’n e guɛguɛ i bo.”—Sa Nga Be Yoli’n 20:24, NW.
Maan e kan Ɲanmiɛn Ndɛ’n e guɛguɛ i bo andɛ
10. ?Wafa sɛ yɛ e kwla wun kɛ e kusu ɔ fata kɛ e kan Ɲanmiɛn Ndɛ’n e guɛguɛ i bo ɔ?
10 Nán akoto’m be ngunmin yɛ be seli be kɛ be “kan kle sran’m be kɛ i [Zezi] bɔbɔ yɛ Nyanmiɛn sieli i ɔ.” Kɛ Zezi cɛnnin’n, ɔ kannin ndɛ kleli i sɔnnzɔnfuɛ nga be yiali Galile lɔ’n. Ɔ kaleli be nun kɔe 500 kɛ: “An wɔ ko kle nvlenvle’n kwlaa be like maan be kaci n sɔnnzɔnfuɛ, yɛ an yo be batɛm e Si Nyanmiɛn, nin i Wa’n, ɔ nin i wawɛ’n be dunman nun. Yɛ like kwlaa nga n kleli amun’n, amun kusu an kle be maan be fa su.” Kɛ nga Zezi fa kannin’n sa’n, ndɛ kunngba’n ti andɛ Klistfuɛ kpa kwlaa’m be liɛ. Afin i waan: “An nian, min nin amun e o cɛn kwlaa lele mɛn’n fá wíe.”—Matie 28:19, 20.
11. ?Junman cinnjin benin yɛ be fa sie Zoova i Lalofuɛ’m be nzɔliɛ ɔ?
11 Andɛ kusu Klistfuɛ juejuefuɛ’m be te wla be wun ase be “kan Ɲanmiɛn Ndɛ’n be guɛguɛ i bo.” I sɔ yolɛ’n i ajalɛ cinnjin kun yɛle ndɛ nga Pɔlu kan kleli Efɛzi lɔ asɔnun kpɛnngbɛn mun’n. Ɔ seli be kɛ be bo jasin fɛ’n awloawlo’m be nun. Afuɛ nga be flɛ i 2007 nun’n, fluwa kun kannin ngaliɛ difuɛ’m be junman kpa’n i ndɛ. Fluwa sɔ’n nun’n, bian kun seli kɛ: “Wafa nga Zoova i Lalofuɛ’m be bo jasin fɛ’n be kle sran’m be tinuntinun’n, ɔ bali nvlɛ trali ndɛ ngbɛn nga be kɛn i be nuan nun’n. Zoova i Lalofuɛ sunman be liɛ’n, jasin fɛ’n nga be bo kle sran’m be tinuntinun’n, yɛ ɔ ti junman nga be klo i kpa’n niɔn.” ?Junman sɔ’n i bo’n gua sɛ? Bian kunngba’n waan: “Afuɛ nga be flɛ i 1999 nun’n, n usausali blɔfuɛ’m be mɛn’n i wia afiliɛ lɔ nvle nɲɔn nun sran’m be kosan. Sɛ e fa sran ya’n, be nun sran 2 annzɛ 4 cɛ yɛ be waan Ɲanmiɛn sulɛ wafa nga be flɛ i Les Saints des Derniers Jours annzɛ ‘ Mormon ’ be ngaliɛ difuɛ’m be nin be kokoli yalɛ ɔ. Sanngɛ sɛ e fa sran ya’n, be nun 70 be waan Zoova i Lalofuɛ’m b’a bo jasin fɛ’n b’a kle be kpɛ sunman le.”—David G. Stewart, Jr.
12. (a) ?Ngue ti yɛ e jasin fɛ’n bowlɛ lika’n nun lɔ’n, e ko bo jasin fɛ’n “kpɛ sunman” awlo’m be nun ɔn? (b) ?An kwla kan sran kun mɔ an boli jasin fɛ’n kleli i lele mɔ i sin’n, ɔ wa kacili’n i ndɛ?
12 Atrɛkpa’n, e jasin fɛ’n bowlɛ lika’n nun lɔ’n, Zoova i Lalofuɛ’m b’a bo jasin fɛ’n b’a kle sran sunman. Junman sɔ’n, atrɛkpa’n e sa o nun wie. Kɛ awloawlo’m be nun é bó jasin fɛ’n é klé “sran’m be tinuntinun,” i yasua o, i bla o, i gbanflɛn nin talua mun o, e kannin Ɲanmiɛn Ndɛ’n e kleli be kwlaa. E ɔli be nun wie’m be wun “kpɛ sunman,” sanngɛ b’a faman be su b’a siemɛn i e ndɛ’n i bo. Be nun wie’m be kusu kɛ é kánngan Biblu’n nun ndɛ mma wie annzɛ é kókó Ɲanmiɛn ndɛ’n wie su yalɛ’n, be fali be su sieli i bo kpe kan. Be nun wie’m be kusu Ɲanmiɛn Ndɛ nga e ɲannin e ti e yiyili nun kpa kleli be’n, ɔ yoli be fɛ. Ɔ maan be sɔli nun klanman. Kɛ é ‘kán Ɲanmiɛn Ndɛ’n e guɛguɛ i bo’n,’ i kwlaa ngalɛ’n kwla ju. E si kɛ sran nga e boli jasin fɛ’n e kleli be “kpɛ sunman” mɔ i sin be wa sɔli nun klanman’n, be diman be yalɛ. Atrɛkpa’n, sa wie m’ɔ ɲannin sran sɔ mun, annzɛ be awlɛn su sran wie ti’n, be wa sɔli ndɛ nanwlɛ’n nun klanman. Ɔ maan siɛn’n, b’a kaci Klistfuɛ kɛ e sa. I sɔ’n ti’n, sɛ bɔbɔ be nga e bo jasin fɛ’n e kle be le nɲɔn’n nun’n, be sɔman nun klanman’n, nán maan e sa sin bubu e. Nán e bu i kɛ sran’m be kwlaa bé wá káci Klistfuɛ. Like nga Ɲanmiɛn kunndɛ i e lika’n, yɛle kɛ e mian e ɲin, yɛ juejue su e kan Ɲanmiɛn Ndɛ’n e guɛguɛ i bo titi.
Jasin fɛ’n bolɛ’n i agualiɛ nga e simɛn i’n
13. ?Wafa sɛ yɛ jasin fɛ’n nga e bo’n, e kwlá simɛn i agualiɛ’n i ngba ɔ?
13 Nán be nga Pɔlu boli jasin fɛ’n kleli be mɔ be kacili Klistfuɛ’n be ngunmin yɛ i jasin fɛ’n ukali be ɔ. Kɛ e liɛ’n ti sɔ wie ɔ. E mian e ɲin titi naan y’a bo awloawlo’m be nun jasin fɛ’n, y’a kle sran nga e to be’n. E bo jasin fɛ’n e kle e mantanfuɛ mun, ɔ nin e wiengu junman difuɛ, ɔ nin e wiengu suklu ba mun, ɔ nin e osufuɛ mun. ?Be kwlaa nga e bo jasin fɛ’n e kle be sɔ’n, e si i agualiɛ’n i ngba? Sran wie’m be liɛ’n, jasin fɛ’n ka lɛ ba nvlɛ be lika. Sran wie’m be liɛ kusu’n, jasin fɛ’n nga e bo kle be’n, ɔ kaman lɛ baman nvlɛ. Sanngɛ i sin’n, sɛ é kwlá sé’n, ɔ tra ndin be awlɛn’n nun, ɔ maan ɔ ba nvlɛ. Kannzɛ bɔbɔ e jasin fɛ’n bolɛ’n, i bo’n guaman kɛ ngalɛ’n sa’n, sanngɛ be nga e bo jasin fɛ’n e kle be’n, be kwla kan kle sran uflɛ. Be kwla kan like nga e lafi su’n, ɔ nin i nuan su sa nga e yo’n i ndɛ. Sɛ jasin fɛ’n nga e bo’n ti like wie m’ɔ le mma’n, e kwla se kɛ, kɛ bé yó sɔ’n nn ɔ ti kɛ be su lua like mma sɔ’n sa. Nja, sɛ ɔ kwla tɔ asiɛ kpa wie su o.
14, 15. ?Jasin fɛ’n mɔ aniaan kun boli’n, i bo’n guali sɛ?
14 Maan e fa Ryan nin i yi Mandi mɔ be tran Floridi Amlɛnkɛn’m be mɛn’n nun lɔ’n, be su sunnzun ase e nian. Ryan i junman su lɔ’n, ɔ boli jasin fɛ’n kleli i wiengu junman difuɛ kun. Bian sɔ’n ti Ɛndifuɛ, sanngɛ Ryan i wun wlawlalɛ’n nin i ijɔlɛ wafa’n be yoli i ɲɛnmɛn. Be yalɛ kokolɛ’n nun’n, Ryan kannin sran cɛnlɛ nin be nga be wuli’n be ndɛ. Zanvie anglo’n nun’n, cɛn kun nnɔsua nun’n, bian’n usali i yi Jodi kɛ ngue yɛ ɔ si i Zoova i Lalofuɛ’m be su ɔ. Bla sɔ’n ti Katoliki. Bla’n seli kɛ like kunngba ng’ɔ si i Zoova i Lalofuɛ’m be su’n yɛle kɛ be “bo jasin fɛ’n awloawlo’m be nun.” Ɔ maan, Jodi ko niannin “Zoova i Lalofuɛ’m” be ɛntɛnɛti adrɛsi www.watchtower.org su. Ɔ ko kunndɛli be su like. Jodi fali anglo kɔe nsan kanngannin be su ndɛ kwlaa ng’ɔ wunnin i lɔ’n nun. Ɔ kanngannin Biblu’n nin ndɛ wie mɔ be ti i cinnjin’n be nun.
15 I sin’n, Jodi nin Mandi be wunnin be wun afin be nɲɔn’n be ti dɔɔtrɔ bla. Aklunjuɛ su yɛ Mandi tɛli Jodi i kosan’m be su ɔ. Kɛ be kokoli yalɛ lele’n, Jodi seli kɛ be yalɛ kokolɛ’n fɛli i Adam su lele fa juli Armagedɔn su. Jodi kplinnin su kɛ be nin i suan Biblu’n nun like i awlo lɔ. I osu w’a cɛman yɛ ɔ boli aɲia’m be bo kɔlɛ bo, Ɲanmiɛn Sielɛ Blɛ Sua nun lɔ ɔ. Ɔktɔblu anglo’n nun’n, Jodi wa yoli jasin bofuɛ nga be nin a yomɛn i batɛmu’n, kpɛkun Fevrie anglo’n nun’n, be wa yoli i batɛmu. Ndɛ ng’ɔ klɛli’n yɛ: “Siɛn’n mɔ n si ndɛ nanwlɛ’n, n di aklunjuɛ yɛ min mɛn dilɛ’n le bo.”
16. ?Jasin fɛ’n mɔ be wla be wun ase be bo nun’n, ngue like yɛ aniaan ng’ɔ o Floridi lɔ’n, i ndɛ’n kle e ɔ?
16 Ryan w’a lafiman su kɛ jasin fɛ’n ng’ɔ bo kleli bian kun’n, ɔ́ wá úka sran uflɛ naan w’a sɔ ndɛ nanwlɛ’n nun. Sanngɛ i wun m’ɔ wlɛli i ase ‘kannin Ɲanmiɛn Ndɛ’n guɛguɛli i bo’n,’ ɔ wunnin i bo’n m’ɔ guali kpa’n. Sanngɛ e liɛ’n, jasin fɛ’n nga e bo’n, maan ɔ yo awlo’m be nun o, annzɛ junman su lɔ o, annzɛ suklu lɔ o, annzɛ jasin fɛ’n bolɛ nga asɔnun’n w’a siesieman’n nin o, atrɛkpa’n e su wunman wafa nga i bo’n gúa’n. Sanngɛ i sɔ’n kwla yo maan sran wie’m be suan ndɛ nanwlɛ’n. Jasin fɛ’n nga Pɔlu bɔbɔ boli i “Azi mɛn’n” nun’n, w’a kwlá simɛn i agualiɛ’n i ngba’n. E kusu, jasin fɛ’n nga e wla e wun ase e bo’n, e kwlá simɛn i agualiɛ’n ngba’n. (An kanngan Sa Nga Be Yoli’n 23:11; 28:23 nun.) Sanngɛ ɔ ti cinnjin kɛ e bo jasin fɛ’n sɔ’n titi!
17. ?Ngue yɛ e ta nda kɛ é yó i afuɛ nga be flɛ i 2009 nun ɔn?
17 Afuɛ nga be flɛ i 2009 nun’n, e ngba é wlá e wun ase kpa é bó jasin fɛ’n awloawlo’m be nun, ɔ nin wafa wie mun ekun. I liɛ’n é kwlá kán ndɛ kunngba nga Pɔlu kannin’n wie. I waan: “Sanngɛ m buman min wun like fi, n yo sɔ naan m’an wanndi a ju n juwlɛ, naan m’an wie junman nga e Min Jésus fa wlali n sa nun kɛ n yo’n i yo [n kan Ɲanmiɛn Ndɛ’n n guɛguɛ i bo]. Junman sɔ’n yɛle kɛ n kan ye dan nga Nyanmiɛn yoli ye’n i ndɛ.”
?Amún tɛ́ su sɛ?
• ?Wafa sɛ yɛ Klistfuɛ klikli’m be blɛ su’n, akoto Piɛli nin Pɔlu nin be nga’m be kannin Ɲanmiɛn Ndɛ’n be guɛguɛli i bo ɔ?
• ?Ngue ti yɛ jasin fɛ’n nga e bo’n, i agualiɛ’n ɔ tra nga e sunnzunman’n niɔn?
• ?Afuɛ 2009 nun Biblu’n nun ndɛ mma liɛ’n yɛle benin? ?Yɛ ngue ti yɛ e tinuntinun e bu i kɛ ɔ nin i fata ɔ?
[Ndɛ kwle, bue 27]
Afuɛ 2009 nun Biblu’n nun ndɛ mma’n yɛle: “Maan e kan Ɲanmiɛn Ndɛ’n e guɛguɛ i bo.”—Sa Nga Be Yoli’n 20:24, NW.